ကစ္စာယနသာရပါဠိ
သာမညနိဒ္ဒေသ
၁။ မုနိန္ဒက္ကော တမံ မောဟံ၊ ဟိတွာ ဗာဓေသိ ပင်္ကဇံ။
ဇနံ သဒ္ဓမ္မရံသီဟိ၊ သော မံ သမ္ပာလေတု ဇိနော။
၂။ မာဂဓိကာယ ဗာလာနံ၊ ဗုဒ္ဓိယာ ဗုဒ္ဓသာသနေ။
ဝက္ခံ ကစ္စာယနသာရံ၊ နိဿာယ ဇင်္ဃဒါသကံ။
၃။ ကတ္တာဒေါ ယတ္ထ အာချာတံ၊ ကိတ်သမာသဿု တဒ္ဓိတံ။
သ ဝုတ္တော တတ္ထ ပဌမာ၊ အတ္ထမတ္တဝိဝစ္ဆယာ။
၄။ ကတ္တုကမ္မနိ အာချာတံ၊ တဒ္ဓိတံ ဝဓိဝဇ္ဇိတေ။
သာမိဝဇ္ဇေ ကိတ်သမာသော၊ ခိလေ ဇာတိ ဝိသေသကေ။
၅။ ကိတာဒီ ဝါစကာ နာမ၊ ဂေါဏာ တေ စ ဝိသေသနာ။
ဝုတ္တဿာဒိ ပရံ သင်္ချံ၊ သေသာ လိင်္ဂါဒိဂါဟိနော။
(ကစ္စာယန၊၂။)၆။ နာမာနဉ္စေ စယေ ဝါကျံ၊ ဂေါဏသင်္ချာ စယင်္ဂသာ။
၇။ ပကတိ ဝိကတိ စာပိ၊ ယတြ ဝုတ္တံ ဒွယမ္ပိ စ။
ဝါစကော ပကတိသင်္ချံ၊ ဂဏှာတိဿာ ပဓာနတော။
၈။ ဘေဒေါ ဝိသေသနံ ဘေဒျံ၊ ဝိသေသျံ တံ ဒွယံ ယဒိ။
တုလျတ္ထံ ဘေဒကံ ဘိယျော၊ ဘေဒျလိင်္ဂါဒိဂါဟကံ။
၉။ သာဓမ္မသာဓနံ သိဒ္ဓ - မသိဒ္ဓဿော ပမာနကံ။
ဥပမေယျ မသိဒ္ဓံ တံ၊ ဒွယမေကဝိဘတ္တိကံ။
၁၀။ ပယုတ္တေ ဂမျမာနေ ဝါ၊ ဝုတ္တေ တုမှမှိ မဇ္ဈိမော။
တထုတ္တမော ဘဝေမှမှိ၊ သေသမှိ ပဌမော ဘဝေ။
(ကစ္စာယန၊၃။)၁၁။ ဧကကာလာဘိဓာနမှိ၊ ဝုတ္တေသု နာမအာဒိသု။
ပရောဝ ပုရိသော ဟောတိ၊ ဓာတုတော ပဌမာဒိသု။
၁၂။ ဈတ္ထနိဒ္ဒိဋ္ဌေ တုမှမှေ၊ န သကာ ပုရိသာ သိယုံ။
ဥပါယောပါဒိယ ဟေယျော၊ ဥပေယျံ တေန သာဓိယံ။
၁၃။ ဂတိဗုဒ္ဓျာသနသဒ္ဒါ - ကမ္မကာနဉ္စ ကာရိတေ။
ဘဇ္ဇာဒီနဉ္စ ယော ကတ္တာ၊ ကမ္မသညော သဓာတူနံ။
၁၄။ နီခါဒါဝှါဒသဒ္ဒါယ၊ ကန္ဒာနံ သမ္ဘဝေ န သာ။
ဝဟာနိယန္တု ဟေတုမှိ၊ ဘက္ခိဿာဟိံသနေပိ စ။
၁၅။ ပဓာနံ နီဝဟာဒီနံ၊ အပ္ပဓာနံ ဒုဟာဒီနံ။
ကာရိတာနံ သကံ ကမ္မံ၊ ဝါစ္စံ ကတ္တာ ပယောဇကော။
(ကစ္စာယန၊၄။)၁၆။ အဘာဝါ အဘိဓေယျဿ၊ အညထာ ပျာဟ ကမ္မဇော။
ကာလဒ္ဓဘာဝဒေသေ တု၊ နာဘိဓာ တျညသမ္ဘဝေ။
၁၇။ ကာလဒ္ဓဘာဝဒေသာနံ၊ ကမ္မတာကမ္မကေဟိ ဝေ။
အန္တဘူတာ ကြိယညေဟိ၊ ယောဂေ သမ္ဘောတိ ဓာတူဟိ။
၁၈။ ကိတာချာတဝိသေသေဟိ၊ ယံ ဝုတ္တံ တံ ပကာသတိ။
ဝိသေသနာနုတ္တမပိ၊ ဝုတ္တံ ဝါဒဗ္ဗဘေဒတော။
၁၉။ ဝုတ္တံပိ ဝုတ္တတံ ယာတိ၊ ပဒန္တရေဟျနုတ္တတံ။
ကွစာနုတ္တံ ပနာနုတ္တံ၊ ဝုတ္တဉ္စာပိ ပဒန္တရေ။
(ကစ္စာယန၊၅။)အာချာတနိဒ္ဒေသ
၂၀။ ပရဿ ကတ္တရိယေဝ၊ အတ္တနော ပန တီသုပိ။
ဝိကရဏာ တု သဗ္ဗေပိ၊ ကတွတ္ထေ သဗ္ဗဓာတုကေ။
၂၁။ အသဗ္ဗဓာတုကေပျေသု၊ ကိဉ္စိ ဣစ္ဆန္တိ ပစ္စယံ။
ပစ္စုပ္ပန္နာဒိကာလေသု၊ ဝတ္တမာနာဒယော ကမာ။
၂၂။ အာရဒ္ဓါ နိဋ္ဌိတော ဘာဝေါ၊ ပစ္စုပ္ပန္နော သုနိဋ္ဌိတော။
အတီတာနာဂတုပ္ပါဒ - မပ္ပတ္တာဘိမုခါ ကြိယာ။
၂၃။ ကတဿာသရဏေ ကတ္တု၊ အစ္စန္တစ္ဆာဒနေပိ စ။
ဒိဋ္ဌာဒီနမဘာဝေ စ၊ တီသု ဉေယျာ ပရောက္ခတာ။
၂၄။ အတီတရတ္တိယာ ယာမော၊ ပစ္ဆိမောဍ္ဎ မမုဿဝါ။
ဘာဝိနိယာ ဒိပ္ပဟာရော၊ တဒဍ္ဎံ ဝါဇ္ဇတေဟျဟော။
၂၅။ ဝိရုဒ္ဓဟေတုယောဂါ ဝါ၊ ဟေတုဝေကလ္လတောပိ ဝါ။
ကြိယာန မဘာဝေါဝ၊ ကြိယာတိပန္နမီရိတံ။
(ကစ္စာယန၊၆။)၂၆။ တဉ္စ ဒွိဓာ ဘူတံ ဘာဝီ - ဘူတံ သမ္ပုဏ္ဏကာရဏာ။
ဘာဝီဘာဝါတိပန္နန္တု၊ ကုတောစိ လိင်္ဂဒဿနာ။
၂၇။ ကာလဘေဒ မနိဿာယ၊ ပဉ္စမီ သတ္တမီ သိယုံ။
ပတ္ထနာ ဝိဓိ သံပုစ္ဆာ၊ ဝိသယာ ပရိကိတ္တိတာ။
၂၈။ ပတ္ထနာသီသနံ တေသု၊ နိယောဂေါ ဝိဓိ သော ဒွိဓာ။
သာဒရာနာဒရာ ပုစ္ဆာ၊ ကိမေဝံ သမ္ပဓာရဏံ။
၂၉။ ကြိယာကာလဝိဝစ္ဆာယံ၊ ဝတ္တမာနာဒယော ခိလာ။
ယထာသကာလမုပ္ပန္နာ၊ သဒ္ဒန္တရသမာဂမာ။
၃၀။ ပစ္ဆာ ကာလန္တရံ ဗြူတေ၊ ပဒသင်္ခါရကာလတော။
ပုရာ ဒိဗ္ဗတျသဒ္ဓမ္မော၊ ဣတျာဒိကမိဒံ မတံ။
၃၁။ ပဒန္တရေန ယော ဉာတော၊ န သောတ္ထော ဗာဓကော ဘဝေ။
ပဒသင်္ခါရဘာဝိဿ၊ အတ္ထဿ ဗာဟိရင်္ဂတော။
၃၂။ ယထာဝိဝစ္ဆမေဝါယံ၊ သဗ္ဗာ သဒ္ဒတ္ထသဏ္ဌိတိ။
သိဒ္ဓလက္ချာနုသာရေန၊ ဝိဝစ္ဆာပျနုဂမျတေ။
(ကစ္စာယန၊၇။)ကိတနိဒ္ဒေသ
၃၃။ ဘာဝေ ကမ္မနိ ကိစ္စာဟု၊ ခတ္ထာပိ ပစ္စယာ တထာ။
အညတ္ထာပိ ကွစိ ကိစ္စာ၊ ယုတု သဗ္ဗမှိ သာဓနေ။
၃၄။ သဒ္ဒတ္ထရုစတာဒီဟိ၊ သီလာဒီသွပိ ကတ္တရိ။
ဏီ တု အာဝီ စ သဗ္ဗေဟိ၊ သီလာဒီသွပိ ကတ္တရိ။
၃၅။ ဘာဝေ ကမ္မနိ ဘူတေတော၊ ဌာသာဝသာ ရုဟာဇရာ။
သိဇနီသိလသာရမ္ဘာ၊ ကတ္တရိ စ အကမ္မကာ။
(ကစ္စာယန၊၈။)၃၆။ ဂမနတ္ထာ တထာ ဓာရေ၊ အာဟာရတ္ထာ စ ဓာတုတော။
ဘာဝမတ္တေ တု ဓာတုမှာ၊ အဝိဝစ္ဆိတကမ္မကာ။
၃၇။ တဝန္တု ဏွုတု အာဝီတု၊ သဗ္ဗသ္မာ အပိ ကတ္တရိ။
ပါယသော ဏာဒယော ဘာဝေ၊ ကေစိ တေသွပိ ကာရကေ။
၃၈။ ကိတဘာဝေါ ဒဗ္ဗမိဝ၊ တေန ကမ္မာဒယော အပိ။
ပါယော သတျပိ ကမ္မသ္မိံ၊ ဘာဝတ္ထဝိဟိတာ ကိတာ။
၃၉။ ကြိယာနမေကကတ္တူနံ၊ ဘာဝေ တွာဒီ ပုရာ ကြိယာ။
တုံ တု ဘာဝေ တဒတ္ထာ စေ၊ ဣစ္ဆတ္ထာဒိ ကြိယာပိ စ။
၄၀။ ပစ္စယတ္ထောပိ ဘာဝေါယံ၊ ဝိနာတေနာပ္ပသိဒ္ဓိတော။
ဓာတုရတ္ထောပိ သေသေဝံ၊ စယတ္ထော တေန သဗ္ဗကော။
(ကစ္စာယန၊၉။)၄၁။ သင်္ကေတကာလမေဝါယံ၊ ဝိဘာဂေါ သမ္ပဝတ္တတေ။
အတ္ထောယံ ပကတိယေသော၊ ပစ္စယတ္ထော ဣတီဒိသော။
၄၂။ သိဒ္ဓသဒ္ဒါနုဝါဒေါယံ၊ မတော ဧဝ န သိဇ္ဈတေ။
ဣတရေတရတော သိဒ္ဓိ၊ လက္ချလက္ခဏိကာ ကွစိ။
၄၃။ အနာဒိရယမာလောကော၊ သဒ္ဒချော ယဿ နပ္ဖုဋော။
ဗျဉ္ဇျတေ တဿ သတ္ထေန၊ ဒီပေါဝ ဂတိယာဝုတော။
၄၄။ မာနန္တာ ဝတ္တမာနေ စ၊ လက္ခဏေ ဟေတုကေ သိယုံ။
ကိတာ ဓာတွတ္ထသမ္ဗန္ဓေ၊ ဟောန္တိ ကာလန္တရေသွပိ။
၄၅။ ကိတကာဘိဓေယျလိင်္ဂါ၊ ဣယုဝဏ္ဏာဝရာဒိဇော။
အပ္ပစ္စယော ဏော ဒုတိယော၊ ဣပစ္စယော ပုမေ သိယုံ။
၄၆။ ယုစာကတ္တရိ ဘာဝသ္မိံ၊ ကိစ္စာ တော စ နပုံသကေ။
တဝါဒိက္ခတ္တု မန္တာ တု၊ အဗျယနာမကာ သိယုံ။
(ကစ္စာယန၊၁၀။)ကာရကနိဒ္ဒေသ
၄၇။ ယတြတ္ထေ နော ဝိဓိယန္တေ၊ တျာဒိပ္ပဘုတယော စ တေ။
သော နုတ္တော တတြ ကမ္မာဒေါ၊ ဒုတိယာဒီ ယထာရဟံ။
၄၈။ ကြိယပ္ပေ ဒုတိယာ ကမ္မေ၊ ဃနယောဂေ ခဏဒ္ဓနိ။
ကမ္မပ္ပဝစနီယေန၊ တွန္တေဟိ စုဘယာဒိဘိ။
၄၉။ သတန္တ သာဓကတမာ၊ ကတ္တုကရဏကာရကာ။
တတိယာ တေသု ဟေတွတ္ထေ၊ သတ္တမျာလက္ခဏေပိ စ။
ဝိသေသနေ သဟတ္ထေ စ၊ ယောဂေ ပုဗ္ဗာဒိနာပိ စ။
၅၀။ ပူဇာနုဂ္ဂကာမေန၊ ယဿ သံ ဒီယတေ ဓနံ။
လဒ္ဓသာမိတ္တကံ တံ ဟိ၊ သမ္ပဒါနန္တိ ကိတ္တိတံ။
စတုတ္ထီ သမ္ပဒါနေ စ၊ ယုတ္တေ နမောတိ အာဒိနာ။
(ကစ္စာယန၊၁၁။)၅၁။ ကြိယာဝဓိရပါဒါနံ၊ တသ္မိံ စ ပဉ္စမီ သိယာ။
ကတ္တုကမ္မာနမာဓာရော၊ နိဿယာနံ ကြိယာယ ယော။
၅၂။ သြကာသော သတ္တမီ တမှိ၊ ကြိယာလက္ချကြိယာယ ဝါ။
ဣပ္ပကတိတကမ္မေ စ၊ ကမ္မေ ဂဟာဒိနံပိ စ။
၅၃။ ကာလေ နိမိတ္တေ ကာရဏေ၊ ပိဏ္ဍစရာဒိဓာတူနံ။
အဓိနာ သတ္တမီ သာမျေ၊ ဥပေနာဓိကိနာပိသာ။
၅၄။ ဝိသေသနဝိသေသျာနံ၊ အညမညမပေက္ခတာ။
သမ္ဗန္ဓော စ တသ္မိံ ဆဋ္ဌီ၊ ကိတျောဂေ ကမ္မကတ္တရိ။
၅၅။ န ကတ္တရိ ဒွယေ ပတ္တေ၊ ဏွု ယု တီနံ တု ဝါ ဘဝေ။
ထီ အဏွူနံ ဒွယေ ကိစ္စေ၊ နေဝ ကတ္တရိ ဧဝ ဝါ။
နိဋ္ဌာဒီနံ န ဟောတျေဝ၊ ဘာဝေ ဝါ တဿ ကတ္တရိ။
(ကစ္စာယန၊၁၂။)၅၆။ ဒိသိနော အန္တိနော ကမ္မေ၊ ကရိနော ယတနေပိ စ။
ဟရတိဿာနုကာရေပိ၊ သတိ ဟိံသတ္ထဓာတူနံ။
၅၇။ ဒယတိဿိစ္ဆတိဿာပိ၊ တိတျတ္ထေ ကရဏေပိ စ။
အာဓာရကေ ဘဝေ နိစ္စံ၊ ကမ္မကတ္တရိ တဿ တု။
၅၈။ သတ္တမီ နာဒရေ သာမိ၊ အပိ နိဒ္ဓါရဏေ တထာ။
တတိယာ ပဉ္စမီ စေဝ၊ ပုထုနာနာပယောဂတော။
၅၉။ ရိတေ တု ဒုတိယာ သာပိ၊ ဝိနာညတြေဟိ တာပိ စ။
ဆဋ္ဌီ ဟေတုပယောဂေ တု၊ ဟေတွတ္ထေ သုဒ္ဓနာမတော။
၆၀။ သဗ္ဗနာမ တု သဗ္ဗာဝ၊ ကြိယာနိပ္ဖတ္တိကာရဏာ။
ဂေါဏမုချပ္ပဘေဒေန၊ ကမ္မာဒိကာရကာ သိယုံ။
(ကစ္စာယန၊၁၃။)သမာသနိဒ္ဒေသ
၆၁။ ဝိသေသနဝိသေသျာနံ၊ အဘိန္နတ္ထတ္တမီရိတံ။
သမာသော နာမ တာဒိမှိ၊ တဒ္ဓိတောပိ ဝိဓီယတေ။
၆၂။ ဒုတိယာဒီ သမာသျန္တေ၊ ယတြ နာမ ပဒေဟိ သော။
ပရေဟိ တု တပ္ပုရိသော၊ ဝိသေသျတြ ပရံ ဗဟုံ။
၆၃။ ဝိသေသနံ ဝိသေသျေန၊ ဧကတ္ထံ ယဒိ တံ ဒွယံ။
သ ကမ္မဓာရယော တသ္မိံ၊ ပါယော ပုဗ္ဗံ ဝိသေသနံ။
၆၄။ တဒ္ဓိတတ္ထေ သမာဟာရေ၊ ဥတ္တရသ္မိံ ပဒေ ပရေ။
သမာသျန္တေ ဒိဂု ယတြ၊ သင်္ချာသင်္ချေယျဝါစိဘိ။
၆၅။ ဥဘေ တပ္ပုရိသာ ဝုတ္တာ၊ ကာရိယဉ္စေ တဒါသယံ။
လက္ချတံ လက္ချလက္ခေသု၊ လက္ချလက္ခဏဒဿိနာ။
(ကစ္စာယန၊၁၄။)၆၆။ ယတြာနေကပဒညတ္ထေ၊ ဗဟုဗ္ဗီဟိ သမုစ္စတေ။
သရူပါ ယဒိ ဝါ ယုဒ္ဓေ၊ ဝိဒိသာယ ဒိသာရဝါ။
၆၇။ ပုဗ္ဗံ ဝိသေသနံ တတြ၊ သတ္တမီ နိဋ္ဌန္တံပိ စ။
ပရန္တု အာဝုဓတ္ထေ ဟိ၊ ဝိဘာသာဂျာဟိတာဒိသု။
၆၈။ သမာဟာရေတရီတရ - ယောဂေ နာမသမုစ္စယော။
ဒွန္ဒော ပုဗ္ဗံ ဘဝေ တတြ၊ အစ္စိတပ္ပသရံ ဗဟုံ။
၆၉။ ဝိဘတျာဒေါ ဗျယာ ယတြ၊ သော ဗျယီဘာဝေါ ဣဿတေ။
ပရာဒယော ပဉ္စမိယာ၊ ဆဋ္ဌိယာ သြရမာဒယော။
၇၀။ ဆဋ္ဌီတပ္ပုရိသေ ရာဇာ၊ မနုဿေဟိ ပရာ သဘာ။
ပဏ္ဍကေ သာလမတ္ထေပိ၊ ဆာယာဗာဟုလ္လပုဗ္ဗိကာ။
၇၁။ ဝါဿု သေနာ သုရာ သာလာ၊ နိသာ ဆာယာ ဣမေ ပန။
ဥပညောပက္ကမာ နိစ္စံ၊ တဒါဒိတ္တပ္ပကာသနေ။
(ကစ္စာယန၊၁၅။)တဒ္ဓိတနိဒ္ဒေသ
၇၂။ သမ္ဗန္ဓေ ကာရကေ ပိဏ္ဍေ၊ ဘာဝေ ဂေါတ္တေ ပရတြ စ။
ကထျန္တေ တဒ္ဓိတာရူဠှာ၊ သမာသန္တာ ဗျယာ အပိ။
ကစ္စာယနသာရဂန္ထော နိဋ္ဌိတော။