သဒ္ဒတ္ထဘေဒစိန္တာပါဠိ
သဒ္ဒဘေဒစိန္တာ
၁။ သဒ္ဒတ္ထဘေဒဝါဒိနံ၊ ပဝရံ ဝရဝါဒိနံ။
အဘိဝါဒိယ သဒ္ဒတ္ထ - ဘေဒစိန္တာဘိဓီယတေ။
၂။ သဒ္ဒေါ ဟိ ဒုဗ္ဗိဓော စိတ္တ - ဇောကာရဒေါတုဇောဒရ။
သဒ္ဒါဒျတ္ထောပကာရတ္တာ၊ စိတ္တဇောဝိဓ ဂယှတေ။
၃။ သော စ ကဏ္ဌာဒိဌာနေဘိ - ဗျတ္တိတော တတ္ထ စိတ္တဇ။
ပထဝီသတ္တိဝိညတ္တိ၊ ဘူသံဃဋ္ဋနဇော မတော။
၄။ နာဘိတောစ္စာရဏုဿာဟ၊ ဘူတပါဏောပရောပရိ။
သဃဋ္ဋနောရကဏ္ဌာဒိ၊ သိရဇောတျပရေ ဝိဒူ။
၅။ သာသနဿုပကာရတ္တာ၊ မာဂဓော ဝိဓ ဂယှတေ။
သောဟာနုဿာဝနံ ပဋိ - သမ္ဘိဒါယ စ ပစ္စယော။
၆။ အနိဋ္ဌိတေ ပဒေ ဝဏ္ဏော၊ ပရမတ္ထော သုနိဋ္ဌိတံ။
ပဒံ ပညတ္တိသဒ္ဒေါတိ၊ သဒ္ဒေါ ဘဝတိ ဒုဗ္ဗိဓော။
၇။ နေကာပိ သုတိယာ သဒ္ဒါ၊ လောကေနေကောတိ ဝုစ္စရေ။
ဧကတ္ထဝါစကေနေ - ကောတိ သင်္ကေတဘာဝတော။
၈။ ဧကက္ခရောပျနေကောပေ - ကတ္ထဝါစကသမ္မတော။
သရော တံသဟိတော ဗျဉ္ဇ - နော စေကက္ခရသမ္မတော။
၉။ အနေကေဝ သမာနေပိ၊ ပဒမေကမိတျုစ္စတေ။
ဆိန္နတ္တာ စိနိပါတေန၊ တေသံ စေကတ္ထဘာဝတော။
၁၀။ အာဘုသေဂတိယန္တေျက - က္ခရောတ္ထီ ပုရိသောတိ စ။
နေကော ယံကိဉ္စိပေတိတျေ၊ ကတ္ထံ နေကပဒဿ စ။
၁၁။ သောတာလမ္ဗဏမာပန္နော၊ သင်္ကေတေန ဝဝတ္ထိတော။
အတ္ထဿ ဉာပကော သဒ္ဒေါ၊ နာသန္တေ ကာရဏဒွယေ။
၁၂။ ဘေဒါ ဘေဒကဘူတတ္ထံ၊ ပုဏ္ဏံ ဝေါဟာရနိဿိတံ။
နာနာပဒံ ဝိဘာဝေတိ၊ ယံ တံ ဝါကျန္တိ ဝုစ္စတိ။
၁၃။ အနိဋ္ဌိတေ ပဒေ ဝဏ္ဏော၊ ဝါက္ခရံ နိဋ္ဌိတေ ပဒံ။
ဝါကျံ တဿမုဒါယော တ - မညောညာပေက္ခလက္ခဏံ။
၁၄။ ပဋိညာ ဥပမာ ဟေတု၊ ဥဒါဟရဏ နိဂမ။
ဝသေနာဝယဝါ ပဉ္စ - ဝိဓာ ဝါကျေ ယထာရဟံ။
၁၅။ ယထာ မဟာနသေ ဧဝ - မဂ္ဂိ ဒဟေန ဓူမတော။
မနျတေ ကတ္ထ ဓမ္မိနော၊ သဒ္ဓိတော စလမတ္ထကေ။
၁၆။ ကြိယာယ သဟ အညောညံ၊ ကာရကာနမပေက္ခတာ။
ကြိယာကာရကသမ္ဗန္ဓော၊ န ဆဋ္ဌီဝိသယော အယံ။
၁၇။ နာနတ္တာ သတ္တိယာ နာနာ - ကြိယာ ဟောတိ ယထာရဟံ။
ဧကကြိယာယ ဆိန္နန္တု၊ နတ္ထိ ကာရကတာ သဒါ။
၁၈။ သဒ္ဒသန္တတိယံ သဒ္ဒေါ၊ ကာသာဒိဝ မကာရိယော။
နိစ္စောတိ ကေစိ တေသန္တု၊ နာပသဒ္ဒေါ ကဒါစိပိ။
၁၉။ အသတိတ္တာလသတ္တာ စ၊ အပသဒ္ဒေပိ သာဓုတာ။
အတ္ထေသနေ ယထာမ္မူတိ၊ ဝုတ္တေပျမ္မာပိ မနျတေ။
၂၀။ အတ္ထေ သာဓုတ္တမတ္တေန၊ နိစ္စတ္တေပိ ကရီယတေ။
နိစ္စေန သဒိသာနိစ္စံ၊ ရင်္ဂဟတ္ထာဒယော ယထာ။
၂၁။ ဂုဠံဝ ဂိလိတေ နိဂ္ဂု - ဟိတံ သိဒ္ဓေဒမုစ္စတေ။
မရူဝ မရုဗိမ္ဗိမှာ၊ သိဒ္ဓေဒံ သိဒ္ဓမုစ္စတေ။
၂၂။ အနိစ္စော ခဏိကော သဒ္ဒေါ၊ ဃဋာဒိ ဝိယ ကာရိယော။
ဣစ္စေကေ သတ္တကာရာ တေ၊ ယေ နိစ္စာနိစ္စဝါဒိနော။
၂၃။ နိစ္စတ္တေ ပိံသလာဒီနံ၊ သညာ ရူဠှီဝ မနျတေ။
အနိစ္စဝါဒီနံ ဝါဒေ၊ အနွတ္ထာပိ ပတီယတေ။
၂၄။ နိစ္စော နိကာရဏော နိစ္စော၊ ကာရဏာနုဂတောရိတော။
နာယံ ကဏ္ဌာဒိဝုတ္တိတ္တာ၊ နိစ္စော ဝုဍ္ဎေ တု ဝုတ္တိတော။
၂၅။ သင်္ကေတေန စ ဝုတ္တိတ္တာ၊ နာပျနိစ္စောတိ ဝုစ္စတေ။
တေန သတ္ထန္တု သင်္ကေတ - ကရဏတ္ထံ ကရီယတေတိ။
အတ္ထဘေဒစိန္တာ
၂၆။ သကတ္ထဒဗ္ဗလိင်္ဂါနိ၊ သင်္ချာကမ္မာဒိကာရကံ။
ဣတိ သဒ္ဒဿ ဝိညေယျာ၊ ပဉ္စကတ္ထာ ယထာရဟံ။
၂၇။ အရီယတျတ္ထတေ ဝါနေ၊ နာတျတ္ထော သောဝ သဿ ဝါ။
ဧသော သကော သကောဝတ္ထော၊ သကတ္ထော သ ဝိသေသနံ။
၂၈။ သုတိ ဇာတိ ဂုဏော ဒဗ္ဗံ၊ သမ္ဗန္ဓော စ ကြိယာ တထာ။
ကြိယာကာရကသမ္ဗန္ဓော၊ တျေဝံ သတ္တဝိဓော ထဝါ။
၂၉။ နေယျော အဋ္ဌဝိဓော သာဒိ - သျာဒိနာ စ သကတ္ထကော။
ဝိသေသျဿ ဝိသေသောတိ၊ တညုနာ သော ပတီယတေ။
၃၀။ သဒ္ဒေနုစ္စာရိတေနေဝ၊ ယံ ဝတ္ထု ပတိပဇ္ဇတေ။
တဿ သဒ္ဒဿ တံ ဝတ္ထု၊ အတ္ထနာမေန မနျတေ။
၃၁။ ဒီပိတာ ဝိယ ဒီပေန၊ ဧဝံသဒ္ဒေန ဒီပိတာ။
သရူပချာ သုတိ သဒ္ဒ - တာ သဒ္ဒါနုဂတာ သဒါ။
၃၂။ သဗလာဒီသု ဘိန္နေသု၊ ယာယ ဝတ္တန္တျ ဘိန္နဓီ။
သဒ္ဒါ သာ ဇာတိရေသာ စ၊ မာလာသုတ္တမိဝါနွိတာ။
၃၃။ ယာ နိစ္စတ္တာ မဟတ္တာ စ၊ သတ္တာ သတ္တဂဝါဒိသု။
မဟာဝိသေသသာမည၊ မိစ္စေတံဟု ယထာက္ကမံ။
၃၄။ ဒဗ္ဗဿိတော တတော ဘိန္နော၊ တဗ္ဘေဒညာဏဟေတုကော။
ဝိပရာဝတ္တိဓမ္မော စ၊ နိဂ္ဂုဏော ဂမျတေ ဂုဏော။
၃၅။ သမ္ဗန္ဓော ကာရကေဟညော၊ ကြိယာကာရကပုဗ္ဗကော။
သမ္ဗန္ဓီဗုဒ္ဓိဇနကော၊ သမ္ဗန္ဓီဒွနိဿိတော။
၃၆။ သမ္ဗန္ဓီ ဝိယ သမ္ဗန္ဓော၊ ရူပတော န ကုဒါစနံ။
ဒဋ္ဌုံ သက္ကောတိ ဝိညူဟိ၊ မနျတေ သောနုမာနတော။
၃၇။ ရာဇာ ဒဒါတိ ဂဏှာတိ၊ ပုရိသောတိ ပဝတ္တတိ။
ကြိယံ နိဿာယ သမ္ဗန္ဓော၊ အညောညာပေက္ခလက္ခဏော။
၃၈။ ကြိယာကာရကတော သေသေ၊ ဆဋ္ဌီ ဇာယတိ သာ ပန။
သမ္ဗန္ဓမပိ ဇောတေတိ၊ ဥတ္တေ သာ ဟိ ပလုဇ္ဇတေ။
၃၉။ ဝိသေသျဿ ဝိသေသေ ဝါ၊ သမ္ဗန္ဓီဒွယဇောတိတံ။
သမ္ဗန္ဓံ ဇောတိတုံ ဆဋ္ဌီ၊ သဒ္ဒသတ္တိသဘာဝတော။
၄၀။ ဓာတွတ္ထောဝ ကြိယာ နာမ၊ ကာစီဟာ ကာ စ ဇေဋ္ဌကာ။
ကာ စ ကာရကဗျာပါရော၊ သော ကြိယာတိ ပတီယတေ။
၄၁။ သာ ဒဗ္ဗံဝ ဣမာဝါတိ၊ သရူပေနာပျဒဿနာ။
ပါဒုက္ခေပမုဒုတ္တာဒိ - မနုမာနေန မနျတေ။
၄၂။ မန္တဗ္ဗာပျနုမာနေန၊ သုတာ သာဓနသတ္တိယာ။
လောကသမ္မုတိယာ သိဒ္ဓါ၊ ဒဗ္ဗံ နိဿာယ မနျတေ။
၄၃။ အဒဗ္ဗာ ကတ္တုကမ္မဋ္ဌာ၊ ကာရကဂ္ဂါမသာဓိယာ။
ကြိယာ နာမာတိ ဝိညေယျာ၊ တညုနာတျပရေ ဝိဒူ။
၄၄။ ယံ ယံ ဝိသေသျတေ တံ တံ၊ ဒဗ္ဗံ တံ သဝိသေသနံ။
ဝိသေသျံ နိဿယောဝါတ္ထော၊ ဝိသေသျော သဝိသေသနော။
၄၅။ ဒုယှန္တေျတ္ထ ဝိသေသာတိ၊ ဒဗ္ဗံ တန္တု စတုဗ္ဗိဓံ။
ဇာတိဂုဏကြိယာဒဗ္ဗ - ဘေဒေနေဝ ပဘိဇ္ဇတေ။
၄၆။ ဧကာကာရော ပုမတ္တာဒိ၊ ဗုဒ္ဓိယာ ပရိကပ္ပိတော။
ဝေါဟာရတ္ထောဝ လိင်္ဂတ္ထော၊ ပုမဘာဝါဒယော ယထာ။
၄၇။ ယေန ယံ သဒိသံ နာမ၊ တမေဝ န စ တံ ဘဝေ။
ဘိန္နာနံ သဒိသတ္တေန၊ တေသမောပမတာ ဘဝေ။
၄၈။ သန္တာနေ ပုမဘာဝါဒိ - သဟိတော ပရိကပ္ပိတော။
မဟန္တကရသဏ္ဌာနာ - ဒျဋ္ဌသာလိနိယာ မတော။
၄၉။ ဝိသဒါဒိပ္ပဘေဒေန၊ တိဝိဓော ဂမနာဒိကော။
လိင်္ဂတ္ထောတျပရေ ကေစိ၊ မဿုကေသာဒယောတိ စ။
၅၀။ ဧတေသေတန္တိ သိဒ္ဓတ္ထ - မတ္တံ စန္ဒြာဒိသွိစ္ဆိတံ။
ကလာပါဒီသွနိပ္ဖန္န - သဒ္ဒတ္ထော တညုနိစ္ဆိတော။
၅၁။ သင်္ချေကတ္တံ ဗဟုတ္တဉ္စ၊ သာသနေ သက္ကတေ ပန။
ဒွိတ္တဉ္စ ပက္ခိပိတွာန၊ သင်္ချာ ဝုစ္စတိ တညုနာ။
၅၂။ ကမ္မာဒိကာရကံ နာမ၊ ဘာဝသတ္တမကာရကံ။
ကတ္တုသာဓနတော ဉေယျံ၊ ဘာဝသာဓနတောပိဝါ။
၅၃။ ဒဗ္ဗဂုဏကြိယာဇာတိ၊ နာမဘေဒေန ပဉ္စကော။
ယော ကရောတိ ကြိယံ ကတ္တု - ကမ္မဋ္ဌန္တိ သ ကာရကော။
၅၄။ လောကေနာဝိဇ္ဇမာနောပိ၊ ဝိဇ္ဇမာနောတိ သမ္မတော။
ဣတိ နျာယေန ဘာဝေါပိ၊ ကတ္တုသာဓနတော မတော။
၅၅။ ကရဏံ ဝါ ကြိယာ ကာရော၊ ကာရော ဧဝ စ ကာရကော။
တေနေဝ ကာရကော သတ္တ၊ ကြိယာဘေဒေန ဒုဗ္ဗိဓော။
၅၆။ နနု ဝိနာဝ ဒဗ္ဗာဒိ၊ သတ္တိ နာမ န ဒိဿတိ။
ဒိဋ္ဌံ ဝတ္ထုံ ဝိဟာယေတ္ထ၊ အဒိဋ္ဌံ ကိံ နု ဣစ္ဆသိ။
၅၇။ ဒဗ္ဗဿ ယံ ကရောတျေတံ၊ သာမတ္ထျံ သတ္တိ တာယ တု။
ကတ္တုတာ ယဿ တဿေဝ၊ ဘဝေယျ ကရဏာဒိတာ။
၅၈။ ကတ္တာဒိသတ္တိယောဂေန၊ ဒဗ္ဗာဒျေကမ္ပိ ဝိဇ္ဇတေ။
ယထေကောပိ ပဋော နီလ - ပီတာဒိဂုဏယောဂတော။
၅၉။ ဗုဒ္ဓေါ စရတိ ဘော ဗုဒ္ဓ၊ ဗုဒ္ဓံ အနုစရာဟိ တွံ။
ဗုဒ္ဓေန ဒေသိတော ဓမ္မော၊ ဓမ္မော ဗုဒ္ဓေန တိဋ္ဌတေ။
၆၀။ ဓမ္မဋ္ဌော ဒေတိ ဗုဒ္ဓဿ၊ ဓမ္မော ဗုဒ္ဓါ ဝိနိဂ္ဂတော။
ဓမ္မော ဗုဒ္ဓဿ ပသတ္ထော၊ လောကော ဗုဒ္ဓေ ပသီဒတိ။
၆၁။ ကာရကတ္တာ ကြိယာယေဝ၊ သတ္တိ မုချေန ကာရကံ။
ဒဗ္ဗံ ဌာနျူပစာရေန၊ တဒါဓာရဏဘာဝတော။
၆၂။ သဒ္ဒေါတ္ထံ ဝဒတီတျေတ္ထ၊ သဒ္ဒေါ ဒဗ္ဗေဝ ဂယှတေ။
အတ္ထဿ ဝါစကော သဒ္ဒေါ - ပျတ္ထဒွါရေန ကာရကော။
၆၃။ ကြိယာနိမိတ္တမေကန္တံ၊ ကြိယတ္ထံ ကာရကီရိတံ။
ကြိယာနိမိတ္တမတ္တမ္ပိ၊ မကြိယတ္ထ မကာရကံ။
၆၄။ သာမျာလပနနိဒ္ဓါရ - ဏဘာဂျာဒိမကာရကံ။
ကြိယာယေဝ တဒါယောဂါ - ဘာဝတောတျုပလက္ခယေ။
၆၅။ ဘာဝလက္ခဏ ဟေတွာဒိ၊ ကြိယတ္ထဿ အဘာဝတော။
တံယောဂေ တံနိမိတ္တေပိ၊ ကာရကန္တိ န ဝုစ္စတိ။
၆၆။ ကာရကော ဆဗ္ဗိဓော ကတ္တု - ကရဏကမ္မသမ္ပဒါ။
နဝဓောကာသဘေဒေန၊ သတျာဝတ္ထပ္ပဘေဒတော။
၆၇။ သဗ္ဗဘာဝါဝိနာဘာဝီ - ကရဏာဒိပုရက္ခတော။
ယော ကရောတျတ္တကမ္မဋ္ဌ - ကြိယံ ကတ္တာ သ ကာရကော။
၆၈။ ကတ္တာ သဗ္ဗကြိယာဗျာပီ၊ သေသံ ကမ္မာဒိ ပဉ္စကံ။
ဝိသေသကြိယာဗျာပီတိ၊ ကာရကံ ဒုဝိဓံ မတံ။
၆၉။ ကတ္တာယံ တိဝိဓော သုဒ္ဓ - ဟေတုကမ္မပ္ပဘေဒတော။
ဒတ္တော ကရောတိ ကာရေတိ၊ ပီယတေ ပါနီယံ သယံ။
၇၀။ ယံ ကြိယာသာဓနေ ကတ္တု၊ ပကာရံ တိသယေန တံ။
ကရဏံ ကတ္တုတောညေသ - မဓိကန္တိ မုဒီရိတံ။
၇၁။ ဗာဟိရဇ္ဈတ္တတော ဗာဟျ - ဗ္ဘန္တရေန စ ဒုဗ္ဗိဓံ။
ဝီဟိံ လုနာတိ ဒတ္တေန၊ စက္ခုနာ စန္ဒမိက္ခတေ။
၇၂။ ယံ ကြိယာယာဘိဂန္တဗ္ဗံ၊ တံ ကမ္မံ ယံ ကရီယတေ။
ဣတိ သတ္တိ တဒါ ကမ္မံ၊ ကရဏန္တိ ကြိယာ တထာ။
၇၃။ နိပ္ဖတ္တိ ဝိကတိ ပတ္တိ၊ ဘေဒါ ကမ္မံ တိဓာ မတံ။
ကဋံ ကရောတိ ဈာပေတိ၊ ကဋ္ဌာဒိစ္စံ နမဿတိ။
၇၄။ သမ္မာ ပဒီယတေ ယဿ၊ သမ္ပဒါနံ တဒုစ္စတေ။
ဝတ္ထုဿ ဝါ ပဋိဂ္ဂါဟ - လက္ခဏံ တံ ကြိယာယ ဝါ။
၇၅။ ပူဇာနုဂ္ဂဟကာမေန၊ ဒိန္နံ သမ္မာတိ မနျတေ။
ဒိန္နာယ သာမိကတ္တေပိ၊ သမ္ပဒါနံ တဒုစ္စတေ။
၇၆။ ရဇကဿ ဒဒေ ဝတ္ထံ၊ ရညော ဒဏ္ဍန္တိအာဒိသု။
န ဘဝေ သမ္ပဒါနတ္တံ၊ ပူဇာဒီနမဘာဝတော။
၇၇။ အနုမတျာနိရာကတ္တာ၊ ရာဓကဘေဒတော တိဓာ။
သမ္ပဒါနံ ဒဒေ ဘိက္ခု - နော ရုက္ခဿဒ္ဓိကဿ စ။
၇၈။ သမ္ပဒါနံ ဒွိဓာ ကာယ - စိတ္တသမ္ပတ္တိပုဗ္ဗကော။
ဘိက္ခုဿ စီဝရံ ဒေတိ၊ ဗလိံ နာရာယနဿ စ။
၇၉။ သမေပျပဂမေ ဒွိန္နံ၊ ပုဗ္ဗရူပါ ယဒစ္စုတံ။
ဝုစ္စတေ တဒပါဒါန - မေတဉ္စာဝဓိလက္ခဏံ။
၈၀။ အပါဒါနံ ဒွိဓာ ဗုဒ္ဓိ - ကာယသမ္ပတ္တိပုဗ္ဗကော။
စလာစလဝသေနာပိ၊ စောရာ ဂါမာတိ အာဒီသု။
၈၁။ နိဒ္ဒိဋ္ဌဝိသယံ ကိဉ္စိ၊ ဥပတ္တိဝိသယံ တထာ။
အနုမေယျဝိသယဉ္စ၊ အပါဒါနံ တိဓာ မတံ။
၈၂။ အပေန္တိ မုနယော ဂါမာ၊ ကုသူလာ တဏ္ဍုလာ ပစေ။
ပါဋလိပုတ္တကေဟိ စ၊ အဘိရူပတရာ ဣမေ။
၈၃။ ကြိယာနိဿယဘူတာနိ၊ ကတ္တုကမ္မာနိ တိဋ္ဌရေ။
ယတ္ထောကာသောတိ သောယေဝ၊ ပရမ္ပရူပစာရတော။
၈၄။ လဒ္ဓနာမဝိသေသတ္တာ၊ နေသံ နောကာသတာ သိယာ။
သာမညဿ ဝိသေသောဝ၊ ဗာဓကောတိ ဟိ ဝုစ္စရေ။
၈၅။ အာဓာရော စတုဓာ ဗျာပိ - ကော တိလောပသိလေသိကော။
ထာလီ ဝေသယိကော ကာသော၊ ဂင်္ဂါ သာမီပိကောတိ စ။
၈၆။ ပဓာနပရိကပ္ပါနံ၊ ဝသာဓာရော ဟိ ဒုဗ္ဗိဓော။
မုချောပစာရတော ဝါပိ၊ တိလဂင်္ဂါဒယော ယထာ။
၈၇။ မုချာမုချဝသေနေဝံ၊ သဗ္ဗော သဒ္ဒေါ ပဘိဇ္ဇတေ။
ဂင်္ဂါယံ နှာယတေ ဂင်္ဂါ - ယံ သဿန္တိ ယထာက္ကမံ။
၈၈။ ဘူတမတ္ထမတိက္ကမ္မ၊ ယေနာဘူတမပေက္ခတိ။
ဘူတတ္ထဿေကဒေသံ ဝါ၊ သောပစာရောတိ ဝုစ္စတိ။
၈၉။ သီဟော ဂါယတိ သီဟောယံ၊ မာဏဝေါစ္စာဒိ ဒုဗ္ဗိဓော။
အဘေဒဝိဝါချာ သောယ - မီတိသမ္ဗန္ဓတော ပျယံ။
၉၀။ ပရဘာဝါပဒါပေက္ခံ၊ သ အမာဒိ တု ကာရကံ။
ပစ္စယဿ သဓာတုဿ၊ အတ္ထဘူတန္တု သာဓနံ။
၉၁။ ဝါကျေ ဝါ ကာရကော ယော တံ၊ ပသိဒ္ဓေ ယဉ္စ သာဓနံ။
ကာရကံ ပုန မေတသ္မိံ၊ အယမေသံ ဝိသေသတော။
၉၂။ ပစ္စတေ သြဒနော ယေန၊ ဣတိ သော ပါစကောဒနော။
ဘုဇ္ဇတေ ပါစကေနေဝ၊ မာဒျုဒါဟရဏံ မတံ။
၉၃။ ဒဗ္ဗဂုဏကြိယာနာမ - ဇာတိဘေဒေန ပဉ္စဓာ။
အတ္ထော အတ္ထမုခေနေဝ၊ သဒ္ဒေါပိတျ ပရေ ဝိဒူ။
၉၄။ ဝီသာဏီ ဓဝလော ဂန္တာ၊ စိတ္တော ဂေါတိ စ တညုနာ။
ဒဗ္ဗာဒိ ဒဗ္ဗသဒ္ဒါဒိ၊ ပစ္စေကံ ဝေါဟရီယတေ။
၉၅။ နိရုတ္တိပဋိသမ္ဘိဒါ၊ ပါဠိယေကေကမက္ခရံ။
ဝိသေသုပ္ပတ္တိယာ နာမ - ပညတ္တီတိ ဟိ ဝုစ္စတေ။
၉၆။ အက္ခရာဝလိသင်္ခါတော၊ သမူဟော ပရိဗျတ္တိယာ။
နာမန္တိ ကေစိ ယဒျေဝံ၊ သုတျက္ခရသမူဟတော။
၉၇။ နာမတာပတ္တိ သဗ္ဗေသံ၊ ဒဗ္ဗသဒ္ဒါဒိနံ သိယာ။
နာမန္တု လောကသင်္ကေတ - မေကံ သညီနိဒဿနံ။
၉၈။ သကတ္ထောဝါဒိတော ဗုဒ္ဓိ၊ နပ္ပတီတိဝိသေသနာ။
ယေဘုယျေန ဝိသေသျေတိ - နျာယတော ပတိပဒျတေ။
၉၉။ သဒ္ဒဿေဝါနုသင်္ဂတ္တာ၊ နေယျတ္တာ တဿရူပတော။
သာမညတ္တာ စ အာဒေါဝ၊ သုတိ ဇာတိ စ မနျတေ။
၁၀၀။ ဝိသေသာနုဂတံ ဒဗ္ဗံ၊ သာမညာနုဂတဉ္စ တံ။
ပစ္ဆုတ္တံ လိင်္ဂသင်္ချာနံ၊ နိဿယတ္တာ စ အာဒိတော။
၁၀၁။ ဒဗ္ဗဿေဝါဓိနတ္တာ တံ - ပစ္ဆာ လိင်္ဂံ တတော ပရံ။
သင်္ချာ စ တဒဓီနေပိ၊ ပရသင်္ချာနိဝတ္တိတော။
၁၀၂။ သဒ္ဒေါပလက္ခဏာဒီဟိ၊ ပတီတတ္ထေ နိဝတ္တိတံ။
ကရောတေဝ ဖလတ္တေန - အညတ္ထာပေါဟနေန ဝါ။
၁၀၃။ ဒဗ္ဗာဓီနေပိ ဘာဝဿာ - ပေက္ခတ္တာ သာဓနံ တတော။
ဒွေဝ ပရာဓီနတ္တာ က - မ္မာဒိသင်္ချာ စတုတ္ထတာ။
၁၀၄။ လိင်္ဂါဒယော တယော ဒဗ္ဗေ၊ ဒဗ္ဗာဓာရဏဘာဝတော။
ဒဗ္ဗံ ဒဗ္ဗဝိသေသတ္တာ၊ သကတ္ထေ သင်္ဂဟံ ဂတာ။
၁၀၅။ တဿရူပါဒိနာယေဝ၊ ဝိသေသျတ္တာ ဆဠေဝ တု။
ဇာတျာဒယော သကတ္ထာပိ၊ ဒဗ္ဗေ တု တျာဟ ဒဗ္ဗတာ။
၁၀၆။ ဝတ္တိစ္ဆာနုပရောဓေန၊ ပုဗ္ဗာပရဝိလောကနံ။
ကာတဗ္ဗံ ကိံ ကမေသေန၊ ပစ္စာသတျာဒိဘာဝတောတိ။
သဒ္ဒတ္ထဘေဒစိန္တာ
၁၀၇။ အဘိန္နေန ပဒေနတ္ထော၊ ပျဘိန္နောဝ ပတီယတေ။
ဗုဒ္ဓိယာ ဘေဒိတတ္တာဝ၊ စိတြဂေါဿာဒယော ယထာ။
၁၀၈။ စိတြဂါဒီသု သုက္ကာဒိ၊ ဗုဒ္ဓိယာ ဘေဒိတံ ယထာ။
ပကတိပစ္စယေ ဘိန္နေ၊ ဘိန္နတ္ထောဝ ပတီယတေ။
၁၀၉။ ပကတိလိင်္ဂဓာတွေဝ၊ ဝိဘတ္တိပစ္စယာ ပန။
ပစ္စယော ကေစိ သျာဒျန္တ - တျာဒျန္တာ ပကတီတိ စ။
၁၁၀။ ဘေဒိတေ တဒ္ဓိတာချာတ - ကိတကာဒိက ပစ္စယေ။
သမာသေ သျာဒိကေ ဓာတု - လိင်္ဂေ စတ္ထော ပဘိဇ္ဇတေ။
၁၁၁။ ဒွိကော တိကော စတုက္ကောပိ၊ ပဉ္စကော ဝါပိ ဝိညုနာ။
အတ္ထော သဒ္ဒဿ ဝိညေယျော၊ သဒ္ဒဘေဒတ္ထဒဿိနာ။
၁၁၂။ ဝါစကတ္တိတ္ထိလိင်္ဂဿီ - ကာရာဒီနံ ပတီယတေ။
သဒ္ဒမတ္တေန သဒ္ဒတ္ထော၊ ဒွိကော ပဋွီတိ အာဒီသု။
၁၁၃။ ဇောတကတ္တိတ္ထိလိင်္ဂဿီ၊ ကာရာဒီနံ ပတီယတေ။
သဒ္ဒမတ္တေန သဒ္ဒတ္ထော၊ တိကော ပဋွီတိ အာဒီသု။
၁၁၄။ သကတ္ထံ တေန ဂန္တဗ္ဗံ၊ ဒဗ္ဗံ တံနိဿိတမ္ပိ စ။
လိင်္ဂမေသော တိကော ဘေဒေါ၊ နိစ္စံ သဒ္ဒေ ပတိဋ္ဌိတော။
၁၁၅။ စတုက္ကော ဒုဗ္ဗိဓော မာသ - ဇာတောစ္စာဒေါ ပတီယတေ။
သင်္ချစတုတ္ထကော သောဝ၊ မာသိကောတိ စ ကေနစိ။
၁၁၆။ ကိံပမာဏော ကုမာရဿ၊ ကာလောတျုတ္တေ ဝိသဇ္ဇနာ။
မာသော ဇာတဿ အဿာတိ၊ အညထာ တိံသရတ္တိယာ။
၁၁၇။ ပဒဒွယမပေက္ခိတွာ၊ ပရိမာဏံ ဝိသေသတော။
သင်္ချာ ပေဥှဝ ဒွေမာသ - ဇာတာဒေါ ဒိဂုဏာပိ ဝါ။
၁၁၈။ မာသံ ဇာတဿ အဿာတိ - က္ကန္တန္တျတြ အနာဒရေ။
ဆဋ္ဌီတျေကေ ပရေ မာသော၊ ဇာတော အဿာတိ ပဏ္ဍိတာ။
၁၁၉။ သလ္လဝိဒ္ဓေါတိ အာဒီသု၊ နေယျော ကမ္မာဒိကာရက။
စတုက္ကော သလ္လသဒ္ဒေါ သာ - ပေက္ခတော ယောဂတောပိ ဝါ။
၁၂၀။ လိင်္ဂတ္ထဝိဝရေ သုပ္ပိ - ကမိစ္စာဒီသု ပဉ္စကော။
လိင်္ဂတ္ထော ပဉ္စကတ္ထေ တု၊ သောပ္ပန္တျာဒီသု ဒါဟဋော။
၁၂၁။ သုပ္ပေနေဝ ပမာဏေန၊ ကီတံ ဘဏ္ဍန္တိ သုပ္ပိကံ။
ဝိသေနဝိသေသျာနံ၊ ဝါစကတ္တာတြ ပဉ္စကော။
၁၂၂။ ဥတ္တရပဒလောပေါ ဝါ၊ တဒ္ဓိတန္တောဂဓောပိ ဝါ။
ပကတိပစ္စယေဟေဝ၊ စရိတတ္ထကဘာဝတော။
၁၂၃။ သုပနံ သုပိနံ သောပ္ပ - မီတိဘာဝေါယမတြ ဟိ။
ပုံနပုံသကမေကတ္တံ၊ တဿ သာမညဘာဝတော။
၁၂၄။ ကြိယာပဒမပေက္ခာယ၊ ပုရိသာဒီသွမာဒီနံ။
ဇောတနေ ပကတျတ္ထတ္တာ၊ ပဉ္စကော ပဇ္ဇတေ သဒါ။
၁၂၅။ ဝါစကတ္တမပေက္ခာယ၊ ပစ္စယာနံ ဒွိကာဒိကော။
ဝိသေသနဝိသေသျာဒိ - ဘာဝတော ဓာတုအာဒိကေ။
၁၂၆။ ဧကကောတိ စ ဧကစ္စေ၊ ပစ္စယာနန္တု ဇောတနေ။
ဓာတွာဒိကေ တိကာဒျတ္ထော၊ နေတဗ္ဗာ သမယညုနာ။
၁၂၇။ ပဒပူရဏသန္ဓီသု၊ ဧကကော ဒေါဏိကာဒိသု။
သင်္ချပမာဏဘေဒေန၊ ဆက္ကော စာတျပရေ ဝိဒူတိ။
၁၂၈။ ဝိဇ္ဇမာနောပိ သုက္ကာဒိ၊ ယထာ ဒီပါဒိကေ သတိ။
ဗျတ္တိမာယာတိ ကမ္မာဒိ - အတ္ထော ဧဝံ ဝိဘတ္တိယံ။
၁၂၉။ လိင်္ဂတ္ထေ ပဉ္စကေ သင်္ချာ - စတုက္ကေ စ ဝိဘတ္တိယော။
သင်္ချာကမ္မာဒိကာနမ္ပိ၊ အဗျတ္တာနံဝ ဇောတိကာ။
၁၃၀။ ဒုကေ တိကေ စ ကမ္မာဒိ - စတုက္ကေ စ ဝိဘတ္တိယော။
သင်္ချာကမ္မာဒိကာနမ္ပိ၊ ဝါစိကာတိ စ ဝုစ္စရေ။
၁၃၁။ သဒ္ဒေါ သကတ္ထမာဒေါဝ၊ ဝတွာ ဇာတိဂုဏကြိယံ။
ဒဗ္ဗံ တံနိဿယံ ပစ္ဆာ၊ လိင်္ဂမိတ္ထာဒိကံ တတော။
၁၃၂။ တတေကတ္တာဒိကံ သင်္ချံ၊ ကမ္မာဒိ သာမိသတ္တမံ။
တတော ဝဒေတိ လိင်္ဂတ္ထော၊ ပဉ္စကောတျပရေ ဝိဒူ။
၁၃၃။ လိင်္ဂတ္ထံ ပန ဇောတေန္တိ၊ သင်္ချာကမ္မာဒိကာရကံ။
သမ္ဗန္ဓဉ္စ ဝိဘတ္တိတ္ထိ - ပစ္စယာ စ ယထာရဟံ။
၁၃၄။ တေသံ ဝိသေသဝုတ္တိတ္တာ၊ တေဟိ ပါကဋဘာဝတော။
ဂေါ သုက္ကော ပါစကော ဒဏ္ဍီ၊ ဂဝံ ဂေါဏဿ ဒဏ္ဍိနီ။
၁၃၅။ ဗဟွတ္ထာနမ္ပိ ဧကတ္ထေ၊ သမာရောပနတော ဗဟု။
ဝစနံ ဒေသနာသောတေ၊ ပတိတတ္တာ စ မနျတေ။
၁၃၆။ သတ္ထေတ္တနိဂရူသု စေ - တိလက္ခဏမုဒါဟဋံ။
မယံ ဂစ္ဆာမ တုမှေ စ၊ ဂစ္ဆာတိ ယထာက္ကမံ။
၁၃၇။ သုပါကဋသရူပတ္တာ၊ ဒဗ္ဗမုစ္စာရိတော ရဝေါ။
မုချေန ဗြဝီတိစ္စာဟ၊ ဗျာဍိ ဒဗ္ဗပဒတ္ထိကော။
၁၃၈။ နိစ္စတ္တတ္တာ ပဓာနေန၊ ဇာတိမုစ္စာရိတော ရဝေါ။
ဗြဝီတိစ္စာဟ ဗာဇာဗျာ - ယနော ဇာတိပဒတ္ထိကော။
၁၃၉။ သဒ္ဒတ္ထော ဒဗ္ဗမေဝါတိ၊ အာဟ ဒဗ္ဗပဒတ္ထိကော။
ဇာတိပဒတ္ထိကော ဇာတိ - ဝါတိ စာတျ ပရေ ဝိဒူ။
၁၄၀။ သဒ္ဒေါဟျုစ္စာရိတော သဒ္ဒါ - နုဗန္ဓတ္တာ သရူပကံ။
သဒါ ဝတွာန ဒဗ္ဗံ ဝါ၊ ဇာတိံ ဝါ မုချတော ဝဒေ။
၁၄၁။ သာဓာရာနုဂတတ္တာဝ၊ ဇာတိံ ဒဗ္ဗပဒတ္ထိကေ။
ဇာတိယာဓာရကတ္တာဝ၊ ဒဗ္ဗံ ဇာတိပဒတ္ထိကေ။
၁၄၂။ ဒဗ္ဗံ ဂုဏံ ကြိယံ နာမံ၊ သမ္ဗန္ဓဉ္စ ယထာရဟံ။
ဇာတိနိဿယ ဒဗ္ဗာဓီ - နတ္တာ နေသန္တိ သင်္ဂဟော။
၁၄၃။ ဂေါ ဒဏ္ဍီ ပါစကော သုက္ကော၊ ဍိတ္တောစ္စာဒိ နိဒဿနံ။
ဒဏ္ဍာဒိနာနပေတဿ၊ ဇာတိံ ဒဏ္ဍျာဒိကော ဝဒေ။
၁၄၄။ ယော သကတ္ထောတိ ဝုတ္တော သော၊ နိမိတ္တန္တျပဓာနတော။
ယော ဒဗ္ဗန္တိ သ သဒ္ဒတ္ထော၊ သဒ္ဒေနုတ္တော ပဓာနတော။
၁၄၅။ ယာယ ဇာတျာ ဝိသေသျံ ဟိ၊ ဒဗ္ဗံ ဒဗ္ဗန္တိ ဝုစ္စတေ။
သာ သကတ္ထောတိ သုတျာ ဝါ၊ ဇာတိ သာ စ ဂဝါဒိသု။
၁၄၆။ ဍိတ္တော ဂေါ ဂေါဿ ဍိတ္တောတိ၊ နာမမိစ္စာဒိကေ ပန။
ဒဗ္ဗံ နာမေန နာမဉ္စ၊ နာမဇာတျာ ယထာက္ကမံ။
၁၄၇။ နာမဇာတိသရူပေန၊ ဒဗ္ဗေ သင်္ဂဟိတမ္ပိ ဝါ။
နာမံ တဇ္ဇာတိယာ နာမေ - န ဝါ ဒဗ္ဗန္တိ စာပရေ။
၁၄၈။ ဂေါဿ သုက္ကော ဂုဏောစ္စာဒေါ၊ ဂုဏောဝ ဂုဏဇာတိယာ။
သုက္ကော ဂေါစ္စာဒိကေ ဒဗ္ဗံ၊ ဂုဏေနေဝ ပတီယတေ။
၁၄၉။ ဂုဏဇာတိ သရူပေန၊ ဂုဏော ဝါ ဂုဏဇာတိယာ။
ဒဗ္ဗံ ဂုဏေန ဝါတျေကေ၊ သုက္ကော ဂေါဿ ဂုဏောတိ စ။
၁၅၀။ သမာသေ ဆိန္နဟတ္ထာဒေါ၊ ဒဏ္ဍျာဒေါတိ စ တဒ္ဓိတေ။
ဒဗ္ဗံ ဒဗ္ဗေန သမ္ဗန္ဓေ - န ဝါ တဿိတယောဂတော။
၁၅၁။ သရူပေန ဟိ တဇ္ဇာတိ၊ တဇ္ဇာတျာ ဒဗ္ဗကေန ဝါ။
သမ္ဗန္ဓေနေဝ ဝါ ဒဗ္ဗ - မိစ္စေဝမပရေ ဝိဒူ။
၁၅၂။ ပါကာဒေါ ဌီယတာဒေါ စ၊ ကြိယာဝ ကြိယာဇာတိယာ။
ပစ္စတေ ပစတာဒေါ စာ - ချာတေ ဘာဝပ္ပဓာနတော။
၁၅၃။ ပစ္စတေ ပစတေ ပါစ - ကောစ္စာဒီသု ကြိယာယ ဝါ။
ကြိယာကာရကသမ္ဗန္ဓေ - န ဝါ ဒဗ္ဗန္တိ စာပရေ။
၁၅၄။ ကေစိ သုတျာ ကြိယဇာတိ၊ ကြိယာဇာတျာ ကြိယာ တထာ။
ကြိယာကာရကသမ္ဗန္ဓေ - န ဝါ ဒဗ္ဗံ ကြိယာယ ဝါ။
၁၅၅။ ဒဗ္ဗံ ဒဗ္ဗေန သမ္ဗန္ဓေ - န ဝါ ယဋ္ဌိံ ပဝေသယ။
သီဟောယံ မာဏဝေါ ဗာဟိ - ဂါမော ဂေါတိ နိဒဿနံ။
၁၅၆။ သဟစရဏတော သူရာ - ဒိ တံရူပကဘာဝတော။
ဒဗ္ဗန္တရောပစာရောယံ၊ နာမေနေဝ န စတ္ထတော။
၁၅၇။ ကေစိ သဒိသဘာဝေါ ဝါ၊ သမ္ဗန္ဓော ဝါ သရူပတော။
ဒဗ္ဗံ ဝါ ဒဗ္ဗသမ္ဗန္ဓ၊ သာဒိသျသုတိတောတိ စ။
၁၅၈။ ပဒပူရဏသန္ဓီသု၊ သုတျာ ပဒသိလိဋ္ဌတာ။
သာ ဟိ လောကေ ပသိဒ္ဓတ္တာ၊ ဒဗ္ဗေ ဂယှတိ တညုနာ။
၁၅၉။ န တု သဒ္ဒါ အနတ္ထာတိ၊ နျာယေန ပဒပူရဏေ။
ပဒတ္ထော သုတိယာ တဿ၊ ပဒတ္ထေဝ ပဝတ္တိတော။
၁၆၀။ ဘဝန္တိ ဗုဒ္ဓိ သဒ္ဒါသ္မာ - တိ ဘာဝေါ သ နိမိတ္တကော။
ဒဗ္ဗဂုဏကြိယာနာမ - ဇာတိ သဒ္ဒပဝတ္တိယာ။
၁၆၁။ သမ္ဗန္ဓိနာ ဟိ သမ္ဗန္ဓော၊ တဿိတတ္တာ သရူပကံ။
ဇာတျာ သဒ္ဒဿ ဇာတိတ္တာ၊ သာဒိသျံ သဒိသေန ဝါ။
၁၆၂။ ဝိဂ္ဂဟာဝိဂ္ဂဟတ္ထာ ယေ၊ နိမိတ္တာနာဟု ဏျာဒယော။
တတော ဘာဝတ္ထဝါစိတ္တာ၊ တထာ သာဓု သကတ္ထကေ။
၁၆၃။ သဒ္ဒဝုတ္တိနိမိတ္တာနု - ဂတာတ္ထေ ဗုဒ္ဓိ ဝတ္တတေ။
သဒ္ဒဝုတ္တိနိမိတ္တေန၊ တထာ သဒ္ဒေါ စ ဝတ္တတေ။
၁၆၄။ ပဓာနတော နိမိတ္တတ္ထော၊ သဒ္ဒတ္ထောတျ ပရေ ဝိဒူ။
နိမိတ္တောတွပ္ပဓာနေန၊ တဗ္ဗိသေသျော ပဓာနတော။
၁၆၅။ ဂေါတ္တံ ဒဗ္ဗဿ ဂေါဇာတိ၊ ဇာတျာ ဝါ ဂေါသရူပတော။
ဍိတ္တတ္တံ ဍိတ္တနာမတ္တ - မိစ္စာဒီသု အယံ နယော။
၁၆၆။ ဇာတျတ္ထေ ရူဠှိယာ ဟောတိ၊ သမာသော တဒ္ဓိတော ကိတော။
ဇာတျတ္ထေ ဏျာဒယော ဟောန္တိ၊ န စ သမ္ဗန္ဓကာဒိကေ။
၁၆၇။ သုက္ကာဒျဘိန္နရူပေါ စ၊ တဒ္ဓိတန္တော စ ကေဝလော။
ဂုဏေ ဝါ ဇာတိယံ ဝါပိ၊ ပဝတ္တန္တိ ယထာရဟံ။
၁၆၈။ သန္တသဒ္ဒေါ ဗျဘိစာရိ - တ သမ္ဗန္ဓေ ကြိယာယ ဝါ။
ဝတ္တတေ ဝတ္တမာနောပိ၊ ဒဗ္ဗေ ကမ္မေ ဂုဏမှိ စ။
၁၆၉။ ယထာဿကဏ္ဏတ္တံ ရာဇ - ပုရိသတ္တဉ္စ ဟိတ္ထိတ္တံ။
ဒဏ္ဍိတ္တံ ကုမ္ဘကာရတ္တံ၊ ဂေါတ္တမိစ္စေဝ နော မတိ။
၁၇၀။ ပါစကတ္တဉ္စ သုက္ကတ္တံ၊ ပါဝါရဿ ဂုဏဿ ဝါ။
သတော ဝတ္ထုဿ သတ္တာ စ၊ ကမ္မညံ ဒေဝတာတိ စ။
၁၇၁။ ယထာ ကထဉ္စိ ဗျုပ္ပတ္တိ၊ ရူဠှိယာ အတ္ထနိစ္ဆယော။
ဣတိ ရူဠှီ ပသိဒ္ဓေန၊ ဗျုပ္ပတ္တိ ယေန ကေနစိ။
၁၇၂။ ယေ ယတ္ထတ္ထေသု ဇာယန္တိ၊ ဘိယျောပေက္ခနသတ္တိယာ။
ဘာဝတော တေဟိ တေ ဥတ္တာ၊ အနုတ္တာ တဒဘာဝတော။
၁၇၃။ သဗာဟိရတ္ထအန္တောတ္ထာ - ပေက္ခာနုတ္တတ္ထဒွါရတော။
သဒ္ဒေါ သန္တောတ္ထဗာဟျတ္ထာ - ပေက္ခော ဥတ္တောတိ လက္ခဏံ။
၁၇၄။ သုရူပေနာ ဘိရူပေါ ကော၊ သော နရော ဓညတော ဓန။
ဝါ နရော ပစ္စတေ သူဒေ - နောဒနော ပစိတောတိ စ။
၁၇၅။ ပယောဂသိဒ္ဓိယာ သုတ္တော - ပဒေသော တေန ယံ သမာ။
သာဒိသဉ္ဇာတိဒေသာဒိ၊ တေနုတ္တံ သာမိကာရကံ။
၁၇၆။ ဇာတျာဏာဝိသယက္ခေတ္တ - ဘူတံ နုတ္တံ ယထာ တထာ။
အဘာဝတောတိ တညူဟိ၊ ဝုတ္တံ ဇာတိနိရုတ္တိယံ။
၁၇၇။ သာသနေ နဟုတံ ဇာတိ - က္ခေတ္တံ လက္ခဉ္စ ကောဋိနံ။
အာဏာက္ခေတ္တမနန္တဉ္စ၊ ဝိသယက္ခေတ္တမီရိတံ။
၁၇၈။ ယဿ ယတ္ထ ဝိဓာနတ္တာ၊ သင်္ကေတေနေဝ တေန သော။
ဥတ္တောတိ ကာရိကာယန္တု၊ ဝုစ္စတေ ကာရိကညုနာ။
၁၇၉။ သမာသာဒီဟိ ဥတ္တာ နော၊ အမာဒီဟီတိ ကေဟိစိ။
ယုတ္တာပေက္ခဟိ ဝုတ္တာ နော၊ နပေက္ခဟီတိ နော မတိ။
၁၈၀။ ဥတ္တာနုတ္တာ သရူပေန၊ ဘာဝသတ္တမကာရကာ။
သာမီ စ ဝါစကာမာဒိ၊ သမာသာဒိ ယထာရဟံ။
၁၈၁။ ကတ္တရိ ဇိတမာရော ကော၊ သော ဇိနော ဝါဘိဓမ္မိကော။
ဘိက္ခု ပစတိ သူဒေါ ပါ - စကော သူဒေါဒနန္တိ စ။
၁၈၂။ ကတ္တာဒိသာမိမတ္တံ တေ - ဟုတ္တံ နာညံ တတော ပရေ။
ပဓာနာနုပရောဓေန၊ အနုဝတ္တန္တိ နာညထာ။
၁၈၃။ ဝါစကတ္တေန ဥတ္တန္တိ၊ ကေစိ တေသံ တု နာဒိသု။
သမာသာဒီသု ကတ္တာဒိ - ဝေါဟာရော န ဇိနာဒိကေ။
၁၈၄။ တေနေဝ ဇောတကတ္တေန၊ ဝုတ္တေ တတ္ထာပိ ယုဇ္ဇတိ။
သာမညတ္ထေ ဟိ တေဟုတ္တေ၊ သာတ္ထကံဝ ဝိသေသနံ။
၁၈၅။ ဥတ္တာနုတ္တေပိ တံယေဝ၊ ကာရကံ န စ တပ္ပရာ။
ဝတ္တိ တေန ဇိနာဒိမှိ၊ ဥတ္တေ တံနာမတာ သိယာ။
၁၈၆။ သာမညံ ဟိ သမာသာဒိ၊ ဝဒေ သျာဒိ ဝိသေသနံ။
တတော ဝိသေသနတ္ထေန၊ သာမညတ္ထော ဝိသေသျတေ။
၁၈၇။ သမာသာဒီနမတ္ထာနံ၊ ဝိလက္ခဏသဘာဝတော။
ဝါကျတော တေန ဝါကျေန၊ ဝိသေသတ္ထော န မနျတေ။
၁၈၈။ ဇိတမာရာဒိသာမညံ၊ ဘိက္ခုနာဒိပ္ပယောဂတော။
ပါရာဒိဝ ဇိနာဒိ စ၊ ကတကိစ္စာဒိယောဂတော။
၁၈၉။ ဝုတ္တိယာ ကာမာစာရာပိ၊ ဝိသေသနဝိသေသျတာ။
လောကေန မနျတေ သိဒ္ဓါ၊ လောကသိဒ္ဓသဘာဝတော။
၁၉၀။ အတ္ထရူပံ ပသိဒ္ဓန္တု၊ ဝါဒရူပန္တိ ဝုစ္စတေ။
ဝိသေသနံဝ တံ အပ္ပ - သိဒ္ဓကံ ဝိဓိရူပကံ။
၁၉၁။ ဝိသေသျမေဝ တံတျေဝ - မတ္ထရူပံ ဒုဓာ မတံ။
ယထာ နီလုပ္ပလံ ရာဇ - ပုရိသောတိ နိဒဿနံ။
၁၉၂။ န တေဟုတ္တေ ဝိဘတ္တီတိ၊ စေ ဝိနာဟု ဝိဘတ္တိယာ။
နာတ္ထံ နိဒဿိတုံ သက္ကာ၊ လိင်္ဂတ္ထံ ပန ပေက္ခိယ။
၁၉၃။ ပဌမာယေဝ ဘဝတိ၊ တတ္ထာပျညကြိယာဒိကေ။
ဘဝတျာပေက္ခိတေယေဝ၊ တတိယာဒိ ယထာရဟံ။
၁၉၄။ ဝိသေသျေ ဒိဿမာနာ ယာ၊ လိင်္ဂသင်္ချာဝိဘတ္တိယော။
တုလျာဓိကရဏေ ဘိယျော၊ ကတ္တဗ္ဗာ တာ ဝိသေသနေ။
၁၉၅။ သဒ္ဒေါ နိယတလိင်္ဂေက - ဝစနော ဂဏှတေ ပဓာ။
နဿ ဝိဘတ္တိမတ္တံ ဇာ - ယန္တိ စိတ္တာနိ ဝီသတိ။
၁၉၆။ နာချာတေန မလိင်္ဂတ္တာ၊ လိင်္ဂံ သက္ကာ နုဝတ္တိတုံ။
ဝိသေသျာဓီနဘာဝေန၊ သင်္ချမတ္တံဝ တဿမံ။
၁၉၇။ တဒ္ဓိတော သတ္တိမံ ဒဗ္ဗံ၊ သဒ္ဒသတ္တိသဘာဝတော။
ကြိယာမုချေပိ အာချာတေ၊ ဘိယျော ဗြဝီတိ မုချတော။
၁၉၈။ ဧကက္ခဏေနေဝ နေကေသ - မုတ္တတ္တေ သတ္တိယာ ပန။
အဘာဝတောတ္တမေကေက - မာချာတေန ကိတေန စ။
၁၉၉။ ကြိယာယေဝ နိမိတ္တတ္တာ၊ နိဿယတ္တာ စ ယုဇ္ဇတေ။
ဥတ္တာနုတ္တောပိ ဘာဝေါပ - လဒ္ဓိဟေတု ဟိ ကာရကော။
၂၀၀။ ကရဏေ ဆိန္နရုက္ခော ပ - ရသု ပဟရဏာဝုဓံ။
ပါယေန ဒုတိယော ခါရီ၊ ဂေါတ္တံ ဇာတိ စ အပ္ပတော။
၂၀၁။ ကမ္မေ အာဂတသံဃော ကော၊ သော ဝိဟာရောဝ သံဃိကော။
ဃာတိကော သြဒနော ပစ္စ - တောဒနော ပစိတောဒနော။
၂၀၂။ ဘုဇ္ဇေတေ သြဒနော တျေတ္ထ၊ မုချတော ပစ္စတောဒနော။
ဣတျေတ္ထာမုချတော၊ ဖလနာမူပစာရတော။
၂၀၃။ ဧကကမ္မကြိယာကမ္မေ၊ ဥတ္တေ တံယေဝ မနျတေ။
နေကကမ္မကြိယာကမ္မေ၊ ဥတ္တေ ကိံ တေသု မနျတေ။
၂၀၄။ အပ္ပဓာနံ ဒုဟာဒီနံ၊ နျာဒီနန္တု ပဓာနကံ။
ကမ္မံ ကမ္မေသွနေကေသု၊ ဝုတ္တံ ကမ္မန္တိ မနျတေ။
၂၀၅။ ဒုဟ ယာစ ရုဓိ ပုစ္ဆ၊ ဘိက္ခ သာသ ဝစာဒယော။
နီ ဝဟ ဟရမာဒီ စ၊ ဥဘယေ တေ ဒွိကမ္မိကာ။
၂၀၆။ ဒုဟမာနော ဂဝံ ခီရံ၊ ဂေါပေါ ဒုဟတိ ဝါတိ စ။
ဂေါ ခီရံ ဒုဟိတာ တေန၊ ဒုယှတေ ဝါတိ စာဗြဝုံ။
၂၀၇။ နယမာနော အဇံ ဂါမံ၊ ဇပါလော နယတီတိ စ။
နီယမာနော အဇော ဂါမံ၊ တေန နီယတိ ဝါတိ စ။
၂၀၈။ ကြိယာယာဘိမတံ ကမ္မံ၊ ပဓာနန္တိ ပဝုစ္စတေ။
ကြိယာနိမိတ္တမေကန္တု၊ အပ္ပဓာနန္တိ ဝုစ္စတေ။
၂၀၉။ ယံ ကတ္တုနော ကြိယာယိစ္ဆိ - တံ ကမ္မံ တံ ပဓာနကံ။
ယံ တဗ္ဗိပရိတံ တန္တု၊ အပ္ပဓာနန္တိ ဝါ မတံ။
၂၁၀။ ပဓာနပ္မပဓာနဉ္စ၊ အာချာတဿ ကိတဿ စ။
ဝိသယော ဓမ္မတာယာတိ၊ ဝုတ္တံ ဇာတိနိရုတ္တိယံ။
၂၁၁။ ဂတိဗောဓန္နသဒ္ဒတ္ထ - ဟရကရာကမ္မကာနံ။
ကတ္တာ အကာရိကေ ယော တံ၊ ဝုတ္တကမ္မန္တိ ကာရိတေ။
၂၁၂။ ဒါသော ဂစ္ဆတိ ဂါမန္တျ - ကာရိတေ ကာရိတေ ပန။
ဒါသကော သာမိနာ ဂစ္ဆာ - ပီယတေ ဂါမကန္တိ စ။
၂၁၃။ ဟတ္ထီ သယတျကမ္မာနံ၊ ကာရိတေ ကာရိတေ ပန။
သော သယာပီယတေ ဟတ္ထာ - ရောဟေန ကိတကေပျယံ။
၂၁၄။ ဟေတုကြိယာယ သမ္ဗန္ဓိ - ဘာဝါ ကမ္မန္တိ မနျတေ။
ဖလကြိယာယ ကတ္တာပိ၊ အညထာနုပပတ္တိတော။
၂၁၅။ ကာရိတော ဓာတုတောညေန၊ သုဒ္ဓကတ္တုပယောဇနံ။
တထာ ပယောဇကဿာပိ၊ ကာရိတန္တာပိ ကာရိတော။
၂၁၆။ သော ဟိ လောကပ္ပမာဏေန၊ တိက္ခတ္တုံ ပဋိပဇ္ဇတေ။
အတြ ဟိ ပုရိမော လုတ္တော၊ ကာရိတောဝ နိပါတနာ။
၂၁၇။ သူဒေန ပစ္စတေ သူဒေါ၊ သူဒဇေဋ္ဌေန ပါစိယ။
တေ မစ္စေန တထာ ရညာ၊ တထောဒနောဒနာဒိကံ။
၂၁၈။ သူဒေါ ပစတိ ပါစေတိ၊ သူဒဇေဋ္ဌောပိ တေန ဝါ။
တံပိ ဝါ တဿ ဝါ မစ္စော၊ တထာ ရာဇာ တထာတိ ဝါ။
၂၁၉။ ဟေတုကြိယာယ သမ္ဗန္ဓီ၊ ကမ္မတာ ပဋိပဇ္ဇတေ။
ဟေတုကြိယာပဓာနတ္တာ၊ အညထာနုပပတ္တိတော။
၂၂၀။ ဖလကြိယာယ သမ္ဗန္ဓီ၊ ကတ္တုတာ ဝါ ဝိဓာနတော။
ဒုတိယာယ ဝိကပ္ပေန၊ ဣတရေသု ပတီယတေ။
၂၂၁။ ကမ္မာနပေက္ခပေက္ခတ္တာ၊ သဘာဝေန အကမ္မကာ။
ဧကကမ္မာ ဒွိကမ္မာ စ၊ ယထာ ဘူဂမုနျာဒယော။
၂၂၂။ ဧကကမ္မကရော ဓာတု - သဟိတော ကာရိတော သဓာ။
တောပသဂ္ဂေါ ယထာယောဂံ၊ သကမ္မာ ကမ္မကာရကော။
၂၂၃။ သပ္ပစ္စယောပသဂ္ဂေသု၊ ဥပဋ္ဌာနဝိသေသတော။
တေ သတောယေဝ အတ္ထဿ၊ ဒီပါဒီဝ ပကာသကာ။
၂၂၄။ ဘာဝေတိ ကုသလံ ဓမ္မံ၊ မဂ္ဂံ ဂမယတေ ယတိံ။
ဘောဂီနုဘဝတိ ဘောဂံ၊ ဥဂ္ဂစ္ဆတိ ဒိဝါကရော။
၂၂၅။ ဒိန္နသုင်္ကော ဓရာဓရော၊ ဒက္ခိဏေယျောရဟာ ယတိ။
ဒါနိယော ဗြာဟ္မဏော သမ္ပ - ဒါနေ နိဂ္ဂတဂါမိကော။
၂၂၆။ ဂါမကော ပဘဝေါ ဟေတု၊ ပါဒါနေပ္ပကတော ပန။
ဂေါတ္တံ ဇာတိ စ သြကာသေ၊ သမ္ပန္နဝီဟိ ဂါမကော။
၂၂၇။ ရုက္ခံဝ ပဝနံ ဝါသော၊ နီလယောနုတ္တဘာဝတော။
ကရဏာဒိစတုက္ကတ္တံ၊ နေဝါချာတေ မုဒါဟဋံ။
၂၂၈။ ပရိတ္တဝိသယတ္တာချာ - တေနုတ္တံ ကာရကတ္တယံ။
ဗဟုတ္တဝိသယတ္တာ ကိ - တေနုတ္တံ သတ္တကာရကံ။
၂၂၉။ ဂေါတ္တံ ဂေါဇာတိ သူဒေန၊ ဌီယတေ ပစနံ ကြိယာ။
ဘာဝေ ဝိဓာနတော ယတ္ထ၊ သော သမာသေနုဒါဟဋော။
၂၃၀။ ဒဗ္ဗ ဂုဏ ကြိယာ နာမ၊ ဇာတျတ္ထေ တဒ္ဓိတော ဘဝေ။
ဘာဝေါ ကြိယာယ မာချာတော၊ ကိတော စာတိ ဝိသေသတာ။
၂၃၁။ ဓာတွတ္ထသင်္ချာလိင်္ဂေါတိ၊ ကာရကန္တရနာကုလော။
အာချာတိကော သလိင်္ဂေါ တု၊ သသင်္ချော ကိတကောတိ စ။
၂၃၂။ ဒသဗလော ဇိနော ဝေဏိ - ကော ဂန္ဓဗ္ဗော စ သာမိနိ။
သော စာချာတကိတာ သမ္ဗ - န္ဓာနုတ္တတ္တာနုဒါဟဋော။
၂၃၃။ ဇိတမာရော ဇိနော ဆိန္န - ရုက္ခောသျာဂတဂါမိကော။
ဂါမော ဒိန္နဓနော ယောဓော၊ နိက္ခန္တဂဟိတော ဂဟော။
၂၃၄။ သမ္ပန္နဝီဟိ ဂါမောတိ၊ သမာသေန ဆကာရကံ။
နုတ္တံ ဒသဗလော နာထော၊ တျုတ္တော သာမိ စ မနျတေ။
၂၃၅။ နေယျော အညပဒတ္ထေန၊ တပ္ပယောဂဝသေန ဝါ။
တဂ္ဂုဏော န တထာ တဂ္ဂု - ဏော စ အညပဒတ္ထကော။
၂၃၆။ နီယတေ ဆိန္နဟတ္ထောယံ၊ နရော နီလပဋော နရော။
သမ္ဗုဒ္ဓပ္ပမုခေါ သံဃော၊ ပုရိသော ဒိဋ္ဌသာဂရော။
၂၃၇။ ဒွန္ဒေန ဒိဂုဏာ ကမ္မ - ဓာရယေန သမုစ္စယ။
တုလျတ္ထဒီပကာ ဒဿ - နာ တေ ဝုတ္တာ န ကာရကာ။
၂၃၈။ သာမီနုတ္တော ဗျယီဘာဝါ၊ မာဒီဟုတ္တော သကာရကော။
တဒ္ဒီပကဝိဘတ္တီနံ၊ လောပလေသာနုမာနတော။
၂၃၉။ သမာသပဒတော အည - သာပေက္ခတာ သမာသတာ။
သဒ္ဒန္တရိကသာပေက္ခ - ဘာဝတောတျ ပရေ ဝိဒူ။
၂၄၀။ ဒေဝဒတ္တဿ ကဏှာဒ - န္တာ ရညော ပုရိသော ဂဝေါ။
အဿော စာတိ စ သာပေက္ခ - ဘာဝန္တု မနပေက္ခိယ။
၂၄၁။ တုလျာဓိကရဏတ္တေ စ၊ စတ္ထတ္တေ စ ကတေန တံ။
အပေက္ခာယပိ သင်္ခါရော၊ နဿတီတိ အမာဒိ စ။
၂၄၂။ ရာဇဿော ရူပဝါ သလ္လ - ဝိဒ္ဓေါ ဂေါတိ သမာသတာ။
သာပေက္ခေပိ ပဓာနတ္တာ၊ အပ္ပဓာနပဒဿ တု။
၂၄၃။ သာပေက္ခတ္တာ သမာသဿာ - ဘာဝေပိ ဂမကေ သတိ။
ဝါကျေ ဝိယ သမာသေပိ၊ ဘဝတျေဝ သမာသတာ။
၂၄၄။ ဖုသိတွာနာင်္ဂိနာင်္ဂဉ္စ၊ တာဝ ပစ္ဆာင်္ဂိနာ သဟ။
သမ္ဗန္ဓော ဒေဝဒတ္တဿ၊ ဂုရုကုလန္တိ အာဒိသု။
၂၄၅။ ဂေယျာဒိနေဝ သမ္ဗန္ဓီ၊ နာဒိသဒ္ဒေါ ပုနာဒိနာ။
သမဿတေ အယုတ္တတ္ထ၊ သမာသော ပဋိပဇ္ဇတေ။
၂၄၆။ ပါယေန ဝုတ္တသုတ္တတ္တာ၊ အထ ဝါဒေါ ပုနာဒိကော။
ပစ္ဆာ နာဒိ သ ယုတ္တတ္ထော၊ ပုန ဂေယျာတိအာဒိသု။
၂၄၇။ တဒဘာဝါဒိနာ လက္ခေျာ၊ ပသဇ္ဇပဋိသေဓနော။
တဿဒိသေန လက္ခေျာပ - ရိယုဒါသောတိ ဒုဗ္ဗိဓော။
၂၄၈။ မိစ္ဆာဉာဏေန ယုတ္တော ဟိ၊ သဒ္ဒေါ ဘာဝါဒိ တုလျတာ။
ဝါစီ တေနေသ ယုတ္တတ္ထော၊ ကတွာနာဗြာဟ္မဏောတိ စ။
၂၄၉။ သမာသော ပဒသင်္ခေပ - ဝသေနေကဝိဓော ထဝါ။
သဒ္ဒအတ္ထသမာသေန၊ လုတ္တာလုတ္တဝသေန ဝါ။
၂၅၀။ နိစ္စာနိစ္စဝသေနာပိ၊ သမာသော ဒုဗ္ဗိဓော ထဝါ။
အာဒိမဇ္ဈုတ္တရာနမ္ပိ၊ ပဒါနံ လောပတော တိဓာ။
၂၅၁။ ဂေါဓနော ဥရသိလောမော၊ ကုမ္ဘကာရော ယထာရဟံ။
ဒတ္တော အဿရထော ရူပ - မိစ္စာဒိ စ ယထာက္ကမံ။
၂၅၂။ ဥတ္တရပဒလောပတ္တာ၊ ကာရကညောညပေက္ခတော။
ဥတ္တတ္တာ ဝါ သမာသေန၊ န ကြိယာဿရထာဒိသု။
၂၅၃။ စတုဗ္ဗိဓောပိ ပုဗ္ဗုတ္တ - ရူဘယညပဒတ္ထက။
ပဓာနတော ယထာယောဂံ၊ သမာသော ပဋိပဇ္ဇတေ။
၂၅၄။ သမာသော ဗျယီဘာဝေါ ဝါ၊ တုလျာဓိကရဏေ ဒိဂု။
တပ္ပုရိသော စ ဒွန္ဒော စ၊ ဗာဟိရတ္ထောတိ ဆဗ္ဗိဓော။
၂၅၅။ ယထောပနဂရံ တဿ - မီပေါ နီလုပ္ပလုပ္ပလံ။
တိယင်္ဂင်္ဂါနိ ရာဇဿော၊ အဿော ဆိန္နကရော နရော။
၂၅၆။ သဝိသေသာ ဣမေ ပဉ္စ၊ အတ္ထာ နေယျာ နယညုနာ။
သမဏဗြာဟ္မဏာ ဒွေက - ပဒတ္ထာတွဝိသေသနာ။
၂၅၇။ ဝိသေသနဝိသေသျတ္ထံ၊ ဒွန္ဒဝဇ္ဇေသု ဝိဇ္ဇတိ။
န ဒွန္ဒေ တေနနေသန္တေ - ကတ္ထီဘာဝေါ န ယုဇ္ဇတိ။
၂၅၈။ နိပါတော သနိပါတေန၊ ဒွန္ဒေဝ ပရိဒီပိတံ။
သတ္ထေ ဝုတ္တိမုခေနာည - မတ္ထံ ဒီပေတိ နာညထာ။
၂၅၉။ တေန ဒွန္ဒဿ စေကတ္ထီ - ဘာဝေါ ဝုစ္စတိ ကေနစိ။
ကြိယာသမ္ဗန္ဓသာမည - ဘာဝတောတျပရေန စ။
၂၆၀။ ကြိယာသမ္ဗန္ဓမတ္တေနာ - နပေက္ခနမပေက္ခနံ။
ယထာ တေန မဘိန္နတ္ထာ - ပရတေကတ္ထတာ မတာ။
၂၆၁။ တဒ္ဓိတုတ္တပယောဂေဘိ - ဓမ္မိကော ဘိက္ခု ပဉ္စမော။
အက္ခရောဃာတိကောဟာရော၊ ဒက္ခိဏေယျော စ ဗြာဟ္မဏော။
၂၆၂။ ဂေါတ္တံ ဇာတိ တထာ ရုက္ခ - ဝါ ဒေသော ဝေဏိကော နရော။
ဣစ္စာဒိကော ဝိသေသျောဝ၊ ဥတ္တော ဝါဏာဒိယောဂတော။
၂၆၃။ ဒါသိကံ ဟတ္ထကမ္မံ နာ - ဝိကော ပေါသော ဘိဓမ္မိကော။
ဘိက္ခု သောဝဂ္ဂိကံ ကမ္မံ၊ ပဗ္ဗတေယျာ စ ကုန္နဒီ။
၂၆၄။ ကာယိကာ ဝေဒနာ ဝါသိ - ဋ္ဌောစ္စာဒီသု ဝိသေသနံ။
ယေန ဝါ သာဒိယောဂဿ၊ ဝုတ္တတ္တာ ဥတ္တမုစ္စတေ။
၂၆၅။ သာမညာဗျယဘာဝေန၊ တိဝိဓံ တဒ္ဓိတံ ဣဒံ။
ဏာဒိ ပဌမတောယေဝ၊ ဝိဘတျန္တာ ပဇာယတေ။
၂၆၆။ ဝါသိဋ္ဌော သဗ္ဗထာ ပါစ - ကတ္တမိစ္စာဒိ - ဇ္ဇာဒိကံ။
တွာဒိကဉ္စ ဝိဘတျတ္ထေ၊ ဧကစ္စေ ကာရကာဒိကေ။
၂၆၇။ ဝသိဋ္ဌဿ အပစ္စန္တိ၊ ဆဋ္ဌျန္တာ ဏာဒယောဘယံ။
ဇာတာ ပဌမတောပစ္စ - တေကံ ဂဏှန္တိ နောဘယံ။
၂၆၈။ သမာသော ပဒသင်္ခေပေါ၊ သပ္ပစ္စယပဒံ ပန။
တဒ္ဓိတန္တိ စ နာနတ္တ - မုဘိန္နမုပလက္ခယေ။
၂၆၉။ ဏာဒျေဝ တဒ္ဓိတံ နာမ၊ ပရိကပ္ပဝသာဒိနာ။
နိပ္ဖာဒေတဗ္ဗကမ္မဉ္စ၊ တဒ္ဓိတန္တျ ပရေ ဝိဒူ။
၂၇၀။ ဘေဒသံသဋ္ဌဘာဝေန၊ နေကတ္ထန္တု သဟဗ္ဗ စ။
နိစ္ဆာဝစနမေတဿ၊ ဟောတိ ဒွန္ဒေကသေသတာ။
၂၇၁။ နေကတ္ထာဘိဟိတေကေ - သဒ္ဒတ္ထာ ပဋိပဇ္ဇတေ။
ဒဗ္ဗပဒတ္ထိကေနေက - သောသော တိမုနိသတ္ထကေ။
၂၇၂။ စန္ဒသတ္ထေ ပနေကော ဒွေ - ဟံ မယန္တျာဒယော ယထာ။
တထာ သဒ္ဒေကဗဟွတ္ထာ၊ နေကသေသောတိ ဝုစ္စတေ။
၂၇၃။ ဧဝံပျဋ္ဌကထာဒီသု၊ မုနိန္ဒသမယညုနာ။
ဝုတ္တတ္တာ ဧကသေသဿ၊ လက္ခဏံ ကဉ္စိ လက္ခယေ။
၂၇၄။ လိင်္ဂေကသေသတ္တံ ကေစိ၊ အနိမိတ္တကဘာဝတော။
ဝိဘတျန္တေကသေသတ္တံ၊ မေကေ သမယပါလကာ။
၂၇၅။ သရူပသမုဒါယေက - သေသတ္တ မပရေ ဝိဒူ။
ဣစ္စေဝမတ္ထဗျာချာနေ၊ တယော ပက္ခာ ဝဝတ္ထိတာ။
၂၇၆။ ဧကကာရကတဉ္စေဝ၊ အဗုဒ္ဓိဉ္စ နိဒဿိတုံ။
ဗျာသတ္ထဉ္စ ဝိဘတျန္တံ၊ စ သဒ္ဒေါ စ ကရီယတေ။
၂၇၇။ စတုသာဓာရဏတော ဂေါဝ၊ ဒီပေါဝ သနိဒဿနော။
ဝိဘတ္တိယာ တထေကာယ၊ နေကသင်္ချာ ပတီယတေ။
၂၇၈။ ကေစိ အပ္ပစ္စယတ္တာ တံ၊ သုဒ္ဓနာမပဒန္တိ စ။
အပရေ ပရိကပ္ပေန၊ ပစ္စယေ ဝိဂတေပိ စ။
၂၇၉။ တဒ္ဓိတန္တိ စ ဧကစ္စေ၊ ဒွန္ဒန္တိ စ အဘာဝတော။
တံ လက္ခဏဿ တံ နာမေ၊ နေကသေသောတိ လက္ခယေ။
၂၈၀။ ဧကသေသပကပ္ပေန၊ ပူရေန္တီတိ ကိတေန ဝါ။
ပုရိသာတိ ပုရိဋ္ဌာနေ၊ သေန္တီတျုပပဒေန ဝါ။
၂၈၁။ မာတရော ပိတရော သာရိ - ပုတ္တာ ပုတ္တာတိ အာဒိသု။
ဧကသေသော ဝိရူပါနံ၊ ဝုတ္တော ယောဂဝိဘာဂတော။
၂၈၂။ မာတရော ပိတရော နာမ - ရူပံတျာဒီသု ပုဗ္ဗကံ။
ပဒံ ပရမ္ပိ ဝါ ဧက - ဒေသော ဝါ ပျဝသိဿတေ။
၂၈၃။ ပစ္ဆာ ပေက္ခတိ သာမည - မေကသေသေပိ နိဋ္ဌိတေ။
တေနေကဝစနံ ဟောတိ၊ နာမရူပန္တိ အာဒိသု။
၂၈၄။ သရူပဿေဝ သဒ္ဒတ္ထ - သဒ္ဒတ္ထာနံ သဘာဝတော။
တိဗ္ဗိဓတ္တံ ယထာ မာသာ၊ ကုဋိလာ ပုရိသာတိ စ။
၂၈၅။ ဘုသောရိတေပိ နေကတ္ထံ၊ ဝိစ္ဆာဝစန မီရိတံ။
အာမေဍိတံ ပနေကတ္ထံ၊ ဒွတ္တိက္ခတ္တု မုဒီရိတံ။
၂၈၆။ ဒွိတ္တံ ဝိစ္ဆာယမေကဿ၊ နေကတ္ထဿ နိပါတနာ။
နတ္ထေဝါ မေဍိတေ ဒွိတ္တ - မေကတ္ထတ္တာ ဘယာဒိနာ။
ဧဒိသီဝ ဂတေ ကစ္စေ၊ ဒွိဘာဝံ နေကရူပတော။
၂၈၇။ ဘိန္နဝတ္ထူနိ ဒဗ္ဗေန၊ ဂုဏေန စ ကြိယာယ ဝါ။
ဗျာပိတုံ ဝတ္တုနော ဣစ္ဆာ၊ ဝိစ္ဆာတျေဝ ပတီယတေ။
၂၈၈။ ဂါမေ ဂါမေ ဇလံ ဂါမော၊ ဂါမော ရမ္မောဝ ဂမျတေ။
ဂါမော ဂါမော ကွစိ သျာဒိ - လောပေါကေကန္တိအာဒိသု။
၂၈၉။ သာပေက္ခတ္တာ ဒွိရူပတ္တာ၊ စေကဿေဝ သမာသတာ။
န ဝိစ္ဆာယံ တဒတ္ထောတိ၊ သာပေက္ခေန သမာသတာ။
၂၉၀။ ပစတီ သြဒနံ သူဒေါ၊ ပစ္စတေ တေန သြဒနော။
ဌီယတေ ဒေဝဒတ္တေနာ - ချာတေနုတ္တံ တိကာရကံ။
၂၉၁။ ဓာတွတ္ထော ကာရကာမိဿော၊ သုဒ္ဓေါ ဘာဝေါတိ မနျတေ။
သော ကြိယာ သာ စ သာမညံ၊ တဿေကတ္တံ ပတီယတေ။
၂၉၂။ တဒေကဝစနန္တဉ္စ၊ ပဌမဿ ထဝါ ဗဟု။
ဝစနံ ကတ္တုဘေဒါဒျ - ပေက္ခိတေ ဘဝတေ ကဒါ။
၂၉၃။ သဗ္ဘိ သမ္ဘူယတေ အာသီ - ယန္တေ ဥဋ္ဌာသိကာ ယထာ။
ဘဝန္တေဟီတိ သင်္ချာနံ၊ ဘေဒါဘေဒေါ ကဒါစိပိ။
၂၉၄။ ပဟီယိဿန္တိ တေ ရူပံ၊ ဘူယတေတိ စ ကေနစိ။
ကမ္မကတ္တူသု ဘာဝေ စ၊ ရူပံ ဝုစ္စတိ တညုနာ။
၂၉၅။ ဘာဝကတ္တရိ ပစ္စတ္တံ၊ သဒ္ဒနီတိယ မုစ္စတေ။
ပစ္စတ္တံ တတိယတ္ထေတိ၊ ဒဠှံ ကတွာ ပရေန စ။
၂၉၆။ ကတ္တာဒိဘေဒလိင်္ဂတ္ထ - မတ္တာပေက္ခေန တိဋ္ဌတေ။
ယော ကဒါစိ သ ဝတ္တိစ္ဆာ - နုပရောဓေန မနျတေ။
၂၉၇။ သကမ္မာကတ္တုကမ္မေသု၊ အာချာတပစ္စယာ သိယုံ။
န စ ဘာဝေ အကမ္မာ တု၊ ကတ္တုဘာဝေ န ကမ္မနိ။
၂၉၈။ ကမ္မဿာဝစနိစ္ဆာယံ၊ သကမ္မာချာတပစ္စယာ။
ဘာဝေပိ တံ ယထာ ဂေဟေ၊ ဒေဝဒတ္တေန ပစ္စတေ။
၂၉၉။ ဝတ္တိစ္ဆာ န ဘဝေ သန္တ - မပျသန္တမ္ပိ သာ ဘဝေ။
တံ ယထာ နုဒရာ ကညာ၊ သမုဒ္ဒေါ ကုဏ္ဍိကာတိ စ။
၃၀၀။ သတ္တာကရဏရူပါ ဟိ၊ ဓာတွတ္ထာ သကလာ တတော။
ဘာဝေါ ကြိယာ စ သာမညံ၊ သကလေသွေဝ ဂမျတေ။
၃၀၁။ သာမညသဒ္ဒတော တေန၊ သဗ္ဗဓာတွတ္ထဒီပနံ။
ယုတ္တံ ဘာဝါဒိသဒ္ဒေန၊ ရုက္ခဝစ္စာ ဓဝါဒီဝ။
၃၀၂။ ဝိသေသာ န တု ပါကာဒိ၊ သဗ္ဗဓာတွတ္ထဒီပကာ။
န ပလာသာဒယော သဒ္ဒါ၊ သဗ္ဗရုက္ခပ္ပကာသကာ။
၃၀၃။ ကြိယာဝိသေသနံ ကတ္တု - ကမ္မတ္ထေ တိဋ္ဌတေ ယတော။
သိဒ္ဓံ နျာယေန တံ တသ္မာ၊ န တဒတ္ထံ ဝိသုံ ဝိဓိ။
၃၀၄။ မုဒုံ ပစတိ ဣစ္စတြ၊ ပစနံ ဘဝတီတိ စ။
သုခံ သယတိ ဣစ္စတြ၊ ကရောတိ သယနန္တိ စ။
၃၀၅။ ကမ္မသဒ္ဒေါ ယထာ ကမ္မေ၊ တထာ ဘာဝေပိ တေန ဝါ။
ကမ္မတ္ထေ တျေကသေသေန၊ ပဒီပနယတောပိ ပါ။
၃၀၆။ ဗာလာဝတာရ သမ္ဗန္ဓ - စိန္တာဒီသု နပုံသကံ။
ဒုတိယေကဝစနန္တံ၊ ယံ တံ တဂ္ဂတိတီရိတံ။
၃၀၇။ သမုဒါယီနမေကတ္တေ၊ ပေက္ခိတေ ပထမာ သိယာ။
ဘေဒတ္ထေ ဒုတိယာတျတ္ထ၊ ဗျာချာနေ တမုဒီရိတံ။
၃၀၈။ ဝိသေသျတဗ္ဗိသေသာန - မဘေဒတ္တမပေက္ခတိ။
ယဒါ လိင်္ဂတ္ထမတ္တတ္တာ၊ တဒေတ္ထ ပထမာ ဘဝေ။
၃၀၉။ ယဒါ ပေက္ခတိ ဘေဒတ္တံ၊ တဒါ တဿင်္ဂဘာဝတော။
ဒုတိယာ စ တဒေကတ္တာ၊ သဒေကစနံ သိယာ။
၃၁၀။ အသမ္ဘာရသဘာဝတ္တာ၊ ကတ္တုနော န စ ကာရကံ။
ဘဝေတေနေဝ တညူဟိ၊ တတိယန္တံပိ မနျတေ။
၃၁၁။ ကြိယာဝိသေသနံ နာမ၊ ဆဋ္ဌျန္တျပရေ ဝိဒူ။
ဧကာဟေနေဝ ပါယာသိ၊ ပါဒဿုက္ခိပနန္တိ စ။
၃၁၂။ ကြိယာဝိသေသနံ သတ္ထေ၊ ဝုတ္တံ ဓာတုဝိသေသနံ။
ဘာဝနပုံသကံ တျေဝ၊ သာသနေ သမုဒီရိတံ။
၃၁၃။ ကြိယာဝိသေသနံ နာမ၊ ဒုဗ္ဗိဓံ သမုဒီရိတံ။
ဗဟိဒ္ဓါလပနံ သဗ္ဗ - မဗဟိဒ္ဓ မုဒါဒိကံ။
၃၁၄။ ယော သာဓယိတုံမာရဒ္ဓေါ၊ န စ နိဋ္ဌမုပါဂတော။
ဝတ္တမာနောတိ သော ဝုတ္တော၊ သောဝ ဝိပ္ပကတောတိ စ။
၃၁၅။ ကြိယာသန္တာန ဝိစ္ဆေဒေ၊ ကာလောတီတော အနာဂတော။
အနာရဒ္ဓကြိယာယန္တိ၊ ကာလတ္တယူပလက္ခဏံ။
၃၁၆။ အနာဒျနိဓနော နိစ္စော၊ ပစ္စယာနုပဝတ္တိတော။
နိဒဿိတော သဒါ ယော သော၊ ကာလော ကာလညုနာ မတော။
၃၁၇။ ယထာ နိစ္စောပိ အာကာသော၊ ဃဋာဒိဒဗ္ဗသံယုတော။
ဃဋာကာသာဒိဘေဒေန၊ အဘိန္နေကောပိ ဘိဇ္ဇတေ။
၃၁၈။ ကြိယာဘေဒူပစာရေန၊ ကာလေကောပိ ပဘိဇ္ဇတေ။
ကတ္တာဒိဘေဒတောယေဝ၊ ကြိယေကာပိ ဘိဇ္ဇတေ။
၃၁၉။ ကြိယာ သာမညဘာဝေန၊ အဘိန္နာပိ ပဘိဇ္ဇတေ။
ဒေသာဒိနာတိ မာချာတေ - ကသေသောတျ ပရေ ဝိဒူ။
၃၂၀။ ကတ္တာဒိဘေဒတောယေဝ၊ ကြိယာဘေဒေါ ပတီယတေ။
နေကသေသေန မိစ္စေဝံ၊ နျာသာဒီသု နိသေဓနံ။
၃၂၁။ မဇ္ဈိမော တုမှယောဂေန၊ အမှယောဂေန ဥတ္တမော။
တဿေသနာမယောဂေန၊ မဌမောတ္တေန နုတ္တကေ။
၃၂၂။ ဓာတွတ္ထဝါစကေနေဝ၊ ပစ္စယေန ပယောဂတော။
နာမတ္တံ ပဇဟိတွာန၊ ဓာတုရူပေဝ တိဋ္ဌတေ။
၃၂၃။ အတ္တနာ ဝစနီယဿ၊ ကတ္တုကမ္မေဟိ ပါကဋော။
သကတ္တုကော သကမ္မောတိ၊ ဓာတုရူပေါတိ ဝုစ္စတိ။
၃၂၄။ ပဗ္ဗတာယတိ သံဃောတိ၊ ဗာလံ မုဏ္ဍာယတီတိ စ။
ဂမကတ္တာ စ သာပေက္ခာ - ပေက္ခိတဗ္ဗော ပယုဇ္ဇတေ။
၃၂၅။ သညာယံ ဝတ္တုမိစ္ဆာယံ - မာချာတံ နာမိကံ ဘဝေ။
မာခလိစ္စာဒိသွိစ္စေဝံ၊ သဒ္ဒနီတိယ မာဟဋံ။
၃၂၆။ ဥပဂ္ဂဟော တု ကတ္တာဒိ - သာဓနန္တျ ပရေ ဝိဒူ။
ကေစိ တဿ ဝိသေသောတိ၊ ကာရကေ တဿ သင်္ဂဟော။
၃၂၇။ ဝုတ္တေပိ ဓာတုနာ ဘာဝေ၊ ဝိဘတ္တပစ္စယာဝိနာ။
ဘာဝိနော ဓာတုနတ္ထဿာ - ချာတေ ပါကဋဘာဝတော။
၃၂၈။ ကြိယာပဓာနဘာဝေန၊ ကြိယမာစိက္ခတေ ဣတိ။
အာချာတံ ကေစိ ဓာတွတ္ထော - ပစာရေနာတိ စာဗြဝုံ။
၃၂၉။ ဗျတိရေကေန ဂစ္ဆာမိ၊ န ဂစ္ဆာမီတိ ပါကဋာ။
ကိံ ကရောသိ ပစာမီတိ၊ ပဥှတော ဝါ ပျယံ ကြိယာ။
၃၃၀။ ဧဝမ္ပိ သာဓျရူပတ္တာ - ချာတဿေဝ ကြိယာပဓာ။
နတ္တံ ကိတဿ ဒဗ္ဗပ္ပ - ဓာနတ္တံ သိဒ္ဓရူပတော။
၃၃၁။ ပါစကော ဘတ္တကာရော ပ - ဟရဏံ သျာဒိ ပစ္စိတော။
သြဒနော ဒါနိယော ဘိက္ခု၊ ပဘဝေါ ဟိမဝါဒိကော။
၃၃၂။ အာသနံ မဉ္စပီဌာဒိ၊ ဌာနံ ဌာနကြိယာ ဣတိ။
ကိတေနာဘိဟိတံ သတ္တ - သာဓနံ ဘာဝသတ္တမံ။
၃၃၃။ ကတ္တုကရဏ ကမ္မသ - မ္ပဒါနာဝဓိယာဓိက။
ရဏဘာဝပ္ပဘေဒေန၊ သာဓနံ သတ္တဓာ မတံ။
၃၃၄။ ဘာဝေါ တု ကာရကာမိဿော၊ ဓာတွတ္ထော သ ကြိယာ ယဒိ။
ဓာတွတ္ထော ဓာတုနာ ဝုတ္တော၊ ကိမတ္ထံ ပစ္စယော ကတော။
၃၃၅။ န ကေဝလာ ပယုဇ္ဇန္တိ၊ ပကတီ န စ ပစ္စယာ။
ဣတိ နျာယေန ဘာဝတ္ထ - သာဓနာပေက္ခဘာဝတော။
၃၃၆။ သိဒ္ဓသာဓျပ္ပဘေဒေန၊ ဒုဓာ ဘာဝေါ ယထာက္ကမံ။
ပါကော ဌီယတိ ဣတျတ္ထ၊ ဗျာချာနေ သဒ္ဒသတ္တိယာ။
၃၃၇။ မာတုလောစရိယော တျေကော၊ ပျေဝံ ဘာဝေါပိ မနျတေ။
ကြိယာ စ သာဓနဉ္စေတိ၊ ပကတျာ ပစ္စယေန စ။
၃၃၈။ ဘာဝေါတိ သတ္တိမံ ဒဗ္ဗံ၊ ယံ ယဒုပစရီယတေ။
ဆဋ္ဌီ သာမိနီ တံယောဂေ၊ ဓာတွတ္ထာပေက္ခိတေ ပန။
၃၃၉။ ကတွတ္ထေ တတိယာ ဆဋ္ဌီ၊ ကေစိ လာခူပမာတိ စ။
ကြိယာဝိသေသနံ ဆဋ္ဌီ - ယန္တံ တံယောဂတောတိ စ။
၃၄၀။ ဘေဒေါ သမ္ဗန္ဓီဘေဒေန၊ ဘာဝဿုပစရီယတေ။
အဘေဒဿ အဘေဒေါ စာ - ဘာဝါကာသာဒိနော ယထာ။
၃၄၁။ ပါကာ တေလဃတာဒီနံ၊ ဟောန္တိ ပါကောတိ ဝါ ကိတေ။
ဘာဝေချာတေ အယုတ္တတ္တာ၊ န ဆဋ္ဌီ သာမိလက္ခဏေ။
၃၄၂။ ကြိယာနိဿယကတ္တာဒိံ၊ ဓာရေန္တမ္ပိ ကဋာဒိကံ။
ကြိယာဓာရော ယထာ ကတ္တု - ဒဗ္ဗေ တန္နိဿယေပိ စ။
၃၄၃။ ဘာဝဿာပိ အဘာဝဿ၊ ကတ္တုပညတ္တိ ဝုစ္စတေ။
သဒ္ဒနီတိယမေတဿ၊ ဒဗ္ဗဘေဒေန ဘေဒတော။
၃၄၄။ ဝေါဟာရဝိသယတ္ထတ္တာ၊ ကိတေ ဒဗ္ဗပ္ပဓာနတော။
ဒဗ္ဗဿေဝ စ နေယျတ္တာ၊ ဘာဝေါ ဒဗ္ဗန္တိ တညုနာ။
၃၄၅။ သဒ္ဒဝုတ္တိနိမိတ္တေန၊ ကြိယာဇာတျာ ဝိသေသိတာ။
ကြိယာ ဝုစ္စတိ ဒဗ္ဗန္တိ၊ သတ္တိဗျတ္တိ ကြိယန္တရေ။
၃၄၆။ ကိရတီတိ ကိတော သိဿ - ကင်္ခံ ဝိက္ခိပတာပနေ။
တီတျတ္ထော ပါယဝုတ္တိတ္တာ၊ ကိတကောတိ ပဝုစ္စတိ။
၃၄၇။ ပစ္စယော ကိတကေ ကိစ္စ၊ ကိတဘေဒေန ဒုဗ္ဗိဓော။
ပဉ္စ တဗ္ဗာဒယော ကိစ္စာ၊ ကိတညေ ဏာဒိပစ္စယာ။
၃၄၈။ ပစ္စယော တိဝိဓော ကိစ္စ - ကိတကိစ္စကိတဗ္ဗသာ။
ဘာဝကမ္မေသု ကတွတ္ထေ၊ တီသု ဝါတျ ပရေ ဝိဒူ။
၃၄၉။ ကိစ္စာဓာတူဟျကမ္မေဟိ၊ ဘာဝေယေဝ နပုံသကေ။
တဒန္တာ ပါယတော ကမ္မေ၊ သကမ္မေဟိ တိလိင်္ဂိကာ။
၃၅၀။ ကိတာ ကတ္တရိ ဝိညေယျာ၊ ဣဒမေဝေါပလက္ခဏံ။
တေန ကိစ္စကိတာ ကတ္တု - ကမ္မဘာဝါဒိကေ သိယုံ။
၃၅၁။ နျာသေ သုတ္တေန ယေ ဏာဒီ၊ လက္ခိတာ တေ တိကာလိကာ။
ဝုတ္တာ အလက္ခိတာ ကာလ - မုတ္တေကဒွိတ္တိကာလိကာ။
၃၅၂။ သေန သေန အနိဒ္ဒိဋ္ဌ - ကာလာ အညေ န လက္ခိတာ။
တေ လက္ခိတာဝ နိဒ္ဒိဋ္ဌ - ကာလာ ယေ ရူပသိဒ္ဓိယံ။
၃၅၃။ တေသံ တေကာလိကတ္တေပျ - တီတေဝေါပပဒတ္ထတော။
ယထာ ပုရိန္ဒဒေါစ္စာဒေါ၊ ဝတ္တမာနေတိ ကေနစိ။
၃၅၄။ နေကဘဝေန ဘိန္နေပိ၊ သန္တာနေနေကတ္တံ ပတိ။
ဝတ္တမာနံ ကတံ ဗုဒ္ဓ - ဝံသအဋ္ဌကထာဒိသု။
၃၅၅။ ဝိသုဒ္ဓိမဂ္ဂဋီကာယံ၊ တံကာလာပေက္ခနေပိ ဝါ။
ဇာတကဋ္ဌကထာယန္တု၊ ဣတော ပေက္ခာယ တီတတာ။
၃၅၆။ ဒတ္တော ဒါနိ တဒါ လုဒ္ဒေါ၊ အဟောသိ ဝိဟရာမဟံ။
တဒါ သုမေဓဘူတောဟံ၊ ဂစ္ဆာမိ အမ္ဗရေ တဒါ။
၃၅၇။ ပစ္စုပ္ပန္နခဏာပေက္ခံ၊ ယတောတီတမနာဂတံ။
တတော ဧကက္ခဏေ ကာတုံ၊ ယုတ္တရူပေါဝ ဝိဂ္ဂဟော။
၃၅၈။ ယတော ပုဗ္ဗာပရော ဘာဂေါ၊ တမုပါဒါယ မနျတေ။
တေကာလိကောတိ ဝတ္တိစ္ဆာ - ယတ္တဘာဝေန ဝုတ္တိတော။
၃၅၉။ ပစ္စုပ္ပန္နကြိယာယေဝ၊ ကာရကတ္တူပစာရတော။
ယောဂျတ္တာ ဝါ အတီတာနာ - ဂတာနံ ကတ္တုတာ သိယာ။
၃၆၀။ ယထာ ပစံပိ ယောဂျတ္တာ၊ ပါစကောတိ ပဝုစ္စတိ။
ဧဝံ ကရဏယောဂျတ္တာ၊ ကတ္တုတာကရဏေပိ စ။
၃၆၁။ သမာသတ္တာ ဝိဘတ္တီနံ၊ လောပေဝေါပပဒေ ကတေ။
နွာဂမော တညုနာ ရူပ - သိဒ္ဓိယံ သမုဒါဟဋော။
၃၆၂။ ကစ္စာယနေ စ နျာသေ စ၊ ဝုတ္တာလုတ္တသမာသတာ။
သမာသေ နွာဂမေနေဝ၊ ကိတေ လုတ္တသမာသတာ။
၃၆၃။ သတ္တသာဓနမုတ္တေပိ၊ တဿီလာဒီသု ပစ္စယေ။
ဓာတုတော ပစ္စယတ္ထတ္တာ၊ ကတ္တုဋ္ဌာနေ စ ဝုတ္တိတော။
၃၆၄။ ပေါရာဏေဟိ ကတော တဿ၊ သင်္ဂဟော ကတ္တုသာဓနေ။
တုလျာဓိကရဏတ္တေန၊ သီလံ ပကတျ မနျတေ။
၃၆၅။ ဓာတွတ္ထောတိ သတာစာရော၊ ဓမ္မော တဿာဓုကာရိတာ။
ဘိန္နာဓိကရတ္ထေန၊ တတ္ထ သက္ကစ္စကာရိတာ။
၃၆၆။ ယထာ ကာလတ္တယေ ကုမ္ဘ - ကာရော ဒီပင်္ကရော ပန။
လုတ္တာလုတ္တေသု တဿီလာ - ဒျတ္ထေ ဘိက္ခုတျုဒါဟဋံ။
၃၆၇။ ဏွုတွန္တဿ တု ကမ္မတ္ထေ၊ ဆဋ္ဌီ ဘဝတိ ဧကဒါ။
ကိတေ ဘာဝဿ ကမ္မတ္ထေ၊ ကတွတ္ထေ စ ယထာရဟံ။
၃၆၈။ တျာဒျန္တဿ တု ကတွတ္ထေ၊ ကမ္မတ္ထေ ဒိဿတေ ကဒါ။
န စာချာတေန သမ္ဗန္ဓာ - ဘာဝတော သာမိလက္ခဏေ။
၃၆၉။ ကမ္မဿ ကာရကော ကမ္မံ၊ သတ္တေ သတ္တာန မုဒ္ဓတာ။
ပါကောဒနဿ သူဒေန၊ ဝါ သူဒဿောဒနမ္ပိ ဝါ။
၃၇၀။ ဓမ္မံ ပါဌေတိ သိဿဿ၊ န ရဇ္ဇဿ သရိဿသိ။
မောဂ္ဂလ္လာနေသု သမ္ဗန္ဓေ၊ ကတ္တာဒျဝစနိစ္ဆိတေ။
၃၇၁။ မာနန္တာ ဝတ္တမာနာနာ - ဂတေကေသေသကေန္တိပိ။
အန္တော ကတ္တရိ မာနော တု၊ ဘာဝေ ကမ္မနိ ကတ္တရိ။
၃၇၂။ တိဋ္ဌန္တော တိဋ္ဌမာနောဟံ၊ ကရိဿာမိ ဝိဘာဝယံ။
ဌီယမာနံ မယာ ဘည - မာနံ တုမှေ သုဏိဿထ။
၃၇၃။ တဒတ္ထေ နာဂတေ ဘာဝေ၊ တာယေ တုံ တျာဒယော တယော။
စတုတ္ထိယာ တဒန္တေ ဟိ၊ မောဂ္ဂလ္လာနမှိ လောပတာ။
၃၇၄။ ကစ္စာယနေ စ နျာသေ စ၊ သဗ္ဗကာလေသု ကတ္တရိ။
ကိတ္တညတာ တဝေ တုံ စ၊ ဒွေ ဟောန္တီတိ ပတီယရေ။
၃၇၅။ ဂစ္ဆတိစ္ဆတိ ကတ္တာယေ၊ တထာ ကာတုဉ္စ ကာတဝေ။
ဧဝံ တု သမ္ပဒါနတ္တံ၊ ကတ္တုတ္တဉ္စ ယထာရဟံ။
၃၇၆။ ပုဗ္ဗကာလေကကတ္တူနံ၊ မဇ္ဈေ တုနာဒိ ပါယတော။
သမာနာပရကာလေနေ - ကကတ္တူနံ နိဒဿနာ။
၃၇၇။ နာနာကြိယာသု သတ္တီနံ၊ နာနတ္တေပိ ပတီယတေ။
ကတ္တူနမေကဝါကျေက - ဒဗ္ဗဋ္ဌတ္တေကကတ္တုတာ။
၃၇၈။ ကလာပါဒီသု ဘာဝတ္ထေ၊ တုနာတျာဒိ ဝိဓီယတေ။
ကစ္စာနာဒီသု ကတွတ္ထေ၊ ကိတ်သညာယ ဝိဓီယတေ။
၃၇၉။ ကိတ်သညတ္တေကကတ္တူန - မီတိဝုတ္တသဘာဝတော။
ကတ္တရိယေဝ တုနာဒိ၊ ကထိတံ ရူပသိဒ္ဓိယံ။
၃၈၀။ ကြိယာဝိသေသနတ္ထာဝ၊ တွာဒျန္တာ တဗ္ဗိသေသတော။
ကတ္တုဝိသေသနတ္ထာတိ၊ ကေစိ ကတ္တရိ ဝုတ္တိတော။
၃၈၁။ ပစိတွာ ဘုဉ္ဇတေ သူရော၊ တမံ ဟန္တွာဒိတော ဃတံ။
ပိတွာ ဟောတိ ဗလံ ဒွါရ - မာဝိရိတွာန နိက္ခမိ။
၃၈၂။ ပစိတွာ သြဒနော ဘုဇ္ဇ - တေ ဘုတ္တော ဝါပိ ယဒျပိ။
ကမ္မမေကံဝ တေ တေဟိ၊ ဥတ္တံ တွာပစ္စယေန တု။
၃၈၃။ နုတ္တံ ပဓာနသမ္ဗန္ဓ - ဒွါရေနေဝ တု ကာရိယံ။
သိဒ္ဓံ ပုဗ္ဗာပရသွေဝါ - ပရကာလပ္ပဓာနတော။
၃၈၄။ ကဒါစိ ဂုဏသမ္ဗန္ဓ - ဒွါရေနေဝ တု ကာရိယံ။
ဂန္တွာ ပိဏ္ဍာယ သာဝတ္ထိံ၊ စရတီတိ နိဒဿနံ။
၃၈၅။ နာနာကြိယာသု နာနတ္တေ၊ ကာရိယာနမ္ပိ မနျတေ။
အတ္ထေန ဒုတိယန္တာဒိ - ဘာဝေါ ဝိယ ယထာရဟံ။
၃၈၆။ သာသညာယ ဟတော ရတော၊ ပုတ္တော ဇီဝေါဝ ပေက္ခိတေ။
ပဓာနေပိ န သင်္ခါရော၊ အပဓာနေပိ နဿတေ။
၃၈၇။ ဒုဝိဓော ဟိ အဓိပ္ပါယော၊ ဝတ္ထုနော ဒီယတောဒနံ။
ပစိတွာ နာတိသာမညာ - ဓိပ္ပါယော ဘုဇ္ဇတောဒနော။
၃၈၈။ ပစိတွာတိ ဝိသေသာဓိ - ပ္ပါယော နေကပဒေ အယံ။
ကာရေတိစ္စာဒိကေ နာနာ - ပဒေ ပန ပတီယတေ။
၃၈၉။ ဘာဝလက္ခဏဟေတွတ္ထာ၊ တွန္တာဒယော ယထာရဟံ။
သက္ကော ဟုတွာန နိဗ္ဗတ္တိ၊ ပဌန္တော ဝသတီတိ စ။
၃၉၀။ ဒွိန္နံ ပဋိစ္စ ဘာဝတ္ထံ၊ ဆဋ္ဌျတ္ထေ ပထမာ ထဝါ။
နပ္ပဓာနမပေက္ခာယ၊ သင်္ခါရော နဿတေ ကဒါ။
၃၉၁။ သံယောဂေါ ဇာယတေ တျာဒေါ၊ ယောဂေ ဇာတော န ဇာယတေ။
သံယောဂေါ ဇာယမာနဿ၊ ကတ္တုတ္တေန န တိဋ္ဌတေ။
၃၉၂။ ပါကဋာဘာဝတောညောညာ - ဘိမုခံ သတ္တိရူပကံ။
ဒွိန္နံ သင်္ဂတိယံ ဗျတ္တိ - ရူပံ ပါကဋဘာဝတော။
၃၉၃။ လောကသင်္ကေတသိဒ္ဓတ္တာ၊ သတ္တိဗျတ္တိဒွယေန ဟိ။
အတ္ထော နတ္ထီတျဘူတမ္ပိ၊ ဘူတံ ဝေါပစရီယတေ။
၃၉၄။ ဝေါဟာရဝိသယော သဒ္ဒေါ၊ ဘူတာဘူတတ္ထဝါစကော။
ဝေါဟာရတ္ထော ဟိ သဒ္ဒတ္ထော၊ ဘာဝတ္ထော တေန ဒီပိတော။
၃၉၅။ အဘူတတ္ထော ခံပုပ္ဖာဒိ၊ ဘူတတ္ထော ပုရိသာဒိကော။
ပရမတ္ထောဝ ဖဿာဒိ၊ ဘူတတ္ထောတျ ပရေ ဝိဒူ။
၃၉၆။ လောကသင်္ကေတသာဓျတ္ထော၊ သဒ္ဒေါ နေကန္တိဘူတိကော။
သမ္မုတျတ္ထော ဟိ သဒ္ဒတ္ထော၊ ဗုဒ္ဓိယာ ပရိကပ္ပိတော။
၃၉၇။ တမ္ပဒီပဝှယေ ရဋ္ဌေ၊ ရိမဒ္ဒနပုရေ ကတာ။
သဒ္ဓမ္မသိရိနာ ဂုဠှ - သာရသဒ္ဒတ္ထဘေဒနီ။
၃၉၈။ သဒ္ဒတ္ထဘေဒစိန္တာယံ၊ နိဋ္ဌိတာ ဂန္ထတော ပန။
တိသတံ နဝုတိသတ္တ - တိပါဒစတုရက္ခရံ။
၃၉၉။ သဒ္ဒတ္ထလက္ခဏေ ဘေဒီ၊ ယော ယော နိစ္ဆိတလက္ခဏော။
သော သော ဉာတုမကိစ္ဆေန၊ ပဟောတိ ပိဋကတ္တယေ။
၄၀၀။ ဣမိနာ လဘိတပုညေန၊ ပါပုဏေယျ မနုတ္တရံ။
တံ ပတွာ သကလေ သတ္တေ၊ မောစေယျံ ဘဝဗန္ဓနာတိ။
သဒ္ဒတ္ထဘေဒစိန္တာ နိဋ္ဌိတာ။