။နမော တဿ ဘဂဝတော အရဟတော သမ္မာသမ္ဗုဒ္ဓဿ။
ဝုတ္တောဒယံ
၁. သညာပရိဘာသာနိဒ္ဒေသ-ပဌမပရိစ္ဆေဒ
ရတနတ္တယပ္ပဏာမ
* ၁။
နမ’တ္ထု ဇန သန္တာန၊ တမ သန္တာန ဘေဒိနော။
ဓမ္မု’ဇ္ဇလန္တ ရုစိနော၊ မုနိန္ဒော’ဒါတ ရောစိနော။
နိမိတ္တ
* ၂။
ပိင်္ဂလာ’စရိယာဒီဟိ၊ ဆန္ဒံ ယ မုဒိတံ ပုရာ။
သုဒ္ဓမာဂဓိကာနံ တံ၊ န သာဓေတိ ယထိစ္ဆိတံ [ယ’ဒိစ္ဆိတံ ယတိ’စ္ဆိတံ (က.)]။
ဂန္ထပရိမာဏ
* ၃။
တတော မာဂဓဘာသာယ၊ မတ္တာ၊ဝဏ္ဏ၊ဝိဘေဒနံ။
လက္ချ လက္ခဏ သံယုတ္တံ၊ ပသန္န’တ္ထ၊ပဒ၊က္ကမံ။
အဘိဓာနာဒိ
* ၄။
ဣဒံ ဝုတ္တောဒယံ နာမ၊ လောကိယ’စ္ဆန္ဒနိဿိတံ။
အာရဘိဿ’မဟံ ဒါနိ၊ တေသံ သုခဝိဗုဒ္ဓိယာ။
ဂဏသင်္ကေတသညာ
* ၅။
သဗ္ဗဂ္လာ မ္နာ၊’ဒိဂလဟူ၊ ဘျာ’၊မဇ္ဈ’န္တ ဂရူ ဇသာ။
မဇ္ဈ’န္တလာ ရ၊တေ’တေ’ဋ္ဌ၊ ဂဏာ ဂေါ ဂရု၊လော လဟု။
ဂဏနိယမ
* ၆။
ဘ၊ဇ၊သာ သဗ္ဗဂ၊လဟူ၊ ပဉ္စိ’မေ သဏ္ဌိတာ ဂဏာ။
အရိယာဒိမှိ ဝိညေယျာ၊ ဂဏော ဣဓ စတု’က္ကလော။
ဂရု,လဟုသရူပ
* ၇။
သံယောဂါ’ဒိ စ၊ ဒီဃော စ၊ နိဂ္ဂဟီတပရော စ၊ ယော။
ဂရု၊ ဝင်္ကော၊ ပါဒန္တော၊ဝါ၊ ရဿော’ညော မတ္တိကော လု’ဇု။
* ၈။
ပရေ ပါဒါဒိသံယောဂေ၊ ယော ပုဗ္ဗော ဂရုက’က္ခရော။
လဟု သ ကွစိ ဝိညေယျော၊ တဒုဒါဟရဏံ ယထာ။
* ၉။
ဒဿနရသာ’နုဘာဝနေ၊ နိဗဒ္ဓဂေဓာ ဇိနဿ’ယံ ဇနတာ။
ဝိမှယဇနနီ သညတ၊ ကြိယာ နု ကံ နာ’နုရဉ္ဇယတိ။
* ၁၀။
ဝိညေယျာ လောကတော သညာ၊ သမုဒ္ဒေါ၊သု၊ရသာဒိနံ။
ပါဒေါဉေယျော စတုတ္ထံ’သော၊ ပဒစ္ဆေဒေါ ယတီ ဘဝေ။
* ၁၁။
သမ၊မဍ္ဎသမံ၊ ဝုတ္တံ၊ ဝိသမံ စာ’ပရံ တိဓာ။
သမာ လက္ခဏတော ပါဒါ၊ စတ္တာရော ယဿ တံ သမံ။
* ၁၂။
ယဿ’န္တိမေန ဒုတိယော၊ တတိယေနာ’ဒိမော သမော။
တ’ဒဍ္ဎသမ၊ မညံ တု၊ ဘိန္န လက္ခဏ ပါဒိကံ။
* ၁၃။
ပါဒ’မေကက္ခရာ’ရဗ္ဘ၊ ယာဝ ဆဗ္ဗီသတ’က္ခရာ။
ဘဝေ ပါဒေဟိ တံ ဆန္ဒံ၊ နာနာနာမော’ဒိတံ တတော။
* ၁၄။
ဒဏ္ဍကာ စဏ္ဍဝုဋ္ဌျာ’ဒိ၊ ပါဒေဟိ ဆဟိ၊ တီဟိ တု။
‘ဂါထာ’တိ စ ပရတ္ထေ’ဝံ၊ ဆန္ဒော သညာ ပကာသိတာ။
* ၁၅။
အနန္တရော’ဒိတံ စ’ည၊ မေတံ သာမည နာမတော။
‘ဂါထာ’ဣစ္စေဝ နိဒ္ဒိဋ္ဌံ၊ မုနိန္ဒဝစနေ ပန။
* ၁၆။
ဝိသေသနာမတော ကိဉ္စိ၊ ဂဟေတွာ သဗ္ဗထော’စိတံ။
ဒဿယိဿာမ’ဟံ တေ’တ္ထ၊ နာမာနာ’ဝိ ဘဝိဿရေ။
ဣတိ ဝုတ္တောဒယေ ဆန္ဒသိ သညာပရိဘာသာ နိဒ္ဒေသော နာမ
ပဌမော ပရိစ္ဆေဒေါ။
၂. မတ္တာဝုတ္တိနိဒ္ဒေသ-ဒုတိယပရိစ္ဆေဒ
ဂဏနိယမ
* ၁၇။
ဂယုတာ’ညေ၊ဆ’ဂ္ဂဏာ၊န ဇော ဝိသမေ၊။
အရိယာယ’န္တဍ္ဎေ လော၊ ဆဋ္ဌော၊’န္တေ ဂေါ၊ဂဏာ ဆ’ညေ။
ယတိနိယမ
* ၁၈။
ပဌမဍ္ဎေ ဆဋ္ဌော စေ၊
သဗ္ဗလဟေ၊’တ္ထာ’ဒိလဟုနိ ဘဝတိယတိ။
တပ္ပရကော၊န္တေပိ၊ သစေ၊ စရိမေပိ၊ ဘဝတိ စတုတ္ထော’န္တေ။
* ၁၉။ အရိယာသာမညံ စေ, ပုဗ္ဗော’ဒိတ လက္ခဏံ ဘဝေ ယဿာ။
* ၂၀။ အာဒိမ’မထ ပါဒယုဂံ, ယဿာ တျံ’သေဟိ သာ ပထျာ။
* ၂၁။
ယတ္ထ ဂဏတ္တယ မုလ္လင်္ဃိ၊
ယော’ဘယတ္ထာ’ဒိမော ဘဝေ ဝိပုလာ။
* ၂၂။ ဂရုမဇ္ဈဂေါ ဇကာရော, စတုတ္ထကော ဒုတိယကော စပလာ။
* ၂၃။
စပလာ’ဂတာ’ခိလံ စေ၊ ဒလာ’ဒိမံ လက္ခဏံ ဘဇတိ ယဿာ။
ပထျာလက္ခဏ’မညံ၊ မုခစပလာ နာမ သာ ဘဝတိ။
* ၂၄။
ပထျာယ လက္ခဏံ စေ၊ ပဌမဍ္ဎေ လက္ခဏံ တု စပလာယ။
ဒုတိယေ ဒလေ’ထ ယဿာ၊ ပကိတ္တိတာ သာ ဇဃနစပလာ။
အရိယာဇာတိယော။
* ၂၅။
သဗ္ဗံပဌမဒလေ ယဒိ၊ လက္ခဏ’မရိယာယ ဝုတ္တ’မုဘယေသု။
ယဿာ ဒလေသု ယုတ္တံ၊
ဝုတ္တာ သာ ဂီတိ ဝုတ္တ ယတိ လလိတာ။
* ၂၆။
အရိယာယံ ဒုတိယ’ဍ္ဎေ၊ ဂဒိတာ’ခိလလက္ခဏံ ယံ တံ။
ဘဝတိ ဒလေသု’ဘယေသုပိ၊
ယဒိ ယဿာ သာ’ယ မုပဂီတိ။
* ၂၇။
အရိယာယ’ဍ္ဎဒွိတယံ၊ ပုဗ္ဗောဒိတ လက္ခဏော’ပေတံ။
ဝိပရိယယေနာ’ဘိဟိတံ၊
ယဿာ သမ္ဘဝတိ စေ’ဟ သော’ဂ္ဂီတိ။
* ၂၈။
အရိယာပုဗ္ဗ’ဍ္ဎံ ယဒိ၊ ဂရုနေ’ကေနာ’ဓိကေန နိဓနေ ယုတ္တံ။
ယဒိ ပုဗ္ဗ’ဍ္ဎသမာနံ၊ ဒလ မိတရံ စော’ဒိတာ’ယ’မရိယာဂီတိ။
ဂီတိဇာတိယော။
* ၂၉။
ဝိသမေ ဆ သိယုံ ကလာ မုခေ၊
သမေ တွ’ဋ္ဌ၊ ရ၊လ၊ဂါ၊ တတော’ပရိ။
ဝေတာလီယံ တ မုစ္စတေ၊ လဟု ဆက္ကံ န နိရန္တရံ သမေ။
* ၃၀။
ဝေတာလီယောပမံ မုခေ တံ၊
ဩပစ္ဆန္ဒသကံ ရ၊ယာ ယ’ဒန္တေ။
* ၃၁။ အာပါတလိကာ ကထိတာ’ယံ, ဘဂဂါ’န္တေ ယဒိ ပုဗ္ဗမိဝ’ညံ။
* ၃၂။
ယဒါ’ဒိတော ဒက္ခိဏန္တိကာ၊
ဌိတေ’တ္ထ ပါဒေသွာ’ခိလေသု ဇော။
* ၃၃။
‘ဥဒိစ္စဝုတ္တီ’တိ ဝုစ္စတေ၊
ဇော စာ’ဒေါ ဝိသမေသု သဏ္ဌိတော။
* ၃၄။ ပုဗ္ဗတ္ထ, သမေသု စေ ဂ, ဇာ, ‘ပစ္စဝုတ္တိ’ ရုဒိတာ’တိ သဏ္ဌိတာ။
* ၃၅။
သမာသမာ’တြာ’ဒိနံ သမာ၊
သံယုတာ ဘဝတိ တံ ပဝတ္တကံ။
* ၃၆။ အဿ သာ သမ ကတာ’ ပရန္တိကာ။
* ၃၇။ တဒ’ညဇာ စာရုဟာသိနီ။
ဝေတာလီယဇာတိယော။
* ၃၈။ ဒွိက ဝိဟတ ဝသု လဟု အစလဓိတိ ရိ’ဟ။
* ၃၉။ မတ္တာသမကံ နဝမော လ္ဂ’န္တေ။
* ၄၀။ ဇော န္လာ’ ထဝါ’ဏ္ဏဝါ ဝိသိလောကော။
* ၄၁။ တဒွယတော ဝါနဝါသိကာ’ချာ။
* ၄၂။ ပဉ္စ,ဋ္ဌ,နဝသု ယဒိ လော စိတြာ။
* ၄၃။ ဂ,လျာ’ဋ္ဌဟိ စေ’သာ ဝု’ပစိတြာ။
* ၄၄။
ယ’မတီတ လက္ခဏ ဝိသေသ ယုတံ၊ (စိတြာ)
မတ္တာ သမာ’ဒိ ပါဒါ’ဘိဟိတံ။ (ဝိသိလောက)
အနိယတ ဝုတ္တ ပရိမာဏ သဟိတံ၊ (ဝါနဝါသိကာ)
ပထိတံ ဇနေသု ပါဒါကုလကံ။ (ဝိသိလောက)
မတ္တာသမက ဇာတိယော။
* ၄၅။
ဝိနာ ဝဏ္ဏေဟိ မတ္တာ ဂါ၊ ဝိနာ ဝဏ္ဏာ ဂရူဟိ တု။
ဝိနာ လဟူဟိ ဂရဝေါ၊ ဒလေ ပထျာဒိနော မတာ။
ဣတိ ဝုတ္တောဒယေ ဆန္ဒသိ မတ္တာဝုတ္တိနိဒ္ဒေသော နာမ
ဒုတိယော ပရိစ္ဆေဒေါ။
၃. သမဝုတ္တိနိဒ္ဒေသ-တတိယပရိစ္ဆေဒ
* ၄၆။ တျာ’ စေ တနုမဇ္ဈာ။
ဂါယတ္တီ။
* ၄၇။ ကုမာရ လလိတာ ဇ္သ္ဂါ။
ဥဏှိကာ။
* ၄၈။ စိတြပဒါ ယဒိ ဘာ ဂါ။
* ၄၉။ မော မော ဂေါ ဂေါ ဝိဇ္ဇုမ္မာလာ။
* ၅၀။ ဘာ တ, လ, ဂါ မာဏဝကံ။
* ၅၁။ ဂ္လာ သမာနိကာ ရ,ဇာ စ။
* ၅၂။ ပမာဏိကာ ဇ, ရာ လ, ဂါ။
အနုဋ္ဌုဘာ။
* ၅၃။ ရာ န,သာ ယဒိ ဟလမုခီ။
* ၅၄။ ဘုဇဂ သုသု သဋာ နာ မော။
ဗြဟတီ။
* ၅၅။ မ္သာဇ္ဂါ သုဒ္ဓဝိရာဇိတံ မတံ။
* ၅၆။ မ္နာ ယော ဂေါ ယဒိ ပဏဝေါ ချာတော။
* ၅၇။ မ္ဘာ သ,ဂယုတ္တာ ရုမ္မဝတီ သာ။
* ၅၈။ ဉေယျာ မတ္တာ မ, ဘ, သ, ဂယုတ္တာ။
* ၅၉။ စမ္ပကမာလာ စေ ဘ, မ, သာ ဂေါ [ဣဒံ နာမန္တရဉာပနတ္ထမေဝ ပုန ဝုတ္တံ (ဋီ.)]။
* ၆၀။ န, ရ, ဇ, ဂေဟိ သာ မနောရမာ။
* ၆၁။ ဥဗ္ဘာသကံ တံ စေ တော မ, ရာ လ္စ။
* ၆၂။ တော ဇာ ဂရုနာ’ယ’မုပဋ္ဌိတာ။
ပန္တိ။
* ၆၃။ ဣန္ဒာဒိကာ တာ ဝဇိရာ ဇ, ဂါ ဂေါ။
* ၆၄။ ဥပါဒိကာ သာ’ဝ ဇ,တာ ဇ,ဂါ ဂေါ။
* ၆၅။
အနန္တရော’ဒီရိတ လက္ခဏာ စေ၊ (ဥပေန္ဒဝဇိရ)
ပါဒါ ဝိမိဿာ ဥပဇာတိယော တာ။ (ဣန္ဒဝဇိရ)
ဧဝံ ကိလ’ညာသုပိ မိဿိတာသု၊ (ဣန္ဒဝဇိရ)
ဝဒန္တိ ဇာတိသွိဒ’ မေဝ နာမံ။ (ဥပေန္ဒဝဇိရ)
* ၆၆။ န, ဇ, ဇ, လ, ဂါ ဂဒိတာ သုမုခီ။
* ၆၇။ ဒေါဓက မိစ္ဆတိ စေ ဘ,ဘ,ဘာ ဂါ။
* ၆၈။ ဝေဒ,ဿေဟိ,ဓ္တာ တ္ဂဂါ,သာလိနီ သာ။
* ၆၉။ ဝါတောမ္မီ သာ, ယတိ သာ မ္ဘာ တ, ဂါ ဂေါ။
* ၇၀။ ဘာ တ, န, ဂါ ဂေါ’သု, ရသ သိရီ သာ။
* ၇၁။ ရော န, ရာ ဣဟ ရထောဒ္ဓတာ လ, ဂါ။
* ၇၂။ သွာဂတေ’တိ ရ, န, ဘာ ဂရုကာ ဒွေ။
* ၇၃။ န,န,ရ,လဟု,ဂရူဟိ ဘဒ္ဒိကာ။
တိဋ္ဌုဘာ။
* ၇၄။ ဝဒန္တိ ဝံသဋ္ဌမိ’ဒံ ဇ, တာ ဇ, ရာ။
* ၇၅။ သာ ဣန္ဒဝံသာ ခလု ယတ္ထ တာ ဇ,ရာ။
* ၇၆။ ဣဓ တောဋက မမ္ဗုဓိ,သေဟိ မိတံ။
* ၇၇။ ဒုတဝိလမ္ဗိတ မာဟ န, ဘာ ဘ,ရာ။
* ၇၈။ ဝသု ယုဂ ဝိရတီ နာ,မျာ’ ပုဋော’ယံ။
* ၇၉။ န, ယ, သဟိတာ နျာ’ ကုသုမဝိစိတ္တာ။
* ၈၀။ ဘုဇင်္ဂ’ပ္ပယာတံ ဘဝေ ဝေဒ, ယေဟိ။
* ၈၁။ န, ဘ, ဇ, ရေဟိ ဘဝတိ’ပ္ပိယံဝဒါ။
* ၈၂။ ဝုတ္တာ သုဓီဟိ လလိတာ တ, ဘာ ဇ, ရာ။
* ၈၃။ ပမိတက္ခရာ သ, ဇ, သ,သေဟု’ဒိတာ။
* ၈၄။ န,န,ဘ,ရ,သဟိတာ’ဘိဟိတု’ဇ္ဇလာ။
* ၈၅။ ပဉ္စ’ဿ’စ္ဆိန္နာ, ဝေဿဒေဝီ မ,မာ ယာ။
* ၈၆။ ဘဝတိ ဟိ တာမရသံ န, ဇ, ဇာ ယော။
* ၈၇။ ‘ကမလာ’တိ ဉေယျာ သ,ယ,သေဟိ ယော စေ။
ဇဂတီ။
* ၈၈။ မ္နာ ဇြာ ဂေါ, တိဒသယတိ’ပ္ပဟဿိဏီ သာ။
* ၈၉။ စတု,ဂ္ဂဟေ,ဟိ’ဟ ရုစိရာ, ဇ,ဘာ သ္ဇ,ဂါ။
အတိဇဂတီ။
* ၉၀။ န,န,ရ,သ,လဟု,ဂါ,သရေဟိ’ပရာဇိတာ။
* ၉၁။ န,န,ဘ,န,လ,ဂိ’တိ,ပ္ပဟရဏကလိကာ။
* ၉၂။ ဝုတ္တာ ဝသန္တတိလကာ တ,ဘ,ဇာ ဇ,ဂါ ဂေါ။
သက္ကရီ။
* ၉၃။ ဒွိဟတ ဟယ လဟု ရ’ထ ဂိ’တိ သသိကလာ။
* ၉၄။ ဝသု,ဟယ,ယတိ ရိ’ဟ,မဏိဂုဏနိကရော။
* ၉၅။ န,န,မ,ယ,ယ,ယုတာ’ယံ,မာလိနီ ဘောဂိ’သီဟိ။
* ၉၆။ ဘဝတိ န,ဇာ,ဘ,ဇာ ရသဟိတာ ပဘဒ္ဒကံ။
အတိသက္ကရီ။
* ၉၇။ န,ဇ,ဘ,ဇ,ရာ သဒါ ဘဝတိ ဝါဏိနီ ဂ, ယုတ္တာ။
အဋ္ဌိ။
* ၉၈။ ယ, မာ နော သော ဘလ္ဂါ, ရသ, ဟရဝိရာမာ သိခရဏီ။
* ၉၉။ ရသ, ယုဂိ, သိတော, နော သော မြာ သ္လာ, ဂျ’ဒါ ဟရိဏီ တဒါ။
* ၁၀၀။ မန္ဒက္ကန္တာ, မ,ဘ,န,တ,တ,ဂါ, ဂေါ ယုဂု,တွ,ဿကေဟိ။
အစ္စဋ္ဌိ။
* ၁၀၁။ မော တော နော ယော ယာ, ကုသုမိတလတာ, ဝေလ္လိတာ’ က္ခု,တွိ,သီဟိ။
ဓုတိ။
* ၁၀၂။ ရသု,တွ,ဿေဟိ ယ္မာ, န,သ,ရ,ရ,ဂရူ, မေဃဝိပ္ဖုဇ္ဇိတာ သာ။
* ၁၀၃။ အက္ကဿေဟိ ယတိ မ္သ,ဇာသ,တ,တ,ဂါ, သဒ္ဒူလဝိက္ကီဠိတံ။
အတိဓုတိ။
* ၁၀၄။ ဝုတ္တ မီဒိသံ တု နာမတော ရ,ဇာ ရ,ဇာ ရ,ဇာ ဂရူ,လဟူ စ။
ကတိ။
* ၁၀၅။ မြာ ဘ္နာ ယော ယော’တြ ယေန,တ္တိ,မုနိ, ယတိယုတာ, သန္ဓရာ ကိတ္တိတာ’ယံ။
ပကတိ။
* ၁၀၆။ ဩ န,ရ,နာ ရ,နာ စ ထ ဂရူ ဒသ,က္က,ဝိရမဉှိ ဘဒ္ဒက’မိဒံ။
အာကတိ။
ဣတိ ဝုတ္တောဒယေ ဆန္ဒသိ သမဝုတ္တိနိဒ္ဒေသော နာမ
တတိယော ပရိစ္ဆေဒေါ။
၄. အဍ္ဎသမဝုတ္တိနိဒ္ဒေသ-စတုတ္ထပရိစ္ဆေဒ
* ၁၀၇။
ဝိသမေ ယဒိ သာ သ၊လ၊ဂါ သမေ၊
ဘ၊တ္တယတော ဂရုကာ ဝု’ပစိတ္တံ။
* ၁၀၈။
ဘ၊တ္တယတော ယဒိ ဂါ ဒုတမဇ္ဈာ။
ယဒိ ပုနရေ’ဝ ဘဝန္တိ န၊ ဇာ ဇျာ။
* ၁၀၉။
ယဒိ သ၊တ္တိတယံ ဂရုယုတ္တံ၊
ဝေဂဝတီ ယဒိ ဘ၊တ္တိတယာ ဂါ။
* ၁၁၀။
တော ဇော ဝိသမေ ရတော ဂရူ စေ။
သ္မာ ဇ္ဂါ ဘဒ္ဒဝိရာဇ မေတ္ထ ဂေါ စေ။
* ၁၁၁။
ဝိသမေ သ၊ ဇာ သ၊ဂရု၊ယုတ္တာ။
ကေတုမတီ သမေ ဘ၊ရ၊န၊ဂါ ဂေါ။
* ၁၁၂။
အာချာနကီ တာ ဝိသမေ ဇ၊ ဂါ ဂေါ။ (ဣန္ဒဝဇိရ)
ဇ၊တာ ဇ၊ဂါ ဂေါ တု သမေ’ထ ပါဒေ။ (ဥပေန္ဒဝဇိရ)
* ၁၁၃။
ဇ၊တာ ဇ၊ဂါ ဂေါ ဝိသမေ သမေ တု။ (ဥပေန္ဒဝဇိရ)
တာ ဇော ဂ၊ဂါ စေ ဝိပရီတပုဗ္ဗာ။ (ဣန္ဒဝဇိရ)
* ၁၁၄။
သ၊သ၊တော သ၊လ၊ဂါ ဝိသမေ သမေ။
န၊ဘ၊ဘ၊ရာ ဘဝတေ ဟရိဏပ္လုတာ။
* ၁၁၅။
ယဒိ န၊န၊ရ၊လ၊ဂါ န၊ဇာ ဇ၊ရာ၊
ယဒိ စ တဒါ’ပရဝတ္တ မိစ္ဆတိ။
* ၁၁၆။
န၊ဇ၊ဇ၊ရ၊ဂါ သမကေ စ ပုပ္ဖိတဂ္ဂါ။
ဒွယံ မိဒံ ဝေတာလီယ’ပ္ပဘေဒေါ။
* ၁၁၇။
သာ ယဝါဒိကာ မတီ ရ၊ဇာ ရ၊ဇာ တွ၊
သမေ သမေ ဇ၊ရာ ဇ၊ရာ ဂရူ ဘဝေယျုံ။
ဣတိ ဝုတ္တောဒယေ ဆန္ဒသိ အဍ္ဎသမဝုတ္တိနိဒ္ဒေသော နာမ
စတုတ္ထော ပရိစ္ဆေဒေါ။
၅. ဝိသမဝုတ္တိနိဒ္ဒေသ-ပဉ္စမပရိစ္ဆေဒ
* ၁၁၈။ န’ဋ္ဌက္ခရေသု ပါဒေသု, သ္နာ’ဒိမှာ ယော’ဏ္ဏဝါ ဝတ္တံ။
* ၁၁၉။ သမေသု သိန္ဓုတော ဇေန, ပထျာဝတ္တံ ပကိတ္တိတံ။
* ၁၂၀။ ဩဇေသု ဇေန သိန္ဓုတော, တ’မေဝ ဝီပရီတာ’ဒိ။
* ၁၂၁။ န,ကာရော စေ ဇလဓိတော, စပလာဝတ္တ’မိစ္စေ’တံ။
* ၁၂၂။ သမေ လော သတ္တမော ယဿာ, ဝိပုလာ ပိင်္ဂလဿ သာ။
* ၁၂၃။ သေတဝဿာ’ခိလေသုပိ။
* ၁၂၄။ ဘေန’ဏ္ဏဝါ ဘ’ဗ္ဗိပုလာ။
* ၁၂၅။ ဧဝ’မညာ ရော စတုတ္ထာ။
* ၁၂၆။ နော’ဏ္ဏဝါ စေ နဝိပုလာ။
* ၁၂၇။ တော’ဏ္ဏဝါ တထာ’ညာ သိယာ။
ဝတ္တ’ပ္ပဘေဒေါ။
* ၁၂၈။
နဒိဿတေ’တ္ထ ယံ ဆန္ဒံ၊ ပယောဂေ ဒိဿတေ ယဒိ။
ဝိသမ’က္ခရပါဒံ တံ၊ ဂါထာ သာမညနာမတော။
ဣတိ ဝုတ္တောဒယေ ဆန္ဒသိ ဝိသမဝုတ္တိ နိဒ္ဒေသော နာမ
ပဉ္စမော ပရိစ္ဆေဒေါ။
၆. ဆပ္ပစ္စယဝိဘာဂ-ဆဋ္ဌပရိစ္ဆေဒ
ပတ္ထာရနယ
* ၁၂၉။
ပတ္ထာရေ သဗ္ဗဂေ ပါဒေ၊ ပုဗ္ဗဂါ’ဓော လ္ပ’ရေ သမာ။
ပုဗ္ဗေ ဂရု တေ စ မိမေ၊ ကတ္တဗ္ဗာ ယာဝ သဗ္ဗလာ။
နဋ္ဌနယ
* ၁၃၀။
နဋ္ဌဿ ယော ဘဝေယျ’င်္ကော၊ တသ္မိံ လော’ဒ္ဓိကတေ သမေ။
ဝိသမေ တွေ’ကသဟိတေ၊ ဘဝေယျ’ဒ္ဓိကတေ ဂရု။
ဥဒ္ဒိဋ္ဌနယ
* ၁၃၁။
ဧကာ’ဒိနုက္ကမေန’င်္ကေ၊ ပုဗ္ဗာဓော ဒွိဂုဏေ လိခေ။
မိဿကေဟိ လဟုဋ္ဌေဟိ၊ သေ’ကေဟု’ဒ္ဒိဋ္ဌကံ ဘဝေ။
သဗ္ဗဂလကြိယနယ
* ၁၃၂။
ဝုတ္တ’က္ခရ သမာ သင်္ချာ၊ လိက္ချ သေကော’ပရူ’ပရိ။
ဧကေကဟီန မေကာဒိ၊ နု’ဋ္ဌာနေ သဗ္ဗဂါဒိကံ။
ဝုတ္တသင်္ချာနယ
* ၁၃၃။
ဂရုကြိယာ’င်္က သန္ဒောဟေ၊ ဘဝေ သင်္ချာ ဝိမိဿိတေ။
ဥဒ္ဒိဋ္ဌ’င်္က သမာဟာရော၊ သေ’ကော ဝေ’မံ သမာ’နယေ။
ဝုတ္တအဒ္ဓါနယ
* ၁၃၄။
သင်္ချေဝ ဒွိဂုဏေ’ကူနာ၊ ဝိတ္ထာရာ’ယာမသမ္ဘဝါ။
ဝုတ္တဿ’ဒ္ဓ’န္တရာနဉ္စ၊ ဂရုလာနဉ္စ အင်္ဂုလံ။
ဣတိ ဝုတ္တောဒယေ ဆန္ဒသိ ဆပ္ပစ္စယဝိဘာဂေါ နာမ
ဆဋ္ဌော ပရိစ္ဆေဒေါ။
နိဂမန
* ၁၃၅။
သေလ’န္တရာ’ယတန ဝါသိက သီလ’တ္ထေရ၊
ပါဒေါ ဂရု ဂ္ဂုဏဂရု ဇ္ဇယတံ မမေ’သော။
ယဿ ပ္ပဘာဝ’မဝလမ္ဗ မယေ’ဒိသောပိ၊
သမ္ပာဒိတော’ဘိမတ သိဒ္ဓိကရော ပရတ္ထော။
* ၁၃၆။
ပရတ္ထ သမ္ပာဒနတော၊ ပုညေနာ’ဓိဂတေန’ဟံ။
ပရတ္ထ သမ္ပာဒနကော၊ ဘဝေယျံ ဇာတိ ဇာတိယံ။
* ၁၃၇။
အဝလောကိတ မတ္တေန၊ ယထာ ဆပ္ပစ္စယာ မယာ။
သာဓိတာ သာဓယန္တေ’ဝ၊ မိစ္ဆိတတ္ထမ္ပိ ပါဏိနောတိ။
ဣတိ သံဃရက္ခိတမဟာသာမိတ္ထေရေန ဝိရစိတံ
ဝုတ္တောဒယပ္ပကရဏံ ပရိနိဋ္ဌိတံ။