အဘိဓာနပ္ပဒီပိကာ

၁ ၂ ၃ ၄ ၅ ၆ ၇ ၈ ၉ ၁၀ ၁၁ ၁၂ ၁၃ ၁၄ ၁၅ ၁၆ ၁၇ ၁၈ ၁၉ ၂၀ ၂၁ ၂၂ ၂၃ ၂၄ ၂၅ ၂၆ ၂၇ ၂၈ ၂၉ ၃၀ ၃၁ ၃၂ ၃၃ ၃၄ ၃၅ ၃၆ ၃၇ ၃၈ ၃၉ ၄၀ ၄၁ ၄၂ ၄၃ ၄၄ ၄၅ ၄၆ ၄၇ ၄၈ ၄၉ ၅၀ ၅၁ ၅၂ ၅၃ ၅၄ ၅၅ ၅၆ ၅၇ ၅၈ ၅၉ ၆၀ ၆၁ ၆၂ ၆၃ ၆၄ ၆၅ ၆၆ ၆၇ ၆၈ ၆၉ ၇၀ ၇၁ ၇၂ ၇၃ ၇၄ ၇၅ ၇၆ ၇၇ ၇၈ ၇၉ ၈၀ ၈၁ ၈၂ ၈၃ ၈၄ ၈၅ ၈၆ ၈၇ ၈၈ ၈၉ ၉၀ ၉၁ ၉၂ ၉၃ ၉၄ ၉၅ ၉၆ ၉၇ ၉၈ ၉၉

(ဓာန်၊၁။)

။နမော တဿ ဘဂဝတော အရဟတော သမ္မာသမ္ဗုဒ္ဓဿ။

အဘိဓာနပ္ပဒီပိကာ

ဗုဒ္ဓပ္ပဏာမော

* ၁။

တထာဂတော ယော ကရုဏာကရော ကရော၊

ပယာတ’မောသဇ္ဇ သုခပ္ပဒံ ပဒံ။

အကာ ပရတ္ထံ ကလိသမ္ဘဝေ ဘဝေ၊

နမာမိ တံ ကေဝလဒုက္ကရံ ကရံ။

ဓမ္မပ္ပဏာမော

* ၂။

အပူဇယုံ ယံ မုနိကုဉ္ဇရာ ဇရာ၊

ရုဇာဒိမုတ္တာ ယဟိမုတ္တရေ တရေ။

ဌိတာ တိဝဋ္ဋမ္ဗုနိဓိံ နရာနရာ၊

တရိံသု တံ ဓမ္မမဃပ္ပဟံ ပဟံ။

သံဃပ္ပဏာမော

* ၃။

ဂတံ မုနိန္ဒော’ရသသူနုတံ နုတံ၊

သုပုညခေတ္တံ ဘုဝနေ သုတံ သုတံ။

ဂဏမ္ပိ ပါဏီကတသံဝရံ ဝရံ၊

သဒါ ဂုဏောဃေန နိရန္တရ’န္တရံ။

ပဋိညာ

* ၄။

နာမလိင်္ဂေသု ကောသလ္လ၊ မတ္ထနိစ္ဆယကာရဏံ။

ယတော မဟဗ္ဗလံ ဗုဒ္ဓ၊ ဝစနေ ပါဋဝတ္ထိနံ။

---

(ဓာန်၊၂။)

* ၅။

နာမလိင်္ဂါနျ’တော ဗုဒ္ဓ၊ ဘာသိတဿာ’ရဟာနျ’ဟံ။

ဒဿယန္တော ပကာသေဿ၊ မဘိဓာနပ္ပဒီပိကံ။

ပရိဘာသာ

* ၆။

ဘိယျော ရူပန္တရာ သာဟ၊ စရိယေန စ ကတ္ထစိ။

ကွစာ’ ဟစ္စဝိဓာနေန ဉေယျံ ထီပုန္နပုံသကံ။

* ၇။

အဘိန္နလိင်္ဂါနံယေဝ၊ ဒွန္ဒော စ၊ လိင်္ဂဝါစကာ။

ဂါထာပါဒန္တမဇ္ဈဋ္ဌာ၊ ပုဗ္ဗံ ယန္တျပရေ ပရံ။

* ၈။

ပုမိတ္ထိယံ ပဒံ ဒွီသု၊ သဗ္ဗလိင်္ဂေ စ တီသွိတိ။

အဘိဓာနန္တရာရမ္ဘေ၊ ဉေယျံ တွ’န္တ မထာဒိ စ။

* ၉။

ဘိယျော ပယောဂ မာဂမ္မ၊ သောဂတေ အာဂမေ ကွစိ။

နိဃဏ္ဍု ယုတ္တိ ဉ္စာနီယ၊ နာမလိင်္ဂံ ကထီယတီတိ။

၁. သဂ္ဂကဏ္ဍ

* ၁။

ဗုဒ္ဓါ ဒသဗလော သတ္ထာ၊ သဗ္ဗညူ ဒွိပဒုတ္တမော။

မုနိန္ဒော ဘဂဝါ နာထော၊ စက္ခုမ’င်္ဂီရသော မုနိ။

* ၂။

လောကနာထော’ နဓိဝရော၊ မဟေသိ စ ဝိနာယကော။

သမန္တစက္ခု သုဂတော၊ ဘူရိပညော စ မာရဇိ။

* ၃။

နရသီဟော နရဝရော၊ ဓမ္မရာဇာ မဟာမုနိ။

ဒေဝဒေဝေါ လောကဂရု၊ ဓမ္မဿာမီ တထာဂတော။

* ၄။

သယမ္ဘူ သမ္မာသမ္ဗုဒ္ဓါ၊ ဝရပညော စ နာယကော။

ဇိနော၊ သက္ကော တု သိဒ္ဓတ္ထော၊ သုဒ္ဓါဒနိ စ ဂေါတမော။

* ၅။

သကျသီဟော တထာ သကျ၊ မုနိ စာဒိစ္စဗန္ဓု စ။

* ၆။

မောက္ခော နိရောဓော နိဗ္ဗာနံ၊ ဒီပေါ တဏှက္ခယော ပရံ။

တာဏံ လေဏ မရူပဉ္စ၊ သန္တံ သစ္စ မနာလယံ။

* ၇။

အသင်္ခတံ သိဝ မမတံ သုဒုဒ္ဒသံ၊

ပရာယဏံ သရဏ မနီတိကံ တထာ။

အနာသဝံ ဓုဝ မနိဒဿနာ’ ကတာ၊

ပလောကိတံ နိပုဏ မနန္တ မက္ခရံ။

---

(ဓာန်၊၃။)

* ၈။

ဒုက္ခက္ခယော ဗျာဗဇ္ဈဉ္စ [ဗျာပဇ္ဇံ (ဋီကာ)]၊ ဝိဝဋ္ဋံ ခေမ ကေဝလံ။

အပဝဂ္ဂေါ ဝိရာဂေါ စ၊ ပဏီတ မစ္စုတံ ပဒံ။

* ၉။

ယောဂက္ခေမော ပါရ မပိ၊ မုတ္တိ သန္တိ ဝိသုဒ္ဓိယော။

ဝိမုတျ’ သင်္ခတဓာတု၊ သုဒ္ဓိ နိဗ္ဗုတိယော သိယုံ။

* ၁၀။

ခီဏာသဝေါ တွ’သေက္ခော စ၊ ဝီတရာဂေါ တထာ’ ရဟာ။

ဒေဝလောကော ဒိဝေါ သဂ္ဂေါ [နာကော (သီ.)]၊

တိဒိဝေါ တိဒသာလယော။

* ၁၁။

တိဒသာ တွ’မရာ ဒေဝါ၊ ဝိဗုဓာ စ သုဓာသိနော။

သုရာ မရူ ဒိဝေါကာ စာ၊ မတပါ သဂ္ဂဝါသိနော။

* ၁၂။

နိဇ္ဇရာ’ နိမိသာ ဒိဗ္ဗာ၊ အပုမေ ဒေဝတာနိ စ [ဒေဝတာ ဧဝ ဒေဝတာနိ၊ သကတ္ထေ နိပစ္စယော (ဋီကာ)]။

* ၁၃။

သိဒ္ဓါ ဘူတော စ ဂန္ဓဗ္ဗော၊ ဂုယှကော ယက္ခ ရက္ခသာ။

ကုမ္ဘဏ္ဍော စ ပိသာစာ’ဒီ၊ နိဒ္ဒိဋ္ဌာ ဒေဝယောနိယော။

* ၁၄။

ပုဗ္ဗဒေဝါ သုရရိပူ၊ အသုရာ ဒါနဝါ ပုမေ။

တဗ္ဗိသေသာ ပဟာရာဒေါ၊ သမ္ဗရော ဗလိအာဒယော။

* ၁၅။

ပိတာမဟော ပိတာ ဗြဟ္မာ၊ လောကေသော ကမလာသနော။

တထာ ဟိရညဂဗ္ဘော စ၊ သုရဇေဋ္ဌော ပဇာပတိ။

* ၁၆။

ဝါသုဒေဝေါ ဟရိ [ဟရီ (ဋီကာ)] ကဏှော၊ ကေသဝေါ စက္ကပါဏျ’ထ။

မဟိဿရော သိဝေါ သူလီ၊ ဣဿရော ပသုပတျ’ပိ။

* ၁၇။

ဟရော ဝုတ္တော ကုမာရော တု၊ ခန္ဓော သတ္တိဓရော ဘဝေ။

* ၁၈။

သက္ကော ပုရိန္ဒဒေါ ဒေဝ၊ ရာဇာ ဝဇိရပါဏိ စ။

သုဇမ္ပတိ သဟဿက္ခော၊ မဟိန္ဒော ဝဇိရာဝုဓော။

* ၁၉။

ဝါသဝေါ စ ဒသသတ၊ နယနော တိဒိဝါဓိဘူ။

သုရနာထော စ ဝဇိရ၊ ဟတ္ထော စ ဘူတပတျ’ပိ။

* ၂၀။

မဃဝါ ကောသိယော ဣန္ဒော၊ ဝတြဘူ ပါကသာသနော။

ဝိဍောဇော ထ သုဇာ တဿ [သုဇာတာ’ဿ (ဋီကာ)]၊ ဘရိယာ ထ ပုရံ ဘဝေ။

---

(ဓာန်၊၄။)

* ၂၁။

မသက္ကသာရာ [မသက္ကသာရော (သီ.)] ဝဿောက၊ သာရာ စေဝါ’ မရာဝတီ။

ဝေဇယန္တော တု ပါသာဒေါ၊

သုဓမ္မာ တု သဘာ မတာ။

* ၂၂။

ဝေဇယန္တော ရထော တဿ၊

ဝုတ္တော မာတလိ သာရထိ။

ဧရာဝဏော ဂဇော ပဏ္ဍု၊ ကမ္ဗလော တု သိလာသနံ။

* ၂၃။

သုဝီရောစ္စာဒယော ပုတ္တာ၊ နန္ဒာ ပေါက္ခရဏီ ဘဝေ။

နန္ဒနံ မိဿကံ စိတ္တ၊ လတာ ဖာရုသကံ ဝနာ။

* ၂၄။

အသနိ ဒွီသု ကုလိသံ၊ ဝဇိရံ ပုန္နပုံသကေ။

အစ္ဆရာယောတ္ထိယံ ဝုတ္တာ၊ ရမ္ဘာ အလမ္ဗုသာဒယော။

ဒေဝိတ္ထိယော ထ ဂန္ဓဗ္ဗာ၊ ပဉ္စသိခေါတိ အာဒယော။

* ၂၅။

ဝိမာနော နိတ္ထိယံ ဗျမှံ၊ ပီယူသံ တွမတံ သုဓာ။

သိနေရု မေရု တိဒိဝါ၊ ဓာရော နေရု သုမေရု စ။

* ၂၆။

ယုဂန္ဓရော ဤသဓရော၊ ကရဝီကော သုဒဿနော။

နေမိန္ဓရော ဝိနတကော၊ အဿကဏ္ဏော ကုလာစလာ။

* ၂၇။

မန္ဒာကိနီ တထာ’ကာသ၊ ဂင်္ဂါ သုရနဒီ ပျထ။

* ၂၈။

ကောဝိဠာရော တထာ ပါရိ၊ စ္ဆတ္တကော ပါရိဇာတကော။

ကပ္ပရုက္ခော တု သန္တာနာ၊ ဒယော ဒေဝဒ္ဒုမာ သိယုံ။

* ၂၉။

ပါစီ ပတီဈု’ ဒီစိ’တ္ထီ၊ ပုဗ္ဗ ပစ္ဆိမ ဥတ္တရာ။

ဒိသာထ ဒက္ခိဏာ’ ပါစီ၊ ဝိဒိသာ’နုဒိသာ ဘဝေ။

* ၃၀။

ဧရာဝတော [ဧရာဝဏော (သီ.)၊ အမရကောသေ ပန ဧရာဝတော ဧဝ အတ္ထိ] ပုဏ္ဍရီကော၊ ဝါမနော ကုမုဒေါ’ ဉ္ဇနော။

ပုပ္ဖဒန္တော သဗ္ဗဘုမ္မော၊ သုပ္ပတီကော ဒိသာဂဇာ။

* ၃၁။

ဓတရဋ္ဌော စ ဂန္ဓဗ္ဗာ၊ ဓိပေါ၊ ကုမ္ဘဏ္ဍသာမိ တု။

ဝိရုဠှကော၊ ဝိရူပက္ခော၊ တု နာဂါဓိပတီရိတော။

* ၃၂။

ယက္ခာဓိပေါ ဝေဿဝဏော၊ ကုဝေရော နရဝါဟနော။

အဠကာ [အလကာ (အမရကောသ)] ဠကမန္ဒာဿ၊ ပုရီ၊ ပဟရဏံ ဂဒါ။

စတုဒ္ဒိသာန မဓိပါ၊ ပုဗ္ဗာဒီနံ ကမာ ဣမေ။

---

(ဓာန်၊၅။)

* ၃၃။

ဇာတဝေဒေါ သိခီ ဇောတိ၊ ပါဝကော ဒဟနော’ နလော။

ဟုတာဝဟော’ စ္စိမာ ဓူမ၊ ကေတွ’ဂ္ဂိ ဂိနိ ဘာနုမာ။

* ၃၄။

တေဇော ဓူမသိခေါ ဝါယု၊ သခေါ စ ကဏှဝတ္တနီ။

ဝေဿာနရော ဟုတာသော ထ၊ သိခါဇာလ’စ္စိ စာပုမေ။

* ၃၅။

ဝိပ္ဖုလိင်္ဂံ ဖုလိင်္ဂဉ္စ၊ ဘသ္မာ [‘ဘသ္မာ’ တိပဒံ ရာဇာဒိဂဏေ ပရိယာပန္နံ (ရူပသိဒ္ဓိ-ဥဏာဒိ)၊ ဘသ္မံ (သီ.)] တု သေဋ္ဌိ ဆာရိကာ။

* ၃၆။

ကုက္ကုဠော တု’ဏှဘသ္မသ္မိ၊ မင်္ဂါရော’လာတ မုမ္မုကံ [တိကံ ဒိတ္တကဋ္ဌာဒိန္ဓနေ (ဋီကာ)]။

သမိဓာ ဣဓုမံ စေ’ဓော၊ ဥပါဒါနံ တထိန္ဓနံ။

* ၃၇။

အထော’ဘာသော ပကာသော စာ၊

'လောကော’ဇ္ဇောတာ’တပါ သမာ။

မာလုတော ပဝနော ဝါယု၊ ဝါတော’နိလ သမီရဏာ။

ဂန္ဓဝါဟော တထာ ဝါယော၊ သမီရော စ သဒါဂတိ။

* ၃၈။

ဝါယုဘေဒါ ဣမေ ဆု’ဒ္ဓ၊ င်္ဂမော စာဓောဂမော တထာ။

ကုစ္ဆိဋ္ဌော စ ကောဋ္ဌာသယော၊ အဿာသင်္ဂါနုသာရိနော။

* ၃၉။

အထော အပါနံ ပဿာသော၊

အဿာသော အာန မုစ္စတေ။

* ၄၀။

ဝေဂေါ ဇဝေါ ရယော ခိပ္ပံ၊ တု သီဃံ တုရိတံ လဟု။

အာသု တုဏ္ဏ မရံ စာဝိ၊ လမ္ဗိတံ တုဝဋံပိ စ။

* ၄၁။

သတတံ နိစ္စ မဝိရတာ၊ နာရတ သန္တတ မနဝရတဉ္စ ဓုဝံ။

ဘုသ မတိသယော စ ဒဠှံ၊ တိဗ္ဗေ’ကန္တာ’တိမတ္တ၊ ဗာဠှာနိ။

ခိပ္ပာဒီ ပဏ္ဍကေ ဒဗ္ဗေ၊ ဒဗ္ဗဂါ တေသု ယေ တိသု။

* ၄၂။

အဝိဂ္ဂဟော တု ကာမော စ၊ မနောဘူ မဒနော ဘဝေ။

အန္တကော ဝသဝတ္တီ စ၊ ပါပိမာ စ ပဇာပတိ။

* ၄၃။

ပမတ္တဗန္ဓု ကဏှော စ၊ မာရော နမုစိ၊ တဿ တု။

တဏှာ’ရတီ ရဂါ ဓီတူ၊ ဟတ္ထီ တု ဂိရိမေခလော။

* ၄၄။

ယမရာဇာ စ ဝေသာယီ၊ ယမော’ဿ နယနာဝုဓံ။

ဝေပစိတ္တိ ပုလောမော စ၊ ကိမ္ပုရိသော တု ကိန္နရော။

* ၄၅။

အန္တလိက္ခံ ခ’မာဒိစ္စ၊ ပထော’ဗ္ဘံ ဂဂန’မ္ဗရံ။

ဝေဟာသော စာနိလပထော၊ အာကာသော နိတ္ထိယံ နဘံ။

---

(ဓာန်၊၆။)

* ၄၆။

ဒေဝေါ ဝေဟာယသော တာရာ၊

ပထော သုရပထော အဃံ။

* ၄၇။

မေဃော ဝလာဟကော ဒေဝေါ၊ ပဇ္ဇုန္နော’မ္ဗုဓရော ဃနော။

ဓာရာဓရော စ ဇီမူတော၊ ဝါရိဝါဟော တထာ’မ္ဗုဒေါ။

* ၄၈။

အဗ္ဘံ တီသွထ ဝဿဉ္စ၊ ဝဿနံ ဝုဋ္ဌိ နာရိယံ။

သတေရတာ’က္ခဏာ ဝိဇ္ဇု၊ ဝိဇ္ဇုတာ စာစိရပ္ပဘာ။

* ၄၉။

မေဃနာဒေ တု ဓနိတံ၊ ဂဇ္ဇိတံ ရသိတာဒိ စ။

ဣန္ဒာဝုဓံ ဣန္ဒဓနု၊ ဝါတက္ခိတ္တမ္ဗု သီကရော။

* ၅၀။

အာသာရော ဓာရာ သမ္ပာတော၊

ကရကာ တု ဃနောပလံ။

ဒုဒ္ဒိနံ မေဃစ္ဆန္နာဟေ၊ ပိဓာနံ တွပဓာရဏံ။

* ၅၁။

တိရောဓာန’န္တရဓာနာ၊ ပိဓာန ဆာဒနာနိ စ။

ဣန္ဒု စန္ဒော စ နက္ခတ္တ၊ ရာဇာ သောမော နိသာကရော။

* ၅၂။

ဩသဓီသော ဟိမရံသိ၊ သသင်္ကော စန္ဒိမာ သသီ။

သီတရံသိ နိသာနာထော၊ ဥဠုရာဇာ စ မာ ပုမေ။

* ၅၃။

ကလာ သောဠသမော ဘာဂေါ၊ ဗိမ္ဗံ တု မဏ္ဍလံ ဘဝေ။

အဍ္ဎော တွဒ္ဓါ ဥပဍ္ဎော စ၊ ဝါ ခဏ္ဍံ သကလံ ပုမေ။

* ၅၄။

အဒ္ဓံ ဝုတ္တံ သမေ ဘာဂေ၊ ပသာဒေါ တု ပသန္နတာ။

ကောမုဒီ စန္ဒိကာ ဇုဏှာ၊ ကန္တိ သောဘာ ဇုတိ စ္ဆဝိ။

* ၅၅။

ကလင်္ကော လဉ္ဆနံ လက္ခံ၊ အင်္ကော’ဘိညာဏ လက္ခဏံ။

စိဟနံ စာပိ သောဘာ တု၊ ပရမာ သုသမာ ထ စ။

* ၅၆။

သီတံ ဂုဏေ၊ ဂုဏိလိင်္ဂါ၊ သီတ သိသိရ သီတလာ။

ဟိမံ တုဟိန မုဿာဝေါ၊ နီဟာရော မဟိကာ ပျထ။

* ၅၇။

နက္ခတ္တံ ဇောတိ ဘံ တာရာ၊ အပုမေ တာရကော’ဠု စ။

* ၅၈။

အဿယုဇော ဘရဏိတ္ထီ၊ သကတ္တိကာ ရောဟိဏီ ပိစ။

မိဂသိရ [မဂသိရ (သီ.)] မဒ္ဒါ စ ပုနဗ္ဗသု၊ ဖုဿော [ပုဿော (ဋီ.)] စာသိလေသ’ပိ။

* ၅၉။

မာဃာ [မဃ (သီ.)] စ ဖဂ္ဂုနီ ဒွေ စ၊ ဟတ္ထာ စိတ္တာ စ သွာတိပိ။

ဝိသာခါ’ နုရာဓာ ဇေဋ္ဌာ၊ မူလာ’ သာဠှာ ဒုဝေ တထာ။

---

(ဓာန်၊၇။)

* ၆၀။

သဝဏော စ ဓနိဋ္ဌာ စ၊ သတဘိသဇော ပုဗ္ဗု’တ္တရဘဒ္ဒပဒါ။

ရေဝတျပီတိ ကမတော၊ သတ္တာဓိကဝီသနက္ခတ္တာ။

* ၆၁။

သောဗ္ဘာနု ကထိတော ရာဟု၊ သူရာဒီ တု နဝဂ္ဂဟာ။

ရာသိ မေသာဒိကော ဘဒ္ဒ၊ ပဒါ ပေါဋ္ဌပဒါ သမာ။

* ၆၂။

အာဒိစ္စော သူရိယော သူရော၊ သတရံသိ ဒိဝါကရော။

ဝေရောစနော ဒိနကရော၊ ဥဏှရံသိ ပဘင်္ကရော။

* ၆၃။

အံသုမာလီ ဒိနပတိ၊ တပနော ရဝိ ဘာနုမာ။

ရံသိမာ ဘာကရော ဘာနု၊ အက္ကော သဟဿရံသိ စ။

* ၆၄။

ရံသိ အာဘာ ပဘာ ဒိတ္တိ၊ ရုစိ ဘာ ဇုတိ ဒီဓိတိ။

မရီစိ ဒွီသု ဘာနွံ’သု၊ မယူခေါ ကိရဏော ကရော။

* ၆၅။

ပရိဓိ ပရိဝေသော ထ၊ မရီစိ မိဂတဏှိကာ။

သူရဿောဒယတော ပုဗ္ဗု’၊ ဋ္ဌိတရံသိ သိယာ’ ရုဏော။

* ၆၆။

ကာလော’ဒ္ဓါ သမယော ဝေလာ၊

တဗ္ဗိသေသာ ခဏာဒယော။

ခဏော ဒသစ္ဆရာကာလော၊

ခဏာ ဒသ လယော ဘဝေ။

* ၆၇။

လယာ ဒသ ခဏလယော၊

မုဟုတ္တော တေ သိယာ ဒသ။

ဒသ ခဏမုဟုတ္တော တေ၊ ဒိဝသော တု အဟံ ဒိနံ။

* ၆၈။

ပဘာတဉ္စ ဝိဘာတဉ္စ၊ ပစ္စူသော ကလ္လ မပျထ။

အဘိဒေါသော ပဒေါသော ထ၊

သာယော သဉ္ဈာ ဒိနစ္စယော။

* ၆၉။

နိသာ စ ရဇနီ ရတ္တိ၊ တိယာမာ သံဝရီ ဘဝေ။

ဇုဏှာ တု စန္ဒိကာယုတ္တာ၊ တမုဿန္နာ တိမိသိကာ။

* ၇၀။

နိသီထော မဇ္ဈိမာ ရတ္တိ၊ အဍ္ဎရတ္တော မဟာနိသာ။

အန္ဓကာရော တမော နိတ္ထီ၊ တိမိသံ တိမိရံ မတံ။

* ၇၁။

စတုရင်္ဂတမံ ဧဝံ၊ ကာဠပက္ခစတုဒ္ဒသီ။

ဝနသဏ္ဍော ဃနော မေဃ၊ ပဋလံ စာ’ဍ္ဎရတ္တိ စ။

---

(ဓာန်၊၈။)

* ၇၂။

အန္ဓတမံ ဃနတမေ၊ ပဟာရော ယာမ၊ သညိတော။

ပါဋိပဒေါ တု ဒုတိယာ၊ တတိယာဒီ တိထီ [တိထိ]၊ တာယတိ ပါလေတီတိ တိထိ၊ တာ+ဣတိ (ဏွာဒိ) ဒွိသု။

* ၇၃။

ပန္နရသီ ပဉ္စဒသီ၊ ပုဏ္ဏမာသီ တု ပုဏ္ဏမာ။

အမာဝသီ ပျမာဝါသီ၊ ထိယံ ပန္နရသီ’ ပရာ။

* ၇၄။

ဃဋိကာ သဋ္ဌျ’ ဟောရတ္တော၊ ပက္ခော တေ ဒသ ပဉ္စ စ။

တေ တု ပုဗ္ဗာပရာ သုက္က၊

ကာဠာ၊ မာသော တု တေ ဒုဝေ။

* ၇၅။

စိတ္တော ဝေသာခ၊ ဇေဋ္ဌော စာ၊ သာဠှော ဒွီသု စ သာဝဏော။

ပေါဋ္ဌပါဒ’ဿယုဇာ စ၊ မာသာ ဒွါဒသ ကတ္တိကော။

* ၇၆။

မာဂသိရော တထာ ဖုဿော၊ ကမေန မာဃ ဖဂ္ဂုဏာ။

ကတ္တိက’ဿယုဇာ မာသာ၊ ပစ္ဆိမ ပုဗ္ဗကတ္တိကာ။

* ၇၇။

သာဝဏော နိက္ခမနီယော၊

စိတ္တမာသော တု ရမ္မကော။

* ၇၈။

စတုရော စတုရော မာသာ၊ ကတ္တိကကာဠပက္ခတော။

ကမာ ဟေမန္တ ဂိမှာန၊ ဝဿာနာ ဥတုယော ဒွိသု။

* ၇၉။

ဟေမန္တော သိသိရ မုတူ၊

ဆ ဝါ ဝသန္တော စ ဂိမှ ဝဿာနာ။

သရဒေါတိ ကမာ မာသာ၊ ဒွေ ဒွေ ဝုတ္တာနုသာရေန။

* ၈၀။

ဥဏှော နိဒါဃော ဂိမှောထ၊

ဝဿော ဝဿာန ပါဝုသာ။

ဥတူဟိ တီဟိ ဝဿာနာ၊ ဒိကေဟိ ဒက္ခိဏာယနံ။

* ၈၁။

ဥတ္တရာယန မညေဟိ၊ တီဟိ ဝဿာယနဒွယံ။

ဝဿ သံဝစ္ဆရာ နိတ္ထီ၊ သရဒေါ ဟာယနော သမာ။

* ၈၂။

ကပ္ပက္ခယော တု သံဝဋ္ဋော၊ ယုဂန္တ ပလယာ အပိ။

အလက္ခီ ကာလကဏ္ဏိတ္ထီ၊ အထ လက္ခီ သိရိ’တ္ထိယံ။

* ၈၃။

ဒနု ဒါနဝမာတာ ထ၊ ဒေဝမာတာ ပနာ’ဒိတိ။

* ၈၄။

ပါပဉ္စ ကိဗ္ဗိသံ ဝေရာ၊ ဃံ ဒုစ္စရိတ ဒုက္ကဋံ။

အပုညာ’ကုသလံ ကဏှံ၊ ကလုသံ ဒုရိတာ’ဂု စ။

---

(ဓာန်၊၉။)

* ၈၅။

ကုသလံ သုကတံ သုက္ကံ၊ ပုညံ ဓမ္မ မနိတ္ထိယံ။

သုစရိတ မထော ဒိဋ္ဌ၊ ဓမ္မိကံ ဣဟလောကိကံ။

* ၈၆။

သန္ဒိဋ္ဌိက မထော ပါရ၊ လောကိကံ သမ္ပရာယိကံ။

တက္ကာလံ တု တဒါတွံ စော၊

တ္တရကာလော တု အာယတိ။

* ၈၇။

ဟာသော’ တ္တမနတာ ပီတိ၊ ဝိတ္တိ တုဋ္ဌိ စ နာရိယံ။

အာနန္ဒော ပမုဒါ’မောဒေါ၊ သန္တောသော နန္ဒိ သမ္မဒေါ။

* ၈၈။

ပါမောဇ္ဇဉ္စ ပမောဒေါ ထ၊ သုခံ သာတဉ္စ ဖာသွ’ထ။

ဘဒ္ဒံ သေယျော သုဘံ ခေမံ၊ ကလျာဏံ မင်္ဂလံ သိဝံ။

* ၈၉။

ဒုက္ခဉ္စ ကသိရံ ကိစ္ဆံ၊ နီဃော စ ဗျသနံ အဃံ။

ဒဗ္ဗေ တု ပါပပုညာနိ၊ တီသွာကိစ္ဆံ သုခါဒိ စ။

* ၉၀။

ဘာဂျံ နိယတိ ဘာဂေါ စ၊ ဘာဂဓေယျံ ဝိဓီ’ရိတော။

အထော ဥပ္ပတ္တိ နိဗ္ဗတ္တိ၊ ဇာတိ ဇနန မုဗ္ဘဝေါ။

* ၉၁။

နိမိတ္တံ ကာရဏံ ဌာနံ၊ ပဒံ ဗီဇံ နိဗန္ဓနံ။

နိဒါနံ ပဘဝေါ ဟေတု၊ သမ္ဘဝေါ သေတု ပစ္စယော။

* ၉၂။

ကာရဏံ ယံ သမာသန္နံ၊ ပဒဋ္ဌာနန္တိ တံ မတံ။

ဇီဝေါ တု ပုရိသော’တ္တာ ထ၊ ပဓာနံ ပကတိတ္ထိယံ။

* ၉၃။

ပါဏော သရီရီ ဘူတံ ဝါ၊ သတ္တော ဒေဟီ စ ပုဂ္ဂလော။

ဇီဝေါ ပါဏီ ပဇာ ဇန္တု၊

ဇနော လောကော တထာဂတော။

* ၉၄။

ရူပံ သဒ္ဒေါ ဂန္ဓ ရသာ၊ ဖဿော ဓမ္မော စ ဂေါစရာ။

အာလမ္ဗာ ဝိသယာ တေ ဆာ၊ ရမ္မဏာ လမ္ဗဏာနိ စ။

* ၉၅။

သုက္ကော ဂေါရော သိတော’ဒါတာ၊

ဓဝလော သေတ၊ ပဏ္ဍရာ။

သောဏော တု လောဟိတော ရတ္တော၊

တမ္ဗ မဉ္ဇိဋ္ဌ ရောဟိတာ။

* ၉၆။

နီလော ကဏှာ’သိတာ ကာဠော၊

မေစကော သာမ သာမလာ။

သိတပီတေတု ပဏ္ဍု’တ္တော၊ ဤသံပဏ္ဍုတု ဓူသရော။

---

(ဓာန်၊၁၀။)

* ၉၇။

အရုဏော ကိဉ္စိရတ္တော ထ၊

ပါဋလော သေတလောဟိတော။

အထော ပီတော ဟလိဒျာဘော၊

ပလာသော ဟရိတော ဟရိ။

* ၉၈။

ကဠာရော ကပိလော နီလ၊ ပီတေ ထ ရောစနပ္ပဘေ။

ပိင်္ဂေါ ပိသင်္ဂေါ ပျထဝါ၊ ကဠာရာဒီ တု ပိင်္ဂလေ။

* ၉၉။

ကမ္မာသော သဗလော စိတ္တော၊

သာဝေါ တု ကဏှပီတကေ။

ဝါစ္စလိင်္ဂါ ဂုဏိနျေတေ၊ ဂုဏေ သုက္ကာဒယော ပုမေ။

* ၁၀၀။

နစ္စံ နဋ္ဋဉ္စ နဋနံ၊ နတ္တနံ လာသနံ ဘဝေ။

နစ္စံ တု ဝါဒိတံ ဂီတ၊ မိတိ နာဋုမိဒံ တယံ။

* ၁၀၁။

နစ္စဋ္ဌာနံ သိယာ ရင်္ဂေါ၊ ဘိနယော သူစျသူစနံ။

အင်္ဂဟာရော’င်္ဂဝိက္ခေပေါ၊ နဋ္ဋကော နဋကော နဋော။

* ၁၀၂။

သိင်္ဂါရော ကရုဏော ဝီရ၊ ဗ္ဘုတ ဟဿ ဘယာနကာ။

သန္တော ဗီဘစ္ဆ ရုဒ္ဒါနိ၊ နဝ နာဋျရသာ ဣမေ။

* ၁၀၃။

ပေါသဿ နာရိယံ ပေါသေ၊ ဣတ္ထိယာ သင်္ဂမံ ပတိ။

ယာ ပိဟာ ဧသ သိင်္ဂါရော၊ ရတိကီဠာဒိကာရဏော။

* ၁၀၄။

ဥတ္တမ ပ္ပကတိပ္ပာယော၊ ဣတ္ထိပုရိသဟေတုကော။

သော သမ္ဘောဂေါ ဝိယောဂေါတိ၊

သိင်္ဂါရော ဒုဝိဓော မတော။

---

(ဓာန်၊၁၁။)

* ၁၀၅။

ဘာသိတံ လပိတံ ဘာသာ၊ ဝေါဟာရော ဝစနံ ဝစော။

ဥတ္တိ ဝါစာ ဂိရာ ဝါဏီ၊ ဘာရတီ ကထိတာ [ကထာ (ကတ္ထစိ)] ဝစီ။

* ၁၀၆။

ဧကာချာတော ပဒစယော၊ သိယာ ဝါကျံသကာရကော။

အာမေဍိတန္တိ ဝိညေယျံ၊ ဒွတ္တိက္ခတ္တု မုဒီရဏံ။

* ၁၀၇။

ဘယေ ကောဓေ ပသံသာယံ၊ တုရိတေ ကောတူဟလေ’စ္ဆရေ။

ဟာသေ သောကေ ပသာဒေ စ၊ ကရေ အာမေဍိတံ ဗုဓော။

* ၁၀၈။

ဣရု နာရီ ယဇု သာမ၊ မိတိ ဝေဒါ တယော သိယုံ။

ဧတေ ဧဝ တယီ နာရီ၊ ဝေဒေါ မန္တော သုတိတ္ထိယံ။

* ၁၀၉။

အဋ္ဌကော ဝါမကော ဝါမ၊ ဒေဝေါ စင်္ဂီရသော ဘဂု။

ယမဒဂ္ဂိ စ ဝါသိဋ္ဌော၊ ဘာရဒွါဇော စ ကဿပေါ။

ဝေဿာမိတ္တောတိ မန္တာနံ၊ ကတ္တာရော ဣသယော ဣမေ။

* ၁၁၀။

ကပ္ပော ဗျာကရဏံ ဇောတိ၊ သတ္ထံ သိက္ခာ နိရုတ္တိ စ။

ဆန္ဒောဝိစိတိ စေတာနိ၊ ဝေဒင်္ဂါနိ ဝဒန္တိ ဆ။

* ၁၁၁။

ဣတိဟာသော ပုရာဝုတ္တ၊ ပ္ပဗန္ဓော ဘာရတာဒိကော။

နာမပ္ပကာသကံ သတ္ထံ၊ ရုက္ခာဒီနံ နိဃဏ္ဍု သော။

* ၁၁၂။

ဝိတဏ္ဍသတ္ထံ ဝိညေယျံ၊ ယံ တံ လောကာယတံ ဣတိ။

ကေဋုဘံ တု ကြိယာကပ္ပ၊ ဝိကပ္ပော ကဝိနံ ဟိတော။

* ၁၁၃။

အာချာယိကောပလဒ္ဓတ္ထာ၊ ပဗန္ဓကပ္ပနာ ကထာ။

ဒဏ္ဍနီတျ’တ္ထသတ္ထသ္မိံ၊ ဝုတ္တန္တော တု ပဝတ္တိ စ။

* ၁၁၄။

သညာ၊ ချာ၊ ဝှါ သမညာ စာ၊ ဘိဓာနံ နာမ မဝှယော။

နာမဓေယျာ’ ဓိဝစနံ၊ ပဋိဝါကျံ တု ဥတ္တရံ။

* ၁၁၅။

ပဉှော တီသွ နုယောဂေါ စ၊ ပုစ္ဆာ ပျထ နိဒဿနံ။

ဥပေါဂ္ဃာတော စ ဒိဋ္ဌန္တော၊ တထော’ဒါဟရဏံ ဘဝေ။

* ၁၁၆။

သမာ သင်္ခေပ သံဟာရာ၊ သမာသော သင်္ဂဟော ပျထ။

သတံ ဓာရယသီ တျာဒျ၊ ဗ္ဘက္ခာနံ တုစ္ဆဘာသနံ။

* ၁၁၇။

ဝေါဟာရော တု ဝိဝါဒေါ ထ၊ သပနံ သပထောပိ စ။

ယသော သိလောကော ကိတ္တိတ္ထီ၊

ဃောသနာ တု’စ္စသဒ္ဒနံ။

* ၁၁၈။

ပဋိဃောသော ပဋိရဝေါ၊ ထော’ ပညာသော ဝစီမုခံ။

ကတ္ထနာ စ သိလာဃာ စ၊ ဝဏ္ဏနာ စ နုတိ တ္ထုတိ။

* ၁၁၉။

ထောမနဉ္စ [ထောမနံ ဝါ (ကတ္ထစိ ထောမနံ ထောမနာ ဒွိလိင်္ဂေ)] ပသံသာထ၊ ကေကာ နာဒေါ သိခဏ္ဍိနံ။

ဂဇာနံ ကောဉ္စနာဒေါ ထ၊

မတာ ဟေသာ ဟယဒ္ဓနိ။

* ၁၂၀။

ပရိယာယော ဝေဝစနံ၊ သာကစ္ဆာ တု စ သံကထာ။

ဥပဝါဒေါ စု’ပက္ကောသာ၊ ဝဏ္ဏဝါဒါ’နုဝါဒေါ စ။

ဇနဝါဒါ’ပဝါဒါပိ၊ ပရိဝါဒေါ စ တုလျတ္ထာ။

---

(ဓာန်၊၁၂။)

* ၁၂၁။

ခေပေါ နိန္ဒာ တထာ ကုစ္ဆာ၊ ဇိဂုစ္ဆာ ဂရဟာ ဘဝေ။

နိန္ဒာပုဗ္ဗော ဥပါရမ္ဘော၊ ပရိဘာသန မုစ္စတေ။

* ၁၂၂။

အဋ္ဌာနရိယဝေါဟာရ၊ ဝသေန ယာ ပဝတ္တိတာ။

အဘိဝါကျံ သိယာ ဝါစာ၊ သာ ဝီတိက္ကမဒီပနီ။

* ၁၂၃။

မုဟုံဘာသာ နုလာပေါထ၊ ပလာပေါ နတ္ထိကာ ဂိရာ။

အာဒေါဘာသန မာလာပေါ၊

ဝိလာပေါ တု ပရိဒ္ဒဝေါ။

* ၁၂၄။

ဝိပ္ပလာပေါ ဝိရောဓောတ္တိ၊ သန္ဒေသောတ္တိ တု ဝါစိကံ။

သမ္ဘာသနံ တု သလ္လာပေါ၊ ဝိရောဓရဟိတံ မိထု။

* ၁၂၅။

ဖရုသံ နိဋ္ဌုရံ ဝါကျံ၊ မနုညံ ဟဒယင်္ဂမံ။

သံကုလံ တု ကိလိဋ္ဌဉ္စ၊ ပုဗ္ဗာပရဝိရောဓိနီ။

* ၁၂၆။

သမုဒါယတ္ထရဟိတံ၊ အဗဒ္ဓမိတိ [အဗန္ဓ (က.)] ကိတ္တိတံ။

ဝိတထံ တု မုသာ စာထ [အာဟတံ တု မုသာတ္ထကံ (ကတ္ထစိ၊ အမရကောသေ)]၊ ဖရုသာဒီ တိလိင်္ဂိကာ။

* ၁၂၇။

သမ္မာ ဗျယဉ္စာ ဝိတထံ၊ သစ္စံ တစ္ဆံ ယထာတထံ။

တဗ္ဗန္တာ တီသွ လီကံ တွ၊ သစ္စံ မိစ္ဆာ မုသာ ဗျယံ။

* ၁၂၈။

ရဝေါ နိနာဒေါ နိနဒေါ စ သဒ္ဒေါ၊

နိဂ္ဃောသ နာဒ ဒ္ဓနယော စ ရာဝေါ။

အာရာဝ သံရာဝ ဝိရာဝ ဃောသာ၊

ရဝါ သုတိတ္ထီ သရ နိဿနာ စ။

* ၁၂၉။

ဝိဿဋ္ဌ မဉ္ဇု ဝိညေယျာ၊ သဝနီယာ ဝိသာရိနော။

ဗိန္ဒု ဂမ္ဘီရ နိန္နာဒီ၊ တျေဝ မဋ္ဌင်္ဂိကော သရော။

* ၁၃၀။

တိရစ္ဆာနဂတာနဉှိ၊ ရုတံ ဝဿိတ မုစ္စတေ။

ကောလာဟလော ကလဟလော၊

ဂီတံ ဂါနဉ္စ ဂီတိကာ။

* ၁၃၁။

သရာ သတ္တ တယော ဂါမာ၊ စေကဝီသတိ မုစ္ဆနာ။

တာနာ [ဌာနာနိ (ဗဟူသု)] စေကူနပညာသ၊ ဣစ္စေတံ သရမဏ္ဍလံ။

* ၁၃၂။

ဥသဘော ဓေဝတော စေဝ၊ ဆဇ္ဇ ဂန္ဓာရ မဇ္ဈိမာ။

ပဉ္စမော စ နိသာဒေါတိ၊ သတ္တေ’တေ ဂဒိတာ သရာ။

---

(ဓာန်၊၁၃။)

* ၁၃၃။

နဒန္တိ ဥသဘံ ဂါဝေါ၊ တုရဂါ ဓေဝတံ တထာ။

ဆဇ္ဇံ မယူရာ ဂန္ဓာရ၊ မဇာ ကောဉ္စာ စ မဇ္ဈိမံ။

* ၁၃၄။

ပဉ္စမံ ပရပုဋ္ဌာဒီ၊ နိသာဒမ္ပိ စ ဝါရဏာ။

ဆဇ္ဇော စ မဇ္ဈိမော ဂါမာ၊

တယော သာဓာရဏောတိ စ။

* ၁၃၅။

သရေသု တေသု ပစ္စေကေ၊ တိဿော တိဿော ဟိ မုစ္ဆနာ။

သိယုံ တထေဝ တာနာနိ [ဌာနာနိ (ဗဟူသု)]၊ သတ္တ သတ္တေဝ လဗ္ဘရေ။

* ၁၃၆။

တိဿော ဒုဝေ စတဿော စ၊ စတဿော ကမတော သရေ။

တိဿော ဒုဝေ စတဿောတိ၊ ဒွါဝီသတိ သုတီ သိယုံ။

* ၁၃၇။

ဥစ္စတရေ ရဝေ တာရော၊ ထာဗျတ္တေ မဓုရေ ကလော။

ဂမ္ဘီရေ တု ရဝေ မန္ဒော၊ တာရာဒီ တီသွထော ကလေ။

ကာကလီ သုခုမေ ဝုတ္တော၊

ကြိယာဒိသမတာ လယော။

* ၁၃၈။

ဝီဏာ စ ဝလ္လကီ သတ္တ၊ တန္တီ သာ ပရိဝါဒိနီ။

ပေါက္ခရော ဒေါဏိ ဝီဏာယ၊

ဥပဝီဏော တု ဝေဌကော။

* ၁၃၉။

အာတတဉ္စေဝ ဝိတတ၊ မာတတဝိတတံ ဃနံ။

သုသိရံ စေတိ တူရိယံ၊ ပဉ္စင်္ဂိက မုဒီရိတံ။

* ၁၄၀။

အာတတံ နာမ စမ္မာဝ၊ နဒ္ဓေသု ဘေရိယာဒိသု။

တလေ’ကေကယုတံ ကုမ္ဘ၊ ထုဏ ဒဒ္ဒရိကာဒိကံ။

* ၁၄၁။

ဝိတတံ စော’ဘယတလံ၊ တူရိယံ မုရဇာဒိကံ။

အာတတဝိတတံ သဗ္ဗ၊ ဝိနဒ္ဓံ ပဏဝါဒိကံ။

* ၁၄၂။

သုသိရံ ဝံသသင်္ခါဒိ၊ သမ္မတာလာဒိကံ ဃနံ။

အာတောဇ္ဇံ တု စ ဝါဒိတ္တံ၊ ဝါဒိတံ ဝဇ္ဇ မုစ္စတေ။

* ၁၄၃။

ဘေရီ (ဘေရိ) ဒုန္ဒုဘိ ဝုတ္တော ထ၊

မုဒိင်္ဂေါ မုရဇောဿ တု။

အာလိင်္ဂ၊ င်္ကျော၊ ဒ္ဓကာ ဘေဒါ၊

တိဏဝေါ တု စ ဍိဏ္ဍိမော။

---

(ဓာန်၊၁၄။)

* ၁၄၄။

အာလမ္ဗရော တု ပဏဝေါ၊ ကောဏော ဝီဏာဒိဝါဒနံ။

ဒဒ္ဒရီ ပဋဟော ဘေရိ၊ ပ္ပဘေဒါ မဒ္ဒလာဒယော။

* ၁၄၅။

ဇနပ္ပိယေ ဝိမဒ္ဒုဋ္ဌေ၊ ဂန္ဓေ ပရိမလော ဘဝေ။

သော တွာ မောဒေါ ဒူရဂါမီ၊ ဝိဿန္တာ တီသွိတော ပရံ။

* ၁၄၆။

ဣဋ္ဌဂန္ဓော စ သုရဘိ၊ သုဂန္ဓော စ သုဂန္ဓိ စ။

ပူတိဂန္ဓိ တု ဒုဂ္ဂန္ဓော၊ ထ ဝိဿံ အာမဂန္ဓိ ယံ။

* ၁၄၇။

ကုင်္ကုမဉ္စေဝ ယဝန၊ ပုပ္ဖဉ္စ တဂရံ တထာ။

တုရုက္ခောတိ စတုဇ္ဇာတိ၊ ဂန္ဓာ ဧတေ ပကာသိတာ။

* ၁၄၈။

ကသာဝေါ နိတ္ထိယံ တိတ္တော၊ မဓုရော လဝဏော ဣမေ။

အမ္ဗိလော ကဋုကော စေတိ၊ ဆ ရသာ တဗ္ဗတီ တိသု။

* ၁၄၉။

သိယာ ဖဿော စ ဖောဋ္ဌဗ္ဗော၊

ဝိသယီ တွက္ခ မိန္ဒြိယံ။

နယနံ တွက္ခိ နေတ္တဉ္စ၊ လောစနံ စ’စ္ဆိ စက္ခု စ။

* ၁၅၀။

သောတံ သဒ္ဒဂ္ဂဟော ကဏ္ဏော၊ သဝနံ သုတိ နတ္ထု တု။

နာသာ စ နာသိကာ ဃာနံ၊ ဇိဝှာတု ရသနာ ဘဝေ။

* ၁၅၁။

သရီရံ ဝပု ဂတ္တဉ္စာ၊ တ္တဘာဝေါ ဗောန္ဒိ ဝိဂ္ဂဟော။

ဒေဟံ ဝါ ပုရိသေ ကာယော၊ ထိယံ တနု ကဠေဝရံ။

* ၁၅၂။

စိတ္တံ စေတော မနော နိတ္ထီ၊ ဝိညာဏံ ဟဒယံ တထာ။

မာနသံ ဓီ တု ပညာ စ၊ ဗုဒ္ဓိ မေဓာ မတိ မုတိ။

* ၁၅၃။

ဘူရီ မန္တာ စ ပညာဏံ၊ ဉာဏံ ဝိဇ္ဇာ စ ယောနိ စ။

ပဋိဘာန မမောဟော ထ၊ ပညာဘေဒါ ဝိပဿနာ။

* ၁၅၄။

သမ္မာဒိဋ္ဌိ ပဘုတိကာ၊ ဝီမံသာ တု ဝိစာရဏာ။

သမ္ပဇညံ တု နေပက္ကံ၊ ဝေဒယိတံ တု ဝေဒနာ။

* ၁၅၅။

တက္ကော ဝိတက္ကော သင်္ကပ္ပော၊

ပ္ပနော’ ဟာ’ ယု တု ဇီဝိတံ။

ဧကဂ္ဂတာ တု သမထော၊ အဝိက္ခေပေါ သမာဓိ စ။

* ၁၅၆။

ဥဿာဟာ’ တပ္ပ ပဂ္ဂါဟာ၊ ဝါယာမော စ ပရက္ကမော။

ပဓာနံ ဝီရိယံ စေဟာ၊ ဥယျာမော စ ဓိတိ တ္ထိယံ။

* ၁၅၇။

စတ္တာရိ ဝီရိယင်္ဂါနိ၊ တစဿ စ နဟာရုနော။

အဝသိဿန မဋ္ဌိဿ၊ မံသလောဟိတသုဿနံ။

---

(ဓာန်၊၁၅။)

* ၁၅၈။

ဥဿောဠှီ တွ ဓိမတ္တေဟာ၊ သတိ တွ နုဿတိ တ္ထိယ။

လဇ္ဇာ ဟိရီ သမာနာ ထ၊ ဩတ္တပ္ပံ ပါပဘီရုတာ။

* ၁၅၉။

မဇ္ဈတ္တတာ တု’ပေက္ခာ စ၊ အဒုက္ခမသုခါ သိယာ။

စိတ္တာဘောဂေါ မနက္ကာရော၊

အဓိမောက္ခော တု နိစ္ဆယော။

* ၁၆၀။

ဒယာ’ နုကမ္ပာ ကာရုညံ၊ ကရုဏာ စ အနုဒ္ဒယာ။

ထိယံ ဝေရမဏီ စေဝ၊ ဝိရတျာ’ ရတိ စာပျထ။

* ၁၆၁။

တိတိက္ခာ ခန္တိ ခမနံ၊ ခမာ မေတ္တာ တု မေတျ’ထ။

ဒဿနံ ဒိဋ္ဌိ လဒ္ဓိတ္ထီ၊ သိဒ္ဓန္တော သမယော ဘဝေ။

* ၁၆၂။

တဏှာ စ တသိဏာ ဧဇာ၊ ဇာလိနီ စ ဝိသတ္တိကာ။

ဆန္ဒော ဇဋာ နိကန္တျာ’သာ၊ သိဗ္ဗိနီ ဘဝနေတ္တိ စ။

* ၁၆၃။

အဘိဇ္ဈာ ဝနထော ဝါနံ၊ လောဘော ရာဂေါ စ အာလယော။

ပိဟာ မနောရထော ဣစ္ဆာ၊ ဘိလာသော ကာမ ဒေါဟဠာ။

အာကင်္ခါ ရုစိ ဝုတ္တာ သာ၊ တွဓိကာ လာလသာ ဒွိသု။

* ၁၆၄။

ဝေရံ ဝိရောဓော ဝိဒ္ဒေသော၊ ဒေါသော စ ပဋိဃဉ္စ ဝါ။

ကောဓာ’ ဃာတာ ကောပ ရောသာ၊

ဗျာပါဒေါ’ နဘိရဒ္ဓိ စ။

* ၁၆၅။

ဗဒ္ဓဝေရ မုပနာဟော၊ သိယာ သောကော တု သောစနံ။

ရောဒိတံ ကန္ဒိတံ ရုဏ္ဏံ၊ ပရိဒေဝေါ ပရိဒ္ဒဝေါ။

* ၁၆၆။

ဘီတိတ္ထိ ဘယ မုတ္တာသော၊ ဘေရဝံ တု မဟဗ္ဘယံ။

* ၁၆၇။

ဘေရဝံ ဘီသနံ ဘီမံ၊ ဒါရုဏဉ္စ ဘယာနကံ။

ဃောရံ ပဋိဘယံ ဘေသ္မံ၊ ဘယင်္ကရ မိမေ တီသု။

* ၁၆၈။

ဣဿာ ဥသူယာ မစ္ဆေရံ၊ တု မစ္ဆရိယ မစ္ဆရံ။

မောဟော’ဝိဇ္ဇာ တထာ’ဉာဏံ၊ မာနော ဝိဓာ စ ဥန္နတိ။

* ၁၆၉။

ဥဒ္ဓစ္စ မုဒ္ဓဋံ စာထ [ဥဒ္ဓဝံဥဒ္ဓံ ဓာဝတိ စိတ္တ မေတေနာတိ ဥဒ္ဓဝံ (ဋီကာ)]၊ တာပေါ ကုက္ကုစ္စမေဝ စ။

ပစ္ဆာတာပေါ နုတာပေါ စ၊ ဝိပ္ပဋိသာရော ပကာသိတော။

* ၁၇၀။

မနောဝိလေခ သန္ဒေဟာ၊ သံသယော စ ကထံကထာ။

ဒွေဠှကံ ဝိစိကိစ္ဆာ စ၊ ကင်္ခါ သင်္ကာ ဝိမတျပိ။

---

(ဓာန်၊၁၆။)

* ၁၇၁။

ဂဗ္ဗော ဘိမာနော’ဟံကာရော၊ စိန္တာတု ဈာန မုစ္စတေ။

နိစ္ဆယော နိဏ္ဏယော ဝုတ္တော၊ ပဋိညာ တု ပဋိဿဝေါ။

* ၁၇၂။

အဝမာနံ တိရက္ကာရော၊ ပရိဘဝေါ ပျ’ နာဒရော။

ပရာဘဝေါ ပျ’ ဝညာ ထ၊ ဥမ္မာဒေါ စိတ္တဝိဗ္ဘမော။

* ၁၇၃။

ပေမံ သိနေဟော သ္နေဟော ထ၊ စိတ္တပီဠာ ဝိသညိတာ။

ပမာဒေါ သတိဝေါဿဂ္ဂေါ၊ ကောတူဟလံ ကုတူဟလံ။

* ၁၇၄။

ဝိလာသော လလိတံ လီလာ၊ ဟာဝေါ ဟေဠာ စ ဝိဗ္ဘမော။

ဣစ္စာဒိကာ သိယုံ နာရိ၊ သိင်္ဂါရဘာဝဇာ ကိရိယာ။

* ၁၇၅။

ဟသနံ ဟသိတံ ဟာသော၊ မန္ဒော သော မိဟိတံ သိတံ။

အဋ္ဋဟာသော မဟာဟာသော၊

ရောမဉ္စော လောမဟံသနံ။

* ၁၇၆။

ပရိဟာသော ဒဝေါ ခိဍ္ဍာ၊ ကေဠိ ကီဠာ စ ကီဠိတံ။

နိဒ္ဒါ တု သုပိနံ သောပ္ပံ၊ မိဒ္ဓဉ္စ ပစလာယိကာ။

* ၁၇၇။

ထိယံ နိကတိ ကူဋဉ္စ၊ ဒမ္ဘော သာဌျဉ္စ ကေတဝံ။

သဘာဝေါ တု နိဿဂ္ဂေါ စ၊ သရူပံ ပကတိတ္ထိယံ။

* ၁၇၈။

သီလဉ္စ လက္ခဏံ ဘာဝေါ၊

ဥဿဝေါ တု ဆဏော မဟော [မတော (ဋီ.)]။

* ၁၇၉။

ဓာရေန္တော ဇန္တု သသ္နေဟ၊ မဘိဓာနပ္ပဒီပိကံ။

ခုဒ္ဒကာဒျတ္ထဇာတာနိ [ခုဒ္ဒကာနျတ္ထဇာတာနိ (က.)]၊ သမ္ပဿတိ ယထာသုခံ။

သဂ္ဂကဏ္ဍော နိဋ္ဌိတော။

၂. ဘူကဏ္ဍ

၁. ဘူမိဝဂ္ဂ

* ၁၈၀။

ဝဂ္ဂါ ဘူမိ၊ ပုရီ၊ မစ္စ၊ စတုဗ္ဗဏ္ဏ၊ ဝနာဒိဟိ။

ပါတာလေန စ ဝုစ္စန္တေ၊ သင်္ဂေါ’ပင်္ဂေဟိ’ဓ’က္ကမာ။

* ၁၈၁။

ဝသုန္ဓရာ ဆမာ ဘူမိ၊ ပထဝီ မေဒနီ မဟီ။

ဥဗ္ဗီ ဝသုမတီ ဂေါ ကု၊ ဝသုဓာ ဓရဏီ ဓရာ။

ပုထဝီ ဇဂတီ ဘူရီ၊ ဘူ စ ဘူတဓရာ’ ဝနီ။

---

(ဓာန်၊၁၇။)

* ၁၈၂။

ခါရာ တု မတ္တိကာ ဦသော၊ ဦသဝါ တူသရော တိသု။

ထလံ ထလီတ္ထီ ဘူဘာဂေ၊ ထဒ္ဓလူခမှိ ဇင်္ဂလော။

* ၁၈၃။

ပုဗ္ဗဝိဒေဟော စာပရ၊ ဂေါယာနံ ဇမ္ဗုဒီပေါ စ။

ဥတ္တရကုရု စေတိ သိယုံ၊ စတ္တာရောမေ မဟာဒီပါ။

* ၁၈၄။

ပုမ္ဗဟုတ္တေ ကုရူ သက္ကာ၊ ကောသလာ မဂဓာ သိဝီ။

ကလိင်္ဂါ’ဝန္တိ ပဉ္စာလာ၊ ဝဇ္ဇီ ဂန္ဓာရ စေတယော။

* ၁၈၅။

ဝင်္ဂါ ဝိဒေဟာ ကမ္ဗောဇာ၊ မဒ္ဒါ ဘဂ္ဂ’င်္ဂ သီဟဠာ။

ကသ္မီရာ ကာသိ ပဏ္ဍဝါဒီ၊ သိယုံ ဇနပဒန္တရာ။

* ၁၈၆။

လောကော စ ဘုဝနံ ဝုတ္တံ၊ ဒေသော တု ဝိသယော ပျထ။

မိလက္ခဒေသော ပစ္စန္တော၊ မဇ္ဈဒေသော တု မဇ္ဈိမော။

* ၁၈၇။

အနူပေါ သလိလပ္ပာယော၊ ကစ္ဆံ ပုမ နပုံသကေ။

သဒ္ဒလော ဟရိတေ ဒေသေ၊ တိဏေနာ၊ ဘိနဝေန ဟိ။

* ၁၈၈။

နဒျမ္ဗုဇီဝနော ဒေသော၊ ဝုဋ္ဌိနိပ္ပဇ္ဇသဿကော။

ယော နဒီမာတိကော ဒေဝ၊

မာတိကော စ ကမေန သော။

* ၁၈၉။

တီသွနူပါဒျထော စန္ဒ၊ သူရာဒေါ သဿတီရိတော။

ရဋ္ဌံ တု ဝိဇိတဉ္စာထ၊ ပုရိသေ သေတု အာလိယံ။

* ၁၉၀။

ဥပါန္တဘူ ပရိသရော၊ ဂေါဋ္ဌံ တု ဂေါကုလံ ဝဇော။

မဂ္ဂေါ ပန္ထော ပထော အဒ္ဓါ၊ အဉ္ဇသံ ဝဋုမံ တထာ။

* ၁၉၁။

ပဇ္ဇော [ပဇ္ဇာ။. (က.)]၊ ယနဉ္စ ပဒဝီ၊ ဝတ္တနီ ပဒ္ဓတိတ္ထိယံ။

တဗ္ဘေဒါ ဇင်္ဃ၊ သကဋ၊ မဂ္ဂါ တေ စ မဟဒ္ဓနိ။

* ၁၉၂။

ဧကပဒျေကပဒိကေ၊ ကန္တာရော တု စ ဒုဂ္ဂမေ။

* ၁၉၃။

ပဋိမဂ္ဂေါ ပဋိပထော၊ အဒ္ဓါနံ ဒီဃ မဉ္ဇသံ။

သုပ္ပထော တု သုပန္ထော စ၊ ဥပ္ပထံ တွပထံ ဘဝေ။

* ၁၉၄။

ဆတ္တိံသပရမာဏူန၊ မေကော ဏု စ ဆတ္တိံသ တေ။

တဇ္ဇာရီ တာပိ ဆတ္တိံသ၊ ရထရေဏု ဆတ္တိံသ တေ။

* ၁၉၅။

လိက္ခာတာ သတ္တ ဦကာ တာ၊ ဓညမာသောတိ သတ္တ တေ။

သတ္တ င်္ဂုလ’ မမု ဒွိစ္ဆ၊ ဝိဒတ္ထိ တာ ဒုဝေ သိယုံ။

---

(ဓာန်၊၁၈။)

* ၁၉၆။

ရတနံ တာနိ သတ္တေဝ၊ ယဋ္ဌိ တာ ဝီသတူ သဘံ။

ဂါဝုတ မုသဘာသီတိ၊ ယောဇနံ စတုဂါဝုတံ။

* ၁၉၇။

ဓနုပဉ္စသတံ ကောသော၊ ကရီသံ စတုရမ္ဗဏံ။

အဗ္ဘန္တရံ တု ဟတ္ထာန၊ မဋ္ဌဝီသ ပမာဏတော။

ဘူမိဝဂ္ဂေါ နိဋ္ဌိတော။

၂. ဘူကဏ္ဍ

၂. ပုရဝဂ္ဂ

* ၁၉၈။

ပုရံ နဂရ မိတ္ထီ ဝါ၊ ဌာနီယံ ပုဋဘေဒနံ။

ထိယံ တု ရာဇဓာနီ [ရာဇဌာနီ (ဋီ.)] စ၊ ခန္ဓာဝါရော ဘဝေ ထ စ။

* ၁၉၉။

သာခါနဂရ မညတြ၊ ယံ တံ မူလပုရာ ပုရံ။

ဗာရာဏသီ စ သာဝတ္ထိ၊ ဝေသာလီ မိထိလာ၊ ဠဝီ။

* ၂၀၀။

ကောသမ္ဗု၊ ဇ္ဇေနိယော တက္က၊ သိလာ စမ္ပာ စ သာဂလံ။

သုသုမာရဂိရံ [သံသုမာရ (ဋီကာ)] ရာဇ၊ ဂဟံ ကပိလဝတ္ထု စ။

* ၂၀၁။

သာကေတ၊ မိန္ဒပတ္ထဉ္စော၊ က္ကဋ္ဌာ ပါဋလိပုတ္တကံ။

ဇေတုတ္တရဉ္စ သင်္ကဿံ၊ ကုသိနာရာဒယော ပုရီ။

* ၂၀၂။

ရစ္ဆာ စ ဝိသိခါ ဝုတ္တာ၊ ရထိကာ ဝီထိ စာပျထ။

ဗျူဟော ရစ္ဆာ အနိဗ္ဗိဒ္ဓါ၊ နိဗ္ဗိဒ္ဓါ တု ပထဒ္ဓိ စ။

* ၂၀၃။

စတုက္ကံ စစ္စရေ မဂ္ဂ၊ သန္ဓိ သိင်္ဃာဋကံ ဘဝေ။

ပါကာရော ဝရဏော စာထ၊ ဥဒါပေါ [ဥဒ္ဒါပ၊ ဥဒ္ဒါပ] ဥပကာရိကာ။

* ၂၀၄။

ကုဋ္ဋံ တု ဘိတ္တိ နာရီ ထ၊ ဂေါပုရံ ဒွါရကောဋ္ဌကော။

ဧသိကာ ဣန္ဒခီလော စ၊ အဋ္ဋော တွဋ္ဋာလကော ဘဝေ။

* ၂၀၅။

တောရဏံ တု ဗဟိဒွါရံ၊ ပရိခါတု စ ဒီဃိကာ။

မန္ဒိရံ သဒနာ၊ ဂါရံ၊ နိကာယော နိလယာ၊ လယော။

* ၂၀၆။

အာဝါသော ဘဝနံ ဝေသ္မံ၊ နိကေတနံ နိဝေသနံ။

ဃရံ ဂဟဉ္စာ၊ ဝသထော၊ သရဏဉ္စ ပတိဿယော။

* ၂၀၇။

ဩကံ သာလာ ခယော ဝါသော၊ ထိယံ ကုဋိ ဝသတျ’ပိ။

ဂေဟဉ္စာ၊ နိတ္ထိ သဒုမံ၊ စေတိယာ၊ ယတနာနိ တု။

---

(ဓာန်၊၁၉။)

* ၂၀၈။

ပါသာဒေါ စေဝ ယူပေါ ထ၊ မုဏ္ဍစ္ဆဒေါ စ ဟမ္မိယံ။

ယူပေါတု ဂဇကုမ္ဘမှိ၊ ဟတ္ထိနခေါ ပတိဋ္ဌိတော။

* ၂၀၉။

သုပဏ္ဏဝင်္ကစ္ဆဒန၊ မဍ္ဎယောဂေါ သိယာ ထ စ။

ဧကကူဋယုတော မာဠော၊

ပါသာဒေါ စတုရဿကော။

* ၂၁၀။

သဘာယဉ္စ သဘာ စာထ၊ မဏ္ဍပံ ဝါ ဇနာလယော။

အထော အာသနသာလာယံ၊ ပဋိက္ကမန မီရိတံ။

* ၂၁၁။

ဇိနဿ ဝါသဘဝန၊ မိတ္ထီ ဂန္ဓကုဋိ ပျထ။

ထိယံ ရသဝတီ ပါက၊ ဋ္ဌာနဉ္စေဝ မဟာနသံ။

* ၂၁၂။

အာဝေသနံ သိပ္ပသာလာ၊ သောဏ္ဍာ တု ပါနမန္ဒိရံ။

ဝစ္စဋ္ဌာနံ ဝစ္စကုဋိ၊ မုနီနံ ဌာန မဿမော။

* ၂၁၃။

ပဏျဝိက္ကယသာလာ ကု၊ အာပဏော ပဏျဝီထိကာ။

ဥဒေါသိတော ဘဏ္ဍသာလာ၊ စင်္ကမနံ တု စင်္ကမော။

* ၂၁၄။

ဇန္တာဃရံ တွဂ္ဂိသာလာ၊ ပပါ ပါနီယသာလိကာ။

ဂဗ္ဘော ဩဝရကော ဝါသာ၊ ဂါရံ တု သယနိဂ္ဂဟံ။

* ၂၁၅။

ဣတ္ထာဂါရံ တု ဩရောဓော၊ သုဒ္ဓန္တော’ န္တေပုရမ္ပိ စ။

အသဗ္ဗဝိသယဋ္ဌာနံ၊ ရညံ ကစ္ဆန္တရံ မတံ။

* ၂၁၆။

သောပါနော ဝါ’ရောဟဏဉ္စ၊

နိဿေဏီ သာ၊ ဓိရောဟိဏီ။

ဝါတပါနံ ဂဝက္ခော စ၊ ဇာလဉ္စ သီဟပဉ္ဇရံ။

* ၂၁၇။

အာလောကသန္ဓိ ဝုတ္တော ထ၊ လင်္ဂီ’တ္ထီ ပလိဃော ဘဝေ။

ကပိသီသော၊ ဂ္ဂလတ္ထမ္ဘော၊ နိဗ္ဗံ တု ဆဒ္ဒကောဋိယံ။

* ၂၁၈။

ဆဒနံ ပဋလံ ဆဒ္ဒ၊ မဇိရံ စစ္စရော၊ င်္ဂဏံ။

ပဃာနော ပဃနာ၊ လိန္ဒော၊ ပမုခံ ဒွါရဗန္ဓနံ။

* ၂၁၉။

ပိဋ္ဌသံဃာဋကံ ဒွါရ၊ ဗာဟာ ကူဋံ တု ကဏ္ဏိကာ။

ဒွါရဉ္စ ပဋိဟာရော ထ၊ ဥမ္မာရော ဒေဟနီ၊ တ္ထိယံ။

* ၂၂၀။

ဧဠကော ဣန္ဒခီလော ထ၊ ထမ္ဘော ထူဏော ပုမိတ္ထိယံ။

ပါဋိကာ၊ ဍ္ဎေန္ဒုပါသာဏေ၊ ဂိဉ္ဇကာ တု စ ဣဋ္ဌကာ။

* ၂၂၁။

ဝလဘိစ္ဆာဒိဒါရုမှိ၊ ဝင်္ကေ ဂေါပါနသီ၊ တ္ထိယံ။

ကပေါတပါလိကာယံ တု၊ ဝိဋင်္ကော နိတ္ထိယံ ဘဝေ။

---

(ဓာန်၊၂၀။)

* ၂၂၂။

ကုဉ္စိကာဝိဝရံ တာဠ၊ စ္ဆိဂ္ဂလော ပျထ ကုဉ္စိကာ။

တာဠော’ဝါပုရဏံ စာထ၊ ဝေဒိကာ ဝေဒိ ကထျတေ။

* ၂၂၃။

သံဃာတော ပက္ခပါသော စ၊ မန္ဒိရင်္ဂါ တုလာ အပိ။

ထိယံ သမ္မုဇ္ဇနီ စေဝ၊ သမ္မဇ္ဇနီ စ သောဓနီ။

* ၂၂၄။

သင်္ကဋီရံ တု သင်္ကာရ၊ ဋ္ဌာနံ သင်္ကာရကူဋကံ။

အထော ကစဝရော၊ က္လာပေါ၊ သင်္ကာရော စ ကသမ္ဗုပိ။

* ၂၂၅။

ဃရာဒိဘူမိ တံ ဝတ္ထု၊ ဂါမော သံဝသထော ထ သော။

ပါကဋော နိဂမော ဘောဂ၊ မစ္စာဒိဘျော ဓိ တူဒိတော [‘အဓိဘူ’တိ ဤရိတော ကထိတော (ဋီ.)]။

* ၂၂၆။

သီမာ စ မရိယာဒါ ထ၊

ဃောသော ဂေါပါလဂါမကောတိ။

ပုရဝဂ္ဂေါ နိဋ္ဌိတော။

၃. နရဝဂ္ဂ

* ၂၂၇။

မနုဿော မာနုသော မစ္စော၊ မာနဝေါ မနုဇော နရော။

ပေါသော ပုမာ စ ပုရိသော၊

ပေါရိသော ပျထ ပဏ္ဍိတော။

* ၂၂၈။

ဗုဓော ဝိဒွါ ဝိဘာဝီ စ၊ သန္တော သပ္ပည ကောဝိဒါ။

ဓီမာ သုဓီ ကဝိ ဗျတ္တော၊ ဝိစက္ခဏော ဝိသာရဒေါ။

* ၂၂၉။

မေဓာဝီ မတိမာ ပညော၊ ဝိညူ စ ဝိဒူရော ဝိဒူ။

ဓီရော ဝိပဿီ ဒေါသညူ၊ ဗုဒ္ဓါ စ ဒဗ္ဗ ဝိဒ္ဒသု။

* ၂၃၀။

ဣတ္ထီ သီမန္တိနီ နာရီ၊ ထီ ဝဓူ ဝနိတာ၊ င်္ဂနာ။

ပမဒါ သုန္ဒရီ ကန္တာ၊ ရမဏီ ဒယိတာ၊ ဗလာ။

* ၂၃၁။

မာတုဂါမော စ မဟိလာ၊ လလနာ ဘီရု ကာမိနီ။

ကုမာရိကာ တု ကညာ ထ၊ ယုဝတီ တရုဏီ ဘဝေ။

* ၂၃၂။

မဟေသီ သာဘိသေကာညာ၊

ဘောဂိနီ ရာဇနာရိယော။

ဓဝတ္ထိနီ တု သင်္ကေတံ၊ ယာတိ ယာ သာ၊ ဘိသာရိကာ။

---

(ဓာန်၊၂၁။)

* ၂၃၃။

ဂဏိကာ ဝေသိယာ ဝဏ္ဏ၊ ဒါသီ နဂရသောဘိနီ။

ရူပူပဇီဝိနီ ဝေသီ၊ ကုလဋာ တု စ ဗန္ဓကီ။

* ၂၃၄။

ဝရာရောဟော၊ တ္တမာ မတ္တ၊ ကာသိနီ ဝရဝဏ္ဏိနီ။

ပတိဗ္ဗတာ တွပိ သတီ၊ ကုလိတ္ထီ ကုလပါလိကာ။

* ၂၃၅။

ဝိဓဝါ ပတိသုညာ ထ၊ ပတိမ္ဗရာ သယမ္ဗရာ။

ဝိဇာတာ တု ပသူတာ စ၊ ဇာတာပစ္စာ ပသူတိကာ။

* ၂၃၆။

ဒူတီ သဉ္စာရိကာ ဒါသီ၊ တု စေဋီ ကုဋဓာရိကာ။

ဝါရုဏီ၊ က္ခဏိကာ တုလျာ၊ ခတ္တိယာနီ တု ခတ္တိယာ။

* ၂၃၇။

ဒါရော ဇာယာ ကလတ္တဉ္စ၊ ဃရဏီ ဘရိယာ ပိယာ၊

ပဇာပတီ စ ဒုတိယာ၊ သာ ပါဒပရိစာရိကာ။

* ၂၃၈။

သခီ တွာ’လီ ဝယဿာ ထ၊ ဇာရီ စေဝါ’တိစာရိနီ။

ပုမေ တူ’တု ရဇော ပုပ္ဖံ၊ ဥတုနီ တု ရဇဿလာ။

* ၂၃၉။

ပုပ္ဖဝတီ ဂရုဂဗ္ဘာ၊ ပန္နသတ္တာ စ ဂဗ္ဘိနီ။

ဂဗ္ဘာသယော ဇလာဗုပိ၊ ကလလံ ပုန္နပုံသကေ။

* ၂၄၀။

ဓဝေါတု သာမိကော ဘတ္တာ၊ ကန္တော ပတိ ဝရော ပိယော။

အထော ပပတိ ဇာရော ထာ၊

ပစ္စံ ပုတ္တော’တြဇော သုတော။

* ၂၄၁။

တနုဇော တနယော သူနု၊ ပုတ္တာဒီ ဓီတရိ’တ္ထိယံ။

နာရိယံ ဒုဟိတာ ဓီတာ၊

သဇာတော တွော’ရသော သုတော။

* ၂၄၂။

ဇာယာပတီ ဇနိပတီ၊ ဇယမ္ပတီ တု ဒမ္ပတီ [ဒမ္ပတီတိ ပဒံ ပုလ္လိင်္ဂ ဗဟုဝစနန္တံ ဣကာရန္တံ၊ တုဒမ္ပတိ (ဋီ.)]။

အထ ဝဿဝရော ဝုတ္တော၊ ပဏ္ဍကော စ နပုံသကံ။

* ၂၄၃။

ဗန္ဓဝေါ ဗန္ဓု သဇနော၊ သဂေါတ္တော ဉာတိ ဉာတကော။

သာလောဟိတော သပိဏ္ဍော စ၊

တာတော တု ဇနကော ပိတာ။

* ၂၄၄။

အမ္မ၊ မ္ဗာ ဇနနီ မာတာ၊ ဇနေတ္တိ ဇနိကာ ဘဝေ။

ဥပမာတာ တု ဓာတိ’တ္ထီ၊

သာလော ဇာယာယ ဘာတိကော။

---

(ဓာန်၊၂၂။)

* ၂၄၅။

နနန္ဒာ သာမိဘဂိနီ၊ မာတာမဟီ တု အယျိကာ။

မာတုလော မာတုဘာတာ၊ဿ၊ မာတုလာနီ ပဇာပတိ။

* ၂၄၆။

ဇာယာပတီနံ ဇနနီ၊ သဿု ဝုတ္တာထ တပ္ပိတာ။

သသုရော ဘာဂိနေယျောတု၊ ပုတ္တော ဘဂိနိယာ ဘဝေ။

* ၂၄၇။

နတ္တာ ဝုတ္တော ပပုတ္တော ထ၊ သာမိဘာတာ တု ဒေဝရော။

ဓီတုပတိ တု ဇာမာတာ၊

အယျကော တု ပိတာမဟော။

* ၂၄၈။

မာတုစ္ဆာ မာတုဘဂိနီ၊ ပိတုစ္ဆာ ဘဂိနီ ပိတု။

ပပိတာမဟော ပယျကော၊

သုဏှာ တု သုဏိသာ ဟုသာ။

* ၂၄၉။

သောဒရိယော သဂဗ္ဘော စ၊ သောဒရော သဟဇော ပျထ။

မာတာပိတူ တေ ပိတရော၊ ပုတ္တာ တု ပုတ္တဓီတရော။

* ၂၅၀။

သသုရာ သဿုသသုရာ၊ ဘာတုဘဂိနီ ဘာတရော။

ဗာလတ္တံ ဗာလတာ ဗာလျံ၊ ယောဗ္ဗညံတု စ ယောဗ္ဗနံ။

* ၂၅၁။

သုက္ကာ တု ပလိတံ ကေသာ၊ ဒယော ထ ဇရတာ ဇရာ။

ပုထုကော ပိလ္လကော ဆာပေါ၊ ကုမာရော ဗာလ ပေါတကာ။

* ၂၅၂။

အထု’ တ္တာနသယု’တ္တာန၊ သေယျကာ ထနပေါပိ စ။

* ၂၅၃။

တရုဏော စ ဝယဋ္ဌော စ၊ ဒဟရော စ ယုဝါ သုသု။

မာဏဝေါဒါရကောစာထ၊ သုကုမာရော သုခေဓိတော။

* ၂၅၄။

မဟလ္လကော စ ဝုဒ္ဓါ စ၊ ထေရော ဇိဏ္ဏော စ ဇိဏ္ဏကော။

အဂ္ဂဇော ပုဗ္ဗဇော ဇေဋ္ဌော၊ ကနိယော ကနိဋ္ဌော နုဇော။

* ၂၅၅။

ဝလိတ္တစော တု ဝလိနော။ တီသု’တ္တာနသယာဒယော။

* ၂၅၆။

သီသော’တ္တမင်္ဂါနိ သိရော၊ မုဒ္ဓါ စ မတ္ထကော ဘဝေ။

ကေသော တု ကုန္တလော ဝါလော၊ တ္တမင်္ဂရုဟ မုဒ္ဓဇာ။

* ၂၅၇။

ဓမ္မိလ္လော သံယတာ ကေသာ၊

ကာကပက္ခော သိခဏ္ဍကော။

ပါသော ဟတ္ထော ကေသစယေ။

တာပသာနံ တဟိံ ဇဋာ။

* ၂၅၈။

ထိယံ ဝေဏီ ပဝေဏီ စ။

အထော စူဠာ သိခါ သိယာ။

သီမန္တော တု မတော နာရိ၊ ကေသမဇ္ဈမှိ ပဒ္ဓတိ။

---

(ဓာန်၊၂၃။)

* ၂၅၉။

လောမံ တနုရုဟံ ရောမံ၊ ပမှံ ပခုမ မက္ခိဂံ။

မဿု ဝုတ္တံ ပုမမုခေ၊ ဘူ တွိတ္ထီ ဘမုကော ဘမု။

* ၂၆၀။

ဗပ္ပော [ခပ္ပော (ဋီ.)] နေတ္တဇလ’ဿူနိ၊ နေတ္တတာရာ ကနီနိကာ။

ဝဒနံ တု မုခံ တုဏ္ဍံ၊ ဝတ္တံ လပန မာနနံ။

* ၂၆၁။

ဒွိဇော လပနဇော ဒန္တော၊ ဒသနော ရဒနော ရဒေါ။

ဒါဌာ တုဒန္တဘေဒသ္မိံ၊ အပါင်္ဂေါ တွက္ခိကောဋိသု။

* ၂၆၂။

ဒန္တာဝရဏ မောဋ္ဌော စာ၊ ပျ’ဓရော ဒသနစ္ဆဒေါ။

ဂဏ္ဍော ကပေါလော ဟနွိတ္ထီ [ဂဏ္ဍတ္ထီ (ဋီ.) ဟနွတ္ထီ=ဟနု+ဣတ္ထီ။ ဟန+ဥ (ဏွာဒိ)]၊

စုဗုကံ တွ’ ဓရာ အဓော။

* ၂၆၃။

ဂလော စ ကဏ္ဌော ဂီဝါ စ၊ ကန္ဓရာ စ သိရောဓရာ။

ကမ္ဗုဂီဝါ တု ယာ ဂီဝါ၊ သုဝဏ္ဏာလိင်္ဂသန္နိဘာ။

အင်္ကိတာ တီဟိ လေခါဟိ၊ ကမ္ဗုဂီဝါ ထဝါ မတာ။

* ၂၆၄။

အံသော နိတ္ထီ ဘုဇသိရော၊ ခန္ဓော တဿန္ဓိ ဇတ္တု တံ။

ဗာဟုမူလံ တု ကစ္ဆော၊ ဓော၊ တွ’ဿ ပဿ မနိတ္ထိယံ။

* ၂၆၅။

ဗာဟု ဘုဇာဒွီသု ဗာဟာ၊ ဟတ္ထော တု ကရ ပါဏယော။

မဏိဗန္ဓော ပကောဋ္ဌန္တော၊ ကပ္ပရော တု ကပေါဏျ’ထ။

* ၂၆၆။

မဏိဗန္ဓ ကနိဋ္ဌာနံ၊ ပါဏိဿ ကရဘော၊န္တရံ။

ကရသာခါ၊ င်္ဂုလီ တာ တု၊ ပဉ္စ၊ င်္ဂုဋ္ဌော စ တဇ္ဇနီ။

မဇ္ဈိမာ နာမိကာ စာပိ၊ ကနိဋ္ဌာ’တိ ကမာ သိယုံ။

* ၂၆၇။

ပဒေသော တာလဂေါကဏ္ဏာ၊ ဝိဒတ္ထိ၊တ္ထီ ကမာ တတေ။

တဇ္ဇနျာဒိယုတေ’င်္ဂုဋ္ဌေ၊ ပသတော ပါဏိ ကုဉ္စိတော။

* ၂၆၈။

ရတနံ ကုက္ကု ဟတ္ထော ထ၊ ပုမေ ကရပုဋော၊ဉ္ဇလိ။

ကရဇော တု နခေါ နိတ္ထီ၊ ခဋကော မုဋ္ဌိ စ ဒွီသု။

* ၂၆၉။

ဗျာမော သဟကရာ ဗာဟု၊ ဒွေ ပဿဒွယဝိတ္ထတာ။

ဥဒ္ဓန္တတ ဘုဇပေါသ၊ ပ္ပမာဏေ ပေါရိသံ တိသု။

* ၂၇၀။

ဥရော စ ဟဒယံ စာထ၊ ထနော ကုစ ပယောဓရာ။

စူစုကံ တု ထနဂ္ဂသ္မိံ၊ ပိဋ္ဌံ တု ပိဋ္ဌိ နာရိယံ။

---

(ဓာန်၊၂၄။)

* ၂၇၁။

မဇ္ဈော’နိတ္ထီ ဝိလဂ္ဂေါ စ၊ မဇ္ဈိမံ ကုစ္ဆိ [စတုက္ကံ ဥဒရေ။ ၉၄၄-ဂါထာပိ ပဿိတဗ္ဗာ] တု ဒွိသု။

ဂဟဏီတ္ထျုဒရံ ဂဗ္ဘော၊ ကောဋ္ဌောန္တော ကုစ္ဆိသမ္ဘဝေ။

* ၂၇၂။

ဇဃနံ တု နိတမ္ဗော စ၊ သောဏီ စ ကဋိ နာရိယံ။

အင်္ဂဇာတံ ရဟဿင်္ဂံ၊ ဝတ္ထဂုယှဉ္စ မေဟနံ။

* ၂၇၃။

နိမိတ္တဉ္စ ဝရင်္ဂဉ္စ၊ ဗီဇဉ္စ ဖလမေဝ စ။

လိင်္ဂံ အဏ္ဍံ တု ကောသော စ၊

ယောနိ တွိတ္ထီပုမေဘဂံ။

* ၂၇၄။

အသုစိ သမ္ဘဝေါ သုက္ကံ၊ ပါယု တု ပုရိသေ ဂုဒံ။

ဝါ ပုမေ ဂူထ ကရီသ၊ ဝစ္စာနိ စ မလံ ဆကံ။

* ၂၇၅။

ဥစ္စာရော မီဠှ မုက္ကာရော၊ ပဿာဝေါ မုတ္တ မုစ္စတေ။

ပူတိမုတ္တဉ္စ ဂေါမုတ္တေ၊ ဿာဒီနံ ဆကဏံ မလေ။

* ၂၇၆။

ဒွီသွဓော နာဘိယာ ဝတ္ထိ၊ ဥစ္ဆင်္ဂ’င်္ကာ တု’ဘော ပုမေ။

ဦရု သတ္ထိ ပုမေ ဦရု၊ ပဗ္ဗံ တု ဇာဏု ဇဏ္ဏု စ။

* ၂၇၇။

ဂေါပ္ဖကော ပါဒဂဏ္ဌိပိ၊ ပုမေ တု ပဏှိ ပါသဏိ။

ပါဒဂ္ဂံ ပပဒေါ ပါဒေါ၊ တု ပဒေါ စရဏဉ္စ ဝါ။

* ၂၇၈။

အင်္ဂံတွ’ဝယဝေါ ဝုတ္တော၊ ဖာသုလိကာ တု ဖာသုကာ။

ပဏ္ဍကေ အဋ္ဌိ ဓာတွိတ္ထီ၊ ဂလန္တဋ္ဌိ တု အက္ခကော။

* ၂၇၉။

ကပ္ပရော တု ကပါလံ ဝါ၊ ကဏ္ဍရာ တု မဟာသိရာ။

ပုမေ နှာရု စိတ္ထီ သိရာ၊ ဓမနီ ထ ရသဂ္ဂသာ။

* ၂၈၀။

ရသဟရဏျ’ထော မံသ၊ မာမိသံ ပိသိတံ ဘဝေ။

တိလိင်္ဂိကံ တု ဝလ္လူရ၊ မုတ္တတ္တံ အထ လောဟိတံ။

* ၂၈၁။

ရုဓိရံ သောဏိတံ ရတ္တံ၊ လာလာ ခေဠော ဧလာ ဘဝေ။

ပုရိသေ မာယု ပိတ္တဉ္စ၊ သေမှော နိတ္ထီ သိလေသုမော။

* ၂၈၂။

ဝသာ ဝိလီနသ္နေဟော ထ၊ မေဒေါ စေဝ ဝပါ ဘဝေ။

အာကပ္ပော ဝေသော နေပစ္ဆံ၊ မဏ္ဍနံ တု ပသာဓနံ။

* ၂၈၃။

ဝိဘူသနံ စာဘရဏံ၊ အလင်္ကာရော ပိလန္ဓနံ။

ကိရီဋ မကုဋာ’နိတ္ထီ၊ စူဠာမဏိ သိရောမဏိ။

---

(ဓာန်၊၂၅။)

* ၂၈၄။

သိရောဝေဌန မုဏှီသံ၊ ကုဏ္ဍလံ ကဏ္ဏဝေဌနံ။

ကဏ္ဏိကာ ကဏ္ဏပူရော စ၊ သိယာ ကဏ္ဏဝိဘူသနံ။

* ၂၈၅။

ကဏ္ဌဘူသာ တု ဂီဝေယျံ၊ ဟာရော မုတ္တာဝလိ’တ္ထိယံ။

နိယုရော ဝလယော နိတ္ထီ၊ ကဋကံ ပရိဟာရကံ။

* ၂၈၆။

ကင်္ကဏံ ကရဘူသာ ထ၊ ကိင်္ကိဏီ [ကိံကဏီ ကိံ ကဏိကာ (က.)] ခုဒ္ဒဃဏ္ဋိကာ။

အင်္ဂုလီယက မင်္ဂုလျာ၊ ဘရဏံ၊ သာက္ခရံ တု တံ။

* ၂၈၇။

မုဒ္ဒိကာ’င်္ဂုလိမုဒ္ဒါ ထ၊ ရသနာ မေခလာ ဘဝေ။

ကေယူရ မင်္ဂဒဉ္စေဝ၊ ဗာဟုမူလဝိဘူသနံ။

* ၂၈၈။

ပါဒင်္ဂဒံ တု မဉ္ဇီရော၊ ပါဒကဋက နူပုရာ။

* ၂၈၉။

အလင်္ကာရပ္ပဘေဒါ တု၊ မုခဖုလ္လံ တထော’ဏ္ဏတံ။

ဥဂ္ဂတ္ထနံ ဂိင်္ဂမက၊ မိစ္စေဝမာဒယော သိယုံ။

* ၂၉၀။

စေလ မစ္ဆာဒနံ ဝတ္ထံ၊ ဝါသော ဝသန မံသုကံ။

အမ္ဗရဉ္စ ပဋော နိတ္ထီ၊ ဒုဿံ စောလော စ သာဋကော။

* ၂၉၁။

ခေါမံ ဒုကူလံ ကောသေယျံ၊ ပတ္တုဏ္ဏံ ကမ္ဗလော စ ဝါ။

သာဏံ ကောဋမ္ဗုရံ ဘင်္ဂ၊ န္တျာဒိ ဝတ္ထန္တရံ မတံ။

* ၂၉၂။

နိဝါသန န္တရီယာနျ၊ န္တရမန္တရဝါသကော။

ပါဝါရော တု’တ္တရာသင်္ဂေါ၊ ဥပသံဗျာန မုတ္တရံ။

* ၂၉၃။

ဥတ္တရီယ မထော ဝတ္ထ၊ မဟတန္တိ မတံ နဝံ။

နန္တကံ ကပ္ပဋော ဇိဏ္ဏ၊ ဝသနံ တု ပဋစ္စရံ။

* ၂၉၄။

ကဉ္စုကော ဝါရဝါဏံ ဝါ၊ ထ ဝတ္ထာဝယဝေ ဒသာ။

နာလိပဋ္ဋောတိ ကထိတော၊ ဥတ္တမင်္ဂမှိ ကဉ္စုကော။

* ၂၉၅။

အာယာမော ဒီဃတာ ရောဟော၊

ပရိဏာဟော ဝိသာလတာ။

* ၂၉၆။

အရဟဒ္ဓဇော စ ကာသာယ၊ ကာသာဝါနိ စ စီဝရံ။

မဏ္ဍလံ တု တဒင်္ဂါနိ၊ ဝိဝဋ္ဋ ကုသိအာဒယော။

* ၂၉၇။

ဖလ၊တ္တစ၊ ကိမိ၊ ရောမာ၊ နျေတာ ဝတ္ထဿ ယောနိယော။

ဖာလံ ကပ္ပာသိကံ တီသု၊ ခေါမာဒီ တု တစဗ္ဘဝါ။

---

(ဓာန်၊၂၆။)

* ၂၉၈။

ကောသေယျံ ကိမိဇံ၊ ရောမ၊ မယံ တု ကမ္ဗလံ ဘဝေ။

သမာနတ္ထာ ဇဝနိကာ၊ သာ တိရောကရဏီ ပျထ။

* ၂၉၉။

ပုန္နပုံသက မုလ္လောစံ၊ ဝိတာနံ ဒွယ မီရိတံ။

နဟာနဉ္စ သိနာနေ ထော၊ ဗ္ဗဋ္ဋနု’မ္မဇ္ဇနံ သမံ။

* ၃၀၀။

ဝိသေသကော တု တိလကော၊ တျူဘော နိတ္ထီ စ စိတ္တကံ။

စန္ဒနော နိတ္ထိယံ ဂန္ဓ၊ သာရော မလယဇော ပျထ။

* ၃၀၁။

ဂေါသီသံ တေလပဏ္ဏိကံ၊ ပုမေ ဝါ ဟရိစန္ဒနံ။

တိလပဏ္ဏီ တု ပတ္တင်္ဂ၊ ရဉ္ဇနံ ရတ္တစန္ဒနံ။

* ၃၀၂။

ကာဠာနုသာရီ ကာဠိယံ၊ လောဟံ တွာ’ဂရု စာ’ဂဠု။

ကာဠာဂရုတု ကာဠေ’သ္မိံ၊ တုရုက္ခောတု စ ပိဏ္ဍကော။

* ၃၀၃။

ကတ္ထူရိကာ မိဂမဒေါ၊ ကုဋ္ဌံ တု အဇပါလကံ။

လဝင်္ဂံ ဒေဝကုသုမံ၊ ကသ္မီရဇံ တု ကုင်္ကုမံ။

* ၃၀၄။

ယက္ခဓူပေါ သဇ္ဇုလသော၊ တက္ကောလံ တု စ ကောလကံ။

ကောသဖလ မထော ဇာတိ၊ ကောသံ ဇာတိဖလံ ဘဝေ။

* ၃၀၅။

ဃနသာရော သိတဗ္ဘော စ၊ ကပ္ပူရံ ပုန္နပုံသကေ။

အလတ္တကော ယာဝကော စ၊ လာခါ ဇတု နပုံသကေ။

* ၃၀၆။

သိရိဝါသော တု သရလ၊ ဒ္ဒဝေါ’ ဉ္ဇနံ တု ကဇ္ဇလံ။

ဝါသစုဏ္ဏံ ဝါသယောဂေါ၊ ဝဏ္ဏကံ တု ဝိလေပနံ။

* ၃၀၇။

ဂန္ဓမာလျာဒိသင်္ခါရော၊ ယော တံ ဝါသန မုစ္စတေ။

မာလာ မာလျံ ပုပ္ဖဒါမေ [ပုပ္ဖံ ဒါမံ (က.)]၊ ဘာဝိတံ ဝါသိတံ တိသု။

* ၃၀၈။

ဥတ္တံသော သေခရာ’ ဝေဠာ၊ မုဒ္ဓမာလျေ ဝဋံသကော။

သေယျာ စ သယနံ သေနံ၊ ပလ္လင်္ကော တု စ မဉ္စကော။

* ၃၀၉။

မဉ္စာဓာရော ပဋိပါဒေါ၊ မဉ္စင်္ဂေ တွဋနီ တ္ထိယံ၊

* ၃၁၀။

ကုဠီရပါဒေါ အာဟစ္စ၊ ပါဒေါ စေဝ မသာရကော။

စတ္တာရော ဗုန္ဒိကာဗဒ္ဓါ၊ တိမေ မဉ္စန္တရာ သိယုံ။

* ၃၁၁။

ဗိဗ္ဗောဟနံ စော’ ပဓာနံ၊ ပီဌိကာ ပီဌ မာသနံ။

ကောစ္ဆံ တု ဘဒ္ဒပီဌေ ထာ၊ သန္ဒီ ပီဌန္တရေ မတာ။

---

(ဓာန်၊၂၇။)

* ၃၁၂။

မဟန္တော ကောဇဝေါ ဒီဃ၊

လောမကော ဂေါနကော မတော။

ဥဏ္ဏာမယံ တွတ္ထရဏံ၊ စိတ္တကံ ဝါနစိတ္တကံ။

* ၃၁၃။

ဃနပုပ္ဖံ ပဋလိကာ၊ သေတံ တု ပဋိကာ ပျထ။

ဒွိဒသေကဒသာနျု’ ဒ္ဒ၊လောမိ ဧကန္တလောမိနော။

* ၃၁၄။

တဒေဝ သောဠသိတ္ထီနံ၊ နစ္စယောဂ္ဂဉှိ ကုတ္တကံ။

သီဟဗျဂ္ဃာဒိရူပေဟိ၊ စိတ္တံ ဝိကတိကာ ဘဝေ။

* ၃၁၅။

ကဋ္ဋိဿံ ကောသေယျံ ရတန၊ ပရိသိဗ္ဗိတ မတ္ထရဏံ ကမာ။

ကောသိယကဋ္ဋိဿမယံ၊ ကောသိယသုတ္တေန ပကတဉ္စ။

* ၃၁၆။

ဒီပေါ ပဒီပေါ ပဇ္ဇောတော၊ ပုမေ တွာဒါသ ဒပ္ပဏာ။

ဂေဏ္ဍုကော ကဏ္ဍုကော တာလ၊ ဝဏ္ဋံ တု ဗီဇနီတ္ထိယံ။

* ၃၁၇။

စင်္ကောဋကော ကရဏ္ဍော စ၊ သမုဂ္ဂေါ သမ္ပုဋော ဘဝေ။

ဂါမဓမ္မော အသဒ္ဓမ္မော၊ ဗျဝါယော မေထုနံ ရတိ။

* ၃၁၈။

ဝိဝါဟော ပယမာ ပါဏိ၊ ဂ္ဂဟော ပရိဏယော ပျထ။

တိဝဂ္ဂေါ ဓမ္မ၊ ကာမ၊တ္ထာ၊ စတုဝဂ္ဂေါ သမောက္ခကာ။

* ၃၁၉။

ခုဇ္ဇော စ ဂဏ္ဍုလော ရဿ၊ ဝါမနာ တု လကုဏ္ဍကော။

ပင်္ဂုလော ပီဌသပ္ပီ စ၊ ပင်္ဂု ဆိန္နိရိယာပထော။

* ၃၂၀။

ပက္ခော ခဉ္ဇော တု ခေါဏ္ဍော ထ၊

မူဂေါ သုညဝစော ဘဝေ။

ကုဏီ ဟတ္ထာဒိဝင်္ကော စ၊ ဝလိရော တု စ ကေကရော။

* ၃၂၁။

နိက္ကေသသီသော ခလ္လာဋော၊

မုဏ္ဍော တု ဘဏ္ဍု မုဏ္ဍိကော။

ကာဏော အက္ခီန မေကေန၊

သုညော အန္ဓော ဒွယေန ထ။

* ၃၂၂။

ဗဓိရော သုတိဟီနော ထ၊ ဂိလာနော ဗျာဓိတာ’တုရာ။

ဥမ္မာဒဝတိ ဥမ္မတ္တော၊ ခုဇ္ဇာဒီ ဝါစ္စလိင်္ဂိကာ။

* ၃၂၃။

အာတင်္ကော အာမယော ဗျာဓိ၊ ဂဒေါ ရောဂေါ ရုဇာပိ စ။

ဂေလညာကလ္လ မာဗာဓော၊

သောသော တု စ ခယော သိယာ။

---

(ဓာန်၊၂၈။)

* ၃၂၄။

ပီနသော [ပီနာသောတိပိ ပါဌော] နာသိကာရောဂေါ၊

ဃာနေ သိင်္ဃာနိကာ ဿဝေါ။

ဉေယျံ တွ’ရု ဝဏော နိတ္ထီ၊ ဖောဋော တု ပိဠကာ ဘဝေ။

* ၃၂၅။

ပုဗ္ဗော ပူယော ထ ရတ္တာတိ၊ သာရော ပက္ခန္ဒိကာ ပျထ။

အပမာရော အပသ္မာရော၊ ပါဒဖောဋော ဝိပါဒိကာ။

* ၃၂၆။

ဝုဍ္ဎိရောဂေါ တု ဝါတဏ္ဍံ၊ သီပဒံ ဘာရပါဒတာ။

ကဏ္ဍူ ကဏ္ဍူတိ ကဏ္ဍူယာ၊ ခဇ္ဇု ကဏ္ဍူဝနံ ပျထ။

* ၃၂၇။

ပါမံ ဝိတစ္ဆိကာ ကစ္ဆု၊ သောထော တု သယထူ’ဒိတော။

ဒုန္နာမကဉ္စ အရိသံ၊ ဆဒ္ဒိကာ ဝမထူ’ဒိတော။

* ၃၂၈။

ဒဝထု ပရိတာပေါ ထ၊ တိလကော တိလကာဠကော။

ဝိသူစိကာ ဣတိ မဟာ၊ ဝိရေကော ထ ဘဂန္ဒလော [ဘဂန္ဒရော (က.)]။

* ၃၂၉။

မေဟော ဇရော ကာသ သာသာ၊ ကုဋ္ဌံ သူလာမယန္တရာ။

ဝုတ္တော ဝေဇ္ဇော ဘိသက္ကော စ၊ ရောဂဟာရီ တိကိစ္ဆကော။

* ၃၃၀။

သလ္လဝေဇ္ဇော သလ္လကတ္တော၊ တိကိစ္ဆာ တု ပတိကြိယာ။

ဘေသဇ္ဇ မဂဒေါ စေဝ၊ ဘေသဇံ မော’သဓံ ပျထ။

* ၃၃၁။

ကုသလာ နာမယာ ရောဂျံ၊

အထ ကလ္လော နိရာမယောတိ၊

နရဝဂ္ဂေါ နိဋ္ဌိတော။

၄. စတုဗ္ဗဏ္ဏဝဂ္ဂ

ခတ္တိယဝဂ္ဂ

* ၃၃၂။

ကုလံ ဝံသော စ သန္တာနာ၊ ဘိဇနာ ဂေါတ္တ မနွယော။

ထိယံ သန္တတျ ထော ဝဏ္ဏာ၊ စတ္တာရော ခတ္တိယာဒယော။

* ၃၃၃။

ကုလီနော သဇ္ဇနော သာဓု၊

သဘျော စာယျော မဟာကုလော။

ရာဇာ ဘူပတိ ဘူပါလော၊ ပတ္ထိဝေါ စ နရာဓိပေါ။

---

(ဓာန်၊၂၉။)

* ၃၃၄။

ဘူနာထော ဇဂတိပါလော၊ ဒိသမ္ပတိ ဇနာဓိပေါ။

ရဋ္ဌာဓိပေါ နရဒေဝေါ၊ ဘူမိပေါ ဘူဘုဇော ပျထ။

* ၃၃၅။

ရာဇညော ခတ္တိယော ခတ္တံ၊ မုဒ္ဓါဘိသိတ္တ ဗာဟုဇာ။

သဗ္ဗဘုမ္မော စက္ကဝတ္တီ၊ ဘူပေါညော မဏ္ဍလိဿရော။

* ၃၃၆။

ပုမေ လိစ္ဆဝိ ဝဇ္ဇီ စ၊ သကျော တု သာကိယော ထ စ။

ဘဒ္ဒကစ္စာနာ [ဘဒ္ဒါ ကစ္စာနာ (ဋီ.)] ရာဟုလ၊ မာတာ ဗိမ္ဗာ ယသောဓရာ။

* ၃၃၇။

ကောဋီနံ ဟေဋ္ဌိမန္တေန၊ သတံ ယေသံ နိဓာနဂံ။

ကဟာပဏာနံ ဒိဝသ၊ ဝဠဉ္ဇော ဝီသတမ္ဗဏံ။

* ၃၃၈။

တေ ခတ္တိယမဟာသာလာ၊ သီတိ ကောဋိဓနာနိ တု။

နိဓာနဂါနိ ဒိဝသ၊ ဝဠဉ္ဇော စ ဒသမ္ဗဏံ။

* ၃၃၉။

ယေသံ ဒွိဇမဟာသာလာ၊ တဒုပဍ္ဎေ နိဓာနဂေ။

ဝဠဉ္ဇေ စ ဂဟပတိ၊ မဟာသာလာ ဓနေ သိယုံ။

* ၃၄၀။

မဟာမတ္တော ပဓာနဉ္စ၊ မတိသဇီဝေါ မန္တိနီ။

သဇီဝေါ သစိဝါ၊ မစ္စော၊ သေနာနီ တု စမူပတိ။

* ၃၄၁။

နျာသာဒီနံ ဝိဝါဒါနံ၊ အက္ခဒဿော ပဒဋ္ဌရိ။

ဒေါဝါရိကော ပတီဟာရော၊ ဒွါရဋ္ဌော ဒွါရပါလကော။

* ၃၄၂။

အနီကဋ္ဌောတိ ရာဇူနံ၊ အင်္ဂရက္ခဂဏော မတော။

ကဉ္စုကီ သောဝိဒလ္လော စ၊ အနုဇီဝီ တု သေဝကော။

* ၃၄၃။

အဇ္ဈက္ခော ဓိကတော စေဝ၊

ဟေရညိကော တု နိက္ခိကော။

သဒေသာနန္တရော သတ္တု၊ မိတ္တောရာဇာ တတော ပရံ။

* ၃၄၄။

အမိတ္တော ရိပု ဝေရီ စ၊ သပတ္တာ ရာတိ သတွ’ရိ။ (သတ္တု+အရိ)

ပစ္စတ္ထိကော ပရိပန္ထီ၊ ပဋိပက္ခာ ဟိတာပရော။

* ၃၄၅။

ပစ္စာမိတ္တော ဝိပက္ခော စ၊ ပစ္စနီက ဝိရောဓိနော။

ဝိဒ္ဒေသီ စ ဒိသော ဒိဋ္ဌော၊ထာ နုရောဓော နုဝတ္တနံ။

* ၃၄၆။

မိတ္တော နိတ္ထီ ဝယဿော စ၊ သဟာယော [သုဟဇ္ဇော (ဋီ.)] သုဟဒေါ သခါ။

သမ္ဘတ္တော ဒဠှမိတ္တော ထ၊ သန္ဒိဋ္ဌော ဒိဋ္ဌမတ္တကော။

* ၃၄၇။

စရော စ ဂုဠှပုရိသော၊ ပထာဝီ ပထိကော’ဒ္ဓဂူ။

ဒူတော တု သန္ဒေသဟရော၊ ဂဏကော တု မုဟုတ္တိကော။

---

(ဓာန်၊၃၀။)

* ၃၄၈။

လေခကော လိပိကာရော စ၊ ဝဏ္ဏော တု အက္ခရော ပျထ။

ဘေဒေါ ဒဏ္ဍော သာမ ဒါနာ၊ နျုပါယာ စတုရော ဣမေ။

* ၃၄၉။

ဥပဇာပေါတု ဘေဒေါ စ၊ ဒဏ္ဍော တု သာဟသံ ဒမော။

* ၃၅၀။

သာမျ’ မစ္စော သခါ ကောသော၊ ဒုဂ္ဂဉ္စ ဝိဇိတံ ဗလံ။

ရဇ္ဇင်္ဂါနီတိ သတ္တေတေ၊ သိယုံ ပကတိယော ပိစ။

* ၃၅၁။

ပဘာဝု’ဿာဟ၊ မန္တာနံ၊ ဝသာ တိဿော ဟိ သတ္တိယော။

ပဘာဝေါ ဒဏ္ဍဇော တေဇော၊

ပတာပေါ တု စ ကောသဇော။

* ၃၅၂။

မန္တော စ မန္တနံ သော တု၊ စတုက္ကဏ္ဏော ဒွိဂေါစရော။

တိဂေါစရော တု ဆက္ကဏ္ဏော၊ ရဟဿံ ဂုယှ မုစ္စတေ။

* ၃၅၃။

တီသု ဝိဝိတ္တ ဝိဇန၊ ဆန္နာ၊ ရဟော ရဟော ဗျယံ။

ဝိဿာသော တု စ ဝိဿမ္ဘော၊

ယုတ္တံ တွော’ပါယိကံ တိသု။

* ၃၅၄။

ဩဝါဒေါ စာနုသိဋ္ဌိတ္ထီ၊ ပုမဝဇ္ဇေ နုသာသနံ။

အာဏာ စ သာသနံ ဉေယျံ၊ ဥဒ္ဒါနံ တု စ ဗန္ဓနံ။

* ၃၅၅။

အာဂု ဝုတ္တ [မန္တု (က.)] မပရာဓော၊ ကရော တု ဗလိ မုစ္စတေ။

ပုဏ္ဏပတ္တော တုဋ္ဌိဒါယော၊ ဥပဒါ တု စ ပါဘတံ။

* ၃၅၆။

တထော’ပါယန မုက္ကောစော၊ ပဏ္ဏာကာရော ပဟေဏကံ။

သုင်္ကံ တွနိတ္ထီ ဂုမ္ဗာဒိ၊ ဒေယျေ ထာ’ယော ဓနာဂမော။

* ၃၅၇။

အာတပတ္တံ တထာ ဆတ္တံ၊ ရညံ တု ဟေမမာသနံ။

သီဟာသနံ အထော ဝါဠ၊ ဗီဇနီတ္ထီ စ စာမရံ။

* ၃၅၈။

ခဂ္ဂေါ စ ဆတ္တ မုဏှီသံ၊ ပါဒုကာ ဝါလဗီဇနီ။

ဣမေ ကကုဓဘဏ္ဍာနိ၊ ဘဝန္တိ ပဉ္စ ရာဇုနံ။

* ၃၅၉။

ဘဒ္ဒကုမ္ဘော ပုဏ္ဏကုမ္ဘော၊ ဘိင်္ကာရော ဇလဒါယကော။

ဟတ္ထိ၊ဿ၊ရထ၊ပတ္တီ တု၊ သေနာ ဟိ စတုရင်္ဂိနီ။

* ၃၆၀။

ကုဉ္ဇရော ဝါရဏော ဟတ္ထီ၊ မာတင်္ဂေါ ဒွိရဒေါ ဂဇော။

နာဂေါ ဒွိပေါ ဣဘော ဒန္တီ၊

ယူထဇေဋ္ဌော တု ယူထပေါ။

---

(ဓာန်၊၃၁။)

* ၃၆၁။

ကာဠာဝက ဂင်္ဂေယျာ၊ ပဏ္ဍရ တမ္ဗာ စ ပိင်္ဂလော ဂန္ဓော။

မင်္ဂလ ဟေမော’ပေါသထ၊

ဆဒ္ဒန္တာ ဂဇကုလာနိ ဧတာနိ။

* ၃၆၂။

ကလဘော စေဝ ဘိင်္ကောထ၊ ပဘိန္နော မတ္တ ဂဇ္ဇိတာ။

ဟတ္ထိဃဋာ တု ဂဇတာ၊ ဟတ္ထီနီ တု ကရေဏုကာ။

* ၃၆၃။

ကုမ္ဘော ဟတ္ထိသိရောပိဏ္ဍာ၊ ကဏ္ဏမူလံ တု စူလိကာ။

အာသနံ ခန္ဓဒေသမှိ၊ ပုစ္ဆမူလံ တု မေစကော။

* ၃၆၄။

အာလာန မာဠှကော ထမ္ဘော၊ နိတ္ထီတု နိဂဠော’န္ဒုကော။

သင်္ခလံ တီသွထော ဂဏ္ဍော၊

ကဋော ဒါနံ တု သော မဒေါ။

* ၃၆၅။

သောဏ္ဍော တု ဒွီသု ဟတ္ထော ထ၊

ကရဂ္ဂံ ပေါက္ခရံ ဘဝေ။

မဇ္ဈမှိ ဗန္ဓနံ ကစ္ဆာ၊ ကပ္ပနော တု ကုထာဒယော။

* ၃၆၆။

ဩပဝယှော ရာဇဝယှော၊ သဇ္ဇိတော တု စ ကပ္ပိတော။

တောမရော နိတ္ထိယံ ပါဒေ၊ သိယာ ဝိဇ္ဈနကဏ္ဋကော။

* ၃၆၇။

တုတ္တံ တု ကဏ္ဏမူလမှိ၊ မတ္ထကမှိ တု အင်္ကုသော။

ဟတ္ထာရောဟော ဟတ္ထိမေဏ္ဍော၊

ဟတ္ထိပေါ ဟတ္ထိဂေါပကော။

* ၃၆၈။

ဂါမဏီယော တု မာတင်္ဂ၊ ဟယာဒျာစရိယော ဘဝေ။

ဟယော တုရင်္ဂေါ တုရဂေါ၊

ဝါဟော အဿော စ သိန္ဓဝေါ။

* ၃၆၉။

ဘေဒေါ အဿတရော တဿာ၊

ဇာနိယော တု ကုလီနကော။

သုခဝါဟီ ဝိနီတော ထ၊

ကိသောရော ဟယပေါတကော။

* ၃၇၀။

ဃောဋကော တု ခဠုင်္ကော ထ၊ ဇဝနော စ ဇဝါဓိကော။

မုခါဓာနံ ခလီနော ဝါ၊ ကသာ တွ ဿာဘိတာဠိနီ။

* ၃၇၁။

ကုသာ တု နာသရဇ္ဇုမှိ၊ ဝဠဝါ’ဿာ ခုရော သဖံ။

ပုစ္ဆ မနိတ္ထီ နင်္ဂုဋ္ဌံ၊ ဝါလဟတ္ထော စ ဝါလဓိ။

---

(ဓာန်၊၃၂။)

* ၃၇၂။

သန္ဒနော စ ရထော ဖုဿ၊ ရထော တု နရဏာယ သော။

စမ္မာဝုတော စ ဝေယဂ္ဃော၊

ဒေပ္ပော ဗျဂ္ဃဿ ဒီပိနော။

* ၃၇၃။

သိဝိကာ ယာပျယာနဉ္စာ၊ နိတ္ထီ တု သကဋော ပျ’နံ [(သကဋော ပိ+အနံ)]။

စက္ကံ ရထင်္ဂ မာချာတံ၊ တဿန္တော နေမိ နာရိယံ။

* ၃၇၄။

တမ္မဇ္ဈေ ပိဏ္ဍိကာ နာဘိ၊ ကုဗ္ဗရော တု ယုဂန္ဓရော။

အက္ခဂ္ဂကီလေ အာဏီတ္ထီ၊ ဝရုထော ရထဂုတျ’ထ။

* ၃၇၅။

ဓုရော မုခေ ရထဿင်္ဂါ၊ တွ က္ခော ပက္ခရအာဒယော။

ယာနဉ္စ ဝါဟနံ ယောဂ္ဂံ၊ သဗ္ဗဟတ္ထျာဒိဝါဟနေ။

* ၃၇၆။

ရထစာရီ တု သူတော စ၊ ပါဇိတာ စေဝ သာရထီ။

ရထာရောဟော စ ရထိကော၊

ရထီ ယောဓော တု ယော ဘဋော။

* ၃၇၇။

ပဒါတိ ပတ္တီ တု ပုမေ၊ ပဒဂေါ ပဒိကော မတော။

သန္နာဟော ကင်္ကဋော ဝမ္မံ၊ ကဝစော ဝါ ဥရစ္ဆဒေါ။

* ၃၇၈။

ဇာလိကာ ထ စ သန္နဒ္ဓါ၊ သဇ္ဇော စ ဝမ္မိကော ဘဝေ။

အာမုက္ကော ပဋိမုက္ကော ထ၊ ပုရေစာရီ ပုရေစရော။

* ၃၇၉။

ပုဗ္ဗင်္ဂမော ပုရေဂါမီ၊ မန္ဒဂါမီ တု မန္ထရော။

ဇဝနော တုရိတော ဝေဂီ၊ ဇေတဗ္ဗံ ဇေယျ မုစ္စတေ။

* ၃၈၀။

သူရ ဝီရာ တု ဝိက္ကန္တော၊ သဟာယော နုစရော သမာ။

သန္နဒ္ဓပ္ပဘုတီ တီသု၊ ပါထေယျံ တု စ သမ္ဗလံ။

* ၃၈၁။

ဝါဟိနီ ဓဇိနီ သေနာ၊ စမူ စက္ကံ ဗလံ တထာ။

အနီကော ဝါ ထ ဝိနျာသော၊

ဗျူဟော သေနာယ ကထျတေ။

* ၃၈၂။

ဟတ္ထီ ဒွါဒသပေါသော၊တိ၊

ပုရိသော တုရဂေါ၊ ရထော။

စတုပေါသောတိ ဧတေန၊ လက္ခဏေနာ ဓမန္တတော။

* ၃၈၃။

ဟတ္ထာနီကံ ဟယာနီကံ၊ ရထာနီကံ တယော တယော။

ဂဇာဒယော သသတ္ထာ တု၊ ပတ္တာနီကံ စတုဇ္ဇနာ။

---

(ဓာန်၊၃၃။)

* ၃၈၄။

သဋ္ဌိဝံသကလာပေသု၊ ပစ္စေကံ သဋ္ဌိဒဏ္ဍိသု။

ဓူလီကတေသု သေနာယ၊ ယန္တိယာ က္ခောဘနီ [အက္ခောဘိဏီ (က.)] တ္ထိယံ။

* ၃၈၅။

သမ္ပတ္တိ သမ္ပဒါ လက္ခီ၊ သိရီ ဝိပတ္တိ အာပဒါ။

အထာ ဝုဓဉ္စ [အာယုဓန္တိပိ ပါဌော] ဟေတိ’တ္ထီ၊ သတ္ထံ ပဟရဏံ ဘဝေ။

* ၃၈၆။

မုတ္တာမုတ္တ မမုတ္တဉ္စ၊ ပါဏိတော မုတ္တမေဝ စ။

ယန္တမုတ္တန္တိ သကလံ၊ အာယုဓံ တံ စတုဗ္ဗိဓံ။

* ၃၈၇။

မုတ္တာမုတ္တဉ္စ ယဋ္ဌျာဒိ၊ အမုတ္တံ ဆုရိကာဒိကံ။

ပါဏိမုတ္တံ တု သတျာဒိ၊ ယန္တမုတ္တံ သရာဒိကံ။

* ၃၈၈။

ဣဿာသော ဓနု ကောဒဏ္ဍံ၊ စာပေါ နိတ္ထီ သရာသနံ။

အထော ဂုဏော ဇိယာ ဇျာ ထ၊

သရော ပတ္တိ စ သာယကော။

* ၃၈၉။

ဝါဏော ကဏ္ဍ မုသု ဒွီသု၊ ခုရပ္ပော [ဥရပ္ပော (က.)] တေဇနာ’သနံ။

တူဏီတ္ထိယံ ကလာပေါ စ၊ တူဏော တူဏီရ ဝါဏဓိ။

* ၃၉၀။

ပက္ခော တု ဝါဇော ဒိဒ္ဓါ တု၊ ဝိသပ္ပိတော သရော ဘဝေ။

လက္ခံ ဝေဇ္ဈံ သရဗျဉ္စ၊ သရာဘျာသော တု’ပါသနံ။

* ၃၉၁။

မဏ္ဍလဂ္ဂေါ တု နေတ္တိံသော၊ အသိ ခဂ္ဂေါ စ သာယကော။

ကောသိတ္ထီ တဗ္ဗိဓာနေ ထော၊ ထရု ခဂ္ဂါဒိမုဋ္ဌိယံ။

* ၃၉၂။

ခေဋကံ ဖလကံ စမ္မံ၊ ဣလ္လီ တု ကရပါလိကာ။

ဆုရိကာ သတျ’သိပုတ္တီ၊ လဂုဠော တု စ မုဂ္ဂရော။

* ၃၉၃။

သလ္လော နိတ္ထိ သင်္ကု ပုမေ၊ ဝါသီ တု တစ္ဆနီတ္ထိယံ။

ကုဌာရီ [ကုဓာရီ (ဋီ.)] တ္ထီဖရသုသော၊ ဋင်္ကော ပါသာဏဒါရဏော။

* ၃၉၄။

ကဏယော ဘိန္ဒိဝါဠော စ၊ စက္ကံ ကုန္တော ဂဒါ တထာ။

သတျာ’ဒီ သတ္ထဘေဒါ ထ၊

ကောဏော’ဿော ကောဋိ နာရိယံ။

* ၃၉၅။

နိယျာနံ ဂမနံ ယာတြာ၊ ပဋ္ဌာနဉ္စ ဂမော ဂတိ။

စုဏ္ဏော ပံသု ရဇော စေဝ၊ ဓူလီ’တ္ထီ ရေဏု စ ဒွိသု။

---

(ဓာန်၊၃၄။)

* ၃၉၆။

မာဂဓော မဓုကော ဝုတ္တော၊ ဝန္ဒီ တု ထုတိပါဌကော။

ဝေတာဠိကော ဗောဓကရော၊

စက္ကိကော တု စ ဃဏ္ဋိကော။

* ၃၉၇။

ကေတု ဓဇော ပဋာကာ စ၊ ကဒလီ ကေတနံ ပျထ။

ယော’ဟံကာရော’ညမညဿ၊ သာ’ ဟမဟမိကာ ဘဝေ။

* ၃၉၈။

ဗလံ ထာမော သဟံ သတ္တိ၊ ဝိက္ကမော တွတိသူရတာ။

ရဏေ ဇိတဿ ယံ ပါနံ၊ ဇယပါနန္တိ တံ မတံ။

* ၃၉၉။

သင်္ဂါမော သမ္ပဟာရော စာ၊ နိတ္ထိယံ သမရံ ရဏံ။

အာဇိတ္ထီ အာဟဝေါ ယုဒ္ဓ၊ မာယောဓနဉ္စ သံယုဂံ။

* ၄၀၀။

ဘဏ္ဍနံ တု ဝိဝါဒေါ စ၊ ဝိဂ္ဂဟော ကလဟ မေဓဂါ။

မုစ္ဆာ မောဟော ထ ပသယှော၊

ဗလက္ကာရော ဟဌော ဘဝေ။

* ၄၀၁။

ဥပ္ပာဒေါ [ဥပ္ပာတော (က.)၁၀၂၇-ဂါထာ ပဿိတဗ္ဗာ] ဘူတဝိကတိ၊ ယာ သုဘာသုဘသူစိကာ။

ဤတိ တွိတ္ထီ အဇညဉ္စ၊ ဥပသဂ္ဂေါ ဥပဒ္ဒဝေါ။

* ၄၀၂။

နိဗ္ဗုဒ္ဓံ [နိယုဒ္ဓံ (က.)] မလ္လယုဒ္ဓမှိ၊ ဇယော တု ဝိဇယော ဘဝေ။

ပရာဇယော ရဏေ ဘင်္ဂေါ၊ ပလာယန မပက္ကမော။

* ၄၀၃။

မာရဏံ ဟနနံ ဃာတော၊ နာသနဉ္စ နိသူဒနံ။

ဟိံသနံ သရဏံ ဟိံသာ၊ ဝဓော သသန ဃာတနံ။

* ၄၀၄။

မရဏံ ကာလကိရိယာ၊ ပလယော မစ္စု အစ္စယော။

နိဓနော နိတ္ထိယံ နာသော၊ ကာလော’န္တော စဝနံ ဘဝေ။

* ၄၀၅။

တီသု ပေတော ပရေတော စ၊

မတော ထ စိတကော စိတော။

အာဠဟနံ သုသာနဉ္စာ၊ နိတ္ထိယံ ကုဏပေါ ဆဝေါ။

* ၄၀၆။

ကဗန္ဓော နိတ္ထိယံ ဒေဟော၊ သိရောသုညော သဟကြိယော။

အထ သိဝထိကာ ဝုတ္တာ၊ သုသာနသ္မိဉှိ အာမကေ။

* ၄၀၇။

ဝန္ဒီတ္ထိယံ ကရမရော၊ ပါဏော တွ’သု ပကာသိတော။

ကာရာ တု ဗန္ဓနာဂါရံ၊ ကာရဏာ တု စ ယာတနာ။

ဣတိ ခတ္တိယဝဂ္ဂေါ။

---

(ဓာန်၊၃၅။)

* ၄၀၈။

ဗြဟ္မဗန္ဓု ဒွိဇော ဝိပ္ပော၊ ဗြဟ္မာ ဘောဝါဒီ ဗြာဟ္မဏော။

သောတ္တိယော ဆန္ဒသော သော ထ၊

သိဿ’ န္တေဝါသိနော ပုမေ။

* ၄၀၉။

ဗြဟ္မစာရီ ဂဟဋ္ဌော စ၊ ဝနပ္ပတ္ထော စ ဘိက္ခုတိ။

ဘဝန္တိ စတ္တာရော ဧတေ၊ အဿမာ ပုန္နပုံသကေ။

* ၄၁၀။

စရန္တာ သဟ သီလာဒီ၊ သဗြဟ္မစာရိနော မိထု။

ဥပဇ္ဈာယော ဥပဇ္ဈာ ထာ၊ စရိယော နိဿယဒါဒိကော [နိဿယဒါယကော (ဋီ.)]။

* ၄၁၁။

ဥပနီယာ ထဝါ ပုဗ္ဗံ၊ ဝေဒ မဇ္ဈာပယေ ဒွိဇော။

ယော သင်္ဂံ သရဟဿဉ္စာ၊ စရိယော ဗြာဟ္မဏေသု သော။

* ၄၁၂။

ပါရမ္ပရိယ မေတိဟျံ၊ ဥပဒေသော တထေ’တိဟာ။

ယာဂေါ တု ကတု ယညော ထ၊ ဝေဒီတ္ထီ ဘူ ပရိက္ခတာ။

* ၄၁၃။

အဿမေဓော စ ပုရိသ၊ မေဓော စေဝ နိရဂ္ဂဠော။

သမ္မာပါသော ဝါဇပေယျ၊ မိတိ ယာဂါ မဟာ ဣမေ။

* ၄၁၄။

ဣတွိဇော [ဣဒိတွိဇော (ဋီ.)] ယာဇကော စာထ၊

သဘျော သာမာဇိကော ပျထ။

ပရိသာ သဘာ သမဇ္ဇာ စ၊ တထာ သမိတိ သံသဒေါ။

* ၄၁၅။

စတဿော ပရိသာ ဘိက္ခု၊ ဘိက္ခုနီ စ ဥပါသကာ။

ဥပါသိကာယောတိ ဣမာ၊ ထဝါ ဋ္ဌ ပရိသာ သိယုံ။

* ၄၁၆။

တာဝတိံသ၊ဒွိဇ၊က္ခတ္တ၊မာရ၊ဂ္ဂဟပတိဿ စ။

သမဏာနံ ဝသာ စာတု၊ မဟာရာဇိက၊ ဗြဟ္မုနံ။

* ၄၁၇။

ဂါယတ္တိပ္ပမုခံ ဆန္ဒံ၊ စတုဝီသ’က္ခရံ တု ယံ။

ဝေဒါန မာဒိဘူတံ သာ၊ သာဝိတ္တီ တိပဒံ သိယာ။

* ၄၁၈။

ဟဗျပါကေ စရု မတော၊ သုဇာ တု ဟောမဒဗ္ဗိယံ။

ပရမန္နံ တု ပါယာသော၊ ဟဗျံ တု ဟဝိ ကထျတေ။

* ၄၁၉။

ယူပေါ ထူဏာယံ နိမ္မန္တျ၊ ဒါရုမှိ တွ’ရဏီ ဒွိသု။

ဂါဟပ္ပစ္စာ’ဟဝနီယော၊ ဒက္ခိဏဂ္ဂိ တယော’ ဂ္ဂယော။

* ၄၂၀။

စာဂေါ ဝိဿဇ္ဇနံ ဒါနံ၊ ဝေါဿဂ္ဂေါ စာပဒေသနံ။

ဝိဿာဏနံ ဝိတရဏံ၊ ဝိဟာယိတာ ပဝဇ္ဇနံ။

---

(ဓာန်၊၃၆။)

* ၄၂၁။

ပဉ္စ မဟာပရိစ္စာဂေါ၊ ဝုတ္တော သေဋ္ဌ၊ ဓနဿ စ။

ဝသေန ပုတ္တ ဒါရာနံ၊ ရဇ္ဇဿ’ င်္ဂါန မေဝ စ။

* ၄၂၂။

အန္နံ ပါနံ ဃရံ ဝတ္ထံ၊ ယာနံ မာလာ ဝိလေပနံ။

ဂန္ဓော သေယျာ ပဒီပေယျံ၊ ဒါနဝတ္ထူ သိယုံ ဒသ။

* ၄၂၃။

မတတ္ထံ တဒဟေ ဒါနံ၊ တီသွေတ မုဒ္ဓဒေဟိကံ။

ပိတုဒါနံ တု နိဝါပေါ၊ သဒ္ဓံ တု တံဝ သာတ္ထတော။

* ၄၂၄။

ပုမေ အတိထိ အာဂန္တု၊ ပါဟုနာ ဝေသိကာ ပျထ။

အညတ္ထ ဂန္တု မိစ္ဆန္တော၊ ဂမိကော ထာ ဂ္ဃ မဂ္ဃိယံ။

* ၄၂၅။

ပဇ္ဇံ ပါဒေါဒကာဒေါ ထ၊ သတ္တာ’ဂန္တွာဒယော တိသု။

အပစိတျ’စ္စနာ ပူဇာ၊ ပဟာရော ဗလိ မာနနာ။

* ၄၂၆။

နမဿာ တု နမက္ကာရော၊ ဝန္ဒနာ စာဘိဝါဒနံ။

ပတ္ထနာ ပဏိဓာနဉ္စ၊ ပုရိသေ ပဏိဓီရိတော။

* ၄၂၇။

အဇ္ဈေသနာ တု သက္ကာရ၊ ပုဗ္ဗင်္ဂမနိယောဇနံ။

* ၄၂၈။

ပရိယေသနာ နွေသနာ၊ ပရိယေဋ္ဌိ ဂဝေသနာ။

ဥပါသနံ တု သုဿူသာ၊ သာ ပါရိစရိယာ ဘဝေ။

* ၄၂၉။

မောန မဘာသနံ တုဏှီ၊ ဘာဝေါ ထ ပဋိပါဋိ သာ။

အနုက္ကမော ပရိယာယော၊ အနုပုဗ္ဗျ’ပုမေ ကမော။

* ၄၃၀။

တပေါ စ သံယမော သီလံ၊ နိယမော တု ဝတဉ္စ ဝါ။

ဝီတိက္ကမော’ ဇ္ဈစာရော ထ၊ ဝိဝေကော ပုထုဂတ္တတာ။

* ၄၃၁။

ခုဒ္ဒါနုခုဒ္ဒကံ အာဘိ၊ သမာစာရိက မုစ္စတေ။

အာဒိဗြဟ္မစရိယံ တု၊ တဒညံ သီလ မီရိတံ။

* ၄၃၂။

ယော ပါပေဟိ ဥပါဝတ္တော၊ ဝါသော သဒ္ဓိံ ဂုဏေဟိ သော။

ဥပဝါသောတိ ဝိညေယျော၊ သဗ္ဗဘောဂဝိဝဇ္ဇိတော။

* ၄၃၃။

တပဿီ ဘိက္ခု သမဏော၊ ပဗ္ဗဇိတော တပေါဓနော။

ဝါစံယမော တု မုနိ စ၊ တာပသော တု ဣသီ ရိတော။

* ၄၃၄။

ယေသံယတိန္ဒြိယဂဏာ၊ ယတယော ဝသိနော စ တေ။

သာရိပုတ္တော’ပတိဿော တု၊ ဓမ္မသေနာပတီ ရိတော။

* ၄၃၅။

ကောလိတော မောဂ္ဂလ္လာနော ထ၊

အရိယော ဓိဂတော သိယာ။

သောတာပန္နာဒိကာ သေခါ၊ နရိယော တု ပုထုဇ္ဇနော။

---

(ဓာန်၊၃၇။)

* ၄၃၆။

အညာ တု အရဟတ္တဉ္စ၊ ထူပေါ တု စေတိယံ ဘဝေ။

ဓမ္မဘဏ္ဍာဂါရိကော စ၊ အာနန္ဒော ဒွေ သမာ ထ စ။

* ၄၃၇။

ဝိသာခါ မိဂါရမာတာ၊ သုဒတ္တော’ နာထပိဏ္ဍိကော။

* ၄၃၈။

ဘိက္ခုပိ သာမဏေရော စ၊ သိက္ခမာနာ စ ဘိက္ခုနီ။

သာမဏေရီတိ ကထိတာ၊ ပဉ္စေတေ သဟဓမ္မိကာ။

* ၄၃၉။

ပတ္တော တိစီဝရံ ကာယ၊ ဗန္ဓနံ ဝါသိ သူစိ စ။

ပရိဿာဝန မိစ္စေတေ၊ ပရိက္ခာရာ’ဋ္ဌ ဘာသိတာ။

* ၄၄၀။

သာမဏေရော စ သမဏု၊ ဒ္ဒေသော စာထ ဒိဂမ္ဗရော။

အစေဠကော နိဂဏ္ဌော စ၊ ဇဋိလော တု ဇဋာဓရော။

* ၄၄၁။

ကုဋီသကာဒိကာ စတု၊ တ္တိံသ ဒွါသဋ္ဌိ ဒိဋ္ဌိယော။

ဣတိ ဆန္နဝုတိ ဧတေ၊ ပါသဏ္ဍာ သမ္ပကာသိတာ။

* ၄၄၂။

ပဝိတ္တော ပယတော ပူတော၊ စမ္မံ တု အဇိနံ ပျထ။

ဒန္တပေါဏော ဒန္တကဋ္ဌံ၊ ဝက္ကလော ဝါ တိရီဋကံ။

* ၄၄၃။

ပတ္တော ပါတိတ္ထိယံနိတ္ထီ၊ ကမဏ္ဍလု တု ကုဏ္ဍိကာ။

အထာလမ္ဗဏဒဏ္ဍသ္မိံ၊ ကတ္တရယဋ္ဌိ နာရိယံ။

* ၄၄၄။

ယံ ဒေဟသာဓနာပေက္ခံ၊ နိစ္စံ ကမ္မမယံ ယမော။

အာဂန္တုသာဓနံ ကမ္မံ၊ အနိစ္စံ နိယမော ဘဝေ။

ဣတိ ဗြာဟ္မဏဝဂ္ဂေါ။

* ၄၄၅။

ဝေဿော စ ဝေသိယာနော ထ၊ ဇီဝနံ ဝုတ္တိ ဇီဝိကာ။

အာဇီဝေါ ဝတ္တနံ စာထ၊ ကသိကမ္မံ ကသိတ္ထိယံ။

* ၄၄၆။

ဝါဏိဇ္ဇဉ္စ ဝဏိဇ္ဇာ ထ၊ ဂေါရက္ခာ ပသုပါလနံ။

ဝေဿဿ ဝုတ္တိယော တိဿော၊ ဂဟဋ္ဌာ’ဂါရိကာ ဂိဟိ။

* ၄၄၇။

ခေတ္တာဇီဝေါ ကဿကော ထ၊ ခေတ္တံ ကေဒါရ မုစ္စတေ။

လေဍ္ဍု’တ္တော မတ္တိကာခဏ္ဍော၊ ခဏိတ္တိ’တ္ထျ’ဝဒါရဏံ။

* ၄၄၈။

ဒါတ္တံ လဝိတ္တ မသိတံ [‘‘အသိတ’’ သဒ္ဒေါ ပုံနပုံသကေ-၁၀၀၅-ဂါထာ ပဿိတဗ္ဗာ]၊ ပတောဒေါ တုတ္တ ပါဇနံ။

ယောတ္တံ တု ရဇ္ဇု ရသ္မိတ္ထီ၊ ဖာလော တု ကသကော ဘဝေ။

* ၄၄၉။

နင်္ဂလဉ္စ ဟလံ သီရော၊ ဤသာ နင်္ဂလဒဏ္ဍကော။

သမ္မာ တု ယုဂကီလသ္မိံ၊ သီတာ တု ဟလပဒ္ဓတိ။

---

(ဓာန်၊၃၈။)

* ၄၅၀။

မုဂ္ဂါဒိကေ ပရဏ္ဏဉ္စ၊ ပုဗ္ဗဏ္ဏံ သာလိအာဒိကေ။

သာလိ ဝီဟိ စ ကုဒြူသော၊ ဂေါဓုမော ဝရကော ယဝေါ။

ကင်္ဂူတိ သတ္တ ဓညာနိ၊ နီဝါရာဒီ တု တဗ္ဘိဒါ။

* ၄၅၁။

စဏကော စ ကဠာယော ထ၊

သိဒ္ဓတ္ထော သာသပေါ ဘဝေ။

* ၄၅၂။

အထ ကင်္ဂု ပိယင်္ဂု’တ္ထီ၊ ဥမ္မာ တု အတသီ ဘဝေ။

ကိဋ္ဌဉ္စ သဿံ ဓညဉ္စ [ဝိညေယျံ (ဋီ.)]၊ ဝီဟိ ထမ္ဗကရီ [ထမ္ဘကရီ (က.)] ရိတော။

* ၄၅၃။

ကဏ္ဍော တု နာဠ မထ သော၊ ပလာလံ နိတ္ထိ နိပ္ဖလော။

ဘုသံ ကလိင်္ဂရော စာထ၊ ထုသော ဓညတ္တစေ ထ စ။

* ၄၅၄။

သေတဋ္ဋိကာ သဿရောဂေါ၊

ကဏော တု ကုဏ္ဍကော ဘဝေ။

ခလော စ ဓညကရဏံ၊ ထမ္ဗော [ထမ္ဘော (က.)] ဂုမ္ဗော တိဏာဒိနံ။

* ၄၅၅။

အယောဂ္ဂေါ မုသလော နိတ္ထီ၊ ကုလ္လော သုပ္ပ မနိတ္ထိယံ။

အထော’ဒ္ဓနဉ္စ စုလ္လိ’တ္ထီ၊ ကိလဉ္ဇော တု ကဋော ဘဝေ။

* ၄၅၆။

ကုမ္ဘီ’တ္ထီ ပိဌရော ကုဏ္ဍံ၊ ခဠောပျု’က္ခလိ ထာလျု’ခါ။

ကောလမ္ဗော စာထ မဏိကံ၊ ဘာဏကော စ အရဉ္ဇရော။

* ၄၅၇။

ဃဋော ဒွီသု ကုဋော နိတ္ထီ၊ ကုမ္ဘော ကလသ၊ ဝါရကာ။

ကံသော ဘုဉ္ဇနပတ္တော ထာ၊ မတ္တံ ပတ္တော စ ဘာဇနံ။

* ၄၅၈။

အဏ္ဍုပကံ စုမ္ဗဋကံ၊ သရာဝေါ တု စ မလ္လကော။

ပုမေ ကဋစ္ဆုဒဗ္ဗိ’တ္ထီ၊ ကုသူလော ကောဋ္ဌ မုစ္စတေ။

* ၄၅၉။

သာကော အနိတ္ထိယံ ဍာကော၊ သိင်္ဂီဝေရံတု အဒ္ဒကံ။

မဟောသဓံ တု တံ သုက္ခံ၊ မရိစံ တု စ ကောလကံ။

* ၄၆၀။

သောဝီရံ ကဉ္ဇိယံ ဝုတ္တံ၊ အာရနာဠံ ထုသောဒကံ။

ဓညမ္ဗိလံ ဗိဠင်္ဂေါ ထ၊ လဝဏံ လောဏ မုစ္စတေ။

* ၄၆၁။

သာမုဒ္ဒံ သိန္ဓဝေါ နိတ္ထီ၊ ကာဠလောဏံ တု ဥဗ္ဘိဒံ။

ဗိဠကံ [ဗိဠာလ (က.)] စေတိ ပဉ္စေတေ၊ ပဘေဒါ လဝဏဿ ဟိ။

* ၄၆၂။

ဂုဠော စ ဖာဏိတံ ခဏ္ဍော၊ မစ္ဆဏ္ဍီ သက္ခရာ ဣတိ။

ဣမေ ဥစ္ဆုဝိကာရာ ထ၊ ဂုဠသ္မိံ ဝိသကဏ္ဋကံ။

---

(ဓာန်၊၃၉။)

* ၄၆၃။

လာဇာ သိယာ’က္ခတံ စာထ၊ ဓာနာ ဘဋ္ဌယဝေ ဘဝေ။

အဗဒ္ဓသတ္တု မန္ထော စ၊ ပူပါ’ ပူပါ တု ပိဋ္ဌကော။

* ၄၆၄။

ဘတ္တကာရော သူပကာရော၊ သူဒေါ အာဠာရိကော တထာ။

ဩဒနိကော စ ရသကော၊ သူပေါ တု ဗျဉ္ဇနံ ဘဝေ။

* ၄၆၅။

ဩဒနော ဝါ ကုရံ ဘတ္တံ၊ ဘိက္ခာ စာ’န္န မထာ သနံ။

အာဟာရော ဘောဇနံ ဃာသော၊

တရလံ ယာဂု နာရိယံ။

* ၄၆၆။

ခဇ္ဇံ တု ဘောဇ္ဇ လေယျာနိ၊ ပေယျန္တိ စတုဓာ’သနံ။

နိဿာဝေါ စ တထာ’စာမော၊

အာလောပေါ ကဗဠော ဘဝေ။

* ၄၆၇။

မဏ္ဍော နိတ္ထီရသဂ္ဂသ္မိံ၊ ဝိဃာသော ဘုတ္တသေသကေ။

ဝိဃာသာဒေါ စ ဒမကော၊ ပိပါသာ တု စ တဿနံ။

* ၄၆၈။

ခုဒ္ဒါ ဇိဃစ္ဆာ၊ မံသဿ၊ ပဋိစ္ဆာဒနိယံ ရသော။

ဥဒြေကော စေဝ ဥဂ္ဂါရော၊ သောဟိစ္စံ တိတ္တိ တပ္ပနံ။

* ၄၆၉။

ကာမံ တွိဋ္ဌံ နိကာမဉ္စ၊ ပရိယတ္တံ ယထစ္ဆိတံ။

ကယဝိက္ကယိကော သတ္ထ၊ဝါဟာ’ ပဏိက ဝါဏိဇာ။

* ၄၇၀။

ဝိက္ကယိကော တု ဝိက္ကေတာ၊

ကယိကော တု စ ကာယိကော။

ဥတ္တမဏ္ဏော စ ဓနိကော၊ ဓမဏ္ဏော တု ဣဏာယိကော။

* ၄၇၁။

ဥဒ္ဓါရော တု ဣဏံ ဝုတ္တံ၊ မူလံ တု ပါဘတံ ဘဝေ။

သစ္စာပနံ သစ္စံကာရော၊ ဝိက္ကေယျံ ပဏိယျံ တိသု။

* ၄၇၂။

ပဋိဒါနံ ပရိဝတ္တော၊ နျာသော တူ’ပနိဓီ ရိတော။

* ၄၇၃။

အဋ္ဌာရသန္တာ သင်္ချေယျေ၊ သင်္ချာ ဧကာဒယော တိသု။

သင်္ချာနေ တု စ သင်္ချေယျေ၊ ဧကတ္တေ ဝီသတာဒယော။

ဝဂ္ဂဘေဒေ ဗဟုတ္တေပိ၊ တာ အာနဝုတိ နာရိယံ။

* ၄၇၄။

သတံ သဟဿံ နိယုတံ [နဟုတံ-နယုတံ (ကတ္ထစိ)]၊ လက္ခံ ကောဋိ ပကောဋိယော။

ကောဋိပကောဋိ နဟုတံ၊ တထာ နိန္နဟုတမ္ပိ စ။

---

(ဓာန်၊၄၀။)

* ၄၇၅။

အက္ခောဘနီတ္ထိယံ [အက္ခောဘိဏီ (က.)] ဗိန္ဒု၊ အဗ္ဗုဒဉ္စ နိရဗ္ဗုဒံ။

အဟဟံ အဗဗံ စေဝါ၊ ဋဋံ သောဂန္ဓိ ကုပ္ပလံ။

* ၄၇၆။

ကုမုဒံ ပုဏ္ဍရီကဉ္စ၊ ပဒုမံ ကထာနမ္ပိ စ။

မဟာကထာနာ’သင်္ချေယျာ၊ နိ’စ္စေတာသု သတာဒိ စ။

* ၄၇၇။

ကောဋျာဒိကံ ဒသဂုဏံ၊ သတလက္ခဂုဏံ ကမာ။

စတုတ္ထော’ဍ္ဎေန အဍ္ဎုဍ္ဎော၊

တတိယော ဍ္ဎတိယော တထာ။

* ၄၇၈။

အဍ္ဎတေယျော ဒိယဍ္ဎော တု၊

ဒိဝဍ္ဎော ဒုတိယော ဘဝေ။

တုလာ၊ ပတ္ထ၊ င်္ဂုလိ၊ ဝသာ၊ တိဓာ မာန မထော သိယာ။

* ၄၇၉။

စတ္တာရော ဝိဟယော ဂုဉ္ဇာ၊

ဒွေ ဂုဉ္ဇာ မာသကော ဘဝေ။

ဒွေ အက္ခာ မာသကာ ပဉ္စ၊ က္ခာနံ ဓရဏမဋ္ဌကံ။

* ၄၈၀။

သုဝဏ္ဏော ပဉ္စဓရဏံ၊ နိက္ခံ တွနိတ္ထိ ပဉ္စ တေ။

ပါဒေါ ဘာဂေ စတုတ္ထေ ထ၊ ဓရဏာနိ ပလံ ဒသ။

* ၄၈၁။

တုလာ ပလသတံ စာထ၊ ဘာရော ဝီသတိ တာ တုလာ။

အထော ကဟာပဏော နိတ္ထီ၊ ကထျတေ ကရိသာပဏော။

* ၄၈၂။

ကုဍုဝေါ ပသတော ဧကော၊

ပတ္ထော တေ စတုရော သိယုံ။

အာဠှကော စတုရော ပတ္ထာ၊ ဒေါဏံ ဝါစတုရာ’ဠှကံ။

* ၄၈၃။

မာနိကာ စတုရော ဒေါဏာ၊ ခါရီတ္ထီ စတုမာနိကာ။

ခါရိယော ဝီသ ဝါဟော ထ၊

သိယာ ကုမ္ဘော ဒသမ္ဗဏံ။

* ၄၈၄။

အာဠှကော နိတ္ထိယံ တုမ္ဘော၊ ပတ္ထောတု နာဠိ နာရိယံ။

ဝါဟော တု သကဋော စေကာ၊

ဒသ ဒေါဏာ တု အမ္ဗဏံ။

* ၄၈၅။

ပဋိဝီသော စ ကောဋ္ဌာသော၊

အံသော ဘာဂေါ ဓနံ တု သော။

ဒဗ္ဗံ ဝိတ္တံ သာပတေယျံ၊ ဝသွ’တ္ထော ဝိဘဝေါ ဘဝေ။

---

(ဓာန်၊၄၁။)

* ၄၈၆။

ကောသော ဟိရညဉ္စ ကတာ၊ ကတံ ကဉ္စန၊ ရူပိယံ။

ကုပ္ပံ တဒညံ တမ္ဗာဒိ၊ ရူပိယံ ဒွယ မာဟတံ။

* ၄၈၇။

သုဝဏ္ဏံ ကနကံ ဇာတ၊ ရူပံ သောဏ္ဏဉ္စ ကဉ္စနံ။

သတ္ထုဝဏ္ဏော ဟရီ ကမ္ဗု၊ စာရု ဟေမဉ္စ ဟာဋကံ။

* ၄၈၈။

တပနိယံ ဟိရညံ တ၊ ဗ္ဘေဒါ စာမီကရမ္ပိ စ။

သာတကုမ္ဘံ တထာ ဇမ္ဗု၊ နဒံ သိင်္ဂီ စ နာရိယံ။

* ၄၈၉။

ရူပိယံ ရဇတံ သဇ္ဈု၊ ရူပီ သဇ္ဈံ အထော ဝသု။

ရတနဉ္စ မဏိ ဒွီသု၊ ပုပ္ဖရာဂါဒီ တဗ္ဘိဒါ။

* ၄၉၀။

သုဝဏ္ဏံ ရဇတံ မုတ္တာ၊ မဏိ ဝေဠုရိယာနိ စ။

ဝဇိရဉ္စ ပဝါဠန္တိ၊ သတ္တာ’ဟု ရတနာနိ’ မေ။

* ၄၉၁။

လောဟိတင်္ကော စ ပဒုမ၊ ရာဂေါ ရတ္တမဏိ ပျထ။

ဝံသဝဏ္ဏော ဝေဠုရိယံ၊ ပဝါဠံ ဝါ စ ဝိဒ္ဒုမော။

* ၄၉၂။

မသာရဂလ္လံ ကဗရမဏိ၊ အထ မုတ္တာ စ မုတ္တိကံ။

ရီတိ [ရီရီ (ဋီ.)] တ္ထီ အာရကူဋော ဝါ၊ အမလံ တွ’ဗ္ဘကံ ဘဝေ။

* ၄၉၃။

လောဟော နိတ္ထီ အယော ကာဠာ၊

ယသဉ္စ ပါရဒေါ ရသော။

ကာဠတိပု တု သီသဉ္စ၊ ဟရိတာလံ တု ပီတနံ။

* ၄၉၄။

စိနပိဋ္ဌဉ္စ သိန္ဒူရံ၊ အထ တူလော တထာ ပိစု။

ခုဒ္ဒဇံ တု မဓု ခုဒ္ဒံ၊ မဓုစ္ဆိဋ္ဌံ တု သိတ္ထကံ။

* ၄၉၅။

ဂေါပါလော ဂေါပ ဂေါသင်္ချာ၊

ဂေါမာ တု ဂေါမိကော ပျထ။

ဥသဘော ဗလီဗဒ္ဓါ [ဗလိဗဒ္ဒ (က.)] စ၊ ဂေါဏော ဂေါဝသဘော ဝုသော။

* ၄၉၆။

ဝုဒ္ဓါ ဇရဂ္ဂဝေါ သော ထ၊ ဒမ္မော ဝစ္ဆတရော သမာ။

ဓုရဝါဟီ တု ဓောရယှော၊ ဂေါဝိန္ဒော ဓိကတော ဂဝံ။

* ၄၉၇။

ဝဟော စ ခန္ဓဒေသော ထ၊ ကကုဓော [ကကုဒေါ (က.)] ကကု ဝုစ္စတေ။

အထော ဝိသာဏံ သိင်္ဂဉ္စ၊ ရတ္တဂါဝီ တု ရောဟိဏီ။

* ၄၉၈။

ဂါဝီ စ သိင်္ဂိနီ ဂေါ စ၊ ဝဉ္ဈာ တု ကထျတေ ဝသာ။

နဝပ္ပသူတိကာ ဓေနု၊ ဝစ္ဆကာမာ တု ဝစ္ဆလာ။

---

(ဓာန်၊၄၂။)

* ၄၉၉။

ဂဂ္ဂရီ မန္ထနီတ္ထီ ဒွေ၊ သန္ဒာနံ ဒါမမုစ္စတေ။

ဂေါမိဠှော ဂေါမယော နိတ္ထီ၊ အထော သပ္ပိ ဃတံ ဘဝေ။

* ၅၀၀။

နဝုဒ္ဓဋံ တု နောနီတံ၊ ဒမိမဏ္ဍံ တု မတ္ထု စ၊

ခီရံ ဒုဒ္ဓံ ပယော ထညံ၊ တက္ကံ တု မထိတံ ပျထ။

* ၅၀၁။

ခီရံ ဒဓိ ဃတံ တက္ကံ၊ နောနီတံ ပဉ္စ ဂေါရသာ။

ဥရဗ္ဘော မေဏ္ဍ မေသာ စ၊ ဥရဏော အဝိ ဧဠကော။

* ၅၀၂။

ဝဿော တွဇော ဆဂလကော၊

ဩဋ္ဌော တု ကရဘော ဘဝေ။

ဂဒြဘော တု ခရော ဝုတ္တော၊ ဥရဏီ တု အဇီ အဇာ။

ဣတိ ဝေဿဝဂ္ဂေါ။

* ၅၀၃။

သုဒ္ဒေါ’န္တဝဏ္ဏော ဝသလော၊ သံကိဏ္ဏာ မာဂဓာဒယော။

မာဂဓော သုဒ္ဒခတ္တာဇော၊ ဥဂ္ဂေါ သုဒ္ဒါယ ခတ္တဇော။

* ၅၀၄။

ဒွိဇာခတ္တိယဇော သူတော၊ ကာရုတု သိပ္ပိကောပုမေ။

သံဃာတောတု သဇာတီနံ၊ တေသံ သေဏီ ဒွိသုစ္စတေ။

* ၅၀၅။

တစ္ဆကော တန္တဝါယော စ၊ ရဇကော စ နဟာပိတော။

ပဉ္စမော စမ္မကာရောတိ၊ ကာရဝေါ ပဉ္စိမေ သိယုံ။

* ၅၀၆။

တစ္ဆကော ဝဍ္ဎကီ မတော၊ ပလဂဏ္ဍော ထပတျပိ။

ရထကာရော ထ သုဝဏ္ဏ၊ ကာရော နာဠိန္ဓမော ဘဝေ။

* ၅၀၇။

တန္တဝါယော ပေသကာရော၊

မာလာကာရော တု မာလိကော။

ကုမ္ဘကာရော ကုလာလော ထ၊

တုန္နဝါယော စ သူစိကော။

* ၅၀၈။

စမ္မကာရော ရထကာရော၊ ကပ္ပကော တု နဟာပိတော။

ရင်္ဂါဇီဝေါ စိတ္တကာရော၊ ပုက္ကုသော ပုပ္ဖဆဍ္ဍကော။

* ၅၀၉။

ဝေနော ဝိလီဝကာရော စ၊ နဠကာရော သမာ တယော။

စုန္ဒကာရော ဘမကာရော၊

ကမ္မာရော လောဟကာရကော။

* ၅၁၀။

နိန္နေဇကော စ ရဇကော၊ နေတ္တိကော ဥဒဟာရကော။

ဝီဏာဝါဒီ ဝေဏိကော ထ၊ ဥသုကာရော’ သုဝဍ္ဎကီ။

---

(ဓာန်၊၄၃။)

* ၅၁၁။

ဝေဏုဓမော ဝေဏဝိကော၊

ပါဏိဝါဒေါ တု ပါဏိဃော [ပါဏိယော (ကတ္ထစိ)]။

ပူပိယော ပူပပဏိယော၊ သောဏ္ဍိကော မဇ္ဇဝိက္ကယီ။

* ၅၁၂။

မာယာ တု သမ္ဗရီ မာယာ၊ ကာရော တု ဣန္ဒဇာလိကော။

* ၅၁၃။

ဩရဗ္ဘိကာ သူကရိကာ၊ မာဂဝိကာ တေ စ သာကုဏိကာ။

ဟန္တွာ ဇီဝန္တေ’ဠက၊ သူကရ၊ မိဂ၊ ပက္ခိနော ကမတော။

* ၅၁၄။

ဝါဂုရိကော ဇာလိကော ထ၊

ဘာရဝါဟော တု ဘာရိကော။

ဝေတနိကော တု ဘတကော၊ ကမ္မကရော ထ ကိံ ကရော။

ဒါသော စ စေဋကော ပေဿော၊ ဘစ္စော စ ပရိစာရိကော။

* ၅၁၅။

အန္တောဇာတော ဓနက္ကီတော၊ ဒါသဗျော’ပဂတော သယံ။

ဒါသာ ကရမရာနီတော၊ စ္စေဝံ တေ စတုဓာ သိယုံ။

* ၅၁၆။

အဒါသော တု ဘုဇိဿော ထ၊

နီစော ဇမ္မော နိဟီနကော။

နိက္ကောသဇ္ဇော အကိလာသု၊

မန္ဒော တု အလသော ပျထ။

* ၅၁၇။

သပါကော စေဝ စဏ္ဍာလော၊ မာတင်္ဂေါ သပစော ဘဝေ။

တဗ္ဘေဒါ မိလက္ခဇာတီ၊ ကိရာတ၊ သဝရာဒယော။

* ၅၁၈။

နေသာဒေါ လုဒ္ဒကော ဗျာဓော၊

မိဂဝေါ တု မိဂဗျဓော။

သာရမေယျော စ သုနခေါ၊ သုနော သောဏော စ ကုက္ကုရော။

* ၅၁၉။

သွာနော သုဝါနော သာဠူရော၊

သူနော သာနော စ သာ ပုမေ။

ဥမ္မတ္တာဒိတ မာပန္နော၊ အဠက္ကောတိ သုနော မတော။

* ၅၂၀။

သာဗန္ဓနံ တု ဂဒ္ဒူလော၊ ဒီပကော တု စ စေတကော။

ဗန္ဓနံ ဂဏ္ဌိ ပါသော ထ၊ ဝါဂုရာ [ဝါကရာ (သီ. ဋီ.)] မိဂဗန္ဓနီ။

* ၅၂၁။

ထိယံ ကုဝေဏီ ကုမီနံ၊ အာနယော ဇာလ မုစ္စတေ။

အာဃာတနံ ဝဓဋ္ဌာနံ၊ သူနာ တု အဓိကောဋ္ဋနံ။

---

(ဓာန်၊၄၄။)

* ၅၂၂။

တက္ကရော မောသကော စောရော၊

ထေနေ’ကာဂါရိကော သမာ။

ထေယျဉ္စ စောရိကာ မောသော၊

ဝေမော ဝါယနဒဏ္ဍကော။

* ၅၂၃။

သုတ္တံ တန္တု ပုမေ တန္တံ၊ ပေါတ္ထံ လေပျာဒိကမ္မနိ။

ပဉ္စာလိကာ ပေါတ္ထလိကာ၊ ဝတ္ထဒန္တာဒိနိမ္မိတာ။

* ၅၂၄။

ဥဂ္ဃာဋနံ ဃဋီယန္တံ၊ ကူပမ္ဗုဗ္ဗာဟနံ ဘဝေ။

မဉ္ဇူသာ ပေဠာ ပိဋကော၊ တွိတ္ထိယံ ပစ္ဆိ ပေဋကော။

* ၅၂၅။

ဗျာဘင်္ဂီ တွိတ္ထိယံ ကာဇော၊ သိက္ကာ တွတြာ’ဝလမ္ဗနံ။

ဥပါဟနော ဝါ ပါဒု’တ္ထီ၊ တဗ္ဘေဒါ ပါဒုကာ ပျထ။

* ၅၂၆။

ဝရတ္တာ ဝဒ္ဓိကာ နဒ္ဓိ၊ ဘသ္တာ စမ္မပသိဗ္ဗကံ။

သောဏ္ဏာဒျာဝတ္တနီ မူသာ၊

ထ ကူဋံ ဝါ အယောဃနော။

* ၅၂၇။

ကမ္မာရဘဏ္ဍာ သဏ္ဍာသော၊ မုဋ္ဌျာ’ဓိကရဏီတ္ထီယံ။

တဗ္ဘသ္တာ ဂဂ္ဂရီ နာရီ၊ သတ္တံ တု ပိပ္ဖလံ ဘဝေ။

* ၅၂၈။

သာဏော တု နိကသော ဝုတ္တော၊

အာရာ တု သူစိဝိဇ္ဈနံ။

ခရော စ ကကစော နိတ္ထီ၊ သိပ္ပံ ကမ္မံ ကလာဒိကံ။

* ၅၂၉။

ပဋိမာ ပဋိဗိမ္ဗဉ္စ၊ ဗိမ္ဗော ပဋိနိဓီရိတော။

တီသု သမော ပဋိဘာဂေါ၊ သန္နိကာသော သရိက္ခကော။

* ၅၃၀။

သမာနော သဒိသော တုလျော၊

သင်္ကာသော သန္နိဘော နိဘော။

ဩပမ္မ မုပမာနံ စု၊ ပမာ ဘတိ တု နာရိယံ။

* ၅၃၁။

နိဗ္ဗေသော ဝေတနံ မူလျံ၊ ဇူတံ တွနိတ္ထိ ကေတဝံ။

ဓုတ္တော’က္ခဓုတ္တော ကိတဝေါ၊ ဇူတကာရ၊ က္ခဒေဝိနော။

* ၅၃၂။

ပါဋိဘောဂေါတု ပဋိဘူ၊ အက္ခော တု ပါသကော ဘဝေ။

ပုမေဝါ’ ဋ္ဌပဒံ [အဋ္ဌာပဒံ (ဋီ. သီ.)] သာရိ၊ ဖလကေ ထ ပဏော၊ ဗ္ဘုတော။

---

(ဓာန်၊၄၅။)

* ၅၃၃။

ကိဏ္ဏံ တု မဒိရာဗီဇေ၊ မဓု မဓွာသဝေ မတံ။

မဒိရာ ဝါရုဏီ မဇ္ဇံ၊ သုရာ ဘဝေါ တု မေရယံ။

* ၅၃၄။

သရကော စသကော နိတ္ထီ၊ အာပါနံ ပါနမဏ္ဍလံ။

* ၅၃၅။

ယေ’တြ ဘူရိပ္ပယောဂတ္တာ၊ ယောဂိကေကသ္မိ မီရိတာ။

လိင်္ဂန္တရေပိ တေ ဉေယျာ၊ တဒ္ဓမ္မတ္တာ’ညဝုတ္တိယန္တိ။

ဣတိ သုဒ္ဒဝဂ္ဂေါ။

စတုဗ္ဗဏ္ဏဝဂ္ဂေါ နိဋ္ဌိတော။

၅. အရညဝဂ္ဂ

* ၅၃၆။

အရညံ ကာနနံ ဒါယော၊ ဂဟနံ ဝိပိနံ ဝနံ။

အဋဝီ’တ္ထီ မဟာရညံ၊ တွ၊ ရညာနီတ္ထိယံ ဘဝေ။

* ၅၃၇။

နဂရာ နာတိဒူရသ္မိံ၊ သန္တေဟိ ယော ဘိရောပိတော။

တရုသဏ္ဍော သ အာရာမော၊ တထော ပဝန မုစ္စတေ။

* ၅၃၈။

သဗ္ဗသာဓာရဏာ’ရညံ၊ ရည မုယျာန မုစ္စတေ။

ဉေယျံ တဒေဝ ပမဒ၊ ဝန မန္တေပုရောစိတံ။

* ၅၃၉။

ပန္တိ ဝီထျာ’ဝလိ သေဏီ၊ ပါဠိ လေခါ တု ရာဇိ စ။

ပါဒပေါ ဝိဋပီ ရုက္ခော၊ အဂေါ သာလော မဟီရုဟော။

* ၅၄၀။

ဒုမော တရု ကုဇော သာခီ၊ ဂစ္ဆော တု ခုဒ္ဒပါဒပေါ။

ဖလန္တိ ယေ ဝိနာ ပုပ္ဖံ၊ တေ ဝုစ္စန္တိ ဝနပ္ပတီ။

* ၅၄၁။

ဖလပါကာဝသာနေ ယော၊

မရတျော သဓိ သာ ဘဝေ။

တီသု ဝဉ္စျာ’ဖလာ စာထ၊ ဖလိနော ဖလဝါ ဖလီ။

* ၅၄၂။

သမ္ဖုလ္လိတော တု ဝိကစော၊ ဖုလ္လော ဝိကသိတော တိသု။

သိရော’ဂ္ဂံ သိခရော နိတ္ထီ၊ သာခါ တု ကထိတာ လတာ။

* ၅၄၃။

ဒလံ ပလာသံ ဆဒနံ၊ ပဏ္ဏံ ပတ္တံ ဆဒေါ ပျထ။

ပလ္လဝေါ ဝါ ကိသလယံ၊ နဝုဗ္ဘိန္နေ တု အင်္ကုရော။

* ၅၄၄။

မကုလံ ဝါ ကုဋုမလော၊ ခါရကော တု စ ဇာလကံ။

ကလိကာ ကောရကော နိတ္ထီ၊ ဝဏ္ဋံ ပုပ္ဖာဒိဗန္ဓနံ။

---

(ဓာန်၊၄၆။)

* ၅၄၅။

ပသဝေါ ကုသုမံ ပုပ္ဖံ၊ ပရာဂေါ ပုပ္ဖဇော ရဇော။

မကရန္ဒော မဓု မတံ၊ ထဝကော တု စ ဂေါစ္ဆကော။

* ၅၄၆။

ဖလေ တွာ’မေ သလာဋု’တ္တော၊

ဖလံ တု ပက္က မုစ္စတေ။

စမ္ပက’မ္ဗာဒိကုသုမ၊ ဖလနာမံ နပုံသကေ။

* ၅၄၇။

မလ္လိကာဒီ တု ကုသုမေ၊ သလိင်္ဂါ ဝီဟယော ဖလေ။

ဇမ္ဗူ’တ္ထီ ဇမ္ဗဝံ ဇမ္ဗူ၊ ဝိဋပေါ ဝိဋဘီ’တ္ထိယံ။

* ၅၄၈။

မူလ မာရဗ္ဘ သာခန္တော၊ ခန္ဓော ဘာဂေါ တရုဿ ထ။

ကောဋရော နိတ္ထိယံ ရုက္ခ၊ စ္ဆိဒ္ဒေ ကဋ္ဌံ တု ဒါရု စ။

* ၅၄၉။

ဗုန္ဒော မူလဉ္စ ပါဒေါ ထ၊ သင်္ကု’တ္တော ခါဏုနိတ္ထိယံ။

ကရဟာဋံ တု ကန္ဒော ထ၊ ကဠီရော မတ္ထကော ဘဝေ။

* ၅၅၀။

ဝလ္လရီ မဉ္ဇရီ နာရီ၊ ဝလ္လီ တု ကထိတာ လတာ။

ထမ္ဘော ဂုမ္ဗော စ အက္ခန္ဓေ၊ လတာ ဝိရူ ပတာနိနီ။

* ၅၅၁။

အဿတ္ထော ဗောဓိ စ ဒွီသု၊ နိဂြောဓော တု ဝဋော ဘဝေ။

ကဗိဋ္ဌော စ ကပိတ္ထော စ၊ ယညင်္ဂေါ တု ဥဒုမ္ဗရော။

* ၅၅၂။

ကောဝိဠာရော ယုဂပတ္တော၊ ဥဒ္ဒါလော ဝါတဃာတကော။

ရာဇရုက္ခော ကတမာလီ၊ န္ဒီဝရော ဗျာဓိဃာတကော။

* ၅၅၃။

ဒန္တသဌော စ ဇမ္ဘီရော၊ ဝရဏော တု ကရေရိ စ။

ကိံ သုကော ပါလိဘဒ္ဒေါထ၊ ဝဉ္ဇုလော တု စ ဝေတသော။

* ၅၅၄။

အမ္ဗာဋကောပီတနကော၊ မဓုကော တု မဓုဒ္ဒုမော။

အထော ဂုဠဖလော ပီလု၊ သောဘဉ္ဇနော စ သိဂ္ဂု စ။

* ၅၅၅။

သတ္တပဏ္ဏိ ဆတ္တပဏ္ဏော၊ တိနိသော တွ တိမုတ္တကော။

ကိံ သုကော တု ပလာသော ထ၊

အရိဋ္ဌော ဖေနိလော ဘဝေ။

* ၅၅၆။

မာလူရ ဗေလုဝါဗိလ္လော၊ ပုန္နာဂေါ တု စ ကေသရော။

သာလဝေါ တု စ လောဒ္ဒေါ ထ၊ ပိယာလော သန္နကဒ္ဒု စ။

* ၅၅၇။

လိကောစကော တထာ’င်္ကောလော၊

အထ ဂုဂ္ဂုလု ကောသိကော။

အမ္ဗော စူတော သဟော တွေသော၊

သဟကာရော သုဂန္ဓဝါ။

---

(ဓာန်၊၄၇။)

* ၅၅၈။

ပုဏ္ဍရီကော စ သေတမ္ဗော၊ သေလု တု ဗဟုဝါရကော။

သေပဏ္ဏီ ကာသ္မိရီ စာထ၊ ကောလီ စ ဗဒရီတ္ထိယံ။

* ၅၅၉။

ကောလံ စာနိတ္ထီ ဗဒရော၊ ပိလက္ခော ပိပ္ပလီ’တ္ထိယံ။

ပါဋလီ ကဏှဝန္တာ စ၊ သာဒုကဏ္ဋော ဝိကင်္ကတော။

* ၅၆၀။

တိန္ဒုကော ကာဠက္ခန္ဓော စ၊ တိမ္ဗရူသက တိမ္ဗရူ။

ဧရာဝတော တု နာရင်္ဂေါ၊ ကုလကော ကာကတိန္ဒုကော။

* ၅၆၁။

ကဒမ္ဗော ပိယကော နီပေါ၊ ဘလ္လီ ဘလ္လာတကော တိသု။

ဈာဝုကော ပိစုလော စာထ၊ တိလကော ခုရကော ဘဝေ။

* ၅၆၂။

စိဉ္စာ စ တိန္တိဏီ စာထ၊ ဂဒ္ဒဘဏ္ဍော ကပီတနော။

သာလော’ဿကဏ္ဏော သဇ္ဇော ထ၊

အဇ္ဇုနော ကကုဓော ဘဝေ။

* ၅၆၃။

နိစုလော မုစလိန္ဒော စ၊ နီပေါ ထ ပိယကော တထာ။

အသနော ပီတသာလော ထ၊

ဂေါလီသော ဈာဋလော ဘဝေ။

* ၅၆၄။

ခီရိကာ ရာဇာယတနံ၊ ကုမ္ဘီ ကုမုဒိကာ ဘဝေ။

ယူပေါ [ပူဂေါ (က.)] တု ကမုကော စာထ၊ ပဋ္ဋိ လာခါပသာဒနော။

* ၅၆၅။

ဣင်္ဂုဒီ တာပသတရု၊ ဘုဇပတ္တော တု အာဘုဇီ။

ပိစ္ဆိလာ သိမ္ဗလီ ဒွီသု၊ ရောစနော ကောဋသိမ္ဗလီ။

* ၅၆၆။

ပကိရိယော ပူတိကော ထ၊ ရောဟီ ရောဟိတကော ဘဝေ။

ဧရဏ္ဍော တု စ အာမဏ္ဍော၊ အထ သတ္တုဖလာ သမီ။

* ၅၆၇။

နတ္တမာလော ကရဉ္ဇော ထ၊ ခဒိရော ဒန္တဓာဝနော။

သောမဝက္ကော တု ကဒရော၊ သလ္လောတု မဒနော ဘဝေ။

* ၅၆၈။

အထာပိ ဣန္ဒသာလော စ၊ သလ္လကီ ခါရကော သိယာ။

ဒေဝဒါရု ဘဒ္ဒဒါရု၊ စမ္ပေယျော တု စ စမ္ပကော။

* ၅၆၉။

ပနသော ကဏ္ဋကိဖလော၊ အဘယာ တု ဟရီတကီ။

အက္ခော ဝိဘီတကော တီသု၊ အမတာ’မလကီ တိသု။

* ၅၇၀။

လဗုဇော လိကုစော စာထ၊ ကဏိကာရော ဒုမုပ္ပလော။

နိမ္ဗော’ရိဋ္ဌော ပုစိမန္ဒော၊ ကရကော တု စ ဒါဠိမော။

---

(ဓာန်၊၄၈။)

* ၅၇၁။

သရလော ပူတိကဋ္ဌဉ္စ၊ ကပိလာ တု စ သိံသပါ။

သာမာ ပိယင်္ဂု ကင်္ဂုပိ၊ သိရီသော တု စ ဘဏ္ဍိလော။

* ၅၇၂။

သောဏကော ဒီဃဝန္တော စ၊

ဝကုလော တု စ ကေသရော။

ကာကောဒုမ္ဗရိကာ ဖေဂ္ဂု၊ နာဂေါ တု နာဂမာလိကာ။

* ၅၇၃။

အသောကော ဝဉ္ဇုလော စာထ၊ တက္ကာရီ ဝေဇယန္တိကာ။

တာပိဉ္ဆော စ တမာလော ထ၊ ကုဋဇော ဂိရိမလ္လိကာ။

* ၅၇၄။

ဣန္ဒယဝေါ ဖလေ တဿာ၊ ဂ္ဂိမန္ထော ကဏိကာ ဘဝေ။

နိဂုဏ္ဌိ’တ္ထီ သိန္ဒုဝါရော၊ တိဏသုညံ [တိဏသူလံ (ဋီ.)] တု မလ္လိကာ။

* ၅၇၅။

သေဖာလိကာ နီလိကာ ထ၊ အပ္ဖောဋာ ဝနမလ္လိကာ။

ဗန္ဓုကော ဇယသုမနံ၊ ဘဏ္ဍိကော ဗန္ဓုဇီဝကော။

* ၅၇၆။

သုမနာ ဇာတိသုမနာ၊ မာလတီ ဇာတိ ဝဿိကီ။

ယူထိကာ မာဂဓီ စာထ၊ သတ္တလာ နဝမလ္လိကာ။

* ၅၇၇။

ဝါသန္တီ၊တ္ထီ အတိမုတ္တော၊ ကရဝီရော’ဿမာရကော။

မာတုလုင်္ဂေါ ဗီဇပူရော၊ ဥမ္မတ္တော တု စ မာတုလော။

* ၅၇၈။

ကရမန္ဒော သုသေနော စ၊ ကုန္ဒံ တု မာဃျ မုစ္စတေ။

ဒေဝတာသော [ဒေဝတာဍော (သီ. အမရကောသ)] တု ဇီမူတော၊

ထာ’မိလာတော မဟာသဟာ။

* ၅၇၉။

အထော သေရေယျကော ဒါသီ၊

ကိံ ကိရာတော ကုရဏ္ဋကော။

အဇ္ဇုကော သိတပဏ္ဏာသော၊ သမီရဏော ဖဏိဇ္ဇကော။

* ၅၈၀။

ဇပါ တု ဇယသုမနံ၊ ကရီရော ကကစော ဘဝေ။

ရုက္ခာဒနီ စ ဝန္ဒာကာ၊ စိတ္တကော တွ’ဂ္ဂိသညိတော။

* ၅၈၁။

အက္ကော ဝိကီရဏော တသ္မိံ၊

တွ’ ဠက္ကော သေတပုပ္ဖကေ။

ပူတိလတာ ဂဠောစီ စ၊ မုဗ္ဗာ မဓုရသာ ပျထ။

* ၅၈၂။

ကပိကစ္ဆု ဒုဖဿော ထ၊ မဉ္ဇိဋ္ဌာ ဝိကသာ ဘဝေ။

အမ္ဗဋ္ဌာ စ တထာ ပါဌာ၊ ကဋုကာ ကဋုရောဟိဏီ။

---

(ဓာန်၊၄၉။)

* ၅၈၃။

အပါမဂ္ဂေါ သေခရိကော၊ ပိပ္ပလီ မာဂဓီ မတာ။

ဂေါကဏ္ဋကော စ သိင်္ဃာဋော၊ ကောလဝလ္လီ’ဘပိပ္ပလီ။

* ၅၈၄။

ဂေါလောမီ တု ဝစာ စာထ၊ ဂိရိကဏျ’ပရာဇိတာ။

သီဟပုစ္ဆီ ပဉှိပဏ္ဏီ၊ သာလပဏ္ဏီ တု စ’တ္ထိရာ။ (စထိရာ)။

* ၅၈၅။

နိဒိဒ္ဓိကာ တု ဗျဂ္ဃီ စ၊ အထ နီလီ စ နီလိနီ။

ဇိဉ္ဇုကော [ဇိဉ္ဇုကာ (က.)] စေဝ ဂုဉ္ဇာ ထ၊ သတမူလီ သတာဝရီ။

* ၅၈၆။

မဟောသဓံ တွ’တိဝိသာ၊ ဗာကုစီ သောမဝလ္လိကာ။

ဒါဗ္ဗီ ဒါရုဟလိဒ္ဒါ ထ၊ ဗိဠင်္ဂံ စိတြတဏ္ဍုလာ။

* ၅၈၇။

နုဟီ စေဝ မဟာနာမော၊ မုဒ္ဒိကာ တု မဓုရသာ။

အထာပိ မဓုကံ ယဋ္ဌိ၊ မဓုကာမဓုယဋ္ဌိကာ [မဓုလဋ္ဌိကာ (သီ. ဋီ.)]။

* ၅၈၈။

ဝါတိင်္ဂဏော စ ဘဏ္ဍာကီ၊ ဝါတ္တာကီ ဗြဟတီ ပျထ။

နာဂဗလာ စေဝ ဈသာ၊ လာင်္ဂလီ တု စ သာရဒီ။

* ၅၈၉။

ရမ္ဘာ စ ကဒလီ မောစော၊ ကပ္ပာသီ ဗဒရာ ဘဝေ။

နာဂလတာ တု တမ္ဗူလီ၊ အဂ္ဂိဇာလာ တု ဓာတကီ။

* ၅၉၀။

တိဝုတာ တိပုဋာ စာထ၊ သာမာ ကာဠာ စ ကထျတေ။

အထော သိင်္ဂီ စ ဥသဘော၊ ရေဏုကာ ကပိဠာ ဘဝေ။

* ၅၉၁။

ဟိရိဝေရဉ္စ ဝါလဉ္စ၊ ရတ္တဖလာ တု ဗိမ္ဗိကာ။

သေလေယျ’ မသ္မပုပ္ဖဉ္စ၊ ဧလာ တု ဗဟုလာ ဘဝေ။

* ၅၉၂။

ကုဋ္ဌဉ္စ ဗျာဓိ ကထိတော၊ ဝါနေယျံ တု ကုဋန္နဋံ။

ဩသဓိ ဇာတိမတ္တမှိ၊ ဩသဓံ သဗ္ဗ’ မဇာတိယံ။

* ၅၉၃။

မူလံ ပတ္တံ ကဠီရ’ဂ္ဂံ၊ ကန္ဒံ မိဉ္ဇာ ဖလံ တထာ။

တစော ပုပ္ဖဉ္စ ဆတ္တန္တိ၊ သာကံ ဒသဝိဓံ မတံ။

* ၅၉၄။

ပပုန္နာဋော ဧဠဂလော၊

တဏ္ဍုလေယျော’ပ္ပမာရိသော။

ဇီဝန္တိ ဇီဝနီ စာထ၊ မဓုရကော စ ဇီဝကော။

* ၅၉၅။

မဟာကန္ဒော စ လသုဏံ၊ ပလဏ္ဍု တု သုကန္ဒကော။

ပဋောလော တိတ္တကော စာထ၊ ဘိင်္ဂရာဇော စ မက္ကဝေါ။

---

(ဓာန်၊၅၀။)

* ၅၉၆။

ပုနန္နဝါ သောထဃာတီ၊ ဝိတုန္နံ သုနိသဏ္ဏကံ။

ကာရဝေလ္လော တု သုသဝီ၊ တုမ္ဗျာ’လာဗု စ လာဗု သာ။

* ၅၉၇။

ဧဠာလုကဉ္စ ကက္ကာရီ၊ ကုမ္ဘဏ္ဍော တု စ ဝလ္လိဘော။

ဣန္ဒဝါရုဏီ ဝိသာလာ၊ ဝတ္ထုကံ ဝတ္ထုလေယျကော။

* ၅၉၈။

မူလကော နိတ္ထိယံ စုစ္စု၊ တမ္ဗကော စ ကလမ္ဗကော။

သာကဘေဒါ ကာသမဒ္ဒ၊ ဈဇ္ဈရီ ဖဂ္ဂဝါ’ဒယော။

* ၅၉၉။

သဒ္ဒလော စေဝ ဒုဗ္ဗာ စ၊ ဂေါလောမီ သာ သိတာ ဘဝေ။

ဂုန္ဒာ စ ဘဒ္ဒမုတ္တဉ္စ၊ ရသာလော တု’စ္ဆု ဝေဠု တု။

* ၆၀၀။

တစသာရော ဝေဏု ဝံသော၊ ပဗ္ဗံ တု ဖလု ဂဏ္ဌိသော။

ကီစကာ တေ သိယုံ ဝေဏူ၊ ယေ နဒန္တျာ’နိလဒ္ဓုတာ။

* ၆၀၁။

နဠော စ ဓမနော ပေါဋ၊ ဂလော တု ကာသ မိတ္ထိ န။

တေဇနော တု သရော၊ မူလံ၊ တူ’ သီရံ ဗီရဏဿ ဟိ။

* ၆၀၂။

ကုသော ဝရဟိသံ ဒဗ္ဗော၊ ဘူတိဏကံ တု ဘူတိဏံ။

ဃာသော တု ယဝသော စာထ၊

ပူဂေါ တု ကမုကော ဘဝေ။

* ၆၀၃။

တာလော ဝိဘေဒိကာ စာထ၊ ခဇ္ဇုရီ သိန္ဒိ ဝုစ္စတိ။

* ၆၀၄။

ဟိန္တာလ၊ တာလ၊ ခဇ္ဇူရီ၊ နာလိကေရာ တထေဝ စ။

တာလီ စ ကေတကီ နာရီ၊ ပူဂေါ စ တိဏပါဒပါတိ။

ဣတိ အရညဝဂ္ဂေါ။

၆. အရညာဒိဝဂ္ဂ

* ၆၀၅။

ပဗ္ဗတော ဂိရိ သေလော’ဒ္ဒိ၊ နဂါ’စလ၊ သိလုစ္စယာ။

သိခရီ ဘူဓရောထ ဗ္ဘ၊ ပါသာဏာ’သ္မော’ပလော သိလာ။

* ၆၀၆။

ဂိဇ္ဈကူဋော စ ဝေဘာရော၊ ဝေပုလ္လော’သိဂိလီ နဂါ။

ဝိဉ္ဈော ပဏ္ဍဝ ဝင်္ကာဒီ၊ ပုဗ္ဗသေလော တု စော’ဒယော။

မန္ဒရော ပရသေလော’တ္ထော၊ ဟိမဝါ တု ဟိမာစလော။

* ၆၀၇။

ဂန္ဓမာဒန ကေလာသ၊ စိတ္တကူဋ သုဒဿနာ။

ကာလကူဋော တိကူဋာ’ဿ၊ ပတ္ထော တု သာနု နိတ္ထိယံ။

---

(ဓာန်၊၅၁။)

* ၆၀၈။

ကူဋော ဝါ သိခရံ သိင်္ဂံ၊ ပပါတော တု တဋော ဘဝေ။

နိတမ္ဗော ကဋကော နိတ္ထီ၊ နိဇ္ဈရော ပသဝေါ’မ္ဗုနော။

* ၆၀၉။

ဒရီ’တ္ထီ ကန္ဒရော ဒွီသု၊ လေဏံ တု ဂဗ္ဘရံ ဂုဟာ။

သိလာပေါက္ခရဏီ သောဏ္ဍီ၊ ကုဉ္ဇံ နိကုဉ္ဇ မိတ္ထိ န။

* ၆၁၀။

ဥဒ္ဓ မဓိစ္စကာ သေလ၊ ဿာသန္နာ ဘူမျု ပစ္စကာ။

ပါဒေါ တု’ပန္တသေလော ထ၊

ဓာတု’တ္တော ဂေရိကာဒိကော။

ဣတိ သေလဝဂ္ဂေါ။

* ၆၁၁။

မိဂိန္ဒော ကေသရီ သီဟော၊ တရစ္ဆော တု မိဂါဒနော။

ဗျဂ္ဃော တု ပုဏ္ဍရီကော ထ၊ သဒ္ဒူလော ဒီပိနီ’ရိတော။

* ၆၁၂။

အစ္ဆော ဣက္ကော စ ဣဿော တု၊

ကာဠသီဟော ဣသော ပျထ။

ရောဟိသော ရောဟိတော စာထ၊

ဂေါကဏ္ဏော ဂဏိ ကဏ္ဋကာ။

* ၆၁၃။

ခဂ္ဂ ခဂ္ဂဝိသာဏာ တု၊ ပလာသာဒေါ စ ဂဏ္ဍကော။

ဗျဂ္ဃာဒိကေ ဝါဠမိဂေါ၊ သာပဒေါ ထ ပ္လဝင်္ဂမော။

* ၆၁၄။

မက္ကဋော ဝါနရော သာခါ၊ မိဂေါ ကပိ ဝလီမုခေါ။

ပလဝင်္ဂေါ၊ ကဏှတုဏ္ဍော၊

ဂေါနင်္ဂုလော [ဂေါနင်္ဂလော (ဋီ.)] တိ သော မတော။

* ၆၁၅။

သိင်္ဂါလော [သိဂါလော (သီ.)] ဇမ္ဗုကော ကောတ္ထု၊ ဘေရဝေါ စ သိဝါ ပျထ။

ဗိဠာရော ဗဗ္ဗု မဉ္ဇာရော၊ ကောကော တု စ ဝကော ဘဝေ။

* ၆၁၆။

မဟိံသော [မဟိသော (သီ.)] စ လုလာယော ထ၊

ဂဝဇော ဂဝယော သမာ။

သလ္လော တု သလ္လကော ထာ’ဿ၊

လောမမှိ သလလံ သလံ။

* ၆၁၇။

ဟရိဏော မိဂ သာရင်္ဂါ၊ မဂေါ အဇိနယောနိ စ။

သူကရော တု ဝရောဟော ထ၊

ပေလကော စ သသော ဘဝေ။

---

(ဓာန်၊၅၂။)

* ၆၁၈။

ဧဏေယျော ဧဏီမိဂေါ စ၊ ပမ္ပဋကော တု ပမ္ပကော။

ဝါတမိဂေါ တု စလနီ၊ မူသိကော တွာ’ခု ဥန္ဒုရော။

* ၆၁၉။

စမရော ပသဒေါ စေဝ၊ ကုရုင်္ဂေါ မိဂမာတုကာ။

ရုရု ရင်္ကု စ နီကော စ၊ သရဘာဒီ မိဂန္တရာ။

* ၆၂၀။

ပိယကော စမူရု ကဒလီ၊ မိဂါဒီ စမ္မယောနယော။

မိဂါ တု ပသဝေါ သီဟာ၊ ဒယော သဗ္ဗစတုပ္ပဒါ။

* ၆၂၁။

လူတာ တု လူတိကာ ဥဏ္ဏ၊ နာဘိ မက္ကဋကော သိယာ။

ဝိစ္ဆိကော တွာ’ဠိ ကထိတော၊ သရဗူ ဃရဂေါဠိကာ။

* ၆၂၂။

ဂေါဓာ ကုဏ္ဍော ပျထော ကဏ္ဏ၊ ဇလူကာ သတပဒျထ။

ကလန္ဒကော ကာဠကာ ထ၊ နကုလော မင်္ဂုသော ဘဝေ။

* ၆၂၃။

ကကဏ္ဋကော စ သရဋော၊ ကီဋော တု ပုဠဝေါ ကိမိ။

ပါဏကော စာပျထော ဥစ္စာ၊

လိင်္ဂေါ လောမသပါဏကော။

* ၆၂၄။

ဝိဟင်္ဂေါ ဝိဟဂေါ ပက္ခီ၊ ဝိဟင်္ဂမ ခဂ’ဏ္ဍဇာ။

သကုဏော စ သကုန္တော ဝိ၊ ပတင်္ဂေါ သကုဏီ ဒွိဇော။

* ၆၂၅။

ဝက္ကင်္ဂေါ ပတ္တယာနော စ၊ ပတန္တော နီဠဇော ဘဝေ။

တဗ္ဘေဒါ ဝဋ္ဋကာ ဇီဝ၊ ဉ္ဇီဝေါ စကောရ တိတ္တိရာ။

* ၆၂၆။

သာဠိကာ ကရဝီကော စ၊ ရဝိဟံသော ကုကုတ္ထကော။

ကာရဏ္ဍဝေါ စ ပိလဝေါ [ဗိလဝေါ (ဋီ.)]၊ ပေါက္ခရသာတကာ’ဒယော။

* ၆၂၇။

ပတတ္တံ ပေခုဏံ ပတ္တံ၊ ပက္ခော ပိဉ္ဆံ ဆဒေါ ဂရု။

အဏ္ဍံ တု ပက္ခိဗီဇေ ထ၊ နီဠော နိတ္ထီ ကုလာဝကံ။

* ၆၂၈။

သုပဏ္ဏမာတာ ဝိနတာ၊ မိထုနံ ထီပုမဒွယံ။

ယုဂံ တု ယုဂလံ ဒွန္ဒံ၊ ယမကံ ယမလံ ယမံ။

* ၆၂၉။

သမူဟော ဂဏ သံဃာတာ၊ သမုဒါယော စ သဉ္စယော။

သန္ဒောဟော နိဝဟော ဩဃော၊ ဝိသရော နိကရော စယော။

* ၆၃၀။

ကာယော ခန္ဓော သမုဒယော၊ ဃဋာ သမိတိ သံဟတိ။

ရာသိ ပုဉ္ဇော သမဝါယော၊ ပူဂေါ ဇာတံ ကဒမ္ဗကံ။

---

(ဓာန်၊၅၃။)

* ၆၃၁။

ဗျူဟော ဝိတာန ဂုမ္ဗာ စ၊ ကလာပေါ ဇာလ မဏ္ဍလံ။

သမာနာနံ ဂဏော ဝဂ္ဂေါ၊

သံဃော သတ္ထော တု ဇန္တုနံ။

* ၆၃၂။

သဇာတိကာနံ တု ကုလံ၊ နိကာယော တု သဓမ္မိနံ။

ယူထော နိတ္ထီ သဇာတိယ၊ တိရစ္ဆာနာနမုစ္စတေ။

* ၆၃၃။

သုပဏ္ဏော ဝေနတေယျော စ၊ ဂရုဠော ဝိဟဂါဓိပေါ။

ပရပုဋ္ဌော ပရဘတော၊ ကုဏာလော ကောကိလော ပိကော။

* ၆၃၄။

မောရော မယူရော ဝရဟီ၊ နီလဂီဝ သိခဏ္ဍိနော။

ကလာပီ စ သိခီ ကေကီ၊ စူဠာ တု စ သိခါ ဘဝေ။

* ၆၃၅။

သိခဏ္ဍော ဝရဟဉ္စေဝ၊ ကလာပေါ ပိဉ္ဆ မပျထ။

စန္ဒကော မေစကော စာထ၊ ဆပ္ပဒေါ စ မဓုဗ္ဗတော။

* ၆၃၆။

မဓုလီဟော မဓုကရော၊ မဓုပေါ ဘမရော အလိ။

ပါရာဝတော ကပေါတော စ၊ ကကုဋော စ ပါရေဝတော။

* ၆၃၇။

ဂိဇ္ဈော ဂဒ္ဓါထ ကုလလော၊ သေနော ဗျဂ္ဃီနသော ပျထ။

တဗ္ဘေဒါ သကုဏဂ္ဃိ’တ္ထီ၊ အာဋော ဒဗ္ဗိမုခဒွိဇော။

* ၆၃၈။

ဥဟုင်္ကာရော ဥလူကော စ၊ ကောသိယော ဝါယသာရိ စ။

ကာကော တွ’ရိဋ္ဌော ဓင်္ကော စ၊ ဗလိပုဋ္ဌော စ ဝါယသော။

* ၆၃၉။

ကာကောလော ဝနကာကော ထ၊

လာပေါ လဋုကိကာ ပျထ။

ဝါရဏော ဟတ္ထိလိင်္ဂေါ စ၊ ဟတ္ထိသောဏ္ဍဝိဟင်္ဂမော။

* ၆၄၀။

ဥက္ကုသော ကုရရော ကောလ၊ဋ္ဌိပက္ခိမှိ စ ကုက္ကုဟော။

သုဝေါ တု ကီရော စ သုကော၊ တမ္ဗစူဠော တု ကုက္ကုဋော။

* ၆၄၁။

ဝနကုက္ကုဋော စ နိဇ္ဇိဝှော၊ အထ ကောဉ္စာ စ ကုန္တနီ။

စက္ကဝါကော တု စက္ကဝှော၊ သာရင်္ဂေါတု စ စာတကော။

* ၆၄၂။

တုလိယော ပက္ခိဗိဠာလော၊

သတပတ္တော တု သာရသော။

ဗကော တု သုက္ကကာကောထ၊

ဗလာကာ ဝိသကဏ္ဌိကာ။

* ၆၄၃။

လောဟပိဋ္ဌော တထာ ကင်္ကော၊ ခဉ္ဇရီဋော တု ခဉ္ဇနော။

ကလဝိင်္ကော တု စာဋကော၊ ဒိန္ဒိဘော တု ကိကီ ဘဝေ။

---

(ဓာန်၊၅၄။)

* ၆၄၄။

ကာဒမ္ဗော ကာဠဟံသောထ၊ သကုန္တော ဘာသပက္ခိနိ။

ဓူမျာဋော တု ကလိင်္ဂေါထ၊

ဒါတျူဟော ကာဠကဏ္ဌကော။

* ၆၄၅။

ခုဒ္ဒါဒီ မက္ခိကာဘေဒါ၊ ဍံသော ပိင်္ဂလမက္ခိကာ။

အာသာဋိကာ မက္ခိကာဏ္ဍံ၊ ပတင်္ဂေါ သလဘော ဘဝေ။

* ၆၄၆။

သူစိမုခေါ စ မကသော၊ စီရီ တု ဈလ္လိကာ [ဈိလ္လိကာ (က.)] ထ စ။

ဇတုကာ ဇိနပတ္တာ ထ၊ ဟံသော သေတစ္ဆဒေါ ဘဝေ။

* ၆၄၇။

တေ ရာဇဟံသာ ရတ္တေဟိ၊ ပါဒတုဏ္ဍေဟိ ဘာသိတာ။

မလ္လိကာ’ချာ ဓတရဋ္ဌာ၊ မလီနေဟျ’သိတေဟိ စ။

* ၆၄၈။ တိရစ္ဆော တု တိရစ္ဆာနော, တိရစ္ဆာနဂတော သိယာတိ။

ဣတိ အရညာဒိဝဂ္ဂေါ။

၇. ပါတာလဝဂ္ဂ

* ၆၄၉။

အဓောဘုဝနံ ပါတာလံ၊ နာဂလောကော ရသာတလံ။

ရန္ဓံ တု ဝိဝရံ ဆိဒ္ဒံ၊ ကုဟရံ သုသိရံ ဗိလံ။

* ၆၅၀။

သုသိ’တ္ထီ ဆိဂ္ဂလံ သောဗ္ဘံ၊ သစ္ဆိဒ္ဒေ သုသိရံ တိသု။

ထိယံ တု ကာသု အာဝါဋော၊ သပ္ပရာဇာ တု ဝါသုကီ။

* ၆၅၁။

အနန္တော နာဂရာဇာ ထ၊ ဝါဟသော’ဇဂရော ဘဝေ။

ဂေါနသော တု တိလိစ္ဆော ထ၊

ဒေဍ္ဍုဘော ရာဇုလော ဘဝေ။

* ၆၅၂။

ကမ္ဗလော’ဿတရော မေရု၊ ပါဒေ နာဂါထ ဓမ္မနီ။

သိလုတ္တော ဃရသပ္ပော ထ၊ နီလသပ္ပော သိလာဘု စ။

* ၆၅၃။

အာသိဝိသော ဘုဇင်္ဂေါ’ဟိ၊ ဘုဇဂေါ စ ဘုဇင်္ဂမော။

သရီသပေါ ဖဏီ သပ္ပာ၊ လဂဒ္ဒါ ဘောဂိ ပန္နဂါ။

* ၆၅၄။

ဒွိဇိဝှော ဥရဂေါ ဝါဠော၊ ဒီဃော စ ဒီဃပိဋ္ဌိကော။

ပါဒူဒရော ဝိသဓရော၊ ဘောဂေါ တု ဖဏိနော တနု။

---

(ဓာန်၊၅၅။)

* ၆၅၅။

အာသီ’တ္ထီ သပ္ပဒါဌာ ထ၊ နိမ္မောကော ကဉ္စုကော သမာ။

ဝိသံ တွ’နိတ္ထီ ဂရဠံ၊ တဗ္ဘေဒါ ဝါ ဟလာဟလော။

* ၆၅၆။

ကာဠကူဋာဒယော စာထ၊ ဝါဠဂ္ဂါတျ’ဟိတုဏ္ဍိကော။

* ၆၅၇။

နိရယော ဒုဂ္ဂတိ’တ္ထီ စ၊ နရကော၊ သော မဟာ’ဋ္ဌဓာ။

သဉ္ဇီဝေါ ကာဠသုတ္တော စ၊ မဟာရောရုဝ ရောရုဝါ။

ပတာပနော အဝီစိ’တ္ထီ၊ သံဃာတော တာပနော ဣတိ။

* ၆၅၈။

ထိယံ ဝေတရဏီ လောဟ၊ ကုမ္ဘီ တတ္ထ ဇလာသယာ။

ကာရဏိကော နိရယပေါ၊

နေရယိကော တု နာရကော။

* ၆၅၉။

အဏ္ဏဝေါ သာဂရော သိန္ဓု၊ သမုဒ္ဒေါ ရတနာကရော။

ဇလနိဈု’ ဒဓိ၊ တဿ၊ ဘေဒါ ခီရဏ္ဏဝါဒယော။

* ၆၆၀။

ဝေလာ’ဿ ကူလဒေသော ထ၊

အာဝဋ္ဋော သလိလဗ္ဘမော။

ထေဝေါ တု ဗိန္ဒု ဖုသိတံ၊ ဘမော တု ဇလနိဂ္ဂမော။

* ၆၆၁။

အာပေါ ပယော ဇလံ ဝါရိ၊ ပါနီယံ သလိလံ ဒကံ။

အဏ္ဏော နီရံ ဝနံ ဝါလံ၊ တောယံ အမ္ဗု’ဒကဉ္စ ကံ။

* ၆၆၂။

တရင်္ဂေါ စ တထာ ဘင်္ဂေါ၊ ဦမိ ဝီစိ ပုမိတ္ထိယံ။

ဥလ္လောလော တု စ ကလ္လောလော၊ မဟာဝီစီသု ကထျတေ။

* ၆၆၃။

ဇမ္ဗာလော ကလလံ ပင်္ကော၊ စိက္ခလ္လံ ကဒ္ဒမော ပျထ။

ပုလိနံ ဝါလုကာ ဝဏ္ဏု၊ မရူ’ရု သိကတာ ဘဝေ။

* ၆၆၄။

အန္တရီပဉ္စ ဒီပေါ ဝါ၊ ဇလမဇ္ဈဂတံ ထလံ။

တီရံ တု ကူလံ ရောဓဉ္စ၊ ပတီရဉ္စ တဋံ တိသု။

* ၆၆၅။

ပါရံ ပရမှိ တီရမှိ၊ ဩရံ တွ’ပါရ မုစ္စတေ။

ဥဠုမ္ပော [ဥဠုပေါ (က.)] တု ပ္လဝေါ ကုလ္လော၊ တရော စ ပစ္စရီ’တ္ထိယံ။

* ၆၆၆။

တရဏီ တရိ နာဝါ စ၊ ကူပကော တု စ ကုမ္ဘကံ။

ပစ္ဆာဗန္ဓော ဂေါဋဝိသော၊ ကဏ္ဏဓာရော တု နာဝိကော။

* ၆၆၇။

အရိတ္တံ ကေနိပါတော ထ၊

ပေါတဝါဟော နိယာမကော။

သံယတ္တိကာ တု နာဝါယ၊ ဝါဏိဇ္ဇမာစရန္တိ ယေ။

---

(ဓာန်၊၅၆။)

* ၆၆၈။

နာဝါယ’င်္ဂါ’ လင်္ကာရော စ၊ ဝဋာကာရော ဖိယာဒယော။

ပေါတော ပဝဟနံ ဝုတ္တံ၊ ဒေါဏိ တွိ’တ္ထီ တထာ’မ္ဗဏံ [အမ္မဏံ (သီ.)]။

* ၆၆၉။

ဂဘီရ နိန္န ဂမ္ဘီရာ၊ ထော တ္တာနံ တဗ္ဗိပက္ခကေ။

အဂါဓံ တွ’တလမ္ဖဿံ၊ အနစ္ဆော ကလုသာ’ဝိလာ။

* ၆၇၀။

အစ္ဆော ပသန္နော ဝိမလော၊ ဂဘီရပ္ပဘုတီ တိသု။

ဓီဝရော မစ္ဆိကော မစ္ဆ၊ ဗန္ဓ ကေဝဋ္ဋ ဇာလိကာ။

* ၆၇၁။

မစ္ဆော မီနော ဇလစရော၊ ပုထုလောမော’မ္ဗုဇော ဈသော။

ရောဟိတော မဂ္ဂုရော သိင်္ဂီ၊ ဗလဇော မုဉ္ဇ ပါဝုသာ။

* ၆၇၂။

သတ္တဝင်္ကော သဝင်္ကော စ၊ နဠမီနော စ ဂဏ္ဍကော။

သုသုကာ သဖရီ မစ္ဆ၊ ပ္ပဘေဒါ မကရာဒယော။

* ၆၇၃။

မဟာမစ္ဆာ တိမိ တိမိ၊ င်္ဂလော တိမိရပိင်္ဂလော။

အာနန္ဒော တိမိနန္ဒော စ၊ အဇ္ဈာရောဟော မဟာတိမိ။

* ၆၇၄။

ပါသာဏမစ္ဆော ပါဌီနော၊ ဝင်္ကော တု ဗဠိသော ဘဝေ။

သုသုမာရော [သံသုမာရော (ဋီ.)၊ သုံသုမာရော (သီ.)] တု ကုမ္ဘီလော၊

နက္ကော ကုမ္မော တု ကစ္ဆပေါ။

* ၆၇၅။

ကက္ကဋကော ကုဠီရော စ၊ ဇလူကာ တု စ ရတ္တပါ။

မဏ္ဍူကော ဒဒ္ဒုရော ဘေကော။

ဂဏ္ဍုပ္ပာဒေါ မဟီလတာ။

* ၆၇၆။

အထ သိပ္ပီ စ သုတ္တိ’တ္ထီ၊ သင်္ခေ တု ကမ္ဗု’နိတ္ထိယံ။

ခုဒ္ဒသင်္ချေ သင်္ခနခေါ၊ ဇလသုတ္တိ စ သမ္ဗုကော။

* ၆၇၇။

ဇလာသယော ဇလာဓာရော၊ ဂမ္ဘီရော ရဟဒေါ ထ စ။

ဥဒပါနော ပါနကူပေါ၊ ခါတံ ပေါက္ခရဏီ’တ္ထိယံ။

* ၆၇၈။

တဠာကော စ သရော’နိတ္ထီ၊ ဝါပီ စ သရသီ’တ္ထိယံ။

ဒဟော’မ္ဗုဇာကရော စာထ၊ ပလ္လလံ ခုဒ္ဒကော သရော။

* ၆၇၉။

အနောတတ္တော တထာ ကဏ္ဏ၊ မုဏ္ဍော စ ရထကာရကော။

ဆဒ္ဒန္တော စ ကုဏာလော စ၊ ဝုတ္တာ မန္ဒာကိနီ’တ္ထိယံ။

* ၆၈၀။

တထာ သီဟပ္ပပါတောတိ၊ ဧတေ သတ္တ မဟာသရာ။

အာဟာဝေါ တု နိပါနဉ္စာ၊ ခါတံ တု ဒေဝခါတကံ။

---

(ဓာန်၊၅၇။)

* ၆၈၁။

သဝန္တီ နိန္နဂါ သိန္ဓု၊ သရိတာ အာပဂါ နဒီ။

ဘာဂီရထီ တု ဂင်္ဂါ ထ၊ သမ္ဘေဒေါ သိန္ဓုသင်္ဂမော။

* ၆၈၂။

ဂင်္ဂါ’စိရဝတီ စေဝ၊ ယမုနာ သရဘူ (သရဗူ [သရယူ (က.)] ) မဟီ။

ဣမာ မဟာနဒီ ပဉ္စ၊ စန္ဒဘာဂါ သရဿတီ [သရသွတီ (သီ. ဋီ.)]။

* ၆၈၃။

နေရဉ္ဇရာ စ ကာဝေရီ၊ နမ္မဒါဒီ စ နိန္နဂါ။

ဝါရိမဂ္ဂေါ ပဏာလီ’တ္ထီ [ပနာဠီ (ဋီ.)]၊ ပုမေ စန္ဒနိကာ တု စ။

* ၆၈၄။

ဇမ္ဗာလီ ဩလိဂလ္လော စ၊ ဂါမဒွါရမှိ ကာသုယံ။

သရောရုဟံ သတပတ္တံ၊ အရဝိန္ဒဉ္စ ဝါရိဇံ။

* ၆၈၅။

အနိတ္ထီ ပဒုမံ ပင်္ကေ၊ ရုဟံ နလိန ပေါက္ခရံ။

မုဠာလပုပ္ဖံ ကမလံ၊ ဘိသပုပ္ဖံ ကုသေသယံ။

* ၆၈၆။

ပုဏ္ဍရီကံ သိတံ၊ ရတ္တံ၊ ကောကနဒံ ကောကာသကော။

ကိဉ္ဇက္ခော ကေသရော နိတ္ထီ၊ ဒဏ္ဍော တု နာလ မုစ္စတေ။

* ၆၈၇။

ဘိသံ မုဠာလော နိတ္ထီ စ၊ ဗီဇကောသော တု ကဏ္ဏိကာ။

ပဒုမာဒိသမူဟေ တု၊ ဘဝေ သဏ္ဍမနိတ္ထိယံ။

* ၆၈၈။

ဥပ္ပလံ ကုဝလယဉ္စ၊ နီလံ တွိ’န္ဒီဝရံ သိယာ။

သေတေတု ကုမုဒဉ္စဿ၊ ကန္ဒော သာလူက မုစ္စတေ။

* ၆၈၉။

သောဂန္ဓိကံ ကလ္လဟာရံ၊ ဒကသီတလိကံ ပျထ။

သေဝါလော နီလိကာ စာထ၊ ဘိသိနျ’မ္ဗုဇိနီ ဘဝေ။

* ၆၉၀။ သေဝါလာ တိလဗီဇဉ္စ, သင်္ခေ စ ပဏကာဒယောတိ။

ဣတိ ပါတာလဝဂ္ဂေါ။

ဘူကဏ္ဍော ဒုတိယော။

၃. သာမညကဏ္ဍ

၁. ဝိသေသျာဓီနဝဂ္ဂ

* ၆၉၁။

ဝိသေသျာဓီန သံကိဏ္ဏာ၊ နေကတ္ထေဟျ’ဗျယေဟိ စ။

သာ’င်္ဂေါ’ပါင်္ဂေဟိ ကထျန္တေ၊ ကဏ္ဍေ ဝဂ္ဂါ ဣဟ က္ကမာ။

---

(ဓာန်၊၅၈။)

* ၆၉၂။

ဂုဏဒဗ္ဗကြိယာသဒ္ဒါ၊ သိယုံ သဗ္ဗေ ဝိသေသနာ။

ဝိသေသျာဓီနဘာဝေန၊ ဝိသေသျသမလိင်္ဂိနော။

* ၆၉၃။

သောဘနံ ရုစိရံ သာဓု၊ မနုညံ စာရု သုန္ဒရံ။

ဝဂ္ဂု မနောရမံ ကန္တံ၊ ဟာရီ မဉ္ဇု စ ပေသလံ။

* ၆၉၄။

ဘဒ္ဒံ ဝါမဉ္စ ကလျာဏံ၊ မနာပံ လဒ္ဓကံ သုဘံ။

ဥတ္တမော ပဝရော ဇေဋ္ဌော၊ ပမုခါ’နုတ္တရော ဝရော။

* ၆၉၅။

မုချော ပဓာနံ ပါမောက္ခော၊ ပရ မဂ္ဂည မုတ္တရံ။

ပဏီတံ ပရမံ သေယျော၊ ဂါမဏီ သေဋ္ဌ သတ္တမာ။

* ၆၉၆။

ဝိသိဋ္ဌာ’ရိယ နာဂေ’ကော၊ သဘဂ္ဂါ မောက္ခ ပုင်္ဂဝါ။

သီဟ ကုဉ္ဇရ သဒ္ဒူလာ၊ ဒီ တု သမာသဂါ ပုမေ။

* ၆၉၇။

စိတ္တ’က္ခိ ပီတိဇနန၊ မဗျာသေက မသေစနံ။

ဣဋ္ဌံ တု သုဘဂံ ဟဇ္ဇံ၊ ဒယိတံ ဝလ္လဘံ ပိယံ။

* ၆၉၈။

တုစ္ဆဉ္စ ရိတ္တကံ သုညံ၊ အထာ’သာရဉ္စ ဖေဂ္ဂု စ။

မေဇ္ဈံ ပူတံ ပဝိတ္တော ထ၊ အဝိရဒ္ဓါ အပဏ္ဏကော။

* ၆၉၉။

ဥက္ကဋ္ဌော စ ပကဋ္ဌော ထ၊ နိဟီနော ဟီန လာမကာ။

ပတိကိဋ္ဌံ နိကိဋ္ဌဉ္စ၊ ဣတ္တရာ’ဝဇ္ဇ ကုစ္ဆိတာ။

* ၇၀၀။

အဓမော’မက ဂါရယှာ၊

မလီနော တု မလီမသော။

ဗြဟာ မဟန္တံ ဝိပုလံ၊ ဝိသာလံ ပုထုလံ ပုထု။

* ၇၀၁။

ဂရု’ရု ဝိတ္ထိဏ္ဏ မထော၊ ပီနံ ထူလဉ္စ ပီဝရံ။

ထုလ္လဉ္စ ဝဌရဉ္စာ ထ၊ အာစိတံ နိစိတံ ဘဝေ။

* ၇၀၂။

သဗ္ဗံ သမတ္တ မခိလံ၊ နိခိလံ သကလံ တထာ။

နိဿေသံ ကသိဏာ’သေသံ၊ သမဂ္ဂဉ္စ အနူနကံ၊

* ၇၀၃။

ဘူရိ ပဟုတံ ပစုရံ၊ ဘိယျော သမ္ဗဟုလံ ဗဟု။

ယေဘုယျံ ဗဟုလံ စာထ၊ ဗာဟိရံ ပရိဗာဟိရံ။

* ၇၀၄။

ပရောသတာဒီ တေ၊ ယေသံ၊ ပရံ မတ္တံ သတာဒိတော။

ပရိတ္တံ သုခုမံ ခုဒ္ဒံ၊ ထောက မပ္ပံ ကိသံ တနု။

* ၇၀၅။

စုလ္လံ မတ္တေ’တ္ထိယံ လေသ၊

လဝါ’ဏုဟိ ကဏော ပုမေ။

သမီပံ နိကဋာ’သန္နော၊ ပကဋ္ဌာ’ဘျာသ သန္တိကံ။

---

(ဓာန်၊၅၉။)

* ၇၀၆။

အဝိဒူရဉ္စ သာမန္တံ၊ သန္နိကဋ္ဌ မုပန္တိကံ။

သကာသံ အန္တိကံ ဉတ္တံ၊ ဒူရံ တု ဝိပ္ပကဋ္ဌကံ။

* ၇၀၇။

နိရန္တရံ ဃနံ သန္ဒံ၊ ဝိရဠံ ပေလဝံ တနု။

အထာ ယတံ ဒီဃ မထော၊ နိတ္တလံ ဝဋ္ဋ ဝဋ္ဋုလံ။

* ၇၀၈။

ဥစ္စော တု ဥန္နတော တုင်္ဂေါ၊ ဥဒဂ္ဂေါ စေဝ ဥစ္ဆိတော။

နီစော ရဿော ဝါမနော ထ၊ အဇိမှော ပဂုဏော ဥဇု။

* ၇၀၉။

အဠာရံ ဝေလ္လိတံ ဝင်္ကံ၊ ကုဋိလံ ဇိမှ ကုဉ္စိတံ။

ဓုဝေါ စ သဿတော နိစ္စော၊ သဒါတန သနန္တနာ။

* ၇၁၀။

ကူဋဋ္ဌော တွေ’ကရူပေန၊ ကာလဗျာပီ ပကာသိတော။

လဟု သလ္လဟုကံ စာထ၊ သင်္ချာတံ ဂဏိတံ မိတံ။

* ၇၁၁။

တိဏှံ တု တိခိဏံ တိဗ္ဗံ၊ စဏ္ဍံ ဥဂ္ဂံ ခရံ ဘဝေ။

ဇင်္ဂမဉ္စ စရဉ္စေဝ၊ တသံ ဉေယျံ စရာစရံ။

* ၇၁၂။

ကမ္ပနံ စလနံ စာထ၊ အတိရိတ္တော တထာ’ဓိကော။

ထာဝရော ဇင်္ဂမာ အညော၊ လောလံ တု စဉ္စလံ စလံ။

* ၇၁၃။

တရလဉ္စ ပုရာဏော တု၊ ပုရာတန သနန္တနာ။

စိရန္တနော ထ ပစ္စဂ္ဃော၊ နူတနော’ဘိနဝေါ နဝေါ။

* ၇၁၄။

ကုရူရံ ကဌိနံ ဒဠှံ၊ နိဋ္ဌုရံ ကက္ခဠံ ဘဝေ။

အနိတ္ထျ’န္တော ပရိယန္တော၊ ပန္တော စ ပစ္ဆိမ’န္တိမာ။

* ၇၁၅။

ဇိဃညံ စရိမံ ပုဗ္ဗံ၊ တွ’ဂ္ဂံ ပဌမ မာဒိ သော။

ပတိရူပေါ နုစ္ဆဝိကံ၊ အထ မောဃံ နိရတ္ထကံ။

* ၇၁၆။

ဗျတ္တံ ပုဋ [ဖုဋံ (သီ.)] ဉ္စ မုဒု တု၊ သုကုမာရဉ္စ ကောမလံ။

ပစ္စက္ခံ ဣန္ဒြိယဂ္ဂယှံ၊ အပစ္စက္ခံ အတိန္ဒြိယံ။

* ၇၁၇။

ဣတရာ’ညတရော ဧကော၊ အညော ဗဟုဝိဓော တု စ။

နာနာရူပေါ စ ဝိဝိဓော၊ အဗာဓံ တု နိရဂ္ဂလံ။

* ၇၁၈။

အထေ’ကာကီ စ ဧကစ္စော၊ ဧကော စ ဧကကော သမာ။

သာဓာရဏဉ္စ သာမညံ၊ သမ္ဗာဓော တု စ သံကဋံ။

* ၇၁၉။

ဝါမံ ကဠေဝရံ သဗျံ။ အပသဗျံ တု ဒက္ခိဏံ။

ပဋိကူလံ တွ’ပသဗျံ၊ ဂဟနံ ကလိလံ သမာ။

---

(ဓာန်၊၆၀။)

* ၇၂၀။

ဥစ္စာဝစံ ဗဟုဘေဒံ၊ သံကိဏ္ဏာ’ ကိဏ္ဏ သံကုလာ။

ကတဟတ္ထော စ ကုသလော၊ ပဝီဏာ’ဘိည သိက္ခိတာ။

* ၇၂၁။

နိပုဏော စ ပဋု ဆေကော၊ စာတုရော ဒက္ခ ပေသလာ။

ဗာလော ဒတ္တု ဇလော မူဠှော၊ မန္ဒော ဝိညူ စ ဗာလိသော။

* ၇၂၂။

ပုညဝါ သုကတီ ဓညော၊ မဟုဿာဟော မဟာဓိတိ။

မဟာတဏှော မဟိစ္ဆော ထ၊ ဟဒယီ ဟဒယာလု စ။

* ၇၂၃။

သုမနော ဟဋ္ဌစိတ္တော ထ၊ ဒုမ္မနော ဝိမနော ပျထ။

ဝဒါနိယော ဝဒညူ စ၊ ဒါနသောဏ္ဍော ဗဟုပ္ပဒေါ။

* ၇၂၄။

ချာတော ပတီတော ပညာတော၊

ဘိညာတော ပထိတော သုတော၊

ဝိဿုတော ဝိဒိတော စေဝ၊ ပသိဒ္ဓါ ပါကဋော ဘဝေ။

* ၇၂၅။

ဣဿရော နာယကော သာမီ၊ ပတီ’သာ’ဓိပတီ ပဘူ။

အယျာ’ဓိပါ’ဓိဘူ နေတာ၊

ဣဗ္ဘော တွ’ဍ္ဎော တထာ ဓနီ။

* ၇၂၆။

ဒါနာရဟော ဒက္ခိဏေယျော၊ သိနိဒ္ဓါ တု စ ဝစ္ဆလော။

ပရိက္ခကော ကာရဏိကော၊

အာသတ္တော တု စ တပ္ပရော။

* ၇၂၇။

ကာရုဏိကော ဒယာလုပိ၊ သူရတော ဥဿုကော တု စ။

ဣဋ္ဌတ္ထေ ဥယျုတော စာထ၊ ဒီဃသုတ္တော စိရကြိယော။

* ၇၂၈။

ပရာဓီနော ပရာယတ္တော၊ အာယတ္တော တု စ သန္တကော။

ပရိဂ္ဂဟော အဓီနော စ၊ သစ္ဆန္ဒော တု စ သေရိနိ။

* ၇၂၉။

အနိသမ္မကာရီ ဇမ္မော၊ အတိတဏှော တု လောလုပေါ။

ဂိဒ္ဓါ တု လုဒ္ဓါ လောလော ထ၊

ကုဏ္ဌော မန္ဒော ကြိယာသု ဟိ။

* ၇၃၀။

ကာမယိတာ တု ကမိတာ၊ ကာမနော ကာမိ ကာမုကော။

သောဏ္ဍော မတ္တော ဝိဓေယျော တု၊

အဿဝေါ သုဗ္ဗစော သမာ။

---

(ဓာန်၊၆၁။)

* ၇၃၁။

ပဂဗ္ဘော ပဋိဘာယုတ္တော၊ ဘီသီလော ဘီရု ဘီရုကော။

အဓီရော [အဝီရော (ဋီ.)] ကာတရော စာထ၊

ဟိံသာသီလော စ ဃာတုကော။

* ၇၃၂။

ကောဓနော ရောသနော [ဒေါသနော (သီ.)] ကောပီ၊

စဏ္ဍော တွစ္စန္တကောဓနော။

သဟနော ခမနော ခန္တာ၊ တိတိက္ခဝါ စ ခန္တိမာ။

* ၇၃၃။

သဒ္ဓါယုတ္တော တု သဒ္ဓါလု၊ ဓဇဝါ တု ဓဇာလု စ [လဇ္ဇာလုတု စ လဇ္ဇဝါ (က.)]။

နိဒ္ဒါလု နိဒ္ဒါသီလော ထ၊ ဘဿရော ဘာသုရော ဘဝေ။

* ၇၃၄။

နဂ္ဂေါ ဒိဂမ္ဗရော’ဝတ္ထော၊ ဃသ္မရော တု စ ဘက္ခကော။

ဧဠမူဂေါ တု ဝတ္တုဉ္စ၊ သောတုံ စာ’ကုသလော ဘဝေ။

* ၇၃၅။

မုခရော ဒုမ္မုခါ’ဗဒ္ဓ၊ မုခါ စာပ္ပိယဝါဒိနိ။

ဝါစာလော ဗဟုဂါရယှ၊ ဝစေ ဝတ္တာ တု သော ဝဒေါ။

* ၇၃၆။

နိဇော သကော အတ္တနိယော၊

ဝိမှယော’စ္ဆရိယ’ဗ္ဘုတော။

ဝိဟတ္ထော ဗျာကုလော စာထ၊

အာတတာယီ ဝဓုဒျတော။

* ၇၃၇။

သီသစ္ဆေဇ္ဇမှိ ဝဇ္ဈော ထ၊ နိကတော စ သဌော’နုဇု။

သူစကော ပိသုဏော ကဏ္ဏေ၊

ဇပေါ ဓုတ္တော တု ဝဉ္စကော။

* ၇၃၈။

အနိသမ္မ ဟိ ယော ကိစ္စံ၊ ပုရိသော ဝဓဗန္ဓနာဒိ မာစရတိ။

အဝိနိစ္ဆိတကာရိတ္တာ၊ သောခလု စပလောတိ ဝိညေယျော။

* ၇၃၉။

ခုဒ္ဒေါ ကဒရိယော ထဒ္ဓ၊ မစ္ဆရီ ကပဏော ပျထ။

အကိဉ္စနော ဒလိဒ္ဒေါ စ၊ ဒီနော နိဒ္ဓန ဒုဂ္ဂတာ။

* ၇၄၀။

အသမ္ဘာဝိတသမ္ပတ္တံ၊ ကာကတာလိယ မုစ္စတေ။

အထ ယာစနကော အတ္ထီ၊ ယာစကော စ ဝနိဗ္ဗကော။

* ၇၄၁။

အဏ္ဍဇာ ပက္ခိသပ္ပာဒီ၊ နရာဒီ တု ဇလာဗုဇာ။

သေဒဇာ ကိမိဍံသာဒီ၊ ဒေဝါဒီ တွော’ ပပါတိကာ။

---

(ဓာန်၊၆၂။)

* ၇၄၂။

ဇဏ္ဏုတဂ္ဃော ဇဏ္ဏုမတ္တော၊ ကပ္ပော တု ကိဉ္စိဒူနကေ။

အန္တဂ္ဂတံ ဘု ပရိယာ၊ ပန္န မန္တောဂဓော’ဂဓာ။

* ၇၄၃။

ရာဓိတော သာဓိတော စာထ၊ နိပ္ပက္ကံ ကုထိတံ ဘဝေ။

အာပန္နော တွာ’ပဒပ္ပတ္တော၊ ဝိဝသော တွဝသော ဘဝေ။

* ၇၄၄။

နုဏ္ဏော နုတ္တာ’တ္တ၊ ခိတ္တာ စေ’၊ ရိတာ ဝိဒ္ဓါ ထ ကမ္ပိတော။

ဓူတော အာဓူတ စလိတာ၊ နိသိတံ တု စ တေဇိတံ။

* ၇၄၅။

ပတ္တဗ္ဗံ ဂမ္မ မာပဇ္ဇံ [အာသဇ္ဇံ (က.)]၊ ပက္ကံ ပရိဏတံ သမာ။

ဝေဌိတံ တု ဝလယိတံ၊ ရုဒ္ဓံ သံဝုတ မာဝုတံ။

* ၇၄၆။

ပရိက္ခိတ္တဉ္စ နိဝုတံ၊ ဝိသဋံ ဝိတ္ထတံ တတံ။

လိတ္တော တု ဒိဒ္ဓါ ဂူဠှော တု၊

ဂုတ္တော ပုဋ္ဌော တု ပေါသိတော။

* ၇၄၇။

လဇ္ဇိတော ဟီဠိတော စာထ၊ သနိတံ ဓနိတံ ပျထ။

သန္ဒာနိတော သိတော ဗဒ္ဓါ၊

ကီလိတော သံယတော ဘဝေ။

* ၇၄၈။

သိဒ္ဓေ နိပ္ဖန္န နိဗ္ဗတ္တာ၊ ဒါရိတေ ဘိန္န ဘေဒိတာ။

ဆန္နော တု ဆာဒိတေ စာထ၊ ဝိဒ္ဓေ ဆိဒ္ဒိတ ဝေဓိတာ။

* ၇၄၉။

အာဟဋော အာဘတာ’နီတာ၊

ဒန္တော တု ဒမိတော သိယာ။

သန္တော တု သမိတော စေဝ၊

ပုဏ္ဏော တု ပူရိတော ဘဝေ။

* ၇၅၀။

အပစာယိတော မဟိတော၊ ပူဇိတာ’ရဟိတော’စ္စိတော။

မာနိတော စာ’ပစိတော စ၊ တစ္ဆိတံ တုတနူကတေ။

* ၇၅၁။

သန္တတ္တော ဓူပိတော စောပ၊

စရိတော တု ဥပါသိတော။

ဘဋ္ဌံ တု ဂလိတံ ပန္နံ၊ စုတဉ္စ ဓံသိတံ ဘဝေ။

* ၇၅၂။

ပီတော ပမုဒိတော ဟဋ္ဌော၊

မတ္တော တုဋ္ဌော ထ ကန္တိတော။

သဉ္ဆိန္နော လူန ဒါတာ ထ၊

ပသတ္ထော ဝဏ္ဏိတော ထုတော။

---

(ဓာန်၊၆၃။)

* ၇၅၃။

တိန္တော’လ္လ’ဒ္ဒ ကိလိန္နော’န္နာ၊ မဂ္ဂိတံ ပရိယေသိတံ။

အနွေသိတံ ဂဝေသိတံ၊ လဒ္ဓံ တု ပတ္တ မုစ္စတေ။

* ၇၅၄။

ရက္ခိတံ ဂေါပိတံ ဂုတ္တံ၊ တာတံ ဂေါပါယိတာ’ဝိတာ။

ပါလိတံ အထ ဩဿဋ္ဌံ၊ စတ္တံ ဟီနံ သမုဇ္ဈိတံ။

* ၇၅၅။

ဘာသိတံ လပိတံ ဝုတ္တာ၊ ဘိဟိတာ’ချာတ ဇပ္ပိတာ။

ဥဒီရိတဉ္စ ကထိတံ၊ ဂဒိတံ ဘဏိတော’ဒိတာ။

* ၇၅၆။

အဝညာတာ’ဝဂဏိတာ၊ ပရိဘူတာ’ဝမာနိတာ။

ဇိဃစ္ဆိတော တု ခုဒိတော၊

ဆာတော စေဝ ဗုဘုက္ခိတော။

* ၇၅၇။

ဗုဒ္ဓံ ဉာတံ ပဋိပန္နံ၊ ဝိဒိတာ’ဝဂတံ မတံ။

ဂိလိတော ခါဒိတော ဘုတ္တော၊

ဘက္ခိတော’ဇ္ဈောဟဋာ’သိတာ။

ဣတိ ဝိသေသျာဓီနဝဂ္ဂေါ။

၂. သံကိဏ္ဏဝဂ္ဂ

* ၇၅၈။

ဉေယျံ လိင်္ဂ မိဟ ကွာပိ၊ ပစ္စယတ္ထဝသေန စ။

ကြိယာ တု ကိရိယံ ကမ္မံ၊

သန္တိ တု သမထော သမော။

ဒမော စ ဒမထော ဒန္တိ၊ ဝတ္တံ တု သုဒ္ဓကမ္မနိ။

အထော အာသင်္ဂဝစနံ၊ တီသု ဝုတ္တံ ပရာယဏံ။

* ၇၅၉။

ဘေဒေါ ဝိဒါရော ဖုဋနံ၊ တပ္ပနံ တု စ ပီဏနံ။

အက္ကောသန မဘိသင်္ဂေါ၊

ဘိက္ခာ တု ယာစနာ’တ္ထနာ။

* ၇၆၀။

နိန္နိမိတ္တံ ယဒိစ္ဆာ ထာ’၊ ပုစ္ဆနာ နန္ဒနာနိ စ။

သဘာဇန မထော ဉာယော၊

နယော ဖာတိ တု ဝုဒ္ဓိယံ။

* ၇၆၁။

ကိလမထော ကိလမနံ၊ ပသဝေါ တု ပသူတိယံ။

ဥက္ကံသော တွတိသယော ထ၊

ဇယော စ ဇယနံ ဇိတိ။

---

(ဓာန်၊၆၄။)

* ၇၆၂။

ဝသော ကန္တိ၊ ဗျဓော ဝေဓော၊

ဂဟော ဂါဟော ဝရော ဝုတိ။

ပစာ ပါကော ဟဝေါ ဟုတိ [ဟူဘိ (သီ. အမရကောသ)]၊

ဝေဒေါ ဝေဒန မိတ္ထိ ဝါ။

* ၇၆၃။

ဇီရဏံ ဇာနိ တာဏံ တု၊ ရက္ခဏံ ပမိတိပ္ပမာ။

သိလေသော သန္ဓိ စ ခယော၊

တွပစယော ရဝေါ ရဏော။

* ၇၆၄။

နိဂါဒေါ နိဂဒေါ မာဒေါ၊ မဒေါ ပသိတိ ဗန္ဓနံ။

အာကရော တွိင်္ဂိတံ ဣင်္ဂေါ၊

အထ’တ္ထာပဂမော ဗျယော။

* ၇၆၅။

အန္တရာယော စ ပစ္စူဟော၊

ဝိကာရော တု ဝိကတျ’ပိ။

ပဝိသိလေသော ဝိဓုရံ၊ ဥပဝေသနမာသနံ။

* ၇၆၆။

အဇ္ဈာသယော အဓိပ္ပာယော၊ အာသယော စာဘိသန္ဓိ စ။

ဘာဝေါ ဓိမုတ္တိ ဆန္ဒော ထ၊

ဒေါသော အာဒီနဝေါ ဘဝေ။

* ၇၆၇။

အာနိသံသော ဂုဏော စာထ၊

မဇ္ဈံ ဝေမဇ္ဈ မုစ္စတေ။

မဇ္ဈနှိကော [မဇ္ဈန္တိကော (ဋီ. သီ. ပီ.)] တု မဇ္ဈနှော၊ ဝေမတ္တံ တု စ နာနတာ။

* ၇၆၈။

ဝါ ဇာဂရော ဇာဂရိယံ [ဇာဂရိယော (ဋီ.)]၊ ပဝါဟော တု ပဝတ္တိ စ။

ဗျာသော ပပဉ္စော ဝိတ္ထာရော၊

ယာမော တု သံယမော ယမော။

* ၇၆၉။

သမ္ဗာဟနံ မဒ္ဒနဉ္စ၊ ပသရော တု ဝိသပ္ပနံ။

သန္ထဝေါ တု ပရိစယော၊

မေလကော သင်္ဂ သင်္ဂမာ။

* ၇၇၀။

သန္နိဓိ သန္နိကဋ္ဌမှိ၊ ဝိနာသော တု အဒဿနံ။

လဝေါ ဘိလာဝေါ လဝနံ၊

ပတ္ထာဝေါ’ဝသရော သမာ။

---

(ဓာန်၊၆၅။)

* ၇၇၁။

ဩသာနံ ပရိယောသာနံ၊ ဥက္ကံသော’တိသယော ဘဝေ [အဝသာနံ သမာပနံ (?)]။

သန္နိဝေသော စ သဏ္ဌာနံ၊ အထာ’ဗ္ဘန္တရ မန္တရံ။

* ၇၇၂။

ပါဋိဟီရံ ပါဋိဟေရံ၊ ပါဋိဟာရိယ မုစ္စတေ။

ကိစ္စံ တု ကရဏီယဉ္စ၊ သင်္ခါရော ဝါသနာ ဘဝေ။

* ၇၇၃။

ပဝနံ ပဝ နိပ္ပာဝါ၊ တသရော သုတ္တဝေဌနံ။

သင်္ကမော ဒုဂ္ဂသဉ္စာရော၊ ပက္ကမော တု ဥပက္ကမော။

* ၇၇၄။

ပါဌော နိပါဌော နိပဌော၊ ဝိစယော မဂ္ဂနာ ပုမေ။

အာလိင်္ဂနံ ပရိဿင်္ဂေါ၊ သိလေသော ဥပဂူဟနံ။

* ၇၇၅။

အာလောကနဉ္စ နိဇ္ဈာနံ၊ ဣက္ခဏံ ဒဿနံ ပျထ။

ပစ္စာဒေသော နိရသနံ၊ ပစ္စက္ခာနံ နိရာကတိ။

* ၇၇၆။

ဝိပလ္လာသော’ညထာဘာဝေါ၊ ဗျတ္တယော ဝိပရီယယော။

ဝိပရိယာသော’တိက္ကမော၊ တွ’တိပါတော ဥပစ္စယော။

ဣတိ သံကိဏ္ဏဝဂ္ဂေါ။

၃. အနေကတ္ထဝဂ္ဂ

* ၇၇၇။

အနေကတ္ထေ ပဝက္ခာမိ၊ ဂါထာ’ဒ္ဓပါဒတော ကမာ။

ဧတ္ထ လိင်္ဂဝိသေသတ္ထ၊ မေကဿ ပုနရုတ္တတာ။

* ၇၇၈။

သမယော သမဝါယေ စ၊ သမူဟေ ကာရဏေ ခဏေ။

ပဋိဝေဓေ သိယာ ကာလေ၊ ပဟာနေ လာဘ ဒိဋ္ဌိသု။

* ၇၇၉။

ဝဏ္ဏော သဏ္ဌာန ရူပေသု၊ ဇာတိ၊စ္ဆဝီသု ကာရဏေ။

ပမာဏေ စ ပသံသာယံ၊ အက္ခရေ စ ယသေ ဂုဏေ။

* ၇၈၀။

ဥဒ္ဒေသေ ပါတိမောက္ခဿ၊ ပဏ္ဏတ္တိယ မုပေါသထော။

ဥပဝါသေ စ အဋ္ဌင်္ဂေ၊ ဥပေါသထဒိနေ သိယာ။

* ၇၈၁။

ရထင်္ဂေ လက္ခဏေ ဓမ္မော၊ ရစက္ကေ’သွီရိယာပထေ။

စက္ကံ သမ္ပတ္တိယံ စက္က၊ ရတနေ မဏ္ဍလေ ဗလေ။

* ၇၈၂။

ကုလာလဘဏ္ဍေ အာဏာယ၊ မာယုဓေ ဒါန ရာသိသု။

---

(ဓာန်၊၆၆။)

* ၇၈၃။

ဒါနသ္မိံ ဗြဟ္မစရိယ၊ မပ္ပမညာသု သာသနေ။

မေထုနာရတိယံ ဝေယျာ၊ ဝစ္စေ သဒါရတုဋ္ဌိယံ။

ပဉ္စသီလာ’ရိယမဂ္ဂေါ၊ ပေါသထင်္ဂ ဓိတီသု [ဌိတီသု (က.)] စ။

* ၇၈၄။

ဓမ္မော သဘာဝေ ပရိယတ္တိပညာ၊

ဉာယေသု သစ္စပ္ပကတီသု ပုညေ။

ဉေယျေ ဂုဏာ’စာရ သမာဓိသူပိ၊

နိဿတ္တတာ’ပတ္တိသု ကာရဏာဒေါ။

* ၇၈၅။

အတ္ထော ပယောဇနေ သဒ္ဒါ၊ ဘိဓေယျေ ဝုဒ္ဓိယံ ဓနေ။

ဝတ္ထုမှိ ကာရဏေ နာသေ၊ ဟိတေ ပစ္ဆိမပဗ္ဗတေ။

* ၇၈၆။

ယေဘုယျတာ’ဗျာမိဿေသု၊ ဝိသံယောဂေ စ ကေဝလံ။

ဒဠှတ္ထေ’နတိရေကေ စာ၊ နဝသေသမှိ တံ တိသု။

* ၇၈၇။

ဂုဏော ပဋလ ရာသီသု၊ အာနိသံသေ စ ဗန္ဓနေ။

အပ္ပဓာနေ စ သီလာဒေါ၊ သုက္ကာဒိမှိ ဇိယာယ စ။

* ၇၈၈။

ရုက္ခာဒေါ ဝိဇ္ဇမာနေ စာ၊ ရဟန္တေ ခန္ဓပဉ္စကေ။

ဘူတော သတ္တ မဟာဘူတာ၊ မနုဿေသု န နာရိယံ။

* ၇၈၉။

ဝါစ္စလိင်္ဂေါ အတီတသ္မိံ၊ ဇာတေ ပတ္တေ သမေ မတော။

* ၇၉၀။

သုန္ဒရေ ဒဠှိကမ္မေ စာ၊ ယာစနေ သမ္ပဋိစ္ဆနေ။

သဇ္ဇနေ သမ္ပဟံသာယံ၊ သာဓွာ’ဘိဓေယျလိင်္ဂိကံ။

* ၇၉၁။

အန္တော နိတ္ထီ သမီပေ စာ၊ ဝသာနေ ပဒပူရဏေ။

ဒေဟာဝယဝေ ကောဋ္ဌာသေ၊ နာသ သီမာသု လာမကေ။

* ၇၉၂။

နိကာယေ သန္ဓိ သာမည၊ ပ္ပသူတီသု ကုလေ ဘဝေ။

ဝိသေသေ သုမနာယဉ္စ၊ ဇာတိ သင်္ခတလက္ခဏေ။

* ၇၉၃။

ဘဝဘေဒေ ပတိဋ္ဌာယံ၊ နိဋ္ဌာ’ဇ္ဈာသယဗုဒ္ဓိသု။

ဝါသဋ္ဌာနေ စ ဂမနေ၊ ဝိသဋတ္တေ [ဝိသရတ္တ ဝိသဒတ္တေ] ဂတီရိတာ။

* ၇၉၄။

ဖလေ ဝိပဿနာ ဒိဗ္ဗ၊ စက္ခု သဗ္ဗညုတာသု စ။

ပစ္စဝေက္ခဏဉာဏမှိ၊ မဂ္ဂေ စ ဉာဏဒဿနံ။

* ၇၉၅။

ကမ္မာရုဒ္ဓန အင်္ဂါရ၊ ကပလ္လ ဒီပိကာသု စ။

သုဝဏ္ဏကာရမူသာယံ၊ ဥက္ကာ ဝေဂေ စ ဝါယုနော။

---

(ဓာန်၊၆၇။)

* ၇၉၆။

ကေသောဟာရဏ၊ ဇီဝိတ၊ ဝုတ္တိသု ဝပနေ စ ဝါပသမကရဏေ။

ကထနေ ပမုတ္တဘာဝ၊ ဇ္ဈေနာဒေါ [ဇ္ဈေသနာဒေါ (သီ.)] ဝုတ္တ မပိ တီသု။

* ၇၉၇။

ဂမနေ ဝိဿုတေ စာ’ဝ၊ ဓာရိတော’ပစိတေသု စ။

အနုယောဂေ ကိလိန္နေ စ၊ သုတော’ ဘိဓေယျလိင်္ဂိကော။

* ၇၉၈။

သောတဝိညေယျ သတ္ထေသု၊ သုတံ ပုတ္တေ သုတော သိယာ။

* ၇၉၉။

ကပ္ပော ကာလေ ယုဂေ လေသေ၊ ပညတ္တိ ပရမာယုသု။

သဒိသေ တီသု သမဏ၊ ဝေါဟာရ ကပ္ပဗိန္ဒုသု။

သမန္တတ္ထေ’န္တရကပ္ပာ၊ ဒိကေ တက္ကေ ဝိဓိမှိ စ။

* ၈၀၀။

နိဗ္ဗာန မဂ္ဂ ဝိရတိ၊ သပထေ သစ္စဘာသိတေ။

တစ္ဆေ စာ’ရိယသစ္စမှိ၊ ဒိဋ္ဌိယံ သစ္စ မီရိတံ။

* ၈၀၁။

သဉ္ဇာတိဒေသေ ဟေတုမှိ၊ ဝါသဋ္ဌာနာ’ကရေသု စ။

သမောသရဏဋ္ဌာနေ စာ၊ ယတနံ ပဒပူရဏေ။

* ၈၀၂။

အန္တရံ မဇ္ဈ ဝတ္ထ’ည၊ ခဏော’ကာသော’ဓိ ဟေတုသု။

ဗျဝဓာနေ ဝိနဋ္ဌေ စ၊ ဘေဒေ ဆိဒ္ဒေ မနသျ’ပိ။

* ၈၀၃။

အာရောဂျေ ကုသလံ ဣဋ္ဌ၊ ဝိပါကေ ကုသလော တထာ။

အနဝဇ္ဇမှိ ဆေကေ စ၊ ကထိတော ဝါစ္စလိင်္ဂိကော။

* ၈၀၄။

ဒြဝါ’စာရေသု ဝီရိယေ၊ မဓုရာဒီသု ပါရဒေ။

သိင်္ဂါရာဒေါ ဓာတုဘေဒေ၊ ကိစ္စေ သမ္ပတ္တိယံ ရသော။

* ၈၀၅။

ဗောဓိ သဗ္ဗညုတညာဏေ၊ ရိယမဂ္ဂေ စ နာရိယံ။

ပညတ္တိယံ ပုမေ’ ဿတ္ထ၊ ရုက္ခမှိ ပုရိသိတ္ထိယံ။

* ၈၀၆။

သေဝိတော ယေန ယော နိစ္စံ၊ တတ္ထာပိ ဝိသယော သိယာ။

ရူပါဒိကေ ဇနပဒေ၊ တထာ ဒေသေ စ ဂေါစရေ။

* ၈၀၇။

ဘာဝေါ ပဒတ္ထေ သတ္တာယ၊ မဓိပ္ပာယ ကြိယာသု စ။

သဘာဝသ္မိဉ္စ လီလာယံ၊ ပုရိသိ’တ္ထိန္ဒြိယေသု စ။

* ၈၀၈။

သော ဗန္ဓဝေ’တ္တနိ စ သံ၊ သော ဓနသ္မိ မနိတ္ထိယံ။

သာ ပုမေ သုနခေ ဝုတ္တော၊ တ္တနိယေ သော တိလိင်္ဂိကော။

* ၈၀၉။

သုဝဏ္ဏံ ကနကေ ဝုတ္တံ၊ သုဝဏ္ဏော ဂရုဠေ တထာ။

ပဉ္စဓရဏမတ္တေ စ၊ ဆဝိ သမ္ပတ္တိယမ္ပိ စ။

---

(ဓာန်၊၆၈။)

* ၈၁၀။

ဝရော ဒေဝါဒိကာ [ဒေဝါဒိတော (သီ.)] ဣဋ္ဌေ၊ ဇာမာတရိ ပတိမှိ စ၊

ဥတ္တမေ ဝါစ္စလိင်္ဂေါ သော၊ ဝရံ မန္ဒပ္ပိယေ ဗျယံ။

* ၈၁၁။

မကုလေ ဓနရာသိမှိ၊ သိယာ ကောသ မနိတ္ထိယံ။

နေတ္တိံသာဒိ ပိဓာနေ စ၊ ဓနုပဉ္စသတေပိ စ။

* ၈၁၂။

ပိတာမဟေ ဇိနေ သေဋ္ဌေ၊ ဗြာဟ္မဏေ စ ပိတူသွပိ။

ဗြဟ္မာ ဝုတ္တော တထာ ဗြဟ္မံ၊ ဝေဒေ တပသိ ဝုစ္စတေ။

* ၈၁၃။

ဟတ္ထီနံ မဇ္ဈဗန္ဓေ စ၊ ပကောဋ္ဌေ ကစ္ဆဗန္ဓနေ။

မေခလာယံ မတာ ကစ္ဆာ၊ ကစ္ဆော ဝုတ္တော လတာယ စ။

* ၈၁၄။

တထေဝ ဗာဟုမူလမှိ၊ အနူပမှိ တိဏေပိ စ။

* ၈၁၅။

ပမာဏံ ဟေတု သတ္ထေသု၊ မာနေ စ သစ္စဝါဒိနိ။

ပမာတရိ စ နိစ္စမှိ၊ မရိယာဒါယ မုစ္စတေ။

* ၈၁၆။

သတ္တံ ဒဗ္ဗ’တ္တဘာဝေသု၊ ပါဏေသု စ ဗလေ၊ သိယာ [ဗလေ သက္ကာ (ဋီ.)]။

သတ္တာယဉ္စ၊ ဇနေသတ္တော၊ အာသတ္တေ သော တိလိင်္ဂိကော။

* ၈၁၇။

သေမှာဒေါ ရသရတ္တာဒေါ၊ မဟာဘူတေ ပဘာဒိကေ။

ဓာတု ဒွီသွ’ဋ္ဌိစက္ခာ’ဒိ၊ ဘွာ’ဒီသု ဂေရိကာဒိသု။

* ၈၁၈။

အမစ္စာဒေါ သဘာဝေ စ၊ ယောနိယံ ပကတီ’ရိတာ။

သတွာဒိသာမျာ’ဝတ္ထာယံ၊ ပစ္စယာ ပဌမေပိ စ။

* ၈၁၉။

ပဒံ ဌာနေ ပရိတ္တာဏေ၊ နိဗ္ဗာနမှိ စ ကာရဏေ။

သဒ္ဒေ ဝတ္ထုမှိ ကောဋ္ဌာသေ၊ ပါဒေ တလ္လဉ္ဆနေ မတံ။

* ၈၂၀။

လောဟမုဂ္ဂရ မေဃေသု၊ ဃနော၊ တာလာဒိကေ ဃနံ၊။

နိရန္တရေ စ ကဌိနေ၊ ဝါစ္စလိင်္ဂိက မုစ္စတေ။

* ၈၂၁။

ခုဒ္ဒါ စ မက္ခိကာဘေဒေ၊ မဓုမှိ ခုဒ္ဒ၊ မပ္ပကေ။

အဓမေ ကပဏေ စာပိ၊ ဗဟုမှိ စတူသု တ္တိသု။

* ၈၂၂။

တက္ကေ မရဏလိင်္ဂေ စ၊ အရိဋ္ဌံ အသုဘေ သုဘေ၊။

အရိဋ္ဌော အာသဝေ ကာကေ၊ နိမ္ဗေ စ ဖေနိလဒ္ဒုမေ။

* ၈၂၃။

မာနဘဏ္ဍေ ပလသတေ၊ သဒိသတ္တေ တုလာ တထာ။

ဂေဟာနံ ဒါရုဗန္ဓတ္ထ၊ ပီဌိကာယဉ္စ ဒိဿတိ။

---

(ဓာန်၊၆၉။)

* ၈၂၄။

မိတ္တကာရေ လဉ္ဇဒါနေ၊ ဗလေ ရာသိ ဝိပတ္တိသု [ဗလရာသိ ဝိပတ္တိသု (က.)]။

ယုဒ္ဓေ စေဝ ပဋိညာယံ၊ သင်္ဂရော သမ္ပကာသိတော။

* ၈၂၅။

ခန္ဓေ ဘဝေ နိမိတ္တမှိ၊ ရူပံ ဝဏ္ဏေ စ ပစ္စယေ။

သဘာဝ သဒ္ဒ သဏ္ဌာန၊ ရူပဇ္ဈာန ဝပူသု စ။

* ၈၂၆။

ဝတ္ထု ကိလေသ ကာမေသု၊ ဣစ္ဆာယံ မဒနေ ရတေ။

ကာမော၊ ကာမံ နိကာမေ၊ စာ၊ နုညာယံ ကာမ မဗျယံ။

* ၈၂၇။

ပေါက္ခရံ ပဒုမေ ဒေဟေ၊ ဝဇ္ဇဘဏ္ဍမုခေပိ စ။

သုန္ဒရတ္တေ စ သလိလေ၊ မာတင်္ဂကရကောဋိယံ။

* ၈၂၈။

ရာသိနိစ္စလ မာယာသု၊ ဒမ္ဘာ’သစ္စေသွ’ယောဃနေ။

ဂိရိသိင်္ဂမှိ သီရင်္ဂေ၊ ယန္တေ ကူဋ မနိတ္ထိယံ။

* ၈၂၉။

ဝုဒ္ဓိယံ ဇနနေ ကာမ၊ ဓာတွာဒီမှိ စ ပတ္တိယံ။

သတ္တာယဉ္စေဝ သံသာရေ၊ ဘဝေါ သဿတဒိဋ္ဌိယံ။

* ၈၃၀။

ပဋိဝါကျော’တ္တရာသင်္ဂေ၊ သု’တ္တရံ ဥတ္တရော တိသု။

သေဋ္ဌေ ဒိသာဒိဘေဒေ စ၊ ပရသ္မိ မုပရီ’ရိတော။

* ၈၃၁။

နေက္ခမ္မံ ပဌမဇ္ဈာနေ၊ ပဗ္ဗဇ္ဇာယံ ဝိမုတ္တိယံ။

ဝိပဿနာယ နိဿေသ၊ ကုသလမှိ စ ဒိဿတိ။

* ၈၃၂။

သင်္ခါရော သင်္ခတေ ပုညာ၊ ဘိသင်္ခါရာဒိကေပိ စ။

ပယောဂေ ကာယသင်္ခါရာ၊ ဒျ’ဘိသင်္ခရဏေသု စ။

* ၈၃၃။

အာရမ္မဏေ စ သံသဋ္ဌေ၊ ဝေါကိဏ္ဏေ နိဿယေ တထာ။

တဗ္ဘာဝေ စာပျဘိဓေယျ၊ လိင်္ဂေါ သဟဂတော ဘဝေ။

* ၈၃၄။

တီသု ဆန္နံ ပတိရူပေ၊ ဆာဒိတေ စ နိဂူဟိတေ။

နိဝါသန ပါရုပနေ၊ ရဟော ပညတ္တိယံ ပုမေ။

* ၈၃၅။

ဗုဒ္ဓသမန္တစက္ခူသု၊ စက္ခု ပညာယ မီရိတံ။

ဓမ္မစက္ခုမှိ စ မံသ၊ ဒိဗ္ဗစက္ခုဒွယေသု စ။

* ၈၃၆။

ဝါစ္စလိင်္ဂေါ အဘိက္ကန္တော၊ သုန္ဒရမှိ အဘိက္ကမေ။

အဘိရူပေ ခယေ ဝုတ္တော၊ တထေဝ’ဗ္ဘနုမောဒနေ။

* ၈၃၇။

ကာရဏေ ဒေသနာယဉ္စ၊ ဝါရေ ဝေဝစနေပိ စ။

ပါကာရသ္မိံ [ပကာရသ္မိံ (က.)] အဝသရေ၊ ပရိယာယော ကထီယတိ။

---

(ဓာန်၊၇၀။)

* ၈၃၈။

ဝိညာဏေ စိတ္တကမ္မေ စ၊ ဝိစိတ္တေ စိတ္တ မုစ္စတေ။

ပညတ္တိ စိတ္တမာသေသု၊ စိတ္တော၊ တာရန္တရေ ထိယံ။

* ၈၃၉။

သာမံ ဝေဒန္တရေ သာန္တွေ၊ တံ ပီတေ သာမလေ တိသု။

သယမတ္ထေ ဗျယံ သာမံ၊ သာမာ စ သာရိဝါယပိ။

* ၈၄၀။

ပုမေ အာစရိယာဒိမှိ၊ ဂရု [ဂုရု (က. ဋီ.)] မာတာပိတူသွပိ။

ဂရု တီသု မဟန္တေ စ၊ ဒုဇ္ဇရာ’လဟုကေသု စ။

* ၈၄၁။

အစ္စိတေ ဝိဇ္ဇမာနေ စ၊ ပသတ္ထေ သစ္စ သာဓုသု။

ခိန္နေ စ သမိတေ စေဝ၊ သန္တောဘိဓေယျလိင်္ဂိကောတိ။

ဣတိ ဂါထာအနေကတ္ထဝဂ္ဂေါ။

* ၈၄၂။

ဒေဝေါ ဝိသုဒ္ဓိဒေဝါ’ဒေါ၊ မေဃ မစ္စု နဘေသု စ။

အထောပိ တရုဏေ သတ္တေ၊ စောရေပိ မာဏဝေါ ဘဝေ။

* ၈၄၃။

အာဒိ ကောဋ္ဌာသ ကောဋီသု၊ ပုရတော’ဂ္ဂံဝရေ တီသု။

ပစ္စနီကော’တ္တမေသွ’ညေ၊ ပစ္ဆာဘာဂေ ပရော တိသု။

* ၈၄၄။

ယောနိ ကာမ သိရိ’ဿရေ၊ ဓမ္မု’ယျာမ ယသေ ဘဂံ။

ဥဠာရော တီသု ဝိပုလေ၊ သေဋ္ဌေ စ မဓုရေ သိယာ။

* ၈၄၅။

သမ္ပန္နော တီသု သမ္ပုဏ္ဏေ၊ မဓုရေ စ သမင်္ဂိနိ။

သင်္ခါ တု ဉာဏေ ကောဋ္ဌာသ၊ ပညတ္တိ ဂဏနေသု စ။

* ၈၄၆။

ဌာနံ ဣဿရိယော’ကာသ၊ ဟေတူသု ဌိတိယမ္ပိ စ။

အထော မာနေ ပကာရေစ၊ ကောဋ္ဌာသေစ ဝိဓော ဒွိသု။

* ၈၄၇။

ပညော’ပဝါသ ခန္တီသု၊ ဒမော ဣန္ဒြိယသံဝရေ။

ဉာဏေ စ သောမနဿေစ၊ ဝေဒေါ ဆန္ဒသိ စော’စ္စတေ။

* ၈၄၈။

ခန္ဓကောဋ္ဌာသ၊ ပဿာဝ၊ မဂ္ဂ၊ ဟေတူသု ယောနိ သာ [ယောနိ သော (ဋီ.)]။

ကာလေ တု ကူလေ သီမာယံ၊ ဝေလာ ရာသိမှိ ဘာသိတာ။

* ၈၄၉။

ဝေါဟာရော သဒ္ဒ ပဏ္ဏတ္တိ၊ ဝဏိဇ္ဇာ စေတနာသု စ။

နာဂေါ တု’ရဂ ဟတ္ထီသု၊ နာဂရုက္ခေ တထု’တ္တမေ။

* ၈၅၀။

သေဋ္ဌာ’သဟာယ သင်္ချာ’ည၊

တုလျေသွေ’ကောတိလိင်္ဂိကော။

ရာဂေ တု မာနသော စိတ္တာ၊ ရဟတ္တေသု စ မာနသံ။

---

(ဓာန်၊၇၁။)

* ၈၅၁။

မူလံ ဘေ သန္တိကေ မူလ၊ မူလေ ဟေတုမှိ ပါဘတေ။

ရူပါဒျံ’သ ပကဏ္ဍေသု၊ ခန္ဓော ရာသိ ဂုဏေသု စ။

* ၈၅၂။

အာရမ္ဘော ဝီရိယေ ကမ္မေ၊ အာဒိကမ္မေ ဝိကောပနေ။

အထော ဟဒယဝတ္ထုမှိ၊ စိတ္တေ စ ဟဒယံ ဥရေ။

* ၈၅၃။

ပစ္ဆာတာပါ’နုဗန္ဓေသု၊ ရာဂါဒေါ’နုသယော ဘဝေ။

မာတင်္ဂမုဒ္ဓပိဏ္ဍေ တု၊ ဃဋေ ကုမ္ဘော ဒသမ္ဗဏေ။

* ၈၅၄။

ပရိဝါရော ပရိဇနေ၊ ခဂ္ဂကောသေ ပရိစ္ဆဒေ။

အာလမ္ဗရော တု သာရမ္ဘေ၊ ဘေရိဘေဒေ စ ဒိဿတိ။

* ၈၅၅။

ခဏော ကာလဝိသေသေ စ၊ နိဗျာပါရဋ္ဌိတိမှိ စ။

ကုလေ တွ’ဘိဇနော ဝုတ္တော၊ ဥပ္ပတ္တိဘူမိယမ္ပိ စ။

* ၈၅၆။

အာဟာရော ကဗဠီကာရာ၊ ဟာရာဒီသု စ ကာရဏေ။

ဝိဿာသေ ယာစနာယဉ္စ၊ ပေမေ စ ပဏယော မတော။

* ၈၅၇။

ဏာဒေါ သဒ္ဓါ၊ စီဝရာဒိ၊ ဟေတွာ’ဓာရေသု ပစ္စယော။

ကီဠာ ဒိဗ္ဗဝိဟာရာဒေါ၊ ဝိဟာရော သုဂတာလယေ။

* ၈၅၈။

သမတ္ထနေ မတော စိတ္တေ၊ ကဂ္ဂတာယံ သမာဓိ စ။

ယောဂေါ သင်္ဂတိ [သင်္ဂေ စ (ဋီ.)] ကာမာဒေါ၊

ဈာနော’ပါယေသု ယုတ္တိယံ။

* ၈၅၉။

ဘောဂေါ သပ္ပဖဏ’င်္ဂေသု၊ ကောဋိလ္လေ ဘုဉ္ဇနေ ဓနေ။

ဘူမိဘာဂေ ကိလေသေ စ၊ မလေ စာ’င်္ဂဏ မုစ္စတေ။

* ၈၆၀။

ဓနာဒိဒပ္ပေ ပညာယ၊ အဘိမာနော မတော ထ စ။

အပဒေသော နိမိတ္တေ စ၊ ဆလေ စ ကထနေ မတော။

* ၈၆၁။

စိတ္တေ ကာယေ သဘာဝေ စ၊ သော အတ္တာ ပရမ’တ္တနိ။

အထ ဂုမ္ဗော စ ထမ္ဗသ္မိံ [ထမ္ဘသ္မိံ (ဋီ.)]၊ သမူဟေ ဗလသဇ္ဇနေ။

* ၈၆၂။

အန္တောဃရေ ကုသူလေ စ၊ ကောဋ္ဌော န္တောကုစ္ဆိယံ ပျထ။

သောပါနင်္ဂမှိ ဥဏှီသော၊ မကုဋေ သီသဝေဌနေ။

* ၈၆၃။

နိယျာသေ သေခရေ ဒွါရေ၊ နိယျူဟော နာဂဒန္တကေ။

အထော သိခဏ္ဍေ တူဏီရေ၊ ကလာပေါ နိကရေ မတော။

* ၈၆၄။

စူဠာ သံယတကေသေသု၊ မကုဋေ မောဠိ စ ဒွိသု။

သင်္ခေါ တွ’နိတ္ထိယံ ကမ္ဗု၊ နလာဋ’ဋ္ဌီသု [လလာဋဋ္ဌီသု (သီ.)] ဂေါပ္ဖကေ။

---

(ဓာန်၊၇၂။)

* ၈၆၅။

ပက္ခော ကာလေ ဗလေ သာဓျေ၊ သခီ ဝါဇေသု ပင်္ဂုလေ။

ဒေသေ’ဏ္ဏဝေ ပုမေ သိန္ဓု၊ သရိတာယံ သ နာရိယံ။

* ၈၆၆။

ဂဇေ ကရေဏု ပုရိသေ၊ သော ဟတ္ထိနိယ မိတ္ထိယံ။

ရတနေ ဝဇိရော နိတ္ထီ၊ မဏိဝေဓိ’န္ဒဟေတိသု။

* ၈၆၇။

ဝိသာဏံ တီသု မာတင်္ဂ၊ ဒန္တေ စ ပသုသိင်္ဂကေ။

ကောဋိယံ တု မတော ကောဏော၊ တထာ ဝါဒိတ္တဝါဒနေ။

* ၈၆၈။

ဝဏိပ္ပထေ စ နဂရေ၊ ဝေဒေ စ နိဂမော ထ စ။

ဝိဝါဒါဒေါ’ ဓိကရဏံ၊ သိယာ’ဓာရေ စ ကာရဏေ။

* ၈၆၉။

ပသုမှိ ဝသုဓာယဉ္စ၊ ဝါစာဒေါ ဂေါ ပုမိတ္ထိယံ။

ဟရိတေ တု သုဝဏ္ဏေ စ၊ ဝါသုဒေဝေ ဟရီ’ရိတော။

* ၈၇၀။

အာယတ္တေ ပရိဝါရေ စ၊ ဘရိယာယံ ပရိဂ္ဂဟော။

ဥတ္တံသော တွ’ ဝတံသော စ၊ ကဏ္ဏပူရေ စ သေခရေ။

* ၈၇၁။

ဝိဇ္ဇုယံ ဝဇိရေ စေဝါ၊ သနိ’တ္ထိပုရိသေ ပျထ။

ကောဏေ သင်္ချာဝိသေသသ္မိံ၊ ဥက္ကံသေ ကောဋိ နာရိယံ။

* ၈၇၂။

စူဠာ ဇာလာ ပဓာန’ဂ္ဂ၊ မောရစူဠာသု သာ သိခါ။

သပ္ပဒါဌာယ မာသီ’တ္ထီ၊ ဣဋ္ဌဿာ’သီသနာယပိ။

* ၈၇၃။

ဝသာ ဝိလီန တေလသ္မိံ၊ ဝသဂါ ဝဉ္ဈဂါဝိသု။

အဘိလာသေ တု ကိရဏေ၊ အဘိသင်္ဂေ ရုစိ’တ္ထိယံ။

* ၈၇၄။

သညာ သဉ္ဇာနနေ နာမေ၊ စေတနာယဉ္စ ဒိဿတိ။

အံသေ သိပ္ပေ ကလာ ကာလေ၊ ဘာဂေ စန္ဒဿ သောဠသေ။

* ၈၇၅။

ဗီဇကောသေ ဃရကူဋေ၊ ကဏ္ဏဘူသာယ ကဏ္ဏိကာ။

အာဂါမိကာလေ ဒီဃတ္တေ၊ ပဘာဝေ စ မတာ’ယတိ။

* ၈၇၆။

ဥဏ္ဏာ မေသာဒိလောမေ၊ စ၊ ဘူမဇ္ဈေ ရောမဓာတုယံ။

ဝါရုဏီ တွိတ္ထိယံ ဝုတ္တာ၊ နဋ္ဋကီ မဒိရာဒိသု။

* ၈၇၇။

ကြိယစိတ္တေ စ ကရဏေ၊ ကိရိယံ ကမ္မနိ ကြိယာ။

သုနိသာယံ တု ကညာယ၊ ဇာယာယ စ ဝဓူ မတာ။

* ၈၇၈။

ပမာဏိ’ဿရိယေ မတ္တာ၊ အက္ခရာဝယဝေ’ပ္ပကေ။

သုတ္တံ ပါဝစနေ ရိဋ္ဌေ [သိဒ္ဓေ (ဋီ.)]၊ တန္တေ တံ သုပိတေ တိသု။

---

(ဓာန်၊၇၃။)

* ၈၇၉။

ရာဇလိင်္ဂေါ’သဘင်္ဂေသု၊ ရုက္ခေ စ ကကုဒေါ [ကကုဓော (ဋီ. သီ.)] ပျထ။

နိမိတ္တ’က္ခရ သူပေသု၊ ဗျဉ္ဇနံ စိဟနေ ပဒေ။

* ၈၈၀။

ဝေါဟာရေ ဇေတု မိစ္ဆာယံ၊ ကီဠာဒေါ စာပိ ဒေဝနံ။

ဘရိယာယံ တု ကေဒါရေ၊ သရီရေ ခေတ္တ မီရိတံ။

* ၈၈၁။

သုဿူသာယဉ္စ ဝိညေယျံ၊ ဣဿာဘျာသေ ပျု’ပါသနံ။

သူလံ တု နိတ္ထိယံ ဟေတိ၊ ဘေဒေ သံကု ရုဇာသု စ။

* ၈၈၂။

တန္တိ ဝီဏာဂုဏေ၊ တန္တံ၊ မုချသိဒ္ဓန္တ တန္တုသု။

ရထာဒျင်္ဂေ တု စ ယုဂေါ၊ ကပ္ပမှိ ယုဂလေ ယုဂံ။

* ၈၈၃။

ဣတ္ထိပုပ္ဖေ စ ရေဏုမှိ၊ ရဇော ပကတိဇေ ဂုဏေ။

နျာသပ္ပဏေ တု ဒါနမှိ၊ နိယျာတန မုဒီရိတံ။

* ၈၈၄။

ဂရု’ပါယာ’ဝတာရေသု၊ တိတ္ထံ ပူတမ္ဗု ဒိဋ္ဌိသု။

ပဏ္ဍကေ ဇောတိ နက္ခတ္တ၊ ရံသီသွ’ဂ္ဂိမှိ ဇောတိ သော။

* ၈၈၅။

ကဏ္ဍော နိတ္ထီ သရေ ဒဏ္ဍေ၊ ဝဂ္ဂေ စာဝသရေ ပျထ။

ဥဒ္ဓံဗာဟုဒွယမာနေ [ဗာဟုဒွယုမ္မာနေ (သီ. က.)]၊ သူရတ္တေပိ စ ပေါရိသံ။

* ၈၈၆။

ဥဋ္ဌာနံ ပေါရိသေ’ဟာသု၊ နိသိန္နာဒျု’ဂ္ဂမေ ပျထ။

အနိဿယမဟီဘာဂေ၊ တွိ’ရီဏံ ဦသရေ သိယာ။

* ၈၈၇။

အာရာဓနံ သာဓနေ စ၊ ပတ္တိယံ ပရိတောသနေ။

ပဓာနေ တု စ သာနုမှိ၊ ဝိသာဏေ သိင်္ဂ မုစ္စတေ။

* ၈၈၈။

ဒိဋ္ဌာ’ဒိမဂ္ဂေ ဉာဏ’က္ခိ၊ က္ခဏ လဒ္ဓီသု ဒဿနံ။

ဟေမေ ပဉ္စသုဝဏ္ဏေ စ၊ နိက္ခော နိတ္ထီ ပသာဓနေ။

* ၈၈၉။

တိထိဘေဒေ စ သာခါဒိ၊ ဖဠုမှိ ပဗ္ဗ မုစ္စတေ။

နာဂလောကေ တု ပါတာလံ၊ ဘာသိတံ ဗလဝါမုခေ။

* ၈၉၀။

ကာမဇေ ကောပဇေ ဒေါသေ၊ ဗျသနဉ္စ ဝိပတ္တိယံ။

အထော’ပကရဏေ သိဒ္ဓိ၊ ကာရကေသု စ သာဓနံ။

* ၈၉၁။

တီသွီရိတော [တီသွိတော (ဋီ.)] ဒါနသီလေ၊ ဝဒညူ ဝဂ္ဂုဝါဒိနိ။

ပုရက္ခတော ဘိသိတ္တေ စ၊ ပူဇိတေ ပုရတောကတေ။

* ၈၉၂။

မန္ဒော ဘာဂျဝိဟီနေ စာ၊ ပ္ပကေ မူဠှာ’ပဋူသွပိ။

ဝုဒ္ဓိယုတ္တေ သမုန္နဒ္ဓေ၊ ဥပ္ပန္နေ ဥဿိတံ ဘဝေ။

---

(ဓာန်၊၇၄။)

* ၈၉၃။

ရထင်္ဂေ’က္ခော သုဝဏ္ဏသ္မိံ၊ ပါသကေ၊ အက္ခ မိန္ဒြိယေ။

သဿတေ စ ဓုဝေါ တီသု၊ ဓုဝံ တက္ကေ စ နိစ္ဆိတေ။

* ၈၉၄။

ဟရေ သိဝေါ၊ သိဝံ ဘဒ္ဒ၊ မောက္ခေသု၊ ဇမ္ဗုကေ သိဝါ။

သေနာယံ သတ္တိယဉ္စေဝ၊ ထူလတ္တေ စ ဗလံ ဘဝေ။

* ၈၉၅။

သင်္ချာ နရကဘေဒေသု၊ ပဒုမံ ဝါရိဇေ ပျထ။

ဒေဝဘေဒေ ဝသု ပုမေ၊ ပဏ္ဍကံ ရတနေ ဓနေ။

* ၈၉၆။

နိဗ္ဗာနံ အတ္ထဂမနေ၊ အပဝဂ္ဂေ သိယာ ထ စ။

သေတမ္ဗုဇေ ပုဏ္ဍရီကံ၊ ဗျဂ္ဃေ ရုက္ခန္တရေ ပုမေ။

* ၈၉၇။

ဥပဟာရေ ဗလိ ပုမေ၊ ကရသ္မိံစာ’သုရန္တရေ။

သုက္ကံ တု သမ္ဘဝေ၊ သုက္ကော၊ ဓဝလေ၊ ကုသလေ တိသု။

* ၈၉၈။

ဒါယော ဒါနေ ဝိဘတ္တဗ္ဗ၊ ဓနေ စ ပိတုနံ ဝနေ [ဓနေ (ဋီ.)]။

ပဘုတ္တာ’ယတ္တတာ’ယတ္တာ’၊ ဘိလာသေသု ဝသော ဘဝေ။

* ၈၉၉။

ပရိဘာသန မက္ကောသေ၊ နိယမေ ဘာသနေ ထ စ၊

ဓနမှိ သေဠနံ ယောဓ၊ သီဟနာဒမှိ ဒိဿတိ။

* ၉၀၀။

ပဘဝေါ ဇာတိဟေတုမှိ၊ ဌာနေ စာဒျုပလဒ္ဓိယံ။

အထော’တု နာရိပုပ္ဖသ္မိံ၊ ဟေမန္တာဒိမှိ စ ဒွိသု။

* ၉၀၁။

ကရဏံ သာဓကတမေ၊ ကြိယာ ဂတ္တေသု ဣန္ဒြိယေ။

တာတော [တာဠော (သီ.)] တု ကုဉ္စိကာယဉ္စ၊ တူရိယင်္ဂေ ဒုမန္တရေ။

* ၉၀၂။

ပုပ္ဖေ ဖလေ စ ပသဝေါ၊ ဥပ္ပာဒေ ဂဗ္ဘမောစနေ။

ဂါယနေ ဂါယကေ အဿေ၊ ဂန္ဓဗ္ဗော ဒေဝတာန္တရေ။

* ၉၀၃။

ဝိနာ ပုပ္ဖံ ဖလဂ္ဂါဟိ၊ ရုက္ခေ ဝနပ္ပတိ။

အာဟတေ ဟေမရဇတေ၊ ရူပိယံ ရဇတေပိ စ။

* ၉၀၄။

ခဂါဒိဗန္ဓနေ ပါသော၊ ကေသပုဗ္ဗော စယေ ပျထ။

တာရာ’က္ခိမဇ္ဈေ နက္ခတ္တေ၊ တာရော ဥစ္စတရဿရေ။

* ၉၀၅။

ပတ္တေ စ လောဟဘေဒသ္မိံ၊ ကံသော စတုကဟာပဏေ။

မဇ္ဈိမော ဒေဟမဇ္ဈသ္မိံ၊ မဇ္ဈဘဝေ စ သော တိသု။

* ၉၀၆။

အာဝေသနံဘူတာဝေသေ၊ သိပ္ပသာလာ ဃရေသု စ။

သောဘာ သမ္ပတ္တီသု သိရီ၊ လက္ခီတ္ထီ ဒေဝတာယ စ။

---

(ဓာန်၊၇၅။)

* ၉၀၇။

ကုမာရော ယုဝရာဇေ စ၊ ခန္ဒေ ဝုတ္တော သုသုမှိ စ။

အထာ’နိတ္ထီ ပဝါဠော စ၊ မဏိဘေဒေ တထာ’င်္ကုရေ။

* ၉၀၈။

ပဏော ဝေတန မူလေသု၊ ဝေါဟာရေ စ ဓနေ မတော။

ပဋိဂ္ဂဟော တု ဂဟဏေ၊ ကထိတော ဘာဇနန္တရေ။

* ၉၀၉။

အသုဘေ စ သုဘေ ကမ္မေ၊ ဘာဂျံ ဝုတ္တံ ဒွယေ ပျထ။

ပိပ္ဖလံ တရုဘေဒေ စ၊ ဝတ္ထစ္ဆေဒနသတ္ထကေ။

* ၉၁၀။

အပဝဂ္ဂေါ ပရိစ္စာဂါ’၊ ဝသာနေသု ဝိမုတ္တိယံ။

လိင်္ဂံ တု အင်္ဂဇာတသ္မိံ၊ ပုမတ္တာဒိမှိ လက္ခဏေ။

* ၉၁၁။

စာဂေ သဘာဝေ နိမ္မာနေ၊ သဂ္ဂေါ ဇ္ဈာယေ ဒိဝေပျထ။

ရောဟိတော လောဟိတေ မစ္ဆ၊ ဘေဒေ စေဝ မိဂန္တရေ။

* ၉၁၂။

နိဋ္ဌာ နိပ္ဖတ္တိယံ စေဝါ၊ ဝသာနမှိ အဒဿနေ။

ကဏ္ဋကော တု သပတ္တသ္မိံ၊ ရုက္ခင်္ဂေ လောမဟံသနေ။

* ၉၁၃။

မုချော’ပါယေသု ဝဒနေ၊ အာဒိသ္မိံ မုခ မီရိတံ။

ဒဗ္ဗံ ဘဗ္ဗေ ဂုဏာဓာရေ၊ ဝိတ္တေ စ ဗုဓ ဒါရုသု။

* ၉၁၄။

မာနံ ပမာဏေ ပတ္ထာဒေါ၊ မာနော ဝုတ္တော ဝိဓာယ စ။

အထော ပရိဿမေ ဝုတ္တော၊ ဝါယာမော ဝီရိယေပိ စ။

* ၉၁၅။

သရောရုဟေ သတပတ္တံ၊ သတပတ္တော ခဂန္တရေ။

ဆိဒ္ဒေ တု ဆိဒ္ဒဝန္တေ စ၊ သုသိရံ တူရိယန္တရေ။

* ၉၁၆။

ဧကသ္မိံ သဒိသေ သန္တေ၊ သမာနံ ဝါစ္စလိင်္ဂိကံ။

အထော ဂါရဝ ဘီတီသု၊ သံဝေဂေ သမ္ဘမော မတော။

* ၉၁၇။

ဇုဏှာ စန္ဒပ္ပဘာယဉ္စ၊ တဒုပေတနိသာယ စ။

ဝိမာနံ ဒေဝတာဝါသေ၊ သတ္တဘူမိဃရမှိ စ။

* ၉၁၈။

မာသေ ဇေဋ္ဌော၊ တိဝုဒ္ဓါ’တိ၊ ပ္ပသတ္ထေသု စ တီသု သော။

ဓမ္မေ စ မင်္ဂလေ သေယျော၊ သော ပသတ္ထတရေ တိသု။

* ၉၁၉။

အာဒိစ္စာဒိမှိ ဂဟဏေ၊ နိဗန္ဓေ စ ဃရေ ဂဟော။

ကာစော တု မတ္တိကာဘေဒေ၊ သိက္ကာယံ နယနာမယေ။

* ၉၂၀။

တီသု ဂါမဏိ သေဋ္ဌသ္မိံ၊ အဓိပေ ဂါမဇေဋ္ဌကေ။

ဗိမ္ဗံ တု ပဋိဗိမ္ဗေ စ၊ မဏ္ဍလေ ဗိမ္ဗိကာဖလေ။

* ၉၂၁။

ဘာဇနာဒိ ပရိက္ခာရေ၊ ဘဏ္ဍံ မူလဓနေပိ စ။

မဂ္ဂေါ တွရိယမဂ္ဂေ စ၊ သမ္မာဒိဋ္ဌာဒိကေ၊ ပထေ။

---

(ဓာန်၊၇၆။)

* ၉၂၂။

သမာ ဝဿေ၊ သမော ခေဒ၊ သန္တီသု၊ သော နိဘေ တိသု။

စာပေတွိဿာသ၊ မုသုနော၊ ဣဿာသော ခေပကမှိ စ။

* ၉၂၃။

ဗာလော တီသွာ’ဒိဝယသာ၊ သမင်္ဂိနိ အပဏ္ဍိတေ။

ရတ္တံ တု သောဏိတေ၊ တမ္ဗာ၊ နုရတ္တ၊ ရဉ္ဇိတေ တိသု။

* ၉၂၄။

တစေ ကာယေ စ တနွိတ္ထီ၊ တီသွ’ပ္ပေ ဝိရဠေ ကိသေ။

ဥတုဘေဒေ တု သိသိရော၊ ဟိမေ သော သီတလေ တိသု။

* ၉၂၅။

သက္ခရာ ဂုဠဘေဒေ စ၊ ကထလေပိ စ ဒိဿတိ။

အနုဂ္ဂဟေ တု သင်္ခေပေ၊ ဂဟဏေ သင်္ဂဟော မတော။

* ၉၂၆။

ဒက္ခေ စ တိခိဏေ ဗျတ္တေ၊ ရောဂမုတ္တေ ပဋုတ္တိသု။

ရာဇာ တု ခတ္တိယေ ဝုတ္တော၊ နရနာထေ ပဘုမှိ စ။

* ၉၂၇။

ခလဉ္စ ဓညကရဏေ၊ ကက္ကေ နီစေ ခလော ဘဝေ။

အထု’ပ္ပာဒေ သမုဒယော၊ သမူဟေ ပစ္စယေပိ စ။

* ၉၂၈။

ဗြဟ္မစာရီ ဂဟဋ္ဌာဒေါ၊ အဿမော စ တပေါဝနေ။

ဘယင်္ကရေ တု ကဌိနေ၊ ကုရူရော တီသု နိဒ္ဒယေ။

* ၉၂၉။

ကနိဋ္ဌော ကနိယော တီသု၊ အတျပ္ပေ’တိယုဝေ ပျထ။

သီဃမှိ လဟု တံ၊ ဣဋ္ဌ၊ နိဿာရာ’ဂရုသုတ္တိသု။

* ၉၃၀။

အဓရော တီသွဓော ဟီနေ၊ ပုမေ ဒန္တစ္ဆဒေ ပျထ။

သုဿုသာ သောတု မိစ္ဆာယ၊ သာ ပါရိစရိယာယ စ။

* ၉၃၁။

ဟတ္ထော ပါဏိမှိ ရတနေ၊ ဂဏေ သောဏ္ဍာယ ဘန္တရေ။

အာဝါဋေ ဥဒပါနေ စ၊ ကူပေါ ကုမ္ဘေ စ ဒိဿတိ။

* ၉၃၂။

အာဒေါ ပဓာနေ ပဌမံ၊ ပမုခဉ္စ တိလိင်္ဂိကံ။

ဝဇ္ဇဘေဒေ စ ဝိတ တံ၊ တံ ဝိတ္ထာရေ တိလိင်္ဂိကံ။

* ၉၃၃။

သာရော ဗလေ ထိရံသေ စ၊ ဥတ္တမေ သော တိလိင်္ဂိကော။

ဘာရော တု ခန္ဓဘာရာဒေါ၊ ဒွိသဟဿပလေပိ စ။

* ၉၃၄။

မန္ဒိရေ ရောဂဘေဒေ စ၊ ခယော အပစယမှိ စ။

ဝါဠော တု သာပဒေ သပ္ပေ၊ ကုရူရေ သော တိလိင်္ဂိကော။

* ၉၃၅။

သာလော သဇ္ဇဒ္ဒုမေ ရုက္ခေ၊ သာလာဂေဟေ စ ဒိဿတိ။

သောတေ တု သဝနံ ဝုတ္တံ၊ ယဇနေ သုတိယမ္ပိ စ။

* ၉၃၆။

တီသု ပတော ပရေတော စ၊ မတေ စ ပေတယောနိဇေ။

ချာတေ တု ဟဋ္ဌေ ဝိညာတေ၊ ပတီတံ ဝါစ္စလိင်္ဂိကံ။

---

(ဓာန်၊၇၇။)

* ၉၃၇။

အဓိပ္ပာယေ စ အာဓာရေ၊ အာသယော ကထိတော ထ စ။

ပတ္တံ ပက္ခေ ဒလေ၊ ပတ္တော၊ ဘာဇနေ သော ဂတေ တိသု။

* ၉၃၈။

ကုသလေ သုကတံ၊ သုဋ္ဌု၊ ကတေ စ သုကတော တိသု။

တပဿီ တွ’နုကမ္ပာယာ၊ ရဟေ ဝုတ္တော တပေါဓနေ။

* ၉၃၉။

တီသု သုရာဒိလောလသ္မိံ၊ သောဏ္ဍော ဟတ္ထိကရေ ဒွိသု။

အဿာဒနေ တု ရသနံ၊ ဇိဝှာယဉ္စ ဓနိမှိ စ။

* ၉၄၀။

ပဏီတော တီသု မဓုရေ၊ ဥတ္တမေ ဝိဟိတေ ပျထ။

အဉ္ဇသေ ဝိသိခါယဉ္စ၊ ပန္တိယံ ဝီထိ နာရိယံ။

* ၉၄၁။

ပါပသ္မိံ ဂဂနေ ဒုက္ခေ၊ ဗျသနေ စာ’ဃ မုစ္စတေ။

သမူဟေ ပဋလံ နေတ္တ၊ ရောဂေ ဝုတ္တံ ဆဒိမှိ စ။

* ၉၄၂။

သန္ဓိ သံဃဋ္ဋနေ ဝုတ္တော၊ သန္ဓိ’တ္ထိ ပဋိသန္ဓိယံ။

သတ္တန္နံ ပူရဏေ သေဋ္ဌေ၊ တိသန္တေ သတ္တမော တိသု။

* ၉၄၃။

ဩဇာ တု ယာပနာယဉ္စ၊ ဩဇော ဒိတ္တိ ဗလေသု စ။

အထော နိသာမနံ ဝုတ္တံ၊ ဒဿနေ သဝနေပိ စ။

* ၉၄၄။

ဂဗ္ဘော ကုစ္ဆိဋ္ဌသတ္တေ စ၊ ကုစ္ဆိ ဩဝရကေသု စ။

ခဏ္ဍနေ တွ’ပဒါနဉ္စ၊ ဣတိဝုတ္တေ စ ကမ္မနိ။

* ၉၄၅။

စိတ္တကေ ရုက္ခဘေဒေ စ၊ တိလကော တိလကာဠကေ။

သီလာဒေါ ပဋိပတ္တိ’တ္ထီ၊ ဗောဓေ ပတ္တိ ပဝတ္တိသု။

* ၉၄၆။

အသုမှိ [အာယုမှိ (ဋီ.)၊ ၄၀၇-ဂါထာ ပဿိတဗ္ဗာ] စ ဗလေ ပါဏော၊ သတ္တေ ဟဒယဂါ’နိလေ။

ဆန္ဒော ဝသေ အဓိပ္ပာယေ၊ ဝေဒေ’စ္ဆာ’နုဋ္ဌုဘာဒိသု။

* ၉၄၇။

ကာမောဃာဒေါ၊ သမူဟသ္မိံ၊ ဩဃောဝေဂေ ဇလဿ စ။

ကပါလံ သိရသဋ္ဌိမှိ၊ ဃဋာဒိ သကလေပိ စ။

* ၉၄၈။

ဝေဏွာဒိသာခါဇာလသ္မိံ၊ လဂ္ဂကေသေ ဇဋာ’လယေ။

သရဏံ တု ဝဓေ ဂေဟေ၊ ရက္ခိတသ္မိဉ္စ ရက္ခဏေ။

* ၉၄၉။

ထိယံ ကန္တာ ပိယေ၊ ကန္တော၊ မနုညေ၊ သော တိလိင်္ဂိကော။

ဂဝက္ခေ တု သမူဟေ စ၊ ဇာလံ မစ္ဆာဒိဗန္ဓနေ။

* ၉၅၀။

ပုစ္ဆာယံ ဂရဟာယဉ္စာ၊ နိယမေ ကိံ တိလိင်္ဂိကံ။

သသဒ္ဓေ တီသု နိဝါပေ၊ သဒ္ဓံ၊ သဒ္ဓါ စ ပစ္စယေ။

---

(ဓာန်၊၇၈။)

* ၉၅၁။

ဗီဇံ ဟေတုမှိ အဋ္ဌိသ္မိံ၊ အင်္ဂဇာတေ စ ဒိဿတိ။

ပုဗ္ဗော ပူယေ’ဂ္ဂတော [အဂ္ဂတေ (ဋီ.)] အာဒေါ၊

သော ဒိသာဒေါ တိလိင်္ဂိကော။

* ၉၅၂။

ဖလစိတ္တေ ဟေတုကတေ၊ လာဘေ ဓညာဒိကေ ဖလံ။

အာဂမနေ တု ဒီဃာဒိ၊ နိကာယေသု စ အာဂမော။

* ၉၅၃။

သန္တာနော ဒေဝရုက္ခေ စ၊ ဝုတ္တော သန္တတိယံ ပျထ။

ဥတ္တရဝိပရီတေ စ၊ သေဋ္ဌေ စာ’နုတ္တရံ တိသု။

* ၉၅၄။

သတ္တိသမ္ပတ္တိယံ ဝုတ္တော၊ ကန္တိမတ္တေ စ ဝိက္ကမော။

ဆာယာ တု အာတပါဘာဝေ၊ ပဋိဗိမ္ဗေ ပဘာယ စ။

* ၉၅၅။

ဂိမှေ ဃမ္မော နိဒါဃော စ၊ ဥဏှေ သေဒဇလေ ပျထ။

ကပ္ပနံ ကန္တနေ ဝုတ္တံ၊ ဝိကပ္ပေ သဇ္ဇနေ’တ္ထိယံ။

* ၉၅၆။

အင်္ဂါ ဒေသေ ဗဟုမှ’င်္ဂံ၊ အင်္ဂေါ ဒေသေ ဝပုမှ’[င်္ဂ (ဋီ.)] တထာ’ဝယဝဟေတုသု။

ဒေဝါလယေ စ ထူပသ္မိံ၊ စေတိယံ စေတိယ’ဒ္ဒုမေ။

* ၉၅၇။

သဇ္ဇနော သာဓုပုရိသေ၊ သဇ္ဇနံ ကပ္ပနေ ပျထ။

သုပိနံ သုပိနေ သုတ္တ၊ ဝိညာဏေ တ မနိတ္ထိယံ။

* ၉၅၈။

ပစ္စက္ခေ သန္နိဓာနေ စ၊ သန္နိဓိ ပရိကိတ္တိတော။

ဘိယျော ဗဟုတရတ္ထေ သော၊ ပုနရတ္ထေ’ဗျယံ ဘဝေ။

* ၉၅၉။

ဝိသလိတ္တသရေ ဒိဒ္ဓါ၊ ဒိဒ္ဓါ လိတ္တေ တိလိင်္ဂိကော။

ဝါသေ ဓူမာဒိသင်္ခါရေ၊ ဓိဝါသော သမ္ပဋိစ္ဆနေ။

* ၉၆၀။

ဝုတ္တော ဝိသာရဒေါ တီသု၊ သုပ္ပဂဗ္ဘေ စ ပဏ္ဍိတေ။

အထ သိတ္ထံ မဓုစ္ဆိဋ္ဌေ၊ ဝုတ္တံ ဩဒနသမ္ဘဝေ။

* ၉၆၁။

ဒြဝေ ဝဏ္ဏေ ရသဘေဒေ၊ ကသာယော သုရဘိမှိ စ။

အထော ဥဂ္ဂမနံ ဝုတ္တံ၊ ဥပ္ပတ္တု’ဒ္ဓဂတီသု စ။

* ၉၆၂။

လူခေ နိဋ္ဌုရဝါစာယံ၊ ဖရုသံ ဝါစ္စလိင်္ဂိကံ။

ပဝါဟော တွ’မ္ဗုဝေဂေ စ၊ သန္ဒိဿတိ ပဝတ္တိယံ။

* ၉၆၃။

နိဿယေ တပ္ပရေ ဣဋ္ဌေ၊ ပရာယဏပဒံ တိသု။

ကဝစေ ဝါရဝါဏေ စ၊ နိမ္မောကေပိ စ ကဉ္စုကော။

---

(ဓာန်၊၇၉။)

* ၉၆၄။

လောဟဘေဒေ မတံ တမ္ဗံ၊ တမ္ဗော ရတ္တေ တိလိင်္ဂိကော။

တီသု တွ’ဝသိတံ ဉာတေ၊ အဝသာနဂတေ မတံ။

* ၉၆၅။

ဗောဓနေ စ ပဒါနေ စ၊ ဝိညေယျံ ပဋိပါဒနံ။

သေလေ နိဇ္ဇလဒေသေ စ၊ ဒေဝတာသု မရူ’ရိတော။

* ၉၆၆။

သတ္ထံ အာယုဓ ဂန္ထေသု၊ လောဟေ၊ သတ္ထော စ သဉ္စယေ။

ဇီဝိကာယံ ဝိဝရဏေ၊ ဝတ္တနေ ဝုတ္တိ နာရိယံ။

* ၉၆၇။

ဝီရိယေ သူရဘာဝေ စ၊ ကထီယတိ ပရက္ကမော။

အထ ကမ္ဗု မတော သင်္ခေ၊ သုဝဏ္ဏေ ဝလယေပိ စ။

* ၉၆၈။

သရော ကဏ္ဍေ အကာရာဒေါ၊ သဒ္ဒေ ဝါပိမှိ’နိတ္ထိယံ။

ဒုပ္ဖဿေ တိခိဏေ တီသု၊ ဂဒြဘေ ကကစေ ခရော။

* ၉၆၉။

သုရာယု’ပဒ္ဒဝေ ကာမာ၊ သဝါဒိမှိ စ အာသဝေါ။

ဒေဟေ ဝုတ္တော ရထင်္ဂေ စ၊ စတုရော’ပဓိသူ’ပဓိ။

* ၉၇၀။

ဝတ္ထု’တ္တံ ကာရဏေ ဒဗ္ဗေ၊ ဘူဘေဒေ ရတနတ္တယေ။

ယက္ခော ဒေဝေ မဟာရာဇေ၊ ကုဝေရာ’နုစရေ နရေ။

* ၉၇၁။

ဒါရုက္ခန္ဓေ ပီဌိကာယံ၊ အာပဏေ ပီဌ မာသနေ။

ပရိဝါရေ ပရိက္ခာရော၊ သမ္ဘာရေ စ ဝိဘူသနေ။

* ၉၇၂။

ဝေါဟာရသ္မိဉ္စ ဌပနေ၊ ပညတ္တိ’တ္ထီ ပကာသနေ။

ပဋိဘာနံ တု ပညာယံ၊ ဥပဋ္ဌိတ ဂိရာယ စ။

* ၉၇၃။

ဝစနာဝယဝေ မူလေ၊ ကထိတော ဟေတု ကာရဏေ။

ဥဒရေ တု တထာ ပါစာ၊ နလသ္မိံ ဂဟဏီ’တ္ထိယံ။

* ၉၇၄။

ပိယော ဘတ္တရိ၊ ဇာယာယံ၊ ပိယာ၊ ဣဋ္ဌေ ပိယော တိသု။

ယမရာဇေ တု ယုဂဠေ၊ သံယမေ စ ယမော ဘဝေ။

* ၉၇၅။

မုဒ္ဒိကဿ စ ပုပ္ဖဿ၊ ရသေ ခုဒ္ဒေ မဓူ’ရိတံ။

ဥလ္လောစေ တု စ ဝိတ္ထာရေ၊ ဝိတာနံ ပုန္နပုံသကေ။

* ၉၇၆။

အပဝဂ္ဂေ စ သလိလေ၊ သုဓာယံ အမတံ မတံ။

မောဟေ တု တိမိရေ သင်္ချာ၊ ဂုဏေ တမ မနိတ္ထိယံ။

* ၉၇၇။

ခရေ စာ’ကာရိယေ တီသု၊ ရသမှိ ပုရိသေ ကဋု။

ပဏ္ဍကေ သုကတေ၊ ပုညံ၊ မနုညေ ပဝနေ တိသု။

* ၉၇၈။

ရုက္ခော ဒုမမှိ၊ ဖရုသာ၊ သိနိဒ္ဓေသု စ သော တိသု။

ဥပ္ပတ္တိယံ တု ဟေတုမှိ၊ သင်္ဂေ သုက္ကေ စ သမ္ဘဝေါ။

---

(ဓာန်၊၈၀။)

* ၉၇၉။

နိမိတ္တံ ကာရဏေ ဝုတ္တံ၊ အင်္ဂဇာတေ စ လဉ္ဆနေ။

အာဒိ သီမာပကာရေသု၊ သမီပေ’ဝယဝေ မတော။

* ၉၈၀။

ဝေဒေ စ မန္တနေ မန္တော၊ မန္တာ ပညာယ မုစ္စတေ။

အနယော ဗျသနေ စေဝ၊ သန္ဒိဿတိ ဝိပတ္တိယံ။

* ၉၈၁။

အရုဏော ရံသိဘေဒေ စာ၊ ဗျတ္တရာဂေ စ လောဟိတေ။

အနုဗန္ဓော တု ပကတာ၊ နိဝတ္တေ နဿနက္ခရေ။

* ၉၈၂။

အဝတာရော’ဝတရဏေ၊ တိတ္ထမှိ ဝိဝရေ ပျထ။

အာကာရော ကာရဏေ ဝုတ္တော၊ သဏ္ဌာနေ ဣင်္ဂိတေပိ စ။

* ၉၈၃။

သုဒ္ဒိတ္ထိ တနယေ ခတ္တာ၊ ဥဂ္ဂေါ၊ တိဗ္ဗမှိ သော တိသု။

ပဓာနံ တု မဟာမတ္တေ၊ ပကတျ’ဂ္ဂ’ဓိတီသု စ။

* ၉၈၄။

ကလ္လံ ပဘာတေ၊ နိရောဂ၊ သဇ္ဇဒက္ခေသု [ယုတ္တဒက္ခေသု (က.)] တီသု တံ။

ကုဟနာ ကူဋစရိယာယံ၊ ကုဟနော ကုဟကေ တိသု။

* ၉၈၅။

ကပေါတော ပက္ခိဘေဒေ စ၊ ဒိဋ္ဌော ပါရာဝတေ ထ စ။

သာရဒေါ သာရဒဗ္ဘူတေ၊ အပဂဗ္ဘေ မတော တိသု။

* ၉၈၆။

တီသု ခရေ စ ကဌိနေ၊ ကက္ကသော သာဟသပ္ပိယေ [သာဟသပ္ပိယေ=သာဟသ+အပ္ပိယေ (ဋီ.)]။

အကာရိယေ တု ဂုယှင်္ဂေ၊ စီရေ ကောပီန မုစ္စတေ။

* ၉၈၇။

မိဂဘေဒေ ပဋာကာယံ၊ မောစေ စ ကဒလီ’တ္ထိယံ။

ဒက္ခိဏာ ဒါနဘေဒသ္မိံ၊ ဝါမတော’ညမှိ ဒက္ခိဏော။

* ၉၈၈။

ဒုတိယာ ဘရိယာယဉ္စ၊ ဒွိန္နံ ပူရဏိယံ မတာ။

အထုပ္ပာဒေ သိယာ ဓူမ၊ ကေတု ဝေဿာနရေပိ စ။

* ၉၈၉။

ဘဝနိဂ္ဂမနေ ယာနေ၊ ဒွါရေ နိဿရဏံ သိယာ။

နိယာမကော ပေါတဝါဟေ၊ တိလိင်္ဂေါ သော နိယန္တရိ။

* ၉၉၀။

အပဝဂ္ဂေ ဝိနာသေ စ၊ နိရောဓော ရောဓနေ ပျထ။

ဘယေ ပဋိဘယံ ဝုတ္တံ၊ တိလိင်္ဂံ တံ ဘယံကရေ။

* ၉၉၁။

ပိဋကံ ဘာဇနေ ဝုတ္တံ၊ တထေဝ ပရိယတ္တိယံ။

ဇရာသိထိလစမ္မသ္မိံ၊ ဥဒရင်္ဂေ မတာ ဝလိ။

* ၉၉၂။

ဘိန္နံ ဝိဒါရိတေ’ညသ္မိံ၊ နိဿိတေ ဝါစ္စလိင်္ဂိကံ။

ဥပဇာပေ မတော ဘေဒေါ၊ ဝိသေသေ စ ဝိဒါရဏေ။

---

(ဓာန်၊၈၁။)

* ၉၉၃။

မဏ္ဍလံ ဂါမသန္ဒောဟေ၊ ဗိမ္ဗေ ပရိဓိရာသိသု။

အာဏာယ မာဂမေ လေခေ။ သာသနံ အနုသာသနေ။

* ၉၉၄။

အဂ္ဂေ တု သိခရံ စာ’ယော၊ မယဝိဇ္ဈနကဏ္ဋကေ။

ဂုဏုက္ကံသေ စ ဝိဘဝေ၊ သမ္ပတ္တိ စေဝ သမ္ပဒါ။

* ၉၉၅။

ဘူခန္တီသု ခမာ၊ ယောဂျေ၊ ဟိတေ သက္ကေ [ယုတ္တေ (ဋီ.) ၁၀၀၁-ဂါထာ ပဿိတဗ္ဗာ] ခမော တိသု။

အဒ္ဓါ ဘာဂေ ပထေ ကာလေ၊ ဧကံသေ’ဒ္ဓါ’ဗျယံ ဘဝေ။

အထော ကရီသံ ဝစ္စသ္မိံ၊ ဝုစ္စတေ စတုရမ္ဗဏေ။

* ၉၉၆။

ဥသဘော’သဓ ဂေါ [ဥသဘော ဥသဘေ (ဋီ.)] သေဋ္ဌေ၊ သူ’သဘံ ဝီသယဋ္ဌိယံ။

သေတုသ္မိံ တန္တိ ပန္တီသု၊ နာရိယံ ပါဠိ ကထျတေ။

* ၉၉၇။

ကဋော ဇယေ’တ္ထိနိမိတ္တေ၊ ကိလဉ္ဇေ သော ကတေ တိသု။

မဟိယံ ဇဂတီ ဝုတ္တာ၊ မန္ဒိရာလိန္ဒဝတ္ထုမှိ။

* ၉၉၈။

ဝိတက္ကေ မထိတေ တက္ကော၊ တထာ သူစိဖလေ မတော။

သုဒဿနံ သက္ကပုရေ၊ တီသု တံ ဒုဒ္ဒသေ’တရေ။

* ၉၉၉။

ဒီပေါ’န္တရီပ ပဇ္ဇောတ၊ ပတိဋ္ဌာ နိဗ္ဗုတီသု စ။

ဗဒ္ဓနိဿိတ သေတေသု၊ တီသု တံ မိဟိတေ သိတံ။

* ၁၀၀၀။

ထိယံ ပဇာပတိ ဒါရေ၊ ဗြဟ္မေ မာရေ သုရေ ပုမေ။

ဝါသုဒေဝေ’န္တကေ ကဏှော၊ သော ပါပေ အသိတေ တိသု။

* ၁၀၀၁။

ဥပစာရော ဥပဋ္ဌာနေ၊ အာသန္နေ အညရောပနေ။

သက္ကော ဣန္ဒေ ဇနပဒေ၊ သာကိယေ၊ သော ခမေ တိသု။

* ၁၀၀၂။

ဝဇ္ဇနေ ပရိဟာရော စ၊ သက္ကာရေ စေဝ ရက္ခဏေ။

သောတာပန္နာဒိကေ အဂ္ဂေ၊ အရိယော တီသု၊ ဒွိဇေ ပုမေ။

* ၁၀၀၃။

သုသုကော သုသုမာရေ စ၊ ဗာလကေ စ ဥလူပိနိ။

ဣန္ဒီဝရံ မတံ နီလု၊ ပ္ပလေ ဥဒ္ဒါလပါဒပေ။

* ၁၀၀၄။

အသနော ပိယကေ ကဏ္ဍေ၊ ဘက္ခဏေ ခိပနေ’ သနံ။

ယုဂေ’ဓိကာရေ [ဝိကာရေ (ဋီ.)] ဝီရိယေ၊ ပဓာနေ စာ’န္တိကေ ဓုရော။

* ၁၀၀၅။

ကာဠေ စ ဘက္ခိတေ တီသု၊ လဝိတ္တေ အသိတော ပုမေ။

ပဝါရဏာ ပဋိက္ခေပေ၊ ကထိတာ’ဇ္ဈေသနာယ စ။

---

(ဓာန်၊၈၂။)

* ၁၀၀၆။

ဥမ္မာရေ ဧသိကတ္ထမ္ဘေ၊ ဣန္ဒခီလော မတော ထ စ။

ပေါတ္ထကံ မကစိဝတ္ထေ၊ ဂန္ထေ လေပျာဒိ ကမ္မနိ။

* ၁၀၀၇။

ဓညံ သာလျာဒိကေ ဝုတ္တံ၊ ဓညော ပုညဝတိ တ္တိသု။

ပါဏိ ဟတ္ထေ စ သတ္တေ ဘူ၊ သဏှကရဏိယံ မတော။

* ၁၀၀၈။

တီသု ပီတံ ဟလိဒျာဘေ၊ ဟဋ္ဌေ စ ပါယိတေ သိယာ။

ဗျူဟော နိဗ္ဗိဒ္ဓရစ္ဆာယံ၊ ဗလနျာသေ ဂဏေ မတော။

* ၁၀၀၉။

လောဟိတာဒိမှိ လောဘေ စ၊ ရာဂေါ စ ရဉ္ဇနေ မတော။

ပဒရော ဖလကေ ဘင်္ဂေ၊ ပဝုဒ္ဓ ဒရိယံ ပိစ။

* ၁၀၁၀။

သိင်္ဃာဋကံ ကသေရုဿ၊ ဖလေ၊ မဂ္ဂသမာဂမေ။

ဗဟုလာယဉ္စ ခေဠမှိ၊ ဧဠာ၊ ဒေါသေ’ဠ မီရိတံ။

* ၁၀၁၁။

အာဓာရော စာ’ဓိကရဏေ၊ ပတ္တာဓာရေ’ လဝါလကေ။

ကာရော’ ဂဘေဒေ သက္ကာရေ၊ ကာရာ တု ဗန္ဓနာလယေ။

* ၁၀၁၂။

ကရကာ မေဃပါသာဏေ၊ ကရကော ကုဏ္ဍိကာယ စ။

ပါပနေ စ ပဒါတိသ္မိံ၊ ဂမနေ ပတ္တိ နာရိယံ။

* ၁၀၁၃။

ဆိဒ္ဒံ ရန္ဓဉ္စ ဝိဝရံ၊ သုသိရေ ဒူသနေပိ စ။

မုတ္တာ တု မုတ္တိကေ၊ မုတ္တံ၊ ပဿာဝေ၊ မုစ္စိတေ တိသု။

* ၁၀၁၄။

နိသေဓေ ဝါရဏံ၊ ဟတ္ထိ၊ လိင်္ဂ ဟတ္ထီသု ဝါရဏော။

ဒါနံ စာဂေ မဒေ သုဒ္ဓေ၊ ခဏ္ဍနေ လဝနေ ခယေ။

* ၁၀၁၅။

မနောတောသေ စ နိဗ္ဗာနေ၊ တ္ထင်္ဂမေ နိဗ္ဗုတိ’တ္ထိယံ။

နေဂမော နိဂမုဗ္ဘူတေ၊ တထာ’ပဏောပဇီဝိနိ။

* ၁၀၁၆။

ဟရိတသ္မိဉ္စ ပဏ္ဏေ စ၊ ပလာသော ကိံ သုကဒ္ဒုမေ။

ပကာသော ပါကဋေတီသု၊ အာလောကသ္မိံ ပုမေ မတော။

* ၁၀၁၇။

ပက္ကံ ဖလမှိ၊ တံ နာသု၊ မ္မုခေ [နာသမုခေ (က.)] ပရိဏတေ တိသု။

ပိဏ္ဍော အာဇီဝနေ ဒေဟေ၊ ပိဏ္ဍနေ ဂေါဠကေ မတော။

* ၁၀၁၈။

ဝဋ္ဋော ပရိဗ္ဗယေ ကမ္မာ၊ ဒိကေ၊ သော ဝဋ္ဋုလေ တိသု။

ပစ္စာဟာရေ ပဋိဟာရော၊ ဒွါရေ စ ဒွါရပါလကေ။

* ၁၀၁၉။

နာရိယံ ဘီရု ကထိတာ၊ ဘီရုကေ သော တိလိင်္ဂိကော။

ဝိကဋံ ဂူထမုတ္တာဒေါ၊ ဝိကဋော ဝိကတေ တိသု။

---

(ဓာန်၊၈၃။)

* ၁၀၂၀။

ဝါမံ သဗျမှိ၊ တံ စာရု၊ ဝိပရီတေသု တီသွ’ထ။

သင်္ချာဘေဒေ သရဗျေ စ၊ စိဟဏေ လက္ခ မုစ္စတေ။

* ၁၀၂၁။

သေဏီ’တ္ထီ သမသိပ္ပီနံ၊ ဂဏေ စာ’ဝလိယံ ပိစ။

သုဓာယံ ဓူလိယံ စုဏ္ဏော၊ စုဏ္ဏဉ္စ ဝါသစုဏ္ဏကေ။

* ၁၀၂၂။

ဇေတဗ္ဗေ’တိပ္ပသတ္ထေ’တိ၊ ဝုဒ္ဓေ ဇေယျံ တိသူ’ရိတံ။

တက္ကေ တု မထိတံ ဟောတျာ၊

လောလိတေ မထိတော တိသု။

* ၁၀၂၃။

အဗ္ဘုတော’စ္ဆရိယေ တီသု၊ ပဏေ စေဝါ’ဗ္ဘုတော ပုမေ။

မေစကော ပုစ္ဆမူလမှိ၊ ကဏှေပိ မေစကော တိသု။

* ၁၀၂၄။

ဝသဝတ္တီ ပုမေ မာရေ၊ ဝသဝတ္တာပကေ တိသု။

သမ္ဘဝေ စာ’သုစိ ပုမေ၊ အမေဇ္ဈေ တီသု ဒိဿတိ။

* ၁၀၂၅။

အစ္ဆော ဣက္ကေ ပုမေ ဝုတ္တော၊ ပသန္နမှိ တိလိင်္ဂိကော။

ဗဠိသေ သေလဘေဒေ စ၊ ဝင်္ကော၊ သော ကုဋိလေ တိသု။

* ၁၀၂၆။

ကုဏပမှိ ဆဝေါ ဉေယျော၊

လာမကေ သော တိလိင်္ဂိကော။

သဗ္ဗသ္မိံ သကလော တီသု၊ အဒ္ဓမှိ ပုရိသေ သိယာ။

* ၁၀၂၇။

စန္ဒဂ္ဂါဟာဒိကေ စေဝု၊ ပ္ပာဒေါ ဥပ္ပတ္တိယံ ပိစ။

ပဒုဿနေ ပဒေါသော စ၊ ကထိတော သံဝရီမုခေ။

* ၁၀၂၈။

ရုဓိရေ လောဟိတံ ဝုတ္တံ၊ ရတ္တမှိ လောဟိတော တိသု။

ဥတ္တမင်္ဂေ ပုမေ မုဒ္ဓါ၊ မုဒ္ဓါ မူဠှေ တိလိင်္ဂိကော။

* ၁၀၂၉။

ရဋ္ဌမှိ ဝိဇိတံ ဝုတ္တံ၊ ဇိတေ စ ဝိဇိတော တိသု။

ပရိတ္တံ တု ပရိတ္တာဏေ၊ ပရိတ္တော တီသု အပ္ပကေ။

* ၁၀၃၀။

ကုမ္ဘဏ္ဍော ဒေဝဘေဒေ စ၊ ဒိဿတိ ဝလ္လိဇာတိယံ။

စတုတ္ထံသေ ပဒေ ပါဒေါ၊ ပစ္စန္တသေလရံသိသု။

* ၁၀၃၁။

ဝင်္ဂေါ လောဟန္တရေ ဝင်္ဂါ၊ ဒေသေ ပုမေ ဗဟုမှိ စ။

ကမ္မာရဘဏ္ဍဘေဒေ စ၊ ခဋကေ မုဋ္ဌိ စ ဒွိသု။

* ၁၀၃၂။

အမ္ဗဏံ ဒေါဏိယံ စေ’ကာ၊ ဒသဒေါဏပ္ပမာဏကေ။

အဓိဋ္ဌိတိယ မာဓာရေ၊ ဌာနေ’ဓိဋ္ဌာန မုစ္စတေ။

* ၁၀၃၃။

ပုမေ မဟေသီ သုဂတေ၊ ဒေဝိယံ နာရိယံ မတာ။

ဥပဒ္ဒဝေ ဥပသဂ္ဂေါ၊ ဒိဿတိ ပါဒိကေပိ စ။

---

(ဓာန်၊၈၄။)

* ၁၀၃၄။

ဝက္ကံ ကောဋ္ဌာသဘေဒသ္မိံ၊ ဝက္ကော ဝင်္ကေ တိသု’စ္စတေ။

ဝိဇ္ဇာ ဝေဒေ စ သိပ္ပေ စ၊ တိဝိဇ္ဇာဒေါ စ ဗုဒ္ဓိယံ။

* ၁၀၃၅။

သမာဓိမှိ ပုမေ’ကဂ္ဂေါ၊ နာကုလေ ဝါစ္စလိင်္ဂိကော။

ပဇ္ဇံ သိလောကေ၊ ပဇ္ဇော’ဒ္ဓေ၊ ပဇ္ဇော ပါဒဟိတေ တိသု။

* ၁၀၃၆။

ကတကော ရုက္ခဘေဒသ္မိံ၊ ကတကော ကိတ္တိမေ တိသု။

ဝိဓေယျေ အဿဝေါ တီသု၊ ပုဗ္ဗမှီ ပုရိသေ သိယာ။

* ၁၀၃၇။

ကလျာဏေ ကထိတံ ခေမံ၊ တီသု လဒ္ဓတ္ထရက္ခဏေ။

အထော နိယောဇနေ ဝုတ္တံ၊ ကာရိယေပိ ပယောဇနံ။

* ၁၀၃၈။

အဿတ္ထော တီသု အဿာသ၊ ပ္ပတ္တေ၊ ဗောဓိဒ္ဒုမေ ပုမေ။

တီသု လုဒ္ဒေါ ကုရူရေ စ၊ နေသာဒမှိ ပုမေ သိယာ။

* ၁၀၃၉။

ဝိလဂ္ဂေါ တီသု လဂ္ဂသ္မိံ၊ ပုမေ မဇ္ဈမှိ ဒိဿတိ။

အဍ္ဎော တွနိတ္ထိယံ ဘာဂေ၊ ဓနိမှိ ဝါစ္စလိင်္ဂိကော။

* ၁၀၄၀။

ကဋ္ဌံ ဒါရုမှိ၊ တံ ကိစ္ဆေ၊ ဂဟနေ ကသိတေ တိသု။

သသန္တာနေ စ ဝိသယေ၊ ဂေါစရေ’ ဇ္ဈတ္တ မုစ္စတေတိ။

ဣတိ အဒ္ဓါနေကတ္ထဝဂ္ဂေါ။

* ၁၀၄၁။

ဘုဝနေ စ ဇနေ လောကော၊ မောရေတွဂ္ဂိမှိ သော သိခီ။

သိလောကော တု ယသေ ပဇ္ဇေ၊

ရုက္ခေ တု သာမိကေ ဓဝေါ။

* ၁၀၄၂။

ဝဋဗျာမေသု နိဂြောဓော၊ ဓင်္ကော တု ဝါယသေ ဗကေ။

ဝါရော တွ’ဝသရာ’ဟေသု၊ ကုစေတွဗ္ဘေ ပယောဓရော။

* ၁၀၄၃။

ဥစ္ဆင်္ဂေ လက္ခဏေ စာ’င်္ကော၊ ရသ္မိ’တ္ထီ ဇုတိ ရဇ္ဇုသု။

ဒိဋ္ဌော’ဘာသေသု အာလောကော၊

ဗုဒ္ဓါ တု ပဏ္ဍိတေ ဇိနေ။

* ၁၀၄၄။

သူရံ’သူသု ပုမေ ဘာနူ၊ ဒဏ္ဍော တု မုဂ္ဂရေ ဒမေ။

ဒေဝမစ္ဆေသွ’နိမိသော၊ ပတ္ထော တု မာနသာနုသု။

* ၁၀၄၅။

အာတင်္ကော ရောဂ တာပေသု၊

မာတင်္ဂေါ သပစေ ဂဇေ။

မိဂေါ ပသု ကုရုင်္ဂေသု၊ ဥလူကိ’န္ဒေသု ကောသိယော။

---

(ဓာန်၊၈၅။)

* ၁၀၄၆။

ဝိဂ္ဂဟော ကလဟေ ကာယေ၊ ပုရိသော မာဏဝ’တ္တသု။

ဒါယာဒေါ ဗန္ဓဝေ ပုတ္တေ၊ သိရေ သီသံ တိပုမှိ စ။

* ၁၀၄၇။

ဗလိဟတ္ထံ’သူသု ကရော၊ ဒန္တေ ဝိပ္ပေ’ဏ္ဍဇေ ဒွိဇော။

ဝတ္တံ ပဇ္ဇာ’နနာ’စာရေ၊ ဓညင်္ဂေ သုခုမေ ကဏော။

* ၁၀၄၈။

ထမ္ဘော ထူဏ ဇဠတ္တေသု၊ သူပေါ ကုမ္မာသ ဗျဉ္ဇနေ။

ဂဏ္ဍော ဖောဋေ ကပေါလမှိ၊ အဂ္ဃော မူလျေ စ ပူဇနေ။

* ၁၀၄၉။

ပကာရော တုလျ ဘေဒေသု၊ သကုန္တော ဘာသပက္ခိသု။

ဘာဂျေ ဝိဓိ ဝိဓာနေ စ၊ သရေ ခဂ္ဂေ စ သာယကော။

* ၁၀၅၀။

သာရင်္ဂေါ စာတကေ ဧဏေ၊ ပတ္တီ တု သရပက္ခိသု။

သေဒေ ပါကော ဝိပါကေ ထ၊

ဘိက္ခုဘေဒေ စယေ ဂဏော။

* ၁၀၅၁။

ရာသိ ပုဉ္ဇေ စ မေသာ’ဒေါ၊

အဿေ လောဏေ စ သိန္ဓဝေါ။

သံဝဋ္ဋေ ပလယော နာသေ၊ ပူဂေါ ကမုကရာသိသု။

* ၁၀၅၂။

အမတေ တု သုဓာ လေပေ၊ အဘိချာ နာမ ရံသိသု။

သတ္တိ သာမတ္ထိယေ သတ္ထေ၊ မဟီ နဇ္ဇန္တရေ ဘုဝိ။

လီလာ ကြိယာ ဝိလာသေသု၊

သတ္တေ တု အတြဇေ ပဇာ။

* ၁၀၅၃။

ဉာဏေ လာဘေ ဥပလဒ္ဓိ၊ ပဝေဏီ ကုထဝေဏိသု။

ပဝတ္တိ ဝုတ္တိ ဝတ္တာသု၊ ဝေတနေ ဘရဏေ ဘတိ။

* ၁၀၅၄။

အာစာရေပိ မရိယာဒါ၊ ဘူတိ သတ္တာ သမိဒ္ဓိသု။

သောပ္ပေ ပမာဒေ တန္ဒီ စ၊ ယာတြာ ဂမန ဝုတ္တိသု။

* ၁၀၅၅။

နိန္ဒာ ကုစ္ဆာ’ပဝါဒေသု၊ ကင်္ဂု ဓည ပိယင်္ဂုသု။

မောက္ခေသိဝေ သမေသန္တိ၊ ဝိဘာဂေ ဘတ္တိ သေဝနေ။

* ၁၀၅၆။

ဣစ္ဆာယံ ဇုတိယံ ကန္တိ၊ ရဉ္ဇနေ သူရတေ ရတိ။

ဂေဟေ ဝသတိ ဝါသေ ထ၊ နဒီ သေနာသု ဝါဟိနီ။

* ၁၀၅၇။

ပတ္ထေ နာဠေ စ နာဠိ’တ္ထီ၊ ဂဏေ သမိတိ သင်္ဂမေ။

တဏှာ လောဘေ ပိပါသာယံ၊ မဂ္ဂ ဝုတ္တီသု ဝတ္တနီ။

* ၁၀၅၈။

ပါဏျင်္ဂေ နာဘိ စက္ကန္တေ၊ ယာစေ ဝိညတ္တိ ဉာပနေ။

ဝိတ္တိ တောသေ ဝေဒနာယံ၊ ဌာနေ တု ဇီဝိတေ ဌိတိ။

---

(ဓာန်၊၈၆။)

* ၁၀၅၉။

တရင်္ဂေ စာ’န္တရေ ဝီစိ၊ ဓီရတ္တေ ဓာရဏေ ဓိတိ။

ဘူ ဘူမိယဉ္စ ဘမုကေ၊ သဒ္ဒေ ဝေဒေ သဝေ သုတိ။

* ၁၀၆၀။

ဂေါတ္တံ နာမေ စ ဝံသေ ထ၊ နဂရေ စ ဃရေ ပုရံ။

ဩကံ တု နိဿယေ ဂေဟေ၊ ကုလံ တု ဂေါတ္တရာသိသု။

* ၁၀၆၁။

ဟေမေ ဝိတ္တေ ဟိရညဉ္စ၊ ပညာဏံ တွ’င်္က ဝုဒ္ဓိသု။

အထာ’မ္ဗရဉ္စ ခေ ဝတ္ထေ၊ ဂုယှံ လိင်္ဂေ ရဟသျ’ပိ။

* ၁၀၆၂။

တပေါ ဓမ္မေ ဝတေ စေဝ၊ ပါပေ တွာ’ဂုမှိ ကိဗ္ဗိသံ။

ရတနံ မဏိ သေဋ္ဌေသု၊ ဝဿံ ဟာယန ဝုဋ္ဌိသု။

* ၁၀၆၃။

ဝနံ အရည ဝါရီသု၊ ခီရမှိ တု ဇလေ ပယော။

အက္ခရံ လိပိ မောက္ခေသု၊ မေထူနံ သင်္ဂမေ ရတေ။

* ၁၀၆၄။

သောတံ ကဏ္ဏေ ပယောဝေဂေ၊ ရိဋ္ဌံ ပါပါ’သုဘေသု စ။

အာဂု ပါပါ’ပရာဓေသု၊ ကေတုမှိ စိဟနေ ဓဇော။

* ၁၀၆၅။

ဂေါပုရံ ဒွါရမတ္တေပိ၊ မန္ဒိရံ နဂရေ ဃရေ။

ဝါစ္စလိင်္ဂါ ပရမိတော၊ ဗျတ္တော တု ပဏ္ဍိတေ ဖုဋေ။

* ၁၀၆၆။

ဝလ္လဘော ဒယိတေ’ဇ္ဈက္ခေ၊ ဇလေ ထူလော မဟတျပိ။

ကုရူရေ ဘေရဝေ ဘီမော၊

လောလော တု လောလုပေ စလေ။

* ၁၀၆၇။

ဗီဘစ္ဆော ဝိကတေ ဘီမေ၊ ကောမလေ တိခိဏေ မုဒု။

ဣဋ္ဌေ စ မဓုရေ သာဒု၊ သာဒုမှိ မဓုရော ပိယေ။

* ၁၀၆၈။

သိတေ တု သုဒ္ဓေ ဩဒါတော၊ ဒွိဇိဝှော သူစကာ’ဟိသု။

သက္ကေ သမတ္ထော သမ္ဗန္ဓေ၊ သမတ္တံ နိဋ္ဌိတာ’ခိလေ။

* ၁၀၆၉။

သုဒ္ဓါ ကေဝလ ပူတေသု၊ ဇိဃညော’န္တာ’ဓမေသု စ။

ပေါဏော’ပနတ နိန္နေသု၊ အည နီစေသု စေ’တရော။

* ၁၀၇၀။

သုစိ သုဒ္ဓေ သိတေ ပူတေ၊ ပေသလော ဒက္ခစာရုသု။

အဓမော ကုစ္ဆိတေ ဦနေ၊ အပ္ပိယေ ပျ’လိကော ဘဝေ။

* ၁၀၇၁။

ဗျာပေ အသုဒ္ဓေ သံကိဏ္ဏော၊ ဘဗ္ဗံ ယောဂျေ စ ဘာဝိနိ။

သုခုမော အပ္ပကာ’ဏူသု၊ ဝုဒ္ဓါ ထေရေ စ ပဏ္ဍိတေ။

* ၁၀၇၂။

သုဘေ သာဓုမှိ ဘဒ္ဒေါ ထ၊ တျာ’ဒေါ စ ဝိပုလေ ဗဟု။

ဓီရော ဗုဓေ ဓိတိမန္တေ၊ ဝေလ္လိတံ ကုဋိလေ ဓုတေ။

---

(ဓာန်၊၈၇။)

* ၁၀၇၃။

ဝိသဒေါ ဗျတ္တ သေတေသု၊ တရုဏော တု ယုဝေ နဝေ။

ယောဂ္ဂံ ယာနေ၊ ခမေ ယောဂ္ဂေါ၊

ပိဏ္ဍိတံ ဂဏိတေ ဃနေ။

* ၁၀၇၄။

ဗုဓေ’ဘိဇာတော ကုလဇေ၊ ဝုဒ္ဓါ’ရူသု မဟလ္လကော။

ကလျာဏံ သုန္ဒရေ စာပိ၊ ဟိမော တု သီတလေပိ စ။

* ၁၀၇၅။

လောလေ တု သီဃေ စပလော၊ ဝုတ္တေ ဥဒိတ မုဂ္ဂတေ။

အာဒိတ္တေ ဂဗ္ဗိတေ ဒိတ္တော၊ ပိဋ္ဌံ တု စုဏ္ဏိတေပိ စ။

* ၁၀၇၆။

ဝိဂတေ ဝါယိတေ [ဝါယနေ (က.)] ဝီတံ၊ ဘာဝိတံ ဝဍ္ဎိတေပိ စ။

ဘဇ္ဇိတေ ပတိတေ ဘဋ္ဌော၊ ပုဋ္ဌော ပုစ္ဆိတ ပေါသိတေ။

* ၁၀၇၇။

ဇာတော ဘူတေ စယေ ဇာတံ၊

ပဋိဘာဂေါ သမာ’ရိသု။

သူရော ဝီရေ ရဝိသူရေ၊ ဒုဋ္ဌော ကုဒ္ဓေ စ ဒူသိတေ။

* ၁၀၇၈။

ဒိဋ္ဌော’ရိမှိ’က္ခိတေ ဒိဋ္ဌော [ဒိဋ္ဌံ (က.)]၊

မူဠှေ ပေါတေ စ ဗာလိသော။

နိန္ဒာယံ ခေပနေ ခေပေါ၊ နိယမော နိစ္ဆယေ ဝတေ။

* ၁၀၇၉။

သလာကာယံ ကုသော ဒဗ္ဘေ၊

ဗာလျာဒေါ တု ခယေ ဝယော။

လေပ ဂဗ္ဗေသွ’ဝလေပေါ၊ အဏ္ဍဇော မီနပက္ခိသု။

* ၁၀၈၀။

ဗိလာလေ နကုလေ ဗဗ္ဗု၊ မန္ထော မန္ထနသတ္တုသု။

ဝါလော ကေသေ’ဿာဒိလောမေ၊

သံဃာတော ဃာတရာသိသု။

* ၁၀၈၁။

ဂေါပဂါမေ ရဝေ ဃောသော၊ သူတော သာရထိဝန္ဒိသု။

မာလျံ တု ပုပ္ဖေ တဒ္ဒါမေ၊ ဝါဟော တု သကဋေ ဟယေ။

* ၁၀၈၂။

ခယေ’စ္စနေ စာ’ပစယော၊ ကာလော သမယ မစ္စုသု။

ဘေ တာရကာ နေတ္တမဇ္ဈေ၊ သီမာ’ ဝဓိ၊ ဋ္ဌိတီသု စ။

* ၁၀၈၃။

အာဘောဂေါ ပုဏ္ဏတာ’ဝဇ္ဇေ-

သွာ’ဠိ’တ္ထီ သခိ သေတုသု။

သတ္တေ ထူလေ တီသု ဒဠှော၊ လတာ သာခါယ ဝလ္လိယံ။

---

(ဓာန်၊၈၈။)

* ၁၀၈၄။

မုတ္တိ’တ္ထီ မောစနေ မောက္ခေ၊

ကာယော တု ဒေဟ ရာသိသု။

နီစေ ပုထုဇ္ဇနော မူဠှေ၊ ဘတ္တာ သာမိနိ ဓာရကေ။

* ၁၀၈၅။

သိခါ၊ ပိဉ္ဆေသု သိခဏ္ဍော၊ သတ္တေ တွ’တ္တနိ ပုဂ္ဂလော။

သမ္ဗာဓော သံကဋေ ဂုယှေ၊

နာသေ ခေပေ ပရာဘဝေါ။

* ၁၀၈၆။

ဝစ္စော ရူပေ ကရီသေ ထ၊ ဇုတိ’တ္ထီ ကန္တိရံသိသု။

* ၁၀၈၇။

လဗ္ဘံ ယုတ္တေ စ လဒ္ဓဗ္ဗေ၊ ခဏ္ဍေ ပဏ္ဏေ ဒလံ မတံ။

သလ္လံ ကဏ္ဍေ သလာကာယံ၊ သုစိတ္တေ ဓာဝနံ ဂတေ။

ဘန္တတ္ထေ ဝိဗ္ဘမော ဟာဝေ၊ မောဟော’ဝိဇ္ဇာယ မုစ္ဆနေ။

* ၁၀၈၈။

သေဒေါ ဃမ္မဇလေ ပါကေ၊

ဂေါဠေ ဥစ္ဆုမယေ ဂုဠော။

မိတ္တေ သဟာယေ စ သခါ၊ ဝိဘူ နိစ္စပ္ပဘူသု သော။

* ၁၀၈၉။

ခဂ္ဂေ ကုရူရေ နေတ္တိံသော၊ ပရသ္မိံ အတြ တီသွ’မု။

ကလင်္ကော’င်္ကာ’ပဝါဒေသု၊

ဒေသေ ဇနပဒေါ ဇနေ။

* ၁၀၉၀။

ပဇ္ဇေ ဂါထာ ဝစီဘေဒေ၊ ဝံသော တွ’နွယဝေဏုသု။

ယာနံ ရထာဒေါ ဂမနေ၊ သရူပသ္မိံ အဓော တလံ။

* ၁၀၉၁။

မဇ္ဈော ဝိလဂ္ဂေ ဝေမဇ္ဈေ၊ ပုပ္ဖံ တု ကုသုမော’တုသု။

သီလံ သဘာဝေ သုဗ္ဗတေ၊ ပုင်္ဂဝေါ ဥသဘေ ဝရေ။

* ၁၀၉၂။

ကောသေ ခဂါဒိဗီဇေ’ဏ္ဍံ၊ ကုဟရံ ဂဗ္ဘရေ ဗိလေ။

နေတ္တိံသေ ဂဏ္ဍကေ ခဂ္ဂေါ၊ ကဒမ္ဗော တု ဒုမေ စယေ။

* ၁၀၉၃။

ဘေ’ဓေနုယံ ရောဟိဏီ’တ္ထီ၊ ဝရင်္ဂံ ယောနိယံ သိရေ။

အက္ကောသေ သပထေ သာပေါ၊ ပင်္ကံ ပါပေ စ ကဒ္ဒမေ။

* ၁၀၉၄။

ဘောဂဝတျု’ရဂေ ဘောဂီ၊ ဿရော တု သိဝသာမိသု။

ဗလေ ပဘာဝေ ဝီရိယံ၊ တေဇော တေသု စ ဒိတ္တိယံ။

* ၁၀၉၅။

ဓာရာ သန္တတိ ခဂ္ဂင်္ဂေ၊ ဝါနံ တဏှာယ သိဗ္ဗနေ။

ခတ္တာ သူတေ ပဋိဟာရေ၊ ဝိတ္တိ ပီဠာသု ဝေဒနာ။

---

(ဓာန်၊၈၉။)

* ၁၀၉၆။

ထိယံ မတိ’စ္ဆာပညာသု၊ ပါပေ ယုဒ္ဓေ ရဝေ ရဏော။

လဝေါတု ဗိန္ဒု’စ္ဆေဒေသု၊ ပလာလေ’ [ပလာသေ (ဋီ.)၊ ပလာပေ-ဋီ (၄၅၃-၁၁၂၄) ဂါထာ ပဿိတဗ္ဗာ] တိသယေ ဘုသံ။

* ၁၀၉၇။

ဗာဓာ ဒုက္ခေ နိသေဓေ စ၊ မူလပဒေပိ မာတိကာ။

သ္နေဟော တေလေ’ဓိကပ္ပေမေ၊

ဃရာ’ပေက္ခာသု အာလယော။

* ၁၀၉၈။

ကေတုသ္မိံ ကေတနံ ဂေဟေ၊ ဌာနေ ဘူမိ’တ္ထိယံ ဘုဝိ။

လေချေ လေခေါ ရာဇိ လေခါ၊ ပူဇိတေ ဘဂဝါ ဇိနေ။

* ၁၀၉၉။

ဂဒါ သတ္ထေ ဂဒေါ ရောဂေ၊ နိသဇ္ဇာ ပီဌေသွာ’သနံ။

တထာဂတော ဇိနေ သတ္တေ၊

စယေ ဒေဟေ သမုဿယော။

* ၁၁၀၀။

ဗိလံ ကောဋ္ဌာသ ဆိဒ္ဒေသု၊ ဝဇ္ဇံ ဒေါသေ စ ဘေရိယံ။

ကာလေ ဒီဃဉ္ဇသေ’ဒ္ဓါနံ၊ အာလိယံ သေတု ကာရဏေ။

* ၁၁၀၁။

ဩကာသော ကာရဏေ ဒေသေ၊

သဘာ ဂေဟေ စ သံသဒေ။

ယူပေါ ထမ္ဘေ စ ပါသာဒေ၊ အယနံ ဂမနေ ပထေ။

* ၁၁၀၂။

အက္ကော ရုက္ခန္တရေ သူရေ၊

အဿော ကောဏေ ဟယေပိ စ။

အံသော ခန္ဓေ စ ကောဋ္ဌာသေ၊

ဇာလံ သူသွ’စ္စိ နော ပုမေ။

* ၁၁၀၃။

နာသာ’သတ္တေသွ’ ဘာဝေါ ထ၊

အန္န မောဒန ဘုတ္တိသု။

ဇီဝံ ပါနေ ဇနေ ဇီဝေါ၊

ဃာသော တွ’န္နေ စ ဘက္ခဏေ။

* ၁၁၀၄။

ဆဒနေ’စ္ဆာဒနံ ဝတ္ထေ၊ နိကာယော ဂေဟရာသိသု။

အန္နာဒေါ အာမိသံ မံသေ။ ဒိက္ခာ တု ယဇနေ’စ္စနေ။

* ၁၁၀၅။

ကြိယာယံ ကာရိကာ ပဇ္ဇေ၊

ကေတု တု စိဟနေ ဓဇေ။

ကုသုမံ ထီရဇေ ပုပ္ဖေ၊ ဝါနရေ တု ဗုဓေ ကဝိ။

---

(ဓာန်၊၉၀။)

* ၁၁၀၆။

အဓရေ ခရဘေ ဩဋ္ဌော၊ လုဒ္ဒေါ တု လုဒ္ဒကေပိ စ။

ကလုသံ တွာ’ဝိလေ ပါပေ၊ ပါပေ ကလိ ပရာဇယေ။

* ၁၁၀၇။

ကန္တာရော ဝန၊ ဒုဂ္ဂေသု၊ စရော စာရမှိ စဉ္စလေ။

ဇနာဝါသေ ဂဏေ ဂါမော၊ စမ္မံ တု ဖလကေ တစေ။

* ၁၁၀၈။

အာမောဒေါ ဟာသ ဂန္ဓေသု၊

စာရု တု ကနကေပိ စ။

သတ္တာယံ ဘဝနံ ဂေဟေ၊ လေသေ တု ခလိတေ ဆလံ။

* ၁၁၀၉။

ဝေရံ ပါပေ စ ပဋိဃေ၊ တစော စမ္မနိ ဝက္ကလေ။

ဥစ္စေ’ဓိရောဟေ အာရောဟော၊ နေတ္တံ ဝတ္ထန္တရ’က္ခိသု။

* ၁၁၁၀။

ပဋိဟာရေ မုခေ ဒွါရံ၊ ပေတေ ဉာတေ မတော တိသု။

မာသော ပရဏ္ဏ ကာလေသု၊ နဂ္ဂေါ တွ’စေလကေပိ စ။

* ၁၁၁၁။

ဒေါသေ ဃာတေ စ ပဋိဃော၊ မိဂါဒေါ ဆဂလေ ပသု။

အရူပေ စာ’ဝှယေ နာမံ၊ ဒရော ဒရထ ဘီတိသု။

* ၁၁၁၂။

ယာစနေ ဘောဇနေ ဘိက္ခာ၊

ဘာရေ တွ’တိသယေ ဘရော။

ဒဗ္ဗိ’န္ဒဇာယာသု သုဇာ၊ မေဃေ တွ’ဗ္ဘံ ဝိဟာယသေ။

* ၁၁၁၃။

မောဒကော ခဇ္ဇဘေဒေပိ၊ မဏိကေ ရတနေ မဏိ။

သေလာ’ရာမေသု မလယော၊

သဘာဝ’င်္ကေသု လက္ခဏံ။

* ၁၁၁၄။

ဟဝိ သပ္ပိမှိ ဟောတဗ္ဗေ၊ သိရော သေဋ္ဌေ စ မုဒ္ဓနိ။

ဝိစာရေပိ ဝိဝေကော ထ၊ သိခရီ ပဗ္ဗတေ ဒုမေ။

* ၁၁၁၅။

ဝေဂေါ ဇဝေ ပဝါဟေ စ၊ သင်္ကု တု ခိလဟေတိသု။

နိဂ္ဂဟီတေ ကဏေ ဗိန္ဒု၊ ဝရာဟော သူကရေ ဂဇေ။

* ၁၁၁၆။

နေတ္တန္တေ စိတ္တကေ’ပါင်္ဂံ၊ သိဒ္ဓတ္ထော သာသပေ ဇိနေ။

ဟာရော မုတ္တာဂုဏေ ဂါဟေ၊

ခါရကော မကုဠေ ရသေ။

* ၁၁၁၇။

အစ္စယော’ တိက္ကမေ ဒေါသေ၊

သေလရုက္ခေသွ’ဂေါ နဂေါ။

သွပ္ပေ’ဝဓာရဏေ မတ္တံ၊ အပစိတျ’စ္စနေ ခယေ။

* ၁၁၁၈။

ဆိဒ္ဒေါ’တရဏေသွော’တာရော၊

---

(ဓာန်၊၉၁။)

ဗြဟ္မေ စ ဇနကေ ပိတာ။

ပိတာမဟော’ယျကေ ဗြဟ္မေ၊

ပေါတော နာဝါယ ဗာလကေ။

* ၁၁၁၉။

ရုက္ခေ ဝဏ္ဏေ သုနေ သောဏော၊

သဂ္ဂေ တု ဂဂနေ ဒိဝေါ။

ဝတ္ထေ ဂန္ဓေ ဃရေ ဝါသော၊ စုလ္လော ခုဒ္ဒေ စ ဥဒ္ဓနေ။

* ၁၁၂၀။

ကဏ္ဏော ကောဏေ စ သဝဏေ၊

မာလာ ပုပ္ဖေ စ ပန္တိယံ။

ဘာဂေါ ဘာဂျေ’ကဒေသေသု၊

ကုဋ္ဌံ ရောဂေ’ ဇပါလကေ။

* ၁၁၂၁။

သေယျာ သေနာသနေ သေနေ၊ စုန္ဒဘဏ္ဍမှိ စ’ဗ္ဘမော။

ဝတ္ထာဒိလောမံ’သု ကရေ၊ နိပါတော ပတနေ’ဗျယေ။

* ၁၁၂၂။

သာခါယံ ဝိဋပေါ ထမ္ဘေ၊ သတ္တု ခဇ္ဇန္တရေ ဒိသေ။

သာမိကော ပတိ’ယိရေသု၊ ပဋ္ဌာနံ ဂတိ ဟေတုသု။

* ၁၁၂၃။

ရာဂေ ရင်္ဂေါ နစ္စဋ္ဌာနေ၊ ပါနံ ပေယျေ စ ပီတိယံ။

ဣဏု’က္ခေပေသု ဥဒ္ဓါရော၊ ဥမ္မာရေ ဧဠကော အဇေ။

* ၁၁၂၄။

ပဟာရော ပေါထနေ ယာမေ၊

သရဒေါ ဟာယနော’တုသု။

ကုဏ္ဍိကာယာ’ဠှကေ တုမ္ဗော၊

ပလာလော [ပလာပေါ (က.) ၄၅၃-ဂါထာ ပဿိတဗ္ဗာ] တု ဘုသမှိ စ။

* ၁၁၂၅။

မတာ’ဝါဋေ စယေ ကာသု၊ ပနိသာ ကာရဏေ ရဟော။

ကာသော ပေါဋဂလေ ရောဂေ၊

ဒေါသော ကောဓေ ဂုဏေ’တရေ။

* ၁၁၂၆။

ယုတျ’ဋ္ဋာလ’ဋ္ဋိတေသွ’ဋ္ဋော၊ ကီဠာယံ ကာနနေ ဒဝေါ။

ဥပ္ပတ္တိယံ စော’ပ္ပတနံ၊ ဥယျာနံ ဂမနေ ဝနေ။

* ၁၁၂၇။

ဝေါကာရော လာမကေ ခန္ဓေ၊ မူလော’ပဒါသု ပါဘတံ။

ဒသာ’ ဝတ္ထာ ပဋန္တေသု၊ ကာရဏံ ဃာတ၊ ဟေတုသု။

---

(ဓာန်၊၉၂။)

* ၁၁၂၈။

ဟတ္ထိဒါနေ မဒေါ ဂဗ္ဗေ၊ ဃဋာ ဃဋန ရာသိသု။

ဥပဟာရော’ဘိဟာရေပိ၊ စယော ဗန္ဓန ရာသိသု။

* ၁၁၂၉။

ဂန္ဓော ထောကေ ဃာယနီယေ၊

စာဂေါ တု ဒါနဟာနိသု။

ပါနေ ပမောဒေ ပီတိ’တ္ထီ၊ ဣဏေ ဂိဝါ ဂလေပိ စ။

* ၁၁၃၀။

ပတိဋ္ဌာ နိဿယေ ဌာနေ၊ ဗလက္ကာရေပိ သာဟသံ။

ဘင်္ဂေါ ဘေဒေ ပဋေ ဘင်္ဂံ၊ ဆတ္တံ တု ဆဝကေပိ စ။

* ၁၁၃၁။

ဉာဏေ ဘုဝိ စ ဘူရိ’တ္တီ၊ အနင်္ဂေ မဒနော ဒုမေ။

ပမာတရိပိ မာတာ ထ၊ ဝေဌု’ဏီသေသု ဝေဌနံ။

* ၁၁၃၂။

မာရိသော တဏ္ဍုလေယျေ’ယျေ၊

မောက္ခော နိဗ္ဗာန မုတ္တိသု။

ဣန္ဒော’ဓိပတိ သက္ကေသွာ၊ ရမ္မဏံ ဟေတု ဂေါစရေ။

* ၁၁၃၃။

အင်္ကေ သဏ္ဌာန မာကာရေ၊

ခေတ္တေ [ဝပ္ပေ (ပါကာရမူလေ နေတ္တဇလေ ဥသုမေ စ ဝပ္ပော-ဋီ)] ဝပ္ပော တဋေပိ စ။

သမ္မုတျ’နုညာ ဝေါဟာရေ၊ သွ’ထ လာဇာသု စာ’က္ခတံ။

* ၁၁၃၄။

သတြံ ယာဂေ သဒါဒါနေ၊

သောမော တု ဩသဓိ’န္ဒုသု။

သံဃာတော ယုဂဂေဟင်္ဂေ၊ ခါရော ဦသေ စ ဘသ္မနိ။

* ၁၁၃၅။

အာတာပေါ ဝီရိယေ တာပေ၊

ဘာဂေ သီမာယ ဩဓိ စာတိ။

ဣတိ ပါဒါနေကတ္ထဝဂ္ဂေါ။

အနေကတ္ထဝဂ္ဂေါ နိဋ္ဌိတော။

၃. သာမညကဏ္ဍ

၄. အဗျယဝဂ္ဂ

* ၁၁၃၆။

အဗျယံ ဝုစ္စတေ ဒါနိ၊ စိရဿံ တု စိရံ တထာ။

စိရေန စိရရတ္တာယ၊ သဟ သဒ္ဓိံ သမံ အမာ။

---

(ဓာန်၊၉၃။)

* ၁၁၃၇။

ပုနပ္ပုနံ အဘိဏှဉ္စာ၊ သကိံ စာ’ဘိက္ခဏံ မုဟုံ။

ဝဇ္ဇနေ တု ဝိနာ နာနာ၊ အန္တရေန ရိတေ ပုထု။

* ၁၁၃၈။

ဗလဝံ သုဋ္ဌု စာ’တီဝါ၊ တိသယေ ကိမုတ သွ’တိ။

အဟော တု ကိံ ကိမူ’ ဒါဟု၊ ဝိကပ္ပေ ကိမုတော’ဒ စ။

* ၁၁၃၉။

အဝှာနေ ဘော အရေ အမ္ဘော၊

ဟမ္ဘော ရေ ဇေ’င်္ဂ အာဝုသော။

ဟေ ဟရေ ထ ကထံ ကိံသု၊ နနု ကစ္စိ နု ကိံ သမာ။

* ၁၁၄၀။

အဓုနေ’တရဟီ’ဒါနိ၊ သမ္ပတိ အညဒတ္ထု တု။

တဂ္ဃေ’ ကံသေ သသက္ကဉ္စာ၊ ဒ္ဓါ ကာမံ ဇာတု ဝေ ဟဝေ။

* ၁၁၄၁။

ယာဝတာ တာဝတာ ယာဝ၊ တာဝ ကိတ္တာဝတာ တထာ။

ဧတ္တာဝတာ စ ကီဝေ’တိ၊ ပရိစ္ဆေဒတ္ထဝါစကာ။

* ၁၁၄၂။

ယထာ တထာ ယထေဝေ’ဝံ၊ ယထာနာမ ယထာဟိ စ။

သေယျထာပျေ’ဝမေဝံ၊ ဝါ၊ တထေဝ စ ယထာပိ စ။

* ၁၁၄၃။

ဧဝမ္ပိ စ သေယျထာပိ၊ နာမ ယထရိဝါ’ပိ စ။

ပဋိဘာဂတ္ထေ ယထာစ၊ ဝိယ တထရိဝါ’ပိ စ။

* ၁၁၄၄။

သံ သာမဉ္စ သယံ စာထ၊ အာမ သာဟု လဟူ’ပိ စ။

ဩပါယိကံ ပတိရူပံ၊ သာဓွေ’ဝံ သမ္ပဋိစ္ဆနေ။

* ၁၁၄၅။

ယံ တံ ယတော တတော ယေန၊

တေနေ’တိ ကာရဏေ သိယုံ။

အသာကလျေ တု စန စိ၊ နိပ္ဖလေ တု မုဓာ ဘဝေ။

* ၁၁၄၆။

ကဒါစိ ဇာတု တုလျာ’ထ၊ သဗ္ဗတော စ သမန္တတော။

ပရိတော စ သမန္တာပိ၊ အထ မိစ္ဆာ မုသာ ဘဝေ။

* ၁၁၄၇။

နိသေဓေ န အနောမာ’လံ၊ နဟိ စေတု သစေ ယဒိ။

အနုကုလျေ တု သဒ္ဓဉ္စ၊

နတ္တံ [ရတ္တံ (ဋီ.)] ဒေါသော ဒိဝါ တွ’ဟေ။

* ၁၁၄၈။

ဤသံ ကိဉ္စိ မနံ အပ္ပေ၊ သဟသာ တု အတက္ကိတေ။

ပုရေ ဂ္ဂတော တု ပုရတော၊ ပေစ္စာ’မုတြဘဝန္တရေ။

---

(ဓာန်၊၉၄။)

* ၁၁၄၉။

အဟော ဟီ ဝိမှယေ တုဏှီ၊

တု မောနေ ထာ’ဝိ ပါတု စ။

တင်္ခဏေ သဇ္ဇု သပဒိ၊ ဗလက္ကာရေ ပသယှ စ။

* ၁၁၅၀။

သုဒံ ခေါ [ဝေါ (က.)] အဿု ယဂ္ဃေ ဝေ၊ဟာ’ဒယော ပဒပူရဏေ။

အန္တရေန’န္တရာ အန္တော၊ ဝဿံ နူန စ နိစ္ဆယေ။

* ၁၁၅၁။

အာနန္ဒေ သဉ္စ ဒိဋ္ဌာ ထ၊ ဝိရောဓကထနေ နနု။

ကာမပ္ပဝေဒနေ ကစ္စိ၊ ဥသူယောပဂမေ’တ္ထု စ။

* ၁၁၅၂။

ဧဝါ’ဝဓာရဏေ ဉေယျံ၊ ယထာတ္တံ တု ယထာတထံ။

နီစံ အပ္ပေ၊ မဟတျု’စ္စံ၊ အထ ပါတော ပဂေ သမာ။

* ၁၁၅၃။

နိစ္စေ သဒါ သနံ [သနာ (က.)] ပါယော၊

ဗာဟုလျေ ဗာဟိရံ ဗဟိ။

ဗဟိဒ္ဓါ ဗာဟိရာ ဗာဟျေ၊ သီဃေတု သဏိကံ ဘဝေ။

* ၁၁၅၄။

အတ္ထံ အဒဿနေ ဒုဋ္ဌု၊ နိန္ဒာယံ၊ ဝန္ဒနေ နမော။

သမ္မာ သုဋ္ဌု ပသံသာယံ၊ အထော သတ္တာယ မတ္ထိ စ။

* ၁၁၅၅။

သာယံ သာယေ’ဇ္ဇ အတြာ’ဟေ၊

သုဝေ တု သွေ အနာဂတေ။

တတော ပရေ ပရသုဝေ၊ ဟိယျောတု ဒိဝသေ ဂတေ။

* ၁၁၅၆။

ယတ္ထ ယတြ ယဟိံစာထ၊ တတ္ထ တတြ တဟိံတဟံ။

အထော ဥဒ္ဓဉ္စ ဥပရိ၊ ဟေဋ္ဌာ တု စ အဓော သမာ။

* ၁၁၅၇။

စောဒနေ ဣင်္ဃ ဟန္ဒာ’ထ၊ အာရာဒူရာ စ အာရကာ။

ပရမ္မုခါ တု စ ရဟော၊ သမ္မုခါ တွာ’ဝိ ပါတု စ။

* ၁၁၅၈။

သံသယတ္ထမှိ အပ္ပေဝ၊ အပ္ပေဝနာမ နူ’တိ စ။

နိဒဿနေ ဣတိ’တ္ထဉ္စ၊ ဧဝံ၊ ကိစ္ဆေ ကထဉ္စိ စ။

* ၁၁၅၉။

ဟာ ခေဒေ သစ္ဆိ ပစ္စက္ခေ၊

ဓုဝံ ထိရေ’ဝဓာရဏေ။

တိရော တု တိရိယံ စာထ၊ ကုစ္ဆာယံ ဒုဋ္ဌု ကု’စ္စတေ။

* ၁၁၆၀။

သုဝတ္ထိ အာသိဋ္ဌတ္ထမှိ၊ နိန္ဒာယံ တု ဓီ [ဓိ (က.)] ကထျတေ။

ကုဟိဉ္စနံ ကုဟိံ ကုတြ၊ ကုတ္ထ ကတ္ထ ကဟံ ကွ ထ။

---

(ဓာန်၊၉၅။)

* ၁၁၆၁။

ဣဟေ’ဓာ’တြ တု ဧတ္ထာ’တ္ထ၊

အထ သဗ္ဗတြ သဗ္ဗဓိ။

ကဒါ ကုဒါစနံ စာထ၊ တဒါနိ စ တဒါ သမာ။

* ၁၁၆၂။

အာဒိကမ္မေ ဘုသတ္ထေ စ၊ သမ္ဘဝေါ’တိဏ္ဏ တိတ္တိသု။

နိယောဂိ’ဿရိယ’ပ္ပီတိ၊ ဒါန ပူဇာ’ဂ္ဂ၊ သန္တိသု။

* ၁၁၆၃။

ဒဿနေ တပ္ပရေ သင်္ဂေ၊ ပသံသာ၊ ဂတိ၊ သုဒ္ဓိသု။

ဟိံသာ၊ ပကာရန္တော’ဘာဝ၊ ဝိယောဂါ’ဝယဝေသု စ။

ပေါ’ပသဂ္ဂေါ ဒိသာယောဂေ၊ ပတ္ထနာ၊ ဓိတိအာဒိသု။

* ၁၁၆၄။

ပရာသဒ္ဒေါ ပရိဟာနိ၊ ပရာဇယ ဂတီသု စ။

ဘုသတ္ထေ ပဋိလောမတ္ထေ၊ ဝိက္ကမာ’မသနာဒိသု။

* ၁၁၆၅။

နိဿေသာ’ဘာဝ သနျာသ၊ ဘုသတ္ထ မောက္ခ ရာသိသု။

ဂေဟာ’ဒေသော’ပမာဟီန၊ ပသာဒနိဂ္ဂတာ’စ္စယေ။

* ၁၁၆၆။

ဒဿနော’သာနနိက္ခန္တာ၊ ဓောဘာဂေသွ’ဝဓာရဏေ။

သာမီပျေ ဗန္ဓနေ ဆေက၊ န္တောဘာဂေါ’ပရတီသု စ။

* ၁၁၆၇။

ပါတုဘာဝေ ဝိယောဂေ စ၊ နိသေဓာဒေါ နိ ဒိဿတိ။

အထော နီဟရဏေ စေဝါ၊ ဝရဏာဒေါ စ နီ သိယာ။

* ၁၁၆၈။

ဥဒ္ဓကမ္မ ဝိယောဂ တ္တ၊ လာဘ တိတ္တိ သမိဒ္ဓိသု။

ပါတုဘာဝ’စ္စယာဘာဝ၊ ပဗလတ္တေ ပကာသနေ။

ဒက္ခ’ဂ္ဂတာသု ကထနေ၊ သတ္တိမောက္ခာဒိကေ ဥ စ။

* ၁၁၆၉။

ဒု ကုစ္ဆိတေ’သဒတ္ထေသု၊ ဝိရူပတ္တေ ပျ’သောဘနေ။

သိယာ’ဘာဝါ’သမိဒ္ဓီသု၊ ကိစ္ဆေ စာ’နန္ဒနာဒိကေ။

* ၁၁၇၀။

သံ သမောဓာန သင်္ခေပ၊ သမန္တတ္တ သမိဒ္ဓိသု။

သမ္မာ ဘုသ သဟ ပ္ပတ္ထာ၊ ဘိမုခတ္ထေသု သင်္ဂတေ။

ဝိဓာနေ ပဘဝေ ပူဇာ၊ ပုနပ္ပုနကြိယာဒိသု။

* ၁၁၇၁။

ဝိဝိဓာ’တိသယာ’ဘာဝ၊ ဘုသတ္တိ’ဿရိယာ’စ္စယေ။

ဝိယောဂေ ကလဟေ ပါတု၊ ဘာဝေ ဘာသေ စ ကုစ္ဆနေ။

* ၁၁၇၂။

ဒူရာ’နဘိမုခတ္တေသု၊ မောဟာ’နဝဋ္ဌိတီသု စ။

ပဓာန ဒက္ခတာ ခေဒ၊ သဟတ္ထာဒေါ ဝိ ဒိဿတိ။

---

(ဓာန်၊၉၆။)

* ၁၁၇၃။

ဝိယောဂေ ဇာနနေ စာ’ဓော၊ဘာဂ နိစ္ဆယ [ဘာဂ’နိစ္ဆယ (ဘာဂ+အနိစ္ဆယ-ဋီ)] သုဒ္ဓိသု။

ဤသဒတ္ထေ ပရိဘဝေ၊ ဒေသ ဗျာပန ဟာနိသု။

ဝစောကြိယာယ ထေယျေ စ၊ ဉာဏပ္ပတ္တာဒိကေ အဝ။

* ၁၁၇၄။

ပစ္ဆာ ဘုသတ္တ သာဒိသျာ၊ နုပစ္ဆိန္နာ’နုဝတ္တိသု။

ဟီနေ စ တတိယတ္ထာ’ဓော၊ ဘာဂေသွ’နုဂတေ ဟိတေ။

ဒေသေ လက္ခဏ ဝိစ္ဆေ’တ္ထ၊ မ္ဘူတ ဘာဂါဒိကေ အနု။

* ၁၁၇၅။

သမန္တတ္ထေ ပရိစ္ဆေဒေ၊ ပူဇာ’လိင်္ဂန ဝဇ္ဇနေ။

ဒေါသက္ခာနေ နိဝါသနာ၊ ဝညာ’ဓာရေသု ဘောဇနေ။

သောက ဗျာပန တတွေသု၊ လက္ခဏာဒေါ သိယာ ပရိ။

* ၁၁၇၆။

အာဘိမုချ ဝိသိဋ္ဌု’ဒ္ဓ၊ ကမ္မသာရုပ္ပဝုဒ္ဓိသု။

ပူဇာ’ဓိက ကုလာ’သစ္စ၊ လက္ခဏာဒိမှိ စာပျ’ဘိ။

* ၁၁၇၇။

အဓိကိ’ဿရ၊ ပါဌာ’ဓိ၊ ဋ္ဌာန၊ ပါပုဏနေသွ’ဓိ။

နိစ္ဆယေ စောပရိတ္တာ’ဓိ၊ ဘဝနေ စ ဝိသေသနေ။

* ၁၁၇၈။

ပဋိဒါနနိသေဓေသု၊ ဝါမာ’ဒါနနိဝတ္တိသု။

သာဒိသေ ပဋိနိဓိမှိ၊ အာဘိမုချဂတီသု စ။

* ၁၁၇၉။

ပတိဗောဓေ ပတိဂတေ၊ တထာ ပုနကြိယာယ စ။

သမ္ဘာဝနေ ပဋိစ္စတ္ထေ၊ ပတီတိ လက္ခဏာဒိကေ။

သု သောဘနေ သုခေ သမ္မာ၊ ဘုသ သုဋ္ဌု သမိဒ္ဓိသု။

* ၁၁၈၀။

အာဘိမုချ၊ သမီပါ’ဒိ၊ ကမ္မာ’လိင်္ဂန ပတ္တိသု။

မရိယာဒု’ဒ္ဓကမ္မိ’စ္ဆာ၊ ဗန္ဓနာ’ဘိဝိဓီသု အာ။

* ၁၁၈၁။

နိဝါသာ’ဝှာန ဂဟဏ၊ ကိစ္ဆေ’သတ္ထ နိဝတ္တိသု။

အပ္ပသာဒါ’သိ သရဏ၊ ပတိဋ္ဌာ’ဝိမှယာဒိသု။

* ၁၁၈၂။

အန္တောဘာဝ ဘုသတ္တာ’တိ၊ သယ ပူဇာသွ’တိက္ကမေ။

ဘူတဘာဝေ ပသံသာယံ၊ ဒဠှတ္ထာဒေါ သိယာ အတိ။

* ၁၁၈၃။

သမ္ဘာဝနေ စ ဂရဟာ၊ ပေက္ခာသု စ သမုစ္စယေ။

ပဉှေ သံဝရဏေ စေဝ၊ အာသီသတ္ထေ အပီ’ရိတံ။

* ၁၁၈၄။

နိဒ္ဒေသေ ဝဇ္ဇနေ ပူဇာ၊ ပဂတေ ဝါရဏေပိ စ။

ပဒုဿနေ စ ဂရဟာ၊ စောရိကာ’ဒေါ သိယာ အပ။

---

(ဓာန်၊၉၇။)

* ၁၁၈၅။

သမီပပူဇာ သာဒိဿ၊ ဒေါသက္ခာနော’ပပတ္တိသု။

ဘုသတ္တော’ပဂမာ’ဓိကျ၊ ပုဗ္ဗကမ္မနိဝတ္တိသု။

ဂယှာကာရော’ပရိတ္တေသု၊ ဥပေ’တျ [ဥပေတျ=ဥပ+ဣတိ]’နသနာ’ဒိကေ။

* ၁၁၈၆။

ဧဝံ နိဒဿနာ’ကာရော၊ ပမာသု သမ္ပဟံသနေ။

ဥပဒေသေ စ ဝစန၊ ပဋိဂ္ဂါဟေ’ဝဓာရဏေ။

ဂရဟာယေ’ဒမတ္ထေ စ၊ ပရိမာနေ စ ပုစ္ဆနေ။

* ၁၁၈၇။

သမုစ္စယေ သမာဟာရေ၊ နွာစယေ စေ’တရီတရေ။

ပဒပူရဏမတ္တေ စ၊ စသဒ္ဒေါ အဝဓာရဏေ။

* ၁၁၈၈။

ဣတိ ဟေတုပကာရေသု၊ အာဒိမှိ စာ’ဝဓာရဏေ။

နိဒဿနေ ပဒတ္ထဿ၊ ဝိပလ္လာသေ သမာပနေ။

* ၁၁၈၉။

သမုစ္စယေ စော’ပမာယံ၊ သံသယေ ပဒပူရဏေ။

ဝဝတ္ထိတဝိဘာသာယံ၊ ဝါ’ဝဿဂ္ဂေ ဝိကပ္ပနေ။

* ၁၁၉၀။

ဘူသနေ ဝါရဏေ စာ’လံ၊ ဝုစ္စတေ ပရိယတ္တိယံ။

အထော’ထာ’နန္တရာ’ရမ္ဘ၊ ပဉှေသု ပဒပူရဏေ။

* ၁၁၉၁။

ပသံသာဂရဟာသညာ၊ သီကာရာဒေါ [သွီကာရ (ဋီ.)] ပိ နာမ ထ။

နိစ္ဆယေ စာ’နုမာနသ္မိံ၊ သိယာ နူန ဝိတက္ကနေ။

* ၁၁၉၂။

ပုစ္ဆာ’ဝဓာရဏာ’နုညာ၊ သာန္တွနာ’လပနေ [သန္တနာလပနေ (က.)] နနု။

ဝတေ’ကံသ၊ ဒယာ၊ ဟာသ၊ ခေဒါ’လပန၊ ဝိမှယေ။

* ၁၁၉၃။

ဝါကျာရမ္ဘ၊ ဝိသာဒေသု၊ ဟန္ဒ ဟာသေ’နုကမ္ပနေ။

ယာဝ တု တာဝ သာကလျ၊ မာနာ’ဝဓျ’ဝဓာရဏေ။

* ၁၁၉၄။

ပါစီ၊ ပုရ၊ င်္ဂတောတ္ထေသု၊ ပုရတ္ထာ ပဌမေ ပျထ။

ပဗန္ဓေ စ စိရာတီတေ၊ နိကဋာဂါမိကေ ပုရာ။

* ၁၁၉၅။

နိသေဓဝါကျာလင်္ကာရာ၊ ဝဓာရဏပသိဒ္ဓိသု။

ခလွာ’သန္နေ တု အဘိတော-

ဘိမုခေါ’ဘယတောဒိကေ။

* ၁၁၉၆။

ကာမံ ယဒျပိသဒ္ဒတ္ထေ၊ ဧကံသတ္ထေ စ ဒိဿတိ။

အထော ပန ဝိသေသသ္မိံ၊ တထေဝ ပဒပူရဏေ။

---

(ဓာန်၊၉၈။)

* ၁၁၉၇။

ဟိ ကာရဏေ ဝိသေသာ’ဝ၊ ဓာရဏေ ပဒပူရဏေ။

တု ဟေတုဝဇ္ဇေ တတ္ထာ’ထ၊ ကု ပါပေ’သတ္ထ’ကုစ္ဆနေ။

* ၁၁၉၈။

နု သံသယေ စ ပဉှေ ထ၊ နာနာ’ နေကတ္ထ ဝဇ္ဇနေ။

ကိံ တု ပုစ္ဆာဇိဂုစ္ဆာသု၊ ကံ တု ဝါရိမှိ မုဒ္ဓနိ။

* ၁၁၉၉။

အမာ သဟသမီပေ ထ၊ ဘေဒေ အပ္ပဌမေ ပုန။

ကိရာ’နုဿဝါ’ရုစိသု၊ ဥဒါ’ပျတ္ထေ ဝိကပ္ပနေ။

* ၁၂၀၀။

ပတီစီ စရိမေ ပစ္ဆာ၊ သာမိ တွဒ္ဓေ ဇိဂုစ္ဆနေ။

ပကာသေ သမ္ဘဝေ ပါတု၊

အညောညေ တု ရဟော မိထော။

* ၁၂၀၁။

ဟာ ခေဒသောကဒုက္ခေသု၊ ခေဒေ တွ’ဟဟ ဝိမှယေ။

ဘိံသာပနေ [ဟိံသာပနေ (ဋီ.)] ဓီ [ဓိ (က.)] နိန္ဒာယံ၊ ပိဓာနေ တိရိယံ တိရော။

* ၁၂၀၂။

တုန တွာန တဝေ တွာ တုံ၊ ဓာ သော ထာ က္ခတ္တု၊ မေဝ စ။

တော ထ တြ ဟိဉ္စနံ ဟိံဟံ၊ ဓိ ဟ ဟိ ဓ ဓုနာ ရဟိ။

* ၁၂၀၃။

ဒါနိ ဝေါဒါစနံ ဒါဇ္ဇ၊ ထံ တတ္တံ ဇ္ဈ ဇ္ဇု အာဒယော။

သမာသော စာ’ဗျယီဘာဝေါ၊

ယာဒေသော စာ’ဗျယံ ဘဝေတိ။

ဣတိ အဗျယဝဂ္ဂေါ။

သာမညကဏ္ဍော တတိယော။

အဘိဓာနပ္ပဒီပိကာ သမတ္တာ။

နိဂမန

---

(ဓာန်၊၉၉။)

၁။

သဂ္ဂကဏ္ဍော စ ဘူကဏ္ဍော၊ တထာ သာမညကဏ္ဍိတိ။

ကဏ္ဍတ္တယာနွိတာ ဧသာ၊ အဘိဓာနပ္ပဒီပိကာ။

၂။

တိဒိဝေ မဟိယံ ဘုဇဂါဝသထေ၊

သကလတ္ထသမဝှယဒီပနိ’ယံ။

ဣဟ ယော ကုသလော မတိမာ သ နရော၊

ပဋု ဟောတိ မဟာမုနိနော ဝစနေ။

၃။

ပရက္ကမဘုဇော နာမ၊ ဘူပါလော ဂုဏဘူသနော။

လင်္ကာယ မာသိ တေဇဿီ၊ ဇယီ ကေသရိဝိက္ကမော။

၄။

ဝိဘိန္နံ စိရံ ဘိက္ခုသံဃံ နိကာယ-

တ္တယသ္မိဉ္စ ကာရေသိ သမ္မာ သမဂ္ဂေ။

သဒေဟံ’ဝ နိစ္စာဒရော ဒီဃကာလံ၊

မဟဂ္ဃေဟိ ရက္ခေသိ ယော ပစ္စယေဟိ။

၅။

ယေန လင်္ကာ ဝိဟာရေဟိ၊ ဂါမာ’ရာမပုရီဟိ စ။

ကိတ္တိယာ ဝိယ သမ္ဗာဓီ၊ ကတာ ခေတ္တေဟိ ဝါပိဟိ။

၆။

ယဿာ’သာဓာရဏံ ပတွာ၊ နုဂ္ဂဟံ သဗ္ဗကာမဒံ။

အဟမ္ပိ ဂန္ထကာရတ္တံ၊ ပတ္တော ဝိဗုဓဂေါစရံ။

၇။

ကာရိတေ တေန ပါသာဒ၊ ဂေါပုရာဒိဝိဘူသိတေ။

သဂ္ဂခဏ္ဍေ’ဝ တတ္တောယာ၊ သယသ္မိံ ပတိဗိမ္ဗိတေ။

၈။

မဟာဇေတဝနာ’ချမှိ၊ ဝိဟာရေ သာဓုသမ္မတေ။

သရောဂါမသမူဟမှိ၊ ဝသတာ သန္တဝုတ္တိနာ။

၉။

သဒ္ဓမ္မဋ္ဌိတိကာမေန၊ မောဂ္ဂလ္လာနေန ဓီမတာ။

ထေရေန ရစိတာ ဧသာ၊ အဘိဓာနပ္ပဒီပိကာတိ။

မာတိကာ

အဘိဓာနပ္ပဒီပိကာ ဗုဒ္ဓပ္ပဏာမော ဓမ္မပ္ပဏာမော သံဃပ္ပဏာမော ပဋိညာ ပရိဘာသာ ၁. သဂ္ဂကဏ္ဍ ၂. ဘူကဏ္ဍ ၁. ဘူမိဝဂ္ဂ ၂. ပုရဝဂ္ဂ ၃. နရဝဂ္ဂ ၄. စတုဗ္ဗဏ္ဏဝဂ္ဂ ၅. အရညဝဂ္ဂ ၆. အရညာဒိဝဂ္ဂ ၇. ပါတာလဝဂ္ဂ ၃. သာမညကဏ္ဍ ၁. ဝိသေသျာဓီနဝဂ္ဂ ၂. သံကိဏ္ဏဝဂ္ဂ ၃. အနေကတ္ထဝဂ္ဂ ၃. သာမညကဏ္ဍ ၄. အဗျယဝဂ္ဂ