နမော တဿ ဘဂဝတော အရဟတော သမ္မာသမ္ဗုဒ္ဓဿ
ခုဒ္ဒကနိကာယေ
ဇာတကပါဠိ
(ပဌမော ဘာဂေါ)
နမော တဿ ဘဂဝတော အရဟတော သမ္မာသမ္ဗုဒ္ဓဿ
၁။ ဧကကနိပါတော
၁။ အပဏ္ဏကဝဂ္ဂေါ
အပဏ္ဏကံ ဌာနမေကေ, ဒုတိယံ အာဟု တက္ကိကာ၊
ဧတဒညာယ မေဓာဝီ, တံ ဂဏှေ ယဒပဏ္ဏကန္တိ [တံ ဂဏှေယျ အပဏ္ဏကံ (က။)]။
အပဏ္ဏကဇာတကံ ပဌမံ။
အကိလာသုနော ဝဏ္ဏုပထေ [ဝဏ္ဏပထေ (က။)] ခဏန္တာ, ဥဒင်္ဂဏေ တတ္ထ ပပံ အဝိန္ဒုံ၊
ဧဝံ မုနီ ဝီရိယ [မုနိ ဝိရိယ (ပီ။), မုနိ ဝီရိယ (သျာ။ က။)] ဗလူပပန္နော, အကိလာသု ဝိန္ဒေ ဟဒယဿ သန္တိန္တိ။
ဝဏ္ဏုပထဇာတကံ ဒုတိယံ။
(ဇာ၊၁၊၂။)ဣဓ စေ နံ [ဣဓ စေ ဟိ နံ (သီ။ ပီ။)] ဝိရာဓေသိ, သဒ္ဓမ္မဿ နိယာမတံ [နိယာမကံ (သျာ။ က။)]၊
စိရံ တွံ အနုတပ္ပေသိ [အနုတပေဿသိ (သီ။ ပီ။), အနုတပ္ပိဿသိ (?)], သေရိဝါယံဝ ဝါဏိဇောတိ။
သေရိဝဝါဏိဇဇာတကံ တတိယံ။
အပ္ပကေနပိ မေဓာဝီ, ပါဘတေန ဝိစက္ခဏော၊
သမုဋ္ဌာပေတိ အတ္တာနံ, အဏုံ အဂ္ဂိံဝ သန္ဓမန္တိ။
စူဠ [စုလ္လ (သီ။), စုလ္လက (သျာ။ ပီ။)] သေဋ္ဌိဇာတကံ စတုတ္ထံ။
[ကိမဂ္ဃတီ တဏ္ဍုလနာဠိကာ စ, ဗာရာဏသီ အန္တရဗာဟိရာနိ၊ အဿပဉ္စသတေ တာနိ, ဧကာ တဏ္ဍုလနာဠိကာတိ၊ (သျာ။)] ကိမဂ္ဃတိ တဏ္ဍုလနာဠိကာယ, အဿာန မူလာယ ဝဒေဟိ ရာဇ [နာဠိကာ စ (သီ။), နာဠိကာယ (က။ သီ။ အဋ္ဌ။)]၊
ဗာရာဏသိံ သန္တရဗာဟိရတော [ဗာဟိရန္တံ (သီ။)], အယမဂ္ဃတိ တဏ္ဍုလနာဠိကာတိ [ကိမဂ္ဃတီ ဝဏ္ဍုလနာဠိကာ စ, ဗာရာဏသီ အန္တရဗာဟိရာနိ၊ အဿပဉ္စသတေ တာနိ, ဧကာ တဏ္ဍုလနာဠိကာတိ၊ (သျာ။)]။
တဏ္ဍုလနာဠိဇာတကံ ပဉ္စမံ။
ဟိရိဩတ္တပ္ပသမ္ပန္နာ, သုက္ကဓမ္မသမာဟိတာ၊
သန္တော သပ္ပုရိသာ လောကေ, ဒေဝဓမ္မာတိ ဝုစ္စရေတိ။
ဒေဝဓမ္မဇာတကံ ဆဋ္ဌံ။
ပုတ္တော တျာဟံ မဟာရာဇ, တွံ မံ ပေါသ ဇနာဓိပ၊
အညေပိ ဒေဝေါ ပေါသေတိ, ကိဉ္စ [ကိဉ္စိ (က။)] ဒေဝေါ သကံ ပဇန္တိ။
ကဋ္ဌဟာရိ [ကဋ္ဌဝါဟန (က။)] ဇာတကံ သတ္တမံ။
(ဇာ၊၁၊၃။)အပိ အတရမာနာနံ, ဖလာသာဝ သမိဇ္ဈတိ၊
ဝိပက္ကဗြဟ္မစရိယောသ္မိ, ဧဝံ ဇာနာဟိ ဂါမဏီတိ။
ဂါမဏိဇာတကံ အဋ္ဌမံ။
ဥတ္တမင်္ဂရုဟာ မယှံ, ဣမေ ဇာတာ ဝယောဟရာ၊
ပါတုဘူတာ ဒေဝဒူတာ, ပဗ္ဗဇ္ဇာသမယော မမာတိ။
မဃဒေဝ [မခါဒေဝ (သီ။ ပီ။), ဒေဝဒူတ (က။)] ဇာတကံ နဝမံ။
ယဉ္စ အညေ န ရက္ခန္တိ, ယော စ အညေ န ရက္ခတိ၊
သ ဝေ ရာဇ သုခံ သေတိ, ကာမေသု အနပေက္ခဝါတိ။
သုခဝိဟာရိဇာတကံ ဒသမံ။
အပဏ္ဏကဝဂ္ဂေါ ပဌမော။
တဿုဒ္ဒါနံ –
ဝရာပဏ္ဏက ဝဏ္ဏုပထ သေရိဝရော, သုဝိစက္ခဏ တဏ္ဍုလနာဠိကဿာ၊
ဟိရိ ပုတ္တဝရုတ္တဂါမဏိနာ, ယော စ န ရက္ခတိ တေန ဒသာတိ။
၂။ သီလဝဂ္ဂေါ
ဟောတိ သီလဝတံ အတ္ထော, ပဋိသန္ထာရ [ပဋိသန္ဓာရ (က။)] ဝုတ္တိနံ၊
လက္ခဏံ ပဿ အာယန္တံ, ဉာတိသံဃပုရက္ခတံ [ပုရက္ခိတံ (သျာ။), ပုရေက္ခိတံ (က။)]၊
အထ ပဿသိမံ ကာဠံ, သုဝိဟီနံဝ ဉာတိဘီတိ။
လက္ခဏမိဂဇာတကံ ပဌမံ။
(ဇာ၊၁၊၄။)နိဂြောဓမေဝ သေဝေယျ, န သာခမုပသံဝသေ၊
နိဂြောဓသ္မိံ မတံ သေယျော, ယဉ္စေ သာခသ္မိ [သာခသ္မိံ (သီ။ ပီ။)] ဇီဝိတန္တိ။
နိဂြောဓမိဂဇာတကံ ဒုတိယံ။
ဓိရတ္ထု ကဏ္ဍိနံ သလ္လံ, ပုရိသံ ဂါဠှဝေဓိနံ၊
ဓိရတ္ထု တံ ဇနပဒံ, ယတ္ထိတ္ထီ ပရိဏာယိကာ၊
တေ စာပိ ဓိက္ကိတာ [ဓိက္ကတာ (?)] သတ္တာ, ယေ ဣတ္ထီနံ ဝသံဂတာတိ။
ကဏ္ဍိဇာတကံ တတိယံ။
န ကိရတ္ထိ ရသေဟိ ပါပိယော, အာဝါသေဟိ ဝ [ဝါ (သဗ္ဗတ္ထ)] သန္ထဝေဟိ ဝါ၊
ဝါတမိဂံ ဂဟနနိဿိတံ [ဂေဟနိဿိတံ (သီ။ ပီ။)], ဝသမာနေသိ ရသေဟိ သဉ္ဇယောတိ။
ဝါတမိဂဇာတကံ စတုတ္ထံ။
အဋ္ဌက္ခုရံ ခရာဒိယေ, မိဂံ ဝင်္ကာတိဝင်္ကိနံ၊
သတ္တဟိ ကာလာတိက္ကန္တံ [သတ္တဟိ ကလာဟ’တိက္ကန္တံ (သီ။), သတ္တကာလေဟ’တိက္ကန္တံ (သျာ။), သတ္တဟိ ကာလာဟ’တိက္ကန္တံ (ပီ။)], န နံ ဩဝဒိတုဿဟေတိ။
ခရာဒိယဇာတကံ ပဉ္စမံ။
(ဇာ၊၁၊၅။)မိဂံ တိပလ္လတ္ထ [တိပလ္လတ္တ (က။)] မနေကမာယံ, အဋ္ဌက္ခုရံ အဍ္ဎရတ္တာပပါယိံ [အဍ္ဎရတ္တာဝပါယိံ (သီ။ ပီ။)]၊
ဧကေန သောတေန ဆမာဿသန္တော, ဆဟိ ကလာဟိတိဘောတိ [ကလာဟတိဘောတိ (သီ။ သျာ။ ပီ။)] ဘာဂိနေယျောတိ။
တိပလ္လတ္ထမိဂဇာတကံ ဆဋ္ဌံ။
ကာဠေ ဝါ ယဒိ ဝါ ဇုဏှေ, ယဒါ ဝါယတိ မာလုတော၊
ဝါတဇာနိ ဟိ သီတာနိ, ဥဘောတ္ထမပရာဇိတာတိ။
မာလုတဇာတကံ သတ္တမံ။
ဧဝံ စေ သတ္တာ ဇာနေယျုံ, ဒုက္ခာယံ ဇာတိသမ္ဘဝေါ၊
န ပါဏော ပါဏိနံ ဟညေ, ပါဏဃာတီ ဟိ သောစတီတိ။
မတကဘတ္တဇာတကံ အဋ္ဌမံ။
သစေ မုစ္စေ [မုဉ္စေ (သီ။ သျာ။ ပီ။)] ပေစ္စ မုစ္စေ [မုဉ္စေ (သီ။ သျာ။ ပီ။)], မုစ္စမာနော ဟိ ဗဇ္ဈတိ၊
န ဟေဝံ ဓီရာ မုစ္စန္တိ, မုတ္တိ ဗာလဿ ဗန္ဓနန္တိ။
အာယာစိတဘတ္တဇာတကံ နဝမံ။
ဒိသွာ ပဒမနုတ္တိဏ္ဏံ, ဒိသွာနောတရိတံ ပဒံ၊
နဠေန ဝါရိံ ပိဿာမ [ပိဝိဿာမ (သီ။ သျာ။ ပီ။)], နေဝ [န စ (က။)] မံ တွံ ဝဓိဿသီတိ။
နဠပါနဇာတကံ ဒသမံ။
သီလဝဂ္ဂေါ ဒုတိယော။
(ဇာ၊၁၊၆။)တဿုဒ္ဒါနံ –
အထ လက္ခဏ သာခ ဓိရတ္ထု ပုန, န ကိရတ္ထိ ရသေဟိ ခရာဒိယာ၊
အတိဘောတိ ဝရ [ရသ (သဗ္ဗတ္ထ)] မာလုတ ပါဏ, မုစ္စေန နဠအဝှယနေန ဘဝန္တိ ဒသာတိ။
၃။ ကုရုင်္ဂဝဂ္ဂေါ
ဉာတမေတံ ကုရုင်္ဂဿ, ယံ တွံ သေပဏ္ဏိ သိယျသိ [သေယျသိ (သီ။ သျာ။ ပီ။)]၊
အညံ သေပဏ္ဏိ ဂစ္ဆာမိ, န မေ တေ ရုစ္စတေ ဖလန္တိ။
ကုရုင်္ဂမိဂဇာတကံ ပဌမံ။
ယေ ကုက္ကုရာ ရာဇကုလမှိ ဝဒ္ဓါ, ကောလေယျကာ ဝဏ္ဏဗလူပပန္နာ၊
တေမေ န ဝဇ္ဈာ မယမသ္မ ဝဇ္ဈာ, နာယံ သဃစ္စာ ဒုဗ္ဗလဃာတိကာယန္တိ။
ကုက္ကုရဇာတကံ ဒုတိယံ။
အပိ ပဿေန သေမာနော, သလ္လေဘိ သလ္လလီကတော၊
သေယျောဝ ဝဠဝါ ဂေါဇော [ဘောဇ္ဇော (သီ။), ဘောဇ္ဈော (သျာ။ ပီ။)], ယုဉ္ဇ မညေဝ သာရထီတိ။
ဂေါဇာနီယ [ဘောဇာဇာနီယ (သီ။ သျာ။ ပီ။)] ဇာတကံ တတိယံ။
ယဒါ ယဒါ ယတ္ထ ယဒါ, ယတ္ထ ယတ္ထ ယဒါ ယဒါ၊
အာဇညော ကုရုတေ ဝေဂံ, ဟာယန္တိ တတ္ထ ဝါဠဝါတိ။
အာဇညဇာတကံ စတုတ္ထံ။
(ဇာ၊၁၊၇။)အညမညေဟိ တိတ္ထေဟိ, အဿံ ပါယေဟိ သာရထိ၊
အစ္စာသနဿ ပုရိသော, ပါယာသဿပိ တပ္ပတီတိ။
တိတ္ထဇာတကံ ပဉ္စမံ။
ပုရာဏစောရာန ဝစော နိသမ္မ, မဟိဠာမုခေါ ပေါထယမနွစာရီ၊
သုသညတာနဉှိ ဝစော နိသမ္မ, ဂဇုတ္တမော သဗ္ဗဂုဏေသု အဋ္ဌာတိ။
မဟိဠာမုခဇာတကံ ဆဋ္ဌံ။
နာလံ ကဗဠံ ပဒါတဝေ, န စ ပိဏ္ဍံ န ကုသေ န ဃံသိတုံ၊
မညာမိ အဘိဏှဒဿနာ, နာဂေါ သ္နေဟမကာသိ [သိနေဟမကာသိ (သီ။ သျာ။ ပီ။)] ကုက္ကုရေတိ။
အဘိဏှဇာတကံ သတ္တမံ။
မနုညမေဝ ဘာသေယျ, နာမနုညံ ကုဒါစနံ၊
မနုညံ ဘာသမာနဿ, ဂရုံ ဘာရံ ဥဒဒ္ဓရိ၊
ဓနဉ္စ နံ အလာဘေသိ, တေန စတ္တမနော အဟူတိ။
နန္ဒိဝိသာလဇာတကံ အဋ္ဌမံ။
ယတော ယတော ဂရု ဓုရံ, ယတော ဂမ္ဘီရဝတ္တနီ၊
တဒါဿု ကဏှံ ယုဉ္ဇန္တိ, သွာဿု တံ ဝဟတေ ဓုရန္တိ။
ကဏှဇာတကံ နဝမံ။
(ဇာ၊၁၊၈။)မာ မုနိကဿ ပိဟယိ, အာတုရန္နာနိ ဘုဉ္ဇတိ၊
အပ္ပေါဿုက္ကော ဘုသံ ခါဒ, ဧတံ ဒီဃာယုလက္ခဏန္တိ။
မုနိကဇာတကံ ဒသမံ။
ကုရုင်္ဂဝဂ္ဂေါ တတိယော။
တဿုဒ္ဒါနံ –
ကုရုင်္ဂဿ ကုက္ကုရဂေါဇဝရော, ပုန ဝါဠဝဿသိရိဝှယနော [သိရိဝယနော (သဗ္ဗတ္ထ)]၊
မဟိဠာမုခနာမနုညဝရော, ဝဟတေ ဓုရ မုနိကေန ဒသာတိ။
၄။ ကုလာဝကဝဂ္ဂေါ
ကုလာဝကာ မာတလိ သိမ္ဗလိသ္မိံ, ဤသာမုခေန ပရိဝဇ္ဇယဿု၊
ကာမံ စဇာမ အသုရေသု ပါဏံ, မာ မေ ဒိဇာ ဝိက္ကုလဝါ [မာယိမေ ဒိဇာ ဝိကုလာဝါ (သီ။ သျာ။ ပီ။)] အဟေသုန္တိ။
ကုလာဝကဇာတကံ ပဌမံ။
ရုဒံ မနုညံ ရုစိရာ စ ပိဋ္ဌိ, ဝေဠုရိယဝဏ္ဏူပနိဘာ [ဝဏ္ဏူပဋိဘာ (သျာ။), ဝဏ္ဏသန္နိဘာ (က။)] စ ဂီဝါ၊
ဗျာမမတ္တာနိ စ ပေခုဏာနိ, နစ္စေန တေ ဓီတရံ နော ဒဒါမီတိ။
နစ္စဇာတကံ ဒုတိယံ။
(ဇာ၊၁၊၉။)သမ္မောဒမာနာ ဂစ္ဆန္တိ, ဇာလမာဒါယ ပက္ခိနော၊
ယဒါ တေ ဝိဝဒိဿန္တိ, တဒါ ဧဟိန္တိ မေ ဝသန္တိ။
သမ္မောဒမာနဇာတကံ တတိယံ။
န မံ သီတံ န မံ ဥဏှံ, န မံ ဇာလသ္မိ ဗာဓနံ၊
ယဉ္စ မံ မညတေ မစ္ဆီ, အညံ သော ရတိယာ ဂတောတိ။
မစ္ဆဇာတကံ စတုတ္ထံ။
သန္တိ ပက္ခာ အပတနာ, သန္တိ ပါဒါ အဝဉ္စနာ၊
မာတာပိတာ စ နိက္ခန္တာ, ဇာတဝေဒ ပဋိက္ကမာတိ။
ဝဋ္ဋကဇာတကံ ပဉ္စမံ။
ယံ နိဿိတာ ဇဂတိရုဟံ ဝိဟင်္ဂမာ, သွာယံ အဂ္ဂိံ ပမုဉ္စတိ၊
ဒိသာ ဘဇထ ဝက္ကင်္ဂါ [ဝင်္ကင်္ဂါ (သျာ။)], ဇာတံ သရဏတော ဘယန္တိ။
သကုဏဇာတကံ ဆဋ္ဌံ။
ယေ ဝုဍ္ဎ [ဝဒ္ဓ (သီ။ ပီ။)] မပစာယန္တိ, နရာ ဓမ္မဿ ကောဝိဒါ၊
ဒိဋ္ဌေဝ ဓမ္မေ ပါသံသာ, သမ္ပရာယေ စ သုဂ္ဂတီတိ။
တိတ္တိရဇာတကံ သတ္တမံ။
နာစ္စန္တံ နိကတိပ္ပညော, နိကတျာ သုခမေဓတိ၊
အာရာဓေတိ နိကတိပ္ပညော [အာရာဓေ နိကတိပ္ပညော (ပီ။)], ဗကော ကက္ကဋကာမိဝါတိ။
ဗကဇာတကံ အဋ္ဌမံ။
(ဇာ၊၁၊၁၀။)မညေ သောဝဏ္ဏယော ရာသိ, သောဏ္ဏမာလာ စ နန္ဒကော၊
ယတ္ထ ဒါသော အာမဇာတော, ဌိတော ထုလ္လာနိ [ထူလာနိ (က။)] ဂဇ္ဇတီတိ။
နန္ဒဇာတကံ နဝမံ။
ကာမံ ပတာမိ နိရယံ, ဥဒ္ဓံပါဒေါ အဝံသိရော၊
နာနရိယံ ကရိဿာမိ, ဟန္ဒ ပိဏ္ဍံ ပဋိဂ္ဂဟာတိ။
ခဒိရင်္ဂါရဇာတကံ ဒသမံ။
ကုလာဝကဝဂ္ဂေါ စတုတ္ထော။
တဿုဒ္ဒါနံ –
သိရိမာတလိ ဓီတရ ပက္ခိဝရော, ရတိယာဂတော မာတာပိတာ စ ပုန၊
ဇဂတီရုဟ ဝုဍ္ဎ သုကက္ကဋကော, တထာ နန္ဒကပိဏ္ဍဝရေန ဒသာတိ။
၅။ အတ္ထကာမဝဂ္ဂေါ
ယော အတ္ထကာမဿ ဟိတာနုကမ္ပိနော, ဩဝဇ္ဇမာနော န ကရောတိ သာသနံ၊
အဇိယာ ပါဒမောလမ္ဗ [ပါဒမောလုမ္ဗ (သီ။ သျာ။ ပီ။)], မိတ္တကော ဝိယ သောစတီတိ။
လောသကဇာတကံ ပဌမံ။
(ဇာ၊၁၊၁၁။)ယော အတ္ထကာမဿ ဟိတာနုကမ္ပိနော, ဩဝဇ္ဇမာနော န ကရောတိ သာသနံ၊
ကပေါတကဿ ဝစနံ အကတွာ, အမိတ္တဟတ္ထတ္ထဂတောဝ သေတီတိ။
ကပေါတဇာတကံ ဒုတိယံ။
ယော အတ္ထကာမဿ ဟိတာနုကမ္ပိနော, ဩဝဇ္ဇမာနော န ကရောတိ သာသနံ၊
ဧဝံ သော နိဟတော သေတိ, ဝေဠုကဿ ယထာ ပိတာတိ။
ဝေဠုကဇာတကံ တတိယံ။
သေယျော အမိတ္တော မတိယာ ဥပေတော, န တွေဝ မိတ္တော မတိဝိပ္ပဟီနော၊
မကသံ ဝဓိဿန္တိ ဟိ ဧဠမူဂေါ, ပုတ္တော ပိတု အဗ္ဘိဒါ ဥတ္တမင်္ဂန္တိ။
မကသဇာတကံ စတုတ္ထံ။
သေယျော အမိတ္တော မေဓာဝီ, ယဉ္စေ ဗာလာနုကမ္ပကော၊
ပဿ ရောဟိဏိကံ ဇမ္မိံ, မာတရံ ဟန္တွာန သောစတီတိ။
ရောဟိဏိဇာတကံ ပဉ္စမံ။
န ဝေ အနတ္ထကုသလေန, အတ္ထစရိယာ သုခါဝဟာ၊
ဟာပေတိ အတ္ထံ ဒုမ္မေဓော, ကပိ အာရာမိကော ယထာတိ။
အာရာမဒူသကဇာတကံ ဆဋ္ဌံ။
(ဇာ၊၁၊၁၂။)န ဝေ အနတ္ထကုသလေန, အတ္ထစရိယာ သုခါဝဟာ၊
ဟာပေတိ အတ္ထံ ဒုမ္မေဓော, ကောဏ္ဍညော ဝါရုဏိံ ယထာတိ။
ဝါရုဏိဒူသကဇာတကံ သတ္တမံ။
အနုပါယေန ယော အတ္ထံ, ဣစ္ဆတိ သော ဝိဟညတိ၊
စေတာ ဟနိံသု ဝေဒဗ္ဗံ [ဝေဒဗ္ဘံ (သီ။ ပီ။)], သဗ္ဗေ တေ ဗျသနမဇ္ဈဂူတိ။
ဝေဒဗ္ဗ [ဝေဒဗ္ဘ (သီ။ ပီ။)] ဇာတကံ အဋ္ဌမံ။
နက္ခတ္တံ ပဋိမာနေန္တံ, အတ္ထော ဗာလံ ဥပစ္စဂါ၊
အတ္ထော အတ္ထဿ နက္ခတ္တံ, ကိံ ကရိဿန္တိ တာရကာတိ။
နက္ခတ္တဇာတကံ နဝမံ။
ဒုမ္မေဓာနံ သဟဿေန, ယညော မေ ဥပယာစိတော၊
ဣဒါနိ ခေါဟံ ယဇိဿာမိ, ဗဟု [ဗဟူ (သီ။ ပီ။), ဗဟုံ (က။)] အဓမ္မိကော ဇနောတိ။
ဒုမ္မေဓဇာတကံ ဒသမံ။
အတ္ထကာမဝဂ္ဂေါ ပဉ္စမော။
တဿုဒ္ဒါနံ –
အထ မိတ္တက မာတု ကပေါတဝရော, တထာ ဝေဠူက ဧဠမူဂေါ ရောဟိဏီ၊
ကပိ ဝါရုဏိ စေတစရာ စ ပုန, တထာ တာရက ယညဝရေန ဒသာတိ။
ပဌမော ပဏ္ဏာသကော။
(ဇာ၊၁၊၁၃။)၆။ အာသီသဝဂ္ဂေါ
အာသီသေထေဝ [အာသိံသေထေဝ (သီ။ သျာ။ ပီ။)] ပုရိသော, န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ, ယထာ ဣစ္ဆိံ တထာ အဟူတိ။
မဟာသီလဝဇာတကံ ပဌမံ။
ဝါယမေထေဝ ပုရိသော, န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ, ဥဒကာ ထလမုဗ္ဘတန္တိ။
စူဠဇနကဇာတကံ ဒုတိယံ။
တထေဝ ပုဏ္ဏာ ပါတိယော, အညာယံ ဝတ္တတေ ကထာ၊
အာကာရဏေန [အာကာရကေန (သီ။ သျာ။ ပီ။)] ဇာနာမိ, န စာယံ ဘဒ္ဒိကာ သုရာတိ။
ပုဏ္ဏပါတိဇာတကံ တတိယံ။
နာယံ ရုက္ခော ဒုရာရုဟော, နပိ ဂါမတော အာရကာ၊
အာကာရဏေန ဇာနာမိ, နာယံ သာဒုဖလော ဒုမောတိ။
ကိံဖလဇာတကံ စတုတ္ထံ။
ယော အလီနေန စိတ္တေန, အလီနမနသော နရော၊
ဘာဝေတိ ကုသလံ ဓမ္မံ, ယောဂက္ခေမဿ ပတ္တိယာ၊
ပါပုဏေ အနုပုဗ္ဗေန, သဗ္ဗသံယောဇနက္ခယန္တိ။
ပဉ္စာဝုဓဇာတကံ ပဉ္စမံ။
(ဇာ၊၁၊၁၄။)ယော ပဟဋ္ဌေန စိတ္တေန, ပဟဋ္ဌမနသော နရော၊
ဘာဝေတိ ကုသလံ ဓမ္မံ, ယောဂက္ခေမဿ ပတ္တိယာ၊
ပါပုဏေ အနုပုဗ္ဗေန, သဗ္ဗသံယောဇနက္ခယန္တိ။
ကဉ္စနက္ခန္ဓဇာတကံ ဆဋ္ဌံ။
ယဿေတေ စတုရော ဓမ္မာ, ဝါနရိန္ဒ ယထာ တဝ၊
သစ္စံ ဓမ္မော ဓိတိ [ဓိတီ (သီ။ ပီ။)] စာဂေါ, ဒိဋ္ဌံ သော အတိဝတ္တတီတိ။
ဝါနရိန္ဒဇာတကံ သတ္တမံ။
ယဿေတေ စ [ယဿ ဧတေ (သီ။ ပီ။)] တယော ဓမ္မာ, ဝါနရိန္ဒ ယထာ တဝ၊
ဒက္ခိယံ သူရိယံ ပညာ, ဒိဋ္ဌံ သော အတိဝတ္တတီတိ။
တယောဓမ္မဇာတကံ အဋ္ဌမံ။
ဓမေ ဓမေ နာတိဓမေ, အတိဓန္တဉှိ ပါပကံ၊
ဓန္တေန ဟိ သတံ လဒ္ဓံ, အတိဓန္တေန နာသိတန္တိ။
ဘေရိဝါဒကဇာတကံ နဝမံ။
ဓမေ ဓမေ နာတိဓမေ, အတိဓန္တဉှိ ပါပကံ၊
ဓန္တေနာဓိဂတာ ဘောဂါ, တေ တာတော ဝိဓမီ ဓမန္တိ။
သင်္ခဓမဇာတကံ ဒသမံ။
အာသီသဝဂ္ဂေါ ဆဋ္ဌော။
(ဇာ၊၁၊၁၅။)တဿုဒ္ဒါနံ –
ယထာ ဣစ္ဆိံ တထာဟုဒကာ ထလာ, သုရ သာဒုဖလော စ အလီနမနော၊
သမ္ပဟဋ္ဌမနော စတုရော စ တယော, သတလဒ္ဓက ဘောဂဓနေန ဒသာတိ။
၇။ ဣတ္ထိဝဂ္ဂေါ
အသာ လောကိတ္ထိယော နာမ, ဝေလာ တာသံ န ဝိဇ္ဇတိ၊
သာရတ္တာ စ ပဂဗ္ဘာ စ, သိခီ သဗ္ဗဃသော ယထာ၊
တာ ဟိတွာ ပဗ္ဗဇိဿာမိ, ဝိဝေကမနုဗြူဟယန္တိ။
အသာတမန္တဇာတကံ ပဌမံ။
ယံ ဗြာဟ္မဏော အဝါဒေသိ, ဝီဏံ သမုခဝေဌိတော၊
အဏ္ဍဘူတာ ဘတာ ဘရိယာ, တာသု ကော ဇာတု ဝိဿသေတိ။
အဏ္ဍဘူတဇာတကံ ဒုတိယံ။
ကောဓနာ အကတညူ စ, ပိသုဏာ မိတ္တဘေဒိကာ [ပိသုဏာ စ ဝိဘေဒိကာ (သီ။ သျာ။ ပီ။)]၊
ဗြဟ္မစရိယံ စရ ဘိက္ခု, သော သုခံ န ဝိဟာဟသီတိ [ပိဟာဟိသီတိ (သီ။ သျာ။ ပီ။), ဝိဟာယသိ (က။)]။
တက္ကပဏ္ဍိတဇာတကံ [တက္ကဇာတကံ (သီ။ သျာ။ ပီ။ အဋ္ဌ။)] တတိယံ။
မာ သု နန္ဒိ ဣစ္ဆတိ မံ, မာ သု သောစိ န မိစ္ဆတိ [န ဣစ္ဆတိ (သီ။ သျာ။ ပီ။)]၊
ထီနံ ဘာဝေါ ဒုရာဇာနော, မစ္ဆဿေဝေါဒကေ ဂတန္တိ။
ဒုရာဇာနဇာတကံ စတုတ္ထံ။
(ဇာ၊၁၊၁၆။)ယထာ နဒီ စ ပန္ထော စ, ပါနာဂါရံ သဘာ ပပါ၊
ဧဝံ လောကိတ္ထိယော နာမ, နာသံ ကုဇ္ဈန္တိ ပဏ္ဍိတာတိ။
အနဘိရတိဇာတကံ ပဉ္စမံ။
ဧကာ ဣစ္ဆာ ပုရေ အာသိ, အလဒ္ဓါ မုဒုလက္ခဏံ၊
ယတော လဒ္ဓါ အဠာရက္ခီ, ဣစ္ဆာ ဣစ္ဆံ ဝိဇာယထာတိ။
မုဒုလက္ခဏဇာတကံ ဆဋ္ဌံ။
ဥစ္ဆင်္ဂေ ဒေဝ မေ ပုတ္တော, ပထေ ဓာဝန္တိယာ ပတိ၊
တဉ္စ ဒေသံ န ပဿာမိ, ယတော သောဒရိယမာနယေတိ [သောဒရိယံ နယေ (က။)]။
ဥစ္ဆင်္ဂဇာတကံ သတ္တမံ။
ယသ္မိံ မနော နိဝိသတိ, စိတ္တဉ္စာပိ [စိတ္တံ ဝါပိ (ကတ္ထစိ)] ပသီဒတိ၊
အဒိဋ္ဌပုဗ္ဗကေ ပေါသေ, ကာမံ တသ္မိမ္ပိ ဝိဿသေတိ။
သာကေတဇာတကံ အဋ္ဌမံ။
ဓိရတ္ထု တံ ဝိသံ ဝန္တံ, ယမဟံ ဇီဝိတကာရဏာ၊
ဝန္တံ ပစ္စာဝမိဿာမိ [ပစ္စာဟရိဿာမိ (က။)], မတံ မေ ဇီဝိတာ ဝရန္တိ။
ဝိသဝန္တဇာတကံ နဝမံ။
န တံ ဇိတံ သာဓု ဇိတံ, ယံ ဇိတံ အဝဇီယတိ၊
တံ ခေါ ဇိတံ သာဓု ဇိတံ, ယံ ဇိတံ နာဝဇီယတီတိ။
ကုဒ္ဒါလဇာတကံ ဒသမံ။
ဣတ္ထိဝဂ္ဂေါ သတ္တမော။
(ဇာ၊၁၊၁၇။)တဿုဒ္ဒါနံ –
သိခီသဗ္ဗဃသောပိ စ ဝီဏဝရော, ပိသုဏာ မိတ္တဘေဒိကာ နန္ဒီ နဒီ၊
မုဒုလက္ခဏ သောဒရိယာ စ မနော, ဝိသ သာဓုဇိတေန ဘဝန္တိ ဒသာတိ။
၈။ ဝရုဏဝဂ္ဂေါ
ယော ပုဗ္ဗေ ကရဏီယာနိ, ပစ္ဆာ သော ကာတုမိစ္ဆတိ၊
ဝရုဏကဋ္ဌ [ဝရဏကဋ္ဌ (သီ။ ပီ။)] ဘဉ္ဇောဝ, သ ပစ္ဆာ မနုတပ္ပတီတိ။
ဝရုဏဇာတကံ ပဌမံ။
အကတညုဿ ပေါသဿ, နိစ္စံ ဝိဝရဒဿိနော၊
သဗ္ဗံ စေ ပထဝိံ [ပဌဝိံ (သီ။ သျာ။ ပီ။)] ဒဇ္ဇာ, နေဝ နံ အဘိရာဓယေတိ။
သီလဝဟတ္ထိဇာတကံ ဒုတိယံ။
သစ္စံ ကိရေဝမာဟံသု, နရာ ဧကစ္စိယာ ဣဓ၊
ကဋ္ဌံ နိပ္လဝိတံ [ဝိပ္လါဝိတံ (သီ။ ပီ။)] သေယျော, န တွေဝေကစ္စိယော နရောတိ။
သစ္စံကိရဇာတကံ တတိယံ။
သာဓူ သမ္ဗဟုလာ ဉာတီ, အပိ ရုက္ခာ အရညဇာ၊
ဝါတော ဝဟတိ ဧကဋ္ဌံ, ဗြဟန္တမ္ပိ ဝနပ္ပတိန္တိ။
ရုက္ခဓမ္မဇာတကံ စတုတ္ထံ။
(ဇာ၊၁၊၁၈။)အဘိတ္ထနယ ပဇ္ဇုန္န, နိဓိံ ကာကဿ နာသယ၊
ကာကံ သောကာယ ရန္ဓေဟိ, မဉ္စ သောကာ ပမောစယာတိ။
မစ္ဆဇာတကံ ပဉ္စမံ။
အသင်္ကိယောမှိ ဂါမမှိ, အရညေ နတ္ထိ မေ ဘယံ၊
ဥဇုံ မဂ္ဂံ သမာရူဠှော, မေတ္တာယ ကရုဏာယ စာတိ။
အသင်္ကိယဇာတကံ ဆဋ္ဌံ။
ဥသဘာ ရုက္ခာ ဂါဝိယော ဂဝါ စ, အဿော ကံသော သိင်္ဂါလီ [သိဂါသီ (သီ။ သျာ။ ပီ။)] စ ကုမ္ဘော၊
ပေါက္ခရဏီ စ အပါကစန္ဒနံ, လာဗူနိ သီဒန္တိ သိလာ ပ္လဝန္တိ။
မဏ္ဍူကိယော ကဏှသပ္ပေ ဂိလန္တိ, ကာကံ သုပဏ္ဏာ ပရိဝါရယန္တိ၊
တသာ ဝကာ ဧဠကာနံ ဘယာဟိ, ဝိပရိယာသော [ဝိပရိယာယော (သျာ။ က။)] ဝတ္တတိ နယိဓ မတ္ထီတိ။
မဟာသုပိနဇာတကံ သတ္တမံ။
ဥဘော ခဉ္ဇာ ဥဘော ကုဏီ, ဥဘော ဝိသမစက္ခုကာ [စက္ခုလာ (သီ။ ပီ။)]၊
ဥဘိန္နံ ပိဠကာ [ပီဠကာ (သျာ။)] ဇာတာ, နာဟံ ပဿာမိ ဣလ္လိသန္တိ။
ဣလ္လိသဇာတကံ အဋ္ဌမံ။
(ဇာ၊၁၊၁၉။)ယတော ဝိလုတ္တာ စ ဟတာ စ ဂါဝေါ, ဒဍ္ဎာနိ ဂေဟာနိ ဇနော စ နီတော၊
အထာဂမာ ပုတ္တဟတာယ ပုတ္တော, ခရဿရံ ဍိဏ္ဍိမံ [ဒေဏ္ဍိမံ (သီ။ သျာ။ ပီ။), ဍိန္ဒိမံ (က။)] ဝါဒယန္တောတိ။
ခရဿရဇာတကံ နဝမံ။
ယံ တေ ပဝိကတ္ထိတံ ပုရေ, အထ တေ ပူတိသရာ သဇန္တိ ပစ္ဆာ၊
ဥဘယံ န သမေတိ ဘီမသေန, ယုဒ္ဓကထာ စ ဣဒဉ္စ တေ ဝိဟညန္တိ။
ဘီမသေနဇာတကံ ဒသမံ။
ဝရုဏဝဂ္ဂေါ [ဝရဏဝဂ္ဂေါ (သီ။ ပီ။)] အဋ္ဌမော။
တဿုဒ္ဒါနံ –
ဝရုဏာ အကတညူဝရေ တု သစ္စဝရံ, သဝနပ္ပတိနာ စ အဘိတ္ထနယ၊
ကရုဏာယ သိလာပ္လဝ ဣလ္လိသတော, ပုန ဍိဏ္ဍိမပူတိသရေန ဒသာတိ။
၉။ အပါယိမှဝဂ္ဂေါ
အပါယိမှ အနစ္စိမှ, အဂါယိမှ ရုဒိမှ စ၊
ဝိသညိကရဏိံ ပိတွာ [ပီတွာ (သီ။ သျာ။ ပီ။)], ဒိဋ္ဌာ နာဟုမှ ဝါနရာတိ။
သုရာပါနဇာတကံ ပဌမံ။
(ဇာ၊၁၊၂၀။)အတိက္ကမ္မ ရမဏကံ, သဒါမတ္တဉ္စ ဒူဘကံ၊
သွာသိ ပါသာဏမာသီနော, ယသ္မာ ဇီဝံ န မောက္ခသီတိ။
မိတ္တဝိန္ဒကဇာတကံ ဒုတိယံ။
မိတ္တော ဟဝေ သတ္တပဒေန ဟောတိ, သဟာယော ပန ဒွါဒသကေန ဟောတိ၊
မာသဍ္ဎမာသေန စ ဉာတိ ဟောတိ, တတုတ္တရိံ အတ္တသမောပိ ဟောတိ၊
သောဟံ ကထံ အတ္တသုခဿ ဟေတု, စိရသန္ထုတံ [စိရသန္ဓဝံ (က။), စိရသတ္ထုနံ (ပီ။)] ကာဠကဏ္ဏိံ ဇဟေယျန္တိ။
ကာလကဏ္ဏိဇာတကံ တတိယံ။
အာရောဂျမိစ္ဆေ ပရမဉ္စ လာဘံ, သီလဉ္စ ဝုဒ္ဓါနုမတံ သုတဉ္စ၊
ဓမ္မာနုဝတ္တီ စ အလီနတာ စ, အတ္ထဿ ဒွါရာ ပမုခါ ဆဠေတေတိ။
အတ္ထဿဒွါရဇာတကံ စတုတ္ထံ။
အာယတိံ ဒေါသံ နာညာယ, ယော ကာမေ ပဋိသေဝတိ၊
ဝိပါကန္တေ ဟနန္တိ နံ, ကိံပက္ကမိဝ ဘက္ခိတန္တိ။
ကိံပက္ကဇာတကံ ပဉ္စမံ။
သီလံ ကိရေဝ ကလျာဏံ, သီလံ လောကေ အနုတ္တရံ၊
ပဿ ဃောရဝိသော နာဂေါ, သီလဝါတိ န ဟညတီတိ။
သီလဝီမံသကဇာတကံ ဆဋ္ဌံ။
(ဇာ၊၁၊၂၁။)ယဿ မင်္ဂလာ သမူဟတာသေ [သမူဟတာ (သီ။ သျာ။ ပီ။ သု။ နိ။ ၃၆၂], ဥပ္ပါတာ [ဥပ္ပါဒါ (ပီ။)] သုပိနာ စ လက္ခဏာ စ၊
သော [သ (သီ။ ပီ။ က။)] မင်္ဂလဒေါသဝီတိဝတ္တော, ယုဂယောဂါဓိဂတော န ဇာတုမေတီတိ။
မင်္ဂလဇာတကံ သတ္တမံ။
ကလျာဏိမေဝ မုဉ္စေယျ, န ဟိ မုဉ္စေယျ ပါပိကံ၊
မောက္ခော ကလျာဏိယာ သာဓု, မုတွာ တပ္ပတိ ပါပိကန္တိ။
သာရမ္ဘဇာတကံ အဋ္ဌမံ။
ဝါစာဝ ကိရ တေ အာသိ, သဏှာ သခိလဘာဏိနော၊
တိဏမတ္တေ အသဇ္ဇိတ္ထော, နော စ နိက္ခသတံ ဟရန္တိ။
ကုဟကဇာတကံ နဝမံ။
ယော ပုဗ္ဗေ ကတကလျာဏော, ကတတ္ထော နာဝဗုဇ္ဈတိ၊
ပစ္ဆာ ကိစ္စေ သမုပ္ပန္နေ, ကတ္တာရံ နာဓိဂစ္ဆတီတိ။
အကတညုဇာတကံ ဒသမံ။
အပါယိမှဝဂ္ဂေါ နဝမော။
တဿုဒ္ဒါနံ –
အပါယိမှ စ ဒူဘကံ သတ္တပဒံ, ဆဠဒွရ စ အာယတိနာ စ ပုန၊
အဟိသီလဝ မင်္ဂလိ ပါပိကဿာ, သတံနိက္ခ ကတတ္ထဝရေန ဒသာတိ။
(ဇာ၊၁၊၂၂။)၁၀။ လိတ္တဝဂ္ဂေါ
လိတ္တံ ပရမေန တေဇသာ, ဂိလမက္ခံ ပုရိသော န ဗုဇ္ဈတိ၊
ဂိလ ရေ ဂိလ ပါပဓုတ္တက, ပစ္ဆာ တေ ကဋုကံ ဘဝိဿတီတိ။
လိတ္တဇာတကံ ပဌမံ။
ဥက္ကဋ္ဌေ သူရမိစ္ဆန္တိ, မန္တီသု အကုတူဟလံ၊
ပိယဉ္စ အန္နပါနမှိ, အတ္ထေ ဇာတေ စ ပဏ္ဍိတန္တိ။
မဟာသာရဇာတကံ ဒုတိယံ။
န ဝိဿသေ အဝိဿတ္ထေ, ဝိဿတ္ထေပိ န ဝိဿသေ၊
ဝိဿာသာ ဘယမနွေတိ, သီဟံဝ မိဂမာတုကာတိ [မိဂမာတုယာ (က။)]။
ဝိသာသဘောဇနဇာတကံ တတိယံ။
သောတတ္တော သောသိန္ဒော [သောသီတော (သီ။ သျာ။ ပီ။), သောသိနော (က။)] စေဝ, ဧကော ဘိံသနကေ ဝနေ၊
နဂ္ဂေါ န စဂ္ဂိမာသီနော, ဧသနာပသုတော မုနီတိ။
လောမဟံသဇာတကံ စတုတ္ထံ။
အနိစ္စာ ဝတ သင်္ခါရာ, ဥပ္ပါဒဝယဓမ္မိနော၊
ဥပ္ပဇ္ဇိတွာ နိရုဇ္ဈန္တိ, တေသံ ဝူပသမော သုခေါတိ။
မဟာသုဒဿနဇာတကံ ပဉ္စမံ။
သမတိတ္တိကံ အနဝသေကံ, တေလပတ္တံ ယထာ ပရိဟရေယျ၊
ဧဝံ သစိတ္တမနုရက္ခေ, ပတ္ထယာနော ဒိသံ အဂတပုဗ္ဗန္တိ။
တေလပတ္တဇာတကံ ဆဋ္ဌံ။
(ဇာ၊၁၊၂၃။)ဇီဝကဉ္စ မတံ ဒိသွာ, ဓနပါလိဉ္စ ဒုဂ္ဂတံ၊
ပန္ထကဉ္စ ဝနေ မူဠှံ, ပါပကော ပုနရာဂတောတိ။
နာမသိဒ္ဓိဇာတကံ သတ္တမံ။
သာဓု ခေါ ပဏ္ဍိတော နာမ, န တွေဝ အတိပဏ္ဍိတော၊
အတိပဏ္ဍိတေန ပုတ္တေန, မနမှိ ဥပကူဠိတောတိ [ဥပကူလိတောတိ (သီ။), ဥပကုဋ္ဌိတောတိ (သျာ။), ဥပကုဋိတော (က။)]။
ကူဋဝါဏိဇဇာတကံ အဋ္ဌမံ။
ပရောသဟဿမ္ပိ သမာဂတာနံ, ကန္ဒေယျုံ တေ ဝဿသတံ အပညာ၊
ဧကောဝ သေယျော ပုရိသော သပညော, ယော ဘာသိတဿ ဝိဇာနာတိ အတ္ထန္တိ။
ပရောသဟဿဇာတကံ နဝမံ။
အသာတံ သာတရူပေန, ပိယရူပေန အပ္ပိယံ၊
ဒုက္ခံ သုခဿ ရူပေန, ပမတ္တမတိဝတ္တတီတိ။
အသာတရူပဇာတကံ ဒသမံ။
လိတ္တဝဂ္ဂေါ ဒသမော။
တဿုဒ္ဒါနံ –
ဂိလမက္ခကုတူဟလ မာတုကဿာ, မုနိနာ စ အနိစ္စတ ပတ္တဝရံ၊
ဓနပါလိဝရော အတိပဏ္ဍိတကော, သပရောသဟဿအသာတဒသာတိ။
မဇ္ဈိမော ပဏ္ဏာသကော။
(ဇာ၊၁၊၂၄။)၁၁။ ပရောသတဝဂ္ဂေါ
ပရောသတံ စေပိ သမာဂတာနံ, ဈာယေယျုံ တေ ဝဿသတံ အပညာ၊
ဧကောဝ သေယျော ပုရိသော သပညော, ယော ဘာသိတဿ ဝိဇာနာတိ အတ္ထန္တိ။
ပရောသတဇာတကံ ပဌမံ။
ယော ဒုက္ခဖုဋ္ဌာယ ဘဝေယျ တာဏံ, သော မေ ပိတာ ဒုဗ္ဘိ [ဒူဘိ (သီ။ ပီ။)] ဝနေ ကရောတိ၊
သာ ကဿ ကန္ဒာမိ ဝနဿ မဇ္ဈေ, ယော တာယိတာ သော သဟသံ [သဟသာ (သီ။ သျာ။ ပီ။)] ကရောတီတိ။
ပဏ္ဏိကဇာတကံ ဒုတိယံ။
ယတ္ထ ဝေရီ နိဝိသတိ [နိဝသတိ (သီ။ က။)], န ဝသေ တတ္ထ ပဏ္ဍိတော၊
ဧကရတ္တံ ဒိရတ္တံ ဝါ, ဒုက္ခံ ဝသတိ ဝေရိသူတိ။
ဝေရိဇာတကံ တတိယံ။
စတုဗ္ဘိ အဋ္ဌဇ္ဈဂမာ, အဋ္ဌာဟိပိ စ သောဠသ၊
သောဠသာဟိ စ ဗာတ္တိံသ [ဗတ္တိံသ (သီ။ သျာ။ ပီ။)], အတြိစ္ဆံ စက္ကမာသဒေါ၊
ဣစ္ဆာဟတဿ ပေါသဿ, စက္ကံ ဘမတိ မတ္ထကေတိ။
မိတ္တဝိန္ဒကဇာတကံ စတုတ္ထံ။
(ဇာ၊၁၊၂၅။)ဗဟုမ္ပေတံ ဝနေ ကဋ္ဌံ, ဝါတော ဘဉ္ဇတိ ဒုဗ္ဗလံ၊
တဿ စေ ဘာယသီ နာဂ, ကိသော နူန ဘဝိဿသီတိ။
ဒုဗ္ဗလကဋ္ဌဇာတကံ ပဉ္စမံ။
သုခံ ဝတ မံ ဇီဝန္တံ [သုခကံ ဝတ ဇီဝံ (က။)], ပစမာနာ ဥဒဉ္စနီ၊
စောရီ ဇာယပ္ပဝါဒေန, တေလံ လောဏဉ္စ ယာစတီတိ။
ဥဒဉ္စနီဇာတကံ ဆဋ္ဌံ။
သာဓု ခေါ သိပ္ပကံ နာမ, အပိ ယာဒိသ ကီဒိသံ၊
ပဿ ခဉ္ဇပ္ပဟာရေန, လဒ္ဓါ ဂါမာ စတုဒ္ဒိသာတိ။
သာလိတ္တကဇာတကံ သတ္တမံ။
သိက္ခေယျ သိက္ခိတဗ္ဗာနိ, သန္တိ တစ္ဆန္ဒိနော [သစ္ဆန္ဒိနော (သီ။ ပီ။)] ဇနာ၊
ဗာဟိယာ ဟိ [ပိ (သီ။ သျာ။ ပီ။)] သုဟန္နေန, ရာဇာနမဘိရာဓယီတိ။
ဗာဟိယဇာတကံ အဋ္ဌမံ။
ယထန္နော ပုရိသော ဟောတိ, တထန္နာ တဿ ဒေဝတာ၊
အာဟရေတံ ကုဏ္ဍပူဝံ [ကဏံ ပူဝံ (သီ။ ပီ။)], မာ မေ ဘာဂံ ဝိနာသယာတိ။
ကုဏ္ဍပူဝဇာတကံ နဝမံ။
(ဇာ၊၁၊၂၆။)သဗ္ဗသံဟာရကော [သဗ္ဗသာဟာရကော (က။)] နတ္ထိ, သုဒ္ဓံ ကင်္ဂု ပဝါယတိ၊
အလိကံ ဘာယတိယံ ဓုတ္တီ, သစ္စမာဟ မဟလ္လိကာတိ။
သဗ္ဗသံဟာရကပဉှဇာတကံ ဒသမံ။
ပရောသတဝဂ္ဂေါ ဧကာဒသမော။
တဿုဒ္ဒါနံ –
သပရောသတ တာယိတ ဝေရီ ပုန, ဘမစက္ကထ နာဂသိရိဝှယနော၊
သုခကဉ္စ ဝတ သိပ္ပက ဗာဟိယာ, ကုဏ္ဍပူဝ မဟလ္လိကကာ စ ဒသာတိ။
၁၂။ ဟံစိဝဂ္ဂေါ
ဟံစိ [ဟံသိ (သီ။ သျာ။), ဟဉ္စိ (?)] တုဝံ ဧဝမညသိ သေယျော, ပုတ္တေန ပိတာတိ ရာဇသေဋ္ဌ၊
ဟန္ဒဿတရဿ တေ အယံ, အဿတရဿ ဟိ ဂဒြဘော ပိတာတိ။
ဂဒြဘပဉှဇာတကံ ပဌမံ။
ယေန သတ္တုဗိလင်္ဂါ စ, ဒိဂုဏပလာသော စ ပုပ္ဖိတော၊
ယေန ဒဒါမိ [ယေနာ’ဒါမိ (သီ။ သျာ။)] တေန ဝဒါမိ, ယေန န ဒဒါမိ [ယေန နာ’ဒါမိ (သီ။ သျာ။)] န တေန ဝဒါမိ၊
ဧသ မဂ္ဂေါ ယဝမဇ္ဈကဿ, ဧတံ ဆန္နပထံ ဝိဇာနာဟီတိ။
အမရာဒေဝီပဉှဇာတကံ ဒုတိယံ။
(ဇာ၊၁၊၂၇။)သဒ္ဒဟာသိ သိင်္ဂါလဿ [သိဂါလဿ (သီ။ သျာ။ ပီ။)], သုရာပီတဿ ဗြာဟ္မဏ၊
သိပ္ပိကာနံ သတံ နတ္ထိ, ကုတော ကံသသတာ ဒုဝေတိ။
သိင်္ဂါလဇာတကံ တတိယံ။
ဗဟုစိန္တီ အပ္ပစိန္တီ, ဥဘော ဇာလေ အဗဇ္ဈရေ၊
မိတစိန္တီ ပမောစေသီ, ဥဘော တတ္ထ သမာဂတာတိ။
မိတစိန္တိဇာတကံ စတုတ္ထံ။
ယာယည [ယာယညေ (က။)] မနုသာသတိ, သယံ လောလုပ္ပစာရိနီ၊
သာယံ ဝိပက္ခိကာ သေတိ, ဟတာ စက္ကေန သာသိကာတိ [သာလိကာတိ (သီ။ သျာ။ ပီ။)]။
အနုသာသိကဇာတကံ ပဉ္စမံ။
အတိကရမကရာစရိယ, မယှမ္ပေတံ န ရုစ္စတိ၊
စတုတ္ထေ လင်္ဃယိတွာန, ပဉ္စမာယသိ အာဝုတောတိ။
ဒုဗ္ဗစဇာတကံ ဆဋ္ဌံ။
အစ္စုဂ္ဂတာတိလပတာ [အတိဗလတာ (သီ။ သျာ။ ပီ။), အတိလပကာ (ကတ္ထစိ)], အတိဝေလံ ပဘာသိတာ၊
ဝါစာ ဟနတိ ဒုမ္မေဓံ, တိတ္တိရံဝါတိဝဿိတန္တိ။
တိတ္တိရဇာတကံ သတ္တမံ။
နာစိန္တယန္တော ပုရိသော, ဝိသေသမဓိဂစ္ဆတိ၊
စိန္တိတဿ ဖလံ ပဿ, မုတ္တောသ္မိ ဝဓဗန္ဓနာတိ။
ဝဋ္ဋကဇာတကံ အဋ္ဌမံ။
(ဇာ၊၁၊၂၈။)အမာတာပိတရသံဝဒ္ဓေါ [ပိတရိ (သီ။ ပီ။), ပိတု (သျာ။)], အနာစေရကုလေ ဝသံ၊
နာယံ ကာလံ အကာလံ ဝါ, အဘိဇာနာတိ ကုက္ကုဋောတိ။
အကာလရာဝိဇာတကံ နဝမံ။
အဗဒ္ဓါ တတ္ထ ဗဇ္ဈန္တိ, ယတ္ထ ဗာလာ ပဘာသရေ၊
ဗဒ္ဓါပိ တတ္ထ မုစ္စန္တိ, ယတ္ထ ဓီရာ ပဘာသရေတိ။
ဗန္ဓနမောက္ခဇာတကံ ဒသမံ။
ဟံစိဝဂ္ဂေါ [ဟံသိဝဂ္ဂေါ (သီ။ သျာ။)] ဒွါဒသမော။
တဿုဒ္ဒါနံ –
အထ ဂဒြဘ သတ္တုဝ ကံသသတံ, ဗဟုစိန္တိ သာသိကာယာတိကရ၊
အတိဝေလ ဝိသေသမနာစရိယောဝ, ဓီရာပဘာသရတေန ဒသာတိ။
၁၃။ ကုသနာဠိဝဂ္ဂေါ
ကရေ သရိက္ခော အထ ဝါပိ သေဋ္ဌော, နိဟီနကော ဝါပိ ကရေယျ ဧကော၊
ကရေယျုမေတေ [ကရေယျုံ တေ (သီ။ ပီ။)] ဗျသနေ ဥတ္တမတ္ထံ, ယထာ အဟံ ကုသနာဠိ ရုစာယန္တိ။
ကုသနာဠိဇာတကံ ပဌမံ။
(ဇာ၊၁၊၂၉။)ယသံ လဒ္ဓါန ဒုမ္မေဓော, အနတ္ထံ စရတိ အတ္တနော၊
အတ္တနော စ ပရေသဉ္စ, ဟိံသာယ ပဋိပဇ္ဇတီတိ။
ဒုမ္မေဓဇာတကံ ဒုတိယံ။
အသဗ္ဗတ္ထဂါမိံ ဝါစံ, ဗာလော သဗ္ဗတ္ထ ဘာသတိ၊
နာယံ ဒဓိံ ဝေဒိ န [န ဝေဒိ (က။)] နင်္ဂလီသံ, ဒဓိပ္ပယံ [ဒဓိမ္ပယံ (သီ။ ပီ။)] မညတိ နင်္ဂလီသန္တိ။
နင်္ဂလီသဇာတကံ တတိယံ။
ဝါယမေထေဝ ပုရိသော, န နိဗ္ဗိန္ဒေယျ ပဏ္ဍိတော၊
ဝါယာမဿ ဖလံ ပဿ, ဘုတ္တာ အမ္ဗာ အနီတိဟန္တိ။
အမ္ဗဇာတကံ စတုတ္ထံ။
ဗဟုမ္ပိ သော ဝိကတ္ထေယျ, အညံ ဇနပဒံ ဂတော၊
အနွာဂန္တွာန ဒူသေယျ, ဘုဉ္ဇ ဘောဂေ ကဋာဟကာတိ။
ကဋာဟကဇာတကံ ပဉ္စမံ။
တဒေဝေကဿ [တထေဝေကဿ (သီ။ သျာ။ ပီ။ အဋ္ဌ။ မူလပါဌော)] ကလျာဏံ, တဒေဝေကဿ ပါပကံ၊
တသ္မာ သဗ္ဗံ န ကလျာဏံ, သဗ္ဗံ ဝါပိ န ပါပကန္တိ။
အသိလက္ခဏဇာတကံ ဆဋ္ဌံ။
တေ ဒေသာ တာနိ ဝတ္ထူနိ, အဟဉ္စ ဝနဂေါစရော၊
အနုဝိစ္စ ခေါ တံ ဂဏှေယျုံ, ပိဝ [ပိပ (သီ။ ပီ။)] ခီရံ ကလဏ္ဍုကာတိ။
ကလဏ္ဍုကဇာတကံ သတ္တမံ။
(ဇာ၊၁၊၃၀။)ယော ဝေ ဓမ္မံ ဓဇံ [ဓမ္မဓဇံ (သျာ။ ပီ။ က။)] ကတွာ, နိဂူဠှော ပါပမာစရေ၊
ဝိဿာသယိတွာ ဘူတာနိ, ဗိဠာရံ နာမ တံ ဝတန္တိ။
ဗိဠာရဝတဇာတကံ အဋ္ဌမံ။
နာယံ သိခါ ပုညဟေတု, ဃာသဟေတု အယံ သိခါ၊
နာင်္ဂုဋ္ဌဂဏနံ ယာတိ, အလံ တေ ဟောတု အဂ္ဂိကာတိ။
အဂ္ဂိကဘာရဒွါဇဇာတကံ နဝမံ။
ယထာ ဝါစာ စ ဘုဉ္ဇဿု, ယထာ ဘုတ္တဉ္စ ဗျာဟရ၊
ဥဘယံ တေ န သမေတိ, ဝါစာ ဘုတ္တဉ္စ ကောသိယေတိ။
ကောသိယဇာတကံ ဒသမံ။
ကုသနာဠိဝဂ္ဂေါ [သရိက္ခဝဂ္ဂေါ (က။)] တေရသမော။
တဿုဒ္ဒါနံ –
ကုသနာဠိသိရိဝှယနော စ ယသံ, ဒဓိ မမ္ဗ ကဋာဟကပဉ္စမကော၊
အထ ပါပက ခီရ ဗိဠာရဝတံ, သိခိ ကောသိယသဝှယနေန ဒသာတိ။
၁၄။ အသမ္ပဒါနဝဂ္ဂေါ
အသမ္ပဒါနေနိတရီတရဿ, ဗာလဿ မိတ္တာနိ ကလီ ဘဝန္တိ၊
တသ္မာ ဟရာမိ ဘုသံ အဍ္ဎမာနံ, မာ မေ မိတ္တိ ဇီယိတ္ထ သဿတာယန္တိ။
အသမ္ပဒါနဇာတကံ ပဌမံ။
(ဇာ၊၁၊၃၁။)ကုသလူပဒေသေ ဓိတိယာ ဒဠှာယ စ, အနိဝတ္တိတတ္တာဘယဘီရုတာယ [အဝတ္ထိတတ္တာဘယဘီရုတာယ (သီ။ သျာ။ ပီ။)] စ၊
န ရက္ခသီနံ ဝသမာဂမိမှသေ, သ သောတ္ထိဘာဝေါ မဟတာ ဘယေန မေတိ။
ဘီရုက [ပဉ္စဂရုက (သီ။ ပီ။), ပဉ္စဘီရုက (သျာ။), အဘယဘီရုတ§(?)] ဇာတကံ ဒုတိယံ။
ခေမံ ယဟိံ တတ္ထ အရီ ဥဒီရိတော [အရိ ဥဒ္ဓရိတော (က။)], ဒကဿ မဇ္ဈေ ဇလတေ ဃတာသနော၊
န အဇ္ဇ ဝါသော မဟိယာ မဟီရုဟေ, ဒိသာ ဘဇဝှေါ သရဏာဇ္ဇ နော ဘယန္တိ။
ဃတာသနဇာတကံ တတိယံ။
ယေ သညိနော တေပိ ဒုဂ္ဂတာ, ယေပိ အသညိနော တေပိ ဒုဂ္ဂတာ၊
ဧတံ ဥဘယံ ဝိဝဇ္ဇယ, တံ သမာပတ္တိသုခံ အနင်္ဂဏန္တိ။
ဈာနသောဓနဇာတကံ စတုတ္ထံ။
စန္ဒာဘံ သူရိယာဘဉ္စ, ယောဓ ပညာယ ဂါဓတိ။
အဝိတက္ကေန ဈာနေန, ဟောတိ အာဘဿရူပဂေါတိ။
စန္ဒာဘဇာတကံ ပဉ္စမံ။
(ဇာ၊၁၊၃၂။)ယံ လဒ္ဓံ တေန တုဋ္ဌဗ္ဗံ, အတိလောဘော ဟိ ပါပကော၊
ဟံသရာဇံ ဂဟေတွာန, သုဝဏ္ဏာ ပရိဟာယထာတိ။
သုဝဏ္ဏဟံသဇာတကံ ဆဋ္ဌံ။
ယတ္ထေကော လဘတေ ဗဗ္ဗု, ဒုတိယော တတ္ထ ဇာယတိ၊
တတိယော စ စတုတ္ထော စ, ဣဒံ တေ ဗဗ္ဗုကာ ဗိလန္တိ။
ဗဗ္ဗုဇာတကံ သတ္တမံ။
ကိံ တေ ဇဋာဟိ ဒုမ္မေဓ, ကိံ တေ အဇိနသာဋိယာ၊
အဗ္ဘန္တရံ တေ ဂဟနံ, ဗာဟိရံ ပရိမဇ္ဇသီတိ။
ဂေါဓဇာတကံ အဋ္ဌမံ။
အက္ခီ ဘိန္နာ ပဋော နဋ္ဌော, သခိဂေဟေ စ ဘဏ္ဍနံ၊
ဥဘတော ပဒုဋ္ဌာ ကမ္မန္တာ [ပဒုဋ္ဌကမ္မန္တော (သီ။), ပဒုဋ္ဌော ကမ္မန္တော (ပီ။)], ဥဒကမှိ ထလမှိ စာတိ။
ဥဘတောဘဋ္ဌဇာတကံ နဝမံ။
နိစ္စံ ဥဗ္ဗိဂ္ဂဟဒယာ, သဗ္ဗလောကဝိဟေသကာ၊
တသ္မာ နေသံ ဝသာ နတ္ထိ, ကာကာနမှာက [ကာကာနသ္မာက (သီ။ သျာ။ ပီ။)] ဉာတိနန္တိ။
ကာကဇာတကံ ဒသမံ။
အသမ္ပဒါနဝဂ္ဂေါ စုဒ္ဒသမော။
(ဇာ၊၁၊၃၃။)တဿုဒ္ဒါနံ –
ဣတရီတရ ရက္ခသိ ခေမိယော စ, ပရောသတပဉှေန အာဘဿရော ပုန၊
အထ ဟံသဝရုတ္တမဗဗ္ဗုဇဋံ, ပဋနဋ္ဌက ကာကဝရေန ဒသာတိ။
၁၅။ ကကဏ္ဋကဝဂ္ဂေါ
န ပါပဇနသံသေဝီ, အစ္စန္တသုခမေဓတိ၊
ဂေါဓာကုလံ [ဂေါဓက္ကုလံ (က။)] ကကဏ္ဋာဝ [ကကဏ္ဋကာ (က။)], ကလိံ ပါပေတိ အတ္တနန္တိ။
ဂေါဓဇာတကံ ပဌမံ။
ဧတဉှိ တေ ဒုရာဇာနံ, ယံ သေသိ မတသာယိကံ၊
ယဿ တေ ကဍ္ဎမာနဿ, ဟတ္ထာ ဒဏ္ဍော န မုစ္စတီတိ။
သိင်္ဂါလဇာတကံ ဒုတိယံ။
လသီ စ တေ နိပ္ဖလိတာ, မတ္ထကော စ ပဒါလိတော [ဝိဒါလိတော (သီ။ ပီ။)]၊
သဗ္ဗာ တေ ဖာသုကာ ဘဂ္ဂါ, အဇ္ဇ ခေါ တွံ ဝိရောစသီတိ။
ဝိရောစဇာတကံ တတိယံ။
ဗဟုမ္ပေတံ အသဗ္ဘိ [ဗဟုပေတမသဗ္ဘိ (က။)] ဇာတဝေဒ, ယံ တံ ဝါလဓိနာဘိပူဇယာမ၊
မံသာရဟဿ နတ္ထဇ္ဇ မံသံ, နင်္ဂုဋ္ဌမ္ပိ ဘဝံ ပဋိဂ္ဂဟာတူတိ။
နင်္ဂုဋ္ဌဇာတကံ စတုတ္ထံ။
(ဇာ၊၁၊၃၄။)န တွံ ရာဓ ဝိဇာနာသိ, အဍ္ဎရတ္တေ အနာဂတေ၊
အဗျယတံ [အဗျာယတံ (သီ။ သျာ။ ပီ။), အဗျတ္တတံ (?)] ဝိလပသိ, ဝိရတ္တာ ကောသိယာယနေတိ။
ရာဓဇာတကံ ပဉ္စမံ။
အပိ နု ဟနုကာ သန္တာ, မုခဉ္စ ပရိသုဿတိ၊
ဩရမာမ န ပါရေမ, ပူရတေဝ မဟောဒဓီတိ။
သမုဒ္ဒကာကဇာတကံ ဆဋ္ဌံ။
နယိဒံ ဒုက္ခံ အဒုံ ဒုက္ခံ, ယံ မံ တုဒတိ ဝါယသော၊
ယံ သာမာ ပုပ္ဖရတ္တေန, ကတ္တိကံ နာနုဘောဿတီတိ။
ပုပ္ဖရတ္တဇာတကံ သတ္တမံ။
နာဟံ ပုနံ န စ ပုနံ, န စာပိ အပုနပ္ပုနံ၊
ဟတ္ထိဗောန္ဒိံ ပဝေက္ခာမိ, တထာ ဟိ ဘယတဇ္ဇိတောတိ။
သိင်္ဂါလဇာတကံ အဋ္ဌမံ။
ဧကပဏ္ဏော အယံ ရုက္ခော, န ဘူမျာ စတုရင်္ဂုလော၊
ဖလေန ဝိသကပ္ပေန, မဟာယံ ကိံ ဘဝိဿတီတိ။
ဧကပဏ္ဏဇာတကံ နဝမံ။
(ဇာ၊၁၊၃၅။)အသန္တံ ယော ပဂ္ဂဏှာတိ, အသန္တံ စူပသေဝတိ၊
တမေဝ ဃာသံ ကုရုတေ, ဗျဂ္ဃေါ သဉ္ဇီဝကော ယထာတိ။
သဉ္ဇီဝဇာတကံ ဒသမံ။
ကကဏ္ဋက [ပါပသေဝန (က။)] ဝဂ္ဂေါ ပန္နရသမော။
တဿုဒ္ဒါနံ –
သုခမေဓတိ ဒဏ္ဍဝရော စ ပုန, လသိ ဝါလဓိ ပဉ္စမရာဓဝရော၊
သမဟောဒဓိ ကတ္တိက ဗောန္ဒိ ပုန, စတုရင်္ဂုလဗျဂ္ဃဝရေန ဒသာတိ။
(ဥပရိမော ပဏ္ဏာသကော။) [( ) သီဟဠပေါတ္ထကေယေဝ ဒိဿတိ]
အထ ဝဂ္ဂုဒ္ဒါနံ –
အပဏ္ဏကံ သီလဝဂ္ဂကုရုင်္ဂ, ကုလာဝကံ အတ္ထကာမေန ပဉ္စမံ၊
အာသီသော ဣတ္ထိဝရုဏံ အပါယိ, လိတ္တဝဂ္ဂေန တေ ဒသ၊
ပရောသတံ ဟံစိ ကုသနာဠိ [ဟံသိ သရိက္ခံ (သဗ္ဗတ္ထ)], အသမ္ပဒံ ကကဏ္ဋကဝဂ္ဂေါ။
ဧကနိပါတမှိလင်္ကတန္တိ။
ဧကကနိပါတံ နိဋ္ဌိတံ။
(ဇာ၊၁၊၃၆။)၂။ ဒုကနိပါတော
၁။ ဒဠှဝဂ္ဂေါ
֍ * ၁၅၁။ ရာဇောဝါဒဇာတကံ (၂-၁-၁)
ဒဠှံ ဒဠှဿ ခိပတိ, ဗလ္လိကော [မလ္လိကော (သီ။ ပီ။)] မုဒုနာ မုဒုံ၊
သာဓုမ္ပိ သာဓုနာ ဇေတိ, အသာဓုမ္ပိ အသာဓုနာ၊
ဧတာဒိသော အယံ ရာဇာ, မဂ္ဂါ ဥယျာဟိ သာရထိ။
အက္ကောဓေန ဇိနေ ကောဓံ, အသာဓုံ သာဓုနာ ဇိနေ၊
ဇိနေ ကဒရိယံ ဒါနေန, သစ္စေနာလိကဝါဒိနံ၊
ဧတာဒိသော အယံ ရာဇာ, မဂ္ဂါ ဥယျာဟိ သာရထီတိ။
ရာဇောဝါဒဇာတကံ ပဌမံ။
၁၅၂။ အသမေက္ခိတကမ္မန္တံ, တုရိတာဘိနိပါတိနံ။
သာနိ ကမ္မာနိ တပ္ပေန္တိ, ဥဏှံဝဇ္ဈောဟိတံ မုခေ။
သီဟော စ သီဟနာဒေန, ဒဒ္ဒရံ အဘိနာဒယိ၊
သုတွာ သီဟဿ နိဂ္ဃေါသံ, သိင်္ဂါလော [သိဂါလော (သီ။ သျာ။ ပီ။)] ဒဒ္ဒရေ ဝသံ၊
ဘီတော သန္တာသမာပါဒိ, ဟဒယဉ္စဿ အပ္ဖလီတိ။
သိင်္ဂါလဇာတကံ [သိဂါလဇာတကံ (သီ။ သျာ။ ပီ။)] ဒုတိယံ။
၁၅၃။ သူကရဇာတကံ (၂-၁-၃)
စတုပ္ပဒေါ အဟံ သမ္မ, တွမ္ပိ သမ္မ စတုပ္ပဒေါ၊
ဧဟိ သမ္မ [သီဟ (သီ။ ပီ။)] နိဝတ္တဿု, ကိံ နု ဘီတော ပလာယသိ။
အသုစိ ပူတိလောမောသိ, ဒုဂ္ဂန္ဓော ဝါသိ သူကရ၊
သစေ ယုဇ္ဈိတုကာမောသိ, ဇယံ သမ္မ ဒဒါမိ တေတိ။
သူကရဇာတကံ တတိယံ။
(ဇာ၊၁၊၃၇။)၁၅၄။ ဥရဂဇာတက (၂-၁-၄)
ဣဓူရဂါနံ ပဝရော ပဝိဋ္ဌော, သေလဿ ဝဏ္ဏေန ပမောက္ခမိစ္ဆံ၊
ဗြဟ္မဉ္စ ဝဏ္ဏံ [ဝက္ကံ (က။)] အပစာယမာနော, ဗုဘုက္ခိတော နော ဝိတရာမိ [ဝိသဟာမိ (က။ သိ။ သျာ။ ပီ။)] ဘောတ္တုံ။
သော ဗြဟ္မဂုတ္တော စိရမေဝ ဇီဝ, ဒိဗျာ စ တေ ပါတုဘဝန္တု ဘက္ခာ၊
ယော ဗြဟ္မဝဏ္ဏံ အပစာယမာနော, ဗုဘုက္ခိတော နော ဝိတရာသိ [သဗ္ဗတ္ထပိ သမာနံ] ဘောတ္တုန္တိ။
ဥရဂဇာတကံ စတုတ္ထံ။
၁၅၅။ ဘဂ္ဂဇာတကံ (၂-၁-၅)
ဇီဝ ဝဿသတံ ဘဂ္ဂ [ဂဂ္ဂ (သီ။ ပီ။)], အပရာနိ စ ဝီသတိံ [ဝီသတိ (သျာ။ က။)]၊
မာ မံ ပိသာစာ ခါဒန္တု, ဇီဝ တွံ သရဒေါ သတံ။
တွမ္ပိ ဝဿသတံ ဇီဝ, အပရာနိ စ ဝီသတိံ၊
ဝိသံ ပိသာစာ ခါဒန္တု, ဇီဝ တွံ သရဒေါ သတန္တိ။
ဘဂ္ဂဇာတကံ ပဉ္စမံ။
၁၅၆။ အလီနစိတ္တဇာတကံ (၂-၁-၆)
အလီနစိတ္တံ နိဿာယ, ပဟဋ္ဌာ မဟတီ စမူ၊
ကောသလံ သေနာသန္တုဋ္ဌံ, ဇီဝဂ္ဂါဟံ အဂါဟယိ။
ဧဝံ နိဿယသမ္ပန္နော, ဘိက္ခု အာရဒ္ဓဝီရိယော၊
ဘာဝယံ ကုသလံ ဓမ္မံ, ယောဂက္ခေမဿ ပတ္တိယာ၊
ပါပုဏေ အနုပုဗ္ဗေန, သဗ္ဗသံယောဇနက္ခယန္တိ။
အလီနစိတ္တဇာတကံ ဆဋ္ဌံ။
(ဇာ၊၁၊၃၈။)ယေန ကာမံ ပဏာမေတိ, ဓမ္မော ဗလဝတံ မိဂီ၊
ဥန္နဒန္တီ ဝိဇာနာဟိ, ဇာတံ သရဏတော ဘယံ။
အပိ စေပိ ဒုဗ္ဗလော မိတ္တော, မိတ္တဓမ္မေသု တိဋ္ဌတိ၊
သော ဉာတကော စ ဗန္ဓု စ, သော မိတ္တော သော စ မေ သခါ၊
ဒါဌိနိ မာတိမညိတ္ထော [မညိဝေါ (သျာ။), မညဝှေါ (က။)], သိင်္ဂါလော မမ ပါဏဒေါတိ။
ဂုဏဇာတကံ သတ္တမံ။
၁၅၈။ သုဟနုဇာတကံ (၂-၁-၈)
နယိဒံ ဝိသမသီလေန, သောဏေန သုဟနူ သဟ၊
သုဟနူပိ တာဒိသောယေဝ, ယော သောဏဿ သဂေါစရော။
ပက္ခန္ဒိနာ ပဂဗ္ဘေန, နိစ္စံ သန္ဒာနခါဒိနာ၊
သမေတိ ပါပံ ပါပေန, သမေတိ အသတာ အသန္တိ။
သုဟနုဇာတကံ အဋ္ဌမံ။
၁၅၉။ မောရဇာတကံ (၂-၁-၉)
ဥဒေတယံ စက္ခုမာ ဧကရာဇာ, ဟရိဿဝဏ္ဏော ပထဝိပ္ပဘာသော [ပဌဝိပ္ပဘာသော (သီ။ သျာ။ ပီ။)]၊
တံ တံ နမဿာမိ ဟရိဿဝဏ္ဏံ ပထဝိပ္ပဘာသံ, တယာဇ္ဇ ဂုတ္တာ ဝိဟရေမု ဒိဝသံ။
ယေ ဗြာဟ္မဏာ ဝေဒဂူ သဗ္ဗဓမ္မေ, တေ မေ နမော တေ စ မံ ပါလယန္တု၊
နမတ္ထု ဗုဒ္ဓါနံ [ဗုဒ္ဓါန (?)] နမတ္ထု ဗောဓိယာ, နမော ဝိမုတ္တာနံ [ဝိမုတ္တာန (?)] နမော ဝိမုတ္တိယာ၊
ဣမံ သော ပရိတ္တံ ကတွာ, မောရော စရတိ ဧသနာ။
(ဇာ၊၁၊၃၉။)အပေတယံ စက္ခုမာ ဧကရာဇာ, ဟရိဿဝဏ္ဏော ပထဝိပ္ပဘာသော၊
တံ တံ နမ္မဿာမိ ဟရိဿဝဏ္ဏံ ပထဝိပ္ပဘာသံ, တယာဇ္ဇ ဂုတ္တာ ဝိဟရေမု ရတ္တိံ။
ယေ ဗြာဟ္မဏာ ဝေဒဂူ သဗ္ဗဓမ္မေ, တေ မေ နမော တေ စ မံ ပါလယန္တု၊
နမတ္ထု ဗုဒ္ဓါနံ နမတ္ထု ဗောဓိယာ, နမော ဝိမုတ္တာနံ နမော ဝိမုတ္တိယာ၊
ဣမံ သော ပရိတ္တံ ကတွာ, မောရော ဝါသမကပ္ပယီတိ။
မောရဇာတကံ နဝမံ။
၁၆၀။ ဝိနီလဇာတကံ (၂-၁-၁၀)
ဧဝမေဝ နူန [နု (က။)] ရာဇာနံ, ဝေဒေဟံ မိထိလဂ္ဂဟံ၊
အဿာ ဝဟန္တိ အာဇညာ, ယထာ ဟံသာ ဝိနီလကံ။
ဝိနီလ ဒုဂ္ဂံ ဘဇသိ, အဘူမိံ တာတ သေဝသိ၊
ဂါမန္တကာနိ [ဂါမန္တိကာနိ (သီ။), ဂါမန္တရာနိ (က။)] သေဝဿု, ဧတံ မာတာလယံ တဝါတိ။
ဝိနီလဇာတကံ ဒသမံ။
ဒဠှဝဂ္ဂေါ ပဌမော။
တဿုဒ္ဒါနံ –
ဝရဗလ္လိက ဒဒ္ဒရ သူကရကော, ဥရဂူတ္တမ ပဉ္စမဘဂ္ဂဝရော၊
မဟတီစမု ယာဝ သိင်္ဂါလဝရော, သုဟနုတ္တမ မောရ ဝိနီလံ ဒသာတိ။
(ဇာ၊၁၊၄၀။)၂။ သန္ထဝဝဂ္ဂေါ
၁၆၁။ ဣန္ဒသမာနဂေါတ္တဇာတကံ (၂-၂-၁)
န သန္ထဝံ [သန္ဓဝံ (က။)] ကာပုရိသေန ကယိရာ, အရိယော အနရိယေန ပဇာနမတ္ထံ၊
စိရာနုဝုတ္ထောပိ ကရောတိ ပါပံ, ဂဇော ယထာ ဣန္ဒသမာနဂေါတ္တံ။
ယံ တွေဝ ဇညာ သဒိသော မမန္တိ, သီလေန ပညာယ သုတေန စာပိ၊
တေနေဝ မေတ္တိံ ကယိရာထ သဒ္ဓိံ, သုခေါ ဟဝေ သပ္ပုရိသေန သင်္ဂမောတိ။
ဣန္ဒသမာနဂေါတ္တဇာတကံ ပဌမံ။
၁၆၂။ သန္ထဝဇာတကံ (၂-၂-၂)
န သန္ထဝသ္မာ ပရမတ္ထိ ပါပိယော, ယော သန္ထဝေါ [သန္ဓဝေါ (က။)] ကာပုရိသေန ဟောတိ၊
သန္တပ္ပိတော သပ္ပိနာ ပါယသေန [ပါယာသေန (က။)], ကိစ္ဆာကတံ ပဏ္ဏကုဋိံ အဒယှိ [အဒဍ္ဎဟိ (သီ။ သျာ။), အဒဋ္ဌဟိ (ပီ။), အဒဒ္ဒဟိ (?)]။
န သန္ထဝသ္မာ ပရမတ္ထိ သေယျော, ယော သန္ထဝေါ သပ္ပုရိသေန ဟောတိ၊
သီဟဿ ဗျဂ္ဃဿ စ ဒီပိနော စ, သာမာ မုခံ လေဟတိ သန္ထဝေနာတိ။
သန္ထဝဇာတကံ ဒုတိယံ။
၁၆၃။ သုသီမဇာတကံ (၂-၂-၃)
ကာဠာ မိဂါ သေတဒန္တာ တဝီမေ [တဝ ဣမေ (သီ။ သျာ။ ပီ။)], ပရောသတံ ဟေမဇာလာဘိဆန္နာ [ဟေမဇာလာဘိသဉ္ဆန္နာ (သီ။)]၊
တေ တေ ဒဒါမီတိ သုသီမ ဗြူသိ, အနုဿရံ ပေတ္တိပိတာမဟာနံ။
(ဇာ၊၁၊၄၁။)ကာဠာ မိဂါ သေတဒန္တာ မမီမေ [မမ ဣမေ (သီ။ ပီ။)], ပရောသတံ ဟေမဇာလာဘိစ္ဆန္နာ၊
တေ တေ ဒဒါမီတိ ဝဒါမိ မာဏဝ, အနုဿရံ ပေတ္တိပိတာမဟာနန္တိ။
သုသီမဇာတကံ တတိယံ။
၁၆၄။ ဂိဇ္ဈဇာတကံ (၂-၂-၄)
ယံ နု ဂိဇ္ဈော ယောဇနသတံ, ကုဏပါနိ အဝေက္ခတိ၊
ကသ္မာ ဇာလဉ္စ ပါသဉ္စ, အာသဇ္ဇာပိ န ဗုဇ္ဈသိ။
ယဒါ ပရာဘဝေါ ဟောတိ, ပေါသော ဇီဝိတသင်္ခယေ၊
အထ ဇာလဉ္စ ပါသဉ္စ, အာသဇ္ဇာပိ န ဗုဇ္ဈတီတိ။
ဂိဇ္ဈဇာတကံ စတုတ္ထံ။
၁၆၅။ နကုလဇာတကံ (၂-၂-၅)
သန္ဓိံ ကတွာ အမိတ္တေန, အဏ္ဍဇေန ဇလာဗုဇ၊
ဝိဝရိယ ဒါဌံ သေသိ [သယသိ (သီ။ သျာ။ ပီ။)], ကုတော တေ ဘယမာဂတံ။
သင်္ကေထေဝ [သင်္ကတေဝ (က။)] အမိတ္တသ္မိံ, မိတ္တသ္မိမ္ပိ န ဝိဿသေ၊
အဘယာ ဘယမုပ္ပန္နံ, အပိ မူလာနိ ကန္တတီတိ [မူလံ နိကန္တတီတိ (သီ။)]။
နကုလဇာတကံ ပဉ္စမံ။
၁၆၆။ ဥပသာဠကဇာတကံ (၂-၂-၆)
ဥပသာဠကနာမာနိ [ဥပသာဠှကနာမာနံ (သီ။ သျာ။ ပီ။)], သဟဿာနိ စတုဒ္ဒသ၊
အသ္မိံ ပဒေသေ ဒဍ္ဎာနိ, နတ္ထိ လောကေ အနာမတံ။
ယမှိ သစ္စဉ္စ ဓမ္မော စ, အဟိံသာ သံယမော ဒမော၊
ဧတံ အရိယာ သေဝန္တိ, ဧတံ လောကေ အနာမတန္တိ။
ဥပသာဠကဇာတကံ ဆဋ္ဌံ။
(ဇာ၊၁၊၄၂။)၁၆၇။ သမိဒ္ဓိဇာတကံ (၂-၂-၇)
အဘုတွာ ဘိက္ခသိ ဘိက္ခု, န ဟိ ဘုတွာန ဘိက္ခသိ၊
ဘုတွာန ဘိက္ခု ဘိက္ခဿု, မာ တံ ကာလော ဥပစ္စဂါ။
ကာလံ ဝေါဟံ န ဇာနာမိ, ဆန္နော ကာလော န ဒိဿတိ၊
တသ္မာ အဘုတွာ ဘိက္ခာမိ, မာ မံ ကာလော ဥပစ္စဂါတိ။
သမိဒ္ဓိဇာတကံ သတ္တမံ။
၁၆၈။ သကုဏဂ္ဃိဇာတကံ (၂-၂-၈)
သေနော ဗလသာ ပတမာနော, လာပံ ဂေါစရဌာယိနံ၊
သဟသာ အဇ္ဈပ္ပတ္တောဝ, မရဏံ တေနုပါဂမိ။
သောဟံ နယေန သမ္ပန္နော, ပေတ္တိကေ ဂေါစရေ ရတော၊
အပေတသတ္တု မောဒါမိ, သမ္ပဿံ အတ္ထမတ္တနောတိ။
သကုဏဂ္ဃိဇာတကံ အဋ္ဌမံ။
၁၆၉။ အရကဇာတကံ (၂-၂-၉)
ယော ဝေ မေတ္တေန စိတ္တေန, သဗ္ဗလောကာနုကမ္ပတိ၊
ဥဒ္ဓံ အဓော စ တိရိယံ, အပ္ပမာဏေန သဗ္ဗသော။
အပ္ပမာဏံ ဟိတံ စိတ္တံ, ပရိပုဏ္ဏံ သုဘာဝိတံ၊
ယံ ပမာဏကတံ ကမ္မံ, န တံ တတြာဝသိဿတီတိ။
အရကဇာတကံ နဝမံ။
၁၇၀။ ကကဏ္ဋကဇာတကံ (၂-၂-၁၀)
နာယံ ပုရေ ဥဏ္ဏမတိ [ဥန္နမတိ (သျာ။)], တောရဏဂ္ဂေ ကကဏ္ဋကော၊
မဟောသဓ ဝိဇာနာဟိ, ကေန ထဒ္ဓေါ ကကဏ္ဋကော။
အလဒ္ဓပုဗ္ဗံ လဒ္ဓါန, အဍ္ဎမာသံ ကကဏ္ဋကော၊
အတိမညတိ ရာဇာနံ, ဝေဒေဟံ မိထိလဂ္ဂဟန္တိ။
ကကဏ္ဋကဇာတကံ ဒသမံ။
သန္ထဝဝဂ္ဂေါ ဒုတိယော။
(ဇာ၊၁၊၄၃။)တဿုဒ္ဒါနံ –
အထ ဣန္ဒသမာန သပဏ္ဏကုဋိ, သုသိမုတ္တမ ဂိဇ္ဈ ဇလာဗုဇကော၊
ဥပသာဠက ဘိက္ခု သလာပဝရော, အထ မေတ္တဝရော ဒသပုဏ္ဏမတီတိ။
၃။ ကလျာဏဝဂ္ဂေါ
၁၇၁။ ကလျာဏဓမ္မဇာတကံ (၂-၃-၁)
ကလျာဏဓမ္မောတိ ယဒါ ဇနိန္ဒ, လောကေ သမညံ အနုပါပုဏာတိ၊
တသ္မာ န ဟိယျေထ [ဟီယေထ (သီ။)] နရော သပညော, ဟိရိယာပိ သန္တော ဓုရမာဒိယန္တိ။
သာယံ သမညာ ဣဓ မဇ္ဇ ပတ္တာ, ကလျာဏဓမ္မောတိ ဇနိန္ဒ လောကေ၊
တာဟံ သမေက္ခံ ဣဓ ပဗ္ဗဇိဿံ, န ဟိ မတ္ထိ ဆန္ဒော ဣဓ ကာမဘောဂေတိ။
ကလျာဏဓမ္မဇာတကံ ပဌမံ။
၁၇၂။ ဒဒ္ဒရဇာတကံ (၂-၃-၂)
ကော နု သဒ္ဒေန မဟတာ, အဘိနာဒေတိ ဒဒ္ဒရံ၊
တံ သီဟာ နပ္ပဋိနဒန္တိ [ကိံ သီဟာ နပ္ပဋိနဒန္တိ (သီ။ ပီ။), န သီဟာ ပဋိနဒန္တိ (က။)], ကော နာမေသော မိဂါဓိဘူ။
အဓမော မိဂဇာတာနံ, သိင်္ဂါလော တာတ ဝဿတိ၊
ဇာတိမဿ ဇိဂုစ္ဆန္တာ, တုဏှီ သီဟာ သမစ္ဆရေတိ။
ဒဒ္ဒရဇာတကံ ဒုတိယံ။
(ဇာ၊၁၊၄၄။)၁၇၃။ မက္ကဋဇာတကံ (၂-၃-၃)
တာတ မာဏဝကော ဧသော, တာလမူလံ အပဿိတော၊
အဂါရကဉ္စိဒံ အတ္ထိ, ဟန္ဒ ဒေမဿဂါရကံ။
မာ ခေါ တွံ တာတ ပက္ကောသိ, ဒူသေယျ နော အဂါရကံ၊
နေတာဒိသံ မုခံ ဟောတိ, ဗြာဟ္မဏဿ သုသီလိနောတိ။
မက္ကဋဇာတကံ တတိယံ။
၁၇၄။ ဒုဗ္ဘိယမက္ကဋဇာတကံ (၂-၃-၄)
အဒမှ တေ ဝါရိ ပဟူတရူပံ, ဃမ္မာဘိတတ္တဿ ပိပါသိတဿ၊
သော ဒါနိ ပိတွာန [ပီတွာန (သီ။ ပီ။)] ကိရိင်္ကရောသိ [ကိကိံကရောသိ (သီ။ သျာ။ ပီ။)], အသင်္ဂမော ပါပဇနေန သေယျော။
ကော တေ သုတော ဝါ ဒိဋ္ဌော ဝါ, သီလဝါ နာမ မက္ကဋော၊
ဣဒါနိ ခေါ တံ ဩဟစ္ဆံ [ဦဟစ္စ (သီ။ ပီ။), ဩဟစ္စံ (သျာ။), ဥဟဇ္ဇံ (က။)], ဧသာ အသ္မာက ဓမ္မတာတိ။
ဒုဗ္ဘိယမက္ကဋဇာတကံ စတုတ္ထံ။
၁၇၅။ အာဒိစ္စုပဋ္ဌာနဇာတကံ (၂-၃-၅)
သဗ္ဗေသု ကိရ ဘူတေသု, သန္တိ သီလသမာဟိတာ၊
ပဿ သာခါမိဂံ ဇမ္မံ, အာဒိစ္စမုပတိဋ္ဌတိ။
နာဿ သီလံ ဝိဇာနာထ, အနညာယ ပသံသထ၊
အဂ္ဂိဟုတ္တဉ္စ ဥဟန္နံ [ဦဟန္တံ (သီ။), ဦဟနံ (သျာ။), ဦဟန္တိ (ပီ။), ဥဟဒံ (က။)], ဒွေ စ ဘိန္နာ ကမဏ္ဍလူတိ။
အာဒိစ္စုပဋ္ဌာနဇာတကံ ပဉ္စမံ။
(ဇာ၊၁၊၄၅။)၁၇၆။ ကဠာယမုဋ္ဌိဇာတကံ (၂-၃-၆)
ဗာလော ဝတာယံ ဒုမသာခဂေါစရော, ပညာ ဇနိန္ဒ နယိမဿ ဝိဇ္ဇတိ၊
ကဠာယမုဋ္ဌိံ [ကလာယမုဋ္ဌိံ (သီ။ ပီ။)] အဝကိရိယ ကေဝလံ, ဧကံ ကဠာယံ ပတိတံ ဂဝေသတိ။
ဧဝမေဝ မယံ ရာဇ, ယေ စညေ အတိလောဘိနော၊
အပ္ပေန ဗဟုံ ဇိယျာမ, ကဠာယေနေဝ ဝါနရောတိ။
ကဠာယမုဋ္ဌိဇာတကံ ဆဋ္ဌံ။
၁၇၇။ တိန္ဒုကဇာတကံ (၂-၃-၇)
ဓနုဟတ္ထကလာပေဟိ, နေတ္တိံ သဝရဓာရိဘိ၊
သမန္တာ ပရိကိဏ္ဏမှ, ကထံ မောက္ခော ဘဝိဿတိ။
အပ္ပေဝ ဗဟုကိစ္စာနံ, အတ္ထော ဇာယေထ ကောစိ နံ၊
အတ္ထိ ရုက္ခဿ အစ္ဆိန္နံ, ခဇ္ဇထညေဝ တိန္ဒုကန္တိ။
တိန္ဒုကဇာတကံ သတ္တမံ။
ဇနိတ္တံ မေ ဘဝိတ္တံ မေ, ဣတိ ပင်္ကေ အဝဿယိံ၊
တံ မံ ပင်္ကော အဇ္ဈဘဝိ, ယထာ ဒုဗ္ဗလကံ တထာ၊
တံ တံ ဝဒါမိ ဘဂ္ဂဝ, သုဏောဟိ ဝစနံ မမ။
ဂါမေ ဝါ ယဒိ ဝါ ရညေ, သုခံ ယတြာဓိဂစ္ဆတိ၊
တံ ဇနိတ္တံ ဘဝိတ္တဉ္စ, ပုရိသဿ ပဇာနတော၊
ယမှိ ဇီဝေ တမှိ ဂစ္ဆေ, န နိကေတဟတော သိယာတိ။
ကစ္ဆပဇာတကံ အဋ္ဌမံ။
တဉ္စ အပ္ပဉ္စ ဥစ္ဆိဋ္ဌံ, တဉ္စ ကိစ္ဆေန နော အဒါ၊
သောဟံ ဗြာဟ္မဏဇာတိကော, ယံ ဘုတ္တံ တမ္ပိ ဥဂ္ဂတံ။
(ဇာ၊၁၊၄၆။)ဧဝံ ဓမ္မံ နိရံကတွာ [နိရာကတွာ (?) နိ + အာ + ကရ + တွာ], ယော အဓမ္မေန ဇီဝတိ၊
သတဓမ္မောဝ လာဘေန, လဒ္ဓေနပိ န နန္ဒတီတိ။
သတဓမ္မဇာတကံ နဝမံ။
ဒုဒ္ဒဒံ ဒဒမာနာနံ, ဒုက္ကရံ ကမ္မ ကုဗ္ဗတံ၊
အသန္တော နာနုကုဗ္ဗန္တိ, သတံ ဓမ္မော ဒုရန္နယော။
တသ္မာ သတဉ္စ အသတံ, နာနာ ဟောတိ ဣတော ဂတိ၊
အသန္တော နိရယံ ယန္တိ, သန္တော သဂ္ဂပရာယဏာတိ [ပရာယနာ (သျာ။ က။)]။
ဒုဒ္ဒဒဇာတကံ ဒသမံ။
ကလျာဏဝဂ္ဂေါ တတိယော။
တဿုဒ္ဒါနံ –
သုသမညမိဂါဓိဘူ မာဏဝကော, ဝါရိပဟူတရူပါဒိစ္စုပဋ္ဌာနာ၊
သကဠာယသတိန္ဒုကပင်္က ပုန, သတဓမ္မ သုဒုဒ္ဒဒကေန ဒသာတိ။
၄။ အသဒိသဝဂ္ဂေါ
ဓနုဂ္ဂဟော အသဒိသော, ရာဇပုတ္တော မဟဗ္ဗလော၊
ဒူရေပါတီ အက္ခဏဝေဓီ, မဟာကာယပ္ပဒါလနော။
သဗ္ဗာမိတ္တေ ရဏံ ကတွာ, န စ ကဉ္စိ ဝိဟေဌယိ၊
ဘာတရံ သောတ္ထိံ ကတွာန, သံယမံ အဇ္ဈုပါဂမီတိ။
အသဒိသဇာတကံ ပဌမံ။
(ဇာ၊၁၊၄၇။)֍ * ၁၈၂။ သင်္ဂါမာဝစရဇာတကံ (၂-၄-၂)
သင်္ဂါမာဝစရော သူရော, ဗလဝါ ဣတိ ဝိဿုတော၊
ကိံ နု တောရဏမာသဇ္ဇ, ပဋိက္ကမသိ ကုဉ္ဇရ။
ဩမဒ္ဒ ခိပ္ပံ ပလိဃံ, ဧသိကာနိ စ အဗ္ဗဟ [ဥဗ္ဗဟ (သျာ။), အဗ္ဘုဟ (က။)]၊
တောရဏာနိ စ မဒ္ဒိတွာ, ခိပ္ပံ ပဝိသ ကုဉ္ဇရာတိ။
သင်္ဂါမာဝစရဇာတကံ ဒုတိယံ။
ဝါလောဒကံ အပ္ပရသံ နိဟီနံ, ပိတွာ [ပီတွာ (သီ။ ပီ။)] မဒေါ ဇာယတိ ဂဒြဘာနံ၊
ဣမဉ္စ ပိတွာန ရသံ ပဏီတံ, မဒေါ န သဉ္ဇာယတိ သိန္ဓဝါနံ။
အပ္ပံ ပိဝိတွာန နိဟီနဇစ္စော, သော မဇ္ဇတီ တေန ဇနိန္ဒ ပုဋ္ဌော [ဖုဋ္ဌော (သီ။ သျာ။), မုဋ္ဌော (က။)]၊
ဓောရယှသီလီ စ ကုလမှိ ဇာတော, န မဇ္ဇတီ အဂ္ဂရသံ ပိဝိတွာတိ။
ဝါလောဒကဇာတကံ တတိယံ။
֍ * ၁၈၄။ ဂိရိဒတ္တဇာတကံ (၂-၄-၄)
ဒူသိတော ဂိရိဒတ္တေန [ဂိရိဒန္တေန (ပီ။)], ဟယော သာမဿ ပဏ္ဍဝေါ၊
ပေါရာဏံ ပကတိံ ဟိတွာ, တဿေဝါနုဝိဓိယျတိ [နုဝိဓီယတိ (သီ။ ပီ။)]။
သစေ စ တနုဇော ပေါသော, သိခရာကာရ [သိင်္ဂါရာကာရ (သျာ။)] ကပ္ပိတော၊
အာနနေ နံ [တံ (သီ။ သျာ။ ပီ။)] ဂဟေတွာန, မဏ္ဍလေ ပရိဝတ္တယေ၊
ခိပ္ပမေဝ ပဟန္တွာန, တဿေဝါနုဝိဓိယျတီတိ။
ဂိရိဒတ္တဇာတကံ စတုတ္ထံ။
(ဇာ၊၁၊၄၈။)ယထောဒကေ အာဝိလေ အပ္ပသန္နေ, န ပဿတိ သိပ္ပိကသမ္ဗုကဉ္စ၊
သက္ခရံ ဝါလုကံ မစ္ဆဂုမ္ဗံ, ဧဝံ အာဝိလမှိ [အာဝိလေ ဟိ (သီ။)] စိတ္တေ၊
န ပဿတိ အတ္တဒတ္ထံ ပရတ္ထံ။
ယထောဒကေ အစ္ဆေ ဝိပ္ပသန္နေ, သော ပဿတိ သိပ္ပိကသမ္ဗုကဉ္စ၊
သက္ခရံ ဝါလုကံ မစ္ဆဂုမ္ဗံ, ဧဝံ အနာဝိလမှိ စိတ္တေ၊
သော ပဿတိ အတ္တဒတ္ထံ ပရတ္ထန္တိ။
အနဘိရတိဇာတကံ ပဉ္စမံ။
ဝဏ္ဏဂန္ဓရသူပေတော, အမ္ဗောယံ အဟုဝါ ပုရေ၊
တမေဝ ပူဇံ လဘမာနော, ကေနမ္ဗော ကဋုကပ္ဖလော။
ပုစိမန္ဒပရိဝါရော, အမ္ဗော တေ ဒဓိဝါဟန၊
မူလံ မူလေန သံသဋ္ဌံ, သာခါ သာခါ [သာခံ (သျာ။ က။)] နိသေဝရေ [နိဝီသရေ (က။)]၊
အသာတသန္နိဝါသေန, တေနမ္ဗော ကဋုကပ္ဖလောတိ။
ဒဓိဝါဟနဇာတကံ ဆဋ္ဌံ။
ဥစ္စေ ဝိဋဘိမာရုယှ, မန္တယဝှေါ ရဟောဂတာ၊
နီစေ ဩရုယှ မန္တဝှေါ, မိဂရာဇာပိ သောဿတိ။
ယံ သုဝဏ္ဏော သုဝဏ္ဏေန [ယံ သုပဏ္ဏော သုပဏ္ဏေန (သီ။ သျာ။ ပီ။)], ဒေဝေါ ဒေဝေန မန္တယေ၊
ကိံ တေတ္ထ စတုမဋ္ဌဿ, ဗိလံ ပဝိသ ဇမ္ဗုကာတိ။
စတုမဋ္ဌဇာတကံ သတ္တမံ။
(ဇာ၊၁၊၄၉။)֍ * ၁၈၈။ သီဟကောတ္ထုဇာတကံ (၂-၄-၈)
သီဟင်္ဂုလီ သီဟနခေါ, သီဟပါဒပတိဋ္ဌိတော၊
သော သီဟော သီဟသံဃမှိ, ဧကော နဒတိ အညထာ။
မာ တွံ နဒိ ရာဇပုတ္တ, အပ္ပသဒ္ဒေါ ဝနေ ဝသ၊
သရေန ခေါ [မာ (က။)] တံ ဇာနေယျုံ, န ဟိ တေ ပေတ္တိကော သရောတိ။
သီဟကောတ္ထုဇာတကံ အဋ္ဌမံ။
နေတံ သီဟဿ နဒိတံ, န ဗျဂ္ဃဿ န [ဗျဂ္ဃဿ န စ (က။)] ဒီပိနော၊
ပါရုတော သီဟစမ္မေန, ဇမ္မော နဒတိ ဂဒြဘော။
စိရမ္ပိ ခေါ တံ ခါဒေယျ, ဂဒြဘော ဟရိတံ ယဝံ၊
ပါရုတော သီဟစမ္မေန, ရဝမာနောဝ ဒူသယီတိ။
သီဟစမ္မဇာတကံ နဝမံ။
֍ * ၁၉၀။ သီလာနိသံသဇာတကံ (၂-၄-၁၀)
ပဿ သဒ္ဓါယ သီလဿ, စာဂဿ စ အယံ ဖလံ၊
နာဂေါ နာဝါယ ဝဏ္ဏေန, သဒ္ဓံ ဝဟတုပါသကံ။
သဗ္ဘိရေဝ သမာသေထ, သဗ္ဘိ ကုဗ္ဗေထ သန္ထဝံ၊
သတဉှိ သန္နိဝါသေန, သောတ္ထိံ ဂစ္ဆတိ နှာပိတောတိ။
သီလာနိသံသဇာတကံ ဒသမံ။
အသဒိသဝဂ္ဂေါ စတုတ္ထော။
တဿုဒ္ဒါနံ –
ဓနုဂ္ဂဟ ကုဉ္ဇရ အပ္ပရသော, ဂိရိဒတ္တမနာဝိလစိတ္တဝရံ၊
ဒဓိဝါဟန ဇမ္ဗူက သီဟနခေါ, ဟရိတယဝ နာဂဝရေန ဒသာတိ။
(ဇာ၊၁၊၅၀။)၅။ ရုဟကဝဂ္ဂေါ
အပိ [အမ္ဘော (သျာ။ က။ သီ။)] ရုဟက ဆိန္နာပိ, ဇိယာ သန္ဓီယတေ ပုန၊
သန္ဓီယဿု ပုရာဏိယာ, မာ ကောဓဿ ဝသံ ဂမိ။
ဝိဇ္ဇမာနေသု ဝါကေသု [ဝိဇ္ဇမာနာသု မရုဝါသု (သီ။), ဝိဇ္ဇမာနာသု မရူဒွါသု (ပီ။)], ဝိဇ္ဇမာနေသု ကာရိသု၊
အညံ ဇိယံ ကရိဿာမိ, အလညေဝ ပုရာဏိယာတိ။
ရုဟကဇာတကံ ပဌမံ။
֍ * ၁၉၂။ သိရိကာဠကဏ္ဏိဇာတကံ (၂-၅-၂)
ဣတ္ထီ သိယာ ရူပဝတီ, သာ စ သီလဝတီ သိယာ၊
ပုရိသော တံ န ဣစ္ဆေယျ, သဒ္ဒဟာသိ မဟောသဓ။
သဒ္ဒဟာမိ မဟာရာဇ, ပုရိသော ဒုဗ္ဘဂေါ သိယာ၊
သိရီ စ ကာဠကဏ္ဏီ စ, န သမေန္တိ ကုဒါစနန္တိ။
သိရိကာဠကဏ္ဏိဇာတကံ ဒုတိယံ။
အယမေဝ သာ အဟမပိ [အဟမ္ပိ (သီ။ သျာ။ ပီ။), အဟံသိ (က။)] သော အနညော, အယမေဝ သော ဟတ္ထစ္ဆိန္နော အနညော၊
ယမာဟ ‘‘ကောမာရပတီ မမ’’န္တိ, ဝဇ္ဈိတ္ထိယော နတ္ထိ ဣတ္ထီသု သစ္စံ။
ဣမဉ္စ ဇမ္မံ မုသလေန ဟန္တွာ, လုဒ္ဒံ ဆဝံ ပရဒါရူပသေဝိံ၊
ဣမိဿာ စ နံ ပါပပတိဗ္ဗတာယ, ဇီဝန္တိယာ ဆိန္ဒထ ကဏ္ဏနာသန္တိ။
စူဠပဒုမဇာတကံ တတိယံ။
(ဇာ၊၁၊၅၁။)န သန္တိ ဒေဝါ ပဝသန္တိ နူန, န ဟိ နူန သန္တိ ဣဓ လောကပါလာ၊
သဟသာ ကရောန္တာနမသညတာနံ, န ဟိ နူန သန္တီ ပဋိသေဓိတာရော။
အကာလေ ဝဿတီ တဿ, ကာလေ တဿ န ဝဿတိ၊
သဂ္ဂါ စ စဝတိ ဌာနာ, နနု သော တာဝတာ ဟတောတိ။
မဏိစောရဇာတကံ စတုတ္ထံ။
֍ * ၁၉၅။ ပဗ္ဗတူပတ္ထရဇာတကံ (၂-၅-၅)
ပဗ္ဗတူပတ္ထရေ [ပဗ္ဗတပတ္ထရေ (သီ။ သျာ။ ပီ။)] ရမ္မေ, ဇာတာ ပေါက္ခရဏီ သိဝါ၊
တံ သိင်္ဂါလော အပါပါယိ [အပါပါသိ (သီ။ သျာ။ ပီ။)], ဇာနံ သီဟေန ရက္ခိတံ။
ပိဝန္တိ စေ [ပိဝန္တိ ဝေ (သီ။), ပိဝန္တိဝ (ပီ။), ပိဝန္တေဝ (?)] မဟာရာဇ, သာပဒါနိ မဟာနဒိံ၊
န တေန အနဒီ ဟောတိ, ခမဿု ယဒိ တေ ပိယာတိ။
ပဗ္ဗတူပတ္ထရ [ပဗ္ဗတပတ္ထရ (သီ။ သျာ။ ပီ။)] ဇာတကံ ပဉ္စမံ။
ယေ န ကာဟန္တိ ဩဝါဒံ, နရာ ဗုဒ္ဓေန ဒေသိတံ၊
ဗျသနံ တေ ဂမိဿန္တိ, ရက္ခသီဟိဝ ဝါဏိဇာ။
ယေ စ ကာဟန္တိ ဩဝါဒံ, နရာ ဗုဒ္ဓေန ဒေသိတံ၊
သောတ္ထိံ ပါရံ ဂမိဿန္တိ, ဝလာဟေနေဝ [ဝါလာဟေနေဝ (သီ။ ပီ။)] ဝါဏိဇာတိ။
ဝလာဟကဿ [ဝါလာဟဿ (သီ။ ပီ။)] ဇာတကံ ဆဋ္ဌံ။
֍ * ၁၉၇။ မိတ္တာမိတ္တဇာတကံ (၂-၅-၇)
န နံ ဥမှယတေ ဒိသွာ, န စ နံ ပဋိနန္ဒတိ၊
စက္ခူနိ စဿ န ဒဒါတိ, ပဋိလောမဉ္စ ဝတ္တတိ။
(ဇာ၊၁၊၅၂။)ဧတေ ဘဝန္တိ အာကာရာ, အမိတ္တသ္မိံ ပတိဋ္ဌိတာ၊
ယေဟိ အမိတ္တံ ဇာနေယျ, ဒိသွာ သုတွာ စ ပဏ္ဍိတောတိ။
မိတ္တာမိတ္တဇာတကံ သတ္တမံ။
ပဝါသာ အာဂတော တာတ, ဣဒါနိ နစိရာဂတော၊
ကစ္စိန္နု တာတ တေ မာတာ, န အညမုပသေဝတိ။
န ခေါ ပနေတံ သုဘဏံ, ဂိရံ သစ္စုပသံဟိတံ၊
သယေထ ပေါဋ္ဌပါဒေါဝ, မုမ္မုရေ [မုမ္မုရေ (သျာ။), မံ ပုရေ (က။) မုမ္မုရသဒ္ဒေါ ထုသဂ္ဂိမှိ ကုက္ကုဠေ စ ဝတ္တတီတိ သက္ကတာဘိဓာနေသု] ဥပကူထိတောတိ [ဥပကူသိတောတိ (သီ။ သျာ။ ပီ။), ဥပကူလိတော (က။)]။
ရာဓဇာတကံ အဋ္ဌမံ။
ဥဘယံ မေ န ခမတိ, ဥဘယံ မေ န ရုစ္စတိ၊
ယာစာယံ ကောဋ္ဌမောတိဏ္ဏာ, နာဒ္ဒသံ ဣတိ ဘာသတိ။
တံ တံ ဂါမပတိ ဗြူမိ, ကဒရေ အပ္ပသ္မိ ဇီဝိတေ၊
ဒွေ မာသေ သင်္ဂရံ ကတွာ [ကာရံ ကတွာန (သီ။ ပီ။), သံကရံ ကတွာ (က။)], မံသံ ဇရဂ္ဂဝံ ကိသံ၊
အပ္ပတ္တကာလေ စောဒေသိ, တမ္ပိ မယှံ န ရုစ္စတီတိ။
ဂဟပတိဇာတကံ နဝမံ။
֍ * ၂၀၀။ သာဓုသီလဇာတကံ (၂-၅-၁၀)
သရီရဒဗျံ ဝုဍ္ဎဗျံ [ဝဒ္ဓဗျံ (သီ။ ပီ။)], သောဇစ္စံ သာဓုသီလိယံ၊
ဗြာဟ္မဏံ တေဝ ပုစ္ဆာမ, ကန္နု တေသံ ဝနိမှသေ [ဝဏိမှသေ (သီ။ ပီ။)]။
အတ္ထော အတ္ထိ သရီရသ္မိံ, ဝုဍ္ဎဗျဿ နမော ကရေ၊
အတ္ထော အတ္ထိ သုဇာတသ္မိံ, သီလံ အသ္မာက ရုစ္စတီတိ။
သာဓုသီလဇာတကံ ဒသမံ။
ရုဟကဝဂ္ဂေါ ပဉ္စမော။
(ဇာ၊၁၊၅၃။)တဿုဒ္ဒါနံ –
အပိရုဟက ရူပဝတီ မုသလော, ပဝသန္တိ သပဉ္စမပေါက္ခရဏီ၊
အထ မုတ္တိမဝါဏိဇ ဥမှယတေ, စိရအာဂတ ကောဋ္ဌ သရီရ ဒသာတိ။
၆။ နတံဒဠှဝဂ္ဂေါ
֍ * ၂၀၁။ ဗန္ဓနာဂါရဇာတကံ (၂-၆-၁)
န တံ ဒဠှံ ဗန္ဓနမာဟု ဓီရာ, ယဒါယသံ ဒါရုဇပဗ္ဗဇဉ္စ [ဗဗ္ဗဇဉ္စ (သီ။)]၊
သာရတ္တရတ္တာ မဏိကုဏ္ဍလေသု, ပုတ္တေသု ဒါရေသု စ ယာ အပေက္ခာ။
ဧတံ ဒဠှံ ဗန္ဓနမာဟု ဓီရာ, ဩဟာရိနံ သိထိလံ ဒုပ္ပမုဉ္စံ၊
ဧတမ္ပိ ဆေတွာန ဝဇန္တိ ဓီရာ, အနပေက္ခိနော ကာမသုခံ ပဟာယာတိ။
ဗန္ဓနာဂါရဇာတကံ ပဌမံ။
ဟံသာ ကောဉ္စာ မယူရာ စ, ဟတ္ထယော [ဟတ္ထိနော (သီ။), ဟတ္ထိယော (သျာ။ ပီ။)] ပသဒါ မိဂါ၊
သဗ္ဗေ သီဟဿ ဘာယန္တိ, နတ္ထိ ကာယသ္မိ တုလျတာ။
ဧဝမေဝ မနုဿေသု, ဒဟရော စေပိ ပညဝါ၊
သော ဟိ တတ္ထ မဟာ ဟောတိ, နေဝ ဗာလော သရီရဝါတိ။
ကေဠိသီလဇာတကံ ဒုတိယံ။
ဝိရူပက္ခေဟိ မေ မေတ္တံ, မေတ္တံ ဧရာပထေဟိ မေ၊
ဆဗျာပုတ္တေဟိ မေ မေတ္တံ, မေတ္တံ ကဏှာဂေါတမကေဟိ စ။
(ဇာ၊၁၊၅၄။)အပါဒကေဟိ မေ မေတ္တံ, မေတ္တံ ဒွိပါဒကေဟိ မေ၊
စတုပ္ပဒေဟိ မေ မေတ္တံ, မေတ္တံ ဗဟုပ္ပဒေဟိ မေ။
မာ မံ အပါဒကော ဟိံသိ, မာ မံ ဟိံသိ ဒွိပါဒကော၊
မာ မံ စတုပ္ပဒေါ ဟိံသိ, မာ မံ ဟိံသိ ဗဟုပ္ပဒေါ။
သဗ္ဗေ သတ္တာ သဗ္ဗေ ပါဏာ, သဗ္ဗေ ဘူတာ စ ကေဝလာ၊
သဗ္ဗေ ဘဒြာနိ ပဿန္တု, မာ ကဉ္စိ [ကိဉ္စိ (သျာ။ က။)] ပါပမာဂမာ။
အပ္ပမာဏော ဗုဒ္ဓေါ, အပ္ပမာဏော ဓမ္မော၊
အပ္ပမာဏော သံဃော, ပမာဏဝန္တာနိ သရီသပါနိ [သိရိသပါနိ (သီ။ သျာ။ ပီ။)]၊
အဟိဝိစ္ဆိကသတပဒီ, ဥဏ္ဏနာဘိ [ဥဏ္ဏာနာဘိ (သီ။ သျာ။ ပီ။)] သရဗူမူသိကာ။
ကတာ မေ ရက္ခာ ကတာ မေ ပရိတ္တာ, ပဋိက္ကမန္တု ဘူတာနိ၊
သောဟံ နမော ဘဂဝတော, နမော သတ္တန္နံ သမ္မာသမ္ဗုဒ္ဓါနန္တိ။
ခဏ္ဍဇာတကံ တတိယံ။
အပိ ဝီရက ပဿေသိ, သကုဏံ မဉ္ဇုဘာဏကံ၊
မယူရဂီဝသင်္ကာသံ, ပတိံ မယှံ သဝိဋ္ဌကံ။
ဥဒကထလစရဿ ပက္ခိနော, နိစ္စံ အာမကမစ္ဆဘောဇိနော၊
တဿာနုကရံ သဝိဋ္ဌကော, သေဝါလေ ပလိဂုဏ္ဌိတော မတောတိ။
ဝီရကဇာတကံ စတုတ္ထံ။
֍ * ၂၀၅။ ဂင်္ဂေယျဇာတကံ (၂-၆-၅)
သောဘတိ မစ္ဆော ဂင်္ဂေယျော, အထော သောဘတိ ယာမုနော [သောဘန္တိ မစ္ဆာ ဂင်္ဂေယျာ, အထော သောဘန္တိ ယာမုနာ (သျာ။ ပီ။)]၊
စတုပ္ပဒေါယံ ပုရိသော, နိဂြောဓပရိမဏ္ဍလော၊
ဤသကာယတ [ဤသမာယတ (က။)] ဂီဝေါ စ, သဗ္ဗေဝ အတိရောစတိ။
(ဇာ၊၁၊၅၅။)ယံ ပုစ္ဆိတော န တံ အက္ခာသိ [အက္ခာ (သီ။ သျာ။ ပီ။)], အညံ အက္ခာသိ [အက္ခာတိ (သျာ။ ပီ။)] ပုစ္ဆိတော၊
အတ္တပ္ပသံသကော ပေါသော, နာယံ အသ္မာက ရုစ္စတီတိ။
ဂင်္ဂေယျဇာတကံ ပဉ္စမံ။
֍ * ၂၀၆။ ကုရုင်္ဂမိဂဇာတကံ (၂-၆-၆)
ဣင်္ဃ ဝဒ္ဓမယံ [ဝဒ္ဓမယံ (သီ။ သျာ။ ပီ။)] ပါသံ, ဆိန္ဒ ဒန္တေဟိ ကစ္ဆပ၊
အဟံ တထာ ကရိဿာမိ, ယထာ နေဟိတိ လုဒ္ဒကော။
ကစ္ဆပေါ ပါဝိသီ ဝါရိံ, ကုရုင်္ဂေါ ပါဝိသီ ဝနံ၊
သတပတ္တော ဒုမဂ္ဂမှာ, ဒူရေ ပုတ္တေ အပါနယီတိ။
ကုရုင်္ဂမိဂဇာတကံ ဆဋ္ဌံ။
အယမဿကရာဇေန, ဒေသော ဝိစရိတော မယာ၊
အနုကာမယ ကာမေန [အနုကာမယဝနုကာမေန (သီ။ ပီ။)], ပိယေန ပတိနာ သဟ။
နဝေန သုခဒုက္ခေန, ပေါရာဏံ အပိဓီယတိ [အပိထီယတိ (သီ။ ပီ။), အပိထိယျတိ (သျာ။)]၊
တသ္မာ အဿကရညာဝ, ကီဋော ပိယတရော မမာတိ။
အဿကဇာတကံ သတ္တမံ။
အလံ မေတေဟိ အမ္ဗေဟိ, ဇမ္ဗူဟိ ပနသေဟိ စ၊
ယာနိ ပါရံ သမုဒ္ဒဿ, ဝရံ မယှံ ဥဒုမ္ဗရော။
မဟတီ ဝတ တေ ဗောန္ဒိ, န စ ပညာ တဒူပိကာ၊
သုသုမာရ [သုံသုမာရ (သီ။ သျာ။ ပီ။)] ဝဉ္စိတော မေသိ, ဂစ္ဆ ဒါနိ ယထာသုခန္တိ။
သုသုမာရဇာတကံ အဋ္ဌမံ။
(ဇာ၊၁၊၅၆။)ဒိဋ္ဌာ မယာ ဝနေ ရုက္ခာ, အဿကဏ္ဏာ ဝိဘီဋကာ [ဝိဘေဒကာ (သျာ။ က။)]၊
န တာနိ ဧဝံ သက္ကန္တိ, ယထာ တွံ ရုက္ခ သက္ကသိ။
ပုရာဏကုက္ကုဋော [ကက္ကရော (သီ။ သျာ။ ပီ။)] အယံ, ဘေတွာ ပဉ္ဇရမာဂတော၊
ကုသလော ဝါဠပါသာနံ, အပက္ကမတိ ဘာသတီတိ။
ကုက္ကုဋ [ကက္ကရ (သီ။ သျာ။ ပီ။)] ဇာတကံ နဝမံ။
֍ * ၂၁၀။ ကန္ဒဂလကဇာတကံ (၂-၆-၁၀)
အမ္ဘော ကော နာမ ယံ ရုက္ခော, သိန္နပတ္တော [သီနပတ္တော (သီ။ ပီ။)] သကဏ္ဋကော၊
ယတ္ထ ဧကပ္ပဟာရေန, ဥတ္တမင်္ဂံ ဝိဘိဇ္ဇိတံ [ဝိသာဋိကံ (သီ။ သျာ။ ပီ။), ဝိဃာဋိတံ (သီ။ နိယျ)]။
အစာရိ ဝတာယံ ဝိတုဒံ ဝနာနိ, ကဋ္ဌင်္ဂရုက္ခေသု အသာရကေသု၊
အထာသဒါ ခဒိရံ ဇာတသာရံ [ဇာတိသာရံ (က။)], ယတ္ထဗ္ဘိဒါ ဂရုဠော ဥတ္တမင်္ဂန္တိ။
ကန္ဒဂလက [ကန္ဒလက (က။)] ဇာတကံ ဒသမံ။
နတံဒဠှဝဂ္ဂေါ ဆဋ္ဌော။
တဿုဒ္ဒါနံ –
ဒဠှဗန္ဓန ဟံသဝရော စ ပုန, ဝိရူပက္ခ သဝိဋ္ဌက မစ္ဆဝရော၊
သကုရုင်္ဂ သအဿက အမ္ဗဝရော, ပုန ကုက္ကုဋကော ဂရုဠေန ဒသာတိ။
၇။ ဗီရဏထမ္ဘဝဂ္ဂေါ
֍ * ၂၁၁။ သောမဒတ္တဇာတကံ (၂-၇-၁)
အကာသိ ယောဂ္ဂံ ဓုဝမပ္ပမတ္တော, သံဝစ္ဆရံ ဗီရဏထမ္ဘကသ္မိံ၊
ဗျာကာသိ သညံ ပရိသံ ဝိဂယှ, န နိယျမော တာယတိ အပ္ပပညံ။
(ဇာ၊၁၊၅၇။)ဒွယံ ယာစနကော တာတ, သောမဒတ္တ နိဂစ္ဆတိ၊
အလာဘံ ဓနလာဘံ ဝါ, ဧဝံ ဓမ္မာ ဟိ ယာစနာတိ။
သောမဒတ္တဇာတကံ ပဌမံ။
֍ * ၂၁၂။ ဥစ္ဆိဋ္ဌဘတ္တဇာတကံ (၂-၇-၂)
အညော ဥပရိမော ဝဏ္ဏော, အညော ဝဏ္ဏော စ ဟေဋ္ဌိမော၊
ဗြာဟ္မဏီ တွေဝ ပုစ္ဆာမိ, ကိံ ဟေဋ္ဌာ ကိဉ္စ ဥပ္ပရိ။
အဟံ နဋောသ္မိ ဘဒ္ဒန္တေ, ဘိက္ခကောသ္မိ ဣဓာဂတော၊
အယဉှိ ကောဋ္ဌမောတိဏ္ဏော, အယံ သော ယံ [တွံ (က။)] ဂဝေသသီတိ။
ဥစ္ဆိဋ္ဌဘတ္တဇာတကံ ဒုတိယံ။
ဣသီနမန္တရံ ကတွာ, ဘရုရာဇာတိ [ကုရုရာဇာတိ (က။)] မေ သုတံ၊
ဥစ္ဆိန္နော သဟ ရဋ္ဌေဟိ [ရဋ္ဌေန (သီ။ ပီ။)], သရာဇာ ဝိဘဝင်္ဂတော။
တသ္မာ ဟိ ဆန္ဒာဂမနံ, နပ္ပသံသန္တိ ပဏ္ဍိတာ၊
အဒုဋ္ဌစိတ္တော ဘာသေယျ, ဂိရံ သစ္စုပသံဟိတန္တိ။
ဘရုဇာတကံ [ကုရုရာတကံ (က။)] တတိယံ။
֍ * ၂၁၄။ ပုဏ္ဏနဒီဇာတကံ (၂-၇-၄)
ပုဏ္ဏံ နဒိံ ယေန စ ပေယျမာဟု, ဇာတံ ယဝံ ယေန စ ဂုယှမာဟု၊
ဒူရံ ဂတံ ယေန စ အဝှယန္တိ, သော တျာဂတော [တျာဘတော (သျာ။ က။) ပဟေဠိဂါထာဘာဝေါ မနသိ ကာတဗ္ဗော] ဟန္ဒ စ ဘုဉ္ဇ ဗြာဟ္မဏ။
ယတော မံ သရတီ ရာဇာ, ဝါယသမ္ပိ ပဟေတဝေ၊
ဟံသာ ကောဉ္စာ မယူရာ စ [ဟံသကောဉ္စမယူရာနံ (က။ အဋ္ဌ။ ပါဌန္တရံ)], အသတီယေဝ ပါပိယာတိ။
ပုဏ္ဏနဒီဇာတကံ စတုတ္ထံ။
(ဇာ၊၁၊၅၈။)အဝဓီ ဝတ အတ္တာနံ, ကစ္ဆပေါ ဗျာဟရံ ဂိရံ [ကစ္ဆပေါဝ ပဗျာဟရံ (သျာ။), ကစ္ဆပေါ သော ပဗျာဟရံ (က။)]၊
သုဂ္ဂဟီတသ္မိံ ကဋ္ဌသ္မိံ, ဝါစာယ သကိယာဝဓိ။
ဧတမ္ပိ ဒိသွာ နရဝီရိယသေဋ္ဌ, ဝါစံ ပမုဉ္စေ ကုသလံ နာတိဝေလံ၊
ပဿသိ ဗဟုဘာဏေန, ကစ္ဆပံ ဗျသနံ ဂတန္တိ။
ကစ္ဆပဇာတကံ ပဉ္စမံ။
န မာယမဂ္ဂိ တပတိ, န သူလော သာဓုတစ္ဆိတော၊
ယဉ္စ မံ မညတေ မစ္ဆီ, အညံ သော ရတိယာ ဂတော။
သော မံ ဒဟတိ ရာဂဂ္ဂိ, စိတ္တံ စူပတပေတိ မံ၊
ဇာလိနော မုဉ္စထာယိရာ မံ, န ကာမေ ဟညတေ ကွစီတိ။
မစ္ဆဇာတကံ ဆဋ္ဌံ။
သဗ္ဗော လောကော အတ္တမနော အဟောသိ, အကောဝိဒါ ဂါမဓမ္မဿ သေဂ္ဂု၊
ကောမာရိ ကော နာမ [ကောမာရိကာ နာမ (က။), ကောမာရိကော နာမ (သျာ။ ပီ။)] တဝဇ္ဇ ဓမ္မော, ယံ တွံ ဂဟိတာ ပဝနေ ပရောဒသိ။
ယော ဒုက္ခဖုဋ္ဌာယ ဘဝေယျ တာဏံ, သော မေ ပိတာ ဒုဗ္ဘိ ဝနေ ကရောတိ၊
သာ ကဿ ကန္ဒာမိ ဝနဿ မဇ္ဈေ, ယော တာယိတာ သော သဟသံ ကရောတီတိ။
သေဂ္ဂုဇာတကံ သတ္တမံ။
(ဇာ၊၁၊၅၉။)֍ * ၂၁၈။ ကူဋဝါဏိဇဇာတကံ (၂-၇-၈)
သဌဿ သာဌေယျမိဒံ သုစိန္တိတံ, ပစ္စောဍ္ဍိတံ ပဋိကူဋဿ ကူဋံ၊
ဖာလဉ္စေ ခါဒေယျုံ [အဒေယျုံ (သီ။ ပီ။)] မူသိကာ, ကသ္မာ ကုမာရံ ကုလလာ န [နော (သီ။ သျာ။ ပီ။)] ဟရေယျုံ။
ကူဋဿ ဟိ သန္တိ [သန္တီဓ (က။)] ကူဋကူဋာ, ဘဝတိ [ဘဝန္တိ (က။)] စာပိ နိကတိနော နိကတျာ၊
ဒေဟိ ပုတ္တနဋ္ဌ ဖာလနဋ္ဌဿ ဖာလံ, မာ တေ ပုတ္တမဟာသိ ဖာလနဋ္ဌောတိ။
ကူဋဝါဏိဇဇာတကံ အဋ္ဌမံ။
ဟိရညံ မေ သုဝဏ္ဏံ မေ, ဧသာ ရတ္တိံ ဒိဝါ ကထာ၊
ဒုမ္မေဓာနံ မနုဿာနံ, အရိယဓမ္မံ အပဿတံ။
ဒွေ ဒွေ ဂဟပတယော ဂေဟေ, ဧကော တတ္ထ အမဿုကော၊
လမ္ဗတ္ထနော ဝေဏိကတော, အထော အင်္ကိတကဏ္ဏကော၊
ကီတော ဓနေန ဗဟုနာ, သော တံ ဝိတုဒတေ ဇနန္တိ။
ဂရဟိတဇာတကံ နဝမံ။
သုခံ ဇီဝိတရူပေါသိ, ရဋ္ဌာ ဝိဝနမာဂတော၊
သော ဧကကော ရုက္ခမူလေ [အရညသ္မိံ (သီ။ သျာ။ ပီ။)], ကပဏော ဝိယ ဈာယသိ။
သုခံ ဇီဝိတရူပေါသ္မိ, ရဋ္ဌာ ဝိဝနမာဂတော၊
သော ဧကကော ရုက္ခမူလေ, ကပဏော ဝိယ ဈာယာမိ၊
ဓမ္မဓဇဇာတကံ ဒသမံ။
ဗီရဏထမ္ဘဝဂ္ဂေါ သတ္တမော။
(ဇာ၊၁၊၆၀။)တဿုဒ္ဒါနံ –
အထ ဗီရဏထမ္ဘဝရော စ နဋော, ဘရုရာဇဝရုတ္တမပုဏ္ဏနဒီ၊
ဗဟုဘာဏိ အဂ္ဂိပဝနေ မူသိကာ, သဟလမ္ဗတ္ထနော ကပဏေန ဒသာတိ။
၈။ ကာသာဝဝဂ္ဂေါ
အနိက္ကသာဝေါ ကာသာဝံ, ယော ဝတ္ထံ ပရိဒဟိဿတိ [ပရိဒဟေဿတိ (သီ။ ပီ။)]၊
အပေတော ဒမသစ္စေန, န သော ကာသာဝမရဟတိ။
ယော စ ဝန္တကသာဝဿ, သီလေသု သုသမာဟိတော၊
ဥပေတော ဒမသစ္စေန, သ ဝေ ကာသာဝမရဟတီတိ။
ကာသာဝဇာတကံ ပဌမံ။
֍ * ၂၂၂။ စူဠနန္ဒိယဇာတကံ (၂-၈-၂)
ဣဒံ တဒါစရိယဝစော, ပါရာသရိယော ယဒဗြဝိ [ပေါရာဏာစရိယောဗြဝိ (က။)]၊
မာသု တွံ အကရိ [အကရာ (သီ။ ပီ။)] ပါပံ, ယံ တွံ ပစ္ဆာ ကတံ တပေ။
ယာနိ ကရောတိ ပုရိသော, တာနိ အတ္တနိ ပဿတိ၊
ကလျာဏကာရီ ကလျာဏံ, ပါပကာရီ စ ပါပကံ၊
ယာဒိသံ ဝပတေ ဗီဇံ, တာဒိသံ ဟရတေ ဖလန္တိ။
စူဠနန္ဒိယဇာတကံ ဒုတိယံ။
နမေ နမန္တဿ ဘဇေ ဘဇန္တံ, ကိစ္စာနုကုဗ္ဗဿ ကရေယျ ကိစ္စံ၊
နာနတ္ထကာမဿ ကရေယျ အတ္ထံ, အသမ္ဘဇန္တမ္ပိ န သမ္ဘဇေယျ။
(ဇာ၊၁၊၆၁။)စဇေ စဇန္တံ ဝနထံ န ကယိရာ, အပေတစိတ္တေန န သမ္ဘဇေယျ၊
ဒိဇော ဒုမံ ခီဏဖလန္တိ ဉတွာ, အညံ သမေက္ခေယျ မဟာ ဟိ လောကောတိ။
ပုဋဘတ္တဇာတကံ တတိယံ။
ယဿေတေ စတုရော ဓမ္မာ, ဝါနရိန္ဒ ယထာ တဝ၊
သစ္စံ ဓမ္မော ဓိတိ စာဂေါ, ဒိဋ္ဌံ သော အတိဝတ္တတိ။
ယဿ စေတေ န ဝိဇ္ဇန္တိ, ဂုဏာ ပရမဘဒ္ဒကာ၊
သစ္စံ ဓမ္မော ဓိတိ စာဂေါ, ဒိဋ္ဌံ သော နာတိဝတ္တတီတိ။
ကုမ္ဘိလဇာတကံ စတုတ္ထံ။
֍ * ၂၂၅။ ခန္တိဝဏ္ဏဇာတကံ (၂-၈-၅)
အတ္ထိ မေ ပုရိသော ဒေဝ, သဗ္ဗကိစ္စေသု ဗျာဝဋော [ဝါဝဋော (က။)]၊
တဿ စေကောပရာဓတ္ထိ, တတ္ထ တွံ ကိန္တိ မညသိ။
အမှာကမ္ပတ္ထိ ပုရိသော, ဧဒိသော ဣဓ ဝိဇ္ဇတိ၊
ဒုလ္လဘော အင်္ဂသမ္ပန္နော, ခန္တိရသ္မာက ရုစ္စတီတိ။
ခန္တိဝဏ္ဏဇာတကံ ပဉ္စမံ။
ကာလေ နိက္ခမနာ သာဓု, နာကာလေ သာဓု နိက္ခမော၊
အကာလေန ဟိ နိက္ခမ္မ, ဧကကမ္ပိ ဗဟုဇ္ဇနော၊
န ကိဉ္စိ အတ္ထံ ဇောတေတိ, ဓင်္ကသေနာဝ ကောသိယံ။
ဓီရော စ ဝိဓိဝိဓာနညူ, ပရေသံ ဝိဝရာနုဂူ၊
သဗ္ဗာမိတ္တေ ဝသီကတွာ, ကောသိယောဝ သုခီ သိယာတိ။
ကောသိယဇာတကံ ဆဋ္ဌံ။
(ဇာ၊၁၊၆၂။)သူရော သူရေန သင်္ဂမ္မ, ဝိက္ကန္တေန ပဟာရိနာ၊
ဧဟိ နာဂ နိဝတ္တဿု, ကိံ နု ဘီတော ပလာယသိ၊
ပဿန္တု အင်္ဂမဂဓာ, မမ တုယှဉ္စ ဝိက္ကမံ။
န တံ ပါဒါ ဝဓိဿာမိ, န ဒန္တေဟိ န သောဏ္ဍိယာ၊
မီဠှေန တံ ဝဓိဿာမိ, ပူတိ ဟညတု ပူတိနာတိ။
ဂူထပါဏဇာတကံ သတ္တမံ။
တယော ဂိရိံ အန္တရံ ကာမယာမိ, ပဉ္စာလာ ကုရုယော ကေကကေ စ [ကုရယော ကေကယေ စ (သီ။)]၊
တတုတ္တရိံ [တဒုတ္တရိံ (က။)] ဗြာဟ္မဏ ကာမယာမိ, တိကိစ္ဆ မံ ဗြာဟ္မဏ ကာမနီတံ။
ကဏှာဟိဒဋ္ဌဿ ကရောန္တိ ဟေကေ, အမနုဿပဝိဋ္ဌဿ [အမနုဿဝဒ္ဓဿ (သီ။ ပီ။), အမနုဿဝိဋ္ဌဿ (သျာ။)] ကရောန္တိ ပဏ္ဍိတာ၊
န ကာမနီတဿ ကရောတိ ကောစိ, ဩက္ကန္တသုက္ကဿ ဟိ ကာ တိကိစ္ဆာတိ။
ကာမနီတဇာတကံ အဋ္ဌမံ။
ဂဇဂ္ဂမေဃေဟိ ဟယဂ္ဂမာလိဘိ, ရထူမိဇာတေဟိ သရာဘိဝဿေဘိ [သရာဘိဝဿဘိ (သျာ။ သီ။ အဋ္ဌ။), သရာဘိဝဿိဘိ (?)]၊
ထရုဂ္ဂဟာဝဋ္ဋ [ဓနုဂ္ဂဟာဝဋ္ဋ (က။)] ဒဠှပ္ပဟာရိဘိ, ပရိဝါရိတာ တက္ကသိလာ သမန္တတော။
(ဇာ၊၁၊၆၃။)[အဘိဓာဝထာ စ ပတထာ စ, ဝိဝိဓဝိနဒိတာ စ ဒန္တိဘိ၊ ဝတ္တတဇ္ဇ တုမုလော ဃောသော, ယထာ ဝိဇ္ဇုတာ ဇလဓရဿ ဂဇ္ဇတောတိ၊ (သီ။ ပီ။ က။)] အဘိဓာဝထ စူပဓာဝထ စ [အဘိဓာဝထာ စုပ္ပတထာ စ (သျာ။)], ဝိဝိဓာ ဝိနာဒိတာ [ဝိနာဒိတတ္ထ (က။)] ဝဒန္တိဘိ၊
ဝတ္တတဇ္ဇ တုမုလော ဃောသော ယထာ, ဝိဇ္ဇုလတာ ဇလဓရဿ ဂဇ္ဇတောတိ [အဘိဓာဝထာ စ ပတထာ စ, ဝိဝိဓဝိနဒိတာ စ ဒန္တိဘိ၊ ဝတ္တတဇ္ဇ တုမုလော ဃောသော, ယထာ ဝိဇ္ဇုတာ ဇလဓရဿ ဂဇ္ဇတောတိ၊ (သီ။ ပီ။ က။)]။
ပလာယိတဇာတကံ နဝမံ။
֍ * ၂၃၀။ ဒုတိယပလာယိတဇာတကံ (၂-၈-၁၀)
ဓဇမပရိမိတံ အနန္တပါရံ, ဒုပ္ပသဟံဓင်္ကေဟိ သာဂရံဝ [သာဂရမိဝ (သီ။ သျာ။ ပီ။)]၊
ဂိရိမိဝအနိလေန ဒုပ္ပသယှော [ဒုပ္ပသဟော (သီ။ ပီ။ က။)], ဒုပ္ပသဟော အဟမဇ္ဇတာဒိသေန။
မာ ဗာလိယံ ဝိလပိ [ဝိပ္ပလပိ (ဗဟူသု)] န ဟိဿ တာဒိသံ, ဝိဍယှသေ [ဝိဠယှသေ (သီ။ ပီ။)] န ဟိ လဘသေ နိသေဓကံ၊
အာသဇ္ဇသိ ဂဇမိဝ ဧကစာရိနံ, ယော တံ ပဒါ နဠမိဝ ပေါထယိဿတီတိ။
ဒုတိယပလာယိတဇာတကံ ဒသမံ။
ကာသာဝဝဂ္ဂေါ အဋ္ဌမော။
တဿုဒ္ဒါနံ –
ဝရဝတ္ထဝစော ဒုမခီဏဖလံ, စတုရောဓမ္မဝရံ ပုရိသုတ္တမ၊
ဓင်္ကမဂဓာ စ တယောဂိရိနာမ, ဂဇဂ္ဂဝရော ဓဇဝရေန ဒသာတိ။
(ဇာ၊၁၊၆၄။)၉။ ဥပါဟနဝဂ္ဂေါ
ယထာပိ ကီတာ ပုရိသဿုပါဟနာ, သုခဿ အတ္ထာယ ဒုခံ ဥဒဗ္ဗဟေ၊
ဃမ္မာဘိတတ္တာ ထလသာ ပပီဠိတာ, တဿေဝ ပါဒေ ပုရိသဿ ခါဒရေ။
ဧဝမေဝ ယော ဒုက္ကုလီနော အနရိယော, တမ္မာက [တမှာက (သီ။), တုမှာက (သျာ။ ပီ။)] ဝိဇ္ဇဉ္စ သုတဉ္စ အာဒိယ၊
တမေဝ သော တတ္ထ သုတေန ခါဒတိ, အနရိယော ဝုစ္စတိ ဒုပါဟနူပမောတိ [ပါနဒူပမောတိ (သီ။ ပီ။)]။
ဥပါဟနဇာတကံ ပဌမံ။
ဧကစိန္တိတော ယမတ္ထော, ဗာလော အပရိဏာယကော၊
န ဟိ ခုဇ္ဇေန ဝါမေန, ဘောတိ သင်္ဂန္တုမရဟသိ။
ပုရိသူသဘံ မညမာနာ, အဟံ ခုဇ္ဇမကာမယိံ၊
သောယံ သံကုဋိတော သေတိ, ဆိန္နတန္တိ ယထာ ဝိဏာတိ [ထုဏာတိ (သီ။)]။
ဝီဏာဂုဏဇာတကံ ဒုတိယံ။
ကာမံ ယဟိံ ဣစ္ဆသိ တေန ဂစ္ဆ, ဝိဒ္ဓေါသိ မမ္မမှိ [မမသ္မိ (က။)] ဝိကဏ္ဏကေန၊
ဟတောသိ ဘတ္တေန သုဝါဒိတေန [သဝါဒိတေန (သီ။ သျာ။ ပီ။)], လောလော စ မစ္ဆေ အနုဗန္ဓမာနော။
(ဇာ၊၁၊၆၅။)ဧဝမ္ပိ လောကာမိသံ ဩပတန္တော, ဝိဟညတီ စိတ္တဝသာနုဝတ္တီ၊
သော ဟညတိ ဉာတိသခါန မဇ္ဈေ, မစ္ဆာနုဂေါ သောရိဝ သုံသုမာရောတိ [သုသုမာရော (က။)]။
ဝိကဏ္ဏဇာတကံ တတိယံ။
တွမေဝ ဒါနိမကရ [မကရိ (သျာ။), မကရာ (က။ သီ။)], ယံ ကာမော ဗျဂမာ တယိ၊
သောယံ အပ္ပဋိသန္ဓိကော, ခရဆိန္နံဝ ရေနုကံ [ရေရုကံ (သီ။ ပီ။)]။
အတြိစ္ဆံ [အတြိစ္ဆာ (သီ။ သျာ။ ပီ။)] အတိလောဘေန, အတိလောဘမဒေန စ၊
ဧဝံ ဟာယတိ အတ္ထမှာ, အဟံဝ အသိတာဘုယာတိ။
အသိတာဘူဇာတကံ စတုတ္ထံ။
သုခါ ဃရာ ဝစ္ဆနခ, သဟိရညာ သဘောဇနာ၊
ယတ္ထ ဘုတွာ ပိဝိတွာ စ, သယေယျာထ အနုဿုကော။
ဃရာ နာနီဟမာနဿ, ဃရာ နာဘဏတော မုသာ၊
ဃရာ နာဒိန္နဒဏ္ဍဿ, ပရေသံ အနိကုဗ္ဗတော [အနိကြုဗ္ဗတော (က။)]၊
ဧဝံ ဆိဒ္ဒံ ဒုရဘိသမ္ဘဝံ [ဒုရဘိဘဝံ (သီ။ ပီ။)], ကော ဃရံ ပဋိပဇ္ဇတီတိ။
ဝစ္ဆနခဇာတကံ ပဉ္စမံ။
ဘဒ္ဒကော ဝတယံ ပက္ခီ, ဒိဇော ကုမုဒသန္နိဘော၊
ဝူပသန္တေဟိ ပက္ခေဟိ, မန္ဒမန္ဒောဝ ဈာယတိ။
နာဿ သီလံ ဝိဇာနာထ, အနညာယ ပသံသထ၊
အမှေ ဒိဇော န ပါလေတိ, တေန ပက္ခီ န ဖန္ဒတီတိ။
ဗကဇာတကံ ဆဋ္ဌံ။
(ဇာ၊၁၊၆၆။)ကော နု ခေါ ဘဂဝါ ဟေတု, ဧကစ္စေ ဣဓ ပုဂ္ဂလေ၊
အတီဝ ဟဒယံ နိဗ္ဗာတိ, စိတ္တဉ္စာပိ ပသီဒတိ။
ပုဗ္ဗေဝ သန္နိဝါသေန, ပစ္စုပ္ပန္နဟိတေန ဝါ၊
ဧဝံ တံ ဇာယတေ ပေမံ, ဥပ္ပလံဝ ယထောဒကေတိ။
သာကေတဇာတကံ သတ္တမံ။
ဣင်္ဃ ဧကပဒံ တာတ, အနေကတ္ထပဒဿိတံ [ပဒနိဿိတံ (သီ။ ပီ။)]၊
ကိဉ္စိ သင်္ဂါဟိကံ ဗြူသိ, ယေနတ္ထေ သာဓယေမသေ။
ဒက္ခေယျေကပဒံ တာတ, အနေကတ္ထပဒဿိတံ၊
တဉ္စ သီလေန သညုတ္တံ, ခန္တိယာ ဥပပါဒိတံ၊
အလံ မိတ္တေ သုခါပေတုံ, အမိတ္တာနံ ဒုခါယ စာတိ။
ဧကပဒဇာတကံ အဋ္ဌမံ။
֍ * ၂၃၉။ ဟရိတမဏ္ဍူကဇာတကံ (၂-၉-၉)
အာသီဝိသမ္ပိ မံ [အာသီဝိသံ မမံ (သီ။ ပီ။)] သန္တံ, ပဝိဋ္ဌံ ကုမိနာမုခံ၊
ရုစ္စတေ ဟရိတာမာတာ, ယံ မံ ခါဒန္တိ မစ္ဆကာ။
ဝိလုမ္ပတေဝ ပုရိသော, ယာဝဿ ဥပကပ္ပတိ၊
ယဒါ စညေ ဝိလုမ္ပန္တိ, သော ဝိလုတ္တော ဝိလုမ္ပတီတိ [ဝိလုပ္ပတီတိ (?)]။
ဟရိတမဏ္ဍူကဇာတကံ နဝမံ။
֍ * ၂၄၀။ မဟာပိင်္ဂလဇာတကံ (၂-၉-၁၀)
သဗ္ဗော ဇနော ဟိံသိတော ပိင်္ဂလေန, တသ္မိံ မတေ ပစ္စယာ [ပစ္စယံ (သီ။ သျာ။ ပီ။)] ဝေဒယန္တိ၊
ပိယော နု တေ အာသိ အကဏှနေတ္တော, ကသ္မာ နု တွံ ရောဒသိ ဒွါရပါလ။
(ဇာ၊၁၊၆၇။)န မေ ပိယော အာသိ အကဏှနေတ္တော, ဘာယာမိ ပစ္စာဂမနာယ တဿ၊
ဣတော ဂတော ဟိံသေယျ မစ္စုရာဇံ, သော ဟိံသိတော အာနေယျ ပုန ဣဓ။
ဒဍ္ဎော ဝါဟသဟဿေဟိ, သိတ္တော ဃဋသတေဟိ သော၊
ပရိက္ခတာ စ သာ ဘူမိ, မာ ဘာယိ နာဂမိဿတီတိ။
မဟာပိင်္ဂလဇာတကံ ဒသမံ။
ဥပါဟနဝဂ္ဂေါ နဝမော။
တဿုဒ္ဒါနံ –
ဝရုပါဟန ခုဇ္ဇ ဝိကဏ္ဏကကော, အသိတာဘုယ ပဉ္စမဝစ္ဆနခေါ၊
ဒိဇ ပေမဝရုတ္တမဧကပဒံ, ကုမိနာမုခ ပိင်္ဂလကေန ဒသာတိ။
၁၀။ သိင်္ဂါလဝဂ္ဂေါ
֍ * ၂၄၁။ သဗ္ဗဒါဌိဇာတကံ (၂-၁၀-၁)
သိင်္ဂါလော မာနထဒ္ဓေါ စ, ပရိဝါရေန အတ္ထိကော၊
ပါပုဏိ မဟတိံ ဘူမိံ, ရာဇာသိ သဗ္ဗဒါဌိနံ။
ဧဝမေဝ မနုဿေသု, ယော ဟောတိ ပရိဝါရဝါ၊
သော ဟိ တတ္ထ မဟာ ဟောတိ, သိင်္ဂါလော ဝိယ ဒါဌိနန္တိ။
သဗ္ဗဒါဌိဇာတကံ ပဌမံ။
ဗာလော ဝတာယံ သုနခေါ, ယော ဝရတ္တံ [ယော စ ယောတ္တံ (က။)] န ခါဒတိ၊
ဗန္ဓနာ စ ပမုဉ္စေယျ, အသိတော စ ဃရံ ဝဇေ။
(ဇာ၊၁၊၆၈။)အဋ္ဌိတံ မေ မနသ္မိံ မေ, အထော မေ ဟဒယေ ကတံ၊
ကာလဉ္စ ပဋိကင်္ခါမိ, ယာဝ ပဿုပတူ ဇနော [ပသုပတုဇ္ဇနော (သျာ။ က။)]။
သုနခဇာတကံ ဒုတိယံ။
֍ * ၂၄၃။ ဂုတ္တိလဇာတကံ (၂-၁၀-၃)
သတ္တတန္တိံ သုမဓုရံ, ရာမဏေယျံ အဝါစယိံ၊
သော မံ ရင်္ဂမှိ အဝှေတိ, သရဏံ မေ ဟောဟိ ကောသိယ။
အဟံ တံ သရဏံ သမ္မ [အဟံ တေ သရဏံ ဟောမိ (ဝိ။ ဝ။ ၃၂၈)], အဟမာစရိယပူဇကော၊
န တံ ဇယိဿတိ သိဿော, သိဿမာစရိယ ဇေဿသီတိ။
ဂုတ္တိလဇာတကံ တတိယံ။
֍ * ၂၄၄။ ဝိဂတိစ္ဆဇာတကံ (၂-၁၀-၄)
ယံ ပဿတိ န တံ ဣစ္ဆတိ, ယဉ္စ န ပဿတိ တံ ကိရိစ္ဆတိ၊
မညာမိ စိရံ စရိဿတိ, န ဟိ တံ လစ္ဆတိ ယံ သ ဣစ္ဆတိ။
ယံ လဘတိ န တေန တုဿတိ, ယဉ္စ ပတ္ထေတိ လဒ္ဓံ ဟီဠေတိ၊
ဣစ္ဆာ ဟိ အနန္တဂေါစရာ, ဝိဂတိစ္ဆာန [ဝီတိစ္ဆာနံ (သီ။ ပီ။)] နမော ကရောမသေတိ။
ဝိဂတိစ္ဆ [ဝီတိစ္ဆ (သီ။ ပီ။)] ဇာတကံ စတုတ္ထံ။
֍ * ၂၄၅။ မူလပရိယာယဇာတကံ (၂-၁၀-၅)
ကာလော ဃသတိ ဘူတာနိ, သဗ္ဗာနေဝ သဟတ္တနာ၊
ယော စ ကာလဃသော ဘူတော, သ ဘူတပစနိံ ပစိ။
ဗဟူနိ နရသီသာနိ, လောမသာနိ ဗြဟာနိ စ၊
ဂီဝါသု ပဋိမုက္ကာနိ, ကောစိဒေဝေတ္ထ ကဏ္ဏဝါတိ။
မူလပရိယာယဇာတကံ ပဉ္စမံ။
֍ * ၂၄၆။ ဗာလောဝါဒဇာတကံ (၂-၁၀-၆)
ဟန္တွာ ဆေတွာ [ဈတွာ (သီ။ ပီ။), ဃတွာ (သျာ။)] ဝဓိတွာ စ, ဒေတိ ဒါနံ အသညတော၊
ဧဒိသံ ဘတ္တံ ဘုဉ္ဇမာနော, သ ပါပေန ဥပလိပ္ပတိ [သ ပါပေန ဥပလိပ္ပတိ (သီ။ ပီ။)]။
(ဇာ၊၁၊၆၉။)ပုတ္တဒါရမ္ပိ စေ ဟန္တွာ, ဒေတိ ဒါနံ အသညတော၊
ဘုဉ္ဇမာနောပိ သပ္ပညော, န ပါပမုပလိမ္ပတီတိ။
ဗာလောဝါဒဇာတကံ ဆဋ္ဌံ။
֍ * ၂၄၇။ ပါဒဉ္ဇလီဇာတကံ (၂-၁၀-၇)
အဒ္ဓါ ပါဒဉ္ဇလီ သဗ္ဗေ, ပညာယ အတိရောစတိ၊
တထာ ဟိ ဩဋ္ဌံ ဘဉ္ဇတိ, ဥတ္တရိံ နူန ပဿတိ။
နာယံ ဓမ္မံ အဓမ္မံ ဝါ, အတ္ထာနတ္ထဉ္စ ဗုဇ္ဈတိ၊
အညတြ ဩဋ္ဌနိဗ္ဘောဂါ, နာယံ ဇာနာတိ ကိဉ္စနန္တိ။
ပါဒဉ္ဇလီဇာတကံ သတ္တမံ။
֍ * ၂၄၈။ ကိံသုကောပမဇာတကံ (၂-၁၀-၈)
သဗ္ဗေဟိ ကိံသုကော ဒိဋ္ဌော, ကိံနွေတ္ထ ဝိစိကိစ္ဆထ၊
န ဟိ သဗ္ဗေသု ဌာနေသု, သာရထီ ပရိပုစ္ဆိတော။
ဧဝံ သဗ္ဗေဟိ ဉာဏေဟိ, ယေသံ ဓမ္မာ အဇာနိတာ၊
တေ ဝေ ဓမ္မေသု ကင်္ခန္တိ, ကိံသုကသ္မိံဝ ဘာတရောတိ။
ကိံသုကောပမဇာတကံ အဋ္ဌမံ။
ဧကပုတ္တကော ဘဝိဿသိ, တွဉ္စ နော ဟေဿသိ ဣဿရော ကုလေ၊
ဩရောဟ ဒုမသ္မာ သာလက, ဧဟိ ဒါနိ ဃရကံ ဝဇေမသေ။
နနု မံ သုဟဒယောတိ [နနု မံ ဟဒယေတိ (သီ။ ပီ။)] မညသိ, ယဉ္စ မံ ဟနသိ ဝေဠုယဋ္ဌိယာ၊
ပက္ကမ္ဗဝနေ ရမာမသေ, ဂစ္ဆ တွံ ဃရကံ ယထာသုခန္တိ။
သာလကဇာတကံ နဝမံ။
(ဇာ၊၁၊၇၀။)အယံ ဣသီ ဥပသမသံယမေ ရတော, သ တိဋ္ဌတိ [သန္တိဋ္ဌတိ (သီ။ ပီ။)] သိသိရဘယေန အဋ္ဋိတော၊
ဟန္ဒ အယံ ပဝိသတုမံ အဂါရကံ, ဝိနေတု သီတံ ဒရထဉ္စ ကေဝလံ။
နာယံ ဣသီ ဥပသမသံယမေ ရတော, ကပီ အယံ ဒုမဝရသာခဂေါစရော၊
သော ဒူသကော ရောသကော စာပိ ဇမ္မော, သစေဝဇေမမ္ပိ [သစေ + အာဝဇေ + ဣမမ္ပိ] ဒူသေယျဂါရန္တိ [ဒူသယေ ဃရန္တိ (သီ။ သျာ။ ပီ။)]။
ကပိဇာတကံ ဒသမံ။
သိင်္ဂါလဝဂ္ဂေါ ဒသမော။
တဿုဒ္ဒါနံ –
အထ ရာဇာ သိင်္ဂါလဝရော သုနခေါ, တထာ ကောသိယ ဣစ္ဆတိ ကာလဃသော၊
အထ ဒါနဝရောဋ္ဌပိ သာရထိနာ, ပုနမ္ဗဝနဉ္စ သိသိရကပိ ဒသာတိ။
အထ ဝဂ္ဂုဒ္ဒါနံ –
ဒဠှဉ္စ ဝဂ္ဂံ အပရေန သန္ထဝံ, ကလျာဏဝဂ္ဂါသဒိသော စ ရူဟကံ၊
နတံဒဠှ ဗီရဏထမ္ဘကံ ပုန, ကာသာဝုပါဟန သိင်္ဂါလကေန ဒသာတိ။
ဒုကနိပါတံ နိဋ္ဌိတံ။
(ဇာ၊၁၊၇၁။)၃။ တိကနိပါတော
၁။ သင်္ကပ္ပဝဂ္ဂေါ
֍ * ၂၅၁။ သင်္ကပ္ပရာဂဇာတကံ (၃-၁-၁)
သင်္ကပ္ပရာဂဓောတေန, ဝိတက္ကနိသိတေန စ၊
နာလင်္ကတေန ဘဒြေန [နေဝါလင်္ကတဘဒြေန (သျာ။)], ဥသုကာရာကတေန စ [န ဥသုကာရကတေန စ (သီ။ သျာ။ ပီ။)]။
န ကဏ္ဏာယတမုတ္တေန, နာပိ မောရူပသေဝိနာ၊
တေနမှိ ဟဒယေ ဝိဒ္ဓေါ, သဗ္ဗင်္ဂပရိဒါဟိနာ။
အာဝေဓဉ္စ န ပဿာမိ, ယတော ရုဟိရမဿဝေ၊
ယာဝ အယောနိသော စိတ္တံ, သယံ မေ ဒုက္ခမာဘတန္တိ။
သင်္ကပ္ပရာဂဇာတကံ ပဌမံ။
֍ * ၂၅၂။ တိလမုဋ္ဌိဇာတကံ (၃-၁-၂)
အဇ္ဇာပိ မေ တံ မနသိ [သရသိ (က။)], ယံ မံ တွံ တိလမုဋ္ဌိယာ၊
ဗာဟာယ မံ ဂဟေတွာန, လဋ္ဌိယာ အနုတာဠယိ။
နနု ဇီဝိတေ န ရမသိ, ယေနာသိ ဗြာဟ္မဏာဂတော၊
ယံ မံ ဗာဟာ ဂဟေတွာန, တိက္ခတ္တုံ အနုတာဠယိ။
အရိယော အနရိယံ ကုဗ္ဗန္တံ [ကုဗ္ဗာနံ (သီ။ ပီ။), ကုဗ္ဗံ (သျာ။)], ယော ဒဏ္ဍေန နိသေဓတိ၊
သာသနံ တံ န တံ ဝေရံ, ဣတိ နံ ပဏ္ဍိတာ ဝိဒူတိ။
တိလမုဋ္ဌိဇာတကံ ဒုတိယံ။
မမန္နပါနံ ဝိပုလံ ဥဠာရံ, ဥပ္ပဇ္ဇတီမဿ မဏိဿ ဟေတု၊
တံ တေ န ဒဿံ အတိယာစကောသိ, န စာပိ တေ အဿမမာဂမိဿံ။
(ဇာ၊၁၊၇၂။)သုသူ ယထာ သက္ခရဓောတပါဏီ, တာသေသိ မံ သေလံ ယာစမာနော၊
တံ တေ န ဒဿံ အတိယာစကောသိ, န စာပိ တေ အဿမမာဂမိဿံ။
န တံ ယာစေ ယဿ ပိယံ ဇိဂီသေ [ဇိဂိံသေ (သီ။ သျာ။ ပီ။)], ဒေဿော ဟောတိ အတိယာစနာယ၊
နာဂေါ မဏိံ ယာစိတော ဗြာဟ္မဏေန, အဒဿနံယေဝ တဒဇ္ဈဂမာတိ။
မဏိကဏ္ဌဇာတကံ တတိယံ။
֍ * ၂၅၄။ ကုဏ္ဍကကုစ္ဆိသိန္ဓဝဇာတကံ (၃-၁-၄)
ဘုတွာ တိဏပရိဃာသံ, ဘုတွာ အာစာမကုဏ္ဍကံ၊
ဧတံ တေ ဘောဇနံ အာသိ, ကသ္မာ ဒါနိ န ဘုဉ္ဇသိ။
ယတ္ထ ပေါသံ န ဇာနန္တိ, ဇာတိယာ ဝိနယေန ဝါ၊
ဗဟုံ [ပဟူ (သီ။ ပီ။), ပဟုံ (သျာ။ က။)] တတ္ထ မဟာဗြမှေ, အပိ အာစာမကုဏ္ဍကံ။
တွဉ္စ ခေါ မံ ပဇာနာသိ, ယာဒိသာယံ ဟယုတ္တမော၊
ဇာနန္တော ဇာနမာဂမ္မ, န တေ ဘက္ခာမိ ကုဏ္ဍကန္တိ။
ကုဏ္ဍကကုစ္ဆိသိန္ဓဝဇာတကံ စတုတ္ထံ။
ယာဝ သော မတ္တမညာသိ, ဘောဇနသ္မိံ ဝိဟင်္ဂမော၊
တာဝ အဒ္ဓါနမာပါဒိ, မာတရဉ္စ အပေါသယိ။
ယတော စ ခေါ ဗဟုတရံ, ဘောဇနံ အဇ္ဈဝါဟရိ [အဇ္ဈုပါဟရိ (သီ။ ပီ။)]၊
တတော တတ္ထေဝ သံသီဒိ, အမတ္တညူ ဟိ သော အဟု။
တသ္မာ မတ္တညုတာ သာဓု, ဘောဇနသ္မိံ အဂိဒ္ဓတာ [အဂိဒ္ဓိတာ (သျာ။ က။)]၊
အမတ္တညူ ဟိ သီဒန္တိ, မတ္တညူ စ န သီဒရေတိ။
သုကဇာတကံ ပဉ္စမံ။
(ဇာ၊၁၊၇၃။)ဇရူဒပါနံ ခဏမာနာ, ဝါဏိဇာ ဥဒကတ္ထိကာ၊
အဇ္ဈဂမုံ အယသံ လောဟံ [အဇ္ဈဂံသု အယောလောဟံ (သီ။ သျာ။ ပီ။)], တိပုသီသဉ္စ ဝါဏိဇာ၊
ရဇတံ ဇာတရူပဉ္စ, မုတ္တာ ဝေဠူရိယာ ဗဟူ။
တေ စ တေန အသန္တုဋ္ဌာ, ဘိယျော ဘိယျော အခါဏိသုံ၊
တေ တတ္ထာသီဝိသော [တတ္ထ အာသီဝိသော (က။), တတ္ထပါသီဝိသော (သျာ။)] ဃောရော, တေဇဿီ တေဇသာ ဟနိ။
တသ္မာ ခဏေ နာတိခဏေ, အတိခါတံ [အတိခဏံ (က။)] ဟိ ပါပကံ၊
ခါတေန စ [ခဏေန စ (က။), ခဏနေန (သျာ။)] ဓနံ လဒ္ဓံ, အတိခါတေန [အတိခဏေန (က။)] နာသိတန္တိ။
ဇရူဒပါနဇာတကံ ဆဋ္ဌံ။
֍ * ၂၅၇။ ဂါမဏိစန္ဒဇာတကံ (၃-၁-၇)
နာယံ ဃရာနံ ကုသလော, လောလော အယံ ဝလီမုခေါ၊
ကတံ ကတံ ခေါ ဒူသေယျ, ဧဝံဓမ္မမိဒံ ကုလံ။
နယိဒံ စိတ္တဝတော လောမံ, နာယံ အဿာသိကော မိဂေါ၊
သိဋ္ဌံ [သတ္ထံ (သီ။ သျာ။ ပီ။)] မေ ဇနသန္ဓေန, နာယံ ကိဉ္စိ ဝိဇာနတိ။
န မာတရံ ပိတရံ ဝါ, ဘာတရံ ဘဂိနိံ သကံ၊
ဘရေယျ တာဒိသော ပေါသော, သိဋ္ဌံ ဒသရထေန မေတိ။
ဂါမဏိစန္ဒ [ဂါမဏိစဏ္ဍ (သီ။ ပီ။)] ဇာတကံ သတ္တမံ။
ယာဝတာ စန္ဒိမသူရိယာ, ပရိဟရန္တိ ဒိသာ ဘန္တိ ဝိရောစနာ [ဝိရောစမာနာ (က။)]၊
သဗ္ဗေဝ ဒါသာ မန္ဓာတု, ယေ ပါဏာ ပထဝိဿိတာ [ပဌဝိနိဿိတာ (သီ။ ပီ။), ပဌဝိဿိတာ (သျာ။)]။
န ကဟာပဏဝဿေန, တိတ္တိ ကာမေသု ဝိဇ္ဇတိ၊
အပ္ပဿာဒါ ဒုခါ ကာမာ, ဣတိ ဝိညာယ ပဏ္ဍိတော။
(ဇာ၊၁၊၇၄။)အပိ ဒိဗ္ဗေသု ကာမေသု, ရတိံ သော နာဓိဂစ္ဆတိ၊
တဏှက္ခယရတော ဟောတိ, သမ္မာသမ္ဗုဒ္ဓသာဝကောတိ။
မန္ဓာတုဇာတကံ အဋ္ဌမံ။
֍ * ၂၅၉။ တိရီဋဝစ္ဆဇာတကံ (၃-၁-၉)
နယိမဿ ဝိဇ္ဇာမယမတ္ထိ ကိဉ္စိ, န ဗန္ဓဝေါ နော ပန တေ သဟာယော၊
အထ ကေန ဝဏ္ဏေန တိရီဋဝစ္ဆော [တိရီဋိဝစ္ဆော (သျာ။ က။)], တေဒဏ္ဍိကော ဘုဉ္ဇတိ အဂ္ဂပိဏ္ဍံ။
အာပါသု [အာဝါသု (က။)] မေ ယုဒ္ဓပရာဇိတဿ, ဧကဿ ကတွာ ဝိဝနသ္မိ ဃောရေ၊
ပသာရယီ ကိစ္ဆဂတဿ ပါဏိံ, တေနူဒတာရိံ ဒုခသံပရေတော။
ဧတဿ ကိစ္စေန ဣဓာနုပတ္တော, ဝေသာယိနော ဝိသယာ ဇီဝလောကေ၊
လာဘာရဟော တာတ တိရီဋဝစ္ဆော, ဒေထဿ ဘောဂံ ယဇထဉ္စ [ယဇတဉ္စ (သီ။ ပီ။), ယဇိတဉ္စ (သျာ။)] ယညန္တိ။
တိရီဋဝစ္ဆဇာတကံ နဝမံ။
ယဿတ္ထာ ဒူရမာယန္တိ, အမိတ္တမပိ ယာစိတုံ၊
တဿူဒရဿဟံ ဒူတော, မာ မေ ကုဇ္ဈ [ကုဇ္ဈိ (သီ။ ပီ။)] ရထေသဘ။
ယဿ ဒိဝါ စ ရတ္တော စ, ဝသမာယန္တိ မာဏဝါ၊
တဿူဒရဿဟံ ဒူတော, မာ မေ ကုဇ္ဈ [ကုဇ္ဈိ (သီ။ ပီ။)] ရထေသဘ။
(ဇာ၊၁၊၇၅။)ဒဒါမိ တေ ဗြာဟ္မဏ ရောဟိဏီနံ, ဂဝံ သဟဿံ သဟ ပုင်္ဂဝေန၊
ဒူတော ဟိ ဒူတဿ ကထံ န ဒဇ္ဇံ, မယမ္ပိ တဿေဝ ဘဝါမ ဒူတာတိ။
ဒူတဇာတကံ ဒသမံ။
သင်္ကပ္ပဝဂ္ဂေါ ပဌမော။
တဿုဒ္ဒါနံ –
ဥသုကာရဝရော တိလမုဋ္ဌိ မဏိ, ဟယရာဇ ဝိဟင်္ဂမ အာသိဝိသော၊
ဇနသန္ဓ ကဟာပဏဝဿ ပုန, တိရိဋံ ပုန ဒူတဝရေန ဒသာတိ။
၂။ ပဒုမဝဂ္ဂေါ
ယထာ ကေသာ စ မဿူ စ, ဆိန္နံ ဆိန္နံ ဝိရူဟတိ၊
ဧဝံ ရူဟတု တေ နာသာ, ပဒုမံ ဒေဟိ ယာစိတော။
ယထာ သာရဒိကံ ဗီဇံ, ခေတ္တေ ဝုတ္တံ ဝိရူဟတိ၊
ဧဝံ ရူဟတု တေ နာသာ, ပဒုမံ ဒေဟိ ယာစိတော။
ဥဘောပိ ပလပန္တေတေ [ဝိလပန္တေတေ (သျာ။ က။)], အပိ ပဒ္မါနိ ဒဿတိ၊
ဝဇ္ဇုံ ဝါ တေ န ဝါ ဝဇ္ဇုံ, နတ္ထိ နာသာယ ရူဟနာ၊
ဒေဟိ သမ္မ ပဒုမာနိ, အဟံ ယာစာမိ ယာစိတောတိ။
ပဒုမဇာတကံ ပဌမံ။
֍ * ၂၆၂။ မုဒုပါဏိဇာတကံ (၃-၂-၂)
ပါဏိ စေ မုဒုကော စဿ, နာဂေါ စဿ သုကာရိတော၊
အန္ဓကာရော စ ဝဿေယျ, အထ နူန တဒါ သိယာ။
(ဇာ၊၁၊၇၆။)အနလာ မုဒုသမ္ဘာသာ, ဒုပ္ပူရာ တာ [ဒုပ္ပူရတ္တာ (က။)] နဒီသမာ၊
သီဒန္တိ နံ ဝိဒိတွာန, အာရကာ ပရိဝဇ္ဇယေ။
ယံ ဧတာ ဥပသေဝန္တိ, ဆန္ဒသာ ဝါ ဓနေန ဝါ၊
ဇာတဝေဒေါဝ သံ ဌာနံ, ခိပ္ပံ အနုဒဟန္တိ နန္တိ။
မုဒုပါဏိဇာတကံ ဒုတိယံ။
֍ * ၂၆၃။ စူဠပလောဘနဇာတကံ (၃-၂-၃)
အဘိဇ္ဇမာနေ ဝါရိသ္မိံ, သယံ [အယံ (က။)] အာဂမ္မ ဣဒ္ဓိယာ၊
မိဿီဘာဝိတ္ထိယာ ဂန္တွာ, သံသီဒသိ [သံသီဒတိ (က။)] မဟဏ္ဏဝေ။
အာဝဋ္ဋနီ မဟာမာယာ, ဗြဟ္မစရိယဝိကောပနာ၊
သီဒန္တိ နံ ဝိဒိတွာန, အာရကာ ပရိဝဇ္ဇယေ။
ယံ ဧတာ ဥပသေဝန္တိ, ဆန္ဒသာ ဝါ ဓနေန ဝါ၊
ဇာတဝေဒေါဝ သံ ဌာနံ, ခိပ္ပံ အနုဒဟန္တိ နန္တိ။
စူဠပလောဘန [စုလ္လပလောဘန (သီ။ သျာ။ ပီ။)] ဇာတကံ တတိယံ။
ပနာဒေါ နာမ သော ရာဇာ, ယဿ ယူပေါ သုဝဏ္ဏယော၊
တိရိယံ သောဠသုဗ္ဗေဓော [သောဠသပဗ္ဗေဓော (သီ။ ပီ။)], ဥဒ္ဓမာဟု [ဥစ္စမာဟု (သီ။ သျာ။ ပီ။)] သဟဿဓာ။
သဟဿကဏ္ဍော သတဂေဏ္ဍု [သတဘေဒေါ (သီ။ ပီ။), သတဘေဏ္ဍု (သီ။ နိဿယ)], ဓဇာသု ဟရိတာမယော၊
အနစ္စုံ တတ္ထ ဂန္ဓဗ္ဗာ, ဆ သဟဿာနိ သတ္တဓာ။
ဧဝမေတံ [ဧဝမေဝ (က။)] တဒါ အာသိ, ယထာ ဘာသသိ ဘဒ္ဒဇိ၊
သက္ကော အဟံ တဒါ အာသိံ, ဝေယျာဝစ္စကရော တဝါတိ။
မဟာပနာဒဇာတကံ စတုတ္ထံ။
(ဇာ၊၁၊၇၇။)ဒိသွာ ခုရပ္ပေ ဓနုဝေဂနုန္နေ, ခဂ္ဂေ ဂဟီတေ တိခိဏေ တေလဓောတေ၊
တသ္မိံ ဘယသ္မိံ မရဏေ ဝိယူဠှေ, ကသ္မာ နု တေ နာဟု ဆမ္ဘိတတ္တံ။
ဒိသွာ ခုရပ္ပေ ဓနုဝေဂနုန္နေ, ခဂ္ဂေ ဂဟီတေ တိခိဏေ တေလဓောတေ၊
တသ္မိံ ဘယသ္မိံ မရဏေ ဝိယူဠှေ, ဝေဒံ အလတ္ထံ ဝိပုလံ ဥဠာရံ။
သော ဝေဒဇာတော အဇ္ဈဘဝိံ အမိတ္တေ, ပုဗ္ဗေဝ မေ ဇီဝိတမာသိ စတ္တံ၊
န ဟိ ဇီဝိတေ အာလယံ ကုဗ္ဗမာနော, သူရော ကယိရာ သူရကိစ္စံ ကဒါစီတိ။
ခုရပ္ပဇာတကံ ပဉ္စမံ။
֍ * ၂၆၆။ ဝါတဂ္ဂသိန္ဓဝဇာတကံ (၃-၂-၆)
ယေနာသိ ကိသိယာ ပဏ္ဍု, ယေန ဘတ္တံ န ရုစ္စတိ၊
အယံ သော အာဂတော ဘတ္တာ [တာတော (သီ။ သျာ။ ပီ။)], ကသ္မာ ဒါနိ ပလာယသိ။
သစေ [န ခေါ (သျာ။ က။)] ပနာဒိကေနေဝ, သန္ထဝေါ နာမ ဇာယတိ၊
ယသော ဟာယတိ ဣတ္ထီနံ, တသ္မာ တာတ ပလာယဟံ [ပလာယိဟံ (သျာ။), ပလာယိတံ (က။)]။
ယဿဿိနံ ကုလေ ဇာတံ, အာဂတံ ယာ န ဣစ္ဆတိ၊
သောစတိ စိရရတ္တာယ, ဝါတဂ္ဂမိဝ ဘဒ္ဒလီတိ [ကုန္ဒလီတိ (သီ။ ပီ။), ဂဒြဘီတိ (သျာ။)]။
ဝါတဂ္ဂသိန္ဓဝဇာတကံ ဆဋ္ဌံ။
(ဇာ၊၁၊၇၈။)သိင်္ဂီမိဂေါ အာယတစက္ခုနေတ္တော, အဋ္ဌိတ္တစော ဝါရိသယော အလောမော၊
တေနာဘိဘူတော ကပဏံ ရုဒါမိ, မာ ဟေဝ မံ ပါဏသမံ ဇဟေယျ [ဇဟေယျာ (ပီ။) ဇဟာ’ယျေ (?)]။
အယျ န တံ ဇဟိဿာမိ, ကုဉ္ဇရံ သဋ္ဌိဟာယနံ [ကုဉ္ဇရ သဋ္ဌိဟာယန (သီ။ ပီ။)]၊
ပထဗျာ စာတုရန္တာယ, သုပ္ပိယော ဟောသိ မေ တုဝံ။
ယေ ကုဠီရာ သမုဒ္ဒသ္မိံ, ဂင်္ဂါယ ယမုနာယ [နမ္မဒါယ (သီ။ ပီ။)] စ၊
တေသံ တွံ ဝါရိဇော သေဋ္ဌော, မုဉ္စ ရောဒန္တိယာ ပတိန္တိ။
ကက္ကဋက [ကုဠီရ (က။)] ဇာတကံ သတ္တမံ။
֍ * ၂၆၈။ အာရာမဒူသကဇာတကံ (၃-၂-၈)
ယော ဝေ သဗ္ဗသမေတာနံ, အဟုဝါ သေဋ္ဌသမ္မတော၊
တဿာယံ ဧဒိသီ ပညာ, ကိမေဝ ဣတရာ ပဇာ။
ဧဝမေဝ တုဝံ ဗြဟ္မေ, အနညာယ ဝိနိန္ဒသိ၊
ကထံ မူလံ အဒိသွာန [ကထံဟိ မူလံ အဒိတွာ (သျာ။ ပီ။)], ရုက္ခံ ဇညာ ပတိဋ္ဌိတံ။
နာဟံ တုမှေ ဝိနိန္ဒာမိ, ယေ စညေ ဝါနရာ ဝနေ၊
ဝိဿသေနောဝ ဂါရယှော, ယဿတ္ထာ ရုက္ခရောပကာတိ။
အာရာမဒူသကဇာတကံ အဋ္ဌမံ။
န ဟိ ဝဏ္ဏေန သမ္ပန္နာ, မဉ္ဇုကာ ပိယဒဿနာ၊
ခရဝါစာ ပိယာ ဟောတိ, အသ္မိံ လောကေ ပရမှိ စ။
နနု ပဿသိမံ ကာဠိံ, ဒုဗ္ဗဏ္ဏံ တိလကာဟတံ၊
ကောကိလံ သဏှဝါစေန, ဗဟူနံ ပါဏိနံ ပိယံ။
(ဇာ၊၁၊၇၉။)တသ္မာ သခိလဝါစဿ, မန္တဘာဏီ အနုဒ္ဓတော၊
အတ္ထံ ဓမ္မဉ္စ ဒီပေတိ, မဓုရံ တဿ ဘာသိတန္တိ။
သုဇာတဇာတကံ နဝမံ။
သဗ္ဗေဟိ ကိရ ဉာတီဟိ, ကောသိယော ဣဿရော ကတော၊
သစေ ဉာတီဟိ အနုညာတော [ဉာတီဟနုညာတော (သီ။ ပီ။)], ဘဏေယျာဟံ ဧကဝါစိကံ။
ဘဏ သမ္မ အနုညာတော, အတ္ထံ ဓမ္မဉ္စ ကေဝလံ၊
သန္တိ ဟိ ဒဟရာ ပက္ခီ, ပညဝန္တော ဇုတိန္ဓရာ။
န မေ ရုစ္စတိ ဘဒ္ဒံ ဝေါ [ဘဒန္တေ (က။)], ဥလူကဿာဘိသေစနံ၊
အက္ကုဒ္ဓဿ မုခံ ပဿ, ကထံ ကုဒ္ဓေါ ကရိဿတီတိ။
ဥလူကဇာတကံ ဒသမံ။
ပဒုမဝဂ္ဂေါ ဒုတိယော။
တဿုဒ္ဒါနံ –
ပဒုမုတ္တမ နာဂသိရိဝှယနော, သ-မဟဏ္ဏဝ ယူပ ခုရပ္ပဝရော၊
အထ ဘဒ္ဒလီ ကုဉ္ဇရ ရုက္ခ ပုန, ခရဝါစ ဥလူကဝရေန ဒသာတိ။
၃။ ဥဒပါနဝဂ္ဂေါ
֍ * ၂၇၁။ ဥဒပါနဒူသကဇာတကံ (၃-၃-၁)
အာရညိကဿ ဣသိနော, စိရရတ္တံ တပဿိနော၊
ကိစ္ဆာကတံ ဥဒပါနံ, ကထံ သမ္မ အဝါဟသိ [အဝါဟယိ (သီ။ ပီ။), အပါဟသိ (သျာ။)]။
ဧသ ဓမ္မော သိင်္ဂါလာနံ, ယံ ပိတွာ ဩဟဒါမသေ၊
ပိတုပိတာမဟံ ဓမ္မော, န တံ [န နံ (သီ။ ပီ။)] ဥဇ္ဈာတုမရဟသိ။
(ဇာ၊၁၊၈၀။)ယေသံ ဝေါ ဧဒိသော ဓမ္မော, အဓမ္မော ပန ကီဒိသော၊
မာ ဝေါ ဓမ္မံ အဓမ္မံ ဝါ, အဒ္ဒသာမ ကုဒါစနန္တိ။
ဥဒပါနဒူသကဇာတကံ ပဌမံ။
ယေန မိတ္တေန သံသဂ္ဂါ, ယောဂက္ခေမော ဝိဟိယျတိ၊
ပုဗ္ဗေဝဇ္ဈာဘဝံ တဿ, ရုက္ခေ အက္ခီဝ ပဏ္ဍိတော။
ယေန မိတ္တေန သံသဂ္ဂါ, ယောဂက္ခေမော ပဝဍ္ဎတိ၊
ကရေယျတ္တသမံ ဝုတ္တိံ, သဗ္ဗကိစ္စေသု ပဏ္ဍိတော။
ဧထ ဗျဂ္ဃါ နိဝတ္တဝှေါ, ပစ္စုပေထ [ပစ္စမေထ (သီ။ ပီ။)] မဟာဝနံ၊
မာ ဝနံ ဆိန္ဒိ နိဗျဂ္ဃံ, ဗျဂ္ဃါ မာဟေသု နိဗ္ဗနာတိ။
ဗျဂ္ဃဇာတကံ ဒုတိယံ။
ကော နု ဥဒ္ဓိတဘတ္တောဝ [ဥဒ္ဒိတဘတ္တောဝ (သီ။), ဝဍ္ဎိတဘတ္တောဝ (သျာ။)], ပူရဟတ္ထောဝ ဗြာဟ္မဏော၊
ကဟံ နု ဘိက္ခံ အစရိ, ကံ သဒ္ဓံ ဥပသင်္ကမိ။
အဟံ ကပိသ္မိ ဒုမ္မေဓော, အနာမာသာနိ အာမသိံ၊
တွံ မံ မောစယ ဘဒ္ဒန္တေ, မုတ္တော ဂစ္ဆေယျ ပဗ္ဗတံ။
ကစ္ဆပါ ကဿပါ ဟောန္တိ, ကောဏ္ဍညာ ဟောန္တိ မက္ကဋာ၊
မုဉ္စ ကဿပ ကောဏ္ဍညံ, ကတံ မေထုနကံ တယာတိ။
ကစ္ဆပဇာတကံ တတိယံ။
ကာယံ ဗလာကာ သိခိနီ, စောရီ လင်္ဃိပိတာမဟာ၊
ဩရံ ဗလာကေ အာဂစ္ဆ, စဏ္ဍော မေ ဝါယသော သခါ။
နာဟံ ဗလာကာ သိခိနီ, အဟံ လောလောသ္မိ ဝါယသော၊
အကတွာ ဝစနံ တုယှံ, ပဿ လူနောသ္မိ အာဂတော။
(ဇာ၊၁၊၈၁။)ပုနပါပဇ္ဇသီ သမ္မ, သီလဉှိ တဝ တာဒိသံ၊
န ဟိ မာနုသကာ ဘောဂါ, သုဘုဉ္ဇာ ဟောန္တိ ပက္ခိနာတိ။
လောလဇာတကံ စတုတ္ထံ။
ကာယံ ဗလာကာ ရုစိရာ, ကာကနီဠသ္မိမစ္ဆတိ၊
စဏ္ဍော ကာကော သခါ မယှံ, ယဿ [တဿ (သီ။ ပီ။)] စေတံ ကုလာဝကံ။
နနု မံ သမ္မ ဇာနာသိ, ဒိဇ သာမာကဘောဇန၊
အကတွာ ဝစနံ တုယှံ, ပဿ လူနောသ္မိ အာဂတော။
ပုနပါပဇ္ဇသီ သမ္မ, သီလဉှိ တဝ တာဒိသံ၊
န ဟိ မာနုသကာ ဘောဂါ, သုဘုဉ္ဇာ ဟောန္တိ ပက္ခိနာတိ။
ရုစိရဇာတကံ ပဉ္စမံ။
֍ * ၂၇၆။ ကုရုဓမ္မဇာတကံ (၃-၃-၆)
တဝ သဒ္ဓဉ္စ သီလဉ္စ, ဝိဒိတွာန ဇနာဓိပ၊
ဝဏ္ဏံ အဉ္ဇနဝဏ္ဏေန, ကာလိင်္ဂသ္မိံ နိမိမှသေ [ဝိနိမှသေ (သျာ။), ဝနိမှသေ (က။)]။
အန္နဘစ္စာ စဘစ္စာ စ, ယောဓ ဥဒ္ဒိဿ ဂစ္ဆတိ၊
သဗ္ဗေ တေ အပ္ပဋိက္ခိပ္ပါ, ပုဗ္ဗာစရိယဝစော ဣဒံ။
ဒဒါမိ ဝေါ ဗြာဟ္မဏာ နာဂမေတံ, ရာဇာရဟံ ရာဇဘောဂ္ဂံ ယသဿိနံ၊
အလင်္ကတံ ဟေမဇာလာဘိဆန္နံ, သသာရထိံ ဂစ္ဆထ ယေန ကာမန္တိ။
ကုရုဓမ္မဇာတကံ [ကုရုဓမ္မဇာတကံ (သီ။ သျာ။ ပီ။)] ဆဋ္ဌံ။
(ဇာ၊၁၊၈၂။)ဝဿာနိ ပညာသ သမာဓိကာနိ, ဝသိမှ သေလဿ ဂုဟာယ ရောမက၊
အသင်္ကမာနာ အဘိနိဗ္ဗုတတ္တာ [အဘိနိဗ္ဗုတစိတ္တာ (သျာ။ က။)], ဟတ္ထတ္တ [ဟတ္ထတ္ထ (သျာ။)] မာယန္တိ မမဏ္ဍဇာ ပုရေ။
တေ ဒါနိ ဝက္ကင်္ဂ ကိမတ္ထမုဿုကာ, ဘဇန္တိ အညံ ဂိရိကန္ဒရံ ဒိဇာ၊
န နူန မညန္တိ မမံ ယထာ ပုရေ, စိရပ္ပဝုတ္ထာ အထ ဝါ န တေ ဣမေ။
ဇာနာမ တံ န မယံ သမ္ပမူဠှာ [န မယ’မသ္မ မူဠှာ (သီ။ ပီ။)], သောယေဝ တွံ တေ မယမသ္မ နာညေ၊
စိတ္တဉ္စ တေ အသ္မိံ ဇနေ ပဒုဋ္ဌံ, အာဇီဝိကာ [အာဇီဝက (သီ။ သျာ။), အာဇီဝိက (ပီ။)] တေန တမုတ္တသာမာတိ။
ရောမကဇာတကံ သတ္တမံ။
֍ * ၂၇၈။ မဟိံသရာဇဇာတကံ (၃-၃-၈)
ကိမတ္ထ [ကမတ္ထ (သီ။ ပီ။)] မဘိသန္ဓာယ, လဟုစိတ္တဿ ဒုဗ္ဘိနော [ဒူဘိနော (သီ။ ပီ။)]၊
သဗ္ဗကာမဒဒဿေဝ [ဒုဟဿေဝ (သီ။ သျာ။ ပီ။), ရဟဿေဝ (က။)], ဣမံ ဒုက္ခံ တိတိက္ခသိ။
သိင်္ဂေန နိဟနာဟေတံ, ပဒသာ စ အဓိဋ္ဌဟ၊
ဘိယျော [ဘီယော (သီ။)] ဗာလာ ပကုဇ္ဈေယျုံ, နော စဿ ပဋိသေဓကော။
မမေဝါယံ မညမာနော, အညေပေဝံ [အညမ္ပေဝံ (သီ။ သျာ။ ပီ။)] ကရိဿတိ၊
တေ နံ တတ္ထ ဝဓိဿန္တိ, သာ မေ မုတ္တိ ဘဝိဿတီတိ။
မဟိံသရာဇဇာတကံ [မဟိသဇာတကံ (သီ။ သျာ။ ပီ။)] အဋ္ဌမံ။
(ဇာ၊၁၊၈၃။)ယထာ မာဏဝကော ပန္ထေ, သိင်္ဂါလိံ ဝနဂေါစရိံ၊
အတ္ထကာမံ ပဝေဒေန္တိံ [ပဝဒန္တိံ (ပီ။)], အနတ္ထကာမာတိ မညတိ၊
အနတ္ထကာမံ သတပတ္တံ, အတ္ထကာမောတိ မညတိ။
ဧဝမေဝ ဣဓေကစ္စော, ပုဂ္ဂလော ဟောတိ တာဒိသော၊
ဟိတေဟိ ဝစနံ ဝုတ္တော, ပဋိဂဏှာတိ ဝါမတော။
ယေ စ ခေါ နံ ပသံသန္တိ, ဘယာ ဥက္ကံသယန္တိ ဝါ [စ (သီ။ ပီ။)]၊
တဉှိ သော မညတေ မိတ္တံ, သတပတ္တံဝ မာဏဝေါတိ။
သတပတ္တဇာတကံ နဝမံ။
֍ * ၂၈၀။ ပုဋဒူသကဇာတကံ (၃-၃-၁၀)
အဒ္ဓါ ဟိ နူန မိဂရာဇာ, ပုဋကမ္မဿ ကောဝိဒေါ၊
တထာ ဟိ ပုဋံ ဒူသေတိ, အညံ နူန ကရိဿတိ။
န မေ မာတာ ဝါ ပိတာ ဝါ, ပုဋကမ္မဿ ကောဝိဒေါ၊
ကတံ ကတံ ခေါ ဒူသေမ, ဧဝံ ဓမ္မမိဒံ ကုလံ။
ယေသံ ဝေါ ဧဒိသော ဓမ္မော, အဓမ္မော ပန ကီဒိသော၊
မာ ဝေါ ဓမ္မံ အဓမ္မံ ဝါ, အဒ္ဒသာမ ကုဒါစနန္တိ။
ပုဋဒူသကဇာတကံ ဒသမံ။
ဥဒပါနဝဂ္ဂေါ [အရညဝဂ္ဂေါ (သီ။ ပီ။ က။)] တတိယော။
တဿုဒ္ဒါနံ –
ဥဒပါနဝရံ ဝနဗျဂ္ဃ ကပိ, သိခိနီ စ ဗလာက ရုစိရဝရော၊
သုဇနာဓိပရောမကဒူသ ပုန, သတပတ္တဝရော ပုဋကမ္မ ဒသာတိ။
(ဇာ၊၁၊၈၄။)၄။ အဗ္ဘန္တရဝဂ္ဂေါ
֍ * ၂၈၁။ အဗ္ဘန္တရဇာတကံ (၃-၄-၁)
အဗ္ဘန္တရော နာမ ဒုမော, ယဿ ဒိဗျမိဒံ ဖလံ၊
ဘုတွာ ဒေါဟဠိနီ နာရီ, စက္ကဝတ္တိံ ဝိဇာယတိ။
တွမ္ပိ [တွဉ္စ (သီ။ ပီ။), တွံ ဟိ (က။)] ဘဒ္ဒေ မဟေသီသိ, သာ စာပိ [စာသိ (သီ။ ပီ။)] ပတိနော ပိယာ၊
အာဟရိဿတိ တေ ရာဇာ, ဣဒံ အဗ္ဘန္တရံ ဖလံ။
ဘတ္တုရတ္ထေ ပရက္ကန္တော, ယံ ဌာနမဓိဂစ္ဆတိ၊
သူရော အတ္တပရိစ္စာဂီ, လဘမာနော ဘဝါမဟန္တိ။
အဗ္ဘန္တရဇာတကံ ပဌမံ။
သေယျံသော သေယျသော ဟောတိ, ယော သေယျမုပသေဝတိ၊
ဧကေန သန္ဓိံ ကတွာန, သတံ ဝဇ္ဈေ [မစ္စေ (က။), ဗဇ္ဈေ (က။ အဋ္ဌ။)] အမောစယိံ။
[ကသ္မာ…ပေ… သဂ္ဂံ န ဂစ္ဆေယျ (ကတ္ထစိ)] တသ္မာ သဗ္ဗေန လောကေန, သန္ဓိံ ကတွာန ဧကတော [ဧကကော (သီ။ သျာ။ ပီ။)]၊
ပေစ္စ သဂ္ဂံ နိဂစ္ဆေယျ [ကသ္မာ…ပေ… သဂ္ဂံ န ဂစ္ဆေယျ (ကတ္ထစိ)], ဣဒံ သုဏာထ ကာသိယာ [ကာသယော (သီ။ ပီ။)]။
ဣဒံ ဝတွာ မဟာရာဇာ, ကံသော ဗာရာဏသိဂ္ဂဟော၊
ဓနုံ ကဏ္ဍဉ္စ [တူဏိဉ္စ (သီ။ ပီ။)] နိက္ခိပ္ပ, သံယမံ အဇ္ဈုပါဂမီတိ။
သေယျဇာတကံ ဒုတိယံ။
֍ * ၂၈၃။ ဝဍ္ဎကီသူကရဇာတကံ (၃-၄-၃)
ဝရံ ဝရံ တွံ နိဟနံ ပုရေ စရိ, အသ္မိံ ပဒေသေ အဘိဘုယျ သူကရေ၊
သော ဒါနိ ဧကော ဗျပဂမ္မ ဈာယသိ, ဗလံ နု တေ ဗျဂ္ဃ န စဇ္ဇ ဝိဇ္ဇတိ။
(ဇာ၊၁၊၈၅။)ဣမေ သုဒံ [ဣမဿု တာ (သျာ။ က။)] ယန္တိ ဒိသောဒိသံ ပုရေ, ဘယဋ္ဋိတာ လေဏဂဝေသိနော ပုထု၊
တေ ဒါနိ သင်္ဂမ္မ ဝသန္တိ ဧကတော, ယတ္ထဋ္ဌိတာ ဒုပ္ပသဟဇ္ဇမေ [ဒုပ္ပသဟဇ္ဇိမေ (သျာ။)] မယာ။
နမတ္ထု သံဃာန သမာဂတာနံ, ဒိသွာ သယံ သချ ဝဒါမိ အဗ္ဘုတံ၊
ဗျဂ္ဃံ မိဂါ ယတ္ထ ဇိနိံသု ဒါဌိနော, သာမဂ္ဂိယာ ဒါဌဗလေသု မုစ္စရေတိ။
ဝဍ္ဎကီသူကရဇာတကံ တတိယံ။
ယံ ဥဿုကာ သံဃရန္တိ, အလက္ခိကာ ဗဟုံ ဓနံ၊
သိပ္ပဝန္တော အသိပ္ပါ စ, လက္ခိဝါ တာနိ ဘုဉ္ဇတိ။
သဗ္ဗတ္ထ ကတပုညဿ, အတိစ္စညေဝ ပါဏိနော၊
ဥပ္ပဇ္ဇန္တိ ဗဟူ ဘောဂါ, အပ္ပနာယတနေသုပိ။
ကုက္ကုဋော [ကုက္ကုဋ (သီ။ ပီ။), ကုက္ကုဋာ (သီ။ နိဿယ, သဒ္ဒနီတိ)] မဏယော ဒဏ္ဍော, ထိယော စ ပုညလက္ခဏာ၊
ဥပ္ပဇ္ဇန္တိ အပါပဿ, ကတပုညဿ ဇန္တုနောတိ။
သိရိဇာတကံ စတုတ္ထံ။
ဒရိယာ သတ္တ ဝဿာနိ, တိံသမတ္တာ ဝသာမသေ၊
ဟညာမ [ဟဉ္ဆေမ (သီ။ ပီ။), ဟဉ္ဆာမ (?)] မဏိနော အာဘံ, ဣတိ နော မန္တနံ အဟု။
ယာဝတာ မဏိံ ဃံသာမ [ယာဝ ယာဝ နိဃံသာမ (သီ။ ပီ။)], ဘိယျော ဝေါဒါယတေ မဏိ၊
ဣဒဉ္စ ဒါနိ ပုစ္ဆာမ, ကိံ ကိစ္စံ ဣဓ မညသိ။
အယံ မဏိ ဝေဠူရိယော, အကာစော ဝိမလော [ဝိပုလော (က။)] သုဘော၊
နာဿ သက္ကာ သိရိံ ဟန္တုံ, အပက္ကမထ သူကရာတိ။
မဏိသူကရ [မဏိဃံသ (က။)] ဇာတကံ ပဉ္စမံ။
(ဇာ၊၁၊၈၆။)မာ သာလူကဿ ပိဟယိ, အာတုရန္နာနိ ဘုဉ္ဇတိ၊
အပ္ပေါဿုက္ကော ဘုသံ ခါဒ, ဧတံ ဒီဃာယုလက္ခဏံ။
ဣဒါနိ သော ဣဓာဂန္တွာ, အတိထီ ယုတ္တသေဝကော၊
အထ ဒက္ခသိ သာလူကံ, သယန္တံ မုသလုတ္တရံ။
ဝိကန္တံ [ဝိကတ္တံ (သီ။), ဝိကန္တိယမာနံ ဆိန္ဒိယမာနံတိ အတ္ထော] သူကရံ ဒိသွာ, သယန္တံ မုသလုတ္တရံ၊
ဇရဂ္ဂဝါ ဝိစိန္တေသုံ, ဝရမှာကံ ဘုသာမိဝါတိ။
သာလူကဇာတကံ ဆဋ္ဌံ။
နာနုမ္မတ္တော နာပိသုဏော, နာနဋော နာကုတူဟလော၊
မူဠှေသု လဘတေ လာဘံ, ဧသာ တေ အနုသာသနီ။
ဓိရတ္ထု တံ ယသလာဘံ, ဓနလာဘဉ္စ ဗြာဟ္မဏ၊
ယာ ဝုတ္တိ ဝိနိပါတေန, အဓမ္မစရဏေန [အဓမ္မစရိယာယ (သီ။ သျာ။)] ဝါ။
အပိ စေ ပတ္တမာဒါယ, အနဂါရော ပရိဗ္ဗဇေ၊
ဧသာဝ ဇီဝိကာ သေယျော [သေယျာ (သီ။ သျာ။ ပီ။)], ယာ စာဓမ္မေန ဧသနာတိ။
လာဘဂရဟဇာတကံ သတ္တမံ။
֍ * ၂၈၈။ မစ္ဆုဒ္ဒါနဇာတကံ (၃-၄-၈)
အဂ္ဃန္တိ မစ္ဆာ အဓိကံ သဟဿံ, န သော အတ္ထိ ယော ဣမံ သဒ္ဒဟေယျ၊
မယှဉ္စ အဿု ဣဓ သတ္တ မာသာ, အဟမ္ပိ တံ မစ္ဆုဒ္ဒါနံ ကိဏေယျံ။
မစ္ဆာနံ ဘောဇနံ ဒတွာ, မမ ဒက္ခိဏမာဒိသိ၊
တံ ဒက္ခိဏံ သရန္တိယာ, ကတံ အပစိတိံ တယာ။
(ဇာ၊၁၊၈၇။)ပဒုဋ္ဌစိတ္တဿ န ဖာတိ ဟောတိ, န စာပိ တံ [နံ (သီ။ သျာ။)] ဒေဝတာ ပူဇယန္တိ၊
ယော ဘာတရံ ပေတ္တိကံ သာပတေယျံ, အဝဉ္စယီ ဒုက္ကဋကမ္မကာရီတိ။
မစ္ဆုဒ္ဒါနဇာတကံ အဋ္ဌမံ။
֍ * ၂၈၉။ နာနာဆန္ဒဇာတကံ (၃-၄-၉)
နာနာဆန္ဒာ မဟာရာဇ, ဧကာဂါရေ ဝသာမသေ၊
အဟံ ဂါမဝရံ ဣစ္ဆေ, ဗြာဟ္မဏီ စ ဂဝံ သတံ။
ပုတ္တော စ အာဇညရထံ, ကညာ စ မဏိကုဏ္ဍလံ၊
ယာ စေသာ ပုဏ္ဏိကာ ဇမ္မီ, ဥဒုက္ခလံဘိကင်္ခတိ။
ဗြာဟ္မဏဿ ဂါမဝရံ, ဗြာဟ္မဏိယာ ဂဝံ သတံ၊
ပုတ္တဿ အာဇညရထံ, ကညာယ မဏိကုဏ္ဍလံ၊
ယဉ္စေတံ ပုဏ္ဏိကံ ဇမ္မိံ, ပဋိပါဒေထုဒုက္ခလန္တိ။
နာနာဆန္ဒဇာတကံ နဝမံ။
֍ * ၂၉၀။ သီလဝီမံသကဇာတကံ (၃-၄-၁၀)
သီလံ ကိရေဝ ကလျာဏံ, သီလံ လောကေ အနုတ္တရံ၊
ပဿ ဃောရဝိသော နာဂေါ, သီလဝါတိ န ဟညတိ။
သောဟံ သီလံ သမာဒိဿံ, လောကေ အနုမတံ သိဝံ၊
အရိယဝုတ္တိသမာစာရော, ယေန ဝုစ္စတိ သီလဝါ။
ဉာတီနဉ္စ ပိယော ဟောတိ, မိတ္တေသု စ ဝိရောစတိ၊
ကာယဿ ဘေဒါ သုဂတိံ, ဥပပဇ္ဇတိ သီလဝါတိ။
သီလဝီမံသကဇာတကံ ဒသမံ။
အဗ္ဘန္တရဝဂ္ဂေါ စတုတ္ထော။
(ဇာ၊၁၊၈၈။)တဿုဒ္ဒါနံ –
ဒုမ ကံသဝရုတ္တမဗျဂ္ဃမိဂါ, မဏယော မဏိ သာလုကမဝှယနော၊
အနုသာသနိယောပိ စ မစ္ဆဝရော, မဏိကုဏ္ဍလကေန ကိရေန ဒသာတိ။
၅။ ကုမ္ဘဝဂ္ဂေါ
သဗ္ဗကာမဒဒံ ကုမ္ဘံ, ကုဋံ လဒ္ဓါန ဓုတ္တကော၊
ယာဝ နံ အနုပါလေတိ, တာဝ သော သုခမေဓတိ။
ယဒါ မတ္တော စ ဒိတ္တော စ, ပမာဒါ ကုမ္ဘမဗ္ဘိဒါ၊
တဒါ နဂ္ဂေါ စ ပေါတ္ထော စ, ပစ္ဆာ ဗာလော ဝိဟညတိ။
ဧဝမေဝ ယော ဓနံ လဒ္ဓါ, ပမတ္တော [အမတ္တာ (သီ။), အမတ္တော (ပီ။)] ပရိဘုဉ္ဇတိ၊
ပစ္ဆာ တပ္ပတိ ဒုမ္မေဓော, ကုဋံ ဘိတွာဝ [ကုဋံ ဘိန္နောဝ (သီ။ ပီ။), ကုဋဘိန္နောဝ (?)] ဓုတ္တကောတိ။
သုရာဃဋ [ဘဒြဃဋ (သီ။ ပီ။), ဘဒြဃဋဘေဒက (သျာ။)] ဇာတကံ ပဌမံ။
ဗာရာဏသျံ [ဗာရာဏဿံ (သီ။ ပီ။)] မဟာရာဇ, ကာကရာဇာ နိဝါသကော [နိဝါသိကော (သီ။ ပီ။)]၊
အသီတိယာ သဟဿေဟိ, သုပတ္တော ပရိဝါရိတော။
တဿ ဒေါဟဠိနီ ဘရိယာ, သုဖဿာ ဘက္ခိတုမိစ္ဆတိ [မစ္ဆမိစ္ဆတိ (သီ။ ပီ။)]၊
ရညော မဟာနသေ ပက္ကံ, ပစ္စဂ္ဃံ ရာဇဘောဇနံ။
တေသာဟံ ပဟိတော ဒူတော, ရညော စမှိ ဣဓာဂတော၊
ဘတ္တု အပစိတိံ ကုမ္မိ, နာသာယမကရံ [မကရိံ (သီ။ နိဿယ)] ဝဏန္တိ။
သုပတ္တဇာတကံ ဒုတိယံ။
(ဇာ၊၁၊၈၉။)֍ * ၂၉၃။ ကာယနိဗ္ဗိန္ဒဇာတကံ (၃-၅-၃)
ဖုဋ္ဌဿ မေ အညတရေန ဗျာဓိနာ, ရောဂေန ဗာဠှံ ဒုခိတဿ ရုပ္ပတော၊
ပရိသုဿတိ ခိပ္ပမိဒံ ကဠေဝရံ, ပုပ္ဖံ ယထာ ပံသုနိ အာတပေ ကတံ။
အဇညံ ဇညသင်္ခါတံ, အသုစိံ သုစိသမ္မတံ၊
နာနာကုဏပပရိပူရံ, ဇညရူပံ အပဿတော။
ဓိရတ္ထုမံ အာတုရံ ပူတိကာယံ, ဇေဂုစ္ဆိယံ အဿုစိံ ဗျာဓိဓမ္မံ၊
ယတ္ထပ္ပမတ္တာ အဓိမုစ္ဆိတာ ပဇာ, ဟာပေန္တိ မဂ္ဂံ သုဂတူပပတ္တိယာတိ။
ကာယနိဗ္ဗိန္ဒ [ကာယဝိစ္ဆန္ဒ (သီ။), ကာယဝိစ္ဆိန္ဒ (ပီ။)] ဇာတကံ တတိယံ။
֍ * ၂၉၄။ ဇမ္ဗုခါဒကဇာတကံ (၃-၅-၄)
ကောယံ ဗိန္ဒုဿရော ဝဂ္ဂု, သရဝန္တာန [ပဝဒန္တာန (သီ။ ပီ။)] မုတ္တမော၊
အစ္စုတော ဇမ္ဗုသာခါယ, မောရစ္ဆာပေါဝ ကူဇတိ။
ကုလပုတ္တောဝ ဇာနာတိ [ကုလပုတ္တော ပဇာနာတိ (သျာ။ က။)], ကုလပုတ္တံ [ကုလပုတ္တေ (သီ။ ပီ။)] ပသံသိတုံ၊
ဗျဂ္ဃစ္ဆာပသရီဝဏ္ဏ, ဘုဉ္ဇ သမ္မ ဒဒါမိ တေ။
စိရဿံ ဝတ ပဿာမိ, မုသာဝါဒီ သမာဂတေ၊
ဝန္တာဒံ ကုဏပါဒဉ္စ, အညမညံ ပသံသကေတိ။
ဇမ္ဗုခါဒကဇာတကံ စတုတ္ထံ။
ဥသဘဿေဝ တေ ခန္ဓော, သီဟဿေဝ ဝိဇမ္ဘိတံ၊
မိဂရာဇ နမော တျတ္ထု, အပိ ကိဉ္စိ လဘာမသေ။
ကုလပုတ္တောဝ ဇာနာတိ, ကုလပုတ္တံ ပသံသိတုံ၊
မယူရဂီဝသင်္ကာသ, ဣတော ပရိယာဟိ ဝါယသ။
(ဇာ၊၁၊၉၀။)မိဂါနံ သိင်္ဂါလော [ကောတ္ထုကော (သီ။ ပီ။), ကောဋ္ဌုကော (သျာ။)] အန္တော, ပက္ခီနံ ပန ဝါယသော၊
ဧရဏ္ဍော အန္တော ရုက္ခာနံ, တယော အန္တာ သမာဂတာတိ။
အန္တဇာတကံ ပဉ္စမံ။
ကော နာယံ [ကော နွာယံ (သျာ။)] လောဏတောယသ္မိံ, သမန္တာ ပရိဓာဝတိ၊
မစ္ဆေ မကရေ စ ဝါရေတိ, ဦမီသု စ ဝိဟညတိ။
အနန္တပါယီ သကုဏော, အတိတ္တောတိ ဒိသာသုတော၊
သမုဒ္ဒံ ပါတုမိစ္ဆာမိ, သာဂရံ သရိတံ ပတိံ။
သော အယံ ဟာယတိ စေဝ, ပူရတေ စ မဟောဒဓိ၊
နာဿ နာယတိ ပီတန္တော, အပေယျော ကိရ သာဂရောတိ။
သမုဒ္ဒဇာတကံ ဆဋ္ဌံ။
֍ * ၂၉၇။ ကာမဝိလာပဇာတကံ (၃-၅-၇)
ဥစ္စေ သကုဏ ဍေမာန, ပတ္တယာန ဝိဟင်္ဂမ၊
ဝဇ္ဇာသိ ခေါ တွံ ဝါမူရုံ, စိရံ ခေါ သာ ကရိဿတိ [သရိဿတိ (က။)]။
ဣဒံ ခေါ သာ န ဇာနာတိ, အသိံ သတ္တိဉ္စ ဩဍ္ဍိတံ၊
သာ စဏ္ဍီ ကာဟတိ ကောဓံ, တံ မေ တပတိ နော ဣဒံ [နော ဣဓ (သီ။ သျာ။ ပီ။)]။
ဧသ ဥပ္ပလသန္နာဟော, နိက္ခဉ္စုဿီသကောဟိတံ [နိက္ခမုဿီသကေ ကတံ (သီ။ ပီ။), နိက္ခဉ္စုဿီသကေ ကတံ (သျာ။)]၊
ကာသိကဉ္စ မုဒုံ ဝတ္ထံ, တပ္ပေတု ဓနိကာ ပိယာတိ [ဓနကာမိယာတိ (သျာ။ ပီ။), ဓနကာမိကာတိ (သီ။)]။
ကာမဝိလာပဇာတကံ သတ္တမံ။
ဥဒုမ္ဗရာ စိမေ ပက္ကာ, နိဂြောဓာ စ ကပိတ္ထနာ၊
ဧဟိ နိက္ခမ ဘုဉ္ဇဿု, ကိံ ဇိဃစ္ဆာယ မိယျသိ။
(ဇာ၊၁၊၉၁။)ဧဝံ သော သုဟိတော ဟောတိ, ယော ဝုဍ္ဎမပစာယတိ၊
ယထာဟမဇ္ဇ သုဟိတော, ဒုမပက္ကာနိ မာသိတော။
ယံ ဝနေဇော ဝနေဇဿ, ဝဉ္စေယျ ကပိနော ကပိ၊
ဒဟရော ကပိ [ဒဟရောပိ တံ န (သီ။ ပီ။), ဒဟရောပိ န (သျာ။)] သဒ္ဓေယျ, န ဟိ ဇိဏ္ဏော ဇရာကပီတိ။
ဥဒုမ္ဗရဇာတကံ အဋ္ဌမံ။
֍ * ၂၉၉။ ကောမာရပုတ္တဇာတကံ (၃-၅-၉)
ပုရေ တုဝံ သီလဝတံ သကာသေ, ဩက္ကန္တိကံ [ဩက္ကန္ဒိကံ (သီ။ သျာ။ ပီ။)] ကီဠသိ အဿမမှိ၊
ကရောဟရေ [ကရောဟိ ရေ (က။)] မက္ကဋိယာနိ မက္ကဋ, န တံ မယံ သီလဝတံ ရမာမ။
သုတာ ဟိ မယှံ ပရမာ ဝိသုဒ္ဓိ, ကောမာရပုတ္တဿ ဗဟုဿုတဿ၊
မာ ဒါနိ မံ မညိ တုဝံ ယထာ ပုရေ, ဈာနာနုယုတ္တော ဝိဟရာမိ [ဈာနာနုယုတ္တာ ဝိဟရာမ (သီ။ ပီ။)] အာဝုသော။
သစေပိ သေလသ္မိ ဝပေယျ ဗီဇံ, ဒေဝေါ စ ဝဿေ န ဟိ တံ ဝိရူဠှေ [နေဝ ဟိ တံ ရုဟေယျ (သီ။ ပီ။), န ဟိ တံ ဝိရူဟေ (?)]၊
သုတာ ဟိ တေ သာ ပရမာ ဝိသုဒ္ဓိ, အာရာ တုဝံ မက္ကဋ ဈာနဘူမိယာတိ။
ကောမာရပုတ္တဇာတကံ နဝမံ။
ပရပါဏရောဓာ [ပရပါဏဃာတေ (သျာ။), ပရပါဏရောစံ (က။)] ဇီဝန္တော, မံသလောဟိတဘောဇနော၊
ဝကော ဝတံ သမာဒါယ, ဥပပဇ္ဇိ ဥပေါသထံ။
တဿ သက္ကော ဝတညာယ, အဇရူပေနုပါဂမိ၊
ဝီတတပေါ အဇ္ဈပ္ပတ္တော, ဘဉ္ဇိ လောဟိတပေါ တပံ။
(ဇာ၊၁၊၉၂။)ဧဝမေဝ ဣဓေကစ္စေ, သမာဒါနမှိ ဒုဗ္ဗလာ၊
လဟုံ ကရောန္တိ အတ္တာနံ, ဝကောဝ အဇကာရဏာတိ။
ဝကဇာတကံ ဒသမံ။
ကုမ္ဘဝဂ္ဂေါ ပဉ္စမော။
တဿုဒ္ဒါနံ –
ဝရကုမ္ဘ သုပတ္တသိရိဝှယနော, သုစိသမ္မတ ဗိန္ဒုသရော စုသဘော၊
သရိတံပတိ စဏ္ဍိ ဇရာကပိနာ, အထ မက္ကဋိယာ ဝကကေန ဒသာတိ။
အထ ဝဂ္ဂုဒ္ဒါနံ –
သင်္ကပ္ပေါ ပဒုမော စေဝ, ဥဒပါနေန တတိယံ၊
အဗ္ဘန္တရံ ဃဋဘေဒံ, တိကနိပါတမှိလင်္ကတန္တိ။
တိကနိပါတံ နိဋ္ဌိတံ။
(ဇာ၊၁၊၉၃။)၄။ စတုက္ကနိပါတော
၁။ ကာလိင်္ဂဝဂ္ဂေါ
֍ * ၃၀၁။ စူဠကာလိင်္ဂဇာတကံ (၄-၁-၁)
ဝိဝရထိမာသံ [ဝိဝရထ ဣမာသံ (သီ။ သျာ။ ပီ။)] ဒွါရံ, နဂရံ ပဝိသန္တု [ပဝိသိတုံ မယာ၊ (က။)] အရုဏရာဇဿ၊
သီဟေန သုသိဋ္ဌေန, သုရက္ခိတံ [သုသတ္ထေန, သုရက္ခိတံ (သီ။ ပီ။), သုသိဋ္ဌေန (က။)] နန္ဒိသေနေန။
ဇယော ကလိင်္ဂါနမသယှသာဟိနံ, ပရာဇယော အနယော [အဇယော (သျာ။), အနွိတော (က။)] အဿကာနံ၊
ဣစ္စေဝ တေ ဘာသိတံ ဗြဟ္မစာရိ, န ဥဇ္ဇုဘူတာ ဝိတထံ ဘဏန္တိ။
ဒေဝါ မုသာဝါဒမုပါတိဝတ္တာ, သစ္စံ ဓနံ ပရမံ တေသု [တထံ ပေမကရံ နု (က။), တထံ ပရမံ ကရံ နု (သျာ။)] သက္က၊
တံ တေ မုသာ ဘာသိတံ ဒေဝရာဇ, ကိံ ဝါ ပဋိစ္စ မဃဝါ မဟိန္ဒ။
နနု တေ သုတံ ဗြာဟ္မဏ ဘညမာနေ, ဒေဝါ န ဣဿန္တိ ပုရိသပရက္ကမဿ၊
ဒမော သမာဓိ မနသော အဘေဇ္ဇော [အဒေဇ္ဇော (သီ။ ပီ။), အဘိဇ္ဇော (က။)], အဗျဂ္ဂတာ နိက္ကမနဉ္စ [နိက္ခမနဉ္စ (သီ။)] ကာလေ၊
ဒဠှဉ္စ ဝိရိယံ ပုရိသပရက္ကမော စ, တေနေဝ အာသိ ဝိဇယော အဿကာနန္တိ။
စူဠကာလိင်္ဂဇာတကံ ပဌမံ။
֍ * ၃၀၂။ မဟာအဿာရောဟဇာတကံ (၄-၁-၂)
အဒေယျေသု ဒဒံ ဒါနံ, ဒေယျေသု နပ္ပဝေစ္ဆတိ၊
အာပါသု ဗျသနံ ပတ္တော, သဟာယံ နာဓိဂစ္ဆတိ။
(ဇာ၊၁၊၉၄။)နာဒေယျေသု ဒဒံ ဒါနံ, ဒေယျေသု ယော ပဝေစ္ဆတိ၊
အာပါသု ဗျသနံ ပတ္တော, သဟာယမဓိဂစ္ဆတိ။
သညောဂသမ္ဘောဂဝိသေသဒဿနံ, အနရိယဓမ္မေသု သဌေသု နဿတိ၊
ကတဉ္စ အရိယေသု စ အဇ္ဇဝေသု, မဟပ္ဖလံ ဟောတိ အဏုမ္ပိ တာဒိသု။
ယော ပုဗ္ဗေ ကတကလျာဏော, အကာ လောကေ သုဒုက္ကရံ၊
ပစ္ဆာ ကယိရာ န ဝါ ကယိရာ, အစ္စန္တံ ပူဇနာရဟောတိ။
မဟာအဿာရောဟဇာတကံ ဒုတိယံ။
အနုတ္တရေ ကာမဂုဏေ သမိဒ္ဓေ, ဘုတွာန ပုဗ္ဗေ ဝသီ ဧကရာဇ၊
သော ဒါနိ ဒုဂ္ဂေ နရကမှိ ခိတ္တော, နပ္ပဇ္ဇဟေ ဝဏ္ဏဗလံ ပုရာဏံ။
ပုဗ္ဗေဝ ခန္တီ စ တပေါ စ မယှံ, သမ္ပတ္ထိတာ ဒုဗ္ဘိသေန [ဒဗ္ဗသေနာ (သီ။ ပီ။)] အဟောသိ၊
တံ ဒါနိ လဒ္ဓါန ကထံ နု ရာဇ, ဇဟေ အဟံ ဝဏ္ဏဗလံ ပုရာဏံ။
သဗ္ဗာ ကိရေဝံ ပရိနိဋ္ဌိတာနိ, ယသဿိနံ ပညဝန္တံ ဝိသယှ၊
ယသော စ လဒ္ဓါ ပုရိမံ ဥဠာရံ, နပ္ပဇ္ဇဟေ ဝဏ္ဏဗလံ ပုရာဏံ။
ပနုဇ္ဇ ဒုက္ခေန သုခံ ဇနိန္ဒ, သုခေန ဝါ ဒုက္ခမသယှသာဟိ၊
ဥဘယတ္ထ သန္တော အဘိနိဗ္ဗုတတ္တာ, သုခေ စ ဒုက္ခေ စ ဘဝန္တိ တုလျာတိ။
ဧကရာဇဇာတကံ တတိယံ။
(ဇာ၊၁၊၉၅။)ဣမာနိ မံ ဒဒ္ဒရ တာပယန္တိ, ဝါစာဒုရုတ္တာနိ မနုဿလောကေ၊
မဏ္ဍူကဘက္ခာ ဥဒကန္တသေဝီ, အာသီဝိသံ မံ အဝိသာ သပန္တိ။
သကာ ရဋ္ဌာ ပဗ္ဗာဇိတော, အညံ ဇနပဒံ ဂတော၊
မဟန္တံ ကောဋ္ဌံ ကယိရာထ, ဒုရုတ္တာနံ [ဒုရုတ္တာနိ (က။)] နိဓေတဝေ။
ယတ္ထ ပေါသံ န ဇာနန္တိ, ဇာတိယာ ဝိနယေန ဝါ၊
န တတ္ထ မာနံ ကယိရာထ, ဝသမညာတကေ ဇနေ။
ဝိဒေသဝါသံ ဝသတော, ဇာတဝေဒသမေနပိ [ဇာတဝေဒဘယေနပိ (က။)]၊
ခမိတဗ္ဗံ သပညေန, အပိ ဒါသဿ တဇ္ဇိတန္တိ။
ဒဒ္ဒရဇာတကံ စတုတ္ထံ။
֍ * ၃၀၅။ သီလဝီမံသနဇာတကံ (၄-၁-၅)
နတ္ထိ လောကေ ရဟော နာမ, ပါပကမ္မံ ပကုဗ္ဗတော၊
ပဿန္တိ ဝနဘူတာနိ, တံ ဗာလော မညတီ ရဟော။
အဟံ ရဟော န ပဿာမိ, သုညံ ဝါပိ န ဝိဇ္ဇတိ၊
ယတ္ထ အညံ [သုညံ (သျာ။ က။)] န ပဿာမိ, အသုညံ ဟောတိ တံ မယာ။
ဒုဇ္ဇစ္စော စ သုဇစ္စော [အဇစ္စော (ပီ။)] စ, နန္ဒော စ သုခဝဍ္ဎိတော [သုခဝစ္ဆကော (သီ။), သုခဝစ္ဆနော (သျာ။ ပီ။)]၊
ဝေဇ္ဇော စ အဒ္ဓုဝသီလော [အထ သီလော (က။)] စ, တေ ဓမ္မံ ဇဟု မတ္ထိကာ။
ဗြာဟ္မဏော စ ကထံ ဇဟေ, သဗ္ဗဓမ္မာန ပါရဂူ၊
ယော ဓမ္မမနုပါလေတိ, ဓိတိမာ သစ္စနိက္ကမောတိ။
သီလဝီမံသနဇာတကံ ပဉ္စမံ။
(ဇာ၊၁၊၉၆။)ကိမဏ္ဍကာ ဣမေ ဒေဝ, နိက္ခိတ္တာ ကံသမလ္လကေ၊
ဥပလောဟိတကာ ဝဂ္ဂူ, တံ [တေ (ပီ။)] မေ အက္ခာဟိ ပုစ္ဆိတော။
ယာနိ ပုရေ တုဝံ ဒေဝိ, ဘဏ္ဍု နန္တကဝါသိနီ၊
ဥစ္ဆင်္ဂဟတ္ထာ ပစိနာသိ, တဿာ တေ ကောလိယံ ဖလံ။
ဥဍ္ဍယှတေ န ရမတိ, ဘောဂါ ဝိပ္ပဇဟန္တိ တံ [ဝိပ္ပဇဟန္တိ’မံ (?)]၊
တတ္ထေဝိမံ ပဋိနေထ, ယတ္ထ ကောလံ ပစိဿတိ။
ဟောန္တိ ဟေတေ မဟာရာဇ, ဣဒ္ဓိပ္ပတ္တာယ [ဣဒ္ဓိမတ္တာယ (က။)] နာရိယာ၊
ခမ ဒေဝ သုဇာတာယ, မာဿာ [မာသု (က။)] ကုဇ္ဈ ရထေသဘာတိ။
သုဇာတဇာတကံ ဆဋ္ဌံ။
အစေတနံ ဗြာဟ္မဏ အဿုဏန္တံ, ဇာနော အဇာနန္တမိမံ ပလာသံ၊
အာရဒ္ဓဝိရိယော ဓုဝံ အပ္ပမတ္တော, သုခသေယျံ ပုစ္ဆသိ ကိဿ ဟေတု။
ဒူရေ သုတော စေဝ ဗြဟာ စ ရုက္ခော, ဒေသေ ဌိတော ဘူတနိဝါသရူပေါ၊
တသ္မာ နမဿာမိ ဣမံ ပလာသံ, ယေ စေတ္ထ ဘူတာ တေ [တေ စ (သီ။ ပီ။)] ဓနဿ ဟေတု။
သော တေ ကရိဿာမိ ယထာနုဘာဝံ, ကတညုတံ ဗြာဟ္မဏ ပေက္ခမာနော၊
ကထဉှိ အာဂမ္မ သတံ သကာသေ, မောဃာနိ တေ အဿု ပရိဖန္ဒိတာနိ။
(ဇာ၊၁၊၉၇။)ယော တိန္ဒုကရုက္ခဿ ပရော [ပုရော (က။)] ပိလက္ခော [ပိလက္ခု (သီ။ ပီ။), မိလက္ခု (က။)], ပရိဝါရိတော ပုဗ္ဗယညော ဥဠာရော၊
တဿေသ မူလသ္မိံ နိဓိ နိခါတော, အဒါယာဒေါ ဂစ္ဆ တံ ဥဒ္ဓရာဟီတိ။
ပလာသဇာတကံ သတ္တမံ။
အကရမှသ တေ ကိစ္စံ, ယံ ဗလံ အဟုဝမှသေ၊
မိဂရာဇ နမော တျတ္ထု, အပိ ကိဉ္စိ လဘာမသေ။
မမ လောဟိတဘက္ခဿ, နိစ္စံ လုဒ္ဒါနိ ကုဗ္ဗတော၊
ဒန္တန္တရဂတော သန္တော, တံ ဗဟုံ ယမ္ပိ ဇီဝသိ။
အကတညုမကတ္တာရံ, ကတဿ အပ္ပဋိကာရကံ၊
ယသ္မိံ ကတညုတာ နတ္ထိ, နိရတ္ထာ တဿ သေဝနာ။
ယဿ သမ္မုခစိဏ္ဏေန, မိတ္တဓမ္မော န လဗ္ဘတိ၊
အနုသူယ [အနုသုယျ (သီ။ ပီ။)] မနက္ကောသံ, သဏိကံ တမှာ အပက္ကမေတိ။
သကုဏဇာတကံ အဋ္ဌမံ။
သဗ္ဗမိဒံ စရိမံ ကတံ [စရိမဝတံ (သီ။ ပီ။)], ဥဘော ဓမ္မံ န ပဿရေ၊
ဥဘော ပကတိယာ စုတာ, ယော စာယံ မန္တေဇ္ဈာပေတိ [မန္တဇ္ဈာယတိ (သီ။), သဇ္ဈာပယတိ (ပီ။)]၊
ယော စ မန္တံ အဓီယတိ။
သာလီနံ ဩဒနံ ဘုဉ္ဇေ, သုစိံ မံသူပသေစနံ၊
တသ္မာ ဧတံ န သေဝါမိ, ဓမ္မံ ဣသီဟိ သေဝိတံ။
ပရိဗ္ဗဇ မဟာ လောကော [မဟာဗြဟ္မေ (က။)], ပစန္တညေပိ ပါဏိနော၊
မာ တံ အဓမ္မော အာစရိတော, အသ္မာ ကုမ္ဘမိဝါဘိဒါ။
(ဇာ၊၁၊၉၈။)ဓိရတ္ထု တံ ယသလာဘံ, ဓနလာဘဉ္စ ဗြာဟ္မဏ၊
ယာ ဝုတ္တိ ဝိနိပါတေန, အဓမ္မစရဏေန ဝါတိ။
ဆဝကဇာတကံ နဝမံ။
သသမုဒ္ဒပရိယာယံ, မဟိံ သာဂရကုဏ္ဍလံ၊
န ဣစ္ဆေ သဟ နိန္ဒာယ, ဧဝံ သေယျ [သယှ (သီ။ သျာ။ ပီ။)] ဝိဇာနဟိ။
ဓိရတ္ထု တံ ယသလာဘံ, ဓနလာဘဉ္စ ဗြာဟ္မဏ၊
ယာ ဝုတ္တိ ဝိနိပါတေန, အဓမ္မစရဏေန ဝါ။
အပိ စေ ပတ္တမာဒါယ, အနဂါရော ပရိဗ္ဗဇေ၊
သာယေဝ ဇီဝိကာ သေယျော, ယာ စာဓမ္မေန ဧသနာ။
အပိ စေ ပတ္တမာဒါယ, အနဂါရော ပရိဗ္ဗဇေ၊
အညံ အဟိံသယံ လောကေ, အပိ ရဇ္ဇေန တံ ဝရန္တိ။
သေယျဇာတကံ [သယှဇာတကံ (သီ။ သျာ။ ပီ။)] ဒသမံ။
ကာလိင်္ဂဝဂ္ဂေါ [ဝိဝရဝဂ္ဂေါ (သီ။ ပီ။)] ပဌမော။
တဿုဒ္ဒါနံ –
ဝိဝရဉ္စ အဒေယျ သမိဒ္ဓဝရံ, အထ ဒဒ္ဒရ ပါပမဟာတိရဟော၊
အထ ကောလိ ပလာသဝရဉ္စ ကရ, စရိမံ သသမုဒ္ဒဝရေန ဒသာတိ။
၂။ ပုစိမန္ဒဝဂ္ဂေါ
֍ * ၃၁၁။ ပုစိမန္ဒဇာတကံ (၄-၂-၁)
ဥဋ္ဌေဟိ စောရ ကိံ သေသိ, ကော အတ္ထော သုပနေန [သုပိတေန (သီ။), သုပိနေန (ပီ။ က။)] တေ၊
မာ တံ ဂဟေသုံ [ဂဏှေယျုံ (က။)] ရာဇာနော, ဂါမေ ကိဗ္ဗိသကာရကံ။
(ဇာ၊၁၊၉၉။)ယံ နု [နူန (သျာ။)] စောရံ ဂဟေဿန္တိ, ဂါမေ ကိဗ္ဗိသကာရကံ၊
ကိံ တတ္ထ ပုစိမန္ဒဿ, ဝနေ ဇာတဿ တိဋ္ဌတော။
န တွံ အဿတ္ထ ဇာနာသိ, မမ စောရဿ စန္တရံ၊
စောရံ ဂဟေတွာ ရာဇာနော, ဂါမေ ကိဗ္ဗိသကာရကံ၊
အပ္ပေန္တိ [အစ္စေန္တိ (သျာ။)] နိမ္ဗသူလသ္မိံ, တသ္မိံ မေ သင်္ကတေ မနော။
သင်္ကေယျ သင်္ကိတဗ္ဗာနိ, ရက္ခေယျာနာဂတံ ဘယံ၊
အနာဂတဘယာ ဓီရော, ဥဘော လောကေ အဝေက္ခတီတိ။
ပုစိမန္ဒဇာတကံ ပဌမံ။
֍ * ၃၁၂။ ကဿပမန္ဒိယဇာတကံ (၄-၂-၂)
အပိ ကဿပ မန္ဒိယာ, ယုဝါ သပတိ ဟန္တိ [သမ္ပဋိဟန္တိ (က။)] ဝါ၊
သဗ္ဗံ တံ ခမတေ ဓီရော, ပဏ္ဍိတော တံ တိတိက္ခတိ။
သစေပိ သန္တော ဝိဝဒန္တိ, ခိပ္ပံ သန္ဓီယရေ ပုန၊
ဗာလာ ပတ္တာဝ ဘိဇ္ဇန္တိ, န တေ သမထမဇ္ဈဂူ။
ဧတေ ဘိယျော သမာယန္တိ, သန္ဓိ တေသံ န ဇီရတိ၊
ယော စာဓိပန္နံ ဇာနာတိ, ယော စ ဇာနာတိ ဒေသနံ။
ဧသော ဟိ ဥတ္တရိတရော, ဘာရဝဟော ဓုရဒ္ဓရော၊
ယော ပရေသာဓိပန္နာနံ, သယံ သန္ဓာတုမရဟတီတိ။
ကဿပမန္ဒိယဇာတကံ ဒုတိယံ။
֍ * ၃၁၃။ ခန္တီဝါဒီဇာတကံ (၄-၂-၃)
ယော တေ ဟတ္ထေ စ ပါဒေ စ, ကဏ္ဏနာသဉ္စ ဆေဒယိ၊
တဿ ကုဇ္ဈ မဟာဝီရ, မာ ရဋ္ဌံ ဝိနသာ [ဝိနဿ (က။ သီ။ သျာ။ က။)] ဣဒံ။
ယော မေ ဟတ္ထေ စ ပါဒေ စ, ကဏ္ဏနာသဉ္စ ဆေဒယိ၊
စိရံ ဇီဝတု သော ရာဇာ, န ဟိ ကုဇ္ဈန္တိ မာဒိသာ။
အဟူ အတီတမဒ္ဓါနံ [အဟု အတီတမဒ္ဓါနေ (သျာ။ ပီ။ က။)], သမဏော ခန္တိဒီပနော၊
တံ ခန္တိယာယေဝ ဌိတံ, ကာသိရာဇာ အဆေဒယိ။
(ဇာ၊၁၊၁၀၀။)တဿ ကမ္မ [ကမ္မဿ (သီ။ ပီ။)] ဖရုသဿ, ဝိပါကော ကဋုကော အဟု၊
ယံ ကာသိရာဇာ ဝေဒေသိ, နိရယမှိ သမပ္ပိတောတိ။
ခန္တီဝါဒီဇာတကံ တတိယံ။
֍ * ၃၁၄။ လောဟကုမ္ဘိဇာတကံ (၄-၂-၄)
ဒုဇ္ဇီဝိတမဇီဝိမှ, ယေ သန္တေ [ယေသံ နော (သျာ။ က။)] န ဒဒမှသေ၊
ဝိဇ္ဇမာနေသု ဘောဂေသု, ဒီပံ နာကမှ အတ္တနော။
သဋ္ဌိ [သဋ္ဌိံ (သျာ။)] ဝဿသဟဿာနိ, ပရိပုဏ္ဏာနိ သဗ္ဗသော၊
နိရယေ ပစ္စမာနာနံ, ကဒါ အန္တော ဘဝိဿတိ။
နတ္ထိ အန္တော ကုတော အန္တော, န အန္တော ပဋိဒိဿတိ၊
တဒါ ဟိ ပကတံ ပါပံ, မမ တုယှဉ္စ မာရိသာ [မာရိသ (သီ။ သျာ။ ပီ။)]။
သောဟံ နူန ဣတော ဂန္တွာ, ယောနိံ လဒ္ဓါန မာနုသိံ၊
ဝဒညူ သီလသမ္ပန္နော, ကာဟာမိ ကုသလံ ဗဟုန္တိ။
လောဟကုမ္ဘိဇာတကံ စတုတ္ထံ။
֍ * ၃၁၅။ သဗ္ဗမံသလာဘဇာတကံ (၄-၂-၅)
ဖရုသာ ဝတ တေ ဝါစာ, မံသံ [သမ္မ (ပီ။ က။)] ယာစနကော အသိ [စသိ (ပီ။)]၊
ကိလောမသဒိသီ [ကိလောမဿ သဒိသာ (ပီ။)] ဝါစာ, ကိလောမံ သမ္မ ဒမ္မိ တေ။
အင်္ဂမေတံ မနုဿာနံ, ဘာတာ လောကေ ပဝုစ္စတိ၊
အင်္ဂဿ သဒိသီ ဝါစာ [အင်္ဂဿဒိသီ တေ ဝါစာ (က။)], အင်္ဂံ သမ္မ ဒဒါမိ တေ။
တာတာတိ ပုတ္တော ဝဒမာနော, ကမ္ပေတိ [သမ္မေတိ (က။)] ဟဒယံ ပိတု၊
ဟဒယဿ သဒိသီ [ဟဒယဿဒိသီ (က။)] ဝါစာ, ဟဒယံ သမ္မ ဒမ္မိ တေ။
ယဿ ဂါမေ သခါ နတ္ထိ, ယထာရညံ တထေဝ တံ၊
သဗ္ဗဿ သဒိသီ ဝါစာ, သဗ္ဗံ သမ္မ ဒဒါမိ တေတိ။
သဗ္ဗမံသလာဘဇာတကံ [မံသဇာတကံ (သီ။ သျာ။ ပီ။)] ပဉ္စမံ။
(ဇာ၊၁၊၁၀၁။)֍ * ၃၁၆။ သသပဏ္ဍိတဇာတကံ (၄-၂-၆)
သတ္တ မေ ရောဟိတာ မစ္ဆာ, ဥဒကာ ထလမုဗ္ဘတာ၊
ဣဒံ ဗြာဟ္မဏ မေ အတ္ထိ, ဧတံ ဘုတွာ ဝနေ ဝသ။
ဒုဿ မေ ခေတ္တပါလဿ, ရတ္တိဘတ္တံ အပါဘတံ၊
မံသသူလာ စ ဒွေ ဂေါဓာ, ဧကဉ္စ ဒဓိဝါရကံ၊
ဣဒံ ဗြာဟ္မဏ မေ အတ္ထိ, ဧတံ ဘုတွာ ဝနေ ဝသ။
အမ္ဗပက္ကံ ဒကံ [အမ္ဗပက္ကောဒကံ (သီ။ ပီ။)] သီတံ, သီတစ္ဆာယာ မနောရမာ [သီတစ္ဆာယံ မနောရမံ (သီ။ သျာ။ ပီ။)]၊
ဣဒံ ဗြာဟ္မဏ မေ အတ္ထိ, ဧတံ ဘုတွာ ဝနေ ဝသ။
န သသဿ တိလာ အတ္ထိ, န မုဂ္ဂါ နပိ တဏ္ဍုလာ၊
ဣမိနာ အဂ္ဂိနာ ပက္ကံ, မမံ [မံသံ (က။)] ဘုတွာ ဝနေ ဝသာတိ။
သသပဏ္ဍိတဇာတကံ ဆဋ္ဌံ။
မတံ မတံ ဧဝ [မတမတမေဝ (သီ။ သျာ။ ပီ။)] ရောဒထ, န ဟိ တံ ရောဒထ ယော မရိဿတိ၊
သဗ္ဗေပိ [သဗ္ဗေဝ (သီ။ သျာ။ ပီ။)] သရီရဓာရိနော, အနုပုဗ္ဗေန ဇဟန္တိ ဇီဝိတံ။
ဒေဝမနုဿာ စတုပ္ပဒါ, ပက္ခိဂဏာ ဥရဂါ စ ဘောဂိနော၊
သမှိ [ယမှိ (သျာ။), အသ္မိံ (ပီ။ က။)] သရီရေ အနိဿရာ, ရမမာနာဝ ဇဟန္တိ ဇီဝိတံ။
ဧဝံ စလိတံ အသဏ္ဌိတံ, သုခဒုက္ခံ မနုဇေသွပေက္ခိယ၊
ကန္ဒိတရုဒိတံ နိရတ္ထကံ, ကိံ ဝေါ သောကဂဏာဘိကီရရေ။
ဓုတ္တာ စ သောဏ္ဍာ [ဓုတ္တာ သောဏ္ဍာ (သီ။), ဓုတ္တာ သောဏ္ဍာ စ (သျာ။)] အကတာ, ဗာလာ သူရာ အယောဂိနော [ဗာလာ သူရာ ဝီရာ အယောဂိနော (ပီ။)]၊
ဓီရံ မညန္တိ ဗာလောတိ, ယေ ဓမ္မဿ အကောဝိဒါတိ။
မတရောဒနဇာတကံ သတ္တမံ။
(ဇာ၊၁၊၁၀၂။)ယံ တံ ဝသန္တသမယေ, ကဏဝေရေသု ဘာဏုသု၊
သာမံ ဗာဟာယ ပီဠေသိ, သာ တံ အာရောဂျမဗြဝိ။
အမ္ဘော န ကိရ သဒ္ဓေယျံ, ယံ ဝါတော ပဗ္ဗတံ ဝဟေ၊
ပဗ္ဗတဉ္စေ ဝဟေ ဝါတော, သဗ္ဗမ္ပိ ပထဝိံ ဝဟေ၊
ယတ္ထ သာမာ ကာလကတာ [ကာလင်္ကတာ (က။)], သာ မံ အာရောဂျမဗြဝိ။
န စေဝ သာ ကာလကတာ, န စ သာ အညမိစ္ဆတိ၊
ဧကဘတ္တိကိနီ [ဧကဘတ္တာ ကိရ (သီ။ သျာ။), ဧကဘတ္တကိနီ (ပီ။)] သာမာ, တမေဝ အဘိကင်္ခတိ။
အသန္ထုတံ မံ စိရသန္ထုတေန [အသန္ဓတံ မံ စိရသန္ဓတေန (က။)], နိမီနိ သာမာ အဓုဝံ ဓုဝေန၊
မယာပိ သာမာ နိမိနေယျ အညံ, ဣတော အဟံ ဒူရတရံ ဂမိဿန္တိ။
ကဏဝေရဇာတကံ အဋ္ဌမံ။
သုသုခံ ဝတ ဇီဝါမိ, လဘာမိ စေဝ ဘုဉ္ဇိတုံ၊
ပရိပန္ထေဝ တိဋ္ဌာမိ, ကာ နု ဘန္တေ ဂတီ မမ။
မနော စေ တေ နပ္ပဏမတိ, ပက္ခိ ပါပဿ ကမ္မုနော၊
အဗျာဝဋဿ ဘဒြဿ, န ပါပမုပလိမ္ပတိ။
ဉာတကော နော နိသိန္နောတိ, ဗဟု အာဂစ္ဆတေ ဇနော၊
ပဋိစ္စ ကမ္မံ ဖုသတိ, တသ္မိံ မေ သင်္ကတေ မနော။
န ပဋိစ္စ ကမ္မံ ဖုသတိ, မနော စေ နပ္ပဒုဿတိ၊
အပ္ပေါဿုက္ကဿ ဘဒြဿ, န ပါပမုပလိမ္ပတီတိ။
တိတ္တိရဇာတကံ နဝမံ။
(ဇာ၊၁၊၁၀၃။)သုစ္စဇံ ဝတ နစ္စဇိ, ဝါစာယ အဒဒံ ဂိရိံ၊
ကိံ ဟိတဿ စဇန္တဿ, ဝါစာယ အဒဒ ပဗ္ဗတံ။
ယဉှိ ကယိရာ တဉှိ ဝဒေ, ယံ န ကယိရာ န တံ ဝဒေ၊
အကရောန္တံ ဘာသမာနံ, ပရိဇာနန္တိ ပဏ္ဍိတာ။
ရာဇပုတ္တ နမော တျတ္ထု, သစ္စေ ဓမ္မေ ဌိတော စသိ၊
ယဿ တေ ဗျသနံ ပတ္တော, သစ္စသ္မိံ ရမတေ မနော။
ယာ ဒလိဒ္ဒီ ဒလိဒ္ဒဿ, အဍ္ဎာ အဍ္ဎဿ ကိတ္တိမ [ကိတ္တိမာ (သီ။ သျာ။ ပီ။)]၊
သာ ဟိဿ ပရမာ ဘရိယာ, သဟိရညဿ ဣတ္ထိယောတိ။
သုစ္စဇဇာတကံ ဒသမံ။
ပုစိမန္ဒဝဂ္ဂေါ ဒုတိယော။
တဿုဒ္ဒါနံ –
အထ စောရ သကဿပ ခန္တီဝရော, ဒုဇ္ဇီဝိတတာ စ ဝရာ ဖရုသာ၊
အထ သသ မတဉ္စ ဝသန္တ သုခံ, သုစ္စဇံဝတနစ္စဇိနာ စ ဒသာတိ။
၃။ ကုဋိဒူသကဝဂ္ဂေါ
֍ * ၃၂၁။ ကုဋိဒူသကဇာတကံ (၄-၃-၁)
မနုဿဿေဝ တေ သီသံ, ဟတ္ထပါဒါ စ ဝါနရ၊
အထ ကေန နု ဝဏ္ဏေန, အဂါရံ တေ န ဝိဇ္ဇတိ။
မနုဿဿေဝ မေ သီသံ, ဟတ္ထပါဒါ စ သိင်္ဂိလ [သိင်္ဂါလ (က။), ပိင်္ဂလ (ဋီကာ)]၊
ယာဟု သေဋ္ဌာ မနုဿေသု, သာ မေ ပညာ န ဝိဇ္ဇတိ။
(ဇာ၊၁၊၁၀၄။)အနဝဋ္ဌိတစိတ္တဿ, လဟုစိတ္တဿ ဒုဗ္ဘိနော [ဒူဘိနော (ပီ။)]၊
နိစ္စံ အဒ္ဓုဝသီလဿ, သုခဘာဝေါ [သုစိဘာဝေါ (သီ။), သုခဘာဂေါ (?)] န ဝိဇ္ဇတိ။
သော ကရဿု အာနုဘာဝံ, ဝီတိဝတ္တဿု သီလိယံ၊
သီတဝါတပရိတ္တာဏံ, ကရဿု ကုဋဝံ [ကုဋိကံ (သီ။ သျာ။)] ကပီတိ။
ကုဋိဒူသက [သိင်္ဂါလသကုဏ (က။)] ဇာတကံ ပဌမံ။
ဒုဒ္ဒုဘာယတိ [ဒဒ္ဒဘာယတိ (သီ။ ပီ။)] ဘဒ္ဒန္တေ, ယသ္မိံ ဒေသေ ဝသာမဟံ၊
အဟမ္ပေတံ န ဇာနာမိ, ကိမေတံ ဒုဒ္ဒုဘာယတိ။
ဗေလုဝံ ပတိတံ သုတွာ, ဒုဒ္ဒုဘန္တိ [ဒဒ္ဒဘန္တိ (သီ။)] သသော ဇဝိ၊
သသဿ ဝစနံ သုတွာ, သန္တတ္တာ မိဂဝါဟိနီ။
အပ္ပတွာ ပဒဝိညာဏံ, ပရဃောသာနုသာရိနော၊
ပနာဒပရမာ ဗာလာ, တေ ဟောန္တိ ပရပတ္တိယာ။
ယေ စ သီလေန သမ္ပန္နာ, ပညာယူပသမေ ရတာ၊
အာရကာ ဝိရတာ ဓီရာ, န ဟောန္တိ ပရပတ္တိယာတိ။
ဒုဒ္ဒုဘဇာတကံ [ဒဒ္ဒဘဇာတကံ (သီ။ ပီ။)] ဒုတိယံ။
֍ * ၃၂၃။ ဗြဟ္မဒတ္တဇာတကံ (၄-၃-၃)
ဒွယံ ယာစနကော ရာဇ, ဗြဟ္မဒတ္တ နိဂစ္ဆတိ၊
အလာဘံ ဓနလာဘံ ဝါ, ဧဝံ ဓမ္မာ ဟိ ယာစနာ။
ယာစနံ ရောဒနံ အာဟု, ပဉ္စာလာနံ ရထေသဘ၊
ယော ယာစနံ ပစ္စက္ခာတိ, တမာဟု ပဋိရောဒနံ။
မာ မဒ္ဒသံသု ရောဒန္တံ, ပဉ္စာလာ သုသမာဂတာ၊
တုဝံ ဝါ ပဋိရောဒန္တံ, တသ္မာ ဣစ္ဆာမဟံ ရဟော။
(ဇာ၊၁၊၁၀၅။)ဒဒါမိ တေ ဗြာဟ္မဏ ရောဟိဏီနံ, ဂဝံ သဟဿံ သဟ ပုင်္ဂဝေန၊
အရိယော ဟိ အရိယဿ ကထံ န ဒဇ္ဇာ [ဒဇ္ဇေ (သီ။), ဒဇ္ဇံ (?)], သုတွာန ဂါထာ တဝ ဓမ္မယုတ္တာတိ။
ဗြဟ္မဒတ္တဇာတကံ တတိယံ။
֍ * ၃၂၄။ စမ္မသာဋကဇာတကံ (၄-၃-၄)
ကလျာဏရူပေါ ဝတယံ စတုပ္ပဒေါ, သုဘဒ္ဒကော စေဝ သုပေသလော စ၊
ယော ဗြာဟ္မဏံ ဇာတိမန္တူပပန္နံ, အပစာယတိ မေဏ္ဍဝရော ယသဿီ။
မာ ဗြာဟ္မဏ ဣတ္တရဒဿနေန, ဝိဿာသမာပဇ္ဇိ စတုပ္ပဒဿ၊
ဒဠှပ္ပဟာရံ အဘိကင်္ခမာနော [အဘိကတ္တုကာမော (သျာ။)], အဝသက္ကတီ ဒဿတိ သုပ္ပဟာရံ။
ဦရုဋ္ဌိ [ဦရဋ္ဌိ (သီ။)] ဘဂ္ဂံ ပဝဋ္ဋိတော [ပတိတော (သီ။ သျာ။)] ခါရိဘာရော, သဗ္ဗဉ္စ ဘဏ္ဍံ ဗြာဟ္မဏဿ [ဗြာဟ္မဏဿီဓ (က။ သီ။ ပီ။), ဗြာဟ္မဏဿေဝ (က။ သီ။ သျာ။ က။)] ဘိန္နံ၊
ဥဘောပိ ဗာဟာ ပဂ္ဂယှ [ပဂ္ဂယျေဝ (သျာ။), ပဂ္ဂဟီယ (?)] ကန္ဒတိ [ဗာဟာ ပဂ္ဂယျ ကန္ဒတိ (ပီ။ က။)], အဘိဓာဝထ ဟညတေ ဗြဟ္မစာရီ။
ဧဝံ သော နိဟတော သေတိ, ယော အပူဇံ ပသံသတိ [နမဿတိ (ပီ။)]၊
ယထာဟမဇ္ဇ ပဟတော, ဟတော မေဏ္ဍေန ဒုမ္မတီတိ။
စမ္မသာဋကဇာတကံ စတုတ္ထံ။
သမဏံ တံ မညမာနော, ဥပဂစ္ဆိမသညတံ၊
သော မံ ဒဏ္ဍေန ပါဟာသိ, ယထာ အဿမဏော တထာ။
(ဇာ၊၁၊၁၀၆။)ကိံ တေ ဇဋာဟိ ဒုမ္မေဓ, ကိံ တေ အဇိနသာဋိယာ၊
အဗ္ဘန္တရံ တေ ဂဟနံ, ဗာဟိရံ ပရိမဇ္ဇသိ။
ဧဟိ ဂေါဓ နိဝတ္တဿု, ဘုဉ္ဇ သာလီနမောဒနံ၊
တေလံ လောဏဉ္စ မေ အတ္ထိ, ပဟူတံ မယှ ပိပ္ဖလိ။
ဧသ ဘိယျော ပဝေက္ခာမိ, ဝမ္မိကံ သတပေါရိသံ၊
တေလံ လောဏဉ္စ ကိတ္တေသိ [ကိန္တေသိ (သျာ။ ပီ။)], အဟိတံ မယှ ပိပ္ဖလီတိ။
ဂေါဓရာဇဇာတကံ ပဉ္စမံ။
ကာယေန ယော နာဝဟရေ, ဝါစာယ န မုသာ ဘဏေ၊
ယသော လဒ္ဓါ န မဇ္ဇေယျ, သ ဝေ ကက္ကာရုမရဟတိ။
ဓမ္မေန ဝိတ္တမေသေယျ, န နိကတျာ ဓနံ ဟရေ၊
ဘောဂေ လဒ္ဓါ န မဇ္ဇေယျ, သ ဝေ ကက္ကာရုမရဟတိ။
ယဿ စိတ္တံ အဟာလိဒ္ဒံ, သဒ္ဓါ စ အဝိရာဂိနီ၊
ဧကော သာဒုံ န ဘုဉ္ဇေယျ, သ ဝေ ကက္ကာရုမရဟတိ။
သမ္မုခါ ဝါ တိရောက္ခာ ဝါ [ပရောက္ခာ ဝါ (ပီ။), ပရမ္မုခါ (က။)], ယော သန္တေ န ပရိဘာသတိ၊
ယထာဝါဒီ တထာကာရီ, သ ဝေ ကက္ကာရုမရဟတီတိ။
ကက္ကာရုဇာတကံ ဆဋ္ဌံ။
ဝါတိ စာယံ [ဝါယံ (က။)] တတော ဂန္ဓော, ယတ္ထ မေ ဝသတီ ပိယာ၊
ဒူရေ ဣတော ဟိ ကာကဝတီ [ကာကာတီ (သီ။), ကာကာတိ (သျာ။ ပီ။)], ယတ္ထ မေ နိရတော မနော။
ကထံ သမုဒ္ဒမတရီ, ကထံ အတရိ ကေပုကံ [ကေဗုကံ (သီ။ ပီ။)]၊
ကထံ သတ္တ သမုဒ္ဒါနိ, ကထံ သိမ္ဗလိမာရုဟိ။
တယာ သမုဒ္ဒမတရိံ, တယာ အတရိ ကေပုကံ [ကေဗုကံ (သီ။ ပီ။)]၊
တယာ သတ္တ သမုဒ္ဒါနိ, တယာ သိမ္ဗလိမာရုဟိံ။
(ဇာ၊၁၊၁၀၇။)ဓိရတ္ထုမံ မဟာကာယံ, ဓိရတ္ထုမံ အစေတနံ၊
ယတ္ထ ဇာယာယဟံ ဇာရံ, အာဝဟာမိ ဝဟာမိ စာတိ။
ကာကဝတီဇာတကံ သတ္တမံ။
֍ * ၃၂၈။ အနနုသောစိယဇာတကံ (၄-၃-၈)
ဗဟူနံ ဝိဇ္ဇတီ ဘောတီ, တေဟိ မေ ကိံ ဘဝိဿတိ၊
တသ္မာ ဧတံ န သောစာမိ, ပိယံ သမ္မိလ္လဟာသိနိံ။
တံ တံ စေ အနုသောစေယျ, ယံ ယံ တဿ န ဝိဇ္ဇတိ၊
အတ္တာနမနုသောစေယျ, သဒါ မစ္စုဝသံ ပတံ။
န ဟေဝ ဌိတံ နာသီနံ, န သယာနံ န ပဒ္ဓဂုံ [ပတ္ထဂုံ (သျာ။)]၊
ယာဝ ဗျာတိ နိမိသတိ, တတြာပိ ရသတီ [သရတီ (သီ။ သျာ။ ပီ။)] ဝယော။
တတ္ထတ္တနိ ဝတပ္ပဒ္ဓေ [ဝတ ပန္ထေ (သျာ။), ဝတ ဗန္ဓေ (က။) ဝတ + ပ-အဒ္ဓေ = ဝတပ္ပဒ္ဓေ], ဝိနာဘာဝေ အသံသယေ၊
ဘူတံ သေသံ ဒယိတဗ္ဗံ, ဝီတံ အနနုသောစိယန္တိ [စဝိတံ နာနုသောစိယန္တိ (သျာ။), မတန္တံ နာနုသောစိယံ (က။)]။
အနနုသောစိယဇာတကံ အဋ္ဌမံ။
ယံ အန္နပါနဿ ပုရေ လဘာမ, တံ ဒါနိ သာခမိဂမေဝ ဂစ္ဆတိ၊
ဂစ္ဆာမ ဒါနိ ဝနမေဝ ရာဓ, အသက္ကတာ စသ္မ ဓနဉ္ဇယာယ [ဓနဉ္စယာယ (က။)]။
လာဘော အလာဘော ယသော အယသော စ, နိန္ဒာ ပသံသာ စ သုခဉ္စ ဒုက္ခံ၊
ဧတေ အနိစ္စာ မနုဇေသု ဓမ္မာ, မာ သောစိ ကိံ သောစသိ ပေါဋ္ဌပါဒ။
(ဇာ၊၁၊၁၀၈။)အဒ္ဓါ တုဝံ ပဏ္ဍိတကောသိ ရာဓ, ဇာနာသိ အတ္ထာနိ အနာဂတာနိ၊
ကထံ နု သာခါမိဂံ ဒက္ခိသာမ [ဒက္ခိယာမ (က။), ဒက္ခာမ (သျာ။)], နိဒ္ဓါဝိတံ [နိဒ္ဓါပိတံ (သီ။ သျာ။), နိဗ္ဗာပိတံ (ပီ။), နိစ္ဆဒံ (က။)] ရာဇကုလတောဝ ဇမ္မံ။
စာလေတိ ကဏ္ဏံ ဘကုဋိံ ကရောတိ, မုဟုံ မုဟုံ ဘာယယတေ [ဘာယတေ (သျာ။), ဘာယာပတေ (က။)] ကုမာရေ၊
သယမေဝ တံ ကာဟတိ ကာဠဗာဟု, ယေနာရကာ ဌဿတိ အန္နပါနာတိ။
ကာဠဗာဟုဇာတကံ နဝမံ။
֍ * ၃၃၀။ သီလဝီမံသဇာတကံ (၄-၃-၁၀)
သီလံ ကိရေဝ ကလျာဏံ, သီလံ လောကေ အနုတ္တရံ၊
ပဿ ဃောရဝိသော နာဂေါ, သီလဝါတိ န ဟညတိ။
ယာဝဒေဝဿဟူ ကိဉ္စိ, တာဝဒေဝ အခါဒိသုံ၊
သင်္ဂမ္မ ကုလလာ လောကေ, န ဟိံသန္တိ အကိဉ္စနံ။
သုခံ နိရာသာ သုပတိ, အာသာ ဖလဝတီ သုခါ၊
အာသံ နိရာသံ ကတွာန, သုခံ သုပတိ ပိင်္ဂလာ။
န သမာဓိပရော အတ္ထိ, အသ္မိံ လောကေ ပရမှိ စ၊
န ပရံ နာပိ အတ္တာနံ, ဝိဟိံသတိ သမာဟိတောတိ။
သီလဝီမံသဇာတကံ ဒသမံ။
ကုဋိဒူသကဝဂ္ဂေါ တတိယော။
တဿုဒ္ဒါနံ –
သမနုဿ -သဒုဒ္ဒုဘ-ယာစနကော, အထ မေဏ္ဍဝရုတ္တမ-ဂေါဓဝရော၊
အထ ကာယသကေပုက ဘောတီဝရော, အထ ရာဓသုသီလဝရေန ဒသာတိ။
(ဇာ၊၁၊၁၀၉။)၄။ ကောကိလဝဂ္ဂေါ
ယော ဝေ ကာလေ အသမ္ပတ္တေ, အတိဝေလံ ပဘာသတိ၊
ဧဝံ သော နိဟတော သေတိ, ကောကိလာယိဝ အတြဇော။
န ဟိ သတ္ထံ သုနိသိတံ, ဝိသံ ဟလာဟလာမိဝ [ဟလာဟလံ ဣဝ (ပီ။)]၊
ဧဝံ နိကဋ္ဌေ [နိက္ကဍ္ဎေ (သျာ။), နိကဍ္ဎေ (က။)] ပါတေတိ, ဝါစာ ဒုဗ္ဘာသိတာ ယထာ။
တသ္မာ ကာလေ အကာလေ ဝါ [အကာလေ စ (သီ။ သျာ။)], ဝါစံ ရက္ခေယျ ပဏ္ဍိတော၊
နာတိဝေလံ ပဘာသေယျ, အပိ အတ္တသမမှိ ဝါ။
ယော စ ကာလေ မိတံ ဘာသေ, မတိပုဗ္ဗော ဝိစက္ခဏော၊
သဗ္ဗေ အမိတ္တေ အာဒေတိ, သုပဏ္ဏော ဥရဂါမိဝါတိ။
ကောကိလဇာတကံ [ကောကာလိကဇာတကံ (သဗ္ဗတ္ထ)] ပဌမံ။
အပိ ဟန္တွာ ဟတော ဗြူတိ, ဇေတွာ ဇိတောတိ ဘာသတိ၊
ပုဗ္ဗဝက္ခာယိနော [ပုဗ္ဗမက္ခာယိနော (သီ။ သျာ။)] ရာဇ, အညဒတ္ထု [ဧကဒတ္ထု (သီ။ ပီ။)] န သဒ္ဒဟေ။
တသ္မာ ပဏ္ဍိတဇာတိယော, သုဏေယျ ဣတရဿပိ၊
ဥဘိန္နံ ဝစနံ သုတွာ, ယထာ ဓမ္မော တထာ ကရေ။
အလသော ဂိဟီ ကာမဘောဂီ န သာဓု, အသညတော ပဗ္ဗဇိတော န သာဓု၊
ရာဇာ န သာဓု အနိသမ္မကာရီ, ယော ပဏ္ဍိတော ကောဓနော တံ န သာဓု။
နိသမ္မ ခတ္တိယော ကယိရာ, နာနိသမ္မ ဒိသမ္ပတိ၊
နိသမ္မကာရိနော ရာဇ [ရညော (သီ။ သျာ။)], ယသော ကိတ္တိ စ ဝဍ္ဎတီတိ။
ရထလဋ္ဌိဇာတကံ ဒုတိယံ။
(ဇာ၊၁၊၁၁၀။)֍ * ၃၃၃။ ပက္ကဂေါဓဇာတကံ (၄-၄-၃)
တဒေဝ မေ တွံ ဝိဒိတော, ဝနမဇ္ဈေ ရထေသဘ၊
ယဿ တေ ခဂ္ဂဗဒ္ဓဿ, သန္နဒ္ဓဿ တိရီဋိနော၊
အဿတ္ထဒုမသာခါယ, ပက္ကာ ဂေါဓာ ပလာယထ။
နမေ နမန္တဿ ဘဇေ ဘဇန္တံ, ကိစ္စာနုကုဗ္ဗဿ ကရေယျ ကိစ္စံ၊
နာနတ္ထကာမဿ ကရေယျ အတ္ထံ, အသမ္ဘဇန္တမ္ပိ န သမ္ဘဇေယျ။
စဇေ စဇန္တံ ဝနထံ န ကယိရာ, အပေတစိတ္တေန န သမ္ဘဇေယျ၊
ဒိဇော ဒုမံ ခီဏဖလန္တိ [ဖလံဝ (က။ သီ။ သျာ။ က။), ဒုကနိပါတေ ပုဋဘတ္တဇာတကေန သံသန္ဒေတဗ္ဗံ] ဉတွာ, အညံ သမေက္ခေယျ မဟာ ဟိ လောကော။
သော တေ ကရိဿာမိ ယထာနုဘာဝံ, ကတညုတံ ခတ္တိယေ [ခတ္တိယော (သျာ။ က။)] ပေက္ခမာနော၊
သဗ္ဗဉ္စ တေ ဣဿရိယံ ဒဒါမိ, ယဿိစ္ဆသီ တဿ တုဝံ ဒဒါမီတိ။
ပက္ကဂေါဓဇာတကံ [ဂေါဓဇာတကံ (သီ။ သျာ။ ပီ။)] တတိယံ။
֍ * ၃၃၄။ ရာဇောဝါဒဇာတကံ (၄-၄-၄)
ဂဝံ စေ တရမာနာနံ, ဇိမှံ ဂစ္ဆတိ ပုင်္ဂဝေါ၊
သဗ္ဗာ တာ ဇိမှံ ဂစ္ဆန္တိ [သဗ္ဗာ ဂါဝီ ဇိမှံ ယန္တိ (သီ။ သျာ။)], နေတ္တေ ဇိမှံ ဂတေ သတိ။
ဧဝမေဝ မနုဿေသု, ယော ဟောတိ သေဋ္ဌသမ္မတော၊
သော စေ အဓမ္မံ စရတိ, ပဂေဝ ဣတရာ ပဇာ၊
သဗ္ဗံ ရဋ္ဌံ ဒုခံ သေတိ, ရာဇာ စေ ဟောတိ အဓမ္မိကော။
ဂဝံ စေ တရမာနာနံ, ဥဇုံ ဂစ္ဆတိ ပုင်္ဂဝေါ၊
သဗ္ဗာ ဂါဝီ ဥဇုံ ယန္တိ [သဗ္ဗာ တာ ဥဇုံ ဂစ္ဆန္တိ (ပီ။ အ။ နိ။ ၄။၇၀)], နေတ္တေ ဥဇုံ ဂတေ သတိ။
(ဇာ၊၁၊၁၁၁။)ဧဝမေဝ မနုဿေသု, ယော ဟောတိ သေဋ္ဌသမ္မတော၊
သော သစေ ဓမ္မံ စရတိ, ပဂေဝ ဣတရာ ပဇာ၊
သဗ္ဗံ ရဋ္ဌံ သုခံ သေတိ, ရာဇာ စေ ဟောတိ ဓမ္မိကောတိ။
ရာဇောဝါဒဇာတကံ စတုတ္ထံ။
ဗြဟာ ပဝဍ္ဎကာယော သော, ဒီဃဒါဌော စ ဇမ္ဗုက၊
န တွံ တတ္ထ ကုလေ ဇာတော, ယတ္ထ ဂဏှန္တိ ကုဉ္ဇရံ။
အသီဟော သီဟမာနေန, ယော အတ္တာနံ ဝိကုဗ္ဗတိ၊
ကောတ္ထူဝ [ကုဋ္ဌူဝ (သီ။), ကုတ္ထုဝ (သျာ။ ပီ)] ဂဇမာသဇ္ဇ, သေတိ ဘူမျာ အနုတ္ထုနံ။
ယသဿိနော ဥတ္တမပုဂ္ဂလဿ, သဉ္ဇာတခန္ဓဿ မဟဗ္ဗလဿ၊
အသမေက္ခိယ ထာမဗလူပပတ္တိံ, သ သေတိ နာဂေန ဟတောယံ ဇမ္ဗုကော။
ယော စီဓ ကမ္မံ ကုရုတေ ပမာယ, ထာမဗ္ဗလံ အတ္တနိ သံဝိဒိတွာ၊
ဇပ္ပေန မန္တေန သုဘာသိတေန, ပရိက္ခဝါ သော ဝိပုလံ ဇိနာတီတိ။
ဇမ္ဗုကဇာတကံ ပဉ္စမံ။
֍ * ၃၃၆။ ဗြဟာဆတ္တဇာတကံ (၄-၄-၆)
တိဏံ တိဏန္တိ လပသိ, ကော နု တေ တိဏမာဟရိ၊
ကိံ နု တေ တိဏကိစ္စတ္ထိ, တိဏမေဝ ပဘာသသိ။
ဣဓာဂမာ ဗြဟ္မစာရီ, ဗြဟာ ဆတ္တော ဗဟုဿုတော၊
သော မေ [သော ဝေ (က။)] သဗ္ဗံ သမာဒါယ, တိဏံ နိက္ခိပ္ပ ဂစ္ဆတိ။
ဧဝေတံ ဟောတိ ကတ္တဗ္ဗံ, အပ္ပေန ဗဟုမိစ္ဆတာ၊
သဗ္ဗံ သကဿ အာဒါနံ, အနာဒါနံ တိဏဿ စ။ ( ) [(တိဏဿ စာဋီသု ဂတော, တတ္ထ ကာ ပရိဒေဝနာ) (သီ။ သျာ။) (စာဋီသု ပက္ခိပိတွာန, တတ္ထ ကာ ပရိဒေဝနာ) (က။)]
(ဇာ၊၁၊၁၁၂။)သီလဝန္တော န ကုဗ္ဗန္တိ, ဗာလော သီလာနိ ကုဗ္ဗတိ၊
အနိစ္စသီလံ ဒုဿီလျံ [ဒုဿီလံ (ပီ။)], ကိံ ပဏ္ဍိစ္စံ ကရိဿတီတိ။
ဗြဟာဆတ္တဇာတကံ ဆဋ္ဌံ။
န တေ ပီဌမဒါယိမှာ [မဒါသိမှ (ပီ။ က။)], န ပါနံ နပိ ဘောဇနံ၊
ဗြဟ္မစာရိ ခမဿု မေ, ဧတံ ပဿာမိ အစ္စယံ။
နေဝါဘိသဇ္ဇာမိ န စာပိ ကုပ္ပေ, န စာပိ မေ အပ္ပိယမာသိ ကိဉ္စိ၊
အထောပိ မေ အာသိ မနောဝိတက္ကော, ဧတာဒိသော နူန ကုလဿ ဓမ္မော။
ဧသသ္မာကံ ကုလေ ဓမ္မော, ပိတုပိတာမဟော သဒါ၊
အာသနံ ဥဒကံ ပဇ္ဇံ, သဗ္ဗေတံ နိပဒါမသေ။
ဧသသ္မာကံ ကုလေ ဓမ္မော, ပိတုပိတာမဟော သဒါ၊
သက္ကစ္စံ ဥပတိဋ္ဌာမ, ဥတ္တမံ ဝိယ ဉာတကန္တိ။
ပီဌဇာတကံ သတ္တမံ။
ဝိဒိတံ ထုသံ ဥန္ဒုရာနံ [ဥန္ဒူရာနံ (က။)], ဝိဒိတံ ပန တဏ္ဍုလံ၊
ထုသံ ထုသံ [ထုသံ ထူလံ (သီ။)] ဝိဝဇ္ဇေတွာ, တဏ္ဍုလံ ပန ခါဒရေ။
ယာ မန္တနာ အရညသ္မိံ, ယာ စ ဂါမေ နိကဏ္ဏိကာ၊
ယဉ္စေတံ ဣတိ စီတိ စ, ဧတမ္ပိ ဝိဒိတံ မယာ။
ဓမ္မေန ကိရ ဇာတဿ, ပိတာ ပုတ္တဿ မက္ကဋော၊
ဒဟရဿေဝ သန္တဿ, ဒန္တေဟိ ဖလမစ္ဆိဒါ။
ယမေတံ ပရိသပ္ပသိ [ပရိသဗ္ဗေသိ (က။)], အဇကာဏောဝ သာသပေ၊
ယောပါယံ ဟေဋ္ဌတော သေတိ [သေသိ (သီ။)], ဧတမ္ပိ ဝိဒိတံ မယာတိ။
ထုသဇာတကံ အဋ္ဌမံ။
(ဇာ၊၁၊၁၁၃။)အဒဿနေန မောရဿ, သိခိနော မဉ္ဇုဘာဏိနော၊
ကာကံ တတ္ထ အပူဇေသုံ, မံသေန စ ဖလေန စ။
ယဒါ စ သရသမ္ပန္နော, မောရော ဗာဝေရုမာဂမာ၊
အထ လာဘော စ သက္ကာရော, ဝါယသဿ အဟာယထ။
ယာဝ နုပ္ပဇ္ဇတီ ဗုဒ္ဓေါ, ဓမ္မရာဇာ ပဘင်္ကရော၊
တာဝ အညေ အပူဇေသုံ, ပုထူ သမဏဗြာဟ္မဏေ။
ယဒါ စ သရသမ္ပန္နော, ဗုဒ္ဓေါ ဓမ္မံ အဒေသယိ၊
အထ လာဘော စ သက္ကာရော, တိတ္ထိယာနံ အဟာယထာတိ။
ဗာဝေရုဇာတကံ နဝမံ။
အဒါသိ ဒါနာနိ ပုရေ ဝိသယှ, ဒဒတော စ တေ ခယဓမ္မော အဟောသိ၊
ဣတော ပရံ စေ န ဒဒေယျ ဒါနံ, တိဋ္ဌေယျုံ တေ သံယမန္တဿ ဘောဂါ။
အနရိယမရိယေန သဟဿနေတ္တ, သုဒုဂ္ဂတေနာပိ အကိစ္စမာဟု၊
မာ ဝေါ ဓနံ တံ အဟု ဒေဝရာဇ [အဟုဝါ ဇနိန္ဒ (က။ သီ။ သျာ။ ပီ။)], ယံ ဘောဂဟေတု ဝိဇဟေမု သဒ္ဓံ။
ယေန ဧကော ရထော ယာတိ, ယာတိ တေနာပရော ရထော၊
ပေါရာဏံ နိဟိတံ ဝတ္တံ, ဝတ္တတညေဝ [ဝဒ္ဓံ, ဝဒ္ဓတညေဝ (က။ သီ။ ပီ။)] ဝါသဝ။
ယဒိ ဟေဿတိ ဒဿာမ, အသန္တေ ကိံ ဒဒါမသေ၊
ဧဝံဘူတာပိ ဒဿာမ, မာ ဒါနံ ပမဒမှသေတိ။
ဝိသယှဇာတကံ ဒသမံ။
ကောကိလဝဂ္ဂေါ [ကောကာလိကဝဂ္ဂေါ (က။)] စတုတ္ထော။
(ဇာ၊၁၊၁၁၄။)တဿုဒ္ဒါနံ –
အတိဝေလပဘာသတိ ဇီတဝရော, ဝနမဇ္ဈ ရထေသဘ ဇိမှဂမော၊
အထ ဇမ္ဗု တိဏာသနပီဌဝရံ, အထ တဏ္ဍုလ မောရ ဝိသယှ ဒသာတိ။
၅။ စူဠကုဏာလဝဂ္ဂေါ
နရာနမာရာမကရာသု နာရိသု, အနေကစိတ္တာသု အနိဂ္ဂဟာသု စ၊
သဗ္ဗတ္ထ နာပီတိကရာပိ [သဗ္ဗ’တ္တနာ’ပီတိကရာပိ (သီ။ သျာ။)] စေ သိယာ [သိယုံ (သျာ။)], န ဝိဿသေ တိတ္ထသမာ ဟိ နာရိယော။
ယံ ဝေ [ယဉ္စ (သျာ။ က။)] ဒိသွာ ကဏ္ဍရီကိန္နရာနံ [ကိန္နရကိန္နရီနံ (သျာ။), ကိန္နရီကိန္နရာနံ (က။)], သဗ္ဗိတ္ထိယော န ရမန္တိ အဂါရေ၊
တံ တာဒိသံ မစ္စံ စဇိတွာ ဘရိယာ, အညံ ဒိသွာ ပုရိသံ ပီဌသပ္ပိံ။
ဗကဿ စ ဗာဝရိကဿ [ပါဝါရိကဿ (သီ။)] ရညော, အစ္စန္တကာမာနုဂတဿ ဘရိယာ၊
အဝါစရီ [အစ္စာစရိ (သျာ။), အနာစရိ (က။)] ပဋ္ဌဝသာနုဂဿ [ဗဒ္ဓဝသာနုဂဿ (သီ။ သျာ။), ပတ္တဝသာနုဂတဿ (က။)], ကံ ဝါပိ ဣတ္ထီ နာတိစရေ တဒညံ။
ပိင်္ဂိယာနီ သဗ္ဗလောကိဿရဿ, ရညော ပိယာ ဗြဟ္မဒတ္တဿ ဘရိယာ၊
အဝါစရီ ပဋ္ဌဝသာနုဂဿ, တံ ဝါပိ သာ နာဇ္ဈဂါ ကာမကာမိနီတိ။
ကဏ္ဍရီဇာတကံ [ကိန္နရီဇာတကံ (က။ သီ။ က။), ကုဏ္ဍလိကဇာတကံ (သျာ။)] ပဌမံ။
(ဇာ၊၁၊၁၁၅။)အသက္ခိံ ဝတ အတ္တာနံ, ဥဒ္ဓါတုံ ဥဒကာ ထလံ၊
န ဒါနာဟံ ပုန တုယှံ, ဝသံ ဂစ္ဆာမိ ဝါရိဇ။
အလမေတေဟိ အမ္ဗေဟိ, ဇမ္ဗူဟိ ပနသေဟိ စ၊
ယာနိ ပါရံ သမုဒ္ဒဿ, ဝရံ မယှံ ဥဒုမ္ဗရော။
ယော စ ဥပ္ပတိတံ အတ္ထံ, န ခိပ္ပမနုဗုဇ္ဈတိ၊
အမိတ္တဝသမနွေတိ, ပစ္ဆာ စ အနုတပ္ပတိ။
ယော စ ဥပ္ပတိတံ အတ္ထံ, ခိပ္ပမေဝ နိဗောဓတိ၊
မုစ္စတေ သတ္တုသမ္ဗာဓာ, န စ ပစ္ဆာနုတပ္ပတီတိ။
ဝါနရဇာတကံ ဒုတိယံ။
֍ * ၃၄၃။ ကုန္တိနီဇာတကံ (၄-၅-၃)
အဝသိမှ တဝါဂါရေ, နိစ္စံ သက္ကတပူဇိတာ၊
တွမေဝ ဒါနိမကရိ, ဟန္ဒ ရာဇ ဝဇာမဟံ။
ယော ဝေ ကတေ ပဋိကတေ, ကိဗ္ဗိသေ ပဋိကိဗ္ဗိသေ၊
ဧဝံ တံ သမ္မတီ ဝေရံ, ဝသ ကုန္တိနိ မာဂမာ။
န ကတဿ စ ကတ္တာ စ, မေတ္တိ [မေတ္တီ (ပီ။), မိတ္တီ (က။)] သန္ဓီယတေ ပုန၊
ဟဒယံ နာနုဇာနာတိ, ဂစ္ဆညေဝ ရထေသဘ။
ကတဿ စေဝ ကတ္တာ စ, မေတ္တိ သန္ဓီယတေ ပုန၊
ဓီရာနံ နော စ ဗာလာနံ, ဝသ ကုန္တိနိ မာဂမာတိ။
ကုန္တိနီဇာတကံ တတိယံ။
ယော နီလိယံ မဏ္ဍယတိ, သဏ္ဍာသေန ဝိဟညတိ၊
တဿ သာ ဝသမနွေတု, ယာ တေ အမ္ဗေ အဝါဟရိ။
ဝီသံ ဝါ ပဉ္စဝီသံ [ပဏ္ဏုဝီသံ (က။ သီ။ ပီ။)] ဝါ, ဦနတိံသံ ဝ ဇာတိယာ၊
တာဒိသာ ပတိ မာ လဒ္ဓါ [ပတိံ မာ လဒ္ဓါ (ပီ။), ပတိ မာ’လတ္ထ (?)], ယာ တေ အမ္ဗေ အဝါဟရိ။
(ဇာ၊၁၊၁၁၆။)ဒီဃံ ဂစ္ဆတု အဒ္ဓါနံ, ဧကိကာ အဘိသာရိကာ၊
သင်္ကေတေ ပတိ မာ အဒ္ဒ [မာ အဒ္ဒသ (သီ။ ပီ။)], ယာ တေ အမ္ဗေ အဝါဟရိ။
အလင်္ကတာ သုဝသနာ, မာလိနီ စန္ဒနုဿဒါ၊
ဧကိကာ သယနေ သေတု, ယာ တေ အမ္ဗေ အဝါဟရီတိ။
အမ္ဗဇာတကံ [အမ္ဗစောရဇာတကံ (က။ သီ။ ပီ။)] စတုတ္ထံ။
ဝနံ ယဒဂ္ဂိ ဒဟတိ, ပါဝကော ကဏှဝတ္တနီ၊
ကထံ ကရောသိ ပစလက, ဧဝံ ဒန္ဓပရက္ကမော။
ဗဟူနိ ရုက္ခဆိဒ္ဒါနိ, ပထဗျာ ဝိဝရာနိ စ၊
တာနိ စေ နာဘိသမ္ဘောမ, ဟောတိ နော ကာလပရိယာယော။
ယော ဒန္ဓကာလေ တရတိ, တရဏီယေ စ ဒန္ဓတိ၊
သုက္ခပဏ္ဏံဝ အက္ကမ္မ, အတ္ထံ ဘဉ္ဇတိ အတ္တနော။
ယော ဒန္ဓကာလေ ဒန္ဓေတိ, တရဏီယေ စ တာရယိ၊
သသီဝ ရတ္တိံ ဝိဘဇံ, တဿတ္ထော ပရိပူရတီတိ။
ဂဇကုမ္ဘဇာတကံ ပဉ္စမံ။
မနုဿိန္ဒံ ဇဟိတွာန, သဗ္ဗကာမသမိဒ္ဓိနံ၊
ကထံ နု ဘဂဝါ ကေသီ, ကပ္ပဿ ရမတိ အဿမေ [ရမတဿမေ (က။)]။
သာဒူနီ [သာဓူနိ (က။ သီ။ သျာ။ က။)] ရမဏီယာနိ, သန္တိ ဝက္ခာ မနောရမာ၊
သုဘာသိတာနိ ကပ္ပဿ, နာရဒ ရမယန္တိ မံ။
သာလီနံ ဩဒနံ ဘုဉ္ဇေ, သုစိံ မံသူပသေစနံ၊
ကထံ သာမာကနီဝါရံ, အလောဏံ ဆာဒယန္တိ တံ။
သာဒုံ ဝါ [အသာဒုံ (ပီ။)] ယဒိ ဝါသာဒုံ, အပ္ပံ ဝါ ယဒိ ဝါ ဗဟုံ၊
ဝိဿတ္ထော ယတ္ထ ဘုဉ္ဇေယျ, ဝိဿာသပရမာ ရသာတိ။
ကေသဝဇာတကံ [ကေသီဇာတကံ (က။)] ဆဋ္ဌံ။
(ဇာ၊၁၊၁၁၇။)သဗ္ဗာယသံ ကူဋမတိပ္ပမာဏံ, ပဂ္ဂယှ ယော [သော (ပီ။)] တိဋ္ဌသိ အန္တလိက္ခေ၊
ရက္ခာယ မေ [မံ (သီ။)] တွံ ဝိဟိတော နုသဇ္ဇ, ဥဒါဟု မေ စေတယသေ [ဝါယမသေ (သီ။ သျာ။)] ဝဓာယ။
ဒူတော အဟံ ရာဇိဓ ရက္ခသာနံ, ဝဓာယ တုယှံ ပဟိတောဟမသ္မိ၊
ဣန္ဒော စ တံ ရက္ခတိ ဒေဝရာဇာ, တေနုတ္တမင်္ဂံ န တေ [န ဟိ (က။ သီ။ ပီ။), တေ န (က။)] ဖာလယာမိ။
သစေ စ မံ ရက္ခတိ ဒေဝရာဇာ, ဒေဝါနမိန္ဒော မဃဝါ သုဇမ္ပတိ၊
ကာမံ ပိသာစာ ဝိနဒန္တု သဗ္ဗေ, န သန္တသေ ရက္ခသိယာ ပဇာယ။
ကာမံ ကန္ဒန္တု [ကန္တန္တု (က။), ကဏ္ဍန္တု (သျာ။)] ကုမ္ဘဏ္ဍာ, သဗ္ဗေ ပံသုပိသာစကာ၊
နာလံ ပိသာစာ ယုဒ္ဓါယ, မဟတီ သာ ဝိဘိံသိကာတိ [ဝိဘေသိကာတိ (သျာ။), ဝိဟေသိကာတိ (ပီ။)]။
အယကူဋဇာတကံ သတ္တမံ။
အရညာ ဂါမမာဂမ္မ, ကိံသီလံ ကိံဝတံ အဟံ၊
ပုရိသံ တာတ သေဝေယျံ, တံ မေ အက္ခာဟိ ပုစ္ဆိတော။
ယော တံ ဝိဿာသယေ တာတ, ဝိဿာသဉ္စ ခမေယျ တေ၊
သုဿူသီ စ တိတိက္ခီ စ, တံ ဘဇေဟိ ဣတော [တံ ဘဇေယျာသိတော (က။)] ဂတော။
ယဿ ကာယေန ဝါစာယ, မနသာ နတ္ထိ ဒုက္ကဋံ၊
ဥရသီဝ ပတိဋ္ဌာယ, တံ ဘဇေဟိ ဣတော ဂတော။
(ဇာ၊၁၊၁၁၈။)ဟလိဒ္ဒိရာဂံ ကပိစိတ္တံ, ပုရိသံ ရာဂဝိရာဂိနံ၊
တာဒိသံ တာတ မာ သေဝိ, နိမ္မနုဿမ္ပိ စေ သိယာတိ။
အရညဇာတကံ အဋ္ဌမံ။
֍ * ၃၄၉။ သန္ဓိဘေဒဇာတကံ (၄-၅-၉)
နေဝ ဣတ္ထီသု သာမညံ, နာပိ ဘက္ခေသု သာရထိ၊
အထဿ သန္ဓိဘေဒဿ, ပဿ ယာဝ သုစိန္တိတံ။
အသိ တိက္ခောဝ မံသမှိ, ပေသုညံ ပရိဝတ္တတိ၊
ယတ္ထူသဘဉ္စ သီဟဉ္စ, ဘက္ခယန္တိ မိဂါဓမာ။
ဣမံ သော သယနံ သေတိ, ယမိမံ [ယယိမံ (သီ။ ပီ။), ယိမံ (က။)] ပဿသိ သာရထိ၊
ယော ဝါစံ သန္ဓိဘေဒဿ, ပိသုဏဿ နိဗောဓတိ။
တေ ဇနာ သုခမေဓန္တိ, နရာ သဂ္ဂဂတာရိဝ၊
ယေ ဝါစံ သန္ဓိဘေဒဿ, နာဝဗောဓန္တိ သာရထီတိ။
သန္ဓိဘေဒဇာတကံ နဝမံ။
֍ * ၃၅၀။ ဒေဝတာပဉှဇာတကံ (၄-၅-၁၀)
ဟန္တိ ဟတ္ထေဟိ ပါဒေဟိ, မုခဉ္စ ပရိသုမ္ဘတိ၊
သ ဝေ ရာဇ ပိယော ဟောတိ, ကံ တေန တွာဘိပဿသိ [မဘိပဿသိ (သီ။)]။
အက္ကောသတိ ယထာကာမံ, အာဂမဉ္စဿ ဣစ္ဆတိ၊
သ ဝေ ရာဇ ပိယော ဟောတိ, ကံ တေန တွာဘိပဿသိ။
အဗ္ဘက္ခာတိ အဘူတေန, အလိကေနာဘိသာရယေ၊
သ ဝေ ရာဇ ပိယော ဟောတိ, ကံ တေန တွာဘိပဿသိ။
ဟရံ အန္နဉ္စ ပါနဉ္စ, ဝတ္ထသေနာသနာနိ စ၊
အညဒတ္ထုဟရာ သန္တာ, တေ ဝေ ရာဇ ပိယာ ဟောန္တိ၊
ကံ တေန တွာဘိပဿသီတိ။
ဒေဝတာပဉှဇာတကံ ဒသမံ။
စူဠကုဏာလဝဂ္ဂေါ ပဉ္စမော။
(ဇာ၊၁၊၁၁၉။)တဿုဒ္ဒါနံ –
နရာနံ အသက္ခိဝသိမှဝရော, နီလိယမဂ္ဂိဝရဉ္စ ပုန၊
ပုန ရသာယသကူဋဝရော, တထာရည သာရထိ ဟန္တိ ဒသာတိ။
အထ ဝဂ္ဂုဒ္ဒါနံ –
ကာလိင်္ဂံ [ဝိဝရံ (ဗဟူသု)] ပုစိမန္ဒဉ္စ, ကုဋိဒူသက ကောကိလာ [ကုဋိဒူသံ ဗဟုဘာဏကံ (ဗဟူသု)]၊
စူဠကုဏာလဝဂ္ဂေါ သော, ပဉ္စမော သုပ္ပကာသိတောတိ။
စတုက္ကနိပါတံ နိဋ္ဌိတံ။
(ဇာ၊၁၊၁၂၀။)၅။ ပဉ္စကနိပါတော
၁။ မဏိကုဏ္ဍလဝဂ္ဂေါ
֍ * ၃၅၁။ မဏိကုဏ္ဍလဇာတကံ (၅-၁-၁)
ဇီနော ရထဿံ မဏိကုဏ္ဍလေ စ, ပုတ္တေ စ ဒါရေ စ တထေဝ ဇီနော၊
သဗ္ဗေသု ဘောဂေသု အသေသကေသု [အသေသိတေသု (သီ။ ပီ။), အသေသိကေသု (က။)], ကသ္မာ န သန္တပ္ပသိ သောကကာလေ။
ပုဗ္ဗေဝ မစ္စံ ဝိဇဟန္တိ ဘောဂါ, မစ္စော ဝါ တေ [စ နေ (ပီ။), ဓနေ (က။)] ပုဗ္ဗတရံ ဇဟာတိ၊
အသဿတာ ဘောဂိနော ကာမကာမိ, တသ္မာ န သောစာမဟံ သောကကာလေ။
ဥဒေတိ အာပူရတိ ဝေတိ [ပူရေတိ ခီယတိ (သျာ။)] စန္ဒော, အတ္ထံ တပေတွာန [အန္ဓံ တပေတွာန (က။), အတ္ထင်္ဂမေတွာန (သျာ။), ဧတ္ထ ‘‘တပေတွာန အတ္ထံ ပလေတီ’’တိ သမ္ဗန္ဓော] ပလေတိ သူရိယော၊
ဝိဒိတာ [ဝိဇိတာ (သျာ။)] မယာ သတ္တုက လောကဓမ္မာ, တသ္မာ န သောစာမဟံ သောကကာလေ။
အလသော ဂိဟီ ကာမဘောဂီ န သာဓု, အသညတော ပဗ္ဗဇိတော န သာဓု၊
ရာဇာ န သာဓု အနိသမ္မကာရီ, ယော ပဏ္ဍိတော ကောဓနော တံ န သာဓု။
နိသမ္မ ခတ္တိယော ကယိရာ, နာနိသမ္မ ဒိသမ္ပတိ၊
နိသမ္မကာရိနော ရာဇ [ရညော (သီ။ သျာ။)], ယသော ကိတ္တိ စ ဝဍ္ဎတီတိ။
မဏိကုဏ္ဍလဇာတကံ ပဌမံ။
(ဇာ၊၁၊၁၂၁။)ကိံ နု သန္တရမာနောဝ, လာယိတွာ ဟရိတံ တိဏံ၊
ခါဒ ခါဒါတိ လပသိ, ဂတသတ္တံ ဇရဂ္ဂဝံ။
န ဟိ အန္နေန ပါနေန, မတော ဂေါဏော သမုဋ္ဌဟေ၊
တွဉ္စ တုစ္ဆံ ဝိလပသိ, ယထာ တံ ဒုမ္မတီ တထာ။
တထေဝ တိဋ္ဌတိ သီသံ, ဟတ္ထပါဒါ စ ဝါလဓိ၊
သောတာ တထေဝ တိဋ္ဌန္တိ [သော တာတ တထေဝ တိဋ္ဌတိ (က။)], မညေ ဂေါဏော သမုဋ္ဌဟေ။
နေဝယျကဿ သီသဉ္စ [သီသံ ဝါ (သီ။ သျာ။ ပီ။)], ဟတ္ထပါဒါ စ ဒိဿရေ၊
ရုဒံ မတ္တိကထူပသ္မိံ, နနု တွညေဝ ဒုမ္မတိ။
အာဒိတ္တံ ဝတ မံ သန္တံ, ဃတသိတ္တံဝ ပါဝကံ၊
ဝါရိနာ ဝိယ ဩသိဉ္စံ [ဩသိဉ္စိ (က။)], သဗ္ဗံ နိဗ္ဗာပယေ ဒရံ။
အဗ္ဗဟီ [အဗ္ဗူဠှံ (သီ။ သျာ။), အဗ္ဘူဠှံ (က။)] ဝတ မေ သလ္လံ, ယမာသိ ဟဒယဿိတံ [သောကံ ဟဒယနိဿိတံ (သီ။ သျာ။)]၊
ယော မေ သောကပရေတဿ, ပိတု သောကံ အပါနုဒိ။
သောဟံ အဗ္ဗူဠှသလ္လောသ္မိ, ဝီတသောကော အနာဝိလော၊
န သောစာမိ န ရောဒါမိ, တဝ သုတွာန မာဏဝ။
ဧဝံ ကရောန္တိ သပ္ပညာ, ယေ ဟောန္တိ အနုကမ္ပကာ၊
ဝိနိဝတ္တေန္တိ သောကမှာ, သုဇာတော ပိတရံ ယထာတိ။
သုဇာတဇာတကံ ဒုတိယံ။
နယိဒံ နိစ္စံ ဘဝိတဗ္ဗံ ဗြဟ္မဒတ္တ, ခေမံ သုဘိက္ခံ သုခတာ စ ကာယေ၊
အတ္ထစ္စယေ မာ အဟု သမ္ပမူဠှော, ဘိန္နပ္လဝေါ သာဂရဿေဝ မဇ္ဈေ။
(ဇာ၊၁၊၁၂၂။)ယာနိ ကရောတိ ပုရိသော, တာနိ အတ္တနိ ပဿတိ၊
ကလျာဏကာရီ ကလျာဏံ, ပါပကာရီ စ ပါပကံ၊
ယာဒိသံ ဝပတေ ဗီဇံ, တာဒိသံ ဟရတေ ဖလံ။
ဣဒံ တဒါစရိယဝစော, ပါရာသရိယော ယဒဗြဝိ၊
မာ သု [မာ ဿု (သီ။ သျာ။ ပီ။)] တွံ အကရိ ပါပံ, ယံ တွံ ပစ္ဆာ ကတံ တပေ။
အယမေဝ သော ပိင်္ဂိယ [သော ပိင်္ဂိယော (သျာ။), သောပိ ဘိယျော (က။)] ဝေနသာခေါ, [ဓောနသာခေါ (က။ သီ။ ပီ။)] ယမှိ ဃာတယိံ ခတ္တိယာနံ သဟဿံ၊
အလင်္ကတေ စန္ဒနသာရာနုလိတ္တေ, တမေဝ ဒုက္ခံ ပစ္စာဂတံ မမံ။
သာမာ စ [သာမာပိ (သီ။ သျာ။)] ခေါ စန္ဒနလိတ္တဂတ္တာ [ဂတ္တီ (က။ သီ။ သျာ။ ပီ။)], လဋ္ဌီဝ သောဘဉ္ဇနကဿ ဥဂ္ဂတာ၊
အဒိသွာ [အဒိသွာဝ (သီ။)] ကာလံ ကရိဿာမိ ဥဗ္ဗရိံ, တံ မေ ဣတော ဒုက္ခတရံ ဘဝိဿတီတိ။
ဝေနသာခဇာတကံ [ဓောနသာခဇာတကံ (က။ သီ။ ပီ။)] တတိယံ။
ဥရဂေါဝ တစံ ဇိဏ္ဏံ, ဟိတွာ ဂစ္ဆတိ သံ တနုံ၊
ဧဝံ သရီရေ နိဗ္ဘောဂေ, ပေတေ ကာလင်္ကတေ သတိ။
ဍယှမာနော န ဇာနာတိ, ဉာတီနံ ပရိဒေဝိတံ၊
တသ္မာ ဧတံ န သောစာမိ, ဂတော သော တဿ ယာ ဂတိ။
အနဝှိတော တတော အာဂါ, အနနုညာတော [နာနုညာတော (က။)] ဣတော ဂတော၊
ယထာဂတော တထာ ဂတော, တတ္ထ ကာ ပရိဒေဝနာ။
ဍယှမာနော န ဇာနာတိ, ဉာတီနံ ပရိဒေဝိတံ၊
တသ္မာ ဧတံ န သောစာမိ, ဂတော သော တဿ ယာ ဂတိ။
သစေ ရောဒေ ကိသာ [ကိသီ (ပီ။)] အဿံ, တဿာ မေ ကိံ ဖလံ သိယာ၊
ဉာတိမိတ္တသုဟဇ္ဇာနံ, ဘိယျော နော အရတီ သိယာ။
(ဇာ၊၁၊၁၂၃။)ဍယှမာနော န ဇာနာတိ, ဉာတီနံ ပရိဒေဝိတံ၊
တသ္မာ ဧတံ န သောစာမိ, ဂတော သော တဿ ယာ ဂတိ။
ယထာပိ ဒါရကော စန္ဒံ, ဂစ္ဆန္တမနုရောဒတိ၊
ဧဝံ သမ္ပဒမေဝေတံ, ယော ပေတမနုသောစတိ။
ဍယှမာနော န ဇာနာတိ, ဉာတီနံ ပရိဒေဝိတံ၊
တသ္မာ ဧတံ န သောစာမိ, ဂတော သော တဿ ယာ ဂတိ။
ယထာပိ ဥဒကကုမ္ဘော, ဘိန္နော အပ္ပဋိသန္ဓိယော၊
ဧဝံ သမ္ပဒမေဝေတံ, ယော ပေတမနုသောစတိ။
ဍယှမာနော န ဇာနာတိ, ဉာတီနံ ပရိဒေဝိတံ၊
တသ္မာ ဧတံ န သောစာမိ, ဂတော သော တဿ ယာ ဂတီတိ။
ဥရဂဇာတကံ စတုတ္ထံ။
အညေ သောစန္တိ ရောဒန္တိ, အညေ အဿုမုခါ ဇနာ၊
ပသန္နမုခဝဏ္ဏောသိ, ကသ္မာ ဃဋ [ဃတ (သီ။ ပီ။)] န သောစသိ။
နာဗ္ဘတီတဟရော သောကော, နာနာဂတသုခါဝဟော၊
တသ္မာ ဓင်္က [ဝံက (ပီ။)] န သောစာမိ, နတ္ထိ သောကေ ဒုတီယတာ [သောကော ဒုတီယကာ (က။)]။
သောစံ ပဏ္ဍု ကိသော ဟောတိ, ဘတ္တဉ္စဿ န ရုစ္စတိ၊
အမိတ္တာ သုမနာ ဟောန္တိ, သလ္လဝိဒ္ဓဿ ရုပ္ပတော။
ဂါမေ ဝါ ယဒိ ဝါရညေ, နိန္နေ ဝါ ယဒိ ဝါ ထလေ၊
ဌိတံ မံ နာဂမိဿတိ, ဧဝံ ဒိဋ္ဌပဒေါ အဟံ။
ယဿတ္တာ နာလမေကောဝ, သဗ္ဗကာမရသာဟရော၊
သဗ္ဗာပိ ပထဝီ တဿ, န သုခံ အာဝဟိဿတီတိ။
ဃဋဇာတကံ ပဉ္စမံ။
(ဇာ၊၁၊၁၂၄။)֍ * ၃၅၆။ ကောရဏ္ဍိယဇာတကံ (၅-၁-၆)
ဧကော အရညေ ဂိရိကန္ဒရာယံ, ပဂ္ဂယှ ပဂ္ဂယှ သိလံ ပဝေစ္ဆသိ [ပဝေဇ္ဈသိ (သျာ။ သီ။ အဋ္ဌ။)]၊
ပုနပ္ပုနံ သန္တရမာနရူပေါ, ကောရဏ္ဍိယ [ကာရဏ္ဍိယ (သီ။ သျာ။ ပီ။)] ကော နု တဝ ယိဓတ္ထော။
အဟဉှိမံ သာဂရ သေဝိတန္တံ, သမံ ကရိဿာမိ ယထာပိ ပါဏိ၊
ဝိကိရိယ သာနူနိ စ ပဗ္ဗတာနိ စ, တသ္မာ သိလံ ဒရိယာ ပက္ခိပါမိ။
နယိမံ မဟိံ အရဟတိ ပါဏိကပ္ပံ, သမံ မနုဿော ကရဏာယ မေကော၊
မညာမိမညေဝ ဒရိံ ဇိဂီသံ [ဇိဂိံသံ (သီ။ သျာ။ ပီ။)], ကောရဏ္ဍိယ ဟာဟသိ [ဟာယသိ (သျာ။ က။)] ဇီဝလောကံ။
သစေ အဟံ [အယံ (သီ။ သျာ။ ပီ။)] ဘူတဓရံ န သက္ကာ [သက္ကော (သျာ။ က။)], သမံ မနုဿော ကရဏာယ မေကော၊
ဧဝမေဝ တွံ ဗြဟ္မေ ဣမေ မနုဿေ, နာနာဒိဋ္ဌိကေ နာနယိဿသိ တေ [နေ (က။)]။
သင်္ခိတ္တရူပေန ဘဝံ မမတ္ထံ, အက္ခာသိ ကောရဏ္ဍိယ ဧဝမေတံ၊
ယထာ န သက္ကာ ပထဝီ သမာယံ, ကတ္တုံ မနုဿေန တထာ မနုဿာတိ။
ကောရဏ္ဍိယဇာတကံ ဆဋ္ဌံ။
ဝန္ဒာမိ တံ ကုဉ္ဇရ သဋ္ဌိဟာယနံ, အာရညကံ ယူထပတိံ ယသဿိံ၊
ပက္ခေဟိ တံ ပဉ္ဇလိကံ ကရောမိ, မာ မေ ဝဓီ ပုတ္တကေ ဒုဗ္ဗလာယ။
(ဇာ၊၁၊၁၂၅။)ဝန္ဒာမိ တံ ကုဉ္ဇရ ဧကစာရိံ, အာရညကံ ပဗ္ဗတသာနုဂေါစရံ၊
ပက္ခေဟိ တံ ပဉ္ဇလိကံ ကရောမိ, မာ မေ ဝဓီ ပုတ္တကေ ဒုဗ္ဗလာယ၊
ဝမိဿာမိ တေ လဋုကိကေ ပုတ္တကာနိ, ကိံ မေ တုဝံ ကာဟသိ ဒုဗ္ဗလာသိ၊
သတံ သဟဿာနိပိ တာဒိသီနံ, ဝါမေန ပါဒေန ပပေါထယေယျံ။
န ဟေဝ သဗ္ဗတ္ထ ဗလေန ကိစ္စံ, ဗလဉှိ ဗာလဿ ဝဓာယ ဟောတိ၊
ကရိဿာမိ တေ နာဂရာဇာ အနတ္ထံ, ယော မေ ဝဓီ ပုတ္တကေ ဒုဗ္ဗလာယ။
ကာကဉ္စ ပဿ လဋုကိကံ, မဏ္ဍူကံ နီလမက္ခိကံ၊
ဧတေ နာဂံ အဃာတေသုံ, ပဿ ဝေရဿ ဝေရိနံ၊
တသ္မာ ဟိ ဝေရံ န ကယိရာထ, အပ္ပိယေနပိ ကေနစီတိ။
လဋုကိကဇာတကံ သတ္တမံ။
֍ * ၃၅၈။ စူဠဓမ္မပါလဇာတကံ (၅-၁-၈)
အဟမေဝ ဒူသိယာ ဘူနဟတာ, ရညော မဟာပတာပဿ၊
ဧတံ မုဉ္စတု ဓမ္မပါလံ, ဟတ္ထေ မေ ဒေဝ ဆေဒေဟိ။
အဟမေဝ ဒူသိယာ ဘူနဟတာ, ရညော မဟာပတာပဿ၊
ဧတံ မုဉ္စတု ဓမ္မပါလံ, ပါဒေ မေ ဒေဝ ဆေဒေဟိ။
အဟမေဝ ဒူသိယာ ဘူနဟတာ, ရညော မဟာပတာပဿ၊
ဧတံ မုဉ္စတု ဓမ္မပါလံ, သီသံ မေ ဒေဝ ဆေဒေဟိ။
န ဟိ [နဟ (သီ။ သျာ။ ပီ။) ဧတ္ထ ဟ-ကာရော ခေဒေ] နူနိမဿ ရညော, မိတ္တာမစ္စာ စ ဝိဇ္ဇရေ သုဟဒါ၊
ယေ န ဝဒန္တိ ရာဇာနံ, မာ ဃာတယိ ဩရသံ ပုတ္တံ။
န ဟိ [နဟ (သီ။ သျာ။ ပီ။) ဧတ္ထ ဟ-ကာရော ခေဒေ] နူနိမဿ ရညော, ဉာတီ မိတ္တာ စ ဝိဇ္ဇရေ သုဟဒါ၊
ယေ န ဝဒန္တိ ရာဇာနံ, မာ ဃာတယိ အတြဇံ ပုတ္တံ။
(ဇာ၊၁၊၁၂၆။)စန္ဒနသာရာနုလိတ္တာ, ဗာဟာ ဆိဇ္ဇန္တိ ဓမ္မပါလဿ၊
ဒါယာဒဿ ပထဗျာ, ပါဏာ မေ ဒေဝ ရုဇ္ဈန္တီတိ။
စူဠဓမ္မပါလဇာတကံ အဋ္ဌမံ။
֍ * ၃၅၉။ သုဝဏ္ဏမိဂဇာတကံ (၅-၁-၉)
ဝိက္ကမ ရေ ဟရိပါဒ [မဟာမိဂ (သီ။ သျာ။ ပီ။)], ဝိက္ကမ ရေ မဟာမိဂ [ဟရီပဒ (သီ။ သျာ။ ပီ။)]၊
ဆိန္ဒ ဝါရတ္တိကံ ပါသံ, နာဟံ ဧကာ ဝနေ ရမေ။
ဝိက္ကမာမိ န ပါရေမိ, ဘူမိံ သုမ္ဘာမိ ဝေဂသာ၊
ဒဠှော ဝါရတ္တိကော ပါသော, ပါဒံ မေ ပရိကန္တတိ။
အတ္ထရဿု ပလာသာနိ, အသိံ နိဗ္ဗာဟ လုဒ္ဒက၊
ပဌမံ မံ ဝဓိတွာန, ဟန ပစ္ဆာ မဟာမိဂံ။
န မေ သုတံ ဝါ ဒိဋ္ဌံ ဝါ, ဘာသန္တိံ မာနုသိံ မိဂိံ [န မေ သုတာ ဝါ ဒိဋ္ဌာ ဝါ, ဘာသန္တီ မာနုသိံ မိဂီ (ဋီကာ)]၊
တွဉ္စ ဘဒ္ဒေ သုခီ ဟောဟိ, ဧသော စာပိ မဟာမိဂေါ။
ဧဝံ လုဒ္ဒက နန္ဒဿု, သဟ သဗ္ဗေဟိ ဉာတိဘိ၊
ယထာဟမဇ္ဇ နန္ဒာမိ, မုတ္တံ ဒိသွာ မဟာမိဂန္တိ။
သုဝဏ္ဏမိဂဇာတကံ နဝမံ။
֍ * ၃၆၀။ သုယောနန္ဒီဇာတကံ (၅-၁-၁၀)
ဝါတိ ဂန္ဓော တိမိရာနံ, ကုသမုဒ္ဒေါ စ [ဝ (သျာ။ ပီ။)] ဃောသဝါ၊
ဒူရေ ဣတော သုယောနန္ဒီ [ဣတော ဟိ သုသန္ဒီ (သီ။ သျာ။), ဣတောပိ သုဿောန္ဒီ (ပီ။)], တမ္ဗကာမာ တုဒန္တိ မံ။
ကထံ သမုဒ္ဒမတရိ, ကထံ အဒ္ဒက္ခိ သေဒုမံ [သေရုမံ (သီ။ သျာ။ ပီ။)]၊
ကထံ တဿာ စ တုယှဉ္စ, အဟု သဂ္ဂ [အဂ္ဂ (သီ။ သျာ။)] သမာဂမော။
ကုရုကစ္ဆာ [ဘရုကစ္ဆာ (သီ။ သျာ။ ပီ။)] ပယာတာနံ, ဝါဏိဇာနံ ဓနေသိနံ၊
မကရေဟိ အဘိဒါ [မကရေဟိဗ္ဘိဒါ (သီ။), မကရေဟိ’ဘိဒါ (သျာ။), မကရေဟိ ဘိန္နာ (ပီ။)] နာဝါ, ဖလကေနာဟမပ္လဝိံ။
(ဇာ၊၁၊၁၂၇။)သာ မံ သဏှေန မုဒုနာ, နိစ္စံ စန္ဒနဂန္ဓိနီ၊
အင်္ဂေန [အင်္ကေန (ပီ။ က။)] ဥဒ္ဓရီ ဘဒ္ဒါ, မာတာ ပုတ္တံဝ ဩရသံ။
သာ မံ အန္နေန ပါနေန, ဝတ္ထေန သယနေန စ၊
အတ္တနာပိ စ မန္ဒက္ခီ, ဧဝံ တမ္ဗ ဝိဇာနာဟီတိ။
သုယောနန္ဒီဇာတကံ ဒသမံ။
မဏိကုဏ္ဍလဝဂ္ဂေါ ပဌမော။
တဿုဒ္ဒါနံ –
အထ ဇိနဝရော ဟရိတံ တိဏကော, အထ ဘိန္နပ္လဝေါ ဥရဂေါဝ ဃဋော၊
ဒရိယာ ပုန ကုဉ္ဇရ ဘူနဟတာ, မိဂမုတ္တမသဂ္ဂဝရေန ဒသာတိ။
၂။ ဝဏ္ဏာရောဟဝဂ္ဂေါ
֍ * ၃၆၁။ ဝဏ္ဏာရောဟဇာတကံ (၅-၂-၁)
ဝဏ္ဏာရောဟေန ဇာတိယာ, ဗလနိက္ကမနေန စ၊
သုဗာဟု န မယာ သေယျော, သုဒါဌ ဣတိ ဘာသသိ။
ဝဏ္ဏာရောဟေန ဇာတိယာ, ဗလနိက္ကမနေန စ၊
သုဒါဌော န မယာ သေယျော, သုဗာဟု ဣတိ ဘာသသိ။
ဧဝံ စေ မံ ဝိဟရန္တံ, သုဗာဟု သမ္မ ဒုဗ္ဘသိ၊
န ဒါနာဟံ တယာ သဒ္ဓိံ, သံဝါသမဘိရောစယေ။
ယော ပရေသံ ဝစနာနိ, သဒ္ဒဟေယျ [သဒ္ဒဟေထ (သီ။ သျာ။ ပီ။)] ယထာတထံ၊
ခိပ္ပံ ဘိဇ္ဇေထ မိတ္တသ္မိံ, ဝေရဉ္စ ပသဝေ ဗဟုံ။
(ဇာ၊၁၊၁၂၈။)န သော မိတ္တော ယော သဒါ အပ္ပမတ္တော, ဘေဒါသင်္ကီ ရန္ဓမေဝါနုပဿီ၊
ယသ္မိဉ္စ သေတီ ဥရသီဝ ပုတ္တော, သ ဝေ မိတ္တော ယော အဘေဇ္ဇော ပရေဟီတိ။
ဝဏ္ဏာရောဟဇာတကံ ပဌမံ။
֍ * ၃၆၂။ သီလဝီမံသဇာတကံ (၅-၂-၂)
သီလံ သေယျော သုတံ သေယျော, ဣတိ မေ သံသယော အဟု၊
သီလမေဝ သုတာ သေယျော, ဣတိ မေ နတ္ထိ သံသယော။
မောဃာ ဇာတိ စ ဝဏ္ဏော စ, သီလမေဝ ကိရုတ္တမံ၊
သီလေန အနုပေတဿ, သုတေနတ္ထော န ဝိဇ္ဇတိ။
ခတ္တိယော စ အဓမ္မဋ္ဌော, ဝေဿော စာဓမ္မနိဿိတော၊
တေ ပရိစ္စဇ္ဇုဘော လောကေ, ဥပပဇ္ဇန္တိ ဒုဂ္ဂတိံ။
ခတ္တိယာ ဗြာဟ္မဏာ ဝေဿာ, သုဒ္ဒါ စဏ္ဍာလပုက္ကုသာ၊
ဣဓ ဓမ္မံ စရိတွာန, ဘဝန္တိ တိဒိဝေ သမာ။
န ဝေဒါ သမ္ပရာယာယ, န ဇာတိ နာပိ [နောပိ (ပီ။)] ဗန္ဓဝါ၊
သကဉ္စ သီလံ သံသုဒ္ဓံ, သမ္ပရာယာယ သုခါယ စာတိ [သုခါဝဟန္တိ (သီ။ သျာ။)]။
သီလဝီမံသဇာတကံ ဒုတိယံ။
ဟိရိံ တရန္တံ ဝိဇိဂုစ္ဆမာနံ, တဝါဟမသ္မီ ဣတိ ဘာသမာနံ၊
သေယျာနိ ကမ္မာနိ အနာဒိယန္တံ, နေသော မမန္တိ ဣတိ နံ ဝိဇညာ။
ယဉှိ ကယိရာ တဉှိ ဝဒေ, ယံ န ကယိရာ န တံ ဝဒေ၊
အကရောန္တံ ဘာသမာနံ, ပရိဇာနန္တိ ပဏ္ဍိတာ။
(ဇာ၊၁၊၁၂၉။)န သော မိတ္တော ယော သဒါ အပ္ပမတ္တော, ဘေဒါသင်္ကီ ရန္ဓမေဝါနုပဿီ၊
ယသ္မိဉ္စ သေတီ ဥရသီဝ ပုတ္တော, သ ဝေ မိတ္တော ယော အဘေဇ္ဇော ပရေဟိ။
ပါမောဇ္ဇကရဏံ ဌာနံ, ပသံသာဝဟနံ သုခံ၊
ဖလာနိသံသော ဘာဝေတိ, ဝဟန္တော ပေါရိသံ ဓုရံ။
နိဒ္ဒရော ဟောတိ နိပ္ပါပေါ, ဓမ္မပ္ပီတိရသံ ပိဝန္တိ။
ဟိရိဇာတကံ တတိယံ။
֍ * ၃၆၄။ ခဇ္ဇောပနကဇာတကံ (၅-၂-၄)
ကော နု သန္တမှိ ပဇ္ဇောတေ, အဂ္ဂိပရိယေသနံ စရံ၊
အဒ္ဒက္ခိ ရတ္တိ [ရတ္တိံ (သျာ။)] ခဇ္ဇောတံ, ဇာတဝေဒံ အမညထ။
သွဿ ဂေါမယစုဏ္ဏာနိ, အဘိမတ္ထံ တိဏာနိ စ၊
ဝိပရီတာယ သညာယ, နာသက္ခိ ပဇ္ဇလေတဝေ။
ဧဝမ္ပိ အနုပါယေန, အတ္ထံ န လဘတေ မိဂေါ [မူဂေါ (သျာ။)]၊
ဝိသာဏတော ဂဝံ ဒေါဟံ, ယတ္ထ ခီရံ န ဝိန္ဒတိ။
ဝိဝိဓေဟိ ဥပါယေဟိ, အတ္ထံ ပပ္ပေါန္တိ မာဏဝါ၊
နိဂ္ဂဟေန အမိတ္တာနံ, မိတ္တာနံ ပဂ္ဂဟေန စ။
သေနာမောက္ခပလာဘေန [သေနီ မောက္ခူပလာဘေန (သျာ။)], ဝလ္လဘာနံ နယေန စ၊
ဇဂတိံ ဇဂတိပါလာ, အာဝသန္တိ ဝသုန္ဓရန္တိ။
ခဇ္ဇောပနကဇာတကံ စတုတ္ထံ။
֍ * ၃၆၅။ အဟိတုဏ္ဍိကဇာတကံ (၅-၂-၅)
ဓုတ္တောမှိ သမ္မ သုမုခ, ဇူတေ အက္ခပရာဇိတော၊
ဟရေဟိ [သေဝေဟိ (ပီ။)] အမ္ဗပက္ကာနိ, ဝီရိယံ တေ ဘက္ခယာမသေ။
အလိကံ ဝတ မံ သမ္မ, အဘူတေန ပသံသသိ၊
ကော တေ သုတော ဝါ ဒိဋ္ဌော ဝါ, သုမုခေါ နာမ မက္ကဋော။
(ဇာ၊၁၊၁၃၀။)အဇ္ဇာပိ မေ တံ မနသိ [တေ မံ သရသိ (က။)], ယံ မံ တွံ အဟိတုဏ္ဍိက၊
ဓညာပဏံ ပဝိသိတွာ, မတ္တော [မုတ္တော (က။)] ဆာတံ ဟနာသိ မံ။
တာဟံ သရံ ဒုက္ခသေယျံ, အပိ ရဇ္ဇမ္ပိ ကာရယေ၊
နေဝါဟံ ယာစိတော ဒဇ္ဇံ, တထာ ဟိ ဘယတဇ္ဇိတော။
ယဉ္စ ဇညာ ကုလေ ဇာတံ, ဂဗ္ဘေ တိတ္တံ အမစ္ဆရိံ၊
တေန သခိဉ္စ မိတ္တဉ္စ, ဓီရော သန္ဓာတုမရဟတီတိ။
အဟိတုဏ္ဍိကဇာတကံ ပဉ္စမံ။
မဓုဝဏ္ဏံ မဓုရသံ, မဓုဂန္ဓံ ဝိသံ အဟု၊
ဂုမ္ဗိယော ဃာသမေသာနော, အရညေ ဩဒဟီ ဝိသံ။
မဓု ဣတိ မညမာနာ [မဓူတိ မညမာနာယ (က။)], ယေ တံ ဝိသမခါဒိသုံ [ဝိသမသာယိသုံ (သီ။ သျာ။)]၊
တေသံ တံ ကဋုကံ အာသိ, မရဏံ တေနုပါဂမုံ။
ယေ စ ခေါ ပဋိသင်္ခါယ, ဝိသံ တံ ပရိဝဇ္ဇယုံ၊
တေ အာတုရေသု သုခိတာ, ဍယှမာနေသု နိဗ္ဗုတာ။
ဧဝမေဝ မနုဿေသု, ဝိသံ ကာမာ သမောဟိတာ၊
အာမိသံ ဗန္ဓနဉ္စေတံ, မစ္စုဝေသော [ပစ္စုဝသော (သီ။ သျာ။)] ဂုဟာသယော။
ဧဝမေဝ ဣမေ ကာမေ, အာတုရာ ပရိစာရိကေ [ပရိစာရကေ (က။)]၊
ယေ သဒါ ပရိဝဇ္ဇေန္တိ, သင်္ဂံ လောကေ ဥပစ္စဂုန္တိ။
ဂုမ္ဗိယဇာတကံ ဆဋ္ဌံ။
ယွာယံ သာဠိယ [သာလိယ (သီ။ သျာ။ ပီ။), သာဠိက (?)] ဆာပေါတိ, ကဏှသပ္ပံ အဂါဟယိ၊
တေန သပ္ပေနယံ ဒဋ္ဌော, ဟတော ပါပါနုသာသကော။
အဟန္တာရ [အဟနန္တ (ပီ။), အဟရန္တ (?)] မဟန္တာရံ, ယော နရော ဟန္တုမိစ္ဆတိ၊
ဧဝံ သော နိဟတော သေတိ, ယထာယံ ပုရိသော ဟတော။
(ဇာ၊၁၊၁၃၁။)အဟန္တာရ [အဟနန္တ (သီ။ သျာ။ ပီ။), အဟရန္တ (?)] မဃာတေန္တံ, ယော နရော ဟန္တုမိစ္ဆတိ၊
ဧဝံ သော နိဟတော သေတိ, ယထာယံ ပုရိသော ဟတော။
ယထာ ပံသုမုဋ္ဌိံ ပုရိသော, ပဋိဝါတံ ပဋိက္ခိပေ၊
တမေဝ သော ရဇော ဟန္တိ, တထာယံ ပုရိသော ဟတော။
ယော အပ္ပဒုဋ္ဌဿ နရဿ ဒုဿတိ, သုဒ္ဓဿ ပေါသဿ အနင်္ဂဏဿ၊
တမေဝ ဗာလံ ပစ္စေတိ ပါပံ, သုခုမော ရဇော ပဋိဝါတံဝ ခိတ္တောတိ။
သာဠိယဇာတကံ သတ္တမံ။
အမိတ္တဟတ္ထတ္ထဂတာ [ဟတ္ထတ္တဂတာ (ကတ္ထစိ, သီ။ နိယျ)], တစသာရသမပ္ပိတာ၊
ပသန္နမုခဝဏ္ဏာတ္ထ, ကသ္မာ တုမှေ န သောစထ။
န သောစနာယ ပရိဒေဝနာယ, အတ္ထောဝ လဗ္ဘော [အတ္ထော စ လဗ္ဘာ (သီ။ သျာ။), အတ္ထောဓ လဗ္ဘာ (အ။ နိ။ ၅။၄၈)] အပိ အပ္ပကောပိ၊
သောစန္တမေနံ ဒုခိတံ ဝိဒိတွာ, ပစ္စတ္ထိကာ အတ္တမနာ ဘဝန္တိ။
ယတော စ ခေါ ပဏ္ဍိတော အာပဒါသု, န ဝေဓတီ အတ္ထဝိနိစ္ဆယညူ၊
ပစ္စတ္ထိကာဿ [ပစ္စတ္ထိကာ တေ (က။)] ဒုခိတာ ဘဝန္တိ, ဒိသွာ မုခံ အဝိကာရံ ပုရာဏံ။
ဇပ္ပေန မန္တေန သုဘာသိတေန, အနုပ္ပဒါနေန ပဝေဏိယာ ဝါ၊
ယထာ ယထာ ယတ္ထ လဘေထ အတ္ထံ, တထာ တထာ တတ္ထ ပရက္ကမေယျ။
(ဇာ၊၁၊၁၃၂။)ယတော စ ဇာနေယျ အလဗ္ဘနေယျော, မယာ ဝ [မယာ ဝါ (သျာ။ က။)] အညေန ဝါ ဧသ အတ္ထော၊
အသောစမာနော အဓိဝါသယေယျ, ကမ္မံ ဒဠှံ ကိန္တိ ကရောမိ ဒါနီတိ။
တစသာရဇာတကံ အဋ္ဌမံ။
֍ * ၃၆၉။ မိတ္တဝိန္ဒကဇာတကံ (၅-၂-၉)
ကျာဟံ ဒေဝါနမကရံ, ကိံ ပါပံ ပကတံ မယာ၊
ယံ မေ သိရသ္မိံ ဩဟစ္စ [ဥဟစ္စ (က။), ဥဟစ္စ (ပီ။)], စက္ကံ ဘမတိ မတ္ထကေ။
အတိက္ကမ္မ ရမဏကံ, သဒါမတ္တဉ္စ ဒူဘကံ၊
ဗြဟ္မတ္တရဉ္စ ပါသာဒံ, ကေနတ္ထေန ဣဓာဂတော။
ဣတော ဗဟုတရာ ဘောဂါ, အတြ မညေ ဘဝိဿရေ၊
ဣတိ ဧတာယ သညာယ, ပဿ မံ ဗျသနံ ဂတံ။
စတုဗ္ဘိ အဋ္ဌဇ္ဈဂမာ, အဋ္ဌာဟိပိ စ [အဋ္ဌာဟိ စာပိ (သီ။ သျာ။), အဋ္ဌာဘိ စာပိ (က။)] သောဠသ၊
သောဠသာဟိ စ ဗာတ္တိံသ, အတြိစ္ဆံ စက္ကမာသဒေါ၊
ဣစ္ဆာဟတဿ ပေါသဿ, စက္ကံ ဘမတိ မတ္ထကေ။
ဥပရိဝိသာလာ ဒုပ္ပူရာ, ဣစ္ဆာ ဝိသဋဂါမိနီ [ဥပရိ ဝိသာလံ ဒုပ္ပူရံ, ဣစ္ဆာဝိသဒဂါမိနီ (သီ။)]၊
ယေ စ တံ အနုဂိဇ္ဈန္တိ, တေ ဟောန္တိ စက္ကဓာရိနောတိ။
မိတ္တဝိန္ဒကဇာတကံ နဝမံ။
ဟံသော ပလာသမဝစ, နိဂြောဓော သမ္မ ဇာယတိ၊
အင်္ကသ္မိံ [အင်္ဂသ္မိံ (က။)] တေ နိသိန္နောဝ, သော တေ မမ္မာနိ ဆေစ္ဆတိ [ဆိဇ္ဇတိ (က။)]။
ဝဍ္ဎတာမေဝ [ဝဒ္ဓိတမေဝ (က။)] နိဂြောဓော, ပတိဋ္ဌဿ ဘဝါမဟံ၊
ယထာ ပိတာ စ မာတာ စ [ပိတာ ဝါ မာတာ ဝါ (ပီ။), မာတာ ဝါ ပိတာ ဝါ (က။)], ဧဝံ မေ သော ဘဝိဿတိ။
ယံ တွံ အင်္ကသ္မိံ ဝဍ္ဎေသိ, ခီရရုက္ခံ ဘယာနကံ၊
အာမန္တ ခေါ တံ ဂစ္ဆာမ, ဝုဍ္ဎိ မဿ န ရုစ္စတိ။
(ဇာ၊၁၊၁၃၃။)ဣဒါနိ ခေါ မံ ဘာယေတိ, မဟာနေရုနိဒဿနံ၊
ဟံသဿ အနဘိညာယ, မဟာ မေ ဘယမာဂတံ။
န တဿ ဝုဍ္ဎိ ကုသလပ္ပသတ္ထာ, ယော ဝဍ္ဎမာနော ဃသတေ ပတိဋ္ဌံ၊
တဿူပရောဓံ ပရိသင်္ကမာနော, ပတာရယီ မူလဝဓာယ ဓီရောတိ။
ပလာသဇာတကံ ဒသမံ။
ဝဏ္ဏာရောဟဝဂ္ဂေါ ဒုတိယော [ဣမဿုဒ္ဒါနံ တတိယဝဂ္ဂပရိယောသာနေ ဘဝိဿတိ]။
၃။ အဍ္ဎဝဂ္ဂေါ
֍ * ၃၇၁။ ဒီဃီတိကောသလဇာတကံ (၅-၃-၁)
ဧဝံဘူတဿ တေ ရာဇ, အာဂတဿ ဝသေ [ဝသော (ပီ။ က။)] မမ၊
အတ္ထိ နု ကောစိ ပရိယာယော, ယော တံ ဒုက္ခာ ပမောစယေ။
နတ္ထိ နော ကောစိ ပရိယာယော, ယော မံ ဒုက္ခာ ပမောစယေ။
နာညံ သုစရိတံ ရာဇ, နာညံ ရာဇ သုဘာသိတံ၊
တာယတေ မရဏကာလေ, ဧဝမေဝိတရံ ဓနံ။
အက္ကောစ္ဆိ မံ အဝဓိ မံ, အဇိနိ မံ အဟာသိ မေ၊
ယေ စ တံ ဥပနယှန္တိ, ဝေရံ တေသံ န သမ္မတိ။
အက္ကောစ္ဆိ မံ အဝဓိ မံ, အဇိနိ မံ အဟာသိ မေ၊
ယေ စ တံ နုပနယှန္တိ, ဝေရံ တေသူပသမ္မတိ။
န ဟိ ဝေရေန ဝေရာနိ, သမ္မန္တီဓ ကုဒါစနံ၊
အဝေရေန စ သမ္မန္တိ, ဧသ ဓမ္မော သနန္တနောတိ။
ဒီဃီတိကောသလဇာတကံ ပဌမံ။
֍ * ၃၇၂။ မိဂပေါတကဇာတကံ (၅-၃-၂)
အဂါရာ ပစ္စုပေတဿ, အနဂါရဿ တေ သတော၊
သမဏဿ န တံ သာဓု, ယံ ပေတမနုသောစသိ။
(ဇာ၊၁၊၁၃၄။)သံဝါသေန ဟဝေ သက္က, မနုဿဿ မိဂဿ ဝါ၊
ဟဒယေ ဇာယတေ ပေမံ, န တံ သက္ကာ အသောစိတုံ။
မတံ မရိဿံ ရောဒန္တိ, ယေ ရုဒန္တိ လပန္တိ စ၊
တသ္မာ တွံ ဣသိ မာ ရောဒိ, ရောဒိတံ မောဃမာဟု သန္တော။
ရောဒိတေန ဟဝေ ဗြဟ္မေ, မတော ပေတော သမုဋ္ဌဟေ၊
သဗ္ဗေ သင်္ဂမ္မ ရောဒါမ, အညမညဿ ဉာတကေ။
အာဒိတ္တံ ဝတ မံ သန္တံ, ဃတသိတ္တံဝ ပါဝကံ၊
ဝါရိနာ ဝိယ ဩသိဉ္စံ, သဗ္ဗံ နိဗ္ဗာပယေ ဒရံ။
အဗ္ဗဟိ ဝတ မေ သလ္လံ, ယမာသိ ဟဒယဿိတံ၊
ယော မေ သောကပရေတဿ, ပုတ္တသောကံ အပါနုဒိ။
သောဟံ အဗ္ဗူဠှသလ္လောသ္မိ, ဝီတသောကော အနာဝိလော၊
န သောစာမိ န ရောဒါမိ, တဝ သုတွာန ဝါသဝါတိ။
မိဂပေါတကဇာတကံ ဒုတိယံ။
ကုဟိံ ဂတာ ကတ္ထ ဂတာ, ဣတိ လာလပ္ပတီ ဇနော၊
အဟမေဝေကော ဇာနာမိ, ဥဒပါနေ မူသိကာ ဟတာ။
ယဉ္စေတံ [ယထေတံ (ပီ။), ယဝေတံ (က။), ယမေတံ (ကတ္ထစိ)] ဣတိ စီတိ စ, ဂဒြဘောဝ နိဝတ္တသိ၊
ဥဒပါနေ မူသိကံ ဟန္တွာ, ယဝံ ဘက္ခေတုမိစ္ဆသိ။
ဒဟရော စာသိ ဒုမ္မေဓ, ပဌမုပ္ပတ္တိကော [ပဌမုပ္ပတ္တိတော (သီ။ ပီ။)] သုသု၊
ဒီဃဉ္စေတံ [ဒီဃမေတံ (ပီ။)] သမာသဇ္ဇ [သမာပဇ္ဇ (သျာ။ က။)], န တေ ဒဿာမိ ဇီဝိတံ။
နာန္တလိက္ခဘဝနေန, နာင်္ဂပုတ္တပိနေန [နာင်္ဂပုတ္တသိရေန (သီ။ သျာ။ ပီ။)] ဝါ၊
ပုတ္တေန ဟိ ပတ္ထယိတော, သိလောကေဟိ ပမောစိတော။
သဗ္ဗံ သုတမဓီယေထ, ဟီနမုက္ကဋ္ဌမဇ္ဈိမံ၊
သဗ္ဗဿ အတ္ထံ ဇာနေယျ, န စ သဗ္ဗံ ပယောဇယေ၊
ဟောတိ တာဒိသကော ကာလော, ယတ္ထ အတ္ထာဝဟံ သုတန္တိ။
မူသိကဇာတကံ တတိယံ။
(ဇာ၊၁၊၁၃၅။)֍ * ၃၇၄။ စူဠဓနုဂ္ဂဟဇာတကံ (၅-၃-၄)
သဗ္ဗံ ဘဏ္ဍံ သမာဒါယ, ပါရံ တိဏ္ဏောသိ ဗြာဟ္မဏ၊
ပစ္စာဂစ္ဆ လဟုံ ခိပ္ပံ, မမ္ပိ တာရေဟိ ဒါနိတော [ဒါနိဘော (သျာ။)]။
အသန္ထုတံ မံ စိရသန္ထုတေန, နိမီနိ ဘောတီ အဒ္ဓုဝံ ဓုဝေန၊
မယာပိ ဘောတီ နိမိနေယျ အညံ, ဣတော အဟံ ဒူရတရံ ဂမိဿံ။
ကာယံ ဧဠဂလာဂုမ္ဗေ [ဧဠဂဏဂုမ္ဗေ (က။)], ကရောတိ အဟုဟာသိယံ၊
နယီဓ နစ္စဂီတံ ဝါ [နယိဓ နစ္စံ ဝါ ဂီတံ ဝါ (သီ။ သျာ။ ပီ။)], တာဠံ ဝါ သုသမာဟိတံ၊
အနမှိကာလေ [အနမှကာလေ (ပီ။)] သုသောဏိ [သုဿောဏိ (သီ။ သျာ။ ပီ။)], ကိံ နု ဇဂ္ဃသိ သောဘနေ [သောဘဏေ (ပီ။ က။)]။
သိင်္ဂါလ ဗာလ ဒုမ္မေဓ, အပ္ပပညောသိ ဇမ္ဗုက၊
ဇီနော မစ္ဆဉ္စ ပေသိဉ္စ, ကပဏော ဝိယ ဈာယသိ။
သုဒဿံ ဝဇ္ဇမညေသံ, အတ္တနော ပန ဒုဒ္ဒသံ၊
ဇီနာ ပတိဉ္စ ဇာရဉ္စ, မညေ တွညေဝ [မမ္ပိ တွညေဝ (သီ။ သျာ။), တွမ္ပိ မညေဝ (ပီ။)] ဈာယသိ။
ဧဝမေတံ မိဂရာဇ, ယထာ ဘာသသိ ဇမ္ဗုက၊
သာ နူနာဟံ ဣတော ဂန္တွာ, ဘတ္တု ဟေဿံ ဝသာနုဂါ။
ယော ဟရေ မတ္တိကံ ထာလံ, ကံသထာလမ္ပိ သော ဟရေ၊
ကတဉ္စေဝ [ကတံယေဝ (သီ။ သျာ။ ပီ။)] တယာ ပါပံ, ပုနပေဝံ ကရိဿသီတိ။
စူဠဓနုဂ္ဂဟဇာတကံ စတုတ္ထံ။
ဣဒါနိ ခေါမှိ သုခိတော အရောဂေါ, နိက္ကဏ္ဋကော နိပ္ပတိတော ကပေါတော၊
ကာဟာမိ ဒါနီ ဟဒယဿ တုဋ္ဌိံ, တထာဟိမံ မံသသာကံ ဗလေတိ။
(ဇာ၊၁၊၁၃၆။)ကာယံ ဗလာကာ သိခိနော, စောရီ လင်္ဃိပိတာမဟာ၊
ဩရံ ဗလာကေ အာဂစ္ဆ, စဏ္ဍော မေ ဝါယသော သခါ။
အလဉှိ တေ ဇဂ္ဃိတာယေ, မမံ ဒိသွာန ဧဒိသံ၊
ဝိလူနံ သူဒပုတ္တေန, ပိဋ္ဌမဏ္ဍေန [ပိဋ္ဌမဒ္ဒေန (သီ။ သျာ။ ပီ။)] မက္ခိတံ။
သုနှာတော သုဝိလိတ္တောသိ, အန္နပါနေန တပ္ပိတော၊
ကဏ္ဌေ စ တေ ဝေဠုရိယော, အဂမာ နု ကဇင်္ဂလံ။
မာ တေ မိတ္တော အမိတ္တော ဝါ, အဂမာသိ ကဇင်္ဂလံ၊
ပိဉ္ဆာနိ တတ္ထ လာယိတွာ, ကဏ္ဌေ ဗန္ဓန္တိ ဝဋ္ဋနံ။
ပုနပါပဇ္ဇသီ သမ္မ, သီလဉှိ တဝ တာဒိသံ၊
န ဟိ မာနုသကာ ဘောဂါ, သုဘုဉ္ဇာ ဟောန္တိ ပက္ခိနာတိ။
ကပေါတဇာတကံ ပဉ္စမံ။
အဍ္ဎဝဂ္ဂေါ တတိယော။
တဿုဒ္ဒါနံ –
အထ ဝဏ္ဏ သသီလ ဟိရိ လဘတေ, သုမုခါ ဝိသ သာဠိယမိတ္တဝရော၊
အထ စက္က ပလာသ သရာဇ သတော, ယဝ ဗာလ ကပေါတက ပန္နရသာတိ။
အထ ဝဂ္ဂုဒ္ဒါနံ –
ဇီနဉ္စ ဝဏ္ဏံ အသမံဝဂုပ္ပရိ, သုဒေသိတာ ဇာတကန္တိ သန္တိ ဝီသတိ [ဇာတက ပဉ္စဝီသတိ (?)]၊
မဟေသိနော ဗြဟ္မစရိတ္တမုတ္တ-မဝေါစ ဂါထာ အတ္ထဝတီ သုဗျဉ္ဇနာတိ။
ပဉ္စကနိပါတံ နိဋ္ဌိတံ။
(ဇာ၊၁၊၁၃၇။)၆။ ဆက္ကနိပါတော
၁။ အဝါရိယဝဂ္ဂေါ
မာသု ကုဇ္ဈ ဘူမိပတိ, မာသု ကုဇ္ဈ ရထေသဘ၊
ကုဒ္ဓံ အပ္ပဋိကုဇ္ဈန္တော, ရာဇာ ရဋ္ဌဿ ပူဇိတော။
ဂါမေ ဝါ ယဒိ ဝါရညေ, နိန္နေ ဝါ ယဒိ ဝါ ထလေ၊
သဗ္ဗတ္ထ အနုသာသာမိ, မာသု ကုဇ္ဈ [မာဿု ကုဇ္ဈိ (သီ။ ပီ။)] ရထေသဘ။
အဝါရိယပိတာ နာမ, အဟု ဂင်္ဂါယ နာဝိကော၊
ပုဗ္ဗေ ဇနံ တာရေတွာန, ပစ္ဆာ ယာစတိ ဝေတနံ၊
တေနဿ ဘဏ္ဍနံ ဟောတိ, န စ ဘောဂေဟိ ဝဍ္ဎတိ။
အတိဏ္ဏံယေဝ ယာစဿု, အပါရံ တာတ နာဝိက၊
အညော ဟိ တိဏ္ဏဿ မနော, အညော ဟောတိ ပါရေသိနော [တရေသိနော (သီ။ ပီ။), တိရေသိနော (သျာ။)]။
ဂါမေ ဝါ ယဒိ ဝါရညေ, နိန္နေ ဝါ ယဒိ ဝါ ထလေ၊
သဗ္ဗတ္ထ အနုသာသာမိ, မာသု ကုဇ္ဈိတ္ထ နာဝိက။
ယာယေဝါနုသာသနိယာ, ရာဇာ ဂါမဝရံ အဒါ၊
တာယေဝါနုသာသနိယာ, နာဝိကော ပဟရီ မုခံ။
ဘတ္တံ ဘိန္နံ ဟတာ ဘရိယာ, ဂဗ္ဘော စ ပတိတော ဆမာ၊
မိဂေါဝ ဇာတရူပေန, န တေနတ္ထံ အဗန္ဓိ သူတိ [အဝဍ္ဎိတုန္တိ (သီ။ သျာ။), အဝဍ္ဎိ သူတိ (?)]။
အဝါရိယဇာတကံ ပဌမံ။
မာ တာတ ကုဇ္ဈိ န ဟိ သာဓု ကောဓော, ဗဟုမ္ပိ တေ အဒိဋ္ဌမဿုတဉ္စ၊
မာတာ ပိတာ ဒိသတာ [ဒိသာ တာတ (သျာ။), ဒိသာ တာ (ပီ။)] သေတကေတု, အာစရိယမာဟု ဒိသတံ ပသတ္ထာ။
(ဇာ၊၁၊၁၃၈။)အဂါရိနော အန္နဒပါနဝတ္ထဒါ [အန္နပါနဝတ္ထဒါ (သျာ။ က။)], အဝှါယိကာ တမ္ပိ ဒိသံ ဝဒန္တိ၊
ဧသာ ဒိသာ ပရမာ သေတကေတု, ယံ ပတွာ ဒုက္ခီ သုခိနော ဘဝန္တိ။
ခရာဇိနာ ဇဋိလာ ပင်္ကဒန္တာ, ဒုမ္မက္ခရူပါ [ဒုမုက္ခရူပါ (သီ။ သျာ။), ဒုမ္မုက္ခရူပါ (ပီ။ က။)] ယေမေ ဇပ္ပန္တိ မန္တေ၊
ကစ္စိ နု တေ မာနုသကေ ပယောဂေ, ဣဒံ ဝိဒူ ပရိမုတ္တာ အပါယာ။
ပါပါနိ ကမ္မာနိ ကတွာန ရာဇ, ဗဟုဿုတော စေ န [ဗဟုဿုတော နေဝ (သီ။ သျာ။)] စရေယျ ဓမ္မံ၊
သဟဿဝေဒေါပိ န တံ ပဋိစ္စ, ဒုက္ခာ ပမုဉ္စေ စရဏံ အပတွာ။
သဟဿဝေဒေါပိ န တံ ပဋိစ္စ, ဒုက္ခာ ပမုဉ္စေ စရဏံ အပတွာ၊
မညာမိ ဝေဒါ အဖလာ ဘဝန္တိ, သသံယမံ စရဏမေဝ [စရဏညေဝ (သီ။ သျာ။ ပီ။)] သစ္စံ။
န ဟေဝ ဝေဒါ အဖလာ ဘဝန္တိ, သသံယမံ စရဏမေဝ သစ္စံ၊
ကိတ္တိဉှိ ပပ္ပေါတိ အဓိစ္စ ဝေဒေ, သန္တိံ ပုဏေတိ [သန္တံ ပုနေ’တိ (သီ။ ပီ။)] စရဏေန ဒန္တောတိ။
သေတကေတုဇာတကံ ဒုတိယံ။
ပင်္ကော စ ကာမာ ပလိပေါ စ ကာမာ, ဘယဉ္စ မေတံ တိမူလံ ပဝုတ္တံ၊
ရဇော စ ဓူမော စ မယာ ပကာသိတာ, ဟိတွာ တုဝံ ပဗ္ဗဇ ဗြဟ္မဒတ္တ။
(ဇာ၊၁၊၁၃၉။)ဂဓိတော [ဂထိတော (သီ။)] စ ရတ္တော စ အဓိမုစ္ဆိတော စ, ကာမေသွဟံ ဗြာဟ္မဏ ဘိံသရူပံ၊
တံ နုဿဟေ ဇီဝိကတ္ထော ပဟာတုံ, ကာဟာမိ ပုညာနိ အနပ္ပကာနိ။
ယော အတ္ထကာမဿ ဟိတာနုကမ္ပိနော, ဩဝဇ္ဇမာနော န ကရောတိ သာသနံ၊
ဣဒမေဝ သေယျော ဣတိ မညမာနော, ပုနပ္ပုနံ ဂဗ္ဘမုပေတိ မန္ဒော။
သော ဃောရရူပံ နိရယံ ဥပေတိ, သုဘာသုဘံ မုတ္တကရီသပူရံ၊
သတ္တာ သကာယေ န ဇဟန္တိ ဂိဒ္ဓါ, ယေ ဟောန္တိ ကာမေသု အဝီတရာဂါ။
မီဠှေန လိတ္တာ ရုဟိရေန မက္ခိတာ, သေမှေန လိတ္တာ ဥပနိက္ခမန္တိ၊
ယံ ယဉှိ ကာယေန ဖုသန္တိ တာဝဒေ, သဗ္ဗံ အသာတံ ဒုခမေဝ ကေဝလံ။
ဒိသွာ ဝဒါမိ န ဟိ အညတော သဝံ, ပုဗ္ဗေနိဝါသံ ဗဟုကံ သရာမိ၊
စိတြာဟိ ဂါထာဟိ သုဘာသိတာဟိ, ဒရီမုခေါ နိဇ္ဈာပယိ သုမေဓန္တိ။
ဒရီမုခဇာတကံ တတိယံ။
ကာကောလာ ကာကသံဃာ စ, မယဉ္စ ပတတံ ဝရာ [ဝရ (က။) မယန္တိပဒဿ ဟိ ဝိသေသနံ]၊
သဗ္ဗေဝ သဒိသာ ဟောမ, ဣမံ အာဂမ္မ ပဗ္ဗတံ။
ဣဓ သီဟာ စ ဗျဂ္ဃါ စ, သိင်္ဂါလာ စ မိဂါဓမာ၊
သဗ္ဗေဝ သဒိသာ ဟောန္တိ, အယံ ကော နာမ ပဗ္ဗတော။
(ဇာ၊၁၊၁၄၀။)ဣမံ နေရူတိ [နေရုန္တိ (သီ။ သျာ။)] ဇာနန္တိ, မနုဿာ ပဗ္ဗတုတ္တမံ၊
ဣဓ ဝဏ္ဏေန သမ္ပန္နာ, ဝသန္တိ သဗ္ဗပါဏိနော။
အမာနနာ ယတ္ထ သိယာ, သန္တာနံ ဝါ ဝိမာနနာ၊
ဟီနသမ္မာနနာ ဝါပိ, န တတ္ထ ဝသတိံ ဝသေ [ဝသတီ ဝသေ (သျာ။), ဝသ ဒိဝသေ (ပီ။)]။
ယတ္ထာလသော စ ဒက္ခော စ, သူရော ဘီရု စ ပူဇိယာ၊
န တတ္ထ သန္တော ဝသန္တိ, အဝိသေသကရေ နရေ [နဂေ (သီ။ သျာ။ ပီ။)]။
နာယံ နေရု ဝိဘဇတိ, ဟီနဥက္ကဋ္ဌမဇ္ဈိမေ၊
အဝိသေသကရော နေရု, ဟန္ဒ နေရုံ ဇဟာမသေတိ။
နေရုဇာတကံ စတုတ္ထံ။
အာသာဝတီ နာမ လတာ, ဇာတာ စိတ္တလတာဝနေ၊
တဿာ ဝဿသဟဿေန, ဧကံ နိဗ္ဗတ္တတေ ဖလံ။
တံ ဒေဝါ ပယိရုပါသန္တိ, တာဝ ဒူရဖလံ သတိံ၊
အာသီသေဝ [အာသိံသေဝ (သီ။ သျာ။ ပီ။)] တုဝံ ရာဇ, အာသာ ဖလဝတီ သုခါ။
အာသီသတေဝ [အာသိံသေထေဝ (သီ။ သျာ။ ပီ။)] သော ပက္ခီ, အာသီသတေဝ [အာသိံသေထေဝ (သီ။ သျာ။ ပီ။)] သော ဒိဇော၊
တဿ စာသာ [တဿေဝါသာ (သျာ။)] သမိဇ္ဈတိ, တာဝ ဒူရဂတာ သတီ၊
အာသီသေဝ တုဝံ ရာဇ, အာသာ ဖလဝတီ သုခါ။
သမ္ပေသိ ခေါ မံ ဝါစာယ, န စ သမ္ပေသိ [သံသေသိ (က။)] ကမ္မုနာ၊
မာလာ သေရေယျကဿေဝ, ဝဏ္ဏဝန္တာ အဂန္ဓိကာ။
အဖလံ မဓုရံ ဝါစံ, ယော မိတ္တေသု ပကုဗ္ဗတိ၊
အဒဒံ အဝိဿဇံ ဘောဂံ, သန္ဓိ တေနဿ ဇီရတိ။
ယဉှိ ကယိရာ တဉှိ ဝဒေ, ယံ န ကယိရာ န တံ ဝဒေ၊
အကရောန္တံ ဘာသမာနံ, ပရိဇာနန္တိ ပဏ္ဍိတာ။
ဗလဉ္စ ဝတ မေ ခီဏံ, ပါထေယျဉ္စ န ဝိဇ္ဇတိ၊
သင်္ကေ ပါဏူပရောဓာယ, ဟန္ဒ ဒါနိ ဝဇာမဟံ။
(ဇာ၊၁၊၁၄၁။)ဧတဒေဝ ဟိ မေ နာမံ, ယံ နာမသ္မိ ရထေသဘ၊
အာဂမေဟိ မဟာရာဇ, ပိတရံ အာမန္တယာမဟန္တိ။
အာသင်္ကဇာတကံ ပဉ္စမံ။
֍ * ၃၈၁။ မိဂါလောပဇာတကံ (၆-၁-၆)
န မေ ရုစ္စိ မိဂါလောပ, ယဿ တေ တာဒိသီ ဂတီ၊
အတုစ္စံ တာတ ပတသိ, အဘူမိံ တာတ သေဝသိ။
စတုက္ကဏ္ဏံဝ ကေဒါရံ, ယဒါ တေ ပထဝီ သိယာ၊
တတော တာတ နိဝတ္တဿု, မာဿု ဧတ္တော ပရံ ဂမိ။
သန္တိ အညေပိ သကုဏာ, ပတ္တယာနာ ဝိဟင်္ဂမာ၊
အက္ခိတ္တာ ဝါတဝေဂေန, နဋ္ဌာ တေ သဿတီသမာ။
အကတွာ အပနန္ဒဿ [အပရဏ္ဏဿ (သီ။ သျာ။ ပီ။)], ပိတု ဝုဒ္ဓဿ သာသနံ၊
ကာလဝါတေ အတိက္ကမ္မ, ဝေရမ္ဘာနံ ဝသံ အဂါ [ဂတော (သီ။)]။
တဿ ပုတ္တာ စ ဒါရာ စ, ယေ စညေ အနုဇီဝိနော၊
သဗ္ဗေ ဗျသနမာပါဒုံ, အနောဝါဒကရေ ဒိဇေ။
ဧဝမ္ပိ ဣဓ ဝုဒ္ဓါနံ, ယော ဝါကျံ နာဝဗုဇ္ဈတိ၊
အတိသီမစရော [အတိသီမံ စရော (သီ။ သျာ။ က။)] ဒိတ္တော, ဂိဇ္ဈောဝါတီတသာသနော၊
သဗ္ဗေ ဗျသနံ ပပ္ပေါန္တိ, အကတွာ ဗုဒ္ဓသာသနန္တိ။
မိဂါလောပဇာတကံ ဆဋ္ဌံ။
֍ * ၃၈၂။ သိရိကာဠကဏ္ဏိဇာတကံ (၆-၁-၇)
ကာ နု ကာဠေန ဝဏ္ဏေန, န စာပိ [န စာသိ (သီ။)] ပိယဒဿနာ၊
ကာ ဝါ တွံ ကဿ ဝါ ဓီတာ, ကထံ ဇာနေမု တံ မယံ။
မဟာရာဇဿဟံ ဓီတာ, ဝိရူပက္ခဿ စဏ္ဍိယာ၊
အဟံ ကာဠီ အလက္ခိကာ, ကာဠကဏ္ဏီတိ မံ ဝိဒူ၊
ဩကာသံ ယာစိတော ဒေဟိ, ဝသေမု တဝ သန္တိကေ။
(ဇာ၊၁၊၁၄၂။)ကိံသီလေ ကိံသမာစာရေ, ပုရိသေ နိဝိသသေ တုဝံ၊
ပုဋ္ဌာ မေ ကာဠိ အက္ခာဟိ, ကထံ [ယထာ (သီ။ ပီ။)] ဇာနေမု တံ မယံ။
မက္ခီ ပဠာသီ သာရမ္ဘီ, ဣဿုကီ မစ္ဆရီ သဌော၊
သော မယှံ ပုရိသော ကန္တော, လဒ္ဓံ ယဿ ဝိနဿတိ။
ကောဓနော ဥပနာဟီ စ, ပိသုဏော စ ဝိဘေဒကော၊
ကဏ္ဍကဝါစော [အဏ္ဍကဝါစော (က။ သီ။ ပီ။)] ဖရုသော, သော မေ ကန္တတရော တတော။
အဇ္ဇ သုဝေတိ ပုရိသော, သဒတ္ထံ နာဝဗုဇ္ဈတိ၊
ဩဝဇ္ဇမာနော ကုပ္ပတိ, သေယျံ သော အတိမညတိ။
ဒဝပ္ပလုဒ္ဓေါ [ဒေဝပ္ပလုဒ္ဓေါ (က။), ဒဝပ္ပလဒ္ဓေါ (ပီ။)] ပုရိသော, သဗ္ဗမိတ္တေဟိ ဓံသတိ၊
သော မယှံ ပုရိသော ကန္တော, တသ္မိံ ဟောမိ အနာမယာ။
အပေဟိ ဧတ္တော တွံ ကာဠိ, နေတံ အမှေသု ဝိဇ္ဇတိ၊
အညံ ဇနပဒံ ဂစ္ဆ, နိဂမေ ရာဇဓာနိယော။
အဟမ္ပိ ခေါ တံ [စေတံ (သီ။)] ဇာနာမိ, နေတံ တုမှေသု ဝိဇ္ဇတိ၊
သန္တိ လောကေ အလက္ခိကာ, သံဃရန္တိ ဗဟုံ ဓနံ၊
အဟံ ဒေဝေါ စ မေ ဘာတာ, ဥဘော နံ ဝိဓမာမသေ။
ကာ နု ဒိဗ္ဗေန ဝဏ္ဏေန, ပထဗျာ သုပတိဋ္ဌိတာ၊
ကာ ဝါ တွံ ကဿ ဝါ ဓီတာ, ကထံ ဇာနေမု တံ မယံ။
မဟာရာဇဿဟံ ဓီတာ, ဓတရဋ္ဌဿ သိရီမတော [ဓတရဋ္ဌသိရီမတော (သျာ။ က။)]၊
အဟံ သိရီ စ လက္ခီ စ, ဘူရိပညာတိ မံ ဝိဒူ၊
ဩကာသံ ယာစိတော ဒေဟိ, ဝသေမု တဝ သန္တိကေ။
ကိံသီလေ ကိံသမာစာရေ, ပုရိသေ နိဝိသသေ တုဝံ၊
ပုဋ္ဌာ မေ လက္ခိ အက္ခာဟိ, ကထံ [ယထာ (သီ။ ပီ။)] ဇာနေမု တံ မယံ။
(ဇာ၊၁၊၁၄၃။)ယော စာပိ သီတေ အထဝါပိ ဥဏှေ, ဝါတာတပေ ဍံသသရီသပေ စ၊
ခုဓံ [ခုဒ္ဒံ (သျာ။ က။), ခုဒံ (ပီ။)] ပိပါသံ အဘိဘုယျ သဗ္ဗံ, ရတ္တိန္တိဝံ ယော သတတံ နိယုတ္တော။
ကာလာဂတဉ္စ န ဟာပေတိ အတ္ထံ, သော မေ မနာပေါ နိဝိသေ စ တမှိ။
အက္ကောဓနော မိတ္တဝါ စာဂဝါ စ, သီလူပပန္နော အသဌောဇုဘူတော [အသဌော ဥဇ္ဇုဘူတော (ပီ။)]၊
သင်္ဂါဟကော သခိလော သဏှဝါစော, မဟတ္တပတ္တောပိ နိဝါတဝုတ္တိ၊
တသ္မိံဟံ [တသ္မာဟံ (သီ။ ပီ။)] ပေါသေ ဝိပုလာ ဘဝါမိ, ဦမိ သမုဒ္ဒဿ ယထာပိ ဝဏ္ဏံ။
ယော စာပိ မိတ္တေ အထဝါ အမိတ္တေ, သေဋ္ဌေ သရိက္ခေ အထ ဝါပိ ဟီနေ၊
အတ္ထံ စရန္တံ အထဝါ အနတ္ထံ, အာဝီ ရဟော သင်္ဂဟမေဝ ဝတ္တေ [ဝတ္တော (သျာ။ က။)]။
ဝါစံ န ဝဇ္ဇာ ဖရုသံ ကဒါစိ, မတဿ ဇီဝဿ စ တဿ ဟောမိ။
ဧတေသံ ယော အညတရံ လဘိတွာ, ကန္တာ သိရီ [ကန္တသိရိံ (ကတ္ထစိ), ကန္တံ သိရိံ (သျာ။) အဋ္ဌကထာယံ ဒုတိယတတိယပါဌန္တရာနိ] မဇ္ဇတိ အပ္ပပညော၊
တံ ဒိတ္တရူပံ ဝိသမံ စရန္တံ, ကရီသဌာနံဝ [ကရီသဇာတံ ဝ (သီ။ သျာ။)] ဝိဝဇ္ဇယာမိ။
Empty Line. Go Next Lineအတ္တနာ ကုရုတေ လက္ခိံ, အလက္ခိံ ကုရုတတ္တနာ၊
န ဟိ လက္ခိံ အလက္ခိံ ဝါ, အညော အညဿ ကာရကောတိ။
သိရိကာဠကဏ္ဏိဇာတကံ သတ္တမံ။
(ဇာ၊၁၊၁၄၄။)သုစိတ္တပတ္တဆဒန, တမ္ဗစူဠ ဝိဟင်္ဂမ၊
ဩရောဟ ဒုမသာခါယ, မုဓာ ဘရိယာ ဘဝါမိ တေ။
စတုပ္ပဒီ တွံ ကလျာဏိ, ဒွိပဒါဟံ မနောရမေ၊
မိဂီ ပက္ခီ အသညုတ္တာ, အညံ ပရိယေသ သာမိကံ။
ကောမာရိကာ တေ ဟေဿာမိ, မဉ္ဇုကာ ပိယဘာဏိနီ၊
ဝိန္ဒ မံ အရိယေန ဝေဒေန, သာဝယ မံ ယဒိစ္ဆသိ။
ကုဏပါဒိနိ လောဟိတပေ, စောရိ ကုက္ကုဋပေါထိနိ၊
န တွံ အရိယေန ဝေဒေန, မမံ ဘတ္တာရမိစ္ဆသိ။
ဧဝမ္ပိ စတုရာ [စာတုရာ (သျာ။ က။)] နာရီ, ဒိသွာန သဓနံ [ပဝရံ (သီ။ သျာ။ ပီ။)] နရံ၊
နေန္တိ သဏှာဟိ ဝါစာဟိ, ဗိဠာရီ ဝိယ ကုက္ကုဋံ။
ယော စ ဥပ္ပတိတံ အတ္ထံ, န ခိပ္ပမနုဗုဇ္ဈတိ၊
အမိတ္တဝသမနွေတိ, ပစ္ဆာ စ အနုတပ္ပတိ။
ယော စ ဥပ္ပတိတံ အတ္ထံ, ခိပ္ပမေဝ နိဗောဓတိ၊
မုစ္စတေ သတ္တုသမ္ဗာဓာ, ကုက္ကုဋောဝ ဗိဠာရိယာတိ။
ကုက္ကုဋဇာတကံ အဋ္ဌမံ။
ဓမ္မံ စရထ ဉာတယော, ဓမ္မံ စရထ ဘဒ္ဒံ ဝေါ [ဘဒ္ဒ ဝေါ (က။)]၊
ဓမ္မစာရီ သုခံ သေတိ, အသ္မိံ လောကေ ပရမှိ စ။
ဘဒ္ဒကော ဝတယံ ပက္ခီ, ဒိဇော ပရမဓမ္မိကော၊
ဧကပါဒေန တိဋ္ဌန္တော, ဓမ္မမေဝါနုသာသတိ။
နာဿ သီလံ ဝိဇာနာထ, အနညာယ ပသံသထ၊
ဘုတွာ အဏ္ဍဉ္စ ပေါတဉ္စ [ဆာပေ စ (သီ။ ပီ။)], ဓမ္မော ဓမ္မောတိ ဘာသတိ။
အညံ ဘဏတိ ဝါစာယ, အညံ ကာယေန ကုဗ္ဗတိ၊
ဝါစာယ နော စ ကာယေန, န တံ ဓမ္မံ အဓိဋ္ဌိတော။
(ဇာ၊၁၊၁၄၅။)ဝါစာယ သခိလော မနောဝိဒုဂ္ဂေါ, ဆန္နော ကူပသယောဝ ကဏှသပ္ပေါ၊
ဓမ္မဓဇော ဂါမနိဂမာသုသာဓု [ဂါမနိဂမာသု သာဓုသမ္မတော (သီ။), ဂါမနိဂမသာဓု (ပီ။)], ဒုဇ္ဇာနော ပုရိသေန ဗာလိသေန။
ဣမံ တုဏ္ဍေဟိ ပက္ခေဟိ, ပါဒါ စိမံ ဝိဟေဌထ [ဝိပေါထထ (ပီ။)]၊
ဆဝဉှိမံ ဝိနာသေထ, နာယံ သံဝါသနာရဟောတိ။
ဓမ္မဓဇဇာတကံ နဝမံ။
֍ * ၃၈၅။ နန္ဒိယမိဂရာဇဇာတကံ (၆-၁-၁၀)
သစေ ဗြာဟ္မဏ ဂစ္ဆေသိ, သာကေတေ [သာကေတံ (သီ။ သျာ။)] အဇ္ဇုနံ [အဉ္ဈနံ (သီ။ သျာ။ ပီ။)] ဝနံ၊
ဝဇ္ဇာသိ နန္ဒိယံ နာမ, ပုတ္တံ အသ္မာကမောရသံ၊
မာတာ ပိတာ စ တေ ဝုဒ္ဓါ, တေ တံ ဣစ္ဆန္တိ ပဿိတုံ။
ဘုတ္တာ မယာ နိဝါပါနိ, ရာဇိနော ပါနဘောဇနံ၊
တံ ရာဇပိဏ္ဍံ အဝဘောတ္တုံ [အဝဘောတ္တံ (က။)], နာဟံ ဗြာဟ္မဏ မုဿဟေ။
ဩဒဟိဿာမဟံ ပဿံ, ခုရပ္ပါနိဿ [ခုရပ္ပါဏိဿ (သီ။), ခုရပါဏိဿ (ပီ။), ခုရပ္ပပါဏိဿ (?)] ရာဇိနော၊
တဒါဟံ သုခိတော မုတ္တော, အပိ ပဿေယျ မာတရံ။
မိဂရာဇာ ပုရေ အာသိံ, ကောသလဿ နိကေတနေ [နိကေတဝေ (သီ။ သျာ။ ပီ။)]၊
နန္ဒိယော နာမ နာမေန, အဘိရူပေါ စတုပ္ပဒေါ။
တံ မံ ဝဓိတုမာဂစ္ဆိ, ဒါယသ္မိံ အဇ္ဇုနေ ဝနေ၊
ဓနုံ အာရဇ္ဇံ [အာရဇ္ဇုံ (နိယျ), အဒေဇ္ဈံ (သီ။ ပီ။) အဒွေဓာဘာဝံ ဧကီဘာဝန္တိ အတ္ထော] ကတွာန, ဥသုံ သန္နယှ [သန္ဓာယ (သီ။ ပီ။)] ကောသလော။
(ဇာ၊၁၊၁၄၆။)တဿာဟံ ဩဒဟိံ ပဿံ, ခုရပ္ပါနိဿ ရာဇိနော၊
တဒါဟံ သုခိတော မုတ္တော, မာတရံ ဒဋ္ဌုမာဂတောတိ။
နန္ဒိယမိဂရာဇဇာတကံ ဒသမံ။
အဝါရိယဝဂ္ဂေါ ပဌမော။
တဿုဒ္ဒါနံ –
အထ ကုဇ္ဈရထေသဘ ကေတုဝရော, သဒရီမုခ နေရု လတာ စ ပုန၊
အပနန္ဒ သိရီ စ သုစိတ္တဝရော, အထ ဓမ္မိက နန္ဒိမိဂေန ဒသာတိ။
၂။ ခရပုတ္တဝဂ္ဂေါ
သစ္စံ ကိရေဝမာဟံသု, ဝသ္တံ [ဘသ္တံ (သီ။ ပီ။), ကလကံ (သျာ။), ဂရံ (က။)] ဗာလောတိ ပဏ္ဍိတာ၊
ပဿ ဗာလော ရဟောကမ္မံ, အာဝိကုဗ္ဗံ န ဗုဇ္ဈတိ။
တွံ ခေါပိ [တွံ နု ခေါ (သီ။ သျာ။), တွဉ္စ ခေါ (ပီ။)] သမ္မ ဗာလောသိ, ခရပုတ္တ ဝိဇာနဟိ၊
ရဇ္ဇုယာ ဟိ [ရဇ္ဇုယာသိ (ပီ။)] ပရိက္ခိတ္တော, ဝင်္ကောဋ္ဌော ဩဟိတောမုခေါ။
အပရမ္ပိ သမ္မ တေ ဗာလျံ [အယမ္ပိ သမ္မ တေ ဗာလော (က။)], ယော မုတ္တော န ပလာယသိ၊
သော စ ဗာလတရော သမ္မ, ယံ တွံ ဝဟသိ သေနကံ။
ယံ နု သမ္မ အဟံ ဗာလော, အဇရာဇ ဝိဇာနဟိ၊
အထ ကေန သေနကော ဗာလော, တံ မေ အက္ခာဟိ ပုစ္ဆိတော။
ဥတ္တမတ္ထံ လဘိတွာန, ဘရိယာယ ယော ပဒဿတိ [ဘယိယာ ယော ပဒဿတိ (ပီ။), ဘယိယာ န ဘဝိဿတိ (က။)]၊
တေန ဇဟိဿတတ္တာနံ, သာ စေဝဿ န ဟေဿတိ။
(ဇာ၊၁၊၁၄၇။)န ဝေ ပိယမ္မေတိ [န ပိယမေတိ (က။), န ပိယမေဒန္တိ (ကတ္ထစိ)] ဇနိန္ဒ တာဒိသော, အတ္တံ နိရံကတွာ ပိယာနိ သေဝတိ [သေဝယေ (?)]၊
အတ္တာဝ သေယျော ပရမာ စ သေယျော, လဗ္ဘာ ပိယာ ဩစိတတ္ထေန ပစ္ဆာတိ။
ခရပုတ္တဇာတကံ ပဌမံ။
အကက္ကသံ အဖရုသံ, ခရဓောတံ သုပါသိယံ၊
သုခုမံ တိခိဏဂ္ဂဉ္စ, ကော သူစိံ ကေတုမိစ္ဆတိ။
သုမဇ္ဇဉ္စ သုပါသဉ္စ, အနုပုဗ္ဗံ [အနုပုဗ္ဗ (သီ။ သျာ။)] သုဝဋ္ဋိတံ၊
ဃနဃာတိမံ ပဋိထဒ္ဓံ, ကော သူစိံ ကေတုမိစ္ဆတိ။
ဣတော ဒါနိ ပတာယန္တိ, သူစိယော ဗဠိသာနိ စ၊
ကောယံ ကမ္မာရဂါမသ္မိံ, သူစိံ ဝိက္ကေတုမိစ္ဆတိ။
ဣတော သတ္ထာနိ ဂစ္ဆန္တိ, ကမ္မန္တာ ဝိဝိဓာ ပုထူ၊
ကောယံ ကမ္မာရဂါမသ္မိံ, သူစိံ ဝိက္ကေတုမိစ္ဆတိ [မရဟတိ (သီ။ သျာ။ ပီ။)]။
သူစိံ ကမ္မာရဂါမသ္မိံ, ဝိက္ကေတဗ္ဗာ ပဇာနတာ၊
အာစရိယာဝ ဇာနန္တိ [အာစရိယာ သဉ္ဇာနန္တိ (က။), အာစရိယာ ပဇာနန္တိ (သျာ။), အာစရိယာဝ သဉ္ဇာနန္တိ (ပီ။)], ကမ္မံ သုကတဒုက္ကဋံ [ဒုက္ကတံ (သီ။ ပီ။)]။
ဣမံ စေ [ဣမဉ္စ (သီ။ သျာ။ ပီ။)] တေ ပိတာ ဘဒ္ဒေ, သူစိံ ဇညာ မယာ ကတံ၊
တယာ စ မံ နိမန္တေယျ, ယဉ္စတ္ထညံ ဃရေ ဓနန္တိ။
သူစိဇာတကံ ဒုတိယံ။
နဝဆန္နကေ [နဝဆန္ဒကေ (သီ။ ပီ။), နဝစ္ဆဒ္ဒကေ (သျာ။)] ဒါနိ [ဒေါဏိ (က။), ဒါနံ, ဒါနေ (ကတ္ထစိ)] ဒိယျတိ, ပုဏ္ဏာယံ ဒေါဏိ သုဝါမိနီ ဌိတာ၊
ဗဟုကေ ဇနေ ပါသပါဏိကေ, နော စ ခေါ မေ ပဋိဘာတိ ဘုဉ္ဇိတုံ။
(ဇာ၊၁၊၁၄၈။)တသသိ ဘမသိ လေဏမိစ္ဆသိ, အတ္တာဏောသိ ကုဟိံ ဂမိဿသိ၊
အပ္ပေါဿုက္ကော ဘုဉ္ဇ တုဏ္ဍိလ, မံသတ္ထာယ ဟိ ပေါသိတာမှသေ [ပေါသိယာမသေ (သီ။ သျာ။ ပီ။)]။
ဩဂဟ ရဟဒံ အကဒ္ဒမံ, သဗ္ဗံ သေဒမလံ ပဝါဟယ၊
ဂဏှာဟိ နဝံ ဝိလေပနံ, ယဿ ဂန္ဓော န ကဒါစိ ဆိဇ္ဇတိ။
ကတမော ရဟဒေါ အကဒ္ဒမော, ကိံသု သေဒမလန္တိ ဝုစ္စတိ၊
ကတမဉ္စ နဝံ ဝိလေပနံ, ယဿ ဂန္ဓော န ကဒါစိ ဆိဇ္ဇတိ။
ဓမ္မော ရဟဒေါ အကဒ္ဒမော, ပါပံ သေဒမလန္တိ ဝုစ္စတိ၊
သီလဉ္စ နဝံ ဝိလေပနံ, တဿ ဂန္ဓော န ကဒါစိ ဆိဇ္ဇတိ။
နန္ဒန္တိ သရီရဃာတိနော, န စ နန္ဒန္တိ သရီရဓာရိနော၊
ပုဏ္ဏာယ စ ပုဏ္ဏမာသိယာ, ရမမာနာဝ ဇဟန္တိ ဇီဝိတန္တိ။
တုဏ္ဍိလဇာတကံ တတိယံ။
֍ * ၃၈၉။ သုဝဏ္ဏကက္ကဋဇာတကံ (၆-၂-၄)
သိင်္ဂီမိဂေါ အာယတစက္ခုနေတ္တော, အဋ္ဌိတ္တစော ဝါရိသယော အလောမော၊
တေနာဘိဘူတော ကပဏံ ရုဒါမိ, ဟရေ သခါ ကိဿ နု မံ ဇဟာသိ။
(ဇာ၊၁၊၁၄၉။)သော ပဿသန္တော မဟတာ ဖဏေန, ဘုဇင်္ဂမော ကက္ကဋမဇ္ဈပတ္တော၊
သခါ သခါရံ ပရိတာယမာနော, ဘုဇင်္ဂမံ ကက္ကဋကော ဂဟေသိ။
န ဝါယသံ နော ပန ကဏှသပ္ပံ, ဃာသတ္ထိကော ကက္ကဋကော အဒေယျ၊
ပုစ္ဆာမိ တံ အာယတစက္ခုနေတ္တ, အထ ကိဿ ဟေတုမှ ဥဘော ဂဟီတာ။
အယံ ပုရိသော မမ အတ္ထကာမော, ယော မံ ဂဟေတွာန ဒကာယ နေတိ၊
တသ္မိံ မတေ ဒုက္ခမနပ္ပကံ မေ, အဟဉ္စ ဧသော စ ဥဘော န ဟောမ။
မမဉ္စ ဒိသွာန ပဝဒ္ဓကာယံ, သဗ္ဗော ဇနော ဟိံသိတုမေဝ မိစ္ဆေ၊
သာဒုဉ္စ ထူလဉ္စ မုဒုဉ္စ မံသံ, ကာကာပိ မံ ဒိသွာန [ဒိသွ (သီ။ ပီ။)] ဝိဟေဌယေယျုံ။
သစေတဿ ဟေတုမှ ဥဘော ဂဟီတာ, ဥဋ္ဌာတု ပေါသော ဝိသမာဝမာမိ [ဝိသမာစမာမိ (သီ။ ပီ။ က။)]၊
မမဉ္စ ကာကဉ္စ ပမုဉ္စ ခိပ္ပံ, ပုရေ ဝိသံ ဂါဠှမုပေတိ မစ္စံ။
သပ္ပံ ပမောက္ခာမိ န တာဝ ကာကံ, ပဋိဗန္ဓကော [ပဋိဗဒ္ဓကော (သီ။ ပီ။)] ဟောဟိတိ [ဟောတိ ဟိ (သျာ။)] တာဝ ကာကော၊
ပုရိသဉ္စ ဒိသွာန သုခိံ အရောဂံ, ကာကံ ပမောက္ခာမိ ယထေဝ သပ္ပံ။
(ဇာ၊၁၊၁၅၀။)ကာကော တဒါ ဒေဝဒတ္တော အဟောသိ, မာရော ပန ကဏှသပ္ပေါ အဟောသိ၊
အာနန္ဒဘဒ္ဒေါ ကက္ကဋကော အဟောသိ, အဟံ တဒါ ဗြာဟ္မဏော ဟောမိ သတ္ထာတိ [တတ္ထာတိ (သီ။ ပီ။)]။
သုဝဏ္ဏကက္ကဋဇာတကံ စတုတ္ထံ။
သကုဏော မယှကော နာမ, ဂိရိသာနုဒရီစရော၊
ပက္ကံ ပိပ္ဖလိမာရုယှ, မယှံ မယှန္တိ ကန္ဒတိ။
တဿေဝံ ဝိလပန္တဿ, ဒိဇသံဃာ သမာဂတာ၊
ဘုတွာန ပိပ္ဖလိံ ယန္တိ, ဝိလပတွေဝ သော ဒိဇော။
ဧဝမေဝ ဣဓေကစ္စော, သံဃရိတွာ ဗဟုံ ဓနံ၊
နေဝတ္တနော န ဉာတီနံ, ယထောဓိံ ပဋိပဇ္ဇတိ။
န သော အစ္ဆာဒနံ ဘတ္တံ, န မာလံ န ဝိလေပနံ၊
အနုဘောတိ [နာနုဘောတိ (သျာ။ က။)] သကိံ ကိဉ္စိ, န သင်္ဂဏှာတိ ဉာတကေ။
တဿေဝံ ဝိလပန္တဿ, မယှံ မယှန္တိ ရက္ခတော၊
ရာဇာနော အထ ဝါ စောရာ, ဒါယဒါ ယေ ဝ [ယေ စ (သျာ။ က။)] အပ္ပိယာ၊
ဓနမာဒါယ ဂစ္ဆန္တိ, ဝိလပတွေဝ သော နရော။
ဓီရော [ဓီရော စ (သီ။)] ဘောဂေ အဓိဂမ္မ, သင်္ဂဏှာတိ စ ဉာတကေ၊
တေန သော ကိတ္တိံ ပပ္ပေါတိ, ပေစ္စ သဂ္ဂေ ပမောဒတီတိ [သဂ္ဂေ စ မောဒတီတိ (သီ။ ပီ။)]။
မယှကဇာတကံ ပဉ္စမံ။
֍ * ၃၉၁။ ဝိဇ္ဇာဓရဇာတကံ (၆-၂-၆)
ဒုဗ္ဗဏ္ဏရူပံ တုဝမရိယဝဏ္ဏီ, ပုရက္ခတွာ [ပုရက္ခိတွာ (သျာ။ က။)] ပဉ္ဇလိကော နမဿသိ၊
သေယျော နု တေ သော ဥဒဝါ [ဥဒါဟု (သျာ။ က။)] သရိက္ခော, နာမံ ပရဿတ္တနော စာပိ ဗြူဟိ။
(ဇာ၊၁၊၁၅၁။)န နာမဂေါတ္တံ ဂဏှန္တိ ရာဇ, သမ္မဂ္ဂတာနုဇ္ဇုဂတာန [သမဂ္ဂတာနုဇ္ဇုဂတာန (သျာ။), သမုဂ္ဂတာနုဇ္ဇုဂတာန (က။)] ဒေဝါ၊
အဟဉ္စ တေ နာမဓေယျံ ဝဒါမိ, သက္ကောဟမသ္မီ တိဒသာနမိန္ဒော။
ယော ဒိသွာ ဘိက္ခုံ စရဏူပပန္နံ, ပုရက္ခတွာ ပဉ္ဇလိကော နမဿတိ၊
ပုစ္ဆာမိ တံ ဒေဝရာဇေတမတ္ထံ, ဣတော စုတော ကိံ လဘတေ သုခံ သော။
ယော ဒိသွာ ဘိက္ခုံ စရဏူပပန္နံ, ပုရက္ခတွာ ပဉ္ဇလိကော နမဿတိ၊
ဒိဋ္ဌေဝ ဓမ္မေ လဘတေ ပသံသံ, သဂ္ဂဉ္စ သော ယာတိ သရီရဘေဒါ။
လက္ခီ ဝတ မေ ဥဒပါဒိ အဇ္ဇ, ယံ ဝါသဝံ ဘူတပတိဒ္ဒသာမ၊
ဘိက္ခုဉ္စ ဒိသွာန တုဝဉ္စ သက္က, ကာဟာမိ ပုညာနိ အနပ္ပကာနိ။
အဒ္ဓါ ဟဝေ သေဝိတဗ္ဗာ သပညာ, ဗဟုဿုတာ ယေ ဗဟုဌာနစိန္တိနော၊
ဘိက္ခုဉ္စ ဒိသွာန မမဉ္စ ရာဇ, ကရောဟိ ပုညာနိ အနပ္ပကာနိ။
အက္ကောဓနော နိစ္စပသန္နစိတ္တော, သဗ္ဗာတိထီယာစယောဂေါ ဘဝိတွာ၊
နိဟစ္စ မာနံ အဘိဝါဒယိဿံ, သုတွာန ဒေဝိန္ဒ သုဘာသိတာနီတိ။
ဝိဇ္ဇာဓရ [ဓဇဝိဟေဌက (သီ။ ပီ။), ပဗ္ဗဇိတဝိဟေဌက (သျာ။)] ဇာတကံ ဆဋ္ဌံ။
(ဇာ၊၁၊၁၅၂။)֍ * ၃၉၂။ သိင်္ဃပုပ္ဖဇာတကံ (၆-၂-၇)
ယမေတံ [ယမေကံ (ပီ။)] ဝါရိဇံ ပုပ္ဖံ, အဒိန္နံ ဥပသိင်္ဃသိ၊
ဧကင်္ဂမေတံ ထေယျာနံ, ဂန္ဓထေနောသိ မာရိသ။
န ဟရာမိ န ဘဉ္ဇာမိ, အာရာ သိင်္ဃာမိ ဝါရိဇံ၊
အထ ကေန နု ဝဏ္ဏေန, ဂန္ဓထေနောတိ ဝုစ္စတိ။
ယောယံ ဘိသာနိ ခဏတိ, ပုဏ္ဍရီကာနိ ဘဉ္ဇတိ၊
ဧဝံ အာကိဏ္ဏကမ္မန္တော, ကသ္မာ ဧသော န ဝုစ္စတိ။
အာကိဏ္ဏလုဒ္ဒေါ ပုရိသော, ဓာတိစေလံဝ မက္ခိတော၊
တသ္မိံ မေ ဝစနံ နတ္ထိ, တဉ္စာရဟာမိ ဝတ္တဝေ။
အနင်္ဂဏဿ ပေါသဿ, နိစ္စံ သုစိဂဝေသိနော၊
ဝါလဂ္ဂမတ္တံ ပါပဿ, အဗ္ဘာမတ္တံဝ ခါယတိ။
အဒ္ဓါ မံ ယက္ခ ဇာနာသိ, အထော မံ အနုကမ္ပသိ၊
ပုနပိ ယက္ခ ဝဇ္ဇာသိ, ယဒါ ပဿသိ ဧဒိသံ။
နေဝ တံ ဥပဇီဝါမိ, နပိ တေ ဘတကာမှသေ [ဘတကမှသေ (သီ။ ပီ။), ဘတိကမှသေ (သျာ။)]၊
တွမေဝ ဘိက္ခု ဇာနေယျ, ယေန ဂစ္ဆေယျ သုဂ္ဂတိန္တိ။
သိင်္ဃပုပ္ဖ [ဘိသပုပ္ဖ (သီ။ ပီ။), ဥပသိင်္ဃပုပ္ဖ (သျာ။)] ဇာတကံ သတ္တမံ။
သုသုခံ ဝတ ဇီဝန္တိ, ယေ ဇနာ ဝိဃာသာဒိနော၊
ဒိဋ္ဌေဝ ဓမ္မေ ပါသံသာ, သမ္ပရာယေ စ သုဂ္ဂတီ။
သုကဿ [သုဝဿ (သီ။ သျာ။ ပီ။)] ဘာသမာနဿ, န နိသာမေထ ပဏ္ဍိတာ၊
ဣဒံ သုဏာထ သောဒရိယာ, အမှေဝါယံ ပသံသတိ။
နာဟံ တုမှေ ပသံသာမိ, ကုဏပါဒါ သုဏာထ မေ၊
ဥစ္ဆိဋ္ဌဘောဇိနော [ဘောဇနာ (က။)] တုမှေ, န တုမှေ ဝိဃာသာဒိနော။
(ဇာ၊၁၊၁၅၃။)သတ္တဝဿာ ပဗ္ဗဇိတာ, မေဇ္ဈာရညေ [မဇ္ဈေရညေ (က။)] သိခဏ္ဍိနော၊
ဝိဃာသေနေဝ ယာပေန္တာ, မယံ စေ ဘောတော ဂါရယှာ၊
ကေ နု ဘောတော ပသံသိယာ။
တုမှေ သီဟာနံ ဗျဂ္ဃါနံ, ဝါဠာနဉ္စာဝသိဋ္ဌကံ၊
ဥစ္ဆိဋ္ဌေနေဝ ယာပေန္တာ, မညိဝှေါ ဝိဃာသာဒိနော။
ယေ ဗြာဟ္မဏဿ သမဏဿ, အညဿ ဝါ [အညဿ စ (သီ။ သျာ။), အညဿေဝ (ပီ။)] ဝနိဗ္ဗိနော [ဝဏိဗ္ဗိနော (သီ။ သျာ။)]၊
ဒတွာဝ [ဒတွာန (ပီ။ က။)] သေသံ ဘုဉ္ဇန္တိ, တေ ဇနာ ဝိဃာသာဒိနောတိ။
ဝိဃာသာဒဇာတကံ အဋ္ဌမံ။
ပဏီတံ ဘုဉ္ဇသေ ဘတ္တံ, သပ္ပိတေလဉ္စ မာတုလ၊
အထ ကေန နု ဝဏ္ဏေန, ကိသော တွမသိ ဝါယသ။
အမိတ္တမဇ္ဈေ ဝသတော, တေသု အာမိသမေသတော၊
နိစ္စံ ဥဗ္ဗိဂ္ဂဟဒယဿ, ကုတော ကာကဿ ဒဠှိယံ။
နိစ္စံ ဥဗ္ဗေဂိနော [ဥဗ္ဗိဂ္ဂိနော (သျာ။ က။), ဥဗ္ဗေဓိနော (သီ။)] ကာကာ, ဓင်္ကာ ပါပေန ကမ္မုနာ၊
လဒ္ဓေါ ပိဏ္ဍော န ပီဏေတိ, ကိသော တေနသ္မိ ဝဋ္ဋက။
လူခါနိ တိဏဗီဇာနိ, အပ္ပသ္နေဟာနိ ဘုဉ္ဇသိ၊
အထ ကေန နု ဝဏ္ဏေန, ထူလော တွမသိ ဝဋ္ဋက။
အပ္ပိစ္ဆာ အပ္ပစိန္တာယ, အဒူရဂမနေန စ၊
လဒ္ဓါလဒ္ဓေန ယာပေန္တော, ထူလော တေနသ္မိ ဝါယသ။
အပ္ပိစ္ဆဿ ဟိ ပေါသဿ, အပ္ပစိန္တသုခဿ [အပ္ပစိန္တိသုခဿ (သီ။ သျာ။ ပီ။)] စ၊
သုသင်္ဂဟိတမာနဿ [သုသင်္ဂဟိတပမာဏဿ (သီ။ သျာ။ ပီ။)], ဝုတ္တီ သုသမုဒါနယာတိ။
ဝဋ္ဋကဇာတကံ နဝမံ။
စိရဿံ ဝတ ပဿာမိ, သဟာယံ မဏိဓာရိနံ၊
သုကတာ [သုကတာယ (သီ။ ပီ။)] မဿုကုတ္တိယာ, သောဘတေ ဝတ မေ သခါ။
(ဇာ၊၁၊၁၅၄။)ပရူဠှကစ္ဆနခလောမော, အဟံ ကမ္မေသု ဗျာဝဋော၊
စိရဿံ နှာပိတံ လဒ္ဓါ, လောမံ တံ အဇ္ဇံ ဟာရယိံ [အပဟာရယိံ (သီ။ ပီ။)]။
ယံ နု လောမံ အဟာရေသိ, ဒုလ္လဘံ လဒ္ဓ ကပ္ပကံ၊
အထ ကိဉ္စရဟိ တေ သမ္မ, ကဏ္ဌေ ကိဏိကိဏာယတိ [ဣဒံ ကဏ္ဌေ ကိဏာယတိ (က။), ကဏ္ဌေ ကိံနိကိလာယတိ (သျာ။)]။
မနုဿသုခုမာလာနံ, မဏိ ကဏ္ဌေသု လမ္ဗတိ၊
တေသာဟံ အနုသိက္ခာမိ, မာ တွံ မညိ ဒဝါ ကတံ။
သစေပိမံ ပိဟယသိ, မဿုကုတ္တိံ သုကာရိတံ၊
ကာရယိဿာမိ တေ သမ္မ, မဏိဉ္စာပိ ဒဒါမိ တေ။
တွညေဝ မဏိနာ ဆန္နော, သုကတာယ စ မဿုယာ၊
အာမန္တ ခေါ တံ ဂစ္ဆာမိ, ပိယံ မေ တဝ ဒဿနန္တိ။
ပါရာဝတဇာတကံ [ကာကဇာတကံ (သီ။ ပီ။), မဏိဇာတကံ (သျာ။)] ဒသမံ။
ခရပုတ္တဝဂ္ဂေါ [သေနကဝဂ္ဂေါ (သီ။ ပီ။), ခုရပုတ္တဝဂ္ဂေါ (သျာ။), သူစိဝဂ္ဂေါ (က။)] ဒုတိယော။
တဿုဒ္ဒါနံ –
အထ ပဿ သသူစိ စ တုဏ္ဍိလကော, မိဂ မယှကပဉ္စမပက္ခိဝရော၊
အထ ပဉ္ဇလိ ဝါရိဇ မေဇ္ဈ ပုန, အထ ဝဋ္ဋ ကပေါတဝရေန ဒသာတိ။
အထ ဝဂ္ဂုဒ္ဒါနံ –
အထ ဝဂ္ဂံ ပကိတ္တိဿံ, ဆနိပါတံ ဝရုတ္တမေ၊
အဝါရိယာ စ ခရော စ [သေနက (သီ။), သူစိ စ (သျာ။ က။)], ဒွေ စ ဝုတ္တာ သုဗျဉ္ဇနာတိ။
ဆက္ကနိပါတံ နိဋ္ဌိတံ။
(ဇာ၊၁၊၁၅၅။)၇။ သတ္တကနိပါတော
၁။ ကုက္ကုဝဂ္ဂေါ
ဒိယဍ္ဎကုက္ကူ ဥဒယေန ကဏ္ဏိကာ, ဝိဒတ္ထိယော အဋ္ဌ ပရိက္ခိပန္တိ နံ၊
သာ သိံသပါ [သသိံသပါ (သီ။ ပီ။), သာ သီသပါ (သျာ။), ယာ သိံသပါ (က။ သီ။ နိယျ)] သာရမယာ အဖေဂ္ဂုကာ, ကုဟိံ ဌိတာ ဥပ္ပရိတော [ဥပရိတော (သီ။ သျာ။ ပီ။)] န ဓံသတိ။
ယာ တိံသတိ သာရမယာ အနုဇ္ဇုကာ, ပရိကိရိယ [ပကိရိယာ (က။)] ဂေါပါဏသိယော သမံ ဌိတာ [သမဋ္ဌိတာ (သီ။ သျာ။)]၊
တာဟိ သုသင်္ဂဟိတာ ဗလသာ ပီဠိတာ [တာ သင်္ဂဟိတာ ဗလသာ စ ပီဠိတာ (သီ။), တာဟိ သုသင်္ဂဟိတာ ဗလသာ စ ပီဠိတာ (သျာ။), တာဟိ သင်္ဂဟီတာ ဗလသာ စ ပီဠိတာ (ပီ။)], သမံ ဌိတာ ဥပ္ပရိတော န ဓံသတိ။
ဧဝမ္ပိ မိတ္တေဟိ ဒဠှေဟိ ပဏ္ဍိတော, အဘေဇ္ဇရူပေဟိ သုစီဟိ မန္တိဘိ၊
သုသင်္ဂဟီတော သိရိယာ န ဓံသတိ, ဂေါပါဏသီ ဘာရဝဟာဝ ကဏ္ဏိကာ။
ခရတ္တစံ ဗေလ္လံ ယထာပိ သတ္ထဝါ, အနာမသန္တောပိ ကရောတိ တိတ္တကံ၊
သမာဟရံ သာဒုံ ကရောတိ ပတ္ထိဝ, အသာဒုံ ကယိရာ တနုဗန္ဓမုဒ္ဓရံ [တနုဝဋ္ဋမုဒ္ဓရံ (သီ။ ပီ။)]။
ဧဝမ္ပိ ဂါမနိဂမေသု ပဏ္ဍိတော, အသာဟသံ ရာဇဓနာနိ သံဃရံ၊
ဓမ္မာနုဝတ္တီ ပဋိပဇ္ဇမာနော, သ ဖာတိ ကယိရာ အဝိဟေဌယံ ပရံ။
(ဇာ၊၁၊၁၅၆။)ဩဒါတမူလံ သုစိဝါရိသမ္ဘဝံ, ဇာတံ ယထာ ပေါက္ခရဏီသု အမ္ဗုဇံ၊
ပဒုမံ ယထာ အဂ္ဂိနိကာသိဖာလိမံ, န ကဒ္ဒမော န ရဇော န ဝါရိ လိမ္ပတိ။
ဧဝမ္ပိ ဝေါဟာရသုစိံ အသာဟသံ, ဝိသုဒ္ဓကမ္မန္တမပေတပါပကံ၊
န လိမ္ပတိ ကမ္မကိလေသ တာဒိသော, ဇာတံ ယထာ ပေါက္ခရဏီသု အမ္ဗုဇန္တိ။
ကုက္ကုဇာတကံ ပဌမံ။
ယထာ စာပေါ နိန္နမတိ, ဇိယာ စာပိ နိကူဇတိ၊
ဟညတေ နူန မနောဇော, မိဂရာဇာ သခါ မမ။
ဟန္ဒ ဒါနိ ဝနန္တာနိ, ပက္ကမာမိ ယထာသုခံ၊
နေတာဒိသာ သခါ ဟောန္တိ, လဗ္ဘာ မေ ဇီဝတော သခါ။
န ပါပဇနသံသေဝီ, အစ္စန္တံ သုခမေဓတိ၊
မနောဇံ ပဿ သေမာနံ, ဂိရိယဿာနုသာသနီ [အရိယဿာနုသာသနီ (သီ။ သျာ။ ပီ။)]။
န ပါပသမ္ပဝင်္ကေန, မာတာ ပုတ္တေန နန္ဒတိ၊
မနောဇံ ပဿ သေမာနံ, အစ္ဆန္နံ [သစ္ဆန္နံ (က။)] သမှိ လောဟိတေ။
ဧဝမာပဇ္ဇတေ ပေါသော, ပါပိယော စ နိဂစ္ဆတိ၊
ယော ဝေ ဟိတာနံ ဝစနံ, န ကရောတိ အတ္ထဒဿိနံ။
ဧဝဉ္စ သော ဟောတိ တတော စ ပါပိယော, ယော ဥတ္တမော အဓမဇနူပသေဝီ၊
ပဿုတ္တမံ အဓမဇနူပသေဝိတံ [သေဝိံ (သျာ။)], မိဂါဓိပံ သရဝရဝေဂနိဒ္ဓုတံ။
(ဇာ၊၁၊၁၅၇။)နိဟီယတိ ပုရိသော နိဟီနသေဝီ, န စ ဟာယေထ ကဒါစိ တုလျသေဝီ၊
သေဋ္ဌမုပဂမံ [မုပနမံ (သီ။ ပီ။ အ။ နိ။ ၃။၂၆)] ဥဒေတိ ခိပ္ပံ, တသ္မာတ္တနာ ဥတ္တရိတရံ [တသ္မာ အတ္တနော ဥတ္တရိံ (သီ။ ပီ။), တသ္မာ အတ္တနော ဥတ္တရံ (သျာ။)] ဘဇေထာတိ။
မနောဇဇာတကံ ဒုတိယံ။
ရာဇာ တေ ဘတ္တံ ပါဟေသိ, သုစိံ မံသူပသေစနံ၊
မဃဒေဝသ္မိံ [မခါဒေဝသ္မိံ (သီ။ ပီ။), မာဃဒေဝသ္မိံ (က။)] အဓိဝတ္ထေ, ဧဟိ နိက္ခမ္မ ဘုဉ္ဇဿု။
ဧဟိ မာဏဝ ဩရေန, ဘိက္ခမာဒါယ သူပိတံ၊
တွဉ္စ မာဏဝ ဘိက္ခာ စ [ဘက္ခောသိ (သျာ။), ဘက္ခာဝ (က။)], ဥဘော ဘက္ခာ ဘဝိဿထ။
အပ္ပကေန တုဝံ ယက္ခ, ထုလ္လမတ္ထံ ဇဟိဿသိ၊
ဘိက္ခံ တေ နာဟရိဿန္တိ, ဇနာ မရဏသညိနော။
လဒ္ဓါယ ယက္ခာ [လဒ္ဓါယံ ယက္ခ (သီ။ သျာ။ ပီ။)] တဝ နိစ္စဘိက္ခံ, သုစိံ ပဏီတံ ရသသာ ဥပေတံ၊
ဘိက္ခဉ္စ တေ အာဟရိယော နရော ဣဓ, သုဒုလ္လဘော ဟေဟိတိ ဘက္ခိတေ [ခါဒိတေ (သီ။ သျာ။ ပီ။)] မယိ။
မမေဝ [မမေသ (သီ။ ပီ။)] သုတနော အတ္ထော, ယထာ ဘာသသိ မာဏဝ၊
မယာ တွံ သမနုညာတော, သောတ္ထိံ ပဿာဟိ မာတရံ။
ခဂ္ဂံ ဆတ္တဉ္စ ပါတိဉ္စ, ဂစ္ဆမာဒါယ [ဂစ္ဆေဝါဒါယ (သီ။ သျာ။ ပီ။)] မာဏဝ၊
သောတ္ထိံ ပဿတု တေ မာတာ, တွဉ္စ ပဿာဟိ မာတရံ။
ဧဝံ ယက္ခ သုခီ ဟောဟိ, သဟ သဗ္ဗေဟိ ဉာတိဘိ၊
ဓနဉ္စ မေ အဓိဂတံ, ရညော စ ဝစနံ ကတန္တိ။
သုတနုဇာတကံ တတိယံ။
(ဇာ၊၁၊၁၅၈။)֍ * ၃၉၉။ မာတုပေါသကဂိဇ္ဈဇာတကံ (၇-၁-၄)
တေ ကထံ နု ကရိဿန္တိ, ဝုဒ္ဓါ ဂိရိဒရီသယာ၊
အဟံ ဗဒ္ဓေါသ္မိ ပါသေန, နိလီယဿ ဝသံ ဂတော။
ကိံ ဂိဇ္ဈ ပရိဒေဝသိ, ကာ နု တေ ပရိဒေဝနာ၊
န မေ သုတော ဝါ ဒိဋ္ဌော ဝါ, ဘာသန္တော မာနုသိံ ဒိဇော။
ဘရာမိ မာတာပိတရော, ဝုဒ္ဓေ ဂိရိဒရီသယေ၊
တေ ကထံ နု ကရိဿန္တိ, အဟံ ဝသံ ဂတော တဝ။
ယံ နု ဂိဇ္ဈော ယောဇနသတံ, ကုဏပါနိ အဝေက္ခတိ၊
ကသ္မာ ဇာလဉ္စ ပါသဉ္စ, အာသဇ္ဇာပိ န ဗုဇ္ဈသိ။
ယဒါ ပရာဘဝေါ ဟောတိ, ပေါသော ဇီဝိတသင်္ခယေ၊
အထ ဇာလဉ္စ ပါသဉ္စ, အာသဇ္ဇာပိ န ဗုဇ္ဈတိ။
ဘရဿု မာတာပိတရော, ဝုဒ္ဓေ ဂိရိဒရီသယေ၊
မယာ တွံ သမနုညာတော, သောတ္ထိံ ပဿာဟိ ဉာတကေ။
ဧဝံ လုဒ္ဒက နန္ဒဿု, သဟ သဗ္ဗေဟိ ဉာတိဘိ၊
ဘရိဿံ မာတာပိတရော, ဝုဒ္ဓေ ဂိရိဒရီသယေတိ။
မာတုပေါသကဂိဇ္ဈဇာတကံ စတုတ္ထံ။
֍ * ၄၀၀။ ဒဗ္ဘပုပ္ဖဇာတကံ (၇-၁-၅)
အနုတီရစာရီ ဘဒ္ဒန္တေ, သဟာယမနုဓာဝ မံ၊
မဟာ မေ ဂဟိတော [ရောဟိတော (က။)] မစ္ဆော, သော မံ ဟရတိ ဝေဂသာ။
ဂမ္ဘီရစာရီ ဘဒ္ဒန္တေ, ဒဠှံ ဂဏှာဟိ ထာမသာ၊
အဟံ တံ ဥဒ္ဓရိဿာမိ, သုပဏ္ဏော ဥရဂါမိဝ [ဥရဂမ္မိဝ (သီ။ သျာ။ ပီ။)]။
ဝိဝါဒေါ နော သမုပ္ပန္နော, ဒဗ္ဘပုပ္ဖ သုဏောဟိ မေ၊
သမေဟိ မေဓဂံ [မေဓကံ (ပီ။)] သမ္မ, ဝိဝါဒေါ ဝူပသမ္မတံ။
ဓမ္မဋ္ဌောဟံ ပုရေ အာသိံ, ဗဟူ အဍ္ဍာ မေ တီရိတာ [ဗဟုအဋ္ဋံ မေ တီရိတံ (သီ။), ဗဟုအဋ္ဋံဝ တီရိတံ (သျာ။), ဗဟု အတ္ထံ မေ တီရိတံ (ပီ။)]၊
သမေမိ မေဓဂံ သမ္မ, ဝိဝါဒေါ ဝူပသမ္မတံ။
(ဇာ၊၁၊၁၅၉။)အနုတီရစာရိ နင်္ဂုဋ္ဌံ, သီသံ ဂမ္ဘီရစာရိနော၊
အစ္စာယံ [အထာယံ (သီ။ ပီ။)] မဇ္ဈိမော ခဏ္ဍော, ဓမ္မဋ္ဌဿ ဘဝိဿတိ။
စိရမ္ပိ ဘက္ခော အဘဝိဿ, သစေ န ဝိဝဒေမသေ၊
အသီသကံ အနင်္ဂုဋ္ဌံ, သိင်္ဂါလော ဟရတိ ရောဟိတံ။
ယထာပိ ရာဇာ နန္ဒေယျ, ရဇ္ဇံ လဒ္ဓါန ခတ္တိယော၊
ဧဝါဟမဇ္ဇ နန္ဒာမိ, ဒိသွာ ပုဏ္ဏမုခံ ပတိံ။
ကထံ နု ထလဇော သန္တော, ဥဒကေ မစ္ဆံ ပရာမသိ၊
ပုဋ္ဌော မေ သမ္မ အက္ခာဟိ, ကထံ အဓိဂတံ တယာ။
ဝိဝါဒေန ကိသာ ဟောန္တိ, ဝိဝါဒေန ဓနက္ခယာ၊
ဇီနာ ဥဒ္ဒါ ဝိဝါဒေန, ဘုဉ္ဇ မာယာဝိ ရောဟိတံ။
ဧဝမေဝ မနုဿေသု, ဝိဝါဒေါ ယတ္ထ ဇာယတိ၊
ဓမ္မဋ္ဌံ ပဋိဓာဝန္တိ, သော ဟိ နေသံ ဝိနာယကော၊
ဓနာပိ တတ္ထ ဇီယန္တိ, ရာဇကောသော ပဝဍ္ဎတီတိ [စ ဝဍ္ဎတိ (ပီ။)]။
ဒဗ္ဘပုပ္ဖဇာတကံ ပဉ္စမံ။
ပဏ္ဏကံ [ဒသဏ္ဏကံ (သီ။ သျာ။ ပီ။)] တိခိဏဓာရံ, အသိံ သမ္ပန္နပါယိနံ၊
ပရိသာယံ ပုရိသော ဂိလတိ, ကိံ ဒုက္ကရတရံ တတော၊
ယဒညံ ဒုက္ကရံ ဌာနံ, တံ မေ အက္ခာဟိ ပုစ္ဆိတော။
ဂိလေယျ ပုရိသော လောဘာ, အသိံ သမ္ပန္နပါယိနံ၊
ယော စ ဝဇ္ဇာ ဒဒါမီတိ, တံ ဒုက္ကရတရံ တတော၊
သဗ္ဗညံ သုကရံ ဌာနံ, ဧဝံ ဇာနာဟိ မဒ္ဒဝ [မာဂဓ (သီ။ သျာ။ ပီ။)]။
ဗျာကာသိ အာယုရော ပဉှံ, အတ္ထံ [အတ္ထ (ပီ။ သီ။ နိယျ)] ဓမ္မဿ ကောဝိဒေါ၊
ပုက္ကုသံ ဒါနိ ပုစ္ဆာမိ, ကိံ ဒုက္ကရတရံ တတော၊
ယဒညံ ဒုက္ကရံ ဌာနံ, တံ မေ အက္ခာဟိ ပုစ္ဆိတော။
(ဇာ၊၁၊၁၆၀။)န ဝါစမုပဇီဝန္တိ, အဖလံ ဂိရမုဒီရိတံ၊
ယော စ ဒတွာ အဝါကယိရာ, တံ ဒုက္ကရတရံ တတော၊
သဗ္ဗညံ သုကရံ ဌာနံ, ဧဝံ ဇာနာဟိ မဒ္ဒဝ။
ဗျာကာသိ ပုက္ကုသော ပဉှံ, အတ္ထံ ဓမ္မဿ ကောဝိဒေါ၊
သေနကံ ဒါနိ ပုစ္ဆာမိ, ကိံ ဒုက္ကရတရံ တတော၊
ယဒညံ ဒုက္ကရံ ဌာနံ, တံ မေ အက္ခာဟိ ပုစ္ဆိတော။
ဒဒေယျ ပုရိသော ဒါနံ, အပ္ပံ ဝါ ယဒိ ဝါ ဗဟုံ၊
ယော စ ဒတွာ နာနုတပ္ပေ [တပေ (သီ။ ပီ။)], တံ ဒုက္ကရတရံ တတော၊
သဗ္ဗညံ သုကရံ ဌာနံ, ဧဝံ ဇာနာဟိ မဒ္ဒဝ။
ဗျာကာသိ အာယုရော ပဉှံ, အထော ပုက္ကုသပေါရိသော၊
သဗ္ဗေ ပဉှေ အတိဘောတိ, ယထာ ဘာသတိ သေနကောတိ။
ပဏ္ဏက [ဒသဏ္ဏက (သီ။ သျာ။ ပီ။)] ဇာတကံ ဆဋ္ဌံ။
֍ * ၄၀၂။ သတ္တုဘသ္တဇာတကံ (၇-၁-၇)
ဝိဗ္ဘန္တစိတ္တော ကုပိတိန္ဒြိယောသိ, နေတ္တေဟိ တေ ဝါရိဂဏာ သဝန္တိ၊
ကိံ တေ နဋ္ဌံ ကိံ ပန ပတ္ထယာနော, ဣဓာဂမာ ဗြဟ္မေ တဒိင်္ဃ [ဗြာဟ္မဏ ဣင်္ဃ (သီ။ သျာ။)] ဗြူဟိ။
မိယျေထ ဘရိယာ ဝဇတော မမဇ္ဇ, အဂစ္ဆတော မရဏမာဟ ယက္ခော၊
ဧတေန ဒုက္ခေန ပဝေဓိတောသ္မိ, အက္ခာဟိ မေ သေနက ဧတမတ္ထံ။
ဗဟူနိ ဌာနာနိ ဝိစိန္တယိတွာ, ယမေတ္ထ ဝက္ခာမိ တဒေဝ သစ္စံ၊
မညာမိ တေ ဗြာဟ္မဏ သတ္တုဘသ္တံ, အဇာနတော ကဏှသပ္ပေါ ပဝိဋ္ဌော။
(ဇာ၊၁၊၁၆၁။)အာဒါယ ဒဏ္ဍံ ပရိသုမ္ဘ ဘသ္တံ, ပဿေဠမူဂံ ဥရဂံ ဒုဇိဝှံ [ဒိဇိဝှံ (သီ။ ပီ။)]၊
ဆိန္ဒဇ္ဇ ကင်္ခံ ဝိစိကိစ္ဆိတာနိ, ဘုဇင်္ဂမံ ပဿ ပမုဉ္စ ဘသ္တံ။
သံဝိဂ္ဂရူပေါ ပရိသာယ မဇ္ဈေ, သော ဗြာဟ္မဏော သတ္တုဘသ္တံ ပမုဉ္စိ၊
အထ နိက္ခမိ ဥရဂေါ ဥဂ္ဂတေဇော, အာသီဝိသော သပ္ပေါ ဖဏံ ကရိတွာ။
သုလဒ္ဓလာဘာ ဇနကဿ ရညော, ယော ပဿတီ သေနကံ သာဓုပညံ၊
ဝိဝဋ္ဋဆဒ္ဒေါ [ဝိဝတ္တစ္ဆဒ္ဒေါ (သီ။), ဝိဝဋ္ဋစ္ဆဒေါ (သျာ။), ဝိဝဋ္ဋစ္ဆဒ္ဒါ (ပီ။)] နုသိ သဗ္ဗဒဿီ, ဉာဏံ နု တေ ဗြာဟ္မဏ ဘိံသရူပံ။
ဣမာနိ မေ သတ္တသတာနိ အတ္ထိ, ဂဏှာဟိ သဗ္ဗာနိ ဒဒါမိ တုယှံ၊
တယာ ဟိ မေ ဇီဝိတမဇ္ဇ လဒ္ဓံ, အထောပိ ဘရိယာယ မကာသိ သောတ္ထိံ။
န ပဏ္ဍိတာ ဝေတနမာဒိယန္တိ, စိတြာဟိ ဂါထာဟိ သုဘာသိတာဟိ၊
ဣတောပိ တေ ဗြဟ္မေ ဒဒန္တု ဝိတ္တံ, အာဒါယ တွံ ဂစ္ဆ သကံ နိကေတန္တိ။
သတ္တုဘသ္တဇာတကံ [သေနကဇာတကံ (သျာ။)] သတ္တမံ။
֍ * ၄၀၃။ အဋ္ဌိသေနကဇာတကံ (၇-၁-၈)
ယေမေ အဟံ န ဇာနာမိ, အဋ္ဌိသေန ဝနိဗ္ဗကေ၊
တေ မံ သင်္ဂမ္မ ယာစန္တိ, ကသ္မာ မံ တွံ န ယာစသိ။
ယာစကော အပ္ပိယော ဟောတိ, ယာစံ အဒဒမပ္ပိယော၊
တသ္မာဟံ တံ န ယာစာမိ, မာ မေ ဝိဒေဿနာ [ဝိဒ္ဒေသနာ (သီ။ ပီ။)] အဟု။
(ဇာ၊၁၊၁၆၂။)ယော ဝေ ယာစနဇီဝါနော, ကာလေ ယာစံ န ယာစတိ၊
ပရဉ္စ ပုညာ [ပုညံ (သျာ။ က။)] ဓံသေတိ, အတ္တနာပိ န ဇီဝတိ။
ယော စ [ယော ဝေ (က။)] ယာစနဇီဝါနော, ကာလေ ယာစဉှိ ယာစတိ [ယာစံပိ ယာစတိ (သျာ။), ယာစာနိ ယာစတိ (ပီ။), ယာစတိ ယာစနံ (သီ။ နိယျ), ယာစနံ ယာစတိ (က။)]၊
ပရဉ္စ ပုညံ လဗ္ဘေတိ, အတ္တနာပိ စ ဇီဝတိ။
န ဝေ ဒေဿန္တိ [န ဝေ ဒုဿန္တိ (သျာ။), န ဝေ ဒိဿန္တိ (ပီ။), န ဝိဒေဿန္တိ (က။ အဋ္ဌ။)] သပ္ပညာ, ဒိသွာ ယာစကမာဂတေ၊
ဗြဟ္မစာရိ ပိယော မေသိ, ဝဒ တွံ [ဝရ တံ (သီ။), ဝရ တွံ (ပီ။)] ဘညမိစ္ဆသိ [ယညမိစ္ဆသိ (?)]။
န ဝေ ယာစန္တိ သပ္ပညာ, ဓီရော စ ဝေဒိတုမရဟတိ၊
ဥဒ္ဒိဿ အရိယာ တိဋ္ဌန္တိ, ဧသာ အရိယာန ယာစနာ။
ဒဒါမိ တေ ဗြာဟ္မဏ ရောဟိဏီနံ, ဂဝံ သဟဿံ သဟ ပုင်္ဂဝေန၊
အရိယော ဟိ အရိယဿ ကထံ န ဒဇ္ဇာ, သုတွာန ဂါထာ တဝ ဓမ္မယုတ္တာတိ။
အဋ္ဌိသေနကဇာတကံ အဋ္ဌမံ။
ယတ္ထ ဝေရီ နိဝသတိ, န ဝသေ တတ္ထ ပဏ္ဍိတော၊
ဧကရတ္တံ ဒိရတ္တံ ဝါ, ဒုက္ခံ ဝသတိ ဝေရိသု။
ဒိသော ဝေ လဟုစိတ္တဿ, ပေါသဿာနုဝိဓီယတော၊
ဧကဿ ကပိနော ဟေတု, ယူထဿ အနယော ကတော။
ဗာလောဝ [စ (သီ။ သျာ။ ပီ။)] ပဏ္ဍိတမာနီ, ယူထဿ ပရိဟာရကော၊
သစိတ္တဿ ဝသံ ဂန္တွာ, သယေထာယံ [ပဿေထာယံ (က။)] ယထာ ကပိ။
န သာဓု ဗလဝါ ဗာလော, ယူထဿ ပရိဟာရကော၊
အဟိတော ဘဝတိ ဉာတီနံ, သကုဏာနံဝ စေတကော [စေဋကော (က။)]။
(ဇာ၊၁၊၁၆၃။)ဓီရောဝ ဗလဝါ သာဓု, ယူထဿ ပရိဟာရကော၊
ဟိတော ဘဝတိ ဉာတီနံ, တိဒသာနံဝ ဝါသဝေါ။
ယော စ သီလဉ္စ ပညဉ္စ, သုတဉ္စတ္တနိ ပဿတိ၊
ဥဘိန္နမတ္ထံ စရတိ, အတ္တနော စ ပရဿ စ။
တသ္မာ တုလေယျ မတ္တာနံ, သီလပညာသုတာမိဝ [သီလံ ပညံ သုတံပိဝ (သျာ။)]၊
ဂဏံ ဝါ ပရိဟရေ ဓီရော, ဧကော ဝါပိ ပရိဗ္ဗဇေတိ။
ကပိဇာတကံ နဝမံ။
ဒွါသတ္တတိ ဂေါတမ [ဘော ဂေါတမ (က။)] ပုညကမ္မာ, ဝသဝတ္တိနော ဇာတိဇရံ အတီတာ၊
အယမန္တိမာ ဝေဒဂူ ဗြဟ္မပတ္တိ [ဗြဟ္မုပပတ္တိ (သျာ။ က။)], အသ္မာဘိဇပ္ပန္တိ ဇနာ [ပဇာ (က။)] အနေကာ။
အပ္ပဉှိ ဧတံ [အပ္ပဉ္စ ဟေတံ (သျာ။), အပ္ပံသိ ဧတံ (က။)] န ဟိ ဒီဃမာယု, ယံ တွံ ဗက မညသိ ဒီဃမာယုံ၊
သတံ သဟဿာနိ [သဟဿာနံ (သီ။ ပီ။ သံ။ နိ။ ၁။၁၇၅), သဟဿာန (သျာ။ ကံ။)] နိရဗ္ဗုဒါနံ, အာယုံ ပဇာနာမိ တဝါဟ ဗြဟ္မေ။
အနန္တဒဿီ ဘဂဝါဟမသ္မိ, ဇာတိဇ္ဇရံ သောကမုပါတိဝတ္တော၊
ကိံ မေ ပုရာဏံ ဝတသီလဝတ္တံ [သီလဝန္တံ (ပီ။ က။)], အာစိက္ခ မေ တံ ယမဟံ ဝိဇညံ။
ယံ တွံ အပါယေသိ ဗဟူ မနုဿေ, ပိပါသိတေ ဃမ္မနိ သမ္ပရေတေ၊
တံ တေ ပုရာဏံ ဝတသီလဝတ္တံ, သုတ္တပ္ပဗုဒ္ဓေါဝ အနုဿရာမိ။
(ဇာ၊၁၊၁၆၄။)ယံ ဧဏိကူလသ္မိ ဇနံ ဂဟီတံ, အမောစယီ ဂယှက နိယျမာနံ၊
တံ တေ ပုရာဏံ ဝတသီလဝတ္တံ, သုတ္တပ္ပဗုဒ္ဓေါဝ အနုဿရာမိ။
ဂင်္ဂါယ သောတသ္မိံ ဂဟီတနာဝံ, လုဒ္ဒေန နာဂေန မနုဿကပ္ပါ၊
အမောစယိ တွံ ဗလသာ ပသယှ, တံ တေ ပုရာဏံ ဝတသီလဝတ္တံ၊
သုတ္တပ္ပဗုဒ္ဓေါဝ အနုဿရာမိ။
ကပ္ပေါ စ တေ ဗဒ္ဓစရော [ပတ္ထစရော (သျာ။), ပဋ္ဌစရော (က။)] အဟောသိ, သမ္ဗုဒ္ဓိမန္တံ [သမ္ဗုဒ္ဓိဝန္တံ (သျာ။ ပီ။), သမ္ဗုဒ္ဓဝန္တံ (က။)] ဝတိနံ [ဝတိတံ (သျာ။), ဝတိဒံ (က။)] အမညံ၊
တံ တေ ပုရာဏံ ဝတသီလဝတ္တံ, သုတ္တပ္ပဗုဒ္ဓေါဝ အနုဿရာမိ။
အဒ္ဓါ ပဇာနာသိ မမေတမာယုံ, အညမ္ပိ ဇာနာသိ တထာ ဟိ ဗုဒ္ဓေါ၊
တထာ ဟိ တာယံ [တျာယံ (သံ။ နိ။ ၁။၁၇၅)] ဇလိတာနုဘာဝေါ, ဩဘာသယံ တိဋ္ဌတိ ဗြဟ္မလောကန္တိ။
ဗကဇာတကံ ဒသမံ။
ကုက္ကုဝဂ္ဂေါ ပဌမော။
တဿုဒ္ဒါနံ –
ဝရကဏ္ဏိက စာပဝရော သုတနော, အထ ဂိဇ္ဈ သရောဟိတမစ္ဆဝရော၊
ပုန ပဏ္ဏက [ဒသဏ္ဏက (သီ။ သျာ။ ပီ။)] သေနက ယာစနကော, အထ ဝေရိ သဗြဟ္မဗကေန ဒသာတိ။
(ဇာ၊၁၊၁၆၅။)၂။ ဂန္ဓာရဝဂ္ဂေါ
ဟိတွာ ဂါမသဟဿာနိ, ပရိပုဏ္ဏာနိ သောဠသ၊
ကောဋ္ဌာဂါရာနိ ဖီတာနိ, သန္နိဓိံ ဒါနိ ကုဗ္ဗသိ။
ဟိတွာ ဂန္ဓာရဝိသယံ, ပဟူတဓနဓာရိယံ [ဓာနိယံ (သီ။ ပီ။), ဓညန္တိ အတ္ထော]၊
ပသာသနတော [ပသာသနိတော (သီ။ သျာ။), ပသာသနာတော (ပီ။)] နိက္ခန္တော, ဣဓ ဒါနိ ပသာသသိ။
ဓမ္မံ ဘဏာမိ ဝေဒေဟ, အဓမ္မော မေ န ရုစ္စတိ၊
ဓမ္မံ မေ ဘဏမာနဿ, န ပါပမုပလိမ္ပတိ။
ယေန ကေနစိ ဝဏ္ဏေန, ပရော လဘတိ ရုပ္ပနံ၊
မဟတ္ထိယမ္ပိ စေ ဝါစံ, န တံ ဘာသေယျ ပဏ္ဍိတော။
ကာမံ ရုပ္ပတု ဝါ မာ ဝါ, ဘုသံဝ ဝိကိရီယတု၊
ဓမ္မံ မေ ဘဏမာနဿ, န ပါပမုပလိမ္ပတိ။
နော စေ အဿ သကာ ဗုဒ္ဓိ, ဝိနယော ဝါ သုသိက္ခိတော၊
ဝနေ အန္ဓမဟိံသောဝ [အန္ဓမဟိသောဝ (သီ။ ပီ။)] စရေယျ ဗဟုကော ဇနော။
ယသ္မာ စ ပနိဓေကစ္စေ, အာစေရမှိ [အာစာရမှိ (သီ။ ပီ။)] သုသိက္ခိတာ၊
တသ္မာ ဝိနီတဝိနယာ, စရန္တိ သုသမာဟိတာတိ။
ဂန္ဓာရဇာတကံ ပဌမံ။
အတ္တာနံ သင်္ကမံ ကတွာ, ယော သောတ္ထိံ သမတာရယိ၊
ကိံ တွံ တေသံ ကိမေ [ကိမော (သီ။ ပီ။), ကိံ မေ (သျာ။)] တုယှံ, ဟောန္တိ ဧတေ [ဟေတေ (သျာ။), သော တေ (က။)] မဟာကပိ။
ရာဇာဟံ ဣဿရော တေသံ, ယူထဿ ပရိဟာရကော၊
တေသံ သောကပရေတာနံ, ဘီတာနံ တေ အရိန္ဒမ။
ဥလ္လင်္ဃယိတွာ [သ လင်္ဃယိတွာ (ပီ။), သုလင်္ဃယိတွာ (က။)] အတ္တာနံ, ဝိဿဋ္ဌဓနုနော သတံ၊
တတော အပရပါဒေသု, ဒဠှံ ဗန္ဓံ လတာဂုဏံ။
(ဇာ၊၁၊၁၆၆။)ဆိန္နဗ္ဘမိဝ ဝါတေန, နုဏ္ဏော [နုန္နော (သီ။)] ရုက္ခံ ဥပါဂမိံ၊
သောဟံ အပ္ပဘဝံ တတ္ထ, သာခံ ဟတ္ထေဟိ အဂ္ဂဟိံ။
တံ မံ ဝိယာယတံ သန္တံ, သာခါယ စ လတာယ စ၊
သမနုက္ကမန္တာ ပါဒေဟိ, သောတ္ထိံ သာခါမိဂါ ဂတာ။
တံ မံ န တပတေ ဗန္ဓော, မတော [ဝဓော (သီ။ သျာ။ ပီ။)] မေ န တပေဿတိ၊
သုခမာဟရိတံ တေသံ, ယေသံ ရဇ္ဇမကာရယိံ။
ဧသာ တေ ဥပမာ ရာဇ, တံ သုဏောဟိ အရိန္ဒမ [အတ္ထသန္ဒဿနီ ကတာ (ပီ။)]၊
ရညာ ရဋ္ဌဿ ယောဂ္ဂဿ, ဗလဿ နိဂမဿ စ၊
သဗ္ဗေသံ သုခမေဋ္ဌဗ္ဗံ, ခတ္တိယေန ပဇာနတာတိ။
မဟာကပိဇာတကံ ဒုတိယံ။
֍ * ၄၀၈။ ကုမ္ဘကာရဇာတကံ (၇-၂-၃)
အမ္ဗာဟမဒ္ဒံ ဝနမန္တရသ္မိံ, နီလောဘာသံ ဖလိတံ [ဖလိနံ (ပီ။)] သံဝိရူဠှံ၊
တမဒ္ဒသံ ဖလဟေတု ဝိဘဂ္ဂံ, တံ ဒိသွာ ဘိက္ခာစရိယံ စရာမိ။
သေလံ သုမဋ္ဌံ နရဝီရနိဋ္ဌိတံ [နရဝိဒ္ဒုနိဋ္ဌိတံ (က။)], နာရီ ယုဂံ ဓာရယိ အပ္ပသဒ္ဒံ၊
ဒုတိယဉ္စ အာဂမ္မ အဟောသိ သဒ္ဒေါ, တံ ဒိသွာ ဘိက္ခာစရိယံ စရာမိ။
ဒိဇာ ဒိဇံ ကုဏပမာဟရန္တံ, ဧကံ သမာနံ ဗဟုကာ သမေစ္စ၊
အာဟာရဟေတူ ပရိပါတယိံသု, တံ ဒိသွာ ဘိက္ခာစရိယံ စရာမိ။
ဥသဘာဟမဒ္ဒံ ယူထဿ မဇ္ဈေ, စလက္ကကုံ ဝဏ္ဏဗလူပပန္နံ၊
တမဒ္ဒသံ ကာမဟေတု ဝိတုန္နံ, တံ ဒိသွာ ဘိက္ခာစရိယံ စရာမိ။
(ဇာ၊၁၊၁၆၇။)ကရဏ္ဍကော [ကရဏ္ဍုနာမ (သီ။ ပီ။)] ကလိင်္ဂါနံ, ဂန္ဓာရာနဉ္စ နဂ္ဂဇိ၊
နိမိရာဇာ ဝိဒေဟာနံ, ပဉ္စာလာနဉ္စ ဒုမ္မုခေါ၊
ဧတေ ရဋ္ဌာနိ ဟိတွာန, ပဗ္ဗဇိံသု အကိဉ္စနာ။
သဗ္ဗေပိမေ ဒေဝသမာ သမာဂတာ, အဂ္ဂီ ယထာ ပဇ္ဇလိတော တထေဝိမေ၊
အဟမ္ပိ ဧကော စရိဿာမိ ဘဂ္ဂဝိ, ဟိတွာန ကာမာနိ ယထောဓိကာနိ။
အယမေဝ ကာလော န ဟိ အညော အတ္ထိ, အနုသာသိတာ မေ န ဘဝေယျ ပစ္ဆာ၊
အဟမ္ပိ ဧကာ စရိဿာမိ ဘဂ္ဂဝ, သကုဏီဝ မုတ္တာ ပုရိသဿ ဟတ္ထာ။
အာမံ ပက္ကဉ္စ ဇာနန္တိ, အထော လောဏံ အလောဏကံ၊
တမဟံ ဒိသွာန ပဗ္ဗဇိံ, စရေဝ တွံ စရာမဟန္တိ။
ကုမ္ဘကာရဇာတကံ တတိယံ။
အဟံ စေ ဒဠှဓမ္မဿ [ဒဠှဓမ္မာယ (ပီ။)], ဝဟန္တိ နာဘိရာဓယိံ၊
ဓရန္တီ ဥရသိ သလ္လံ, ယုဒ္ဓေ ဝိက္ကန္တစာရိနီ။
နူန ရာဇာ န ဇာနာတိ [န ဟ နူန ရာဇာ ဇာနာတိ (သီ။ ပီ။)], မမ ဝိက္ကမပေါရိသံ၊
သင်္ဂါမေ သုကတန္တာနိ, ဒူတဝိပ္ပဟိတာနိ စ။
သာ နူနာဟံ မရိဿာမိ, အဗန္ဓု အပရာယိနီ [အပရာယိဏီ (သီ။), အပရာယဏီ (?)]၊
တဒါ ဟိ [တထာ ဟိ (ပီ။)] ကုမ္ဘကာရဿ, ဒိန္နာ ဆကဏဟာရိကာ။
ယာဝတာသီသတီ ပေါသော, တာဝဒေဝ ပဝီဏတိ၊
အတ္ထာပါယေ ဇဟန္တိ နံ, ဩဋ္ဌိဗျာဓိံဝ ခတ္တိယော။
ယော ပုဗ္ဗေ ကတကလျာဏော, ကတတ္ထော နာဝဗုဇ္ဈတိ၊
အတ္ထာ တဿ ပလုဇ္ဇန္တိ, ယေ ဟောန္တိ အဘိပတ္ထိတာ။
(ဇာ၊၁၊၁၆၈။)ယော ပုဗ္ဗေ ကတကလျာဏော, ကတတ္ထော မနုဗုဇ္ဈတိ၊
အတ္ထာ တဿ ပဝဍ္ဎန္တိ, ယေ ဟောန္တိ အဘိပတ္ထိတာ။
တံ ဝေါ ဝဒါမိ ဘဒ္ဒန္တေ [ဘဒ္ဒံ ဝေါ (သီ။ သျာ။ ပီ။)], ယာဝန္တေတ္ထ သမာဂတာ၊
သဗ္ဗေ ကတညုနော ဟောထ, စိရံ သဂ္ဂမှိ ဌဿထာတိ။
ဒဠှဓမ္မဇာတကံ စတုတ္ထံ။
֍ * ၄၁၀။ သောမဒတ္တဇာတကံ (၇-၂-၅)
ယော မံ ပုရေ ပစ္စုဍ္ဍေတိ [ပစ္စုဒေတိ (သီ။ သျာ။ ပီ။), ပစ္စုဋ္ဌေတိ (က။)], အရညေ ဒူရမာယတော၊
သော န ဒိဿတိ မာတင်္ဂေါ, သောမဒတ္တော ကုဟိံ ဂတော။
အယံ ဝါ သော မတော သေတိ, အလ္လသိင်္ဂံဝ ဝစ္ဆိတော [အလ္လပိင်္ကဝ ဆိဇ္ဇိတော (သီ။ ပီ။), အလ္လပီတံဝ ဝိစ္ဆိတော (သျာ။)]၊
ဘုမျာ နိပတိတော သေတိ, အမရာ ဝတ ကုဉ္ဇရော။
အနဂါရိယုပေတဿ, ဝိပ္ပမုတ္တဿ တေ သတော၊
သမဏဿ န တံ သာဓု, ယံ ပေတမနုသောစသိ။
သံဝါသေန ဟဝေ သက္က, မနုဿဿ မိဂဿ ဝါ၊
ဟဒယေ ဇာယတေ ပေမံ, တံ န သက္ကာ အသောစိတုံ။
မတံ မရိဿံ ရောဒန္တိ, ယေ ရုဒန္တိ လပန္တိ စ၊
တသ္မာ တွံ ဣသိ မာ ရောဒိ, ရောဒိတံ မောဃမာဟု သန္တော။
ကန္ဒိတေန ဟဝေ ဗြဟ္မေ, မတော ပေတော သမုဋ္ဌဟေ၊
သဗ္ဗေ သင်္ဂမ္မ ရောဒါမ, အညမညဿ ဉာတကေ။
အာဒိတ္တံ ဝတ မံ သန္တံ, ဃတသိတ္တံဝ ပါဝကံ၊
ဝါရိနာ ဝိယ ဩသိဉ္စံ, သဗ္ဗံ နိဗ္ဗာပယေ ဒရံ။
အဗ္ဗဟီ ဝတ မေ သလ္လံ, ယမာသိ ဟဒယဿိတံ၊
ယော မေ သောကပရေတဿ, ပုတ္တသောကံ အပါနုဒိ။
သောဟံ အဗ္ဗူဠှသလ္လောသ္မိ, ဝီတသောကော အနာဝိလော၊
န သောစာမိ န ရောဒါမိ, တဝ သုတွာန ဝါသဝါတိ။
သောမဒတ္တဇာတကံ ပဉ္စမံ။
(ဇာ၊၁၊၁၆၉။)ကာဠာနိ ကေသာနိ ပုရေ အဟေသုံ, ဇာတာနိ သီသမှိ ယထာပဒေသေ၊
တာနဇ္ဇ သေတာနိ သုသီမ [သုသိမ (က။)] ဒိသွာ, ဓမ္မံ စရ ဗြဟ္မစရိယဿ ကာလော။
မမေဝ ဒေဝ ပလိတံ န တုယှံ, မမေဝ သီသံ မမ ဥတ္တမင်္ဂံ၊
‘‘အတ္ထံ ကရိဿ’’န္တိ မုသာ အဘာဏိံ [အဘာသိံ (က။)], ဧကာပရာဓံ ခမ ရာဇသေဋ္ဌ။
ဒဟရော တုဝံ ဒဿနိယောသိ ရာဇ, ပဌမုဂ္ဂတော ဟောသိ [ဟောဟိ (သီ။), ဟောတိ (က။)] ယထာ ကဠီရော၊
ရဇ္ဇဉ္စ ကာရေဟိ မမဉ္စ ပဿ, မာ ကာလိကံ အနုဓာဝီ ဇနိန္ဒ။
ပဿာမိ ဝေါဟံ ဒဟရိံ ကုမာရိံ, သာမဋ္ဌပဿံ သုတနုံ သုမဇ္ဈံ၊
ကာဠပ္ပဝါဠာဝ ပဝေလ္လမာနာ, ပလောဘယန္တီဝ [သာ လောဘယန္တီဝ (ပီ။)] နရေသု ဂစ္ဆတိ။
တမေန ပဿာမိပရေန နာရိံ, အာသီတိကံ နာဝုတိကံ ဝ ဇစ္စာ၊
ဒဏ္ဍံ ဂဟေတွာန ပဝေဓမာနံ, ဂေါပါနသီဘောဂ္ဂသမံ စရန္တိံ။
သောဟံ တမေဝါနုဝိစိန္တယန္တော, ဧကော သယာမိ [ပဿာမိ (က။)] သယနဿ မဇ္ဈေ၊
‘‘အဟမ္ပိ ဧဝံ’’ ဣတိ ပေက္ခမာနော, န ဂဟေ ရမေ [န ဂေဟေ ရမေ (သီ။), ဂေဟေ န ရမေ (သျာ။ က။)] ဗြဟ္မစရိယဿ ကာလော။
(ဇာ၊၁၊၁၇၀။)ရဇ္ဇုဝါလမ္ဗနီ စေသာ, ယာ ဂေဟေ ဝသတော ရတိ၊
ဧဝမ္ပိ ဆေတွာန ဝဇန္တိ ဓီရာ, အနပေက္ခိနော ကာမသုခံ ပဟာယာတိ။
သုသီမဇာတကံ ဆဋ္ဌံ။
֍ * ၄၁၂။ ကောဋသိမ္ဗလိဇာတကံ (၇-၂-၇)
အဟံ ဒသသတံဗျာမံ, ဥရဂမာဒါယ အာဂတော၊
တဉ္စ မဉ္စ မဟာကာယံ, ဓာရယံ နပ္ပဝေဓသိ [န ပဝေဓယိ (က။)]။
အထိမံ ခုဒ္ဒကံ ပက္ခိံ, အပ္ပမံသတရံ မယာ၊
ဓာရယံ ဗျထသိ [ဗျာဓသေ (သီ။), ဗျဓသေ (ပီ။), ဗျာဓသိ (က။)] ဘီတာ [ဘီတော (သီ။ သျာ။ ပီ။)], ကမတ္ထံ ကောဋသိမ္ဗလိ [ကောဋိသိမ္ဗလိ (သီ။ ပီ။)]။
မံသဘက္ခော တုဝံ ရာဇ, ဖလဘက္ခော အယံ ဒိဇော၊
အယံ နိဂြောဓဗီဇာနိ, ပိလက္ခုဒုမ္ဗရာနိ စ၊
အဿတ္ထာနိ စ ဘက္ခိတွာ, ခန္ဓေ မေ ဩဟဒိဿတိ။
တေ ရုက္ခာ သံဝိရူဟန္တိ, မမ ပဿေ နိဝါတဇာ၊
တေ မံ ပရိယောနန္ဓိဿန္တိ, အရုက္ခံ မံ ကရိဿရေ။
သန္တိ အညေပိ ရုက္ခာ သေ, မူလိနော ခန္ဓိနော ဒုမာ၊
ဣမိနာ သကုဏဇာတေန, ဗီဇမာဟရိတာ ဟတာ။
အဇ္ဈာရူဟာဘိဝဍ္ဎန္တိ [အဇ္ဈာရူဠှာဘိဝဍ္ဎန္တိ (သီ။ ပီ။)], ဗြဟန္တမ္ပိ ဝနပ္ပတိံ၊
တသ္မာ ရာဇ ပဝေဓာမိ, သမ္ပဿံနာဂတံ ဘယံ။
သင်္ကေယျ သင်္ကိတဗ္ဗာနိ, ရက္ခေယျာနာဂတံ ဘယံ၊
အနာဂတဘယာ ဓီရော, ဥဘော လောကေ အဝေက္ခတီတိ။
ကောဋသိမ္ဗလိဇာတကံ သတ္တမံ။
ရာဇာ အပုစ္ဆိ ဝိဓုရံ, ဓမ္မကာမော ယုဓိဋ္ဌိလော၊
အပိ ဗြာဟ္မဏ ဇာနာသိ, ကော ဧကော ဗဟု သောစတိ။
(ဇာ၊၁၊၁၇၁။)ဗြာဟ္မဏော အဇယူထေန, ပဟူတေဓော [ဗဟူတေဇော (ပီ။ က။), ဗဟုတေန္ဒော (သျာ။)] ဝနေ ဝသံ၊
ဓူမံ အကာသိ ဝါသေဋ္ဌော, ရတ္တိန္ဒိဝမတန္ဒိတော။
တဿ တံ ဓူမဂန္ဓေန, သရဘာ မကသဍ္ဍိတာ [မကသဒ္ဒိတာ (သီ။ သျာ။), မကသဋ္ဋိတာ (ပီ။ က။)]၊
ဝဿာဝါသံ ဥပါဂစ္ဆုံ, ဓူမကာရိဿ သန္တိကေ။
သရဘေသု မနံ ကတွာ, အဇာ သော နာဝဗုဇ္ဈထ၊
အာဂစ္ဆန္တီ ဝဇန္တီ ဝါ [အာဂစ္ဆန္တိ ဝဇန္တိ ဝါ (သျာ။ ပီ။), အာဂစ္ဆန္တိံ ဝဇန္တိံ ဝါ (က။)], တဿ တာ ဝိနသုံ [ဝိနဿုံ (သီ။)] အဇာ။
သရဘာ သရဒေ ကာလေ, ပဟီနမကသေ ဝနေ၊
ပါဝိသုံ ဂိရိဒုဂ္ဂါနိ, နဒီနံ ပဘဝါနိ စ။
သရဘေ စ ဂတေ ဒိသွာ, အဇာ စ ဝိဘဝံ ဂတာ [အဇေ စ ဝိဘဝံ ဂတေ (က။)]၊
ကိသော စ ဝိဝဏ္ဏော စာသိ, ပဏ္ဍုရောဂီ စ ဗြာဟ္မဏော။
ဧဝံ ယော သံ နိရံကတွာ, အာဂန္တုံ ကုရုတေ ပိယံ၊
သော ဧကော ဗဟု သောစတိ, ဓူမကာရီဝ ဗြာဟ္မဏောတိ။
ဓူမကာရိဇာတကံ အဋ္ဌမံ။
ကောဓ ဇာဂရတံ သုတ္တော, ကောဓ သုတ္တေသု ဇာဂရော၊
ကော မမေတံ ဝိဇာနာတိ, ကော တံ ပဋိဘဏာတိ မေ။
အဟံ ဇာဂရတံ သုတ္တော, အဟံ သုတ္တေသု ဇာဂရော၊
အဟမေတံ ဝိဇာနာမိ, အဟံ ပဋိဘဏာမိ တေ။
ကထံ ဇာဂရတံ သုတ္တော, ကထံ သုတ္တေသု ဇာဂရော၊
ကထံ ဧတံ ဝိဇာနာသိ, ကထံ ပဋိဘဏာသိ မေ။
ယေ ဓမ္မံ နပ္ပဇာနန္တိ, သံယမောတိ ဒမောတိ စ၊
တေသု သုပ္ပမာနေသု, အဟံ ဇဂ္ဂါမိ ဒေဝတေ။
ယေသံ ရာဂေါ စ ဒေါသော စ, အဝိဇ္ဇာ စ ဝိရာဇိတာ၊
တေသု ဇာဂရမာနေသု, အဟံ သုတ္တောသ္မိ ဒေဝတေ။
(ဇာ၊၁၊၁၇၂။)ဧဝံ ဇာဂရတံ သုတ္တော, ဧဝံ သုတ္တေသု ဇာဂရော၊
ဧဝမေတံ ဝိဇာနာမိ, ဧဝံ ပဋိဘဏာမိ တေ။
သာဓု ဇာဂရတံ သုတ္တော, သာဓု သုတ္တေသု ဇာဂရော၊
သာဓုမေတံ ဝိဇာနာသိ, သာဓု ပဋိဘဏာသိ မေတိ။
ဇာဂရဇာတကံ နဝမံ။
֍ * ၄၁၅။ ကုမ္မာသပိဏ္ဍိဇာတကံ (၇-၂-၁၀)
န ကိရတ္ထိ အနောမဒဿိသု, ပါရိစရိယာ ဗုဒ္ဓေသု အပ္ပိကာ [အပ္ပကာ (က။)]၊
သုက္ခာယ အလောဏိကာယ စ, ပဿဖလံ ကုမ္မာသပိဏ္ဍိယာ။
ဟတ္ထိဂဝဿာ စိမေ ဗဟူ [ဟတ္ထိဂဝါဿာ စ မေ ဗဟူ (သီ။), ဟတ္ထီ ဂဝါဿာ စိမေ ဗဟူ (သျာ။), ဟတ္ထီ ဂဝါဿာ စ မေ ဗဟူ (ပီ။)], ဓနဓညံ ပထဝီ စ ကေဝလာ၊
နာရိယော စိမာ အစ္ဆရူပမာ, ပဿဖလံ ကုမ္မာသပိဏ္ဍိယာ။
အဘိက္ခဏံ ရာဇကုဉ္ဇရ, ဂါထာ ဘာသသိ ကောသလာဓိပ၊
ပုစ္ဆာမိ တံ ရဋ္ဌဝဍ္ဎန, ဗာဠှံ ပီတိမနော ပဘာသသိ။
ဣမသ္မိညေဝ နဂရေ, ကုလေ အညတရေ အဟုံ၊
ပရကမ္မကရော အာသိံ, ဘတကော သီလသံဝုတော။
ကမ္မာယ နိက္ခမန္တောဟံ, စတုရော သမဏေဒ္ဒသံ၊
အာစာရသီလသမ္ပန္နေ, သီတိဘူတေ အနာသဝေ။
တေသု စိတ္တံ ပသာဒေတွာ, နိသီဒေတွာ [နိသာဒေတွာ (?)] ပဏ္ဏသန္ထတေ၊
အဒံ ဗုဒ္ဓါန ကုမ္မာသံ, ပသန္နော သေဟိ ပါဏိဘိ။
(ဇာ၊၁၊၁၇၃။)တဿ ကမ္မဿ ကုသလဿ, ဣဒံ မေ ဧဒိသံ ဖလံ၊
အနုဘောမိ ဣဒံ ရဇ္ဇံ, ဖီတံ ဓရဏိမုတ္တမံ။
ဒဒံ ဘုဉ္ဇ မာ စ ပမာဒေါ [ဒဒ ဘုဉ္ဇ စ မာ စ ပမာဒေါ (သီ။ ပီ။)], စက္ကံ ဝတ္တယ ကောသလာဓိပ၊
မာ ရာဇ အဓမ္မိကော အဟု, ဓမ္မံ ပါလယ ကောသလာဓိပ။
သောဟံ တဒေဝ ပုနပ္ပုနံ, ဝဋုမံ အာစရိဿာမိ သောဘနေ၊
အရိယာစရိတံ သုကောသလေ, အရဟန္တော မေ မနာပါဝ ပဿိတုံ။
ဒေဝီ ဝိယ အစ္ဆရူပမာ, မဇ္ဈေ နာရိဂဏဿ သောဘသိ၊
ကိံ ကမ္မမကာသိ ဘဒ္ဒကံ, ကေနာသိ ဝဏ္ဏဝတီ သုကောသလေ။
အမ္ဗဋ္ဌကုလဿ ခတ္တိယ, ဒါသျာဟံ ပရပေသိယာ အဟုံ၊
သညတာ စ [သညတာ (သီ။ ပီ။)] ဓမ္မဇီဝိနီ, သီလဝတီ စ အပါပဒဿနာ။
ဥဒ္ဓဋဘတ္တံ အဟံ တဒါ, စရမာနဿ အဒါသိ ဘိက္ခုနော၊
ဝိတ္တာ သုမနာ သယံ အဟံ, တဿ ကမ္မဿ ဖလံ မမေဒိသန္တိ။
ကုမ္မာသပိဏ္ဍိဇာတကံ ဒသမံ။
အာဂမိဿတိ မေ ပါပံ, အာဂမိဿတိ မေ ဘယံ၊
တဒါ ဟိ စလိတာ သာခါ, မနုဿေန မိဂေန ဝါ။
ဘီရုယာ နူန မေ ကာမော, အဝိဒူရေ ဝသန္တိယာ၊
ကရိဿတိ ကိသံ ပဏ္ဍုံ, သာဝ သာခါ ပရန္တပံ။
(ဇာ၊၁၊၁၇၄။)သောစယိဿတိ မံ ကန္တာ, ဂါမေ ဝသမနိန္ဒိတာ၊
ကရိဿတိ ကိသံ ပဏ္ဍုံ, သာဝ သာခါ ပရန္တပံ။
တယာ မံ အသိတာပင်္ဂိ [ဟသိတာပင်္ဂိ (သီ။ သျာ။ ပီ။)], သိတာနိ [မိဟိတာနိ (သီ။ သျာ။ ပီ။)] ဘဏိတာနိ စ၊
ကိသံ ပဏ္ဍုံ ကရိဿန္တိ, သာဝ သာခါ ပရန္တပံ။
အဂမာ နူန သော သဒ္ဒေါ, အသံသိ နူန သော တဝ၊
အက္ခာတံ နူန တံ တေန, ယော တံ သာခမကမ္ပယိ။
ဣဒံ ခေါ တံ သမာဂမ္မ, မမ ဗာလဿ စိန္တိတံ၊
တဒါ ဟိ စလိတာ သာခါ, မနုဿေန မိဂေန ဝါ။
တထေဝ တွံ အဝေဒေသိ, အဝဉ္စိ [အဝဇ္ဈိ (က။)] ပိတရံ မမ၊
ဟန္တွာ သာခါဟိ ဆာဒေန္တော, အာဂမိဿတိ မေ [တေ (သျာ။ က။)] ဘယန္တိ။
ပရန္တပဇာတကံ ဧကာဒသမံ။
ဂန္ဓာရဝဂ္ဂေါ ဒုတိယော။
တဿုဒ္ဒါနံ –
ဝရဂါမ မဟာကပိ ဘဂ္ဂဝ စ, ဒဠှဓမ္မ သကုဉ္ဇရ ကေသဝရော၊
ဥရဂေါ ဝိဓုရော ပုန ဇာဂရတံ, အထ ကောသလာဓိပ ပရန္တပ စာတိ။
အထ ဝဂ္ဂုဒ္ဒါနံ –
အထ သတ္တနိပါတမှိ, ဝဂ္ဂံ မေ ဘဏတော သုဏ၊
ကုက္ကု စ ပုန ဂန္ဓာရော, ဒွေဝ ဂုတ္တာ မဟေသိနာတိ။
သတ္တကနိပါတံ နိဋ္ဌိတံ။
(ဇာ၊၁၊၁၇၅။)၈။ အဋ္ဌကနိပါတော
ဩဒါတဝတ္ထာ သုစိ အလ္လကေသာ, ကစ္စာနိ ကိံ ကုမ္ဘိမဓိဿယိတွာ [ကုမ္ဘိမပဿယိတွာ (ပီ။)]၊
ပိဋ္ဌာ တိလာ ဓောဝသိ တဏ္ဍုလာနိ, တိလောဒနော ဟေဟိတိ ကိဿ ဟေတု။
န ခေါ အယံ ဗြာဟ္မဏ ဘောဇနတ္ထာ [ဘောဇနတ္ထံ (သျာ။)], တိလောဒနော ဟေဟိတိ သာဓုပက္ကော၊
ဓမ္မော မတော တဿ ပဟုတ္တမဇ္ဇ [ပဟူနမဇ္ဇ (သျာ။), ပဟူတမဇ္ဇ (သီ။), ဗဟူတမဇ္ဇာ (ပီ။)], အဟံ ကရိဿာမိ သုသာနမဇ္ဈေ။
အနုဝိစ္စ ကစ္စာနိ ကရောဟိ ကိစ္စံ, ဓမ္မော မတော ကော နု တဝေဝ [တဝေတ (သီ။ သျာ။ ပီ။)] သံသိ၊
သဟဿနေတ္တော အတုလာနုဘာဝေါ, န မိယျတီ ဓမ္မဝရော ကဒါစိ။
ဒဠှပ္ပမာဏံ မမ ဧတ္ထ ဗြဟ္မေ, ဓမ္မော မတော နတ္ထိ မမေတ္ထ ကင်္ခါ၊
ယေ ယေဝ ဒါနိ ပါပါ ဘဝန္တိ, တေ တေဝ ဒါနိ သုခိတာ ဘဝန္တိ။
သုဏိသာ ဟိ မယှံ ဝဉ္ဈာ အဟောသိ, သာ မံ ဝဓိတွာန ဝိဇာယိ ပုတ္တံ၊
သာ ဒါနိ သဗ္ဗဿ ကုလဿ ဣဿရာ, အဟံ ပနမှိ [ဝသာမိ (သျာ။)] အပဝိဒ္ဓါ ဧကိကာ။
(ဇာ၊၁၊၁၇၆။)ဇီဝါမိ ဝေါဟံ န မတောဟမသ္မိ [နာဟံ မတောသ္မိ (သီ။ ပီ။)], တဝေဝ အတ္ထာယ ဣဓာဂတောသ္မိ၊
ယာ တံ ဝဓိတွာန ဝိဇာယိ ပုတ္တံ, သဟာဝ ပုတ္တေန ကရောမိ ဘသ္မံ။
ဧဝဉ္စ [ဧတဉ္စ (သီ။ ပီ။)] တေ ရုစ္စတိ ဒေဝရာဇ, မမေဝ အတ္ထာယ ဣဓာဂတောသိ၊
အဟဉ္စ ပုတ္တော သုဏိသာ စ နတ္တာ, သမ္မောဒမာနာ ဃရမာဝသေမ။
ဧဝဉ္စ တေ ရုစ္စတိ ကာတိယာနိ, ဟတာပိ သန္တာ န ဇဟာသိ ဓမ္မံ၊
တုဝဉ္စ [တွဉ္စ (ပီ။ က။)] ပုတ္တော သုဏိသာ စ နတ္တာ, သမ္မောဒမာနာ ဃရမာဝသေထ။
သာ ကာတိယာနီ သုဏိသာယ သဒ္ဓိံ, သမ္မောဒမာနာ ဃရမာဝသိတ္ထ၊
ပုတ္တော စ နတ္တာ စ ဥပဋ္ဌဟိံသု, ဒေဝါနမိန္ဒေန အဓိဂ္ဂဟီတာတိ။
ကစ္စာနိဇာတကံ ပဌမံ။
ဣဒံ ပုရေ နိန္နမာဟု, ဗဟုမစ္ဆံ မဟောဒကံ၊
အာဝါသော ဗကရာဇဿ, ပေတ္တိကံ ဘဝနံ မမ၊
တျဇ္ဇ ဘေကေန [ဘိင်္ဂေန (က။)] ယာပေမ, ဩကံ န ဝဇဟာမသေ [ဩကန္တံ န ဇဟာမသေ (က။)]။
ကော ဒုတိယံ အသီလိဿ, ဗန္ဓရဿက္ခိ ဘေစ္ဆတိ [ဘေဇ္ဇတိ (သီ။ သျာ။ ပီ။), ဘိန္ဒတိ (က။)]၊
ကော မေ ပုတ္တေ ကုလာဝကံ, မဉ္စ သောတ္ထိံ ကရိဿတိ။
သဗ္ဗာ ပရိက္ခယာ ဖေဂ္ဂု, ယာဝ တဿာ ဂတီ အဟု၊
ခီဏဘက္ခော မဟာရာဇ, သာရေ န ရမတီ ဃုဏော။
(ဇာ၊၁၊၁၇၇။)သာ နူနာဟံ ဣတော ဂန္တွာ, ရညော မုတ္တာ နိဝေသနာ၊
အတ္တာနံ ရမယိဿာမိ, ဒုမသာခနိကေတိနီ။
သော နူနာဟံ ဣတော ဂန္တွာ, ရညော မုတ္တော နိဝေသနာ၊
အဂ္ဂေါဒကာနိ ပိဿာမိ, ယူထဿ ပုရတော ဝဇံ။
တံ မံ ကာမေဟိ သမ္မတ္တံ, ရတ္တံ ကာမေသု မုစ္ဆိတံ၊
အာနယီ ဘရတော [ဝနတော (က။)] လုဒ္ဒေါ, ဗာဟိကော ဘဒ္ဒမတ္ထု တေ။
အန္ဓကာရတိမိသာယံ, တုင်္ဂေ ဥပရိပဗ္ဗတေ၊
သာ မံ သဏှေန မုဒုနာ, မာ ပါဒံ ခလိ [ခဏိ (သီ။ သျာ။ ပီ။)] ယသ္မနိ။
အသံသယံ ဇာတိခယန္တဒဿီ, န ဂဗ္ဘသေယျံ ပုနရာဝဇိဿံ၊
အယမန္တိမာ ပစ္ဆိမာ ဂဗ္ဘသေယျာ [အယံ ဟိ မေ အန္တိမာ ဂဗ္ဘသေယျာ (သီ။ ပီ။)], ခီဏော မေ သံသာရော ပုနဗ္ဘဝါယာတိ။
အဋ္ဌသဒ္ဒဇာတကံ ဒုတိယံ။
ဣဒံ သုဝဏ္ဏကာယူရံ, မုတ္တာ ဝေဠုရိယာ ဗဟူ၊
သဗ္ဗံ ဟရဿု ဘဒ္ဒန္တေ, မဉ္စ ဒါသီတိ သာဝယ။
ဩရောပယဿု ကလျာဏိ, မာ ဗာဠှံ [ဗဟုံ (သီ။ သျာ။ ပီ။)] ပရိဒေဝသိ၊
န စာဟံ အဘိဇာနာမိ, အဟန္တွာ ဓနမာဘတံ။
ယတော သရာမိ အတ္တာနံ, ယတော ပတ္တာသ္မိ ဝိညုတံ၊
န စာဟံ အဘိဇာနာမိ, အညံ ပိယတရံ တယာ။
ဧဟိ တံ ဥပဂူဟိဿံ [ဥပဂုယှိဿံ (က။)], ကရိဿဉ္စ ပဒက္ခိဏံ၊
န ဟိ ဒါနိ ပုန အတ္ထိ, မမ တုယှဉ္စ သင်္ဂမော။
န ဟိ သဗ္ဗေသု ဌာနေသု, ပုရိသော ဟောတိ ပဏ္ဍိတော၊
ဣတ္ထီပိ ပဏ္ဍိတာ ဟောတိ, တတ္ထ တတ္ထ ဝိစက္ခဏာ။
(ဇာ၊၁၊၁၇၈။)န ဟိ သဗ္ဗေသု ဌာနေသု, ပုရိသော ဟောတိ ပဏ္ဍိတော၊
ဣတ္ထီပိ ပဏ္ဍိတာ ဟောတိ, လဟုံ အတ္ထံ ဝိစိန္တိကာ [လဟုမတ္ထဝိစိန္တိကာ (သီ။ ပီ။)]။
လဟုဉ္စ ဝတ ခိပ္ပဉ္စ, နိကဋ္ဌေ သမစေတယိ၊
မိဂံ ပုဏ္ဏာယတေနေဝ [ပုဏ္ဏာယတနေဝ (သျာ။)], သုလသာ သတ္တုကံ ဝဓိ။
ယောဓ ဥပ္ပတိတံ အတ္ထံ, န ခိပ္ပမနုဗုဇ္ဈတိ၊
သော ဟညတိ မန္ဒမတိ, စောရောဝ ဂိရိဂဗ္ဘရေ။
ယော စ ဥပ္ပတိတံ အတ္ထံ, ခိပ္ပမေဝ နိဗောဓတိ၊
မုစ္စတေ သတ္တုသမ္ဗာဓာ, သုလသာ သတ္တုကာမိဝါတိ။
သုလသာဇာတကံ တတိယံ။
ဘုသမှိ [ဘုသမ္ပိ (က။), ဘုသံ ဟိ (သီ။ နိယျ)] ကုဒ္ဓေါတိ အဝေက္ခိယာန, န တာဝ ဒဏ္ဍံ ပဏယေယျ ဣဿရော၊
အဋ္ဌာနသော အပ္ပတိရူပမတ္တနော, ပရဿ ဒုက္ခာနိ ဘုသံ ဥဒီရယေ။
ယတော စ ဇာနေယျ ပသာဒမတ္တနော, အတ္ထံ နိယုဉ္ဇေယျ ပရဿ ဒုက္ကဋံ၊
တဒါယမတ္ထောတိ သယံ အဝေက္ခိယ, အထဿ ဒဏ္ဍံ သဒိသံ နိဝေသယေ။
န စာပိ ဈာပေတိ ပရံ န အတ္တနံ, အမုစ္ဆိတော ယော နယတေ နယာနယံ၊
ယော ဒဏ္ဍဓာရော ဘဝတီဓ ဣဿရော, သ ဝဏ္ဏဂုတ္တော သိရိယာ န ဓံသတိ။
ယေ ခတ္တိယာ သေ အနိသမ္မကာရိနော, ပဏေန္တိ ဒဏ္ဍံ သဟသာ ပမုစ္ဆိတာ၊
အဝဏ္ဏသံယုတာ [ယုတ္တာဝ (က။)] ဇဟန္တိ ဇီဝိတံ, ဣတော ဝိမုတ္တာပိ စ ယန္တိ ဒုဂ္ဂတိံ။
(ဇာ၊၁၊၁၇၉။)ဓမ္မေ စ ယေ အရိယပ္ပဝေဒိတေ ရတာ, အနုတ္တရာ တေ ဝစသာ မနသာ ကမ္မုနာ စ၊
တေ သန္တိသောရစ္စသမာဓိသဏ္ဌိတာ, ဝဇန္တိ လောကံ ဒုဘယံ တထာဝိဓာ။
ရာဇာဟမသ္မိ နရပမဒါနမိဿရော, သစေပိ ကုဇ္ဈာမိ ဌပေမိ အတ္တနံ၊
နိသေဓယန္တော ဇနတံ တထာဝိဓံ, ပဏေမိ ဒဏ္ဍံ အနုကမ္ပ ယောနိသော။
သိရီ စ လက္ခီ စ တဝေဝ ခတ္တိယ, ဇနာဓိပ မာ ဝိဇဟိ ကုဒါစနံ၊
အက္ကောဓနော နိစ္စပသန္နစိတ္တော, အနီဃော တုဝံ ဝဿသတာနိ ပါလယ။
ဂုဏေဟိ ဧတေဟိ ဥပေတ ခတ္တိယ, ဌိတမရိယဝတ္တီ [ဝတ္တိ (သီ။), ဝုတ္တိ (က။)] သုဝစော အကောဓနော၊
သုခီ အနုပ္ပီဠ ပသာသမေဒိနိံ [အနုပ္ပီဠံ သဟသမေဒနိံ (က။)], ဣတော ဝိမုတ္တောပိ စ ယာဟိ သုဂ္ဂတိံ။
ဧဝံ သုနီတေန [သုဝိနီတေန (ပီ။)] သုဘာသိတေန, ဓမ္မေန ဉာယေန ဥပါယသော နယံ၊
နိဗ္ဗာပယေ သင်္ခုဘိတံ မဟာဇနံ, မဟာဝ မေဃော သလိလေန မေဒိနိန္တိ [မေဒနိန္တိ (သျာ။ က။)]။
သုမင်္ဂလဇာတကံ စတုတ္ထံ။
အင်္ဂါရဇာတာ ပထဝီ, ကုက္ကုဠာနုဂတာ မဟီ၊
အထ ဂါယသိ ဝတ္တာနိ [ဝတ္ထာနိ (က။)], န တံ တပတိ အာတပေါ။
ဥဒ္ဓံ တပတိ အာဒိစ္စော, အဓော တပတိ ဝါလုကာ၊
အထ ဂါယသိ ဝတ္တာနိ [ဝတ္ထာနိ (က။)], န တံ တပတိ အာတပေါ။
(ဇာ၊၁၊၁၈၀။)န မံ တပတိ အာတပေါ, အာတပါ [အာတပ္ပါ (သီ။ သျာ။ ပီ။)] တပယန္တိ မံ၊
အတ္ထာ ဟိ ဝိဝိဓာ ရာဇ, တေ တပန္တိ န အာတပေါ။
အဒ္ဒသံ ကာမ တေ မူလံ, သင်္ကပ္ပါ ကာမ ဇာယသိ၊
န တံ သင်္ကပ္ပယိဿာမိ, ဧဝံ ကာမ န ဟေဟိသိ။
အပ္ပါပိ ကာမာ န အလံ, ဗဟူဟိပိ န တပ္ပတိ၊
အဟဟာ ဗာလလပနာ, ပရိဝဇ္ဇေထ [ပဋိဝိဇ္ဈေထ (ပီ။ သီ။ အဋ္ဌ။)] ဇဂ္ဂတော။
အပ္ပဿ ကမ္မဿ ဖလံ မမေဒံ, ဥဒယော အဇ္ဈာဂမာ မဟတ္တပတ္တံ၊
သုလဒ္ဓလာဘော ဝတ မာဏဝဿ, ယော ပဗ္ဗဇီ ကာမရာဂံ ပဟာယ။
တပသာ ပဇဟန္တိ ပါပကမ္မံ, တပသာ နှာပိတကုမ္ဘကာရဘာဝံ၊
တပသာ အဘိဘုယျ ဂင်္ဂမာလ, နာမေနာလပသဇ္ဇ ဗြဟ္မဒတ္တံ။
သန္ဒိဋ္ဌိကမေဝ ‘‘အမ္မ’’ ပဿထ, ခန္တီသောရစ္စဿ အယံ [ယော (သျာ။ ပီ။ က။)] ဝိပါကော၊
ယော [သော (သျာ။ က။)] သဗ္ဗဇနဿ ဝန္ဒိတောဟု, တံ ဝန္ဒာမ သရာဇိကာ သမစ္စာ။
မာ ကိဉ္စိ အဝစုတ္ထ ဂင်္ဂမာလံ, မုနိနံ မောနပထေသု သိက္ခမာနံ၊
ဧသော ဟိ အတရိ အဏ္ဏဝံ, ယံ တရိတွာ စရန္တိ ဝီတသောကာတိ။
ဇင်္ဂမာလဇာတကံ ပဉ္စမံ။
ဓမ္မော ဟဝေ ဟတော ဟန္တိ, နာဟတော ဟန္တိ ကိဉ္စနံ [ကဉ္စိနံ (ပီ။)]၊
တသ္မာ ဟိ ဓမ္မံ န ဟနေ, မာ တွံ [တံ (သျာ။ ပီ။)] ဓမ္မော ဟတော ဟနိ။
(ဇာ၊၁၊၁၈၁။)အလိကံ ဘာသမာနဿ, အပက္ကမန္တိ ဒေဝတာ၊
ပူတိကဉ္စ မုခံ ဝါတိ, သကဋ္ဌာနာ စ ဓံသတိ၊
ယော ဇာနံ ပုစ္ဆိတော ပဉှံ, အညထာ နံ ဝိယာကရေ။
သစေ ဟိ သစ္စံ ဘဏသိ, ဟောဟိ ရာဇ ယထာ ပုရေ၊
မုသာ စေ ဘာသသေ ရာဇ, ဘူမိယံ တိဋ္ဌ စေတိယ။
အကာလေ ဝဿတီ တဿ, ကာလေ တဿ န ဝဿတိ၊
ယော ဇာနံ ပုစ္ဆိတော ပဉှံ, အညထာ နံ ဝိယာကရေ။
သစေ ဟိ သစ္စံ ဘဏသိ, ဟောဟိ ရာဇ ယထာ ပုရေ၊
မုသာ စေ ဘာသသေ ရာဇ, ဘူမိံ ပဝိသ စေတိယ။
ဇိဝှါ တဿ ဒွိဓာ ဟောတိ, ဥရဂဿေဝ ဒိသမ္ပတိ၊
ယော ဇာနံ ပုစ္ဆိတော ပဉှံ, အညထာ နံ ဝိယာကရေ။
သစေ ဟိ သစ္စံ ဘဏသိ, ဟောဟိ ရာဇ ယထာ ပုရေ၊
မုသာ စေ ဘာသသေ ရာဇ, ဘိယျော ပဝိသ စေတိယ။
ဇိဝှါ တဿ န ဘဝတိ, မစ္ဆဿေဝ ဒိသမ္ပတိ၊
ယော ဇာနံ ပုစ္ဆိတော ပဉှံ, အညထာ နံ ဝိယာကရေ။
သစေ ဟိ သစ္စံ ဘဏသိ, ဟောဟိ ရာဇ ယထာ ပုရေ၊
မုသာ စေ ဘာသသေ ရာဇ, ဘိယျော ပဝိသ စေတိယ။
ထိယောဝ တဿ ဇာယန္တိ [ထိယော တဿ ပဇာယန္တိ (က။)], န ပုမာ ဇာယရေ ကုလေ၊
ယော ဇာနံ ပုစ္ဆိတော ပဉှံ, အညထာ နံ ဝိယာကရေ။
သစေ ဟိ သစ္စံ ဘဏသိ, ဟောဟိ ရာဇ ယထာ ပုရေ၊
မုသာ စေ ဘာသသေ ရာဇ, ဘိယျော ပဝိသ စေတိယ။
ပုတ္တာ တဿ န ဘဝန္တိ, ပက္ကမန္တိ ဒိသောဒိသံ၊
ယော ဇာနံ ပုစ္ဆိတော ပဉှံ, အညထာ နံ ဝိယာကရေ။
သစေ ဟိ သစ္စံ ဘဏသိ, ဟောဟိ ရာဇ ယထာ ပုရေ၊
မုသာ စေ ဘာသသေ ရာဇ, ဘိယျော ပဝိသ စေတိယ။
(ဇာ၊၁၊၁၈၂။)သ ရာဇာ ဣသိနာ သတ္တော, အန္တလိက္ခစရော ပုရေ၊
ပါဝေက္ခိ ပထဝိံ စေစ္စော, ဟီနတ္တော ပတွ ပရိယာယံ [အတ္တပရိယာယံ (သီ။ သျာ။), ပတ္တပရိယာယံ (က။ သီ။ နိယျ)]။
တသ္မာ ဟိ ဆန္ဒာဂမနံ, နပ္ပသံသန္တိ ပဏ္ဍိတာ၊
အဒုဋ္ဌစိတ္တော ဘာသေယျ, ဂိရံ သစ္စူပသံဟိတန္တိ။
စေတိယဇာတကံ ဆဋ္ဌံ။
ယော ဣန္ဒြိယာနံ ကာမေန, ဝသံ နာရဒ ဂစ္ဆတိ၊
သော ပရိစ္စဇ္ဇုဘော လောကေ, ဇီဝန္တောဝ ဝိသုဿတိ [ဇီဝန္တောပိဝိသုဿတိ (သျာ။), ဇီဝန္တော ဝါပိ သုဿတိ (က။)]။
သုခဿာနန္တရံ ဒုက္ခံ, ဒုက္ခဿာနန္တရံ သုခံ၊
သောသိ [သောပိ (သျာ။ ပီ။ က။)] ပတ္တော သုခါ [သုခ (သျာ။), သုခံ (က။)] ဒုက္ခံ, ပါဋိကင်္ခ ဝရံ သုခံ။
ကိစ္ဆကာလေ ကိစ္ဆသဟော, ယော ကိစ္ဆံ နာတိဝတ္တတိ၊
သ ကိစ္ဆန္တံ သုခံ ဓီရော, ယောဂံ သမဓိဂစ္ဆတိ။
န ဟေဝ ကာမာန ကာမာ, နာနတ္ထာ နာတ္ထကာရဏာ၊
န ကတဉ္စ နိရင်္ကတွာ, ဓမ္မာ စဝိတုမရဟသိ။
ဒက္ခံ ဂဟပတီ [ဂဟပတံ (သီ။ သျာ။ ပီ။), ဂဟဝတံ (?)] သာဓု, သံဝိဘဇ္ဇဉ္စ ဘောဇနံ၊
အဟာသော အတ္ထလာဘေသု, အတ္ထဗျာပတ္တိ အဗျထော။
ဧတ္တာဝတေတံ ပဏ္ဍိစ္စံ, အပိ သော [အသိတော (သီ။ သျာ။ ပီ။)] ဒဝိလော [ဒေဝလော (သီ။ ပီ။)] ဗြဝိ၊
န ယိတော ကိဉ္စိ ပါပိယော, ယော ဣန္ဒြိယာနံ ဝသံ ဝဇေ။
အမိတ္တာနံဝ ဟတ္ထတ္ထံ, သိဝိ ပပ္ပေါတိ မာမိဝ၊
ကမ္မံ ဝိဇ္ဇဉ္စ ဒက္ခေယျံ, ဝိဝါဟံ သီလမဒ္ဒဝံ၊
ဧတေ စ ယသေ ဟာပေတွာ, နိဗ္ဗတ္တော သေဟိ ကမ္မေဟိ။
သောဟံ သဟဿဇီနောဝ အဗန္ဓု အပရာယဏော၊
အရိယဓမ္မာ အပက္ကန္တော, ယထာ ပေတော တထေဝဟံ။
(ဇာ၊၁၊၁၈၃။)သုခကာမေ ဒုက္ခာပေတွာ, အာပန္နောသ္မိ ပဒံ ဣမံ၊
သော သုခံ နာဓိဂစ္ဆာမိ, ဌိတော [စိတော (ပီ။ သီ။ အဋ္ဌ။)] ဘာဏုမတာမိဝါတိ။
ဣန္ဒြိယဇာတကံ သတ္တမံ။
အာဒိတ္တသ္မိံ အဂါရသ္မိံ, ယံ နီဟရတိ ဘာဇနံ၊
တံ တဿ ဟောတိ အတ္ထာယ, နော စ ယံ တတ္ထ ဍယှတိ။
ဧဝါမာဒီပိတော လောကော, ဇရာယ မရဏေန စ၊
နီဟရေထေဝ ဒါနေန, ဒိန္နံ ဟောတိ သုနီဟတံ [သုနီဘတံ (သီ။ သျာ။ ပီ။), သုနိဗ္ဘတံ (က။)]။
ယော ဓမ္မလဒ္ဓဿ ဒဒါတိ ဒါနံ, ဥဋ္ဌာနဝီရိယာဓိဂတဿ ဇန္တု၊
အတိက္ကမ္မ သော ဝေတရဏိံ [ဝေတ္တရဏိံ (က။)] ယမဿ, ဒိဗ္ဗာနိ ဌာနာနိ ဥပေတိ မစ္စော။
ဒါနဉ္စ ယုဒ္ဓဉ္စ သမာနမာဟု, အပ္ပါပိ သန္တာ ဗဟုကေ ဇိနန္တိ၊
အပ္ပမ္ပိ စေ သဒ္ဒဟာနော ဒဒါတိ, တေနေဝ သော ဟောတိ သုခီ ပရတ္ထ။
ဝိစေယျ ဒါနံ သုဂတပ္ပသတ္ထံ, ယေ ဒက္ခိဏေယျာ ဣဓ ဇီဝလောကေ၊
ဧတေသု ဒိန္နာနိ မဟပ္ဖလာနိ, ဗီဇာနိ ဝုတ္တာနိ ယထာ သုခေတ္တေ။
ယော ပါဏဘူတာနိ အဟေဌယံ စရံ, ပရူပဝါဒါ န ကရောတိ ပါပံ၊
ဘီရုံ ပသံသန္တိ န တတ္ထ သူရံ, ဘယာ ဟိ သန္တော န ကရောန္တိ ပါပံ။
ဟီနေန ဗြဟ္မစရိယေန, ခတ္တိယေ ဥပပဇ္ဇတိ၊
မဇ္ဈိမေန စ ဒေဝတ္တံ, ဥတ္တမေန ဝိသုဇ္ဈတိ။
(ဇာ၊၁၊၁၈၄။)အဒ္ဓါ ဟိ ဒါနံ ဗဟုဓာ ပသတ္ထံ, ဒါနာ စ ခေါ ဓမ္မပဒံဝ သေယျော၊
ပုဗ္ဗေဝ ဟိ ပုဗ္ဗတရေဝ သန္တော [ပုဗ္ဗေ စ ဟိ ပုဗ္ဗတရေ စ သန္တော (သံ။ နိ။ ၁။၃၃)], နိဗ္ဗာနမေဝဇ္ဈဂမုံ သပညာတိ။
အာဒိတ္တဇာတကံ အဋ္ဌမံ။
ဂင်္ဂါ ကုမုဒိနီ သန္တာ, သင်္ခဝဏ္ဏာ စ ကောကိလာ၊
ဇမ္ဗု တာလဖလံ ဒဇ္ဇာ, အထ နူန တဒါ သိယာ။
ယဒါ ကစ္ဆပလောမာနံ, ပါဝါရော တိဝိဓော သိယာ၊
ဟေမန္တိကံ ပါဝုရဏံ [ပါပုရဏံ (သီ။ သျာ။ ပီ။)], အထ နူန တဒါ သိယာ။
ယဒါ မကသပါဒါနံ [ဒါဌာနံ (သီ။ ပီ။)], အဋ္ဋာလော သုကတော သိယာ၊
ဒဠှော စ အဝိကမ္ပီ စ [အပ္ပကမ္ပီ စ (သီ။ ပီ။)], အထ နူန တဒါ သိယာ။
ယဒါ သသဝိသာဏာနံ, နိဿေဏီ သုကတာ သိယာ၊
သဂ္ဂဿာရောဟဏတ္ထာယ, အထ နူန တဒါ သိယာ။
ယဒါ နိဿေဏိမာရုယှ, စန္ဒံ ခါဒေယျု မူသိကာ၊
ရာဟုဉ္စ ပရိပါတေယျုံ [ပရိဗာဟေယျုံ (သျာ။)], အထ နူန တဒါ သိယာ။
ယဒါ သုရာဃဋံ ပိတွာ, မက္ခိကာ ဂဏစာရိဏီ၊
အင်္ဂါရေ ဝါသံ ကပ္ပေယျုံ, အထ နူန တဒါ သိယာ။
ယဒါ ဗိမ္ဗောဋ္ဌသမ္ပန္နော, ဂဒြဘော သုမုခေါ သိယာ၊
ကုသလော နစ္စဂီတဿ, အထ နူန တဒါ သိယာ။
ယဒါ ကာကာ ဥလူကာ စ, မန္တယေယျုံ ရဟောဂတာ၊
အညမညံ ပိဟယေယျုံ, အထ နူန တဒါ သိယာ။
ယဒါ မုဠာလ [ပုလသ (သီ။ ပီ။), ပုလာသ (သျာ။)] ပတ္တာနံ, ဆတ္တံ ထိရတရံ သိယာ၊
ဝဿဿ ပဋိဃာတာယ, အထ နူန တဒါ သိယာ။
(ဇာ၊၁၊၁၈၅။)ယဒါ ကုလကော [ကုလုင်္ကော (သီ။ ပီ။), ကုလုကော (သျာ။)] သကုဏော, ပဗ္ဗတံ ဂန္ဓမာဒနံ၊
တုဏ္ဍေနာဒါယ ဂစ္ဆေယျ, အထ နူန တဒါ သိယာ။
ယဒါ သာမုဒ္ဒိကံ နာဝံ, သ-ယန္တံ သ-ဝဋာကရံ [သပဋာကာရံ (က။)]၊
စေဋော အာဒါယ ဂစ္ဆေယျ, အထ နူန တဒါ သိယာတိ။
အဋ္ဌာနဇာတကံ နဝမံ။
ခမနီယံ ယာပနီယံ, ကစ္စိ မာတုလ တေ သုခံ၊
သုခံ တေ အမ္မာ အဝစ, သုခကာမာဝ [သုခကာမာ ဟိ (သီ။ သျာ။ ပီ။)] တေ မယံ။
နင်္ဂုဋ္ဌံ မေ အဝက္ကမ္မ [အပက္ကမ္မ (က။)], ဟေဌယိတွာန [ပေါထယိတွာန (က။)] ဧဠိကေ [ဧဠကိ (သျာ။), ဧဠိကိ (ပီ။)]၊
သာဇ္ဇ မာတုလဝါဒေန, မုဉ္စိတဗ္ဗာ နု မညသိ။
ပုရတ္ထာမုခေါ နိသိန္နောသိ, အဟံ တေ မုခမာဂတာ၊
ပစ္ဆတော တုယှံ နင်္ဂုဋ္ဌံ, ကထံ ခွါဟံ အဝက္ကမိံ [အပက္ကမိံ (က။)]။
ယာဝတာ စတုရော ဒီပါ, သသမုဒ္ဒါ သပဗ္ဗတာ၊
တာဝတာ မယှံ နင်္ဂုဋ္ဌံ, ကထံ ခေါ တွံ ဝိဝဇ္ဇယိ။
ပုဗ္ဗေဝ မေတမက္ခိံသု [မေတံ အက္ခံသု (သီ။ ပီ။)], မာတာ ပိတာ စ ဘာတရော၊
ဒီဃံ ဒုဋ္ဌဿ နင်္ဂုဋ္ဌံ, သာမှိ ဝေဟာယသာဂတာ။
တဉ္စ ဒိသွာန အာယန္တိံ, အန္တလိက္ခသ္မိ ဧဠိကေ၊
မိဂသံဃော ပလာယိတ္ထ, ဘက္ခော မေ နာသိတော တယာ။
ဣစ္စေဝံ ဝိလပန္တိယာ, ဧဠကိယာ ရုဟဂ္ဃသော၊
ဂလကံ အနွာဝမဒ္ဒိ, နတ္ထိ ဒုဋ္ဌေ သုဘာသိတံ။
(ဇာ၊၁၊၁၈၆။)နေဝ ဒုဋ္ဌေ နယော အတ္ထိ, န ဓမ္မော န သုဘာသိတံ၊
နိက္ကမံ ဒုဋ္ဌေ ယုဉ္ဇေထ, သော စ သဗ္ဘိံ န ရဉ္ဇတီတိ။
ဒီပိဇာတကံ ဒသမံ။
အဋ္ဌကနိပါတံ နိဋ္ဌိတံ။
တဿုဒ္ဒါနံ –
ပရိသုဒ္ဓါ မနာဝိလာ ဝတ္ထဓရာ, ဗကရာဇဿ ကာယုရံ ဒဏ္ဍဝရော၊
အထ အင်္ဂါရ စေတိယ ဒေဝိလိနာ, အထ အာဒိတ္တ ဂင်္ဂါ ဒသေဠကိနာတိ။
(ဇာ၊၁၊၁၈၇။)၉။ နဝကနိပါတော
ပရိသင်္ကုပထော နာမ, ဂိဇ္ဈပန္ထော သနန္တနော၊
တတြာသိ မာတာပိတရော, ဂိဇ္ဈော ပေါသေသိ ဇိဏ္ဏကေ၊
တေသံ အဇဂရမေဒံ, အစ္စဟာသိ ဗဟုတ္တသော [ပဟုတ္တတော (က။ သီ။), ပဟူတသော (သျာ။ ပီ။), ဗဟုဓသော (က။)]။
ပိတာ စ ပုတ္တံ အဝစ, ဇာနံ ဥစ္စံ ပပါတိနံ၊
သုပတ္တံ ထာမသမ္ပန္နံ [ပက္ခသမ္ပန္နံ (သီ။ သျာ။ ပီ။)], တေဇဿိံ ဒူရဂါမိနံ။
ပရိပ္လဝန္တံ ပထဝိံ, ယဒါ တာတ ဝိဇာနဟိ၊
သာဂရေန ပရိက္ခိတ္တံ, စက္ကံဝ ပရိမဏ္ဍလံ၊
တတော တာတ နိဝတ္တဿု, မာဿု ဧတ္တော ပရံ ဂမိ။
ဥဒပတ္တောသိ [ဥဒ္ဓံ ပတ္တောသိ (က။ သီ။)] ဝေဂေန, ဗလီ ပက္ခီ ဒိဇုတ္တမော၊
ဩလောကယန္တော ဝက္ကင်္ဂေါ, ပဗ္ဗတာနိ ဝနာနိ စ။
အဒ္ဒဿ ပထဝိံ ဂိဇ္ဈော, ယထာသာသိ [ယထာဿာသိ (သျာ။ အဋ္ဌ။ ပါဌန္တရံ)] ပိတုဿုတံ၊
သာဂရေန ပရိက္ခိတ္တံ, စက္ကံဝ ပရိမဏ္ဍလံ။
တဉ္စ သော သမတိက္ကမ္မ, ပရမေဝစ္စဝတ္တထ [ပရမေဝ ပဝတ္တထ (သီ။ သျာ။)]၊
တဉ္စ ဝါတသိခါ တိက္ခာ, အစ္စဟာသိ ဗလိံ ဒိဇံ။
နာသက္ခာတိဂတော ပေါသော, ပုနဒေဝ နိဝတ္တိတုံ၊
ဒိဇော ဗျသနမာပါဒိ, ဝေရမ္ဘာနံ [ဝေရမ္ဗာနံ (သီ။ ပီ။)] ဝသံ ဂတော။
တဿ ပုတ္တာ စ ဒါရာ စ, ယေ စညေ အနုဇီဝိနော၊
သဗ္ဗေ ဗျသနမာပါဒုံ, အနောဝါဒကရေ ဒိဇေ။
ဧဝမ္ပိ ဣဓ ဝုဍ္ဎာနံ, ယော ဝါကျံ နာဝဗုဇ္ဈတိ၊
အတိသီမစရော ဒိတ္တော, ဂိဇ္ဈောဝါတီတသာသနော၊
သ ဝေ ဗျသနံ ပပ္ပေါတိ, အကတွာ ဝုဍ္ဎသာသနန္တိ။
ဂိဇ္ဈဇာတကံ ပဌမံ။
(ဇာ၊၁၊၁၈၈။)ပုထုသဒ္ဒေါ သမဇနော, န ဗာလော ကောစိ မညထ၊
သံဃသ္မိံ ဘိဇ္ဇမာနသ္မိံ, နာညံ ဘိယျော အမညရုံ။
ပရိမုဋ္ဌာ ပဏ္ဍိတာဘာသာ, ဝါစာဂေါစရဘာဏိနော၊
ယာဝိစ္ဆန္တိ မုခါယာမံ, ယေန နီတာ န တံ ဝိဒူ။
အက္ကောစ္ဆိ မံ အဝဓိ မံ, အဇိနိ မံ အဟာသိ မေ၊
ယေ စ တံ ဥပနယှန္တိ, ဝေရံ တေသံ န သမ္မတိ။
အက္ကောစ္ဆိ မံ အဝဓိ မံ, အဇိနိ မံ အဟာသိ မေ၊
ယေ စ တံ နုပနယှန္တိ, ဝေရံ တေသူပသမ္မတိ။
န ဟိ ဝေရေန ဝေရာနိ, သမ္မန္တီဓ ကုဒါစနံ၊
အဝေရေန စ သမ္မန္တိ, ဧသ ဓမ္မော သနန္တနော။
ပရေ စ န ဝိဇာနန္တိ, မယမေတ္ထ ယမာမသေ၊
ယေ စ တတ္ထ ဝိဇာနန္တိ, တတော သမ္မန္တိ မေဓဂါ။
အဋ္ဌိစ္ဆိန္နာ ပါဏဟရာ, ဂဝဿ [ဂဝါဿ (သီ။ သျာ။ ပီ။)] ဓနဟာရိနော၊
ရဋ္ဌံ ဝိလုမ္ပမာနာနံ, တေသမ္ပိ ဟောတိ သင်္ဂတိ၊
ကသ္မာ တုမှာက နော သိယာ။
သစေ လဘေထ နိပကံ သဟာယံ, သဒ္ဓိံစရံ သာဓုဝိဟာရိဓီရံ၊
အဘိဘုယျ သဗ္ဗာနိ ပရိဿယာနိ, စရေယျ တေနတ္တမနော သတီမာ။
နော စေ လဘေထ နိပကံ သဟာယံ, သဒ္ဓိံစရံ သာဓုဝိဟာရိဓီရံ၊
ရာဇာဝ ရဋ္ဌံ ဝိဇိတံ ပဟာယ, ဧကော စရေ မာတင်္ဂရညေဝ နာဂေါ။
(ဇာ၊၁၊၁၈၉။)ဧကဿ စရိတံ သေယျော, နတ္ထိ ဗာလေ သဟာယတာ၊
ဧကော စရေ န ပါပါနိ ကယိရာ, အပ္ပေါဿုက္ကော မာတင်္ဂရညေဝ နာဂေါတိ။
ကောသမ္ဗိယဇာတကံ ဒုတိယံ။
ဒုမော ယဒါ ဟောတိ ဖလူပပန္နော, ဘုဉ္ဇန္တိ နံ ဝိဟင်္ဂမာ [ဝိဟဂါ (သီ။ ပီ။)] သမ္ပတန္တာ၊
ခီဏန္တိ ဉတွာန ဒုမံ ဖလစ္စယေ [ဉတွာ ဒုမပ္ဖလစ္စယေန (က။)], ဒိသောဒိသံ ယန္တိ တတော ဝိဟင်္ဂမာ။
စရ စာရိကံ လောဟိတတုဏ္ဍ မာမရိ, ကိံ တွံ သုဝ သုက္ခဒုမမှိ ဈာယသိ၊
တဒိင်္ဃ မံ ဗြူဟိ ဝသန္တသန္နိဘ, ကသ္မာ သုဝ သုက္ခဒုမံ န ရိဉ္စသိ။
ယေ ဝေ သခီနံ သခါရော ဘဝန္တိ, ပါဏစ္စယေ [ပါဏံ စဇေ (က။), ပါဏစ္စယေ မရဏကာလေ စ သုခဒုက္ခေသု စ န ဇဟန္တီတိ သမ္ဗန္ဓော] ဒုက္ခသုခေသု ဟံသ၊
ခီဏံ အခီဏန္တိ န တံ ဇဟန္တိ, သန္တော သတံ ဓမ္မမနုဿရန္တာ။
သောဟံ သတံ အညတရောသ္မိ ဟံသ, ဉာတီ စ မေ ဟောတိ သခါ စ ရုက္ခော၊
တံ နုဿဟေ ဇီဝိကတ္ထော ပဟာတုံ, ခီဏန္တိ ဉတွာန န ဟေသ ဓမ္မော [န သောသ (က။), န ဧသ (သျာ။)]။
သာဓု သက္ခိ ကတံ ဟောတိ, မေတ္တိ သံသတိ သန္ထဝေါ [မိတ္တံ သင်္ဂတိ သန္ဓဝေါ (က။)]၊
သစေတံ ဓမ္မံ ရောစေသိ, ပါသံသောသိ ဝိဇာနတံ။
သော တေ သုဝ ဝရံ ဒမ္မိ, ပတ္တယာန ဝိဟင်္ဂမ၊
ဝရံ ဝရဿု ဝက္ကင်္ဂ, ယံ ကိဉ္စိ မနသိစ္ဆသိ။
(ဇာ၊၁၊၁၉၀။)ဝရဉ္စ မေ ဟံသ ဘဝံ ဒဒေယျ, အယဉ္စ ရုက္ခော ပုနရာယုံ လဘေထ၊
သော သာခဝါ ဖလိမာ သံဝိရူဠှော, မဓုတ္ထိကော တိဋ္ဌတု သောဘမာနော။
တံ ပဿ သမ္မ ဖလိမံ ဥဠာရံ, သဟာဝ တေ ဟောတု ဥဒုမ္ဗရေန၊
သော သာခဝါ ဖလိမာ သံဝိရူဠှော, မဓုတ္ထိကော တိဋ္ဌတု သောဘမာနော။
ဧဝံ သက္က သုခီ ဟောဟိ, သဟ သဗ္ဗေဟိ ဉာတိဘိ၊
ယထာဟမဇ္ဇ သုခိတော, ဒိသွာန သဖလံ ဒုမံ။
သုဝဿ စ ဝရံ ဒတွာ, ကတွာန သဖလံ ဒုမံ၊
ပက္ကာမိ သဟ ဘရိယာယ, ဒေဝါနံ နန္ဒနံ ဝနန္တိ။
မဟာသုဝဇာတကံ တတိယံ။
သန္တိ ရုက္ခာ ဟရိပတ္တာ [ဟရိတပတ္တာ (သီ။ သျာ။ ပီ။)], ဒုမာ နေကဖလာ ဗဟူ၊
ကသ္မာ နု သုက္ခေ [သုက္ခ (က။)] ကောဠာပေ, သုဝဿ နိရတော မနော။
ဖလဿ ဥပဘုဉ္ဇိမှာ, နေကဝဿဂဏေ ဗဟူ၊
အဖလမ္ပိ ဝိဒိတွာန, သာဝ မေတ္တိ ယထာ ပုရေ။
သုခဉ္စ ရုက္ခံ ကောဠာပံ, ဩပတ္တမဖလံ ဒုမံ၊
ဩဟာယ သကုဏာ ယန္တိ, ကိံ ဒေါသံ ပဿသေ ဒိဇ။
ယေ ဖလတ္ထာ သမ္ဘဇန္တိ, အဖလောတိ ဇဟန္တိ နံ၊
အတ္တတ္ထပညာ ဒုမ္မေဓာ, တေ ဟောန္တိ ပက္ခပါတိနော။
သာဓု သက္ခိ ကတံ ဟောတိ, မေတ္တိ သံသတိ သန္ထဝေါ၊
သစေတံ ဓမ္မံ ရောစေသိ, ပါသံသောသိ ဝိဇာနတံ။
သော တေ သုဝ ဝရံ ဒမ္မိ, ပတ္တယာန ဝိဟင်္ဂမ၊
ဝရံ ဝရဿု ဝက္ကင်္ဂ, ယံ ကိဉ္စိ မနသိစ္ဆသိ။
(ဇာ၊၁၊၁၉၁။)အပိ နာမ နံ ပဿေယျံ [အပိ နာမ နံ ပုန ပဿေ (သီ။ သျာ။)], သပတ္တံ သဖလံ ဒုမံ၊
ဒလိဒ္ဒေါဝ နိဓိ လဒ္ဓါ, နန္ဒေယျာဟံ ပုနပ္ပုနံ။
တတော အမတမာဒါယ, အဘိသိဉ္စိ မဟီရုဟံ၊
တဿ သာခါ ဝိရူဟိံသု [ဝိရူဠှဿ (က။)], သီတစ္ဆာယာ မနောရမာ။
ဧဝံ သက္က သုခီ ဟောဟိ, သဟ သဗ္ဗေဟိ ဉာတိဘိ၊
ယထာဟမဇ္ဇ သုခိတော, ဒိသွာန သဖလံ ဒုမံ။
သုဝဿ စ ဝရံ ဒတွာ, ကတွာန သဖလံ ဒုမံ၊
ပက္ကာမိ သဟ ဘရိယာယ, ဒေဝါနံ နန္ဒနံ ဝနန္တိ။
စူဠသုဝဇာတကံ စတုတ္ထံ။
သုတံ မေတံ မဟာဗြဟ္မေ, ကာမေ ဘုဉ္ဇတိ ဟာရိတော၊
ကစ္စေတံ ဝစနံ တုစ္ဆံ, ကစ္စိ သုဒ္ဓေါ ဣရိယျသိ။
ဧဝမေတံ မဟာရာဇ, ယထာ တေ ဝစနံ သုတံ၊
ကုမ္မဂ္ဂံ ပဋိပန္နောသ္မိ, မောဟနေယျေသု မုစ္ဆိတော။
အဒု [အာဒု (သီ။ ပီ။)] ပညာ ကိမတ္ထိယာ, နိပုဏာ သာဓုစိန္တိနီ [စိန္တနီ (သီ။ ပီ။)]၊
ယာယ ဥပ္ပတိတံ ရာဂံ, ကိံ မနော န ဝိနောဒယေ။
စတ္တာရောမေ မဟာရာဇ, လောကေ အတိဗလာ ဘုသာ၊
ရာဂေါ ဒေါသော မဒေါ မောဟော, ယတ္ထ ပညာ န ဂါဓတိ။
အရဟာ သီလသမ္ပန္နော, သုဒ္ဓေါ စရတိ ဟာရိတော၊
မေဓာဝီ ပဏ္ဍိတော စေဝ, ဣတိ နော သမ္မတော ဘဝံ။
မေဓာဝီနမ္ပိ ဟိံသန္တိ, ဣသိံ ဓမ္မဂုဏေ ရတံ၊
ဝိတက္ကာ ပါပကာ ရာဇ, သုဘာ ရာဂူပသံဟိတာ။
(ဇာ၊၁၊၁၉၂။)ဥပ္ပန္နာယံ သရီရဇော, ရာဂေါ ဝဏ္ဏဝိဒူသနော တဝ၊
တံ ပဇဟ ဘဒ္ဒမတ္ထု တေ, ဗဟုန္နာသိ မေဓာဝိသမ္မတော။
တေ အန္ဓကာရကေ [ကရဏေ (သီ။ သျာ။ ပီ။)] ကာမေ, ဗဟုဒုက္ခေ မဟာဝိသေ၊
တေသံ မူလံ ဂဝေသိဿံ, ဆေစ္ဆံ ရာဂံ သဗန္ဓနံ။
ဣဒံ ဝတွာန ဟာရိတော, ဣသိ သစ္စပရက္ကမော၊
ကာမရာဂံ ဝိရာဇေတွာ, ဗြဟ္မလောကူပဂေါ အဟူတိ။
ဟရိတစဇာတကံ [ဟာရိတဇာတကံ (သီ။ ပီ။)] ပဉ္စမံ။
ဗဟုဿုတံ စိတ္တကထိံ [စိတ္တကထံ (သျာ။ က။)], ဂင်္ဂါ ဝဟတိ ပါဋလိံ [ပါဋလံ (သီ။ ပီ။)]၊
ဝုယှမာနက ဘဒ္ဒန္တေ, ဧကံ မေ ဒေဟိ ဂါထကံ [ဂီတကံ (က။ အဋ္ဌ။)]။
ယေန သိဉ္စန္တိ ဒုက္ခိတံ, ယေန သိဉ္စန္တိ အာတုရံ၊
တဿ မဇ္ဈေ မရိဿာမိ, ဇာတံ သရဏတော ဘယံ။
ယတ္ထ ဗီဇာနိ ရူဟန္တိ, သတ္တာ ယတ္ထ ပတိဋ္ဌိတာ၊
သာ မေ သီသံ နိပီဠေတိ, ဇာတံ သရဏတော ဘယံ။
ယေန ဘတ္တာနိ ပစ္စန္တိ, သီတံ ယေန ဝိဟညတိ၊
သော မံ ဍဟတိ [ဒယှတိ (က။)] ဂတ္တာနိ, ဇာတံ သရဏတော ဘယံ။
ယေန ဘုတ္တေန [ဘတ္တေန (သျာ။ က။)] ယာပေန္တိ, ပုထူ ဗြာဟ္မဏခတ္တိယာ၊
သော မံ ဘုတ္တော ဗျာပါဒေတိ, ဇာတံ သရဏတော ဘယံ။
ဂိမှာနံ ပစ္ဆိမေ မာသေ, ဝါတမိစ္ဆန္တိ ပဏ္ဍိတာ၊
သော မံ [သော မေ (သီ။ ပီ။)] ဘဉ္ဇတိ ဂတ္တာနိ, ဇာတံ သရဏတော ဘယံ။
ယံ နိဿိတာ ဇဂတိရုဟံ, သွာယံ အဂ္ဂိံ ပမုဉ္စတိ၊
ဒိသာ ဘဇထ ဝက္ကင်္ဂါ, ဇာတံ သရဏတော ဘယံ။
(ဇာ၊၁၊၁၉၃။)ယမာနယိံ သောမနဿံ, မာလိနိံ စန္ဒနုဿဒံ၊
သာ မံ ဃရာ နိစ္ဆုဘတိ [နီဟရတိ (သီ။ သျာ။)], ဇာတံ သရဏတော ဘယံ။
ယေန ဇာတေန နန္ဒိဿံ, ယဿ စ ဘဝမိစ္ဆိသံ၊
သော မံ ဃရာ နိစ္ဆုဘတိ [နီဟရတိ (သီ။ သျာ။)], ဇာတံ သရဏတော ဘယံ။
သုဏန္တု မေ ဇာနပဒါ, နေဂမာ စ သမာဂတာ၊
ယတောဒကံ တဒါဒိတ္တံ, ယတော ခေမံ တတော ဘယံ။
ရာဇာ ဝိလုမ္ပတေ ရဋ္ဌံ, ဗြာဟ္မဏော စ ပုရောဟိတော၊
အတ္တဂုတ္တာ ဝိဟရထ, ဇာတံ သရဏတော ဘယန္တိ။
ပဒကုသလမာဏဝဇာတကံ ဆဋ္ဌံ။
အဿ ဣန္ဒသမော ရာဇ, အစ္စန္တံ အဇရာမရော၊
သစေ တွံ ယညံ ယာဇေယျ, ဣသိံ လောမသကဿပံ။
သသမုဒ္ဒပရိယာယံ, မဟိံ သာဂရကုဏ္ဍလံ၊
န ဣစ္ဆေ သဟ နိန္ဒာယ, ဧဝံ သေယျ [သယှ (သီ။ သျာ။ ပီ။)] ဝိဇာနဟိ။
ဓိရတ္ထု တံ ယသလာဘံ, ဓနလာဘဉ္စ ဗြာဟ္မဏ၊
ယာ ဝုတ္တိ ဝိနိပါတေန, အဓမ္မစရဏေန ဝါ။
အပိ စေ ပတ္တမာဒါယ, အနဂါရော ပရိဗ္ဗဇေ၊
သာယေဝ ဇီဝိကာ သေယျော, ယာ စာဓမ္မေန ဧသနာ။
အပိ စေ ပတ္တမာဒါယ, အနဂါရော ပရိဗ္ဗဇေ၊
အညံ အဟိံသယံ လောကေ, အပိ ရဇ္ဇေန တံ ဝရံ။
ဗလံ စန္ဒော ဗလံ သုရိယော, ဗလံ သမဏဗြာဟ္မဏာ၊
ဗလံ ဝေလာ သမုဒ္ဒဿ, ဗလာတိဗလမိတ္ထိယော။
ယထာ ဥဂ္ဂတပံ သန္တံ, ဣသိံ လောမသကဿပံ၊
ပိတု အတ္ထာ စန္ဒဝတီ, ဝါဇပေယျံ [ဝါစပေယျံ (ပီ။ က။)] အယာဇယိ။
တံ လောဘပကတံ ကမ္မံ, ကဋုကံ ကာမဟေတုကံ၊
တဿ မူလံ ဂဝေသိဿံ, ဆေစ္ဆံ ရာဂံ သဗန္ဓနံ။
(ဇာ၊၁၊၁၉၄။)ဓိရတ္ထု ကာမေ သုဗဟူပိ လောကေ, တပေါဝ သေယျော ကာမဂုဏေဟိ ရာဇ၊
တပေါ ကရိဿာမိ ပဟာယ ကာမေ, တဝေဝ ရဋ္ဌံ စန္ဒဝတီ စ ဟောတူတိ။
လောမသကဿပဇာတကံ သတ္တမံ။
ကာသာယဝတ္ထေ သကုဏေ ဝဒါမိ, ဒုဝေ ဒုဝေ နန္ဒမနေ [နန္ဒိမနေ (သီ။ ပီ။)] စရန္တေ၊
ကံ အဏ္ဍဇံ အဏ္ဍဇာ မာနုသေသု, ဇာတိံ ပသံသန္တိ တဒိင်္ဃ ဗြူထ။
အမှေ မနုဿေသု မနုဿဟိံသ, အနုဗ္ဗတေ [အနုပုဗ္ဗကေ (က။)] စက္ကဝါကေ ဝဒန္တိ၊
ကလျာဏဘာဝမှေ [ဘာဝ’မှ (သီ။ ပီ။)] ဒိဇေသု သမ္မတာ, အဘိရူပါ [အဘီတရူပါ (သီ။ သျာ။ ပီ။)] ဝိစရာမ အဏ္ဏဝေ။ ( ) [(န ဃာသဟေတူပိ ကရောမ ပါပံ) (က။)]
ကိံ အဏ္ဏဝေ ကာနိ ဖလာနိ ဘုဉ္ဇေ, မံသံ ကုတော ခါဒထ စက္ကဝါကာ၊
ကိံ ဘောဇနံ ဘုဉ္ဇထ ဝေါ အနောမာ [အဘိဏှံ (က။)], ဗလဉ္စ ဝဏ္ဏော စ အနပ္ပရူပါ [အနပ္ပရူပေါ (သီ။ သျာ။ ပီ။)]။
န အဏ္ဏဝေ သန္တိ ဖလာနိ ဓင်္က, မံသံ ကုတော ခါဒိတုံ စက္ကဝါကေ၊
သေဝါလဘက္ခမှ [ဘက္ခိမှ (က။)] အပါဏဘောဇနာ [အဝါကဘောဇနာ (သီ။ ပီ။)], န ဃာသဟေတူပိ ကရောမ ပါပံ။
န မေ ဣဒံ ရုစ္စတိ စက္ကဝါက, အသ္မိံ ဘဝေ ဘောဇနသန္နိကာသော၊
အဟောသိ ပုဗ္ဗေ တတော မေ အညထာ, ဣစ္စေဝ မေ ဝိမတိ ဧတ္ထ ဇာတာ။
(ဇာ၊၁၊၁၉၅။)အဟမ္ပိ မံသာနိ ဖလာနိ ဘုဉ္ဇေ, အန္နာနိ စ လောဏိယတေလိယာနိ၊
ရသံ မနုဿေသု လဘာမိ ဘောတ္တုံ, သူရောဝ သင်္ဂါမမုခံ ဝိဇေတွာ၊
န စ မေ တာဒိသော ဝဏ္ဏော, စက္ကဝါက ယထာ တဝ။
အသုဒ္ဓဘက္ခောသိ ခဏာနုပါတီ, ကိစ္ဆေန တေ လဗ္ဘတိ အန္နပါနံ၊
န တုဿသီ ရုက္ခဖလေဟိ ဓင်္က, မံသာနိ ဝါ ယာနိ သုသာနမဇ္ဈေ။
ယော သာဟသေန အဓိဂမ္မ ဘောဂေ, ပရိဘုဉ္ဇတိ ဓင်္က ခဏာနုပါတီ၊
တတော ဥပက္ကောသတိ နံ သဘာဝေါ, ဥပက္ကုဋ္ဌော ဝဏ္ဏဗလံ ဇဟာတိ။
အပ္ပမ္ပိ စေ နိဗ္ဗုတိံ ဘုဉ္ဇတီ ယဒိ, အသာဟသေန အပရူပဃာတီ [အသာဟသေနာနုပဃာတိနော (က။)]၊
ဗလဉ္စ ဝဏ္ဏော စ တဒဿ ဟောတိ, န ဟိ သဗ္ဗော အာဟာရမယေန ဝဏ္ဏောတိ။
စက္ကဝါကဇာတကံ အဋ္ဌမံ။
သုတိတိက္ခံ အရညမှိ, ပန္တမှိ သယနာသနေ၊
ယေ စ ဂါမေ တိတိက္ခန္တိ, တေ ဥဠာရတရာ တယာ။
အရညာ ဂါမမာဂမ္မ, ကိံသီလံ ကိံဝတံ အဟံ၊
ပုရိသံ တာတ သေဝေယျံ, တံ မေ အက္ခာဟိ ပုစ္ဆိတော။
ယော တေ [ယော တံ (သျာ။ ဇာ။ ၁။၄။၁၉၀ အရညဇာတကေပိ)] ဝိဿာသယေ တာတ, ဝိဿာသဉ္စ ခမေယျ တေ၊
သုဿူသီ စ တိတိက္ခီ စ, တံ ဘဇေဟိ ဣတော ဂတော။
(ဇာ၊၁၊၁၉၆။)ယဿ ကာယေန ဝါစာယ, မနသာ နတ္ထိ ဒုက္ကဋံ၊
ဥရသီဝ ပတိဋ္ဌာယ, တံ ဘဇေဟိ ဣတော ဂတော။
ယော စ ဓမ္မေန စရတိ, စရန္တောပိ န မညတိ၊
ဝိသုဒ္ဓကာရိံ သပ္ပညံ, တံ ဘဇေဟိ ဣတော ဂတော။
ဟလိဒ္ဒိရာဂံ ကပိစိတ္တံ, ပုရိသံ ရာဂဝိရာဂိနံ၊
တာဒိသံ တာတ မာ သေဝိ, နိမ္မနုဿမ္ပိ စေ သိယာ။
အာသီဝိသံဝ ကုပိတံ, မီဠှလိတ္တံ မဟာပထံ၊
အာရကာ ပရိဝဇ္ဇေဟိ, ယာနီဝ ဝိသမံ ပထံ။
အနတ္ထာ တာတ ဝဍ္ဎန္တိ, ဗာလံ အစ္စုပသေဝတော၊
မာဿု ဗာလေန သံဂစ္ဆိ, အမိတ္တေနေဝ သဗ္ဗဒါ။
တံ တာဟံ တာတ ယာစာမိ, ကရဿု ဝစနံ မမ၊
မာဿု ဗာလေန သံဂစ္ဆိ [သံဂဉ္ဆိ (သီ။ ပီ။)], ဒုက္ခော ဗာလေဟိ သင်္ဂမောတိ။
ဟလိဒ္ဒိရာဂဇာတကံ နဝမံ။
ကုတော နု အာဂစ္ဆထ ဘော တယော ဇနာ, သွာဂတာ ဧထ [သွာဂတံ ဧတ္ထ (သီ။ ပီ။)] နိသီဒထာသနေ၊
ကစ္စိတ္ထ ဘောန္တော ကုသလံ အနာမယံ, စိရဿမဗ္ဘာဂမနံ ဟိ ဝေါ ဣဓ။
အဟမေဝ ဧကော ဣဓ မဇ္ဇ ပတ္တော, န စာပိ မေ ဒုတိယော ကောစိ ဝိဇ္ဇတိ၊
ကိမေဝ သန္ဓာယ တေ ဘာသိတံ ဣသေ, ‘‘ကုတော နု အာဂစ္ဆထ ဘော တယော ဇနာ’’။
တုဝဉ္စ ဧကော ဘရိယာ စ တေ ပိယာ, သမုဂ္ဂပက္ခိတ္တနိကိဏ္ဏမန္တရေ၊
သာ ရက္ခိတာ ကုစ္ဆိဂတာဝ [ကုစ္ဆိဂတာ စ (က။)] တေ သဒါ, ဝါယုဿ [ဟရိဿ (က။)] ပုတ္တေန သဟာ တဟိံ ရတာ။
(ဇာ၊၁၊၁၉၇။)သံဝိဂ္ဂရူပေါ ဣသိနာ ဝိယာကတော [ပဗျာကတော (က။), ဗျာကတော (သျာ။ ပီ။)], သော ဒါနဝေါ တတ္ထ သမုဂ္ဂမုဂ္ဂိလိ၊
အဒ္ဒက္ခိ ဘရိယံ သုစိ မာလဓာရိနိံ, ဝါယုဿ ပုတ္တေန သဟာ တဟိံ ရတံ။
သုဒိဋ္ဌရူပမုဂ္ဂတပါနုဝတ္တိနာ [သုဒိဋ္ဌရူပုဂ္ဂတပါနုဝတ္တိနာ (သီ။ သျာ။ ပီ။)], ဟီနာ နရာ ယေ ပမဒါဝသံ ဂတာ၊
ယထာ ဟဝေ ပါဏရိဝေတ္ထ ရက္ခိတာ, ဒုဋ္ဌာ မယီ အညမဘိပ္ပမောဒယိ။
ဒိဝါ စ ရတ္တော စ မယာ ဥပဋ္ဌိတာ, တပဿိနာ ဇောတိရိဝါ ဝနေ ဝသံ၊
သာ ဓမ္မမုက္ကမ္မ အဓမ္မမာစရိ, အကိရိယရူပေါ ပမဒါဟိ သန္ထဝေါ။
သရီရမဇ္ဈမှိ ဌိတာတိမညဟံ, မယှံ အယန္တိ အသတိံ အသညတံ၊
သာ ဓမ္မမုက္ကမ္မ အဓမ္မမာစရိ, အကိရိယရူပေါ ပမဒါဟိ သန္ထဝေါ။
သုရက္ခိတံ မေတိ ကထံ နု ဝိဿသေ, အနေကစိတ္တာသု န ဟတ္ထိ [အနေကစိတ္တာ ပုန ဟေတ္ထ (က။)] ရက္ခဏာ၊
ဧတာ ဟိ ပါတာလပပါတသန္နိဘာ, ဧတ္ထပ္ပမတ္တော ဗျသနံ နိဂစ္ဆတိ။
တသ္မာ ဟိ တေ သုခိနော ဝီတသောကာ, ယေ မာတုဂါမေဟိ စရန္တိ နိဿဋာ၊
ဧတံ သိဝံ ဥတ္တမမာဘိပတ္ထယံ, န မာတုဂါမေဟိ ကရေယျ သန္ထဝန္တိ။
သမုဂ္ဂဇာတကံ ဒသမံ။
(ဇာ၊၁၊၁၉၈။)န ခေါ မေ ရုစ္စတိ အာဠိ, ပူတိမံသဿ ပေက္ခနာ၊
ဧတာဒိသာ သခါရသ္မာ, အာရကာ ပရိဝဇ္ဇယေ။
ဥမ္မတ္တိကာ အယံ ဝေဏီ, ဝဏ္ဏေတိ ပတိနော သခိံ၊
ပဇ္ဈာယိ [ပဇ္ဈာတိ (သီ။ ပီ။), ပဇ္ဈာယတိ (သီ။ နိယျ)] ပဋိဂစ္ဆန္တိံ, အာဂတံ မေဏ္ဍ [မေဠ (သီ။ ပီ။)] မာတရံ။
တွံ ခေါသိ သမ္မ ဥမ္မတ္တော, ဒုမ္မေဓော အဝိစက္ခဏော၊
ယော တွံ [သော တွံ (သျာ။)] မတာလယံ ကတွာ, အကာလေန ဝိပေက္ခသိ။
န အကာလေ ဝိပေက္ခေယျ, ကာလေ ပေက္ခေယျ ပဏ္ဍိတော၊
ပူတိမံသောဝ ပဇ္ဈာယိ [ပဇ္ဈာတိ (သီ။ ပီ။), ပဇ္ဈာယတိ (သီ။ နိယျ)], ယော အကာလေ ဝိပေက္ခတိ။
ပိယံ ခေါ အာဠိ မေ ဟောတု, ပုဏ္ဏပတ္တံ ဒဒါဟိ မေ၊
ပတိ သဉ္ဇီဝိတော မယှံ, ဧယျာသိ ပိယပုစ္ဆိကာ [ပုစ္ဆိတာ (သျာ။ က။)]။
ပိယံ ခေါ အာဠိ တေ ဟောတု, ပုဏ္ဏပတ္တံ ဒဒါမိ တေ၊
မဟတာ ပရိဝါရေန [ပရိဟာရေန (သျာ။)], ဧဿံ [ဧသံ (သီ။ ပီ။)] ကယိရာဟိ [ကယိရာသိ (ပီ။)] ဘောဇနံ။
ကီဒိသော တုယှံ ပရိဝါရော, ယေသံ ကာဟာမိ ဘောဇနံ၊
ကိံနာမကာ စ တေ သဗ္ဗေ, တံ [တေ (သီ။ သျာ။ ပီ။)] မေ အက္ခာဟိ ပုစ္ဆိတာ။
မာလိယော စတုရက္ခော စ, ပိင်္ဂိယော အထ ဇမ္ဗုကော၊
ဧဒိသော မယှံ ပရိဝါရော, တေသံ ကယိရာဟိ [ကယိရာသိ (ပီ။)] ဘောဇနံ။
နိက္ခန္တာယ အဂါရသ္မာ, ဘဏ္ဍကမ္ပိ ဝိနဿတိ၊
အာရောဂျံ အာဠိနော ဝဇ္ဇံ [ဝစ္ဆံ (?)], ဣဓေဝ ဝသ မာဂမာတိ။
ပူတိမံသဇာတကံ ဧကာဒသမံ။
ယော တေ ပုတ္တကေ အခါဒိ, ဒိန္နဘတ္တော အဒူသကေ၊
တသ္မိံ ဒါဌံ နိပါတေဟိ, မာ တေ မုစ္စိတ္ထ ဇီဝတော။
(ဇာ၊၁၊၁၉၉။)အာကိဏ္ဏလုဒ္ဒေါ ပုရိသော, ဓာတိစေလံဝ မက္ခိတော၊
ပဒေသံ တံ န ပဿာမိ, ယတ္ထ ဒါဌံ နိပါတယေ။
အကတညုဿ ပေါသဿ, နိစ္စံ ဝိဝရဒဿိနော၊
သဗ္ဗံ စေ ပထဝိံ ဒဇ္ဇာ, နေဝ နံ အဘိရာဓယေ။
ကိန္နု သုဗာဟု တရမာနရူပေါ, ပစ္စာဂတောသိ သဟ မာဏဝေန၊
ကိံ ကိစ္စမတ္ထံ ဣဓမတ္ထိ တုယှံ, အက္ခာဟိ မေ ပုစ္ဆိတော ဧတမတ္ထံ။
ယော တေ သခါ ဒဒ္ဒရော သာဓုရူပေါ, တဿ ဝဓံ ပရိသင်္ကာမိ အဇ္ဇ၊
ပုရိသဿ ကမ္မာယတနာနိ သုတွာ, နာဟံ သုခိံ ဒဒ္ဒရံ အဇ္ဇ မညေ။
ကာနိဿ ကမ္မာယတနာနိ အဿု, ပုရိသဿ ဝုတ္တိသမောဓာနတာယ၊
ကံ ဝါ ပဋိညံ ပုရိသဿ သုတွာ, ပရိသင်္ကသိ ဒဒ္ဒရံ မာဏဝေန။
စိဏ္ဏာ ကလိင်္ဂါ စရိတာ ဝဏိဇ္ဇာ, ဝေတ္တာစရော သင်္ကုပထောပိ စိဏ္ဏော၊
နဋေဟိ စိဏ္ဏံ သဟ ဝါကုရေဟိ [ဝါကရေဟိ (ပီ။ သီ။ နိယျ), ဝါဂုရေဟိ (?)], ဒဏ္ဍေန ယုဒ္ဓမ္ပိ သမဇ္ဇမဇ္ဈေ။
ဗဒ္ဓါ ကုလီကာ [ကုလိင်္ကာ (သီ။ ပီ။)] မိတမာဠှကေန, အက္ခာ ဇိတာ [အက္ခာစိတာ (သီ။ အဋ္ဌ။)] သံယမော အဗ္ဘတီတော၊
အဗ္ဗာဟိတံ [အပ္ပဟိတံ (သီ။ သျာ။), အဗ္ဗူဟိတံ (ပီ။ သီ။ နိယျ)] ပုဗ္ဗကံ [ပုပ္ဖကံ (သီ။ သျာ။)] အဍ္ဎရတ္တံ, ဟတ္ထာ ဒဍ္ဎာ ပိဏ္ဍပဋိဂ္ဂဟေန။
(ဇာ၊၁၊၂၀၀။)တာနိဿ ကမ္မာယတနာနိ အဿု, ပုရိသဿ ဝုတ္တိသမောဓာနတာယ၊
ယထာ အယံ ဒိဿတိ လောမပိဏ္ဍော, ဂါဝေါ ဟတာ ကိံ ပန ဒဒ္ဒရဿာတိ။
ဒဒ္ဒရဇာတကံ ဒွါဒသမံ။
နဝကနိပါတံ နိဋ္ဌိတံ။
တဿုဒ္ဒါနံ –
ဝရဂိဇ္ဈ သမဇ္ဇန ဟံသဝရော, နိဓိသဝှယ ဟာရိတ ပါဋလိကော၊
အဇရာမရ ဓင်္က တိတိက္ခ ကုတော, အထ ဒွါဒသ ပေက္ခန ဒဒ္ဒရိဘီတိ။
(ဇာ၊၁၊၂၀၁။)၁၀။ ဒသကနိပါတော
စတုဒွါရမိဒံ နဂရံ, အာယသံ ဒဠှပါကာရံ၊
ဩရုဒ္ဓပဋိရုဒ္ဓေါသ္မိ, ကိံ ပါပံ ပကတံ မယာ။
သဗ္ဗေ အပိဟိတာ ဒွါရာ, ဩရုဒ္ဓေါသ္မိ ယထာ ဒိဇော၊
ကိမာဓိကရဏံ ယက္ခ, စက္ကာဘိနိဟတော အဟံ။
လဒ္ဓါ သတသဟဿာနိ, အတိရေကာနိ ဝီသတိ၊
အနုကမ္ပကာနံ ဉာတီနံ, ဝစနံ သမ္မ နာကရိ။
လင်္ဃိံ သမုဒ္ဒံ ပက္ခန္ဒိ, သာဂရံ အပ္ပသိဒ္ဓိကံ၊
စတုဗ္ဘိ အဋ္ဌဇ္ဈဂမာ, အဋ္ဌာဟိပိ စ သောဠသ။
သောဠသာဟိ စ ဗာတ္တိံသ, အတြိစ္ဆံ စက္ကမာသဒေါ၊
ဣစ္ဆာဟတဿ ပေါသဿ, စက္ကံ ဘမတိ မတ္ထကေ။
ဥပရိဝိသာလာ ဒုပ္ပူရာ, ဣစ္ဆာ ဝိသဋဂါမိနီ [ဝိသဋဂါမိနိံ (ပီ။ က။)]၊
ယေ စ တံ အနုဂိဇ္ဈန္တိ, တေ ဟောန္တိ စက္ကဓာရိနော။
ဗဟုဘဏ္ဍံ [ဗဟုံ ဘဏ္ဍံ (သီ။ ပီ။)] အဝဟာယ, မဂ္ဂံ အပ္ပဋိဝေက္ခိယ၊
ယေသဉ္စေတံ အသင်္ခါတံ, တေ ဟောန္တိ စက္ကဓာရိနော။
ကမ္မံ သမေက္ခေ ဝိပုလဉ္စ ဘောဂံ, ဣစ္ဆံ န သေဝေယျ အနတ္ထသံဟိတံ၊
ကရေယျ ဝါကျံ အနုကမ္ပကာနံ, တံ တာဒိသံ နာတိဝတ္တေယျ စက္ကံ။
ကီဝစိရံ နု မေ ယက္ခ, စက္ကံ သိရသိ ဌဿတိ၊
ကတိ ဝဿသဟဿာနိ, တံ မေ အက္ခာဟိ ပုစ္ဆိတော။
အတိသရော ပစ္စသရော [အစ္စသရော (သီ။ သျာ။ ပီ။)], မိတ္တဝိန္ဒ သုဏောဟိ မေ၊
စက္ကံ တေ သိရသိ [သိရသ္မိ (သျာ။)] မာဝိဒ္ဓံ, န တံ ဇီဝံ ပမောက္ခသီတိ။
စတုဒွါရဇာတကံ ပဌမံ။
(ဇာ၊၁၊၂၀၂။)ကဏှော ဝတာယံ ပုရိသော, ကဏှံ ဘုဉ္ဇတိ ဘောဇနံ၊
ကဏှေ ဘူမိပဒေသသ္မိံ, န မယှံ မနသော ပိယော။
န ကဏှော တစသာ ဟောတိ, အန္တောသာရော ဟိ ဗြာဟ္မဏော၊
ယသ္မိံ ပါပါနိ ကမ္မာနိ, သ ဝေ ကဏှော သုဇမ္ပတိ။
ဧတသ္မိံ တေ သုလပိတေ, ပတိရူပေ သုဘာသိတေ၊
ဝရံ ဗြာဟ္မဏ တေ ဒမ္မိ, ယံ ကိဉ္စိ မနသိစ္ဆသိ။
ဝရဉ္စေ မေ အဒေါ သက္က, သဗ္ဗဘူတာနမိဿရ၊
သုနိက္ကောဓံ သုနိဒ္ဒေါသံ, နိလ္လောဘံ ဝုတ္တိမတ္တနော၊
နိသ္နေဟမဘိကင်္ခါမိ, ဧတေ မေ စတုရော ဝရေ။
ကိံ နု ကောဓေ ဝါ [ကောဓေဝ (သီ။ ပီ။)] ဒေါသေ ဝါ, လောဘေ သ္နေဟေ စ ဗြာဟ္မဏ၊
အာဒီနဝံ တွံ ပဿသိ [သမ္ပဿသိ (သီ။ ပီ။)], တံ မေ အက္ခာဟိ ပုစ္ဆိတော။
အပ္ပေါ ဟုတွာ ဗဟု ဟောတိ, ဝဍ္ဎတေ သော အခန္တိဇော၊
အာသင်္ဂီ ဗဟုပါယာသော, တသ္မာ ကောဓံ န ရောစယေ။
ဒုဋ္ဌဿ ဖရုသာ [ပဌမာ (ပီ။ သီ။ နိယျ)] ဝါစာ, ပရာမာသော အနန္တရာ၊
တတော ပါဏိ တတော ဒဏ္ဍော, သတ္ထဿ ပရမာ ဂတိ [ပရာမသတိ (က။)]၊
ဒေါသော ကောဓသမုဋ္ဌာနော, တသ္မာ ဒေါသံ န ရောစယေ။
အာလောပသာဟသာကာရာ [သဟသာကာရာ (သီ။ သျာ။ ပီ။)], နိကတီ ဝဉ္စနာနိ စ၊
ဒိဿန္တိ လောဘဓမ္မေသု, တသ္မာ လောဘံ န ရောစယေ။
သ္နေဟသင်္ဂထိတာ [သင်္ဂဓိတာ (က။), သင်္ဂန္တိတာ (သျာ။)] ဂန္ထာ, သေန္တိ မနောမယာ ပုထူ၊
တေ ဘုသံ ဥပတာပေန္တိ, တသ္မာ သ္နေဟံ န ရောစယေ။
ဧတသ္မိံ တေ သုလပိတေ, ပတိရူပေ သုဘာသိတေ၊
ဝရံ ဗြာဟ္မဏ တေ ဒမ္မိ, ယံ ကိဉ္စိ မနသိစ္ဆသိ။
ဝရဉ္စေ မေ အဒေါ သက္က, သဗ္ဗဘူတာနမိဿရ၊
အရညေ မေ ဝိဟရတော, နိစ္စံ ဧကဝိဟာရိနော၊
အာဗာဓာ မာ [န (သျာ။ ပီ။)] ဥပ္ပဇ္ဇေယျုံ, အန္တရာယကရာ ဘုသာ။
(ဇာ၊၁၊၂၀၃။)ဧတသ္မိံ တေ သုလပိတေ, ပတိရူပေ သုဘာသိတေ၊
ဝရံ ဗြာဟ္မဏ တေ ဒမ္မိ, ယံ ကိဉ္စိ မနသိစ္ဆသိ။
ဝရဉ္စေ မေ အဒေါ သက္က, သဗ္ဗဘူတာနမိဿရ၊
န မနော ဝါ သရီရံ ဝါ, မံ-ကတေ သက္က ကဿစိ၊
ကဒါစိ ဥပဟညေထ, ဧတံ သက္က ဝရံ ဝရေတိ။
ကဏှဇာတကံ ဒုတိယံ။
ယော ကောပနေယျေ န ကရောတိ ကောပံ, န ကုဇ္ဈတိ သပ္ပုရိသော ကဒါစိ၊
ကုဒ္ဓေါပိ သော နာဝိကရောတိ ကောပံ, တံ ဝေ နရံ သမဏမာဟု [သမဏံ အာဟု (သီ။)] လောကေ။
ဦနူဒရော ယော သဟတေ ဇိဃစ္ဆံ, ဒန္တော တပဿီ မိတပါနဘောဇနော၊
အာဟာရဟေတု န ကရောတိ ပါပံ, တံ ဝေ နရံ သမဏမာဟု လောကေ။
ခိဍ္ဍံ ရတိံ ဝိပ္ပဇဟိတွာန သဗ္ဗံ, န စာလိကံ ဘာသသိ ကိဉ္စိ လောကေ၊
ဝိဘူသဋ္ဌာနာ ဝိရတော မေထုနသ္မာ, တံ ဝေ နရံ သမဏမာဟု လောကေ။
ပရိဂ္ဂဟံ လောဘဓမ္မဉ္စ သဗ္ဗံ, ယော ဝေ ပရိညာယ ပရိစ္စဇေတိ၊
ဒန္တံ ဌိတတ္တံ အမမံ နိရာသံ, တံ ဝေ နရံ သမဏမာဟု လောကေ။
ပုစ္ဆာမ ကတ္တာရမနောမပညံ [မနောမပည (သျာ။ က။)], ကထာသု နော ဝိဂ္ဂဟော အတ္ထိ ဇာတော၊
ဆိန္ဒဇ္ဇ ကင်္ခံ ဝိစိကိစ္ဆိတာနိ, တဒဇ္ဇ [တယာဇ္ဇ (သီ။)] ကင်္ခံ ဝိတရေမု သဗ္ဗေ။
(ဇာ၊၁၊၂၀၄။)ယေ ပဏ္ဍိတာ အတ္ထဒသာ ဘဝန္တိ, ဘာသန္တိ တေ ယောနိသော တတ္ထ ကာလေ၊
ကထံ နု ကထာနံ အဘာသိတာနံ, အတ္ထံ နယေယျုံ ကုသလာ ဇနိန္ဒာ။
ကထံ ဟဝေ ဘာသတိ နာဂရာဇာ, ဂရုဠော ပန ဝေနတေယျော ကိမာဟ၊
ဂန္ဓဗ္ဗရာဇာ ပန ကိံ ဝဒေသိ, ကထံ ပန ကုရူနံ ရာဇသေဋ္ဌော။
ခန္တိံ ဟဝေ ဘာသတိ နာဂရာဇာ, အပ္ပါဟာရံ ဂရုဠော ဝေနတေယျော၊
ဂန္ဓဗ္ဗရာဇာ ရတိဝိပ္ပဟာနံ, အကိဉ္စနံ ကုရူနံ ရာဇသေဋ္ဌော။
သဗ္ဗာနိ ဧတာနိ သုဘာသိတာနိ, န ဟေတ္ထ ဒုဗ္ဘာသိတမတ္ထိ ကိဉ္စိ၊
ယသ္မိဉ္စ ဧတာနိ ပတိဋ္ဌိတာနိ, အရာဝ နာဘျာ သုသမောဟိတာနိ၊
စတုဗ္ဘိ ဓမ္မေဟိ သမင်္ဂိဘူတံ, တံ ဝေ နရံ သမဏမာဟု လောကေ။
တုဝဉှိ [တုဝံ နု (သီ။ ပီ။)] သေဋ္ဌော တွမနုတ္တရောသိ, တွံ ဓမ္မဂူ ဓမ္မဝိဒူ သုမေဓော၊
ပညာယ ပဉှံ သမဓိဂ္ဂဟေတွာ, အစ္ဆေစ္ဆိ ဓီရော ဝိစိကိစ္ဆိတာနိ၊
အစ္ဆေစ္ဆိ ကင်္ခံ ဝိစိကိစ္ဆိတာနိ, စုန္ဒော ယထာ နာဂဒန္တံ ခရေန။
နီလုပ္ပလာဘံ ဝိမလံ အနဂ္ဃံ, ဝတ္ထံ ဣဒံ ဓူမသမာနဝဏ္ဏံ၊
ပဉှဿ ဝေယျာကရဏေန တုဋ္ဌော, ဒဒါမိ တေ ဓမ္မပူဇာယ ဓီရ။
(ဇာ၊၁၊၂၀၅။)သုဝဏ္ဏမာလံ သတပတ္တဖုလ္လိတံ, သကေသရံ ရတ္နသဟဿမဏ္ဍိတံ၊
ပဉှဿ ဝေယျာကရဏေန တုဋ္ဌော, ဒဒါမိ တေ ဓမ္မပူဇာယ ဓီရ။
မဏိံ အနဂ္ဃံ ရုစိရံ ပဘဿရံ, ကဏ္ဌာဝသတ္တံ [ဝသိတံ (က။)] မဏိဘူသိတံ မေ၊
ပဉှဿ ဝေယျာကရဏေန တုဋ္ဌော, ဒဒါမိ တေ ဓမ္မပူဇာယ ဓီရ။
ဂဝံ သဟဿံ ဥသဘဉ္စ နာဂံ, အာဇညယုတ္တေ စ ရထေ ဒသ ဣမေ၊
ပဉှဿ ဝေယျာကရဏေန တုဋ္ဌော, ဒဒါမိ တေ ဂါမဝရာနိ သောဠသ။
သာရိပုတ္တော တဒါ နာဂေါ, သုပဏ္ဏော ပန ကောလိတော၊
ဂန္ဓဗ္ဗရာဇာ အနုရုဒ္ဓေါ, ရာဇာ အာနန္ဒ ပဏ္ဍိတော၊
ဝိဓုရော ဗောဓိသတ္တော စ, ဧဝံ ဓာရေထ ဇာတကန္တိ။
စတုပေါသထိယဇာတကံ တတိယံ။
ဗဟုဿုတော သုတဓမ္မောသိ သင်္ခ, ဒိဋ္ဌာ တယာ သမဏဗြာဟ္မဏာ စ၊
အထက္ခဏေ ဒဿယသေ ဝိလာပံ, အညော နု ကော တေ ပဋိမန္တကော မယာ။
သုဗ္ဘူ [သုဗ္ဘာ (သျာ။), သုမ္ဘာ, သုbhmာ (က။)] သုဘာ သုပ္ပဋိမုက္ကကမ္ဗု, ပဂ္ဂယှ သောဝဏ္ဏမယာယ ပါတိယာ၊
‘‘ဘုဉ္ဇဿု ဘတ္တံ’’ ဣတိ မံ ဝဒေတိ, သဒ္ဓါဝိတ္တာ [သဒ္ဓါစိတ္တာ (သီ။ ပီ။ က။)], တမဟံ နောတိ ဗြူမိ။
(ဇာ၊၁၊၂၀၆။)ဧတာဒိသံ ဗြာဟ္မဏ ဒိသွာန [ဒိသွ (သီ။ ပီ။)] ယက္ခံ, ပုစ္ဆေယျ ပေါသော သုခမာသိသာနော [သုခမာသသာနော (သျာ။), သုခမာသိသမာနော (က။)]၊
ဥဋ္ဌေဟိ နံ ပဉ္ဇလိကာဘိပုစ္ဆ, ဒေဝီ နုသိ တွံ ဥဒ မာနုသီ နု။
ယံ တွံ သုခေနာဘိသမေက္ခသေ မံ, ဘုဉ္ဇဿု ဘတ္တံ ဣတိ မံ ဝဒေသိ၊
ပုစ္ဆာမိ တံ နာရိ မဟာနုဘာဝေ, ဒေဝီ နုသိ တွံ ဥဒ မာနုသီ နု။
ဒေဝီ အဟံ သင်္ခ မဟာနုဘာဝါ, ဣဓာဂတာ သာဂရဝါရိမဇ္ဈေ၊
အနုကမ္ပိကာ နော စ ပဒုဋ္ဌစိတ္တာ, တဝေဝ အတ္ထာယ ဣဓာဂတာသ္မိ။
ဣဓန္နပါနံ သယနာသနဉ္စ, ယာနာနိ နာနာဝိဝိဓာနိ သင်္ခ၊
သဗ္ဗဿ တျာဟံ ပဋိပါဒယာမိ, ယံ ကိဉ္စိ တုယှံ မနသာဘိပတ္ထိတံ။
ယံ ကိဉ္စိ ယိဋ္ဌဉ္စ ဟုတဉ္စ [ယိဋ္ဌံဝ ဟုတံဝ (သီ။ ပီ။)] မယှံ, သဗ္ဗဿ နော ဣဿရာ တွံ သုဂတ္တေ၊
သုသောဏိ သုဗ္ဘမု [သုဗ္ဘု (သီ။), သုဗ္ဘာ (သျာ။)] သုဝိလဂ္ဂမဇ္ဈေ [သုဝိလာကမဇ္ဈေ (သျာ။ ပီ။ သီ။ အဋ္ဌ။), သုဝိလာတမဇ္ဈေ (က။)], ကိဿ မေ ကမ္မဿ အယံ ဝိပါကော။
ဃမ္မေ ပထေ ဗြာဟ္မဏ ဧကဘိက္ခုံ, ဥဂ္ဃဋ္ဋပါဒံ တသိတံ ကိလန္တံ၊
ပဋိပါဒယီ သင်္ခ ဥပါဟနာနိ [ဥပါဟနာဟိ (သီ။ ပီ။)], သာ ဒက္ခိဏာ ကာမဒုဟာ တဝဇ္ဇ။
(ဇာ၊၁၊၂၀၇။)သာ ဟောတု နာဝါ ဖလကူပပန္နာ, အနဝဿုတာ ဧရကဝါတယုတ္တာ၊
အညဿ ယာနဿ န ဟေတ္ထ [န ဟတ္ထိ (ပီ။)] ဘူမိ, အဇ္ဇေဝ မံ မောဠိနိံ ပါပယဿု။
သာ တတ္ထ ဝိတ္တာ သုမနာ ပတီတာ, နာဝံ သုစိတ္တံ အဘိနိမ္မိနိတွာ၊
အာဒါယ သင်္ခံ ပုရိသေန သဒ္ဓိံ, ဥပါနယီ နဂရံ သာဓုရမ္မန္တိ။
သင်္ခဇာတကံ စတုတ္ထံ။
ယော တေ ဣမံ ဝိသာလက္ခိံ, ပိယံ သမှိတဘာသိနိံ [သမ္မိလ္လဘာသိနိံ (သီ။ ပီ။), သမ္မိလ္လဟာသိနိံ (သျာ။)]၊
အာဒါယ ဗလာ ဂစ္ဆေယျ, ကိံ နု ကယိရာသိ ဗြာဟ္မဏ။
ဥပ္ပဇ္ဇေ [ဥပ္ပဇ္ဇ (သီ။ ပီ။)] မေ န မုစ္စေယျ, န မေ မုစ္စေယျ ဇီဝတော၊
ရဇံဝ ဝိပုလာ ဝုဋ္ဌိ, ခိပ္ပမေဝ နိဝါရယေ [နိဝါရယိံ (က။)]။
ယံ နု ပုဗ္ဗေ ဝိကတ္ထိတ္ထော [ဝိကတ္ထိတော (က။ သီ။ သျာ။ က။)], ဗလမှိဝ အပဿိတော၊
သွဇ္ဇ တုဏှိကတော [တုဏှိကတော (သီ။), တုဏှိက္ခကော (ပီ။)] ဒါနိ, သံဃာဋိံ သိဗ္ဗမစ္ဆသိ။
ဥပ္ပဇ္ဇိ မေ န မုစ္စိတ္ထ, န မေ မုစ္စိတ္ထ ဇီဝတော၊
ရဇံဝ ဝိပုလာ ဝုဋ္ဌိ, ခိပ္ပမေဝ နိဝါရယိံ။
ကိံ တေ ဥပ္ပဇ္ဇိ နော မုစ္စိ, ကိံ တေ န မုစ္စိ ဇီဝတော၊
ရဇံဝ ဝိပုလာ ဝုဋ္ဌိ, ကတမံ တွံ နိဝါရယိ။
ယမှိ ဇာတေ န ပဿတိ, အဇာတေ သာဓု ပဿတိ၊
သော မေ ဥပ္ပဇ္ဇိ နော မုစ္စိ, ကောဓော ဒုမ္မေဓဂေါစရော။
ယေန ဇာတေန နန္ဒန္တိ, အမိတ္တာ ဒုက္ခမေသိနော၊
သော မေ ဥပ္ပဇ္ဇိ နော မုစ္စိ, ကောဓော ဒုမ္မေဓဂေါစရော။
(ဇာ၊၁၊၂၀၈။)ယသ္မိဉ္စ ဇာယမာနမှိ, သဒတ္ထံ နာဝဗုဇ္ဈတိ၊
သော မေ ဥပ္ပဇ္ဇိ နော မုစ္စိ, ကောဓော ဒုမ္မေဓဂေါစရော။
ယေနာဘိဘူတော ကုသလံ ဇဟာတိ, ပရက္ကရေ ဝိပုလဉ္စာပိ အတ္ထံ၊
သ ဘီမသေနော ဗလဝါ ပမဒ္ဒီ, ကောဓော မဟာရာဇ န မေ အမုစ္စထ။
ကဋ္ဌသ္မိံ မတ္ထမာနသ္မိံ [မန္ထမာနသ္မိံ (ပီ။), မဒ္ဒမာနသ္မိံ (က။)], ပါဝကော နာမ ဇာယတိ၊
တမေဝ ကဋ္ဌံ ဍဟတိ, ယသ္မာ သော ဇာယတေ ဂိနိ။
ဧဝံ မန္ဒဿ ပေါသဿ, ဗာလဿ အဝိဇာနတော၊
သာရမ္ဘာ [သာရဗ္ဘာ (က။)] ဇာယတေ ကောဓော, သောပိ တေနေဝ ဍယှတိ။
အဂ္ဂီဝ တိဏကဋ္ဌသ္မိံ, ကောဓော ယဿ ပဝဍ္ဎတိ၊
နိဟီယတိ တဿ ယသော, ကာဠပက္ခေဝ စန္ဒိမာ။
အနေဓော [အနိန္ဓော (သီ။ က။), အနိန္ဒော (သျာ။)] ဓူမကေတူဝ, ကောဓော ယဿူပသမ္မတိ၊
အာပူရတိ တဿ ယသော, သုက္ကပက္ခေဝ စန္ဒိမာတိ။
စူဠဗောဓိဇာတကံ ပဉ္စမံ။
သတ္တာဟမေဝါဟံ ပသန္နစိတ္တော, ပုညတ္ထိကော အာစရိံ [အစရိံ (သီ။ သျာ။ ပီ။)] ဗြဟ္မစရိယံ၊
အထာပရံ ယံ စရိတံ မမေဒံ [မမ ယိဒံ (သျာ။), မမာယိဒံ (ပီ။)], ဝဿာနိ ပညာသ သမာဓိကာနိ၊
အကာမကော ဝါပိ [ဝါဟိ (ပီ။ က။)] အဟံ စရာမိ, ဧတေန သစ္စေန သုဝတ္ထိ ဟောတု၊
ဟတံ ဝိသံ ဇီဝတု ယညဒတ္တော။
(ဇာ၊၁၊၂၀၉။)ယသ္မာ ဒါနံ နာဘိနန္ဒိံ ကဒါစိ, ဒိသွာနဟံ အတိထိံ ဝါသကာလေ၊
န စာပိ မေ အပ္ပိယတံ အဝေဒုံ, ဗဟုဿုတာ သမဏဗြာဟ္မဏာ စ။
အကာမကော ဝါပိ အဟံ ဒဒါမိ, ဧတေန သစ္စေန သုဝတ္ထိ ဟောတု၊
ဟတံ ဝိသံ ဇီဝတု ယညဒတ္တော။
အာသီဝိသော တာတ ပဟူတတေဇော, ယော တံ အဒံသီ [အဍံသီ (သျာ။)] သစရာ [ဗိလရာ (သီ။), ပိဠာရာ (သျာ။), ပတရာ (ပီ။)] ဥဒိစ္စ၊
တသ္မိဉ္စ မေ အပ္ပိယတာယ အဇ္ဇ, ပိတရိ စ တေ နတ္ထိ ကောစိ ဝိသေသော၊
ဧတေန သစ္စေန သုဝတ္ထိ ဟောတု, ဟတံ ဝိသံ ဇီဝတု ယညဒတ္တော။
သန္တာ ဒန္တာယေဝ [ဒန္တာ သန္တာ ယေ စ (သျာ။ က။)] ပရိဗ္ဗဇန္တိ, အညတြ ကဏှာ နတ္ထာကာမရူပါ [အနကာမရူပါ (သီ။ သျာ။ ပီ။)]၊
ဒီပါယန ကိဿ ဇိဂုစ္ဆမာနော, အကာမကော စရသိ ဗြဟ္မစရိယံ။
သဒ္ဓါယ နိက္ခမ္မ ပုနံ နိဝတ္တော, သော ဧဠမူဂေါဝ ဗာလော [ဧဠမူဂေါ စပလော (သျာ။ က။)] ဝတာယံ၊
ဧတဿ ဝါဒဿ ဇိဂုစ္ဆမာနော, အကာမကော စရာမိ ဗြဟ္မစရိယံ၊
ဝိညုပ္ပသတ္ထဉ္စ သတဉ္စ ဌာနံ [ဝိညူပသတ္ထံ ဝသိတံ စ ဌာနံ (က။)], ဧဝမ္ပဟံ ပုညကရော ဘဝါမိ။
(ဇာ၊၁၊၂၁၀။)သမဏေ တုဝံ ဗြာဟ္မဏေ အဒ္ဓိကေ စ, သန္တပ္ပယာသိ အန္နပါနေန ဘိက္ခံ၊
ဩပါနဘူတံဝ ဃရံ တဝ ယိဒံ, အန္နေန ပါနေန ဥပေတရူပံ၊
အထ ကိဿ ဝါဒဿ ဇိဂုစ္ဆမာနော, အကာမကော ဒါနမိမံ ဒဒါသိ။
ပိတရော စ မေ အာသုံ ပိတာမဟာ စ, သဒ္ဓါ အဟုံ ဒါနပတီ ဝဒညူ၊
တံ ကုလ္လဝတ္တံ အနုဝတ္တမာနော, မာဟံ ကုလေ အန္တိမဂန္ဓနော [ဂန္ဓိနော (သျာ။ ပီ။ က။), ဂန္ဓိနီ (သီ။)] အဟုံ၊
ဧတဿ ဝါဒဿ ဇိဂုစ္ဆမာနော, အကာမကော ဒါနမိမံ ဒဒါမိ။
ဒဟရိံ ကုမာရိံ အသမတ္ထပညံ, ယံ တာနယိံ ဉာတိကုလာ သုဂတ္တေ၊
န စာပိ မေ အပ္ပိယတံ အဝေဒိ, အညတြ ကာမာ ပရိစာရယန္တာ [ပရိစာရယန္တီ (သီ။ ပီ။)]၊
အထ ကေန ဝဏ္ဏေန မယာ တေ ဘောတိ, သံဝါသဓမ္မော အဟု ဧဝရူပေါ။
အာရာ ဒူရေ နယိဓ ကဒါစိ အတ္ထိ, ပရမ္ပရာ နာမ ကုလေ ဣမသ္မိံ၊
တံ ကုလ္လဝတ္တံ အနုဝတ္တမာနာ, မာဟံ ကုလေ အန္တိမဂန္ဓိနီ အဟုံ၊
ဧတဿ ဝါဒဿ ဇိဂုစ္ဆမာနာ, အကာမိကာ ပဒ္ဓစရာမှိ [ပဋ္ဌစရာမှိ (သျာ။ က။)] တုယှံ။
(ဇာ၊၁၊၂၁၁။)မဏ္ဍဗျ ဘာသိံ ယမဘာသနေယျံ [ဘာသိဿံ အဘာသနေယျံ (သီ။ သျာ။ ပီ။), ဘာသိဿ’မဘာသနေယျံ (?)], တံ ခမျတံ ပုတ္တကဟေတု မဇ္ဇ၊
ပုတ္တပေမာ န ဣဓ ပရတ္ထိ ကိဉ္စိ, သော နော အယံ ဇီဝတိ ယညဒတ္တောတိ။
ကဏှဒီပါယနဇာတကံ [မဏ္ဍဗျဇာတကံ (သျာ။ က။)] ဆဋ္ဌံ။
န ဝါဟမေတံ [န စာဟမေတံ (သီ။)] ဇာနာမိ, ကော ဝါယံ ကဿ ဝါတိ ဝါ [စာတိ ဝါ (သီ။)]၊
ယထာ သာခေါ စရိ [ဝဒီ (သီ။ သျာ။ ပီ။)] ဧဝံ, နိဂြောဓ ကိန္တိ မညသိ။
တတော ဂလဝိနီတေန, ပုရိသာ နီဟရိံသု မံ၊
ဒတွာ မုခပဟာရာနိ, သာခဿ ဝစနံကရာ။
ဧတာဒိသံ ဒုမ္မတိနာ, အကတညုန ဒုဗ္ဘိနာ၊
ကတံ အနရိယံ သာခေန, သခိနာ တေ ဇနာဓိပ။
န ဝါဟမေတံ ဇာနာမိ, နပိ မေ ကောစိ သံသတိ၊
ယံ မေ တွံ သမ္မ အက္ခာသိ, သာခေန ကာရဏံ [ကဍ္ဎနံ (သီ။ သျာ။)] ကတံ။
သခီနံ သာဇီဝကရော, မမ သာခဿ စူဘယံ၊
တွံ နောသိဿရိယံ ဒါတာ, မနုဿေသု မဟန္တတံ၊
တယာမာ လဗ္ဘိတာ ဣဒ္ဓီ, ဧတ္ထ မေ နတ္ထိ သံသယော။
ယထာပိ ဗီဇမဂ္ဂိမှိ, ဍယှတိ န ဝိရူဟတိ၊
ဧဝံ ကတံ အသပ္ပုရိသေ, နဿတိ န ဝိရူဟတိ။
ကတညုမှိ စ ပေါသမှိ, သီလဝန္တေ အရိယဝုတ္တိနေ၊
သုခေတ္တေ ဝိယ ဗီဇာနိ, ကတံ တမှိ န နဿတိ။
ဣမံ ဇမ္မံ နေကတိကံ, အသပ္ပုရိသစိန္တကံ၊
ဟနန္တု သာခံ သတ္တီဟိ, နာဿ ဣစ္ဆာမိ ဇီဝိတံ။
(ဇာ၊၁၊၂၁၂။)ခမတဿ မဟာရာဇ, ပါဏာ န ပဋိအာနယာ [ဒုပ္ပဋိအာနယာ (သီ။ သျာ။ ပီ။)]၊
ခမ ဒေဝ အသပ္ပုရိသဿ, နာဿ ဣစ္ဆာမဟံ ဝဓံ။
နိဂြောဓမေဝ သေဝေယျ, န သာခမုပသံဝသေ၊
နိဂြောဓသ္မိံ မတံ သေယျော, ယဉ္စေ သာခသ္မိ ဇီဝိတန္တိ။
နိဂြောဓဇာတကံ သတ္တမံ။
န တက္ကလာ သန္တိ န အာလုဝါနိ [အာလုပါနိ (သီ။ သျာ။ ပီ။)], န ဗိဠာလိယော န ကဠမ္ဗာနိ တာတ၊
ဧကော အရညမှိ သုသာနမဇ္ဈေ, ကိမတ္ထိကော တာတ ခဏာသိ ကာသုံ။
ပိတာမဟော တာတ သုဒုဗ္ဗလော တေ, အနေကဗျာဓီဟိ ဒုခေန ဖုဋ္ဌော၊
တမဇ္ဇဟံ နိခဏိဿာမိ သောဗ္ဘေ, န ဟိဿ တံ ဇီဝိတံ ရောစယာမိ။
သင်္ကပ္ပမေတံ ပဋိလဒ္ဓ ပါပကံ, အစ္စာဟိတံ ကမ္မ ကရောသိ လုဒ္ဒံ၊
မယာပိ တာတ ပဋိလစ္ဆသေ တုဝံ, ဧတာဒိသံ ကမ္မ ဇရူပနီတော၊
တံ ကုလ္လဝတ္တံ အနုဝတ္တမာနော, အဟမ္ပိ တံ နိခဏိဿာမိ သောဗ္ဘေ။
ဖရုသာဟိ ဝါစာဟိ ပကုဗ္ဗမာနော, အာသဇ္ဇ မံ တွံ ဝဒသေ ကုမာရ၊
ပုတ္တော မမံ ဩရသကော သမာနော, အဟိတာနုကမ္ပီ မမ တွံသိ ပုတ္တ။
(ဇာ၊၁၊၂၁၃။)န တာဟံ [တျာဟံ (သျာ။)] တာတ အဟိတာနုကမ္ပီ, ဟိတာနုကမ္ပီ တေ အဟမ္ပိ [အဟဉှိ (သျာ။)] တာတ၊
ပါပဉ္စ တံ ကမ္မ ပကုဗ္ဗမာနံ, အရဟာမိ နော ဝါရယိတုံ တတော။
ယော မာတရံ ဝါ ပိတရံ သဝိဋ္ဌ [မာတရံ ပိတရံ ဝါ ဝသိဋ္ဌ (သီ။ ပီ။)], အဒူသကေ ဟိံသတိ ပါပဓမ္မော၊
ကာယဿ ဘေဒါ အဘိသမ္ပရာယံ, အသံသယံ သော နိရယံ ဥပေတိ [ပရေတိ (သီ။ ပီ။)]။
ယော မာတရံ ဝါ ပိတရံ သဝိဋ္ဌ, အန္နေန ပါနေန ဥပဋ္ဌဟာတိ၊
ကာယဿ ဘေဒါ အဘိသမ္ပရာယံ, အသံသယံ သော သုဂတိံ ဥပေတိ။
န မေ တွံ ပုတ္တ အဟိတာနုကမ္ပီ, ဟိတာနုကမ္ပီ မေ [မမ (?)] တွံသိ ပုတ္တ၊
အဟဉ္စ တံ မာတရာ ဝုစ္စမာနော, ဧတာဒိသံ ကမ္မ ကရောမိ လုဒ္ဒံ။
ယာ တေ သာ ဘရိယာ အနရိယရူပါ, မာတာ မမေသာ သကိယာ ဇနေတ္တိ၊
နိဒ္ဓါပယေ [နိဒ္ဓါမသေ (ပီ။)] တဉ္စ သကာ အဂါရာ, အညမ္ပိ တေ သာ ဒုခမာဝဟေယျ။
ယာ တေ သာ ဘရိယာ အနရိယရူပါ, မာတာ မမေသာ သကိယာ ဇနေတ္တိ၊
ဒန္တာ ကရေဏူဝ ဝသူပနီတာ, သာ ပါပဓမ္မာ ပုနရာဝဇာတူတိ။
တက္ကလဇာတကံ အဋ္ဌမံ။
(ဇာ၊၁၊၂၁၄။)ကိံ တေ ဝတံ ကိံ ပန ဗြဟ္မစရိယံ, ကိဿ သုစိဏ္ဏဿ အယံ ဝိပါကော၊
အက္ခာဟိ မေ ဗြာဟ္မဏ ဧတမတ္ထံ, ကသ္မာ နု တုမှံ ဒဟရာ န မိယျရေ [မီယရေ (သီ။ ပီ။)]။
ဓမ္မံ စရာမ န မုသာ ဘဏာမ, ပါပါနိ ကမ္မာနိ ပရိဝဇ္ဇယာမ [ဝိဝဇ္ဇယာမ (သီ။ သျာ။ ပီ။)]၊
အနရိယံ ပရိဝဇ္ဇေမု သဗ္ဗံ, တသ္မာ ဟိ အမှံ ဒဟရာ န မိယျရေ။
သုဏောမ ဓမ္မံ အသတံ သတဉ္စ, န စာပိ ဓမ္မံ အသတံ ရောစယာမ၊
ဟိတွာ အသန္တေ န ဇဟာမ သန္တေ, တသ္မာ ဟိ အမှံ ဒဟရာ န မိယျရေ။
ပုဗ္ဗေဝ ဒါနာ သုမနာ ဘဝါမ, ဒဒမ္ပိ ဝေ အတ္တမနာ ဘဝါမ၊
ဒတွာပိ ဝေ နာနုတပ္ပါမ ပစ္ဆာ, တသ္မာ ဟိ အမှံ ဒဟရာ န မိယျရေ။
သမဏေ မယံ ဗြာဟ္မဏေ အဒ္ဓိကေ စ, ဝနိဗ္ဗကေ ယာစနကေ ဒလိဒ္ဒေ၊
အန္နေန ပါနေန အဘိတပ္ပယာမ, တသ္မာ ဟိ အမှံ ဒဟရာ န မိယျရေ။
မယဉ္စ ဘရိယံ နာတိက္ကမာမ, အမှေ စ ဘရိယာ နာတိက္ကမန္တိ၊
အညတြ တာဟိ ဗြဟ္မစရိယံ စရာမ, တသ္မာ ဟိ အမှံ ဒဟရာ န မိယျရေ။
(ဇာ၊၁၊၂၁၅။)ပါဏာတိပါတာ ဝိရမာမ သဗ္ဗေ, လောကေ အဒိန္နံ ပရိဝဇ္ဇယာမ၊
အမဇ္ဇပါ နောပိ မုသာ ဘဏာမ, တသ္မာ ဟိ အမှံ ဒဟရာ န မိယျရေ။
ဧတာသု ဝေ ဇာယရေ သုတ္တမာသု, မေဓာဝိနော ဟောန္တိ ပဟူတပညာ၊
ဗဟုဿုတာ ဝေဒဂုနော [ဝေဒဂုဏာ (သျာ။ က။)] စ ဟောန္တိ, တသ္မာ ဟိ အမှံ ဒဟရာ န မိယျရေ။
မာတာ ပိတာ စ [မာတာ စ ပိတာ (က။), မာတာပိတရာ (သျာ။)] ဘဂိနီ ဘာတရော စ, ပုတ္တာ စ ဒါရာ စ မယဉ္စ သဗ္ဗေ၊
ဓမ္မံ စရာမ ပရလောကဟေတု, တသ္မာ ဟိ အမှံ ဒဟရာ န မိယျရေ။
ဒါသာ စ ဒါသျော [ဒါဿော (သီ။ ပီ။), ဒါသီ (သျာ။)] အနုဇီဝိနော စ, ပရိစာရကာ ကမ္မကရာ စ သဗ္ဗေ၊
ဓမ္မံ စရန္တိ ပရလောကဟေတု, တသ္မာ ဟိ အမှံ ဒဟရာ န မိယျရေ။
ဓမ္မော ဟဝေ ရက္ခတိ ဓမ္မစာရိံ, ဓမ္မော သုစိဏ္ဏော သုခမာဝဟာတိ၊
ဧသာနိသံသော ဓမ္မေ သုစိဏ္ဏေ, န ဒုဂ္ဂတိံ ဂစ္ဆတိ ဓမ္မစာရီ။
ဓမ္မော ဟဝေ ရက္ခတိ ဓမ္မစာရိံ, ဆတ္တံ မဟန္တံ ဝိယ ဝဿကာလေ၊
ဓမ္မေန ဂုတ္တော မမ ဓမ္မပါလော, အညဿ အဋ္ဌီနိ သုခီ ကုမာရောတိ။
မဟာဓမ္မပါလဇာတကံ နဝမံ။
(ဇာ၊၁၊၂၁၆။)နာသ္မသေ ကတပါပမှိ, နာသ္မသေ အလိကဝါဒိနေ၊
နာသ္မသေ အတ္တတ္ထပညမှိ, အတိသန္တေပိ နာသ္မသေ။
ဘဝန္တိ ဟေကေ ပုရိသာ, ဂေါပိပါသိကဇာတိကာ [ဂေါပိပါသကဇာတိကာ (သီ။ သျာ။ ပီ။)]၊
ဃသန္တိ မညေ မိတ္တာနိ, ဝါစာယ န စ ကမ္မုနာ။
သုက္ခဉ္ဇလိပဂ္ဂဟိတာ, ဝါစာယ ပလိဂုဏ္ဌိတာ၊
မနုဿဖေဂ္ဂူ နာသီဒေ, ယသ္မိံ နတ္ထိ ကတညုတာ။
န ဟိ အညညစိတ္တာနံ, ဣတ္ထီနံ ပုရိသာန ဝါ၊
နာနာဝိကတွာ [နာနာဝ ကတွာ (သီ။ ပီ။)] သံသဂ္ဂံ, တာဒိသမ္ပိ စ နာသ္မသေ [တာဒိသမ္ပိ န ဝိဿသေ (သျာ။)]။
အနရိယကမ္မမောက္ကန္တံ, အထေတံ [အတ္ထေတံ (သီ။ သျာ။ ပီ။)] သဗ္ဗဃာတိနံ၊
နိသိတံဝ ပဋိစ္ဆန္နံ, တာဒိသမ္ပိ စ နာသ္မသေ။
မိတ္တရူပေနိဓေကစ္စေ, သာခလျေန အစေတသာ၊
ဝိဝိဓေဟိ ဥပါယန္တိ, တာဒိသမ္ပိ စ နာသ္မသေ။
အာမိသံ ဝါ ဓနံ ဝါပိ, ယတ္ထ ပဿတိ တာဒိသော၊
ဒုဗ္ဘိံ ကရောတိ ဒုမ္မေဓော, တဉ္စ ဟန္တွာန [ဈာတွာန (သီ။ ပီ။), ဟိတွာန (သျာ။)] ဂစ္ဆတိ။
မိတ္တရူပေန ဗဟဝေါ, ဆန္နာ သေဝန္တိ သတ္တဝေါ၊
ဇဟေ ကာပုရိသေ ဟေတေ, ကုက္ကုဋော ဝိယ သေနကံ။
ယော စ [ယောဓ (ဇာ။ ၁။၈။၂၅ သုလသာဇာတကေ)] ဥပ္ပတိတံ အတ္ထံ, န ခိပ္ပမနုဗုဇ္ဈတိ၊
အမိတ္တဝသမနွေတိ, ပစ္ဆာ စ အနုတပ္ပတိ။
ယော စ ဥပ္ပတိတံ အတ္ထံ, ခိပ္ပမေဝ နိဗောဓတိ၊
မုစ္စတေ သတ္တုသမ္ဗာဓာ, ကုက္ကုဋော ဝိယ သေနကာ၊
တံ တာဒိသံ ကူဋမိဝေါဍ္ဍိတံ ဝနေ, အဓမ္မိကံ နိစ္စဝိဓံသကာရိနံ၊
အာရာ ဝိဝဇ္ဇေယျ နရော ဝိစက္ခဏော, သေနံ ယထာ ကုက္ကုဋော ဝံသကာနနေတိ။
ကုက္ကုဋဇာတကံ ဒသမံ။
(ဇာ၊၁၊၂၁၇။)֍ * ၄၄၉။ မဋ္ဌကုဏ္ဍလီဇာတကံ (၁၁)
အလင်္ကတော မဋ္ဌကုဏ္ဍလီ [မဋ္ဋကုဏ္ဍလီ (သီ။ ပီ။)], မာလဓာရီ [မာလဘာရီ (သီ။ ပီ။)] ဟရိစန္ဒနုဿဒေါ၊
ဗာဟာ ပဂ္ဂယှ ကန္ဒသိ, ဝနမဇ္ဈေ ကိံ ဒုက္ခိတော တုဝံ။
သောဝဏ္ဏမယော ပဘဿရော, ဥပ္ပန္နော ရထပဉ္ဇရော မမ၊
တဿ စက္ကယုဂံ န ဝိန္ဒာမိ, တေန ဒုက္ခေန ဇဟာမိ ဇီဝိတံ။
သောဝဏ္ဏမယံ မဏီမယံ, လောဟမယံ အထ ရူပိယာမယံ၊
[အာစိက္ခ မေ ဘဒ္ဒမာဏဝ (ဝိ။ ဝ။ ၁၂၀၉)] ပါဝဒ ရထံ ကရိဿာမိ [ကာရယာမိ (သီ။ ပီ။)] တေ [အာစိက္ခ မေ ဘဒ္ဒမာဏဝ (ဝိ။ ဝ။ ၁၂၀၉)], စက္ကယုဂံ ပဋိပါဒယာမိ တံ။
သော [အထ (သျာ။)] မာဏဝေါ တဿ ပါဝဒိ, စန္ဒိမသူရိယာ [စန္ဒိမသူရိယာ (သျာ။)] ဥဘယေတ္ထ ဘာတရော [ဒိဿရေ (ဝိ။ ဝ။ ၁၂၁၀)]၊
သောဝဏ္ဏမယော ရထော မမ, တေန စက္ကယုဂေန သောဘတိ။
ဗာလော ခေါ တွံသိ မာဏဝ, ယော တွံ ပတ္ထယသေ အပတ္ထိယံ၊
မညာမိ တုဝံ မရိဿသိ, န ဟိ တွံ လစ္ဆသိ စန္ဒသူရိယေ။
ဂမနာဂမနမ္ပိ ဒိဿတိ, ဝဏ္ဏဓာတု ဥဘယေတ္ထ ဝီထိယော၊
ပေတော ပန နေဝ ဒိဿတိ, ကော နု ခေါ [ကော နိဓ (ဝိ။ ဝ။ ၁၂၁၂)] ကန္ဒတံ ဗာလျတရော။
(ဇာ၊၁၊၂၁၈။)သစ္စံ ခေါ ဝဒေသိ မာဏဝ, အဟမေဝ ကန္ဒတံ ဗာလျတရော၊
စန္ဒံ ဝိယ ဒါရကော ရုဒံ, ပေတံ ကာလကတာဘိပတ္ထယေ။
အာဒိတ္တံ ဝတ မံ သန္တံ, ဃတသိတ္တံဝ ပါဝကံ၊
ဝါရိနာ ဝိယ ဩသိဉ္စံ, သဗ္ဗံ နိဗ္ဗာပယေ ဒရံ။
အဗ္ဗဟီ [အဗ္ဗုဟိ (သျာ။), အဗ္ဘုဠှံ (က။)] ဝတ မေ သလ္လံ, ယမာသိ ဟဒယဿိတံ [သောကံ ဟဒယနိဿိတံ (ဝိ။ ဝ။ ၁၂၁၅)]၊
ယော မေ သောကပရေတဿ, ပုတ္တသောကံ အပါနုဒိ။
သောဟံ အဗ္ဗူဠှသလ္လောသ္မိ, ဝီတသောကော အနာဝိလော၊
န သောစာမိ န ရောဒါမိ, တဝ သုတွာန မာဏဝါတိ။
မဋ္ဌကုဏ္ဍလီဇာတကံ ဧကာဒသမံ။
֍ * ၄၅၀။ ဗိလာရကောသိယဇာတကံ (၁၂)
အပစန္တာပိ ဒိစ္ဆန္တိ, သန္တော လဒ္ဓါန ဘောဇနံ၊
ကိမေဝ တွံ ပစမာနော, ယံ န ဒဇ္ဇာ န တံ သမံ။
မစ္ဆေရာ စ ပမာဒါ စ, ဧဝံ ဒါနံ န ဒိယျတိ၊
ပုညံ အာကင်္ခမာနေန, ဒေယျံ ဟောတိ ဝိဇာနတာ။
ယဿေဝ ဘီတော န ဒဒါတိ မစ္ဆရီ, တဒေဝါဒဒတော ဘယံ၊
ဇိဃစ္ဆာ စ ပိပါသာ စ, ယဿ ဘာယတိ မစ္ဆရီ၊
တမေဝ ဗာလံ ဖုသတိ, အသ္မိံ လောကေ ပရမှိ စ။
တသ္မာ ဝိနေယျ မစ္ဆေရံ, ဒဇ္ဇာ ဒါနံ မလာဘိဘူ၊
ပုညာနိ ပရလောကသ္မိံ, ပတိဋ္ဌာ ဟောန္တိ ပါဏိနံ။
ဒုဒ္ဒဒံ ဒဒမာနာနံ, ဒုက္ကရံ ကမ္မ ကုဗ္ဗတံ၊
အသန္တော နာနုကုဗ္ဗန္တိ, သတံ ဓမ္မော ဒုရန္နယော။
တသ္မာ သတဉ္စ အသတံ [အသတဉ္စ (သီ။ သျာ။ ပီ။)], နာနာ ဟောတိ ဣတော ဂတိ၊
အသန္တော နိရယံ ယန္တိ, သန္တော သဂ္ဂပရာယနာ။
(ဇာ၊၁၊၂၁၉။)အပ္ပသ္မေကေ [အပ္ပမ္ပေကေ (သျာ။)] ပဝေစ္ဆန္တိ, ဗဟုနေကေ န ဒိစ္ဆရေ၊
အပ္ပသ္မာ ဒက္ခိဏာ ဒိန္နာ, သဟဿေန သမံ မိတာ။
ဓမ္မံ စရေ ယောပိ သမုဉ္ဆကံ စရေ, ဒါရဉ္စ ပေါသံ ဒဒမပ္ပကသ္မိံ [ဒဒံ အပ္ပကသ္မိပိ (ပီ။)]၊
သတံ သဟဿာနံ သဟဿယာဂိနံ, ကလမ္ပိ နာဂ္ဃန္တိ တထာဝိဓဿ တေ။
ကေနေသ ယညော ဝိပုလော မဟဂ္ဃတော [မဟဂ္ဂတော (သံ။ နိ။ ၁။၃၂)], သမေန ဒိန္နဿ န အဂ္ဃမေတိ၊
ကထံ သတံ သဟဿာနံ [ကထံ သဟဿာနံ (သီ။ သျာ။ ပီ။)] သဟဿယာဂိနံ, ကလမ္ပိ နာဂ္ဃန္တိ တထာဝိဓဿ တေ။
ဒဒန္တိ ဟေကေ ဝိသမေ နိဝိဋ္ဌာ, ဆေတွာ [ဈတွာ (သီ။ ပီ။), ဃတွာ (သျာ။)] ဝဓိတွာ အထ သောစယိတွာ၊
သာ ဒက္ခိဏာ အဿုမုခါ သဒဏ္ဍာ, သမေန ဒိန္နဿ န အဂ္ဃမေတိ၊
ဧဝံ သတံ သဟဿာနံ [ဧဝံ သဟဿာနံ (သီ။ သျာ။ ပီ။)] သဟဿယာဂိနံ, ကလမ္ပိ နာဂ္ဃန္တိ တထာဝိဓဿ တေတိ။
ဗိလာရကောသိယဇာတကံ ဒွါဒသမံ။
ဝဏ္ဏဝါ အဘိရူပေါသိ, ဃနော သဉ္ဇာတရောဟိတော၊
စက္ကဝါက သုရူပေါသိ, ဝိပ္ပသန္နမုခိန္ဒြိယော။
ပါဌီနံ ပါဝုသံ မစ္ဆံ, ဗလဇံ [ဝါလဇံ (သီ။ ပီ။), ဗလဇ္ဇံ (သျာ။)] မုဉ္ဇရောဟိတံ၊
ဂင်္ဂါယ တီရေ နိသိန္နော [ဂင်္ဂါတီရေ နိသိန္နောသိ (သျာ။ က။)], ဧဝံ ဘုဉ္ဇသိ ဘောဇနံ။
န ဝါဟမေတံ [သဗ္ဗတ္ထပိ သမာနံ] ဘုဉ္ဇာမိ, ဇင်္ဂလာနောဒကာနိ ဝါ၊
အညတြ သေဝါလပဏကာ, ဧတံ [အညံ (သျာ။)] မေ သမ္မ ဘောဇနံ။
(ဇာ၊၁၊၂၂၀။)န ဝါဟမေတံ သဒ္ဒဟာမိ, စက္ကဝါကဿ ဘောဇနံ၊
အဟမ္ပိ သမ္မ ဘုဉ္ဇာမိ, ဂါမေ လောဏိယတေလိယံ။
မနုဿေသု ကတံ ဘတ္တံ, သုစိံ မံသူပသေစနံ၊
န စ မေ တာဒိသော ဝဏ္ဏော, စက္ကဝါက ယထာ တုဝံ။
သမ္ပဿံ အတ္တနိ ဝေရံ, ဟိံသယံ [ဟိံသာယ (သျာ။ ပီ။ က။)] မာနုသိံ ပဇံ၊
ဥတြသ္တော ဃသသီ ဘီတော, တေန ဝဏ္ဏော တဝေဒိသော။
သဗ္ဗလောကဝိရုဒ္ဓေါသိ, ဓင်္က ပါပေန ကမ္မုနာ၊
လဒ္ဓေါ ပိဏ္ဍော န ပီဏေတိ, တေန ဝဏ္ဏော တဝေဒိသော။
အဟမ္ပိ [အဟဉ္စ (?)] သမ္မ ဘုဉ္ဇာမိ, အဟိံသံ သဗ္ဗပါဏိနံ၊
အပ္ပေါဿုက္ကော နိရာသင်္ကီ, အသောကော အကုတောဘယော။
သော ကရဿု အာနုဘာဝံ, ဝီတိဝတ္တဿု သီလိယံ၊
အဟိံသာယ စရ လောကေ, ပိယော ဟောဟိသိ မံမိဝ။
ယော န ဟန္တိ န ဃာတေတိ, န ဇိနာတိ န ဇာပယေ၊
မေတ္တံသော သဗ္ဗဘူတေသု, ဝေရံ တဿ န ကေနစီတိ။
စက္ကဝါကဇာတကံ တေရသမံ။
သစ္စံ ကိရ တွံ အပိ [တွမ္ပိ (သီ။), တုဝမ္ပိ (သျာ။), တွံ အသိ (က။)] ဘူရိပည, ယာ တာဒိသီ သီရိ ဓိတီ မတီ စ၊
န တာယတေဘာဝဝသူပနိတံ, ယော ယဝကံ ဘုဉ္ဇသိ အပ္ပသူပံ။
သုခံ ဒုက္ခေန ပရိပါစယန္တော, ကာလာ ကာလံ ဝိစိနံ ဆန္ဒဆန္နော၊
အတ္ထဿ ဒွါရာနိ အဝါပုရန္တော, တေနာဟံ တုဿာမိ ယဝေါဒနေန။
(ဇာ၊၁၊၂၂၁။)ကာလဉ္စ ဉတွာ အဘိဇီဟနာယ, မန္တေဟိ အတ္ထံ ပရိပါစယိတွာ၊
ဝိဇမ္ဘိဿံ သီဟဝိဇမ္ဘိတာနိ, တာယိဒ္ဓိယာ ဒက္ခသိ မံ ပုနာပိ။
သုခီပိ ဟေကေ [သုခီ ဟိ ဧကေ (သီ။), သုခီတိ ဟေကေ (?)] န ကရောန္တိ ပါပံ, အဝဏ္ဏသံသဂ္ဂဘယာ ပုနေကေ၊
ပဟူ သမာနော ဝိပုလတ္ထစိန္တီ, ကိံကာရဏာ မေ န ကရောသိ ဒုက္ခံ။
န ပဏ္ဍိတာ အတ္တသုခဿ ဟေတု, ပါပါနိ ကမ္မာနိ သမာစရန္တိ၊
ဒုက္ခေန ဖုဋ္ဌာ ခလိတာပိ သန္တာ, ဆန္ဒာ စ ဒေါသာ န ဇဟန္တိ ဓမ္မံ။
ယေန ကေနစိ ဝဏ္ဏေန, မုဒုနာ ဒါရုဏေန ဝါ၊
ဥဒ္ဓရေ ဒီနမတ္တာနံ, ပစ္ဆာ ဓမ္မံ သမာစရေ။
ယဿ ရုက္ခဿ ဆာယာယ, နိသီဒေယျ သယေယျ ဝါ၊
န တဿ သာခံ ဘဉ္ဇေယျ, မိတ္တဒုဗ္ဘော ဟိ ပါပကော။
ယဿာပိ [ယဿ ဟိ (သီ။ က။)] ဓမ္မံ ပုရိသော [မနုဇော (သီ။)] ဝိဇညာ, ယေ စဿ ကင်္ခံ ဝိနယန္တိ သန္တော၊
တံ ဟိဿ ဒီပဉ္စ ပရာယနဉ္စ, န တေန မေတ္တိံ ဇရယေထ ပညော။
အလသော ဂိဟီ ကာမဘောဂီ န သာဓု, အသညတော ပဗ္ဗဇိတော န သာဓု၊
ရာဇာ န သာဓု အနိသမ္မကာရီ, ယော ပဏ္ဍိတော ကောဓနော တံ န သာဓု။
နိသမ္မ ခတ္တိယော ကယိရာ, နာနိသမ္မ ဒိသမ္ပတိ၊
နိသမ္မကာရိနော ရာဇ, ယသော ကိတ္တိ စ ဝဍ္ဎတီတိ။
ဘူရိပညဇာတကံ စုဒ္ဒသမံ။
(ဇာ၊၁၊၂၂၂။)ကိံသု နရော ဇပ္ပမဓိစ္စကာလေ, ကံ ဝါ ဝိဇ္ဇံ ကတမံ ဝါ သုတာနံ၊
သော မစ္စော အသ္မိဉ္စ [အသ္မိံဝ (ပီ။)] ပရမှိ လောကေ, ကထံ ကရော သောတ္ထာနေန ဂုတ္တော။
ယဿ ဒေဝါ ပိတရော စ သဗ္ဗေ, သရီသပါ [သိရိံသပါ (သီ။ သျာ။ ပီ။)] သဗ္ဗဘူတာနိ စာပိ၊
မေတ္တာယ နိစ္စံ အပစိတာနိ ဟောန္တိ, ဘူတေသု ဝေ သောတ္ထာနံ တဒါဟု။
ယော သဗ္ဗလောကဿ နိဝါတဝုတ္တိ, ဣတ္ထီပုမာနံ သဟဒါရကာနံ၊
ခန္တာ ဒုရုတ္တာနမပ္ပဋိကူလဝါဒီ, အဓိဝါသနံ သောတ္ထာနံ တဒါဟု။
ယော နာဝဇာနာတိ သဟာယမိတ္တေ [သဟာယမတ္တေ (သီ။ ပီ။)], သိပ္ပေန ကုလျာဟိ ဓနေန ဇစ္စာ၊
ရုစိပညော အတ္ထကာလေ မတီမာ [မုတီမာ (သီ။ ပီ။)], သဟာယေသု ဝေ သောတ္ထာနံ တဒါဟု။
မိတ္တာနိ ဝေ ယဿ ဘဝန္တိ သန္တော, သံဝိဿတ္ထာ အဝိသံဝါဒကဿ၊
န မိတ္တဒုဗ္ဘီ သံဝိဘာဂီ ဓနေန, မိတ္တေသု ဝေ သောတ္ထာနံ တဒါဟု။
ယဿ ဘရိယာ တုလျဝယာ သမဂ္ဂါ, အနုဗ္ဗတာ ဓမ္မကာမာ ပဇာတာ [သဇာတာ (က။)]၊
ကောလိနိယာ သီလဝတီ ပတိဗ္ဗတာ, ဒါရေသု ဝေ သောတ္ထာနံ တဒါဟု။
(ဇာ၊၁၊၂၂၃။)ယဿ ရာဇာ ဘူတပတိ [ဘူတပတီ (သီ။ သျာ။ ပီ။)] ယသဿီ, ဇာနာတိ သောစေယျံ ပရက္ကမဉ္စ၊
အဒွေဇ္ဈတာ သုဟဒယံ မမန္တိ, ရာဇူသု ဝေ သောတ္ထာနံ တဒါဟု။
အန္နဉ္စ ပါနဉ္စ ဒဒါတိ သဒ္ဓေါ, မာလဉ္စ ဂန္ဓဉ္စ ဝိလေပနဉ္စ၊
ပသန္နစိတ္တော အနုမောဒမာနော, သဂ္ဂေသု ဝေ သောတ္ထာနံ တဒါဟု။
ယမရိယဓမ္မေန ပုနန္တိ ဝုဒ္ဓါ, အာရာဓိတာ သမစရိယာယ သန္တော၊
ဗဟုဿုတာ ဣသယော သီလဝန္တော, အရဟန္တမဇ္ဈေ သောတ္ထာနံ တဒါဟု။
ဧတာနိ ခေါ သောတ္ထာနာနိ လောကေ, ဝိညုပ္ပသတ္ထာနိ သုခုဒြယာနိ [သုခိန္ဒြိယာနိ (ပီ။)]၊
တာနီဓ သေဝေထ နရော သပညော, န ဟိ မင်္ဂလေ ကိဉ္စနမတ္ထိ သစ္စန္တိ။
မဟာမင်္ဂလဇာတကံ ပန္နရသမံ။
ဥဋ္ဌေဟိ ကဏှ ကိံ သေသိ, ကော အတ္ထော သုပနေန တေ၊
ယောပိ တုယှံ [တာယံ (ပီ။)] သကော ဘာတာ, ဟဒယံ စက္ခု စ [စက္ခုံဝ (ပီ။)] ဒက္ခိဏံ၊
တဿ ဝါတာ ဗလီယန္တိ, ဃဋော ဇပ္ပတိ [သသံ ဇပ္ပတိ (?)] ကေသဝ။
တဿ တံ ဝစနံ သုတွာ, ရောဟိဏေယျဿ ကေသဝေါ၊
တရမာနရူပေါ ဝုဋ္ဌာသိ, ဘာတုသောကေန အဋ္ဋိတော။
ကိံ နု ဥမ္မတ္တရူပေါဝ, ကေဝလံ ဒွါရကံ ဣမံ၊
သသော သသောတိ လပသိ, ကော နု တေ သသမာဟရိ။
(ဇာ၊၁၊၂၂၄။)သောဝဏ္ဏမယံ မဏီမယံ, လောဟမယံ အထ ရူပိယာမယံ၊
သင်္ခသိလာပဝါဠမယံ, ကာရယိဿာမိ တေ သသံ။
သန္တိ အညေပိ သသကာ, အရညေ ဝနဂေါစရာ၊
တေပိ တေ အာနယိဿာမိ, ကီဒိသံ သသမိစ္ဆသိ။
န စာဟမေတေ [န စာဟမေတံ (သီ။), န ဝါဟမေတေ (သျာ။), န ဝါဟမေတံ (ပီ။)] ဣစ္ဆာမိ, ယေ သသာ ပထဝိဿိတာ [ပဌဝိံသိတာ (သီ။ သျာ။ ပီ။)]၊
စန္ဒတော သသမိစ္ဆာမိ, တံ မေ ဩဟရ ကေသဝ။
သော နူန မဓုရံ ဉာတိ, ဇီဝိတံ ဝိဇဟိဿသိ၊
အပတ္ထိယံ ယော ပတ္ထယသိ, စန္ဒတော သသမိစ္ဆသိ။
ဧဝံ စေ ကဏှ ဇာနာသိ, ယဒညမနုသာသသိ၊
ကသ္မာ ပုရေ မတံ ပုတ္တံ, အဇ္ဇာပိ မနုသောစသိ။
ယံ န လဗ္ဘာ မနုဿေန, အမနုဿေန ဝါ ပုန [ပန (ပေ။ ဝ။ ၂၁၅)]၊
ဇာတော မေ မာ မရီ ပုတ္တော, ကုတော လဗ္ဘာ အလဗ္ဘိယံ။
န မန္တာ မူလဘေသဇ္ဇာ, ဩသဓေဟိ ဓနေန ဝါ၊
သက္ကာ အာနယိတုံ ကဏှ, ယံ ပေတမနုသောစသိ။
ယဿ ဧတာဒိသာ အဿု, အမစ္စာ ပုရိသပဏ္ဍိတာ၊
ယထာ နိဇ္ဈာပယေ အဇ္ဇ, ဃဋော ပုရိသပဏ္ဍိတော။
အာဒိတ္တံ ဝတ မံ သန္တံ, ဃတသိတ္တံဝ ပါဝကံ၊
ဝါရိနာ ဝိယ ဩသိဉ္စံ, သဗ္ဗံ နိဗ္ဗာပယေ ဒရံ။
အဗ္ဗဟီ ဝတ မေ သလ္လံ, ယမာသိ ဟဒယဿိတံ၊
ယော မေ သောကပရေတဿ, ပုတ္တသောကံ အပါနုဒိ။
သောဟံ အဗ္ဗူဠှသလ္လောသ္မိ, ဝီတသောကော အနာဝိလော၊
န သောစာမိ န ရောဒါမိ, တဝ သုတွာန မာဏဝ [ဘာတိက (ပေ။ ဝ။ ၂၂၄)]။
ဧဝံ ကရောန္တိ သပ္ပညာ, ယေ ဟောန္တိ အနုကမ္ပကာ၊
နိဝတ္တယန္တိ သောကမှာ, ဃဋော ဇေဋ္ဌံဝ ဘာတရန္တိ။
ဃဋပဏ္ဍိတဇာတကံ သောဠသမံ။
ဒသကနိပါတံ နိဋ္ဌိတံ။
(ဇာ၊၁၊၂၂၅။)တဿုဒ္ဒါနံ –
ဒဠှ ကဏှ ဓနဉ္ဇယ သင်္ခဝရော, ရဇ သတ္တဟ ကဿ စ [သတ္တာဟသသာခ (သျာ။)] တက္ကလိနာ၊
ဓမ္မံ ကုက္ကုဋ ကုဏ္ဍလိ ဘောဇနဒါ, စက္ကဝါက သုဘူရိသ သောတ္ထိ ဃဋောတိ။
(ဇာ၊၁၊၂၂၆။)၁၁။ ဧကာဒသကနိပါတော
တဿ နာဂဿ ဝိပ္ပဝါသေန, ဝိရူဠှာ သလ္လကီ စ ကုဋဇာ စ၊
ကုရုဝိန္ဒကရဝီရာ [ကရဝရာ (သီ။ သျာ။)] တိသသာမာ စ, နိဝါတေ ပုပ္ဖိတာ စ ကဏိကာရာ။
ကောစိဒေဝ သုဝဏ္ဏကာယုရာ, နာဂရာဇံ ဘရန္တိ ပိဏ္ဍေန၊
ယတ္ထ ရာဇာ ရာဇကုမာရော ဝါ, ကဝစမဘိဟေဿတိ အဆမ္ဘိတော [အသမ္ဘီတော (သီ။ သျာ။ ပီ။)]။
ဂဏှာဟိ နာဂ ကဗဠံ, မာ နာဂ ကိသကော ဘဝ၊
ဗဟူနိ ရာဇကိစ္စာနိ, တာနိ [ယာနိ (သီ။ ပီ။)] နာဂ ကရိဿသိ။
သာ နူနသာ ကပဏိကာ, အန္ဓာ အပရိဏာယိကာ၊
ခါဏုံ ပါဒေန ဃဋ္ဋေတိ, ဂိရိံ စဏ္ဍောရဏံ ပတိ။
ကာ နု တေ သာ မဟာနာဂ, အန္ဓာ အပရိဏာယိကာ၊
ခါဏုံ ပါဒေန ဃဋ္ဋေတိ, ဂိရိံ စဏ္ဍောရဏံ ပတိ။
မာတာ မေ သာ မဟာရာဇ, အန္ဓာ အပရိဏာယိကာ၊
ခါဏုံ ပါဒေန ဃဋ္ဋေတိ, ဂိရိံ စဏ္ဍောရဏံ ပတိ။
မုဉ္စထေတံ မဟာနာဂံ, ယောယံ ဘရတိ မာတရံ၊
သမေတု မာတရာ နာဂေါ, သဟ သဗ္ဗေဟိ ဉာတိဘိ။
မုတ္တော စ ဗန္ဓနာ နာဂေါ, မုတ္တမာဒါယ ကုဉ္ဇရော [ကာသိရာဇေန ပေသိတော (သီ။ သျာ။), မုတ္တော ဒါမာတော ကုဉ္ဇရော (ပီ။ သီ။ နိယျ)]၊
မုဟုတ္တံ အဿာသယိတွာ [ဝိဿမိတွာန (သီ။)], အဂမာ ယေန ပဗ္ဗတော။
တတော သော နဠိနိံ [နိလိနံ (သျာ။)] ဂန္တွာ, သီတံ ကုဉ္ဇရသေဝိတံ၊
သောဏ္ဍာယူဒကမာဟတွာ [မာဟိတွာ (သျာ။ က။)], မာတရံ အဘိသိဉ္စထ။
(ဇာ၊၁၊၂၂၇။)ကောယ အနရိယော ဒေဝေါ, အကာလေနပိ ဝဿတိ [အကာလေန ပဝဿတိ (သီ။ သျာ။), အကာလေန’တိဝဿတိ (ပီ။)]၊
ဂတော မေ အတြဇော ပုတ္တော, ယော မယှံ ပရိစာရကော။
ဥဋ္ဌေဟိ အမ္မ ကိံ သေသိ, အာဂတော တျာဟမတြဇော၊
မုတ္တောမှိ ကာသိရာဇေန, ဝေဒေဟေန ယသဿိနာ။
စိရံ ဇီဝတု သော ရာဇာ, ကာသီနံ ရဋ္ဌဝဍ္ဎနော၊
ယော မေ ပုတ္တံ ပမောစေသိ, သဒါ ဝုဒ္ဓါပစာယိကန္တိ။
မာတုပေါသကဇာတကံ ပဌမံ။
သုဏောဟိ မယှံ ဝစနံ ဇနိန္ဒ, အတ္ထေန ဇုဏှမှိ ဣဓာနုပတ္တော၊
န ဗြာဟ္မဏေ အဒ္ဓိကေ တိဋ္ဌမာနေ, ဂန္တဗ္ဗ [ဂန္တဗျ (က။)] မာဟု ဒွိပဒိန္ဒ [ဒိပဒါန (သီ။ ပီ။), ဒွိပဒါန (သျာ။)] သေဋ္ဌ။
သုဏောမိ တိဋ္ဌာမိ ဝဒေဟိ ဗြဟ္မေ, ယေနာသိ [ယေနာပိ (သျာ။ က။)] အတ္ထေန ဣဓာနုပတ္တော၊
ကံ ဝါ တွမတ္ထံ မယိ ပတ္ထယာနော, ဣဓာဂမာ ဗြဟ္မေ တဒိင်္ဃ ဗြူဟိ။
ဒဒါဟိ မေ ဂါမဝရာနိ ပဉ္စ, ဒါသီသတံ သတ္တ ဂဝံသတာနိ၊
ပရောသဟဿဉ္စ သုဝဏ္ဏနိက္ခေ, ဘရိယာ စ မေ သာဒိသီ ဒွေ ဒဒါဟိ။
တပေါ နု တေ ဗြာဟ္မဏ ဘိံသရူပေါ, မန္တာ နု တေ ဗြာဟ္မဏ စိတ္တရူပါ၊
ယက္ခာ နု [ယက္ခာ ဝ (သီ။ ပီ။)] တေ အဿဝါ သန္တိ ကေစိ, အတ္ထံ ဝါ မေ အဘိဇာနာသိ ကတ္တံ။
(ဇာ၊၁၊၂၂၈။)န မေ တပေါ အတ္ထိ န စာပိ မန္တာ, ယက္ခာပိ မေ အဿဝါ နတ္ထိ ကေစိ၊
အတ္ထမ္ပိ တေ နာဘိဇာနာမိ ကတ္တံ, ပုဗ္ဗေ စ ခေါ [ပုဗ္ဗေဝ ခေါ (သျာ။ က။)] သင်္ဂတိမတ္တမာသိ။
ပဌမံ ဣဒံ ဒဿနံ ဇာနတော မေ, န တာဘိဇာနာမိ ဣတော ပုရတ္ထာ၊
အက္ခာဟိ မေ ပုစ္ဆိတော ဧတမတ္ထံ, ကဒါ ကုဟိံ ဝါ အဟု သင်္ဂမော နော။
ဂန္ဓာရရာဇဿ ပုရမှိ ရမ္မေ, အဝသိမှသေ တက္ကသီလာယံ ဒေဝ၊
တတ္ထန္ဓကာရမှိ တိမီသိကာယံ [တိမိဿိကာယံ (သီ။ အဋ္ဌ။), တိမိဿကာယံ (သျာ။)], အံသေန အံသံ သမဃဋ္ဋယိမှ။
တေ တတ္ထ ဌတွာန ဥဘော ဇနိန္ဒ, သာရာဏိယံ [သာရဏီယံ (က။)] ဝီတိသာရယိမှ [ဝီတိသာရိမှ (သီ။ သျာ။ ပီ။)] တတ္ထ၊
သာယေဝ နော သင်္ဂတိမတ္တမာသိ, တတော န ပစ္ဆာ န ပုရေ အဟောသိ။
ယဒါ ကဒါစိ မနုဇေသု ဗြဟ္မေ, သမာဂမော သပ္ပုရိသေန ဟောတိ၊
န ပဏ္ဍိတာ သင်္ဂတိသန္ထဝါနိ, ပုဗ္ဗေ ကတံ ဝါပိ ဝိနာသယန္တိ။
ဗာလာဝ [ဗာလာ စ (သီ။ သျာ။ ပီ။)] ခေါ သင်္ဂတိသန္ထဝါနိ, ပုဗ္ဗေ ကတံ ဝါပိ ဝိနာသယန္တိ၊
ဗဟုမ္ပိ ဗာလေသု ကတံ ဝိနဿတိ, တထာ ဟိ ဗာလာ အကတညုရူပါ။
ဓီရာ စ ခေါ သင်္ဂတိသန္ထဝါနိ, ပုဗ္ဗေ ကတံ ဝါပိ န နာသယန္တိ၊
အပ္ပမ္ပိ ဓီရေသု ကတံ န နဿတိ, တထာ ဟိ ဓီရာ သုကတညုရူပါ။
(ဇာ၊၁၊၂၂၉။)ဒဒါမိ တေ ဂါမဝရာနိ ပဉ္စ, ဒါသီသတံ သတ္တ ဂဝံသတာနိ၊
ပရောသဟဿဉ္စ သုဝဏ္ဏနိက္ခေ, ဘရိယာ စ တေ သာဒိသီ ဒွေ ဒဒါမိ။
ဧဝံ သတံ ဟောတိ သမေစ္စ ရာဇ, နက္ခတ္တရာဇာရိဝ တာရကာနံ၊
အာပူရတီ ကာသိပတီ တထာဟံ, တယာပိ မေ သင်္ဂမော အဇ္ဇ လဒ္ဓေါတိ။
ဇုဏှဇာတကံ ဒုတိယံ။
֍ * ၄၅၇။ ဓမ္မဒေဝပုတ္တဇာတကံ (၃)
ယသောကရော ပုညကရောဟမသ္မိ, သဒါတ္ထုတော သမဏဗြာဟ္မဏာနံ၊
မဂ္ဂါရဟော ဒေဝမနုဿပူဇိတော, ဓမ္မော အဟံ ဒေဟိ အဓမ္မ မဂ္ဂံ။
အဓမ္မယာနံ ဒဠှမာရုဟိတွာ, အသန္တသန္တော ဗလဝါဟမသ္မိ၊
သ ကိဿ ဟေတုမှိ တဝဇ္ဇ ဒဇ္ဇံ, မဂ္ဂံ အဟံ ဓမ္မ အဒိန္နပုဗ္ဗံ။
ဓမ္မော ဟဝေ ပါတုရဟောသိ ပုဗ္ဗေ, ပစ္ဆာ အဓမ္မော ဥဒပါဒိ လောကေ၊
ဇေဋ္ဌော စ သေဋ္ဌော စ သနန္တနော စ, ဥယျာဟိ ဇေဋ္ဌဿ ကနိဋ္ဌ မဂ္ဂါ။
န ယာစနာယ နပိ ပါတိရူပါ, န အရဟတာ [န အရဟတိ (သီ။ ပီ။), အရဟတိ (က။)] တေဟံ ဒဒေယျံ မဂ္ဂံ၊
ယုဒ္ဓဉ္စ နော ဟောတု ဥဘိန္နမဇ္ဇ, ယုဒ္ဓမှိ ယော ဇေဿတိ တဿ မဂ္ဂေါ။
(ဇာ၊၁၊၂၃၀။)သဗ္ဗာ ဒိသာ အနုဝိသဋောဟမသ္မိ, မဟဗ္ဗလော အမိတယသော အတုလျော၊
ဂုဏေဟိ သဗ္ဗေဟိ ဥပေတရူပေါ, ဓမ္မော အဓမ္မ တွံ ကထံ ဝိဇေဿသိ။
လောဟေန ဝေ ဟညတိ ဇာတရူပံ, န ဇာတရူပေန ဟနန္တိ လောဟံ၊
သစေ အဓမ္မော ဟဉ္ဆတိ [ဟညတိ (သီ။ သျာ။), ဟညိတိ (ကတ္ထစိ)] ဓမ္မမဇ္ဇ, အယော သုဝဏ္ဏံ ဝိယ ဒဿနေယျံ။
သစေ တုဝံ ယုဒ္ဓဗလော အဓမ္မ [ယုဒ္ဓဗလော’သိ’ဓမ္မ (က။ သီ။), ယုဒ္ဓဗလော’သ’ဓမ္မ (ပီ။)], န တုယှ ဝုဍ္ဎာ [ဝဒ္ဓါ (သီ။ ပီ။)] စ ဂရူ စ အတ္ထိ၊
မဂ္ဂဉ္စ တေ ဒမ္မိ ပိယာပ္ပိယေန, ဝါစာဒုရုတ္တာနိပိ တေ ခမာမိ။
ဣဒဉ္စ သုတွာ ဝစနံ အဓမ္မော, အဝံသိရော ပတိတော ဥဒ္ဓပါဒေါ၊
‘‘ယုဒ္ဓတ္ထိကော စေ န လဘာမိ ယုဒ္ဓံ’’, ဧတ္တာဝတာ ဟောတိ ဟတော အဓမ္မော။
ခန္တီဗလော ယုဒ္ဓဗလံ ဝိဇေတွာ, ဟန္တွာ အဓမ္မံ နိဟနိတွ [ဝိဟနိတွာ (က။)] ဘူမျာ၊
ပါယာသိ ဝိတ္တော [စိတ္တော (သျာ။)] အဘိရုယှ သန္ဒနံ, မဂ္ဂေနေဝ အတိဗလော သစ္စနိက္ကမော။
မာတာ ပိတာ သမဏဗြာဟ္မဏာ စ, အသမ္မာနိတာ ယဿ သကေ အဂါရေ၊
ဣဓေဝ နိက္ခိပ္ပ သရီရဒေဟံ, ကာယဿ ဘေဒါ နိရယံ ဝဇန္တိ တေ [ဝဇန္တိ (သီ။ ပီ။)]၊
ယထာ အဓမ္မော ပတိတော အဝံသိရော။
(ဇာ၊၁၊၂၃၁။)မာတာ ပိတာ သမဏဗြာဟ္မဏာ စ, သုသမ္မာနိတာ ယဿ သကေ အဂါရေ၊
ဣဓေဝ နိက္ခိပ္ပ သရီရဒေဟံ, ကာယဿ ဘေဒါ သုဂတိံ ဝဇန္တိ တေ၊
ယထာပိ ဓမ္မော အဘိရုယှ သန္ဒနန္တိ။
ဓမ္မဒေဝပုတ္တဇာတကံ [ဓမ္မဇာတကံ (သီ။ ပီ။)] တတိယံ။
ဧကာ နိသိန္နာ သုစိ သညတူရူ, ပါသာဒမာရုယှ အနိန္ဒိတင်္ဂီ၊
ယာစာမိ တံ ကိန္နရနေတ္တစက္ခု, ဣမေကရတ္တိံ ဥဘယော ဝသေမ။
ဩကိဏ္ဏန္တရပရိခံ, ဒဠှမဋ္ဋာလကောဋ္ဌကံ၊
ရက္ခိတံ ခဂ္ဂဟတ္ထေဟိ, ဒုပ္ပဝေသမိဒံ ပုရံ။
ဒဟရဿ ယုဝိနော စာပိ, အာဂမော စ န ဝိဇ္ဇတိ၊
အထ ကေန နု ဝဏ္ဏေန, သင်္ဂမံ ဣစ္ဆသေ မယာ။
ယက္ခောဟမသ္မိ ကလျာဏိ, အာဂတောသ္မိ တဝန္တိကေ [တဝန္တိကံ (သီ။ ပီ။)]၊
တွံ မံ နန္ဒယ [နန္ဒဿု (သျာ။ က။)] ဘဒ္ဒန္တေ, ပုဏ္ဏကံသံ ဒဒါမိ တေ။
ဒေဝံ ဝ ယက္ခံ အထ ဝါ မနုဿံ, န ပတ္ထယေ ဥဒယမတိစ္စ အညံ၊
ဂစ္ဆေဝ တွံ ယက္ခ မဟာနုဘာဝ, မာ စဿု ဂန္တွာ ပုနရာဝဇိတ္ထ။
ယာ သာ ရတိ ဥတ္တမာ ကာမဘောဂိနံ, ယံ ဟေတု သတ္တာ ဝိသမံ စရန္တိ၊
မာ တံ ရတိံ ဇီယိ တုဝံ သုစိမှိ တေ, ဒဒါမိ တေ ရူပိယံ ကံသပူရံ။
(ဇာ၊၁၊၂၃၂။)နာရိံ နရော နိဇ္ဈပယံ ဓနေန, ဥက္ကံသတီ ယတ္ထ ကရောတိ ဆန္ဒံ၊
ဝိပစ္စနီကော တဝ ဒေဝဓမ္မော, ပစ္စက္ခတော ထောကတရေန ဧသိ။
အာယု စ ဝဏ္ဏော စ [အာယုံ စ ဝဏ္ဏံ စ (က။ သီ။ ပီ။)] မနုဿလောကေ, နိဟီယတိ မနုဇာနံ သုဂ္ဂတ္တေ၊
တေနေဝ ဝဏ္ဏေန ဓနမ္ပိ တုယှံ, နိဟီယတိ ဇိဏ္ဏတရာသိ အဇ္ဇ။
ဧဝံ မေ ပေက္ခမာနဿ, ရာဇပုတ္တိ ယသဿိနိ၊
ဟာယတေဝ တဝ [ဟာယတေ ဝတ တေ (သီ။ သျာ။ က။), ဟာယတေဝ တတော (ပီ။)] ဝဏ္ဏော, အဟောရတ္တာနမစ္စယေ။
ဣမိနာဝ တွံ ဝယသာ, ရာဇပုတ္တိ သုမေဓသေ၊
ဗြဟ္မစရိယံ စရေယျာသိ, ဘိယျော ဝဏ္ဏဝတီ သိယာ။
ဒေဝါ န ဇီရန္တိ ယထာ မနုဿာ, ဂတ္တေသု တေသံ ဝလိယော န ဟောန္တိ၊
ပုစ္ဆာမိ တံ ယက္ခ မဟာနုဘာဝ, ကထံ နု ဒေဝါန [ကထံ န ဒေဝါနံ (ပီ။)] သရီရဒေဟော။
ဒေဝါ န ဇီရန္တိ ယထာ မနုဿာ, ဂတ္တေသု တေသံ ဝလိယော န ဟောန္တိ၊
သုဝေ သုဝေ ဘိယျတရောဝ [ဘိယျတရော စ (က။)] တေသံ, ဒိဗ္ဗော စ ဝဏ္ဏော ဝိပုလာ စ ဘောဂါ။
ကိံသူဓ ဘီတာ ဇနတာ အနေကာ, မဂ္ဂေါ စ နေကာယတနံ ပဝုတ္တော၊
ပုစ္ဆာမိ တံ ယက္ခ မဟာနုဘာဝ, ကတ္ထဋ္ဌိတော ပရလောကံ န ဘာယေ။
(ဇာ၊၁၊၂၃၃။)ဝါစံ မနဉ္စ ပဏိဓာယ သမ္မာ, ကာယေန ပါပါနိ အကုဗ္ဗမာနော၊
ဗဟုန္နပါနံ ဃရမာဝသန္တော, သဒ္ဓေါ မုဒူ သံဝိဘာဂီ ဝဒညူ၊
သင်္ဂါဟကော သခိလော သဏှဝါစော, ဧတ္ထဋ္ဌိတော ပရလောကံ န ဘာယေ။
အနုသာသသိ မံ ယက္ခ, ယထာ မာတာ ယထာ ပိတာ၊
ဥဠာရဝဏ္ဏံ ပုစ္ဆာမိ, ကော နု တွမသိ သုဗြဟာ။
ဥဒယောဟမသ္မိ ကလျာဏိ, သင်္ကရတ္တာ ဣဓာဂတော [သင်္ဂရတ္ထာ ဣဓာဂတော (သီ။ ပီ။), သင်္ဂရတ္ထာယိဓာဂတော (သျာ။)]၊
အာမန္တ ခေါ တံ ဂစ္ဆာမိ, မုတ္တောသ္မိ တဝ သင်္ကရာ [သင်္ဂရာ (သီ။ သျာ။ ပီ။)]။
သစေ ခေါ တွံ ဥဒယောသိ, သင်္ကရတ္တာ ဣဓာဂတော၊
အနုသာသ မံ ရာဇပုတ္တ, ယထာဿ ပုန သင်္ဂမော။
အတိပတတိ [အဓိပတတီ (သီ။ ပီ။)] ဝယော ခဏော တထေဝ, ဌာနံ နတ္ထိ ဓုဝံ စဝန္တိ သတ္တာ၊
ပရိဇိယျတိ အဒ္ဓုဝံ သရီရံ, ဥဒယေ မာ ပမာဒ [မာ ပမာဒံ (သီ။)] စရဿု ဓမ္မံ။
ကသိဏာ ပထဝီ ဓနဿ ပူရာ, ဧကဿေဝ သိယာ အနညဓေယျာ၊
တဉ္စာပိ ဇဟတိ [ဇဟာတိ (သီ။ သျာ။ ပီ။), ဇဟာတီ (?)] အဝီတရာဂေါ, ဥဒယေ မာ ပမာဒ စရဿု ဓမ္မံ။
မာတာ စ ပိတာ စ ဘာတရော စ, ဘရိယာ ယာပိ ဓနေန ဟောတိ ကီတာ [ဘရိယာပိ ဓနေန ဟောန္တိ အတိတ္တာ (က။)]၊
တေ စာပိ ဇဟန္တိ အညမညံ, ဥဒယေ မာ ပမာဒ စရဿု ဓမ္မံ။
(ဇာ၊၁၊၂၃၄။)ကာယော ပရဘောဇနန္တိ ဉတွာ [ကာယော စ ပရဘောဇနံ ဝိဒိတွာ (က။)], သံသာရေ သုဂတိဉ္စ ဒုဂ္ဂတိဉ္စ [သုဂတီ စ ဒုဂ္ဂတီ စ (သီ။ သျာ။ ပီ။), သုဂ္ဂတိံ ဒုဂ္ဂတိဉ္စ (က။)]၊
ဣတ္တရဝါသောတိ ဇာနိယာန, ဥဒယေ မာ ပမာဒ စရဿု ဓမ္မံ။
သာဓု ဘာသတိယံ [ဘာသတယံ (သီ။ ပီ။)] ယက္ခော, အပ္ပံ မစ္စာန ဇီဝိတံ၊
ကသိရဉ္စ ပရိတ္တဉ္စ, တဉ္စ ဒုက္ခေန သံယုတံ၊
သာဟံ ဧကာ ပဗ္ဗဇိဿာမိ, ဟိတွာ ကာသိံ သုရုန္ဓနန္တိ။
ဥဒယဇာတကံ စတုတ္ထံ။
မိတ္တော မိတ္တဿ ပါနီယံ, အဒိန္နံ ပရိဘုဉ္ဇိသံ၊
တေန ပစ္ဆာ ဝိဇိဂုစ္ဆိံ, တံ ပါပံ ပကတံ မယာ၊
မာ ပုန အကရံ ပါပံ, တသ္မာ ပဗ္ဗဇိတော အဟံ။
ပရဒါရဉ္စ ဒိသွာန, ဆန္ဒော မေ ဥဒပဇ္ဇထ [ဥပပဇ္ဇထ (သျာ။ က။)]၊
တေန ပစ္ဆာ ဝိဇိဂုစ္ဆိံ, တံ ပါပံ ပကတံ မယာ၊
မာ ပုန အကရံ ပါပံ, တသ္မာ ပဗ္ဗဇိတော အဟံ။
ပိတရံ မေ မဟာရာဇ, စောရာ အဂဏှု [အဂဏှုံ (သီ။ ပီ။), အဂဏှိ (က။)] ကာနနေ၊
တေသာဟံ ပုစ္ဆိတော ဇာနံ, အညထာ နံ ဝိယာကရိံ။
တေန ပစ္ဆာ ဝိဇိဂုစ္ဆိံ, တံ ပါပံ ပကတံ မယာ၊
မာ ပုန အကရံ ပါပံ, တသ္မာ ပဗ္ဗဇိတော အဟံ။
ပါဏာတိပါတမကရုံ, သောမယာဂေ ဥပဋ္ဌိတေ၊
တေသာဟံ သမနုညာသိံ။
တေန ပစ္ဆာ ဝိဇိဂုစ္ဆိံ, တံ ပါပံ ပကတံ မယာ,
မာ ပုန အကရံ ပါပံ၊ တသ္မာ ပဗ္ဗဇိတော အဟံ။
သုရာမေရယမာဓုကာ [မဓုကာ (သီ။ သျာ။ ပီ။)], ယေ ဇနာ ပဌမာသု နော၊
ဗဟူနံ တေ အနတ္ထာယ, မဇ္ဇပါနမကပ္ပယုံ။
တေသာဟံ သမနုညာသိံ။
(ဇာ၊၁၊၂၃၅။)တေသာဟံ သမနုညာသိံ, တေန ပစ္ဆာ ဝိဇိဂုစ္ဆိံ၊
တံ ပါပံ ပကတံ မယာ, မာ ပုန အကရံ ပါပံ၊
တသ္မာ ပဗ္ဗဇိတော အဟံ။
ဓိရတ္ထု သုဗဟူ ကာမေ, ဒုဂ္ဂန္ဓေ ဗဟုကဏ္ဋကေ၊
ယေ အဟံ ပဋိသေဝန္တော, နာလဘိံ တာဒိသံ သုခံ။
မဟဿာဒါ သုခါ ကာမာ, နတ္ထိ ကာမာ ပရံ [ကာမပရံ (သီ။ ပီ။)] သုခံ၊
ယေ ကာမေ ပဋိသေဝန္တိ, သဂ္ဂံ တေ ဥပပဇ္ဇရေ။
အပ္ပဿာဒါ ဒုခါ ကာမာ, နတ္ထိ ကာမာ ပရံ ဒုခံ၊
ယေ ကာမေ ပဋိသေဝန္တိ, နိရယံ တေ ဥပပဇ္ဇရေ။
အသီ ယထာ သုနိသိတော, နေတ္တိံသောဝ သုပါယိကော [သုပါသိတော (က။ သီ။ နိယျ), သုပါယိတော (က။ အဋ္ဌ။)]၊
သတ္တီဝ ဥရသိ ခိတ္တာ, ကာမာ ဒုက္ခတရာ တတော။
အင်္ဂါရာနံဝ ဇလိတံ, ကာသုံ သာဓိကပေါရိသံ၊
ဖာလံဝ ဒိဝသံတတ္တံ, ကာမာ ဒုက္ခတရာ တတော။
ဝိသံ ယထာ ဟလာဟလံ, တေလံ ပက္ကုထိတံ [ဥက္ကဋ္ဌိတံ (သီ။ ပီ။), ပက္ကုဋ္ဌိတံ (သျာ။)] ယထာ၊
တမ္ဗလောဟ [တမ္ပလောဟံ (သျာ။)] ဝိလီနံဝ, ကာမာ ဒုက္ခတရာ တတောတိ။
ပါနီယဇာတကံ ပဉ္စမံ။
မိတ္တာမစ္စပရိဗျူဠှံ [ပရိဗ္ဗူဠှံ (သီ။ ပီ။)], အဟံ ဝန္ဒေ ရထေသဘံ၊
ပဗ္ဗဇိဿာမဟံ ရာဇ [ပဗ္ဗဇိဿံ မဟာရာဇ (သီ။ ပီ။)], တံ ဒေဝေါ အနုမညတု။
သစေ တေ ဦနံ ကာမေဟိ, အဟံ ပရိပူရယာမိ [အဟံဝ ပူရယာမိ (က။)] တေ၊
ယော တံ ဟိံသတိ ဝါရေမိ, မာ ပဗ္ဗဇ [ပဗ္ဗဇိ (ပီ။)] ယုဓဉ္စယ [ယုဓဉ္ဇယ (သီ။ သျာ။), ယုဝဉ္ဇယ (ပီ။)]။
န မတ္ထိ ဦနံ ကာမေဟိ, ဟိံသိတာ မေ န ဝိဇ္ဇတိ၊
ဒီပဉ္စ ကာတုမိစ္ဆာမိ, ယံ ဇရာ နာဘိကီရတိ။
(ဇာ၊၁၊၂၃၆။)ပုတ္တော ဝါ ပိတရံ ယာစေ, ပိတာ ဝါ ပုတ္တမောရသံ၊
နေဂမော တံ ယာစေ [နေဂမော ယာစတေ (သီ။ သျာ။ ပီ။)] တာတ, မာ ပဗ္ဗဇ ယုဓဉ္စယ။
မာ မံ ဒေဝ နိဝါရေဟိ, ပဗ္ဗဇန္တံ ရထေသဘ၊
မာဟံ ကာမေဟိ သမ္မတ္တော, ဇရာယ ဝသမနွဂူ။
အဟံ တံ တာတ ယာစာမိ, အဟံ ပုတ္တ နိဝါရယေ၊
စိရံ တံ ဒဋ္ဌုမိစ္ဆာမိ, မာ ပဗ္ဗဇ ယုဓဉ္စယ။
ဥဿာဝေါဝ တိဏဂ္ဂမှိ, သူရိယုဂ္ဂမနံ ပတိ၊
ဧဝမာယု မနုဿာနံ, မာ မံ အမ္မ နိဝါရယ။
တရမာနော ဣမံ ယာနံ, အာရောပေတု [တရမာနာ ဣမံ ယာနံ, အာရောပေန္တု (သီ။ ပီ။)] ရထေသဘ၊
မာ မေ မာတာ တရန္တဿ, အန္တရာယကရာ အဟု။
အဘိဓာဝထ ဘဒ္ဒန္တေ, သုညံ ဟေဿတိ ရမ္မကံ၊
ယုဓဉ္စယော အနုညာတော, သဗ္ဗဒတ္တေန ရာဇိနာ။
ယောဟု သေဋ္ဌော သဟဿဿ [မနုဿာနံ (သျာ။), သဟဿာနံ (က။)], ယုဝါ ကဉ္စနသန္နိဘော၊
သောယံ ကုမာရော ပဗ္ဗဇိတော, ကာသာယဝသနော ဗလီ။
ဥဘော ကုမာရာ ပဗ္ဗဇိတာ, ယုဓဉ္စယော ယုဓိဋ္ဌိလော၊
ပဟာယ မာတာပိတရော, သင်္ဂံ ဆေတွာန မစ္စုနောတိ။
ယုဓဉ္စယဇာတကံ ဆဋ္ဌံ။
ဧထ လက္ခဏ သီတာ စ, ဥဘော ဩတရထောဒကံ၊
ဧဝါယံ ဘရတော အာဟ, ‘‘ရာဇာ ဒသရထော မတော’’။
ကေန ရာမပ္ပဘာဝေန, သောစိတဗ္ဗံ န သောစသိ၊
ပိတရံ ကာလကတံ [ကာလင်္ကတံ (က။)] သုတွာ, န တံ ပသဟတေ ဒုခံ။
ယံ န သက္ကာ နိပါလေတုံ, ပေါသေန လပတံ ဗဟုံ၊
သ ကိဿ ဝိညူ မေဓာဝီ, အတ္တာနမုပတာပယေ။
(ဇာ၊၁၊၂၃၇။)ဒဟရာ စ ဟိ ဝုဒ္ဓါ စ [ယေ ဝုဒ္ဓါ (သီ။ အဋ္ဌ။), ယေ ဝုဍ္ဎာ (သျာ။)], ယေ ဗာလာ ယေ စ ပဏ္ဍိတာ၊
အဍ္ဎာ စေဝ ဒလိဒ္ဒါ စ, သဗ္ဗေ မစ္စုပရာယဏာ။
ဖလာနမိဝ ပက္ကာနံ, နိစ္စံ ပတနတော ဘယံ၊
ဧဝံ ဇာတာန မစ္စာနံ, နိစ္စ မရဏတော ဘယံ။
သာယမေကေ န ဒိဿန္တိ, ပါတော ဒိဋ္ဌာ ဗဟုဇ္ဇနာ၊
ပါတော ဧကေ န ဒိဿန္တိ, သာယံ ဒိဋ္ဌာ ဗဟုဇ္ဇနာ။
ပရိဒေဝယမာနော စေ, ကိဉ္စိဒတ္ထံ ဥဒဗ္ဗဟေ၊
သမ္မူဠှော ဟိံသမတ္တာနံ, ကယိရာ တံ ဝိစက္ခဏော။
ကိသော ဝိဝဏ္ဏော ဘဝတိ, ဟိံသမတ္တာနမတ္တနော [မတ္တနာ (သီ။ အဋ္ဌ။ သု။ နိ။ ၅၉၀)]၊
န တေန ပေတာ ပါလေန္တိ, နိရတ္ထာ ပရိဒေဝနာ။
ယထာ သရဏမာဒိတ္တံ, ဝါရိနာ ပရိနိဗ္ဗယေ [ဝါရိနာဝနိဗ္ဗာပယေ (သျာ။ က။)]၊
ဧဝမ္ပိ ဓီရော သုတဝါ, မေဓာဝီ ပဏ္ဍိတော နရော၊
ခိပ္ပမုပ္ပတိတံ သောကံ, ဝါတော တူလံဝ ဓံသယေ။
မစ္စော ဧကောဝ [ဧကောဝ မစ္စော (သီ။ သျာ။ ပီ။)] အစ္စေတိ, ဧကောဝ ဇာယတေ ကုလေ၊
သံယောဂပရမာတွေဝ, သမ္ဘောဂါ သဗ္ဗပါဏိနံ။
တသ္မာ ဟိ ဓီရဿ ဗဟုဿုတဿ, သမ္ပဿတော လောကမိမံ ပရဉ္စ၊
အညာယ ဓမ္မံ ဟဒယံ မနဉ္စ, သောကာ မဟန္တာပိ န တာပယန္တိ။
သောဟံ ဒဿဉ္စ ဘောက္ခဉ္စ, ဘရိဿာမိ စ [သောဟံ ယသဉ္စ ဘောဂဉ္စ, ဘရိယာပိ စ (သျာ။ က။)] ဉာတကေ၊
သေသဉ္စ ပါလယိဿာမိ, ကိစ္စမေတံ [ကိစ္စမေဝံ (ပီ။)] ဝိဇာနတော။
ဒသ ဝဿသဟဿာနိ, သဋ္ဌိ ဝဿသတာနိ စ၊
ကမ္ဗုဂီဝေါ မဟာဗာဟု, ရာမော ရဇ္ဇမကာရယီတိ။
ဒသရထဇာတကံ သတ္တမံ။
(ဇာ၊၁၊၂၃၈။)ဇာနန္တော နော မဟာရာဇ, တဝ သီလံ ဇနာဓိပေါ၊
ဣမေ ကုမာရေ ပူဇေန္တော, န တံ ကေနစိ မညထ။
တိဋ္ဌန္တေ နော မဟာရာဇေ, အဒု [အာဒု (သီ။ ပီ။), အာဒူ (သျာ။)] ဒေဝေ ဒိဝင်္ဂတေ၊
ဉာတီ တံ သမနုညိံသု, သမ္ပဿံ အတ္ထမတ္တနော။
ကေန သံဝရဝတ္တေန, သဉ္ဇာတေ အဘိတိဋ္ဌသိ၊
ကေန တံ နာတိဝတ္တန္တိ, ဉာတိသံဃာ သမာဂတာ။
န ရာဇပုတ္တ ဥသူယာမိ [ရာဇပုတ္တ နုဿုယျာမိ (က။)], သမဏာနံ မဟေသိနံ၊
သက္ကစ္စံ တေ နမဿာမိ, ပါဒေ ဝန္ဒာမိ တာဒိနံ။
တေ မံ ဓမ္မဂုဏေ ယုတ္တံ, သုဿူသမနုသူယကံ၊
သမဏာ မနုသာသန္တိ [သမနုသာသန္တိ (သီ။ သျာ။ ပီ။)], ဣသီ ဓမ္မဂုဏေ ရတာ။
တေသာဟံ ဝစနံ သုတွာ, သမဏာနံ မဟေသိနံ၊
န ကိဉ္စိ အတိမညာမိ, ဓမ္မေ မေ နိရတော မနော။
ဟတ္ထာရောဟာ အနီကဋ္ဌာ, ရထိကာ ပတ္တိကာရကာ၊
တေသံ [တေသု (ပီ။)] နပ္ပဋိဗန္ဓာမိ, နိဝိဋ္ဌံ [နိဗဒ္ဓံ (သီ။ ပီ။)] ဘတ္တဝေတနံ။
မဟာမတ္တာ စ မေ အတ္ထိ, မန္တိနော ပရိစာရကာ၊
ဗာရာဏသိံ ဝေါဟရန္တိ, ဗဟုမံသသုရောဒကံ။
အထောပိ ဝါဏိဇာ ဖီတာ, နာနာရဋ္ဌေဟိ အာဂတာ၊
တေသု မေ ဝိဟိတာ ရက္ခာ, ဧဝံ ဇာနာဟုပေါသထ။
ဓမ္မေန ကိရ ဉာတီနံ, ရဇ္ဇံ ကာရေဟိ သံဝရ၊
မေဓာဝီ ပဏ္ဍိတော စာသိ [စာပိ (သီ။ ပီ။)], အထောပိ ဉာတိနံ ဟိတော။
တံ တံ ဉာတိပရိဗျူဠှံ, နာနာရတနမောစိတံ၊
အမိတ္တာ နပ္ပသဟန္တိ, ဣန္ဒံဝ အသုရာဓိပေါတိ။
သံဝရဇာတကံ အဋ္ဌမံ။
(ဇာ၊၁၊၂၃၉။)ဥမ္မုဇ္ဇန္တိ နိမုဇ္ဇန္တိ, မနုဿာ ခုရနာသိကာ၊
သုပ္ပါရကံ တံ ပုစ္ဆာမ, သမုဒ္ဒေါ ကတမော အယံ။
ကုရုကစ္ဆာ [ဘရုကစ္ဆာ (သီ။ သျာ။ ပီ။ အဋ္ဌ။)] ပယာတာနံ, ဝါဏိဇာနံ ဓနေသိနံ၊
နာဝါယ ဝိပ္ပနဋ္ဌာယ, ခုရမာလီတိ ဝုစ္စတိ။
ယထာ အဂ္ဂီဝ သုရိယောဝ [အဂ္ဂိ သုရိယော စ (သျာ။), အဂ္ဂီဝ သူရိယော (က။)], သမုဒ္ဒေါ ပဋိဒိဿတိ၊
သုပ္ပါရကံ တံ ပုစ္ဆာမ, သမုဒ္ဒေါ ကတမော အယံ။
ကုရုကစ္ဆာ ပယာတာနံ, ဝါဏိဇာနံ ဓနေသိနံ၊
နာဝါယ ဝိပ္ပနဋ္ဌာယ, အဂ္ဂိမာလီတိ ဝုစ္စတိ။
ယထာ ဒဓီဝ ခီရံဝ [ဒဓိ စ ခီရံ စ (သျာ။), ဧဝမုပရိပိ], သမုဒ္ဒေါ ပဋိဒိဿတိ၊
သုပ္ပါရကံ တံ ပုစ္ဆာမ, သမုဒ္ဒေါ ကတမော အယံ။
ကုရုကစ္ဆာ ပယာတာနံ, ဝါဏိဇာနံ ဓနေသိနံ၊
နာဝါယ ဝိပ္ပနဋ္ဌာယ, ဒဓိမာလီတိ [ခီရမာလီတိ (က။)] ဝုစ္စတိ။
ယထာ ကုသောဝ သဿောဝ, သမုဒ္ဒေါ ပဋိဒိဿတိ၊
သုပ္ပါရကံ တံ ပုစ္ဆာမ, သမုဒ္ဒေါ ကတမော အယံ။
ကုရုကစ္ဆာ ပယာတာနံ, ဝါဏိဇာနံ ဓနေသိနံ၊
နာဝါယ ဝိပ္ပနဋ္ဌာယ, ကုသမာလီတိ ဝုစ္စတိ။
ယထာ နဠောဝ ဝေဠူဝ, သမုဒ္ဒေါ ပဋိဒိဿတိ၊
သုပ္ပါရကံ တံ ပုစ္ဆာမ, သမုဒ္ဒေါ ကတမော အယံ။
ကုရုကစ္ဆာ ပယာတာနံ, ဝါဏိဇာနံ ဓနေသိနံ၊
နာဝါယ ဝိပ္ပနဋ္ဌာယ, နဠမာလီတိ ဝုစ္စတိ။
မဟဗ္ဘယော ဘိံသနကော, သဒ္ဒေါ သုယျတိမာနုသော [သမုဒ္ဒေါ သုယျတ’မာနုသော (သီ။ ပီ။ အဋ္ဌ။)]၊
ယထာ သောဗ္ဘော ပပါတောဝ, သမုဒ္ဒေါ ပဋိဒိဿတိ၊
သုပ္ပါရကံ တံ ပုစ္ဆာမ, သမုဒ္ဒေါ ကတမော အယံ။
(ဇာ၊၁၊၂၄၀။)ကုရုကစ္ဆာ ပယာတာနံ, ဝါဏိဇာနံ ဓနေသိနံ၊
နာဝါယ ဝိပ္ပနဋ္ဌာယ, ဗဠဝါမုခီတိ [ဝဠဘာမုခီတိ (သီ။ သျာ။), ဗလဝါမုခီတိ (သျာ။ က။)] ဝုစ္စတိ။
ယတော သရာမိ အတ္တာနံ, ယတော ပတ္တောသ္မိ ဝိညုတံ၊
နာဘိဇာနာမိ သဉ္စိစ္စ, ဧကပါဏမ္ပိ ဟိံသိတံ၊
ဧတေန သစ္စဝဇ္ဇေန, သောတ္ထိံ နာဝါ နိဝတ္တတူတိ။
သုပ္ပါရကဇာတကံ နဝမံ။
ဧကာဒသကနိပါတံ နိဋ္ဌိတံ။
တဿုဒ္ဒါနံ –
သိရိမာတုသုပေါသကနာဂဝရော, ပုန ဇုဏှက ဓမ္မမုဒယဝရော၊
အထ ပါနိ ယုဓဉ္စယကော စ, ဒသရထ သံဝရ ပါရဂတေန နဝါတိ။
(ဇာ၊၁၊၂၄၁။)၁၂။ ဒွါဒသကနိပါတော
လုဒ္ဓါနံ [ခုဒ္ဒါနံ (သီ။ သျာ။ ပီ။)] လဟုစိတ္တာနံ, အကတညူန ဒုဗ္ဘိနံ၊
နာဒေဝသတ္တော ပုရိသော, ထီနံ သဒ္ဓါတုမရဟတိ။
န တာ ပဇာနန္တိ ကတံ န ကိစ္စံ, န မာတရံ ပိတရံ ဘာတရံ ဝါ၊
အနရိယာ သမတိက္ကန္တဓမ္မာ, သဿေဝ စိတ္တဿ ဝသံ ဝဇန္တိ။
စိရာနုဝုဋ္ဌမ္ပိ [စိရာနုဝုတ္ထမ္ပိ (သီ။ ပီ။)] ပိယံ မနာပံ, အနုကမ္ပကံ ပါဏသမမ္ပိ ဘတ္တုံ [သန္တံ (သီ။ သျာ။ ပီ။)]၊
အာဝါသု ကိစ္စေသု စ နံ ဇဟန္တိ, တသ္မာဟမိတ္ထီနံ န ဝိဿသာမိ။
ထီနဉှိ စိတ္တံ ယထာ ဝါနရဿ, ကန္နပ္ပကန္နံ ယထာ ရုက္ခဆာယာ၊
စလာစလံ ဟဒယမိတ္ထိယာနံ, စက္ကဿ နေမိ ဝိယ ပရိဝတ္တတိ။
ယဒါ တာ ပဿန္တိ သမေက္ခမာနာ, အာဒေယျရူပံ ပုရိသဿ ဝိတ္တံ၊
သဏှာဟိ ဝါစာဟိ နယန္တိ မေနံ, ကမ္ဗောဇကာ ဇလဇေနေဝ အဿံ။
ယဒါ န ပဿန္တိ သမေက္ခမာနာ, အာဒေယျရူပံ ပုရိသဿ ဝိတ္တံ၊
သမန္တတော နံ ပရိဝဇ္ဇယန္တိ, တိဏ္ဏော နဒီပါရဂတောဝ ကုလ္လံ။
(ဇာ၊၁၊၂၄၂။)သိလေသူပမာ သိခိရိဝ သဗ္ဗဘက္ခာ, တိက္ခမာယာ နဒီရိဝ သီဃသောတာ၊
သေဝန္တိ ဟေတာ ပိယမပ္ပိယဉ္စ, နာဝါ ယထာ ဩရကူလံ ပရဉ္စ။
န တာ ဧကဿ န ဒွိန္နံ, အာပဏောဝ ပသာရိတော၊
ယော တာ မယှန္တိ မညေယျ, ဝါတံ ဇာလေန ဗာဓယေ [ဗန္ဓယေ (သျာ။ က။)]။
ယထာ နဒီ စ ပန္ထော စ, ပါနာဂါရံ သဘာ ပပါ၊
ဧဝံ လောကိတ္ထိယော နာမ, ဝေလာ တာသံ န ဝိဇ္ဇတိ [ဣမိဿာ ဂါထာယ ပုဗ္ဗဒ္ဓါပရဒ္ဓံ ဝိပရိယာယေန ဒိဿတိ (က။)]။
ဃတာသနသမာ ဧတာ, ကဏှသပ္ပသိရူပမာ၊
ဂါဝေါ ဗဟိတိဏဿေဝ, ဩမသန္တိ ဝရံ ဝရံ။
ဃတာသနံ ကုဉ္ဇရံ ကဏှသပ္ပံ, မုဒ္ဓါဘိသိတ္တံ ပမဒါ စ သဗ္ဗာ၊
ဧတေ နရော နိစ္စယတော [နိစ္စယတ္တော (သီ။ ပီ။)] ဘဇေထ, တေသံ ဟဝေ ဒုဗ္ဗိဒု သဗ္ဗဘာဝေါ [သစ္စဘာဝေါ (သျာ။)]။
နစ္စန္တဝဏ္ဏာ န ဗဟူနံ ကန္တာ, န ဒက္ခိဏာ ပမဒါ သေဝိတဗ္ဗာ၊
န ပရဿ ဘရိယာ န ဓနဿ ဟေတု, ဧတိတ္ထိယော ပဉ္စ န သေဝိတဗ္ဗာတိ။
စူဠကုဏာလဇာတကံ ပဌမံ။
ကာ တွံ သုဒ္ဓေဟိ ဝတ္ထေဟိ, အဃေ ဝေဟာယသံ [ဝေဟာသယံ (သီ။ ပီ။)] ဌိတာ၊
ကေန တျာဿူနိ ဝတ္တန္တိ, ကုတော တံ ဘယမာဂတံ။
တဝေဝ ဒေဝ ဝိဇိတေ, ဘဒ္ဒသာလောတိ မံ ဝိဒူ၊
သဋ္ဌိ [သဋ္ဌိံ (သီ။ ပီ။)] ဝဿသဟဿာနိ, တိဋ္ဌတော ပူဇိတဿ မေ။
(ဇာ၊၁၊၂၄၃။)ကာရယန္တာ နဂရာနိ, အဂါရေ စ ဒိသမ္ပတိ၊
ဝိဝိဓေ စာပိ ပါသာဒေ, န မံ တေ အစ္စမညိသုံ၊
ယထေဝ မံ တေ ပူဇေသုံ, တထေဝ တွမ္ပိ ပူဇယ။
တံ ဣဝါဟံ [တဉ္စ အဟံ (သီ။ သျာ။ ပီ။)] န ပဿာမိ, ထူလံ ကာယေန တေ ဒုမံ၊
အာရောဟပရိဏာဟေန, အဘိရူပေါသိ ဇာတိယာ။
ပါသာဒံ ကာရယိဿာမိ, ဧကတ္ထမ္ဘံ မနောရမံ၊
တတ္ထ တံ ဥပနေဿာမိ, စိရံ တေ ယက္ခ ဇီဝိတံ။
ဧဝံ စိတ္တံ ဥဒပါဒိ, သရီရေန ဝိနာဘာဝေါ၊
ပုထုသော မံ ဝိကန္တိတွာ, ခဏ္ဍသော အဝကန္တထ။
အဂ္ဂေ စ ဆေတွာ မဇ္ဈေ စ, ပစ္ဆာ မူလမှိ ဆိန္ဒထ [မူလဉ္စ ဆိန္ဒထ (သီ။), မူလံ ဝိဆိန္ဒထ (ပီ။)]၊
ဧဝံ မေ ဆိဇ္ဇမာနဿ, န ဒုက္ခံ မရဏံ သိယာ။
ဟတ္ထပါဒံ [ဟတ္ထပါဒေ (က။)] ယထာ ဆိန္ဒေ [ဆိန္နေ (က။)], ကဏ္ဏနာသဉ္စ ဇီဝတော၊
တတော ပစ္ဆာ သိရော ဆိန္ဒေ, တံ ဒုက္ခံ မရဏံ သိယာ။
သုခံ နု ခဏ္ဍသော ဆိန္နံ, ဘဒ္ဒသာလဝနပ္ပတိ၊
ကိံ ဟေတု ကိံ ဥပါဒါယ, ခဏ္ဍသော ဆိန္နမိစ္ဆသိ။
ယဉ္စ ဟေတုမုပါဒါယ, ဟေတုံ ဓမ္မူပသံဟိတံ၊
ခဏ္ဍသော ဆိန္နမိစ္ဆာမိ, မဟာရာဇ သုဏောဟိ မေ။
ဉာတီ မေ သုခသံဝဒ္ဓါ, မမ ပဿေ နိဝါတဇာ၊
တေပိဟံ ဥပဟိံသေယျံ, ပရေသံ အသုခေါစိတံ။
စေတေယျရူပံ [စေတဗ္ဗရူပံ (သီ။ ပီ။)] စေတေသိ, ဘဒ္ဒသာလဝနပ္ပတိ၊
ဟိတကာမောသိ ဉာတီနံ, အဘယံ သမ္မ ဒမ္မိ တေတိ။
ဘဒ္ဒသာလဇာတကံ ဒုတိယံ။
(ဇာ၊၁၊၂၄၄။)ကသန္တိ ဝပန္တိ တေ ဇနာ, မနုဇာ ကမ္မဖလူပဇီဝိနော၊
နယိမဿ ဒီပကဿ ဘာဂိနော, ဇမ္ဗုဒီပါ ဣဒမေဝ နော ဝရံ။
တိပဉ္စရတ္တူပဂတမှိ စန္ဒေ, ဝေဂေါ မဟာ ဟေဟိတိ သာဂရဿ၊
ဥပ္လဝိဿံ ဒီပမိမံ ဥဠာရံ, မာ ဝေါ ဝဓီ ဂစ္ဆထ လေဏမညံ။
န ဇာတုယံ သာဂရဝါရိဝေဂေါ, ဥပ္လဝိဿံ ဒီပမိမံ ဥဠာရံ၊
တံ မေ နိမိတ္တေဟိ ဗဟူဟိ ဒိဋ္ဌံ, မာ ဘေထ ကိံ သောစထ မောဒထဝှေါ [မောဒထ ဝေါ (က။) ၆။၃၈ မောဂ္ဂလ္လာနသုတ္တံ ပဿိတဗ္ဗံ]။
ပဟူတဘက္ခံ ဗဟုအန္နပါနံ, ပတ္တတ္ထ အာဝါသမိမံ ဥဠာရံ၊
န ဝေါ ဘယံ ပဋိပဿာမိ ကိဉ္စိ, အာပုတ္တပုတ္တေဟိ ပမောဒထဝှေါ။
ယော ဒေဝေါယံ ဒက္ခိဏာယံ [ဒက္ခိဏဿံ (သီ။)] ဒိသာယံ, ခေမန္တိ ပက္ကောသတိ တဿ သစ္စံ၊
န ဥတ္တရော ဝေဒိ ဘယာဘယဿ, မာ ဘေထ ကိံ သောစထ မောဒထဝှေါ။
ယထာ ဣမေ ဝိပ္ပဝဒန္တိ ယက္ခာ, ဧကော ဘယံ သံသတိ ခေမမေကော၊
တဒိင်္ဃ မယှံ ဝစနံ သုဏာထ, ခိပ္ပံ လဟုံ မာ ဝိနဿိမှ သဗ္ဗေ။
(ဇာ၊၁၊၂၄၅။)သဗ္ဗေ သမာဂမ္မ ကရောမ နာဝံ, ဒေါဏိံ ဒဠှံ သဗ္ဗယန္တူပပန္နံ၊
သစေ အယံ ဒက္ခိဏော သစ္စမာဟ, မောဃံ ပဋိက္ကောသတိ ဥတ္တရောယံ၊
သာ စေဝ နော ဟေဟိတိ အာပဒတ္ထာ, ဣမဉ္စ ဒီပံ န ပရိစ္စဇေမ။
သစေ စ ခေါ ဥတ္တရော သစ္စမာဟ, မောဃံ ပဋိက္ကောသတိ ဒက္ခိဏောယံ၊
တမေဝ နာဝံ အဘိရုယှ သဗ္ဗေ, ဧဝံ မယံ သောတ္ထိ တရေမု ပါရံ။
န ဝေ သုဂဏှံ ပဌမေန သေဋ္ဌံ, ကနိဋ္ဌမာပါထဂတံ ဂဟေတွာ၊
ယော စီဓ တစ္ဆံ [မဇ္ဈံ (သီ။ သျာ။ ပီ။)] ပဝိစေယျ ဂဏှတိ [ဂဏှိ (က။)], သ ဝေ နရော သေဋ္ဌမုပေတိ ဌာနံ။
ယထာပိ တေ သာဂရဝါရိမဇ္ဈေ, သကမ္မုနာ သောတ္ထိ ဝဟိံသု ဝါဏိဇာ၊
အနာဂတတ္ထံ ပဋိဝိဇ္ဈိယာန, အပ္ပမ္ပိ နာစ္စေတိ သ ဘူရိပညော။
ဗာလာ စ မောဟေန ရသာနုဂိဒ္ဓါ, အနာဂတံ အပ္ပဋိဝိဇ္ဈိယတ္ထံ၊
ပစ္စုပ္ပန္နေ သီဒန္တိ အတ္ထဇာတေ, သမုဒ္ဒမဇ္ဈေ ယထာ တေ မနုဿာ။
အနာဂတံ ပဋိကယိရာထ ကိစ္စံ, ‘‘မာ မံ ကိစ္စံ ကိစ္စကာလေ ဗျဓေသိ’’၊
တံ တာဒိသံ ပဋိကတ [ပဋိကတံ (က။), ပဋိဂတ (သီ။ အဋ္ဌ။), ပဋိကစ္စ (?)] ကိစ္စကာရိံ, န တံ ကိစ္စံ ကိစ္စကာလေ ဗျဓေတီတိ။
သမုဒ္ဒဝါဏိဇဇာတကံ တတိယံ။
(ဇာ၊၁၊၂၄၆။)ကာမံ ကာမယမာနဿ, တဿ စေ တံ သမိဇ္ဈတိ၊
အဒ္ဓါ ပီတိမနော ဟောတိ, လဒ္ဓါ မစ္စော ယဒိစ္ဆတိ။
ကာမံ ကာမယမာနဿ, တဿ စေ တံ သမိဇ္ဈတိ၊
တတော နံ အပရံ ကာမေ, ဓမ္မေ တဏှံဝ ဝိန္ဒတိ။
ဂဝံဝ သိင်္ဂိနော သိင်္ဂံ, ဝဍ္ဎမာနဿ ဝဍ္ဎတိ၊
ဧဝံ မန္ဒဿ ပေါသဿ, ဗာလဿ အဝိဇာနတော၊
ဘိယျော တဏှာ ပိပါသာ စ, ဝဍ္ဎမာနဿ ဝဍ္ဎတိ။
ပထဗျာ သာလိယဝကံ, ဂဝဿံ [ဂဝါသံ (သီ။ သျာ။ ပီ။)] ဒါသပေါရိသံ၊
ဒတွာ စ [ဒတွာပိ (သီ။ သျာ။), ဒတွာ ဝါ (ပီ။)] နာလမေကဿ, ဣတိ ဝိဒွါ [ဝိဒ္ဓါ (သျာ။)] သမံ စရေ။
ရာဇာ ပသယှ ပထဝိံ ဝိဇိတွာ, သသာဂရန္တံ မဟိမာဝသန္တော၊
ဩရံ သမုဒ္ဒဿ အတိတ္တရူပေါ [အတိတ္တိရူပေါ (က။)], ပါရံ သမုဒ္ဒဿပိ ပတ္ထယေထ။
ယာဝ အနုဿရံ ကာမေ, မနသာ တိတ္တိ နာဇ္ဈဂါ၊
တတော နိဝတ္တာ ပဋိကမ္မ ဒိသွာ, တေ ဝေ သုတိတ္တာ ယေ [တိတ္တာ (သီ။ သျာ။ ပီ။)] ပညာယ တိတ္တာ။
ပညာယ တိတ္တိနံ [တိတ္တီနံ (သီ။ သျာ။)] သေဋ္ဌံ, န သော ကာမေဟိ တပ္ပတိ၊
ပညာယ တိတ္တံ ပုရိသံ, တဏှာ န ကုရုတေ ဝသံ။
အပစိနေထေဝ ကာမာနံ [ကာမာနိ (သီ။ သျာ။ ပီ။)], အပ္ပိစ္ဆဿ အလောလုပေါ၊
သမုဒ္ဒမတ္တော ပုရိသော, န သော ကာမေဟိ တပ္ပတိ။
ရထကာရောဝ စမ္မဿ, ပရိကန္တံ ဥပါဟနံ၊
ယံ ယံ စဇတိ [ဇဟတိ (သျာ။ က။)] ကာမာနံ, တံ တံ သမ္ပဇ္ဇတေ သုခံ၊
သဗ္ဗံ စေ သုခမိစ္ဆေယျ, သဗ္ဗေ ကာမေ ပရိစ္စဇေ။
(ဇာ၊၁၊၂၄၇။)အဋ္ဌ တေ ဘာသိတာ ဂါထာ, သဗ္ဗာ ဟောန္တိ သဟဿိယော [သဟဿိယာ (?) ဥပရိ သုတသောမဇာတကေ တထာ ဒိဿတိ]၊
ပဋိဂဏှ မဟာဗြဟ္မေ, သာဓေတံ တဝ ဘာသိတံ။
န မေ အတ္ထော သဟဿေဟိ, သတေဟိ နဟုတေဟိ ဝါ၊
ပစ္ဆိမံ ဘာသတော ဂါထံ, ကာမေ မေ န ရတော မနော။
ဘဒြကော [သဒ္ဒေါ (သီ။)] ဝတာယံ မာဏဝကော, သဗ္ဗလောကဝိဒူ မုနိ၊
ယော ဣမံ တဏှံ [ယော တဏှံ (သီ။ သျာ။)] ဒုက္ခဇနနိံ, ပရိဇာနာတိ ပဏ္ဍိတောတိ။
ကာမဇာတကံ စတုတ္ထံ။
ဒသ ခလု ဣမာနိ [ခလုမာနိ (သျာ။)] ဌာနာနိ, ယာနိ ပုဗ္ဗေ အကရိတွာ၊
သ ပစ္ဆာ မနုတပ္ပတိ, ဣစ္စေဝါဟ [ဣစ္စာဟ ရာဇာ (သီ။ သျာ။ ပီ။)] ဇနသန္ဓော။
အလဒ္ဓါ ဝိတ္တံ တပ္ပတိ, ပုဗ္ဗေ အသမုဒါနိတံ၊
န ပုဗ္ဗေ ဓနမေသိဿံ, ဣတိ ပစ္ဆာနုတပ္ပတိ။
သကျရူပံ ပုရေ သန္တံ, မယာ သိပ္ပံ န သိက္ခိတံ၊
ကိစ္ဆာ ဝုတ္တိ အသိပ္ပဿ, ဣတိ ပစ္ဆာနုတပ္ပတိ။
ကူဋဝေဒီ ပုရေ အာသိံ, ပိသုဏော ပိဋ္ဌိမံသိကော၊
စဏ္ဍော စ ဖရုသော စာပိ [စာသိံ (သီ။ သျာ။ ပီ။)], ဣတိ ပစ္ဆာနုတပ္ပတိ။
ပါဏာတိပါတီ ပုရေ အာသိံ, လုဒ္ဒေါ စာပိ [စာသိံ (သီ။ ပီ။)] အနာရိယော၊
ဘူတာနံ နာပစာယိဿံ, ဣတိ ပစ္ဆာနုတပ္ပတိ။
ဗဟူသု ဝတ သန္တီသု, အနာပါဒါသု ဣတ္ထိသု၊
ပရဒါရံ အသေဝိဿံ, ဣတိ ပစ္ဆာနုတပ္ပတိ။
ဗဟုမှိ ဝတ သန္တမှိ, အန္နပါနေ ဥပဋ္ဌိတေ၊
န ပုဗ္ဗေ အဒဒံ [အဒဒိံ (သီ။)] ဒါနံ, ဣတိ ပစ္ဆာနုတပ္ပတိ။
မာတရံ ပိတရဉ္စာပိ, ဇိဏ္ဏကံ ဂတယောဗ္ဗနံ [ဇိဏ္ဏကေ ဂတယောဗ္ဗနေ (သီ။ သျာ။ ပီ။)]၊
ပဟု သန္တော န ပေါသိဿံ, ဣတိ ပစ္ဆာနုတပ္ပတိ။
(ဇာ၊၁၊၂၄၈။)အာစရိယမနုသတ္ထာရံ, သဗ္ဗကာမရသာဟရံ၊
ပိတရံ အတိမညိဿံ, ဣတိ ပစ္ဆာနုတပ္ပတိ။
သမဏေ ဗြာဟ္မဏေ စာပိ, သီလဝန္တေ ဗဟုဿုတေ၊
န ပုဗ္ဗေ ပယိရုပါသိဿံ, ဣတိ ပစ္ဆာနုတပ္ပတိ။
သာဓု ဟောတိ တပေါ စိဏ္ဏော, သန္တော စ ပယိရုပါသိတော၊
န စ ပုဗ္ဗေ တပေါ စိဏ္ဏော, ဣတိ ပစ္ဆာနုတပ္ပတိ။
ယော စ ဧတာနိ ဌာနာနိ, ယောနိသော ပဋိပဇ္ဇတိ၊
ကရံ ပုရိသကိစ္စာနိ, သ ပစ္ဆာ နာနုတပ္ပတီတိ။
ဇနသန္ဓဇာတကံ ပဉ္စမံ။
ကဏှော ကဏှော စ ဃောရော စ, သုက္ကဒါဌော ပဘာသဝါ [ပတာပဝါ (သီ။ သျာ။ ပီ။)]၊
ဗဒ္ဓေါ ပဉ္စဟိ ရဇ္ဇူဟိ, ကိံ ရဝိ [ဓီရ (သီ။ ပီ။), ဝီရ (သျာ။)] သုနခေါ တဝ။
နာယံ မိဂါနမတ္ထာယ, ဥသီနက [ဥသီနရ (သီ။ ပီ။), ဥသီန္နရ (သျာ။)] ဘဝိဿတိ၊
မနုဿာနံ အနယော ဟုတွာ, တဒါ ကဏှော ပမောက္ခတိ။
ပတ္တဟတ္ထာ သမဏကာ, မုဏ္ဍာ သံဃာဋိပါရုတာ၊
နင်္ဂလေဟိ ကသိဿန္တိ, တဒါ ကဏှော ပမောက္ခတိ။
တပဿိနိယော [တပနီယာ (က။) ဒုတိယန္တပဒါနိ ဟေတာနိ] ပဗ္ဗဇိတာ, မုဏ္ဍာ သံဃာဋိပါရုတာ၊
ယဒါ လောကေ ဂမိဿန္တိ, တဒါ ကဏှော ပမောက္ခတိ။
ဒီဃောတ္တရောဋ္ဌာ ဇဋိလာ, ပင်္ကဒန္တာ ရဇဿိရာ၊
ဣဏံ စောဒါယ [ဝေါဒါယ (သီ။ ပီ။), စောဒယ (သျာ။)] ဂစ္ဆန္တိ, တဒါ ကဏှော ပမောက္ခတိ။
အဓိစ္စ ဝေဒေ [ဝေဒံ (က။)] သာဝိတ္တိံ, ယညတန္တဉ္စ [တန္တြဉ္စ (သီ။ သျာ။ ပီ။)] ဗြာဟ္မဏာ၊
ဘတိကာယ ယဇိဿန္တိ, တဒါ ကဏှော ပမောက္ခတိ။
မာတရံ ပိတရဉ္စာပိ, ဇိဏ္ဏကံ ဂတယောဗ္ဗနံ၊
ပဟူ သန္တော [သန္တာ (သီ။)] န ဘရန္တိ, တဒါ ကဏှော ပမောက္ခတိ။
(ဇာ၊၁၊၂၄၉။)မာတရံ ပိတရဉ္စာပိ, ဇိဏ္ဏကံ ဂတယောဗ္ဗနံ၊
ဗာလာ တုမှေတိ ဝက္ခန္တိ, တဒါ ကဏှော ပမောက္ခတိ။
အာစရိယဘရိယံ သခိံ [အာစရိယဘရိယံ သခါဘရိယံ (သီ။ ပီ။)], မာတုလာနိံ ပိတုစ္ဆကိံ [ပိတုစ္ဆယံ (သီ။), ပိတုစ္ဆသံ (ပီ။)]၊
ယဒါ လောကေ ဂမိဿန္တိ, တဒါ ကဏှော ပမောက္ခတိ။
အသိစမ္မံ ဂဟေတွာန, ခဂ္ဂံ ပဂ္ဂယှ ဗြာဟ္မဏာ၊
ပန္ထဃာတံ ကရိဿန္တိ, တဒါ ကဏှော ပမောက္ခတိ။
သုက္ကစ္ဆဝီ ဝေဓဝေရာ, ထူလဗာဟူ အပါတုဘာ၊
မိတ္တဘေဒံ ကရိဿန္တိ, တဒါ ကဏှော ပမောက္ခတိ။
မာယာဝိနော နေကတိကာ, အသပ္ပုရိသစိန္တကာ၊
ယဒါ လောကေ ဘဝိဿန္တိ, တဒါ ကဏှော ပမောက္ခတီတိ။
မဟာကဏှဇာတကံ ဆဋ္ဌံ။
နေဝ ကိဏာမိ နပိ ဝိက္ကိဏာမိ, န စာပိ မေ သန္နိစယော စ အတ္ထိ [ဣဓတ္ထိ (သျာ။)]၊
သုကိစ္ဆရူပံ ဝတိဒံ ပရိတ္တံ, ပတ္ထောဒနော နာလမယံ ဒုဝိန္နံ။
အပ္ပမှာ အပ္ပကံ ဒဇ္ဇာ, အနုမဇ္ဈတော မဇ္ဈကံ၊
ဗဟုမှာ ဗဟုကံ ဒဇ္ဇာ, အဒါနံ နုပပဇ္ဇတိ [န ဥပပဇ္ဇတိ (သီ။ ပီ။), နူပပဇ္ဇတိ (သျာ။)]။
တံ တံ ဝဒါမိ ကောသိယ, ဒေဟိ ဒါနာနိ ဘုဉ္ဇ စ။
အရိယမဂ္ဂံ သမာရူဟ [အရိယံ မဂ္ဂံ သမာရုဟ (သီ။ ပီ။)], နေကာသီ လဘတေ သုခံ။
မောဃဉ္စဿ ဟုတံ ဟောတိ, မောဃဉ္စာပိ သမီဟိတံ၊
အတိထိသ္မိံ ယော နိသိန္နသ္မိံ, ဧကော ဘုဉ္ဇတိ ဘောဇနံ။
တံ တံ ဝဒါမိ ကောသိယ, ဒေဟိ ဒါနာနိ ဘုဉ္ဇ စ၊
အရိယမဂ္ဂံ သမာရူဟ, နေကာသီ လဘတေ သုခံ။
(ဇာ၊၁၊၂၅၀။)သစ္စဉ္စဿ ဟုတံ ဟောတိ, သစ္စဉ္စာပိ သမီဟိတံ၊
အတိထိသ္မိံ ယော နိသိန္နသ္မိံ, နေကော ဘုဉ္ဇတိ ဘောဇနံ။
တံ တံ ဝဒါမိ ကောသိယ, ဒေဟိ ဒါနာနိ ဘုဉ္ဇ စ၊
အရိယမဂ္ဂံ သမာရူဟ, နေကာသီ လဘတေ သုခံ။
သရဉ္စ ဇုဟတိ ပေါသော, ဗဟုကာယ ဂယာယ စ၊
ဒေါဏေ တိမ္ဗရုတိတ္ထသ္မိံ, သီဃသောတေ မဟာဝဟေ။
အတြ စဿ ဟုတံ ဟောတိ, အတြ စဿ သမီဟိတံ၊
အတိထိသ္မိံ ယော နိသိန္နသ္မိံ, နေကော ဘုဉ္ဇတိ ဘောဇနံ။
တံ တံ ဝဒါမိ ကောသိယ, ဒေဟိ ဒါနာနိ ဘုဉ္ဇ စ၊
အရိယမဂ္ဂံ သမာရူဟ, နေကာသီ လဘတေ သုခံ။
ဗဠိသဉှိ သော နိဂိလတိ [နိဂ္ဂိလတိ (သီ။ ပီ။)], ဒီဃသုတ္တံ သဗန္ဓနံ၊
အတိထိသ္မိံ ယော နိသိန္နသ္မိံ, ဧကော ဘုဉ္ဇတိ ဘောဇနံ။
တံ တံ ဝဒါမိ ကောသိယ, ဒေဟိ ဒါနာနိ ဘုဉ္ဇ စ၊
အရိယမဂ္ဂံ သမာရူဟ, နေကာသီ လဘတေ သုခံ။
ဥဠာရဝဏ္ဏာ ဝတ ဗြာဟ္မဏာ ဣမေ, အယဉ္စ ဝေါ သုနခေါ ကိဿ ဟေတု၊
ဥစ္စာဝစံ ဝဏ္ဏနိဘံ ဝိကုဗ္ဗတိ, အက္ခာထ နော ဗြာဟ္မဏာ ကေ နု တုမှေ။
စန္ဒော စ သုရိယော စ [သူရိယော စ (က။)] ဥဘော ဣဓာဂတာ, အယံ ပန မာတလိ ဒေဝသာရထိ၊
သက္ကောဟမသ္မိ တိဒသာနမိန္ဒော, ဧသော စ ခေါ ပဉ္စသိခေါတိ ဝုစ္စတိ။
ပါဏိဿရာ မုဒိင်္ဂါ စ [မုတိင်္ဂါ စ (သီ။ သျာ။ ပီ။], မုရဇာလမ္ဗရာနိ စ၊
သုတ္တမေနံ ပဗောဓေန္တိ, ပဋိဗုဒ္ဓေါ စ နန္ဒတိ။
ယေ ကေစိမေ မစ္ဆရိနော ကဒရိယာ, ပရိဘာသကာ သမဏဗြာဟ္မဏာနံ၊
ဣဓေဝ နိက္ခိပ္ပ သရီရဒေဟံ, ကာယဿ ဘေဒါ နိရယံ ဝဇန္တိ။
(ဇာ၊၁၊၂၅၁။)ယေ ကေစိမေ သုဂ္ဂတိမာသမာနာ [သုဂ္ဂတိမာသသာနာ (သီ။ ပီ။), သုဂ္ဂတာသိသမာနာ (က။)], ဓမ္မေ ဌိတာ သံယမေ သံဝိဘာဂေ၊
ဣဓေဝ နိက္ခိပ္ပ သရီရဒေဟံ, ကာယဿ ဘေဒါ သုဂတိံ ဝဇန္တိ။
တွံ နောသိ ဉာတိ ပုရိမာသု ဇာတိသု, သော မစ္ဆရီ ရောသကော [ကောသိယော (သျာ။ က။)] ပါပဓမ္မော၊
တဝေဝ အတ္ထာယ ဣဓာဂတမှာ, မာ ပါပဓမ္မော နိရယံ ဂမိတ္ထ [အပ္ပတ္ထ (က။ သီ။ သျာ။ ပီ။)]။
အဒ္ဓါ ဟိ မံ ဝေါ ဟိတကာမာ, ယံ မံ သမနုသာသထ၊
သောဟံ တထာ ကရိဿာမိ, သဗ္ဗံ ဝုတ္တံ ဟိတေသိဘိ။
ဧသာဟမဇ္ဇေဝ ဥပါရမာမိ, န စာပိဟံ [န စာပဟံ (သီ။ ပီ။)] ကိဉ္စိ ကရေယျ ပါပံ၊
န စာပိ မေ ကိဉ္စိ အဒေယျမတ္ထိ, န စာပိဒတွာ ဥဒကံ ပိဝါမိ [ဥဒကမ္ပဟံ ပိဗေ (သီ။)]။
ဧဝဉ္စ မေ ဒဒတော သဗ္ဗကာလံ [ကာလေ (က။)], ဘောဂါ ဣမေ ဝါသဝ ခီယိဿန္တိ၊
တတော အဟံ ပဗ္ဗဇိဿာမိ သက္က, ဟိတွာန ကာမာနိ ယထောဓိကာနီတိ။
ကောသိယဇာတကံ သတ္တမံ။
ယေသံ န ကဒါစိ ဘူတပုဗ္ဗံ, သချံ [သက္ခိံ (သီ။ ပီ။), သခိ (သျာ။)] သတ္တပဒမ္ပိမသ္မိ လောကေ၊
ဇာတာ အမိတ္တာ ဒုဝေ သဟာယာ, ပဋိသန္ဓာယ စရန္တိ ကိဿ ဟေတု။
(ဇာ၊၁၊၂၅၂။)ယဒိ မေ အဇ္ဇ ပါတရာသကာလေ, ပဉှံ န သက္ကုဏေယျာထ ဝတ္တုမေတံ၊
ရဋ္ဌာ ပဗ္ဗာဇယိဿာမိ ဝေါ သဗ္ဗေ, န ဟိ မတ္ထော ဒုပ္ပညဇာတိကေဟိ။
မဟာဇနသမာဂမမှိ ဃောရေ, ဇနကောလာဟလသင်္ဂမမှိ ဇာတေ၊
ဝိက္ခိတ္တမနာ အနေကစိတ္တာ, ပဉှံ န သက္ကုဏောမ ဝတ္တုမေတံ။
ဧကဂ္ဂစိတ္တာဝ ဧကမေကာ, ရဟသိ ဂတာ အတ္ထံ နိစိန္တယိတွာ [အတ္ထာနိ စိန္တယိတွာ (သျာ။ က။)]၊
ပဝိဝေကေ သမ္မသိတွာန ဓီရာ, အထ ဝက္ခန္တိ ဇနိန္ဒ ဧတမတ္ထံ။
ဥဂ္ဂပုတ္တ-ရာဇပုတ္တိယာနံ, ဥရဗ္ဘဿ မံသံ ပိယံ မနာပံ၊
န သုနခဿ တေ အဒေန္တိ မံသံ, အထ မေဏ္ဍဿ သုဏေန သချမဿ။
စမ္မံ ဝိဟနန္တိ ဧဠကဿ, အဿပိဋ္ဌတ္ထရဿုခဿ [အဿပိဋ္ဌတ္ထရဏသုခဿ (သီ။)] ဟေတု၊
န စ တေ သုနခဿ အတ္ထရန္တိ, အထ မေဏ္ဍဿ သုဏေန သချမဿ။
အာဝေလ္လိတသိင်္ဂိကော ဟိ မေဏ္ဍော, န စ သုနခဿ ဝိသာဏကာနိ အတ္ထိ၊
တိဏဘက္ခော မံသဘောဇနော စ, အထ မေဏ္ဍဿ သုဏေန သချမဿ။
တိဏမာသိ ပလာသမာသိ မေဏ္ဍော, န စ သုနခေါ တိဏမာသိ နော ပလာသံ၊
ဂဏှေယျ သုဏော သသံ ဗိဠာရံ, အထ မေဏ္ဍဿ သုဏေန သချမဿ။
(ဇာ၊၁၊၂၅၃။)အဋ္ဌဍ္ဎပဒေါ စတုပ္ပဒဿ, မေဏ္ဍော အဋ္ဌနခေါ အဒိဿမာနော၊
ဆာဒိယမာဟရတီ အယံ ဣမဿ, မံသံ အာဟရတီ အယံ အမုဿ။
ပါသာဒဝရဂတော ဝိဒေဟသေဋ္ဌော, ဝိတိဟာရံ အညမညဘောဇနာနံ၊
အဒ္ဒက္ခိ [အဒ္ဒသ (သျာ။ က။)] ကိရ သက္ခိကံ ဇနိန္ဒော, ဗုဘုက္ကဿ ပုဏ္ဏံ မုခဿ [ဘောဘုက္ခဿ စ ပုဏ္ဏမုခဿ (သီ။)] စေတံ။
လာဘာ ဝတ မေ အနပ္ပရူပါ, ယဿ မေဒိသာ ပဏ္ဍိတာ ကုလမှိ၊
ပဉှဿ ဂမ္ဘီရဂတံ နိပုဏမတ္ထံ, ပဋိဝိဇ္ဈန္တိ သုဘာသိတေန ဓီရာ။
အဿတရိရထဉ္စ ဧကမေကံ, ဖီတံ ဂါမဝရဉ္စ ဧကမေကံ၊
သဗ္ဗေသံ ဝေါ ဒမ္မိ ပဏ္ဍိတာနံ, ပရမပ္ပတီတမနော သုဘာသိတေနာတိ။
မေဏ္ဍကပဉှဇာတကံ အဋ္ဌမံ။
နာဒဋ္ဌာ [နာဒိဋ္ဌာ (က။ သီ။ သျာ။ က။)] ပရတော ဒေါသံ, အဏုံ ထူလာနိ သဗ္ဗသော၊
ဣဿရော ပဏယေ ဒဏ္ဍံ, သာမံ အပ္ပဋိဝေက္ခိယ။
ယော စ အပ္ပဋိဝေက္ခိတွာ, ဒဏ္ဍံ ကုဗ္ဗတိ ခတ္တိယော၊
သကဏ္ဋကံ သော ဂိလတိ, ဇစ္စန္ဓောဝ သမက္ခိကံ။
အဒဏ္ဍိယံ ဒဏ္ဍယတိ [ဒဏ္ဍိယတိ (သျာ။ ပီ။)], ဒဏ္ဍိယဉ္စ အဒဏ္ဍိယံ [အဒဏ္ဍိယ (နိယျ), န ဒဏ္ဍယေ (?)]၊
အန္ဓောဝ ဝိသမံ မဂ္ဂံ, န ဇာနာတိ သမာသမံ။
ယော စ ဧတာနိ ဌာနာနိ, အဏုံ ထူလာနိ သဗ္ဗသော၊
သုဒိဋ္ဌမနုသာသေယျ, သ ဝေ ဝေါဟရိတု [ဝေါဟာတု (ပီ။)] မရဟတိ။
(ဇာ၊၁၊၂၅၄။)နေကန္တမုဒုနာ သက္ကာ, ဧကန္တတိခိဏေန ဝါ၊
အတ္တံ မဟန္တေ [မဟတ္တေ (သျာ။ က။)] ဌပေတုံ [ဌာပေတုံ (သီ။ သျာ။ ပီ။)], တသ္မာ ဥဘယမာစရေ။
ပရိဘူတော မုဒု ဟောတိ, အတိတိက္ခော စ ဝေရဝါ၊
ဧတဉ္စ ဥဘယံ ဉတွာ, အနုမဇ္ဈံ သမာစရေ။
ဗဟုမ္ပိ ရတ္တော ဘာသေယျ, ဒုဋ္ဌောပိ ဗဟု ဘာသတိ၊
န ဣတ္ထိကာရဏာ ရာဇ, ပုတ္တံ ဃာတေတုမရဟသိ။
သဗ္ဗောဝ [သဗ္ဗော စ (က။ သီ။ ပီ။)] လောကော ဧကတော [ဧကန္တော (သီ။ ပီ။)], ဣတ္ထီ စ အယမေကိကာ၊
တေနာဟံ ပဋိပဇ္ဇိဿံ, ဂစ္ဆထ ပက္ခိပထေဝ [ပက္ခိပေထ (သျာ။ အဋ္ဌ။)] တံ။
အနေကတာလေ နရကေ, ဂမ္ဘီရေ စ သုဒုတ္တရေ [ဂမ္ဘီရေ သုဒုရုတ္တရေ (ပီ။ က။)]၊
ပါတိတော ဂိရိဒုဂ္ဂသ္မိံ, ကေန တွံ တတ္ထ နာမရိ။
နာဂေါ ဇာတဖဏော တတ္ထ, ထာမဝါ ဂိရိသာနုဇော၊
ပစ္စဂ္ဂဟိ မံ ဘောဂေဟိ, တေနာဟံ တတ္ထ နာမရိံ။
ဧဟိ တံ ပဋိနေဿာမိ, ရာဇပုတ္တ သကံ ဃရံ၊
ရဇ္ဇံ ကာရေဟိ [ကာရေသိ (သီ။)] ဘဒ္ဒန္တေ, ကိံ အရညေ ကရိဿသိ။
ယထာ ဂိလိတွာ ဗဠိသံ, ဥဒ္ဓရေယျ သလောဟိတံ၊
ဥဒ္ဓရိတွာ သုခီ အဿ, ဧဝံ [သုခံ (ပီ။ က။)] ပဿာမိ အတ္တနံ [အတ္တနိ (ပီ။ က။), အတ္တနာ (သျာ။), ဧဝံ အဟမ္ပိ ပုန သောတ္ထိဘာဝပ္ပတ္တံ ဂိလိတဗဠိသံ ပုရိသမိဝ အတ္တာနံ ပဿာမီတိ (အဋ္ဌ။ သံဝဏ္ဏနာ)]။
ကိံ နု တွံ ဗဠိသံ ဗြူသိ, ကိံ တွံ ဗြူသိ သလောဟိတံ၊
ကိံ နု တွံ ဥဗ္ဘတံ ဗြူသိ, တံ မေ အက္ခာဟိ ပုစ္ဆိတော။
ကာမာဟံ ဗဠိသံ ဗြူမိ, ဟတ္ထိအဿံ သလောဟိတံ၊
စတ္တာဟံ ဥဗ္ဘတံ ဗြူမိ, ဧဝံ ဇာနာဟိ ခတ္တိယ။
စိဉ္စာမာဏဝိကာ မာတာ, ဒေဝဒတ္တော စ မေ ပိတာ၊
အာနန္ဒော ပဏ္ဍိတော နာဂေါ, သာရိပုတ္တော စ ဒေဝတာ၊
ရာဇပုတ္တော အဟံ အာသိံ [အဟံ တဒါ ရာဇပုတ္တော (သီ။ သျာ။ ပီ။)], ဧဝံ ဓာရေထ ဇာတကန္တိ။
မဟာပဒုမဇာတကံ နဝမံ။
(ဇာ၊၁၊၂၅၅။)֍ * ၄၇၃။ မိတ္တာမိတ္တဇာတကံ (၁၀)
ကာနိ ကမ္မာနိ ကုဗ္ဗာနံ, ကထံ ဝိညူ ပရက္ကမေ၊
အမိတ္တံ ဇာနေယျ မေဓာဝီ, ဒိသွာ သုတွာ စ ပဏ္ဍိတော။
န နံ ဥမှယတေ ဒိသွာ, န စ နံ ပဋိနန္ဒတိ၊
စက္ခူနိ စဿ [စက္ခူနိဿ (သျာ။ က။)] န ဒဒါတိ, ပဋိလောမဉ္စ ဝတ္တတိ။
အမိတ္တေ တဿ ဘဇတိ, မိတ္တေ တဿ န သေဝတိ၊
ဝဏ္ဏကာမေ နိဝါရေတိ, အက္ကောသန္တေ ပသံသတိ။
ဂုယှဉ္စ တဿ နက္ခာတိ, တဿ ဂုယှံ န ဂူဟတိ၊
ကမ္မံ တဿ န ဝဏ္ဏေတိ, ပညဿ နပ္ပသံသတိ။
အဘဝေ နန္ဒတိ တဿ, ဘဝေ တဿ န နန္ဒတိ၊
အစ္ဆေရံ [အစ္ဆရိယံ (သီ။ သျာ။ ပီ။)] ဘောဇနံ လဒ္ဓါ, တဿ နုပ္ပဇ္ဇတေ သတိ၊
တတော နံ နာနုကမ္ပတိ, အဟော သောပိ [အဟာသောပိ (က။ သီ။ သျာ။ က။)] လဘေယျိတော။
ဣစ္စေတေ သောဠသာကာရာ, အမိတ္တသ္မိံ ပတိဋ္ဌိတာ၊
ယေဟိ အမိတ္တံ ဇာနေယျ, ဒိသွာ သုတွာ စ ပဏ္ဍိတော။
ကာနိ ကမ္မာနိ ကုဗ္ဗာနံ, ကထံ ဝိညူ ပရက္ကမေ၊
မိတ္တံ ဇာနေယျ မေဓာဝီ, ဒိသွာ သုတွာ စ ပဏ္ဍိတော။
ပဝုတ္ထံ တဿ သရတိ, အာဂတံ အဘိနန္ဒတိ၊
တတော ကေလာယိတော ဟောတိ, ဝါစာယ ပဋိနန္ဒတိ။
မိတ္တေ တဿေဝ ဘဇတိ, အမိတ္တေ တဿ န သေဝတိ၊
အက္ကောသန္တေ နိဝါရေတိ, ဝဏ္ဏကာမေ ပသံသတိ။
ဂုယှဉ္စ တဿ အက္ခာတိ, တဿ ဂုယှဉ္စ ဂူဟတိ၊
ကမ္မဉ္စ တဿ ဝဏ္ဏေတိ, ပညံ တဿ [ပညမဿ (သျာ။ က။)] ပသံသတိ။
ဘဝေ စ နန္ဒတိ တဿ [ဘဝေ နန္ဒတိ တဿ စ (က။)], အဘဝေ တဿ န နန္ဒတိ၊
အစ္ဆေရံ [အစ္ဆရိယံ (သီ။ သျာ။ ပီ။)] ဘောဇနံ လဒ္ဓါ, တဿ ဥပ္ပဇ္ဇတေ သတိ၊
တတော နံ အနုကမ္ပတိ, အဟော သောပိ [ပဟာသောပိ (က။ သီ။ သျာ။ က။)] လဘေယျိတော။
(ဇာ၊၁၊၂၅၆။)ဣစ္စေတေ သောဠသာကာရာ, မိတ္တသ္မိံ သုပ္ပတိဋ္ဌိတာ၊
ယေဟိ မိတ္တဉ္စ ဇာနေယျ [မိတ္တံ သုဇာနေယျ (ပီ။ က။)], ဒိသွာ သုတွာ စ ပဏ္ဍိတောတိ။
မိတ္တာမိတ္တဇာတကံ ဒသမံ။
ဒွါဒသကနိပါတံ နိဋ္ဌိတံ။
တဿုဒ္ဒါနံ –
လဟုစိတ္တ သသာလ ကသန္တိ ပုန, အထ ကာမ ဒသခလုဋ္ဌာနဝရော၊
အထ ကဏှ သုကောသိယ မေဏ္ဍဝရော, ပဒုမော ပုန မိတ္တဝရေန ဒသာတိ။
(ဇာ၊၁၊၂၅၇။)၁၃။ တေရသကနိပါတော
အဟာသိ [အာဟာသိ (?)] မေ အမ္ဗဖလာနိ ပုဗ္ဗေ, အဏူနိ ထူလာနိ စ ဗြဟ္မစာရိ၊
တေဟေဝ မန္တေဟိ န ဒါနိ တုယှံ, ဒုမပ္ဖလာ ပါတုဘဝန္တိ ဗြဟ္မေ။
နက္ခတ္တယောဂံ ပဋိမာနယာမိ, ခဏံ မုဟုတ္တဉ္စ မန္တေ န ပဿံ [ခဏံ မုဟုတ္တံ န မံ တောသယန္တိ (သီ။ ပီ။)]၊
နက္ခတ္တယောဂဉ္စ ခဏဉ္စ လဒ္ဓါ, အဒ္ဓါဟရိဿမ္ဗဖလံ [အထာဟရိဿမ္ဗဖလံ (သီ။ ပီ။)] ပဟူတံ။
နက္ခတ္တယောဂံ န ပုရေ အဘာဏိ, ခဏံ မုဟုတ္တံ န ပုရေ အသံသိ၊
သယံ ဟရီ [အထာဟရီ (သီ။ သျာ။ ပီ။)] အမ္ဗဖလံ ပဟူတံ, ဝဏ္ဏေန ဂန္ဓေန ရသေနုပေတံ။
မန္တာဘိဇပ္ပေန ပုရေ ဟိ [ပုရ’ဿ (သီ။ ပီ။), ပုရေပိ (သျာ။)] တုယှံ, ဒုမပ္ဖလာ ပါတုဘဝန္တိ ဗြဟ္မေ၊
သွာဇ္ဇ န ပါရေသိ ဇပ္ပမ္ပိ မန္တံ [ဇပမ္ပိ မန္တေ (သီ။ ပီ။)], အယံ သော ကော နာမ တဝဇ္ဇ ဓမ္မော။
စဏ္ဍာလပုတ္တော မမ သမ္ပဒါသိ, ဓမ္မေန မန္တေ ပကတိဉ္စ သံသိ၊
မာ စဿု မေ ပုစ္ဆိတော နာမဂေါတ္တံ, ဂုယှိတ္ထော အတ္ထံ [မာ တံ (သီ။ သျာ။ ပီ။)] ဝိဇဟေယျ မန္တော [ဝိဇဟေယျုမန္တာ (သျာ။)]။
(ဇာ၊၁၊၂၅၈။)သောဟံ ဇနိန္ဒေန ဇနမှိ ပုဋ္ဌော, မက္ခာဘိဘူတော အလိကံ အဘာဏိံ၊
‘‘မန္တာ ဣမေ ဗြာဟ္မဏဿာ’’တိ မိစ္ဆာ, ပဟီနမန္တော ကပဏော ရုဒါမိ။
ဧရဏ္ဍာ ပုစိမန္ဒာ ဝါ, အထ ဝါ ပါလိဘဒ္ဒကာ၊
မဓုံ မဓုတ္ထိကော ဝိန္ဒေ, သော ဟိ တဿ ဒုမုတ္တမော။
ခတ္တိယာ ဗြာဟ္မဏာ ဝေဿာ, သုဒ္ဒါ စဏ္ဍာလပုက္ကုသာ၊
ယမှာ ဓမ္မံ ဝိဇာနေယျ, သော ဟိ တဿ နရုတ္တမော။
ဣမဿ ဒဏ္ဍဉ္စ ဝဓဉ္စ ဒတွာ, ဂလေ ဂဟေတွာ ခလယာထ [ဗလယာထ (သျာ။), ဂလယာထ (က။)] ဇမ္မံ၊
ယော ဥတ္တမတ္ထံ ကသိရေန လဒ္ဓံ, မာနာတိမာနေန ဝိနာသယိတ္ထ။
ယထာ သမံ မညမာနော ပတေယျ, သောဗ္ဘံ ဂုဟံ နရကံ ပူတိပါဒံ၊
ရဇ္ဇူတိ ဝါ အက္ကမေ ကဏှသပ္ပံ, အန္ဓော ယထာ ဇောတိမဓိဋ္ဌဟေယျ၊
ဧဝမ္ပိ မံ တွံ ခလိတံ သပည [သပညာ (ပီ။)], ပဟီနမန္တဿ ပုနပ္ပဒါဟိ [ပုန သမ္ပဒါဟိ (သျာ။), ပုနပ္ပသီဒ (သီ။ ပီ။)]။
ဓမ္မေန မန္တံ [မန္တေ (သီ။ သျာ။ ပီ။)] တဝ သမ္ပဒါသိံ, တုဝမ္ပိ ဓမ္မေန [တွမ္ပိ ဓမ္မေနေဝ (က။)] ပရိဂ္ဂဟေသိ၊
ပကတိမ္ပိ တေ အတ္တမနော အသံသိံ, ဓမ္မေ ဌိတံ တံ [ပတိဋ္ဌံ (က။)] န ဇဟေယျ မန္တော။
ယော ဗာလ မန္တံ [ဗလမန္တံ (က။)] ကသိရေန လဒ္ဓံ, ယံ ဒုလ္လဘံ အဇ္ဇ မနုဿလောကေ၊
ကိဉ္စာပိ လဒ္ဓါ ဇီဝိတုံ အပ္ပပညော [ကိစ္ဆာ လဒ္ဓံ ဇီဝိကံ အပ္ပပညော (သီ။ သျာ။), ကစ္ဆာပိ လဒ္ဓါ ဇီဝိကံ အပ္ပည (ပီ။)], ဝိနာသယီ အလိကံ ဘာသမာနော။
(ဇာ၊၁၊၂၅၉။)ဗာလဿ မူဠှဿ အကတညုနော စ, မုသာ ဘဏန္တဿ အသညတဿ၊
မန္တေ မယံ တာဒိသကေ န ဒေမ, ကုတော မန္တာ ဂစ္ဆ န မယှ ရုစ္စသီတိ။
အမ္ဗဇာတကံ ပဌမံ။
ကုဌာရိဟတ္ထော [ကုဓာရိဟတ္ထော (က။)] ပုရိသော, ဝနမောဂယှ တိဋ္ဌသိ၊
ပုဋ္ဌော မေ သမ္မ အက္ခာဟိ, ကိံ ဒါရုံ ဆေတုမိစ္ဆသိ။
ဣဿော [ဣသော (သီ။), ဤသော (သျာ။ ပီ။)] ဝနာနိ စရသိ, သမာနိ ဝိသမာနိ စ၊
ပုဋ္ဌော မေ သမ္မ အက္ခာဟိ, ကိံ ဒါရုံ နေမိယာ ဒဠှံ။
နေဝ သာလော န ခဒိရော, နာဿကဏ္ဏော ကုတော ဓဝေါ၊
ရုက္ခော စ [ရုက္ခောဝ (သီ။ ပီ။)] ဖန္ဒနော နာမ, တံ ဒါရုံ နေမိယာ ဒဠှံ။
ကီဒိသာနိဿ ပတ္တာနိ, ခန္ဓော ဝါ ပန ကီဒိသော၊
ပုဋ္ဌော မေ သမ္မ အက္ခာဟိ, ယထာ ဇာနေမု ဖန္ဒနံ။
ယဿ သာခါ ပလမ္ဗန္တိ, နမန္တိ န စ ဘဉ္ဇရေ၊
သော ရုက္ခော ဖန္ဒနော နာမ, ယဿ မူလေ အဟံ ဌိတော။
အရာနံ စက္ကနာဘီနံ, ဤသာနေမိရထဿ စ၊
သဗ္ဗဿ တေ ကမ္မနိယော, အယံ ဟေဿတိ ဖန္ဒနော။
ဣတိ ဖန္ဒနရုက္ခောပိ, တာဝဒေ အဇ္ဈဘာသထ၊
မယှမ္ပိ ဝစနံ အတ္ထိ, ဘာရဒွါဇ သုဏောဟိ မေ။
ဣဿဿ [ဣမဿ (က။ သီ။ က။)] ဥပက္ခန္ဓမှာ [ဥပခန္ဓမှာ (က။ သီ။ ပီ။ က။)], ဥက္ကစ္စ စတုရင်္ဂုလံ၊
တေန နေမိံ ပသာရေသိ [ပရိဟရေသိ (သီ။ ပီ။)], ဧဝံ ဒဠှတရံ သိယာ။
ဣတိ ဖန္ဒနရုက္ခောပိ, ဝေရံ အပ္ပေသိ တာဝဒေ၊
ဇာတာနဉ္စ အဇာတာနံ, ဣဿာနံ ဒုက္ခမာဝဟိ။
(ဇာ၊၁၊၂၆၀။)ဣစ္စေဝံ [ဣစ္စေဝ (သီ။ ပီ။)] ဖန္ဒနော ဣဿံ, ဣဿော စ ပန ဖန္ဒနံ၊
ဧဝမေဝ မနုဿာနံ, ဝိဝါဒေါ ယတ္ထ ဇာယတိ၊
မယူရနစ္စံ နစ္စန္တိ, ယထာ တေ ဣဿဖန္ဒနာ။
တံ ဝေါ ဝဒါမိ ဘဒ္ဒံ ဝေါ [ဘဒ္ဒန္တေ (က။)], ယာဝန္တေတ္ထ သမာဂတာ၊
သမ္မောဒထ မာ ဝိဝဒထ [မာဝိဝဒိတ္ထ (သီ။ သျာ။ ပီ။)], မာ ဟောထ ဣဿဖန္ဒနာ။
သာမဂ္ဂိမေဝ [သာမဂျမေဝ (သျာ။ က။)] သိက္ခေထ, ဗုဒ္ဓေဟေတံ ပသံသိတံ၊
သာမဂ္ဂိရတော ဓမ္မဋ္ဌော, ယောဂက္ခေမာ န ဓံသတီတိ။
ဖန္ဒနဇာတကံ ဒုတိယံ။
ဣဓေဝ ဟံသ နိပတ, ပိယံ မေ တဝ ဒဿနံ၊
ဣဿရောသိ အနုပ္ပတ္တော, ယမိဓတ္ထိ ပဝေဒယ။
သဝနေန ဧကဿ ပိယာ ဘဝန္တိ, ဒိသွာ ပနေကဿ ဝိယေတိ [ဝိနေတိ (သျာ။), ဝိဟေတိ (ပီ။), ဝိဂေတိ (က။ အဋ္ဌ။)] ဆန္ဒော၊
ဒိသွာ စ သုတွာ စ ပိယာ ဘဝန္တိ, ကစ္စိန္နု မေ ပီယသိ [ပိယျသိ (သီ။ ပီ။)] ဒဿနေန။
သဝနေန ပိယော မေသိ, ဘိယျော စာဂမ္မ ဒဿနံ၊
ဧဝံ ပိယဒဿနော မေ [ဧဝံ ပိယဒဿနော သမာနော (သီ။ သျာ။ ပီ။)], ဝသ ဟံသ မမန္တိကေ [မမ သန္တိကေ (သီ။ သျာ။ ပီ။)]။
ဝသေယျာမ တဝါဂါရေ, နိစ္စံ သက္ကတပူဇိတာ၊
မတ္တော စ ဧကဒါ ဝဇ္ဇေ [ဝဇ္ဇာ (သီ။ ပီ။)], ‘‘ဟံသရာဇံ ပစန္တု မေ’’။
ဓိရတ္ထု တံ မဇ္ဇပါနံ, ယံ မေ ပိယတရံ တယာ၊
န စာပိ မဇ္ဇံ ပိဿာမိ [ပိဝိဿာမိ (သျာ။), ပါယာမိ (သီ။ ပီ။)], ယာဝ မေ ဝစ္ဆသီ ဃရေ။
(ဇာ၊၁၊၂၆၁။)သုဝိဇာနံ သိင်္ဂါလာနံ, သကုဏာနဉ္စ [သကုန္တာနဉ္စ (သီ။ သျာ။ ပီ။)] ဝဿိတံ၊
မနုဿဝဿိတံ ရာဇ, ဒုဗ္ဗိဇာနတရံ တတော။
အပိ စေ မညတီ ပေါသော, ဉာတိ မိတ္တော သခါတိ ဝါ၊
ယော ပုဗ္ဗေ သုမနော ဟုတွာ, ပစ္ဆာ သမ္ပဇ္ဇတေ ဒိသော။
ယသ္မိံ မနော နိဝိသတိ, အဝိဒူရေ သဟာပိ သော၊
သန္တိကေပိ ဟိ သော ဒူရေ, ယသ္မိံ နာဝိသတေ [ယသ္မာ ဝိဝသတေ (သီ။ သျာ။ ပီ။)] မနော။
အန္တောပိ သော ဟောတိ ပသန္နစိတ္တော, ပါရံ သမုဒ္ဒဿ ပသန္နစိတ္တော၊
အန္တောပိ သော ဟောတိ ပဒုဋ္ဌစိတ္တော, ပါရံ သမုဒ္ဒဿ ပဒုဋ္ဌစိတ္တော။
သံဝသန္တာ ဝိဝသန္တိ, ယေ ဒိသာ တေ ရထေသဘ၊
အာရာ သန္တော သံဝသန္တိ, မနသာ ရဋ္ဌဝဍ္ဎန။
အတိစိရံ နိဝါသေန, ပိယော ဘဝတိ အပ္ပိယော၊
အာမန္တ ခေါ တံ ဂစ္ဆာမ [ဂစ္ဆာမိ (သျာ။)], ပုရာ တေ ဟောမ အပ္ပိယာ [ဟောမိ အပ္ပိယော (သျာ။)]။
ဧဝံ စေ ယာစမာနာနံ, အဉ္ဇလိံ နာဝဗုဇ္ဈသိ၊
ပရိစာရကာနံ သတံ [သန္တာနံ (သီ။ သျာ။), သတ္တာနံ (ပီ။)], ဝစနံ န ကရောသိ နော၊
ဧဝံ တံ အဘိယာစာမ, ပုန ကယိရာသိ ပရိယာယံ။
ဧဝံ စေ နော ဝိဟရတံ, အန္တရာယော န ဟေဿတိ၊
တုယှဉ္စာပိ [ဝါပိ (သျာ။ ပီ။ က။)] မဟာရာဇ, မယှဉ္စ [ဝါ (ဗဟူသု)] ရဋ္ဌဝဍ္ဎန၊
အပ္ပေဝ နာမ ပဿေမု [ပဿေမ (သီ။ သျာ။ ပီ။)], အဟောရတာနမစ္စယေတိ။
ဇဝနဟံသဇာတကံ တတိယံ။
န တေ ကဋ္ဌာနိ ဘိန္နာနိ, န တေ ဥဒကမာဘတံ၊
အဂ္ဂီပိ တေ န ဟာပိတော [ဟာသိတော (သီ။ သျာ။)], ကိံ နု မန္ဒောဝ ဈာယသိ။
(ဇာ၊၁၊၂၆၂။)န ဥဿဟေ ဝနေ ဝတ္ထုံ, ကဿပါမန္တယာမိ တံ၊
ဒုက္ခော ဝါသော အရညသ္မိံ, ရဋ္ဌံ ဣစ္ဆာမိ ဂန္တဝေ။
ယထာ အဟံ ဣတော ဂန္တွာ, ယသ္မိံ ဇနပဒေ ဝသံ၊
အာစာရံ ဗြဟ္မေ [ဗြဟ္မံ (က။)] သိက္ခေယျံ, တံ ဓမ္မံ အနုသာသ မံ။
သစေ အရညံ ဟိတွာန, ဝနမူလဖလာနိ စ၊
ရဋ္ဌေ ရောစယသေ ဝါသံ, တံ ဓမ္မံ နိသာမေဟိ မေ။
ဝိသံ မာ ပဋိသေဝိတ္ထော [ပဋိသေဝိတ္ထ (သျာ။ က။)], ပပါတံ ပရိဝဇ္ဇယ၊
ပင်္ကေ စ မာ ဝိသီဒိတ္ထော [ပင်္ကော စ မာ ဝိသိယိတ္ထော (က။)], ယတ္တော စာသီဝိသေ စရေ။
ကိံ နု ဝိသံ ပပါတော ဝါ, ပင်္ကော ဝါ ဗြဟ္မစာရိနံ၊
ကံ တွံ အာသီဝိသံ ဗြူသိ, တံ မေ အက္ခာဟိ ပုစ္ဆိတော၊
အာသဝေါ တာတ လောကသ္မိံ, သုရာ နာမ ပဝုစ္စတိ၊
မနုညော [မနုညာ (သီ။ သျာ။ ပီ။)] သုရဘီ ဝဂ္ဂု, သာဒု [မဓု (သီ။ သျာ။)] ခုဒ္ဒရသူပမော [ရသူပမာ (သီ။ သျာ။ ပီ။)]၊
ဝိသံ တဒါဟု အရိယာ သေ, ဗြဟ္မစရိယဿ နာရဒ။
ဣတ္ထိယော တာတ လောကသ္မိံ, ပမတ္တံ ပမထေန္တိ တာ၊
ဟရန္တိ ယုဝိနော စိတ္တံ, တူလံ ဘဋ္ဌံဝ မာလုတော၊
ပပါတော ဧသော အက္ခာတော, ဗြဟ္မစရိယဿ နာရဒ။
လာဘော သိလောကော သက္ကာရော, ပူဇာ ပရကုလေသု စ၊
ပင်္ကော ဧသော စ [ဧသောဝ (သီ။ သျာ။ ပီ။)] အက္ခာတော, ဗြဟ္မစရိယဿ နာရဒ။
သသတ္ထာ [မဟန္တာ (သျာ။ က။)] တာတ ရာဇာနော, အာဝသန္တိ မဟိံ ဣမံ၊
တေ တာဒိသေ မနုဿိန္ဒေ, မဟန္တေ တာတ နာရဒ။
ဣဿရာနံ အဓိပတီနံ, န တေသံ ပါဒတော စရေ၊
အာသီဝိသောတိ [အာသီဝိသော သော (သီ။ ပီ။)] အက္ခာတော, ဗြဟ္မစရိယဿ နာရဒ။
ဘတ္တတ္ထော ဘတ္တကာလေ စ [ယံ (သီ။ ပီ။)], ယံ ဂေဟမုပသင်္ကမေ၊
ယဒေတ္ထ ကုသလံ ဇညာ, တတ္ထ ဃာသေသနံ စရေ။
(ဇာ၊၁၊၂၆၃။)ပဝိသိတွာ ပရကုလံ, ပါနတ္ထံ [ပါနတ္ထော (သျာ။ ပီ။)] ဘောဇနာယ ဝါ၊
မိတံ ခါဒေ မိတံ ဘုဉ္ဇေ, န စ ရူပေ မနံ ကရေ။
ဂေါဋ္ဌံ မဇ္ဇံ ကိရာဋဉ္စ [ကိရာသဉ္စ (သီ။ သျာ။), ကိရာသံ ဝါ (ပီ။)], သဘာ နိကိရဏာနိ စ၊
အာရကာ ပရိဝဇ္ဇေဟိ, ယာနီဝ ဝိသမံ ပထန္တိ။
စူဠနာရဒဇာတကံ စတုတ္ထံ။
ဒူတေ တေ ဗြဟ္မေ [ဒူတေ ဗြာဟ္မဏ (က။)] ပါဟေသိံ, ဂင်္ဂါတီရသ္မိ ဈာယတော၊
တေသံ ပုဋ္ဌော န ဗျာကာသိ, ဒုက္ခံ ဂုယှမတံ [ဂုယှံ မတံ (သီ။), တုယှံ မတံ (သျာ။ က။)] နု တေ။
သစေ တေ ဒုက္ခမုပ္ပဇ္ဇေ, ကာသီနံ ရဋ္ဌဝဍ္ဎန၊
မာ ခေါ နံ တဿ အက္ခာဟိ, ယော တံ ဒုက္ခာ န မောစယေ။
ယော တဿ [ယော စ တထာ (ပီ။)] ဒုက္ခဇာတဿ, ဧကင်္ဂမပိ ဘာဂသော [ဧကန္တမပိ ဘာသတော (သီ။ ပီ။)]၊
ဝိပ္ပမောစေယျ ဓမ္မေန, ကာမံ တဿ ပဝေဒယ [ပဝေဒယေ (သီ။)]။
သုဝိဇာနံ သိင်္ဂါလာနံ, သကုဏာနဉ္စ ဝဿိတံ၊
မနုဿဝဿိတံ ရာဇ, ဒုဗ္ဗိဇာနတရံ တတော။
အပိ စေ မညတီ ပေါသော, ဉာတိ မိတ္တော သခါတိ ဝါ၊
ယော ပုဗ္ဗေ သုမနော ဟုတွာ, ပစ္ဆာ သမ္ပဇ္ဇတေ ဒိသော။
ယော အတ္တနော ဒုက္ခမနာနုပုဋ္ဌော, ပဝေဒယေ ဇန္တု အကာလရူပေ၊
အာနန္ဒိနော တဿ ဘဝန္တိမိတ္တာ [ဘဝန္တ’မိတ္တာ (သီ။ ပီ။)], ဟိတေသိနော တဿ ဒုခီ ဘဝန္တိ။
ကာလဉ္စ ဉတွာန တထာဝိဓဿ, မေဓာဝီနံ ဧကမနံ ဝိဒိတွာ၊
အက္ခေယျ တိဗ္ဗာနိ [တိပ္ပါနိ (သီ။ သျာ။ ပီ။)] ပရဿ ဓီရော, သဏှံ ဂိရံ အတ္ထဝတိံ ပမုဉ္စေ။
(ဇာ၊၁၊၂၆၄။)သစေ စ ဇညာ အဝိသယှမတ္တနော, န တေ ဟိ မယှံ [နာယံ နီတိ မယှ (သီ။ ပီ။)] သုခါဂမာယ၊
ဧကောဝ တိဗ္ဗာနိ သဟေယျ ဓီရော, သစ္စံ ဟိရောတ္တပ္ပမပေက္ခမာနော။
အဟံ ရဋ္ဌာနိ ဝိစရန္တော, နိဂမေ ရာဇဓာနိယော၊
ဘိက္ခမာနော မဟာရာဇ, အာစရိယဿ ဓနတ္ထိကော။
ဂဟပတီ ရာဇပုရိသေ, မဟာသာလေ စ ဗြာဟ္မဏေ၊
အလတ္ထံ သတ္တ နိက္ခာနိ, သုဝဏ္ဏဿ ဇနာဓိပ၊
တေ မေ နဋ္ဌာ မဟာရာဇ, တသ္မာ သောစာမဟံ ဘုသံ။
ပုရိသာ တေ မဟာရာဇ, မနသာနုဝိစိန္တိတာ၊
နာလံ ဒုက္ခာ ပမောစေတုံ, တသ္မာ တေသံ န ဗျာဟရိံ။
တွဉ္စ ခေါ မေ မဟာရာဇ, မနသာနုဝိစိန္တိတော၊
အလံ ဒုက္ခာ ပမောစေတုံ, တသ္မာ တုယှံ ပဝေဒယိံ။
တဿာဒါသိ ပသန္နတ္တော, ကာသီနံ ရဋ္ဌဝဍ္ဎနော၊
ဇာတရူပမယေ နိက္ခေ, သုဝဏ္ဏဿ စတုဒ္ဒသာတိ။
ဒူတဇာတကံ ပဉ္စမံ။
֍ * ၄၇၉။ ကာလိင်္ဂဗောဓိဇာတကံ (၆)
ရာဇာ ကာလိင်္ဂေါ စက္ကဝတ္တိ, ဓမ္မေန ပထဝိမနုသာသံ [မနုသာသိ (သျာ။ က။)]၊
အဂမာ [အဂမာသိ (သျာ။ က။)] ဗောဓိသမီပံ, နာဂေန မဟာနုဘာဝေန။
ကာလိင်္ဂေါ ဘာရဒွါဇော စ, ရာဇာနံ ကာလိင်္ဂံ သမဏကောလညံ၊
စက္ကံ ဝတ္တယတော ပရိဂ္ဂဟေတွာ [ပရိဏေတွာ (ပီ။)], ပဉ္ဇလီ ဣဒမဝေါစ။
ပစ္စောရောဟ မဟာရာဇ, ဘူမိဘာဂေါ ယထာ သမဏုဂ္ဂတော [သမနုဂီတော (သီ။ သျာ။ ပီ။)]၊
ဣဓ အနဓိဝရာ ဗုဒ္ဓါ, အဘိသမ္ဗုဒ္ဓါ ဝိရောစန္တိ။
(ဇာ၊၁၊၂၆၅။)ပဒက္ခိဏတော အာဝဋ္ဋာ, တိဏလတာ အသ္မိံ ဘူမိဘာဂသ္မိံ၊
ပထဝိယာ နာဘိယံ [ပုထုဝိယာ အယံ (သီ။), ပဌဝိယာ အယံ (သျာ။), ပုထဝိယာ’ယံ (ပီ။)] မဏ္ဍော, ဣတိ နော သုတံ မန္တေ မဟာရာဇ [သုတံ မဟာရာဇ (သီ။ သျာ။ ပီ။)]။
သာဂရပရိယန္တာယ, မေဒိနိယာ သဗ္ဗဘူတဓရဏိယာ၊
ပထဝိယာ အယံ မဏ္ဍော, ဩရောဟိတွာ နမော ကရောဟိ။
ယေ တေ ဘဝန္တိ နာဂါ စ, အဘိဇာတာ စ ကုဉ္ဇရာ၊
ဧတ္တာဝတာ ပဒေသံ တေ, နာဂါ နေဝ မုပယန္တိ။
အဘိဇာတော နာဂေါ [အဘိဇာတော တေ နာဂေါ (သီ။ ပီ။ အဋ္ဌ။)] ကာမံ, ပေသေဟိ ကုဉ္ဇရံ ဒန္တိံ၊
ဧတ္တာဝတာ ပဒေသော [ပဒေသော စ (သျာ။ က။)], သက္ကာ [န သက္ကာ (သျာ။)] နာဂေန မုပဂန္တုံ။
တံ သုတွာ ရာဇာ ကာလိင်္ဂေါ, ဝေယျဉ္ဇနိကဝစော နိသာမေတွာ၊
သမ္ပေသေသိ နာဂံ ဉဿာမ, မယံ ယထိမဿိဒံ [ယထာ ဣဒံ (သီ။ သျာ။ ပီ။)] ဝစနံ။
သမ္ပေသိတော စ ရညာ, နာဂေါ ကောဉ္စောဝ အဘိနဒိတွာန၊
ပဋိသက္ကိတွာ [ပဋိဩသက္ကိတွာ (က။)] နိသီဒိ, ဂရုံဝ ဘာရံ အသဟမာနော။
ကာလိင်္ဂဘာရဒွါဇော, နာဂံ ခီဏာယုကံ ဝိဒိတွာန၊
ရာဇာနံ ကာလိင်္ဂံ, တရမာနော အဇ္ဈဘာသိတ္ထ၊
အညံ သင်္ကမ နာဂံ, နာဂေါ ခီဏာယုကော မဟာရာဇ။
တံ သုတွာ ကာလိင်္ဂေါ, တရမာနော သင်္ကမီ နာဂံ၊
သင်္ကန္တေဝ ရညေ, နာဂေါ တတ္ထေဝ ပတိ [ပတိတော (က။)] ဘုမျာ၊
ဝေယျဉ္ဇနိကဝစော, ယထာ တထာ အဟု နာဂေါ။
ကာလိင်္ဂေါ ရာဇာ ကာလိင်္ဂံ, ဗြာဟ္မဏံ ဧတဒဝေါစ၊
တွမေဝ အသိ သမ္ဗုဒ္ဓေါ, သဗ္ဗညူ သဗ္ဗဒဿာဝီ။
တံ အနဓိဝါသေန္တော ကာလိင်္ဂံ [ကာလိင်္ဂေါ (သီ။ သျာ။ ပီ။)], ဗြာဟ္မဏော ဣဒမဝေါစ၊
ဝေယျဉ္ဇနိကာ ဟိ မယံ, ဗုဒ္ဓါ သဗ္ဗညုနော မဟာရာဇ။
သဗ္ဗညူ သဗ္ဗဝိဒူ စ, ဗုဒ္ဓါ န လက္ခဏေန ဇာနန္တိ၊
အာဂမဗလသာ [အာဂမပုရိသာ (ပီ။)] ဟိ မယံ, ဗုဒ္ဓါ သဗ္ဗံ ပဇာနန္တိ။
(ဇာ၊၁၊၂၆၆။)မဟယိတွာ သမ္ဗောဓိံ [မဟာယိတွာန သမ္ဗောဓိံ (သီ။ ပီ။), ပဟံသိတွာန သမ္ဗောဓိံ (သျာ။), မမာယိတွာန တံ ဗောဓိံ (က။)], နာနာတုရိယေဟိ ဝဇ္ဇမာနေဟိ၊
မာလာဝိလေပနံ အဘိဟရိတွာ [မာလာဂန္ဓဝိလေပနံ အာဟရိတွာ (သီ။ ပီ။)၊ ပါကာရပရိက္ခေပံ ကာရေသိ၊ အထ ရာဇာ ပါယာသိ (သီ။ သျာ။ ပီ။)] အထ ရာဇာ မနုပါယာသိ [ပါကာရပရိက္ခေပံ ကာရေသိ၊ အထ ရာဇာ ပါယာသိ (သီ။ သျာ။ ပီ။)]။
သဋ္ဌိ ဝါဟသဟဿာနိ, ပုပ္ဖါနံ သန္နိပါတယိ၊
ပူဇေသိ ရာဇာ ကာလိင်္ဂေါ, ဗောဓိမဏ္ဍမနုတ္တရန္တိ [ဝရုတ္တမေတိ (သီ။)]။
ကာလိင်္ဂဗောဓိဇာတကံ ဆဋ္ဌံ။
အကိတ္တိံ [အကတ္တိံ (က။)] ဒိသွာ သမ္မန္တံ, သက္ကော ဘူတပတီ ဗြဝိ၊
ကိံ ပတ္ထယံ မဟာဗြဟ္မေ, ဧကော သမ္မသိ ဃမ္မနိ။
ဒုက္ခော ပုနဗ္ဘဝေါ သက္က, သရီရဿ စ ဘေဒနံ၊
သမ္မောဟမရဏံ ဒုက္ခံ, တသ္မာ သမ္မာမိ ဝါသဝ။
ဧတသ္မိံ တေ သုလပိတေ, ပတိရူပေ သုဘာသိတေ၊
ဝရံ ကဿပ တေ ဒမ္မိ, ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က, သဗ္ဗဘူတာနမိဿရ၊
ယေန ပုတ္တေ စ ဒါရေ စ, ဓနဓညံ ပိယာနိ စ၊
လဒ္ဓါ နရာ န [လဒ္ဓါ နညာနိ (က။)] တပ္ပန္တိ, သော လောဘော န မယီ ဝသေ။
ဧတသ္မိံ တေ သုလပိတေ, ပတိရူပေ သုဘာသိတေ၊
ဝရံ ကဿပ တေ ဒမ္မိ, ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က, သဗ္ဗဘူတာနမိဿရ၊
ခေတ္တံ ဝတ္ထုံ ဟိရညဉ္စ, ဂဝဿံ ဒါသပေါရိသံ၊
ယေန ဇာတေန ဇီယန္တိ, သော ဒေါသော န မယီ ဝသေ။
ဧတသ္မိံ တေ သုလပိတေ, ပတိရူပေ သုဘာသိတေ၊
ဝရံ ကဿပ တေ ဒမ္မိ, ယံ ကိဉ္စိ မနသိစ္ဆသိ။
(ဇာ၊၁၊၂၆၇။)ဝရံ စေ မေ အဒေါ သက္က, သဗ္ဗဘူတာနမိဿရ၊
ဗာလံ န ပဿေ န သုဏေ, န စ ဗာလေန သံဝသေ၊
ဗာလေနလ္လာပ [ဗာလေနာ’လာပ (?)] သလ္လာပံ, န ကရေ န စ ရောစယေ။
ကိံ နု တေ အကရံ ဗာလော, ဝဒ ကဿပ ကာရဏံ၊
ကေန ကဿပ ဗာလဿ, ဒဿနံ နာဘိကင်္ခသိ။
အနယံ နယတိ ဒုမ္မေဓော, အဓုရာယံ နိယုဉ္ဇတိ၊
ဒုန္နယော သေယျသော ဟောတိ, သမ္မာ ဝုတ္တော ပကုပ္ပတိ၊
ဝိနယံ သော န ဇာနာတိ, သာဓု တဿ အဒဿနံ။
ဧတသ္မိံ တေ သုလပိတေ, ပတိရူပေ သုဘာသိတေ၊
ဝရံ ကဿပ တေ ဒမ္မိ, ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က, သဗ္ဗဘူတာနမိဿရ၊
ဓီရံ ပဿေ သုဏေ ဓီရံ, ဓီရေန သဟ သံဝသေ၊
ဓီရေနလ္လာပသလ္လာပံ, တံ ကရေ တဉ္စ ရောစယေ။
ကိံ နု တေ အကရံ ဓီရော, ဝဒ ကဿပ ကာရဏံ၊
ကေန ကဿပ ဓီရဿ, ဒဿနံ အဘိကင်္ခသိ။
နယံ နယတိ မေဓာဝီ, အဓုရာယံ န ယုဉ္ဇတိ၊
သုနယော သေယျသော ဟောတိ, သမ္မာ ဝုတ္တော န ကုပ္ပတိ၊
ဝိနယံ သော ပဇာနာတိ, သာဓု တေန သမာဂမော။
ဧတသ္မိံ တေ သုလပိတေ, ပတိရူပေ သုဘာသိတေ၊
ဝရံ ကဿပ တေ ဒမ္မိ, ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က, သဗ္ဗဘူတာနမိဿရ၊
တတော ရတျာ ဝိဝသာနေ [ဝိဝသနေ (သီ။ သျာ။ ပီ။)], သူရိယုဂ္ဂမနံ [သုရိယဿုဂ္ဂမနံ (သီ။ သျာ။ ပီ။)] ပတိ၊
ဒိဗ္ဗာ ဘက္ခာ ပါတုဘဝေယျုံ, သီလဝန္တော စ ယာစကာ။
ဒဒတော မေ [ဒဒတော စ မေ (ပီ။)] န ခီယေထ, ဒတွာ နာနုတပေယျဟံ၊
ဒဒံ စိတ္တံ ပသာဒေယျံ, ဧတံ သက္က ဝရံ ဝရေ။
(ဇာ၊၁၊၂၆၈။)ဧတသ္မိံ တေ သုလပိတေ, ပတိရူပေ သုဘာသိတေ၊
ဝရံ ကဿပ တေ ဒမ္မိ, ယံ ကိဉ္စိ မနသိစ္ဆသိ။
ဝရံ စေ မေ အဒေါ သက္က, သဗ္ဗဘူတာနမိဿရ၊
န မံ ပုန ဥပေယျာသိ, ဧတံ သက္က ဝရံ ဝရေ။
ဗဟူဟိ ဝတစရိယာဟိ [ဝတ္တစရိယာဟိ (သီ။ သျာ။ က။)], နရာ စ အထ နာရိယော၊
ဒဿနံ အဘိကင်္ခန္တိ, ကိံ နု မေ ဒဿနေ ဘယံ။
တံ တာဒိသံ ဒေဝဝဏ္ဏံ [ဒေဝဝဏ္ဏိံ (ပီ။)], သဗ္ဗကာမသမိဒ္ဓိနံ၊
ဒိသွာ တပေါ ပမဇ္ဇေယျ [ဒိသွာ တပေါ ပမဇ္ဇေယျံ (သီ။ သျာ။ ပီ။), ဒိသွာနဟံ ပမဇ္ဇေယျံ (စရိယာပိဋကဋ္ဌကထာ)], ဧတံ တေ ဒဿနေ ဘယန္တိ။
အကိတ္တိဇာတကံ သတ္တမံ။
အဟမေဝ ဒုဗ္ဘာသိတံ ဘာသိ ဗာလော, ဘေကောဝရညေ အဟိမဝှါယမာနော [မဝှယာနော (သီ။ ပီ။)]၊
တက္ကာရိယေ သောဗ္ဘမိမံ [သောဗ္ဘမှိ အဟံ (က။)] ပတာမိ, န ကိရေဝ သာဓု အတိဝေလဘာဏီ [သာဓူတျတိဝေလဘာဏီ (က။)]။
ပပ္ပေါတိ မစ္စော အတိဝေလဘာဏီ, ဗန္ဓံ ဝဓံ သောကပရိဒ္ဒဝဉ္စ၊
အတ္တာနမေဝ ဂရဟာသိ ဧတ္ထ, အာစေရ ယံ တံ နိခဏန္တိ သောဗ္ဘေ။
ကိမေဝဟံ တုဏ္ဍိလမနုပုစ္ဆိံ, ကရေယျ သံ [ကရေယျာသံ (သျာ။), ကရေယျ သ (က။), ဘရေယျ သံ (?)] ဘာတရံ ကာဠိကာယံ [ကာဠိကာယ (သျာ။ က။)]၊
နဂ္ဂေါဝဟံ [နဂ္ဂေါစ’ဟံ (?)] ဝတ္ထယုဂဉ္စ ဇီနော, အယမ္ပိ အတ္ထော ဗဟုတာဒိသောဝ။
(ဇာ၊၁၊၂၆၉။)ယော ယုဇ္ဈမာနာနမယုဇ္ဈမာနော [ယုဇ္ဈမာနေန အယုဇ္ဈမာနော (က။)], မေဏ္ဍန္တရံ အစ္စုပတီ ကုလိင်္ဂေါ၊
သော ပိံသိတော မေဏ္ဍသိရေဟိ တတ္ထ, အယမ္ပိ အတ္ထော ဗဟုတာဒိသောဝ။
စတုရော ဇနာ ပေါတ္ထကမဂ္ဂဟေသုံ, ဧကဉ္စ ပေါသံ အနုရက္ခမာနာ၊
သဗ္ဗေဝ တေ ဘိန္နသိရာ သယိံသု, အယမ္ပိ အတ္ထော ဗဟုတာဒိသောဝ။
အဇာ ယထာ ဝေဠုဂုမ္ဗသ္မိံ ဗဒ္ဓါ [ဗန္ဓံ (သျာ။ က။)], အဝက္ခိပန္တီ အသိမဇ္ဈဂစ္ဆိ၊
တေနေဝ တဿာ ဂလကာဝကန္တံ [ဂလယာ ဝိကန္တုံ (က။), ဂလကံ ဝိကန္တာ (သျာ။)], အယမ္ပိ အတ္ထော ဗဟုတာဒိသောဝ။
ဣမေ န ဒေဝါ န ဂန္ဓဗ္ဗပုတ္တာ, မိဂါ ဣမေ အတ္ထဝသံ ဂတာ မေ [အတ္ထဝသာဘတာ ဣမေ (သီ။ သျာ။ ပီ။)]၊
ဧကဉ္စ နံ သာယမာသေ ပစန္တု, ဧကံ ပုနပ္ပါတရာသေ [ဧကဉ္စ နံ ပါတရာသေ (က။ သီ။ ပီ။)] ပစန္တု။
သတံ သဟဿာနိ ဒုဘာသိတာနိ, ကလမ္ပိ နာဂ္ဃန္တိ သုဘာသိတဿ၊
ဒုဗ္ဘာသိတံ သင်္ကမာနော ကိလေသော [ကိလိဿတိ (?)], တသ္မာ တုဏှီ ကိမ္ပုရိသာ [ကိံပုရိသော (သီ။ သျာ။)] န ဗာလျာ။
ယာ မေသာ ဗျာဟာသိ [ဗျာကာသိ (သီ။ သျာ။ ပီ။)] ပမုဉ္စထေတံ, ဂိရိဉ္စ နံ [ဂိရိံ ဝရံ (က။)] ဟိမဝန္တံ နယန္တု၊
ဣမဉ္စ ခေါ ဒေန္တု မဟာနသာယ, ပါတောဝ နံ ပါတရာသေ ပစန္တု။
(ဇာ၊၁၊၂၇၀။)ပဇ္ဇုန္နနာထာ ပသဝေါ, ပသုနာထာ အယံ ပဇာ၊
တွံ နာထောသိ [တွံ-နာထော’သ္မိ (သီ။ သျာ။ ပီ။)] မဟာရာဇ, နာထောဟံ ဘရိယာယ မေ [အမှ-နာထာ မမ ဘရိယာ (က။ သီ။ သျာ။)]၊
ဒွိန္နမညတရံ ဉတွာ, မုတ္တော ဂစ္ဆေယျ ပဗ္ဗတံ။
န ဝေ နိန္ဒာ သုပရိဝဇ္ဇယေထ [သုပရိဝဇ္ဇယာထ (သျာ။)], နာနာ ဇနာ သေဝိတဗ္ဗာ ဇနိန္ဒ၊
ယေနေဝ ဧကော လဘတေ ပသံသံ, တေနေဝ အညော လဘတေ နိန္ဒိတာရံ။
သဗ္ဗော လောကော ပရိစိတ္တော အတိစိတ္တော [ပရစိတ္တေန အတိစိတ္တော (သီ။ သျာ။), ပရစိတ္တေန အစိတ္တော (သီ။ အဋ္ဌ။)], သဗ္ဗော လောကော စိတ္တဝါ သမှိ စိတ္တေ၊
ပစ္စေကစိတ္တာ ပုထု သဗ္ဗသတ္တာ, ကဿီဓ စိတ္တဿ ဝသေ န ဝတ္တေ။
တုဏှီ အဟူ ကိမ္ပုရိသော သဘရိယော [အဘာဏီ (က။)], ယော ဒါနိ ဗျာဟာသိ ဘယဿ ဘီတော၊
သော ဒါနိ မုတ္တော သုခိတော အရောဂေါ, ဝါစာကိရေဝတ္တဝတီ နရာနန္တိ။
တက္ကာရိယဇာတကံ အဋ္ဌမံ။
တဿ [ကဿ (သီ။ ပီ။)] ဂါမဝရံ ဒမ္မိ, နာရိယော စ အလင်္ကတာ၊
ယော [ကော (သီ။ သျာ။ ပီ။)] မေတံ မိဂမက္ခာတိ [မက္ခာသိ (သျာ။ က။)], မိဂါနံ မိဂမုတ္တမံ။
မယှံ ဂါမဝရံ ဒေဟိ, နာရိယော စ အလင်္ကတာ၊
အဟံ တေ မိဂမက္ခိဿံ, မိဂါနံ မိဂမုတ္တမံ။
ဧတသ္မိံ ဝနသဏ္ဍသ္မိံ, အမ္ဗာ သာလာ စ ပုပ္ဖိတာ၊
ဣန္ဒဂေါပကသဉ္ဆန္နာ, ဧတ္ထေသော တိဋ္ဌတေ မိဂေါ။
ဓနုံ အဒွေဇ္ဈံ [အဒေဇ္ဈံ (သီ။ ပီ။), သရဇ္ဇံ (က။)] ကတွာန, ဥသုံ သန္နယှုပါဂမိ [သန္ဓာယုပါဂမိ (သီ။ ပီ။)]၊
မိဂေါ စ ဒိသွာ ရာဇာနံ, ဒူရတော အဇ္ဈဘာသထ။
(ဇာ၊၁၊၂၇၁။)အာဂမေဟိ မဟာရာဇ, မာ မံ ဝိဇ္ဈိ ရထေသဘ၊
ကော နု တေ ဣဒမက္ခာသိ, ဧတ္ထေသော တိဋ္ဌတေ မိဂေါ။
ဧသ ပါပစရော ပေါသော, သမ္မ တိဋ္ဌတိ အာရကာ၊
သောယံ [သော ဟိ (သီ။ သျာ။ ပီ။)] မေ ဣဒမက္ခာသိ, ဧတ္ထေသော တိဋ္ဌတေ မိဂေါ။
သစ္စံ ကိရေဝ မာဟံသု, နရာ ဧကစ္စိယာ ဣဓ၊
ကဋ္ဌံ နိပ္လဝိတံ သေယျော, န တွေဝေကစ္စိ ယော နရော။
ကိံ နု ရုရု ဂရဟသိ မိဂါနံ, ကိံ ပက္ခီနံ ကိံ ပန မာနုသာနံ၊
ဘယဉှိ မံ ဝိန္ဒတိနပ္ပရူပံ, သုတွာန တံ မာနုသိံ ဘာသမာနံ။
ယမုဒ္ဓရိံ ဝါဟနေ ဝုယှမာနံ, မဟောဒကေ သလိလေ သီဃသောတေ၊
တတောနိဒါနံ ဘယမာဂတံ မမ, ဒုက္ခော ဟဝေ ရာဇ အသဗ္ဘိ သင်္ဂမော။
သောဟံ စတုပ္ပတ္တမိမံ ဝိဟင်္ဂမံ, တနုစ္ဆိဒံ ဟဒယေ ဩဿဇာမိ၊
ဟနာမိ တံ မိတ္တဒုဗ္ဘိံ အကိစ္စကာရိံ [ဟနာမိ မိတ္တဒ္ဒု’မကိစ္စကာရိံ (သီ။ ပီ။)], ယော တာဒိသံ ကမ္မကတံ န ဇာနေ။
ဓီရဿ ဗာလဿ ဟဝေ ဇနိန္ဒ, သန္တော ဝဓံ နပ္ပသံသန္တိ ဇာတု၊
ကာမံ ဃရံ ဂစ္ဆတု ပါပဓမ္မော, ယဉ္စဿ ဘဋ္ဌံ တဒေတဿ ဒေဟိ၊
အဟဉ္စ တေ ကာမကရော ဘဝါမိ။
အဒ္ဓါ ရုရု အညတရော သတံ သော [သတံ’သေ (သီ။)], ယော ဒုဗ္ဘတော [ဒုဗ္ဘိနော (သျာ။), ဒူဘတော (ပီ။)] မာနုသဿ န ဒုဗ္ဘိ၊
ကာမံ ဃရံ ဂစ္ဆတု ပါပဓမ္မော, ယဉ္စဿ ဘဋ္ဌံ တဒေတဿ ဒမ္မိ၊
အဟဉ္စ တေ ကာမစာရံ ဒဒါမိ။
(ဇာ၊၁၊၂၇၂။)သုဝိဇာနံ သိင်္ဂါလာနံ, သကုဏာနဉ္စဝဿိတံ၊
မနုဿဝဿိတံ ရာဇ, ဒုဗ္ဗိဇာနတရံ တတော။
အပိ စေ မညတီ ပေါသော, ဉာတိ မိတ္တော သခါတိ ဝါ၊
ယော ပုဗ္ဗေ သုမနော ဟုတွာ, ပစ္ဆာ သမ္ပဇ္ဇတေ ဒိသော။
သမာဂတာ ဇာနပဒါ, နေဂမာ စ သမာဂတာ၊
မိဂါ သဿာနိ ခါဒန္တိ, တံ ဒေဝေါ ပဋိသေဓတု။
ကာမံ ဇနပဒေါ မာသိ, ရဋ္ဌဉ္စာပိ ဝိနဿတု၊
န တွေဝါဟံ ရုရုံ ဒုဗ္ဘေ, ဒတွာ အဘယဒက္ခိဏံ။
မာ မေ ဇနပဒေါ အာသိ [မာ မံ ဇနပဒေါ အဟု (သျာ။)], ရဋ္ဌဉ္စာပိ ဝိနဿတု၊
န တွေဝါဟံ [န တွေဝ (က။ သီ။ က။)] မိဂရာဇဿ, ဝရံ ဒတွာ မုသာ ဘဏေတိ။
ရုရုမိဂရာဇဇာတကံ နဝမံ။
အာသီသေထေဝ [အာသိံသေထေဝ (သီ။ သျာ။ ပီ။)] ပုရိသော, န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ, ယထာ ဣစ္ဆိံ တထာ အဟု။
အာသီသေထေဝ ပုရိသော, န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ, ဥဒကာ ထလမုဗ္ဘတံ။
ဝါယမေထေဝ ပုရိသော, န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ, ယထာ ဣစ္ဆိံ တထာ အဟု။
ဝါယမေထေဝ ပုရိသော, န နိဗ္ဗိန္ဒေယျ ပဏ္ဍိတော၊
ပဿာမိ ဝေါဟံ အတ္တာနံ, ဥဒကာ ထလမုဗ္ဘတံ။
ဒုက္ခူပနီတောပိ နရော သပညော, အာသံ န ဆိန္ဒေယျ သုခါဂမာယ၊
ဗဟူ ဟိ ဖဿာ အဟိတာ ဟိတာ စ, အဝိတက္ကိတာ မစ္စမုပဗ္ဗဇန္တိ [မစ္စုမုပဗ္ဗဇန္တိ (က။ သီ။ ပီ။), မစ္စုမုပပဇ္ဇန္တိ (သျာ။ က။) ဧတ္ထ ‘‘အဝိတက္ကိတာပိ ဖဿော မစ္စံ ဇနံ ဥပဂစ္ဆန္တီ’’တိ အတ္ထော]။
(ဇာ၊၁၊၂၇၃။)အစိန္တိတမ္ပိ ဘဝတိ, စိန္တိတမ္ပိ ဝိနဿတိ၊
န ဟိ စိန္တာမယာ ဘောဂါ, ဣတ္ထိယာ ပုရိသဿ ဝါ။
သရဘံ ဂိရိဒုဂ္ဂသ္မိံ, ယံ တွံ အနုသရီ ပုရေ၊
အလီနစိတ္တဿ တုဝံ, ဝိက္ကန္တမနုဇီဝသိ [တဝ, ဝိက္ကန္တံ ဇီဝိတံ လဘိ (က။)]။
ယော တံ ဝိဒုဂ္ဂါ နရကာ သမုဒ္ဓရိ, သိလာယ ယောဂ္ဂံ သရဘော ကရိတွာ၊
ဒုက္ခူပနီတံ မစ္စုမုခါ ပမောစယိ, အလီနစိတ္တံ တံ မိဂံ [တမေဝ (သျာ။ က။)] ဝဒေသိ။
ကိံ တွံ နု [တုဝန္နု (သီ။ ပီ။)] တတ္ထေဝ တဒါ အဟောသိ, ဥဒါဟု တေ ကောစိ နံ [တံ (က။)] ဧတဒက္ခာ၊
ဝိဝဋ္ဋစ္ဆဒ္ဒေါ နုသိ သဗ္ဗဒဿီ, ဉာဏံ နု တေ ဗြာဟ္မဏ ဘိံသရူပံ။
န စေဝဟံ တတ္ထ တဒါ အဟောသိံ, န စာပိ မေ ကောစိ နံ [တံ (က။)] ဧတဒက္ခာ၊
ဂါထာပဒါနဉ္စ သုဘာသိတာနံ, အတ္ထံ တဒါနေန္တိ ဇနိန္ဒ ဓီရာ။
အာဒါယ ပတ္တိံ [ပတ္တံ (သျာ။), ပဋ္ဋိံ (က။)] ပရဝိရိယဃာတိံ, စာပေ သရံ ကိံ ဝိစိကိစ္ဆသေ တုဝံ၊
နုန္နော [နုဏ္ဏော (က။ သီ။ သျာ။), တုဏ္ဏော (က။)] သရော သရဘံ ဟန္တု ခိပ္ပံ, အန္နဉှိ ဧတံ ဝရပည ရညော။
အဒ္ဓါ ပဇာနာမိ အဟမ္ပိ ဧတံ, အန္နံ မိဂေါ ဗြာဟ္မဏ ခတ္တိယဿ၊
ပုဗ္ဗေ ကတဉ္စ [ပုဗ္ဗေ စ ကတံ (က။)] အပစာယမာနော, တသ္မာ မိဂံ သရဘံ နော ဟနာမိ။
နေသော မိဂေါ မဟာရာဇ, အသုရေသော ဒိသမ္ပတိ၊
ဧတံ ဟန္တွာ မနုဿိန္ဒ, ဘဝဿု အမရာဓိပေါ။
(ဇာ၊၁၊၂၇၄။)သစေ စ ရာဇာ [ရာဇ (သီ။ သျာ။ ပီ။)] ဝိစိကိစ္ဆသေ တုဝံ, ဟန္တုံ မိဂံ သရဘံ သဟာယကံ [သဟာယကံ မေ (သီ။ ပီ။)]၊
သပုတ္တဒါရော နရဝီရသေဋ္ဌ [နရဝိရိယသေဋ္ဌ (သီ။ ပီ။)], ဂန္တွာ [ဂန္တာ (သီ။ ပီ။ အဋ္ဌ။)] တုဝံ ဝေတရဏိံ ယမဿ။
ကာမံ အဟံ ဇာနပဒါ စ သဗ္ဗေ, ပုတ္တာ စ ဒါရာ စ သဟာယသံဃာ၊
ဂစ္ဆေမု တံ ဝေတရဏိံ ယမဿ, န တွေဝ ဟညော မမ ပါဏဒေါ ယော [ပါဏဒ’ဿ (သီ။ သျာ။ ပီ။)]။
အယံ မိဂေါ ကိစ္ဆဂတဿ မယှံ, ဧကဿ ကတ္တာ ဝိဝနသ္မိ ဃောရေ၊
တံ တာဒိသံ ပုဗ္ဗကိစ္စံ သရန္တော, ဇာနံ မဟာဗြဟ္မေ ကထံ ဟနေယျံ။
မိတ္တာဘိရာဓီ စိရမေဝ ဇီဝ, ရဇ္ဇံ ဣမံ ဓမ္မဂုဏေ [ရဇ္ဇမ္ပိမံ စဿ ဂဏေ (က။)] ပသာသ၊
နာရီဂဏေဟိ ပရိစာရိယန္တော, မောဒဿု ရဋ္ဌေ တိဒိဝေဝ ဝါသဝေါ။
အက္ကောဓနော နိစ္စပသန္နစိတ္တော, သဗ္ဗာတိထီ ယာစယောဂေါ ဘဝိတွာ [ပါဟုနကေ ကရိတွာ (သျာ။), ယာစယောဂေါ ဝိဒိတွာ (က။)]၊
ဒတွာ စ ဘုတွာ စ ယထာနုဘာဝံ, အနိန္ဒိတော သဂ္ဂမုပေဟိ ဌာနန္တိ။
သရဘမိဂဇာတကံ ဒသမံ။
တေရသကနိပါတံ နိဋ္ဌိတံ။
(ဇာ၊၁၊၂၇၅။)တဿုဒ္ဒါနံ –
ဝရအမ္ဗ ကုဌာရိ သဟံသဝရော, အထရညသ္မိံ ဒူတကပဉ္စမကော၊
အထ ဗောဓိ အကိတ္တိ သုတက္ကရိနာ, အထ ရုရုမိဂေနပရော သရဘောတိ။
(ဇာ၊၁၊၂၇၆။)၁၄။ ပကိဏ္ဏကနိပါတော
သမ္ပန္နံ သာလိကေဒါရံ, သုဝါ ဘုဉ္ဇန္တိ ကောသိယ၊
ပဋိဝေဒေမိ တေ ဗြဟ္မေ, န နေ [တေ (သီ။ သျာ။), နံ (သီ။ သျာ။ ပီ။ အဋ္ဌ။), တံ (က။ အဋ္ဌ။)] ဝါရေတုမုဿဟေ။
ဧကော စ တတ္ထ သကုဏော, ယော နေသံ [တေသံ (သီ။ အဋ္ဌ။)] သဗ္ဗသုန္ဒရော၊
ဘုတွာ သာလိံ ယထာကာမံ, တုဏ္ဍေနာဒါယ ဂစ္ဆတိ။
ဩဍ္ဍေန္တု [ဥဇ္ဈုန္တု (သျာ။ က။) အင်္ဂုတ္တရနိကာယေ ပဿိတဗ္ဗံ] ဝါဠပါသာနိ, ယထာ ဝဇ္ဈေထ သော ဒိဇော၊
ဇီဝဉ္စ နံ ဂဟေတွာန, အာနယေဟိ [အာနယေထ (သီ။ ပီ။)] မမန္တိကေ။
ဧတေ ဘုတွာ ပိဝိတွာ စ [ဘုတွာ စ ပိတွာ စ (ပီ။)], ပက္ကမန္တိ ဝိဟင်္ဂမာ၊
ဧကော ဗဒ္ဓေါသ္မိ ပါသေန, ကိံ ပါပံ ပကတံ မယာ။
ဥဒရံ နူန အညေသံ, သုဝ အစ္စောဒရံ တဝ၊
ဘုတွာ သာလိံ ယထာကာမံ, တုဏ္ဍေနာဒါယ ဂစ္ဆသိ။
ကောဋ္ဌံ နု တတ္ထ ပူရေသိ, သုဝ ဝေရံ နု တေ မယာ၊
ပုဋ္ဌော မေ သမ္မ အက္ခာဟိ, ကုဟိံ သာလိံ နိဒါဟသိ [နိဓီယသိ (ပီ။)]။
န မေ ဝေရံ တယာ သဒ္ဓိံ, ကောဋ္ဌော မယှံ န ဝိဇ္ဇတိ၊
ဣဏံ မုဉ္စာမိဏံ ဒမ္မိ, သမ္ပတ္တော ကောဋသိမ္ဗလိံ၊
နိဓိမ္ပိ တတ္ထ နိဒဟာမိ, ဧဝံ ဇာနာဟိ ကောသိယ။
ကီဒိသံ တေ ဣဏဒါနံ, ဣဏမောက္ခော စ ကီဒိသော၊
နိဓိနိဓာနမက္ခာဟိ, အထ ပါသာ ပမောက္ခသိ။
အဇာတပက္ခာ တရုဏာ, ပုတ္တကာ မယှ ကောသိယ၊
တေ မံ ဘတာ ဘရိဿန္တိ, တသ္မာ တေသံ ဣဏံ ဒဒေ။
မာတာ ပိတာ စ မေ ဝုဒ္ဓါ, ဇိဏ္ဏကာ ဂတယောဗ္ဗနာ၊
တေသံ တုဏ္ဍေန ဟာတူန, မုဉ္စေ ပုဗ္ဗကတံ [ပုဗ္ဗေ ကတံ (သီ။)] ဣဏံ။
(ဇာ၊၁၊၂၇၇။)အညေပိ တတ္ထ သကုဏာ, ခီဏပက္ခာ သုဒုဗ္ဗလာ၊
တေသံ ပုညတ္ထိကော ဒမ္မိ, တံ နိဓိံ အာဟု ပဏ္ဍိတာ။
ဤဒိသံ [ဧဒိသံ (သီ။ ပီ။)] မေ ဣဏဒါနံ, ဣဏမောက္ခော စ ဤဒိသော၊
နိဓိနိဓာနမက္ခာမိ [နိဓိံ နိဓာနံ အက္ခာတံ (သီ။ ပီ။)], ဧဝံ ဇာနာဟိ ကောသိယ။
ဘဒ္ဒကော ဝတယံ ပက္ခီ, ဒိဇော ပရမဓမ္မိကော၊
ဧကစ္စေသု မနုဿေသု, အယံ ဓမ္မော န ဝိဇ္ဇတိ။
ဘုဉ္ဇ သာလိံ ယထာကာမံ, သဟ သဗ္ဗေဟိ ဉာတိဘိ၊
ပုနာပိ သုဝ ပဿေမု, ပိယံ မေ တဝ ဒဿနံ။
ဘုတ္တဉ္စ ပီတဉ္စ တဝဿမမှိ [တဝဿဗျမှိ (က။)], ရတ္တိဉ္စ [ရတီ စ (သီ။ ပီ။)] နော ကောသိယ တေ သကာသေ၊
နိက္ခိတ္တဒဏ္ဍေသု ဒဒါဟိ ဒါနံ, ဇိဏ္ဏေ စ မာတာပိတရော ဘရဿု။
လက္ခီ ဝတ မေ ဥဒပါဒိ အဇ္ဇ, ယော အဒ္ဒသာသိံ ပဝရံ [ယောဟံ အဒဿံ ပရမံ (သျာ။ က။)] ဒိဇာနံ၊
သုဝဿ သုတွာန သုဘာသိတာနိ, ကာဟာမိ ပုညာနိ အနပ္ပကာနိ။
သော ကောသိယော အတ္တမနော ဥဒဂ္ဂေါ, အန္နဉ္စ ပါနဉ္စဘိသင်္ခရိတွာ [အန္နဉ္စ ပါနံ အဘိသံဟရိတွာ (က။)]၊
အန္နေန ပါနေန ပသန္နစိတ္တော, သန္တပ္ပယိ သမဏဗြာဟ္မဏေ စာတိ။
သာလိကေဒါရဇာတကံ [ကေဒါရဇာတကံ (က။)] ပဌမံ။
ဥပနီယတိဒံ မညေ, စန္ဒေ [လောဟိတမဒေန မဇ္ဇာမိ၊ ဝိဇဟာမိ ဇီဝိတံ ပါဏာ, (သီ။ ပီ။ အဋ္ဌ။)] လောဟိတမဒ္ဒနေ၊
အဇ္ဇ ဇဟာမိ ဇီဝိတံ, ပါဏာ [လောဟိတမဒေန မဇ္ဇာမိ၊ ဝိဇဟာမိ ဇီဝိတံ ပါဏာ, (သီ။ ပီ။ အဋ္ဌ။)] မေ စန္ဒေ နိရုဇ္ဈန္တိ။
(ဇာ၊၁၊၂၇၈။)ဩသီဒိ [ဩသဓိ (သီ။ သျာ။ ပီ။), ဩသဋ္ဌိ (က။), ဩသတိ (အဘိနဝဋီကာ), ဩသီဒတိ (?)] မေ ဒုက္ခံ [ဒုက္ခံ မေ (သီ။ ပီ။)] ဟဒယံ, မေ ဍယှတေ နိတမ္မာမိ၊
တဝ စန္ဒိယာ သောစန္တိယာ, န နံ အညေဟိ သောကေဟိ။
တိဏမိဝ ဝနမိဝ မိလာယာမိ [မိလယာမိ (သီ။), မိယျာမိ (သီ။ ပီ။ အဋ္ဌ။)], နဒီ အပရိပုဏ္ဏာဝ [အပရိပုဏ္ဏိယာဝ (သီ။ ပီ။)] သုဿာမိ၊
တဝ စန္ဒိယာ သောစန္တိယာ, န နံ အညေဟိ သောကေဟိ။
ဝဿမိဝ သရေ ပါဒေ [ဝဿံဝ သရေ ပါဒေ (သီ။), ဝဿံဝ သရေ ပဗ္ဗတပါဒေ (ပီ။)], ဣမာနိ အဿူနိ ဝတ္တရေ မယှံ၊
တဝ စန္ဒိယာ သောစန္တိယာ, န နံ အညေဟိ သောကေဟိ။
ပါပေါ ခေါသိ [ပါပေါသိ ခေါ (သီ။), ပါပေါ ခေါ (သျာ။ ပီ။)] ရာဇပုတ္တ, ယော မေ ဣစ္ဆိတံ [ဣစ္ဆိတ (သီ။ သျာ။ ပီ။)] ပတိံ ဝရာကိယာ၊
ဝိဇ္ဈသိ ဝနမူလသ္မိံ, သောယံ ဝိဒ္ဓေါ ဆမာ သေတိ။
ဣမံ မယှံ ဟဒယသောကံ, ပဋိမုဉ္စတု ရာဇပုတ္တ တဝ မာတာ၊
ယော မယှံ ဟဒယသောကော, ကိမ္ပုရိသံ အဝေက္ခမာနာယ။
ဣမံ မယှံ ဟဒယသောကံ, ပဋိမုဉ္စတု ရာဇပုတ္တ တဝ ဇာယာ၊
ယော မယှံ ဟဒယသောကော, ကိမ္ပုရိသံ အဝေက္ခမာနာယ။
မာ စ ပုတ္တံ [ပုတ္တေ (သီ။ ပီ။)] မာ စ ပတိံ, အဒ္ဒက္ခိ ရာဇပုတ္တ တဝ မာတာ၊
ယော ကိမ္ပုရိသံ အဝဓိ, အဒူသကံ မယှ ကာမာ ဟိ [မယှံ ကာမာ (က။)]။
မာ စ ပုတ္တံ မာ စ ပတိံ, အဒ္ဒက္ခိ ရာဇပုတ္တ တဝ ဇာယာ၊
ယော ကိမ္ပုရိသံ အဝဓိ, အဒူသကံ မယှ ကာမာ ဟိ။
မာ တွံ စန္ဒေ ရောဒိ, မာ သောစိ ဝနတိမိရမတ္တက္ခိ၊
မမ တွံ ဟေဟိသိ ဘရိယာ, ရာဇကုလေ ပူဇိတာ နာရီဘိ [နာရီ (သီ။ ပီ။)]။
အပိ နူနဟံ မရိဿံ, နာဟံ [န စ ပနာဟံ (သီ။ ပီ။)] ရာဇပုတ္တ တဝ ဟေဿံ၊
ယော ကိမ္ပုရိသံ အဝဓိ, အဒူသကံ မယှ ကာမာ ဟိ။
အပိ ဘီရုကေ အပိ ဇီဝိတုကာမိကေ, ကိမ္ပုရိသိ ဂစ္ဆ ဟိမဝန္တံ၊
တာလီသတဂရဘောဇနာ, အညေ [တာလိဿတဂရဘောဇနေ, အရညေ (သီ။ ပီ။)] တံ မိဂါ ရမိဿန္တိ။
(ဇာ၊၁၊၂၇၉။)တေ ပဗ္ဗတာ တာ စ ကန္ဒရာ, [တာ စ ဂိရိဂုဟာယော (သီ။ သျာ။ ပီ။)] တာ စ ဂိရိဂုဟာယော တထေဝ တိဋ္ဌန္တိ [တာ စ ဂိရိဂုဟာယော (သီ။ သျာ။ ပီ။)]၊
တတ္ထေဝ [တတ္ထ (သီ။ သျာ။ ပီ။)] တံ အပဿန္တီ, ကိမ္ပုရိသ ကထံ အဟံ ကဿံ။
တေ ပဏ္ဏသန္ထတာ ရမဏီယာ, ဝါဠမိဂေဟိ အနုစိဏ္ဏာ၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ [ကာသံ (သီ။ သျာ။ ပီ။)]။
တေ ပုပ္ဖသန္ထတာ ရမဏီယာ, ဝါဠမိဂေဟိ အနုစိဏ္ဏာ၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
အစ္ဆာ သဝန္တိ ဂိရိဝန [ဂိရိဝရ (သီ။ ပီ။)] နဒိယော, ကုသုမာဘိကိဏ္ဏသောတာယော၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
နီလာနိ ဟိမဝတော ပဗ္ဗတဿ, ကူဋာနိ ဒဿနီယာနိ [ဒဿနေယျာနိ (သီ။ ပီ။)]၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
ပီတာနိ ဟိမဝတော ပဗ္ဗတဿ, ကူဋာနိ ဒဿနီယာနိ၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
တမ္ဗာနိ ဟိမဝတော ပဗ္ဗတဿ, ကူဋာနိ ဒဿနီယာနိ၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
တုင်္ဂါနိ ဟိမဝတော ပဗ္ဗတဿ, ကူဋာနိ ဒဿနီယာနိ၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
သေတာနိ ဟိမဝတော ပဗ္ဗတဿ, ကူဋာနိ ဒဿနီယာနိ၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
စိတြာနိ ဟိမဝတော ပဗ္ဗတဿ, ကူဋာနိ ဒဿနီယာနိ၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
ယက္ခဂဏသေဝိတေ ဂန္ဓမာဒနေ, ဩသဓေဘိ သဉ္ဆန္နေ၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
ကိမ္ပုရိသသေဝိတေ ဂန္ဓမာဒနေ, ဩသဓေဘိ သဉ္ဆန္နေ၊
တတ္ထေဝ တံ အပဿန္တီ, ကိမ္ပုရိသ ကထံ အဟံ ကဿံ။
(ဇာ၊၁၊၂၈၀။)ဝန္ဒေ တေ အယိရဗြဟ္မေ [အယျိရေ ဗြဟ္မေ (က။)], ယော မေ ဣစ္ဆိတံ ပတိံ ဝရာကိယာ၊
အမတေန အဘိသိဉ္စိ, သမာဂတာသ္မိ ပိယတမေန။
ဝိစရာမ ဒါနိ ဂိရိဝန [ဂိရိဝရ (သီ။ ပီ။)] နဒိယော, ကုသုမာဘိကိဏ္ဏသောတာယော၊
နာနာဒုမဝသနာယော [သေဝနာယော (ပီ။)], ပိယံဝဒါ အညမညဿာတိ။
စန္ဒကိန္နရီဇာတကံ [စန္ဒကိန္နရဇာတကံ (သီ။ သျာ။ ပီ။)] ဒုတိယံ။
ဥက္ကာ စိလာစာ [မိလာစာ (သီ။ သျာ။ ပီ။)] ဗန္ဓန္တိ ဒီပေ [ဗန္ဓန္တိ လုဒ္ဒါ, ဒီပေ (က။)], ပဇာ မမံ ခါဒိတုံ ပတ္ထယန္တိ၊
မိတ္တံ သဟာယဉ္စ ဝဒေဟိ သေနက, အာစိက္ခ ဉာတိဗျသနံ ဒိဇာနံ။
ဒိဇော ဒိဇာနံ ပဝရောသိ ပက္ခိမ [ပက္ခိ (သီ။ ပီ။), ပက္ခိ စ (သျာ။)], ဥက္ကုသရာဇ သရဏံ တံ ဥပေမ [ဥပေမိ (သီ။ သျာ။ ပီ။)]၊
ပဇာ မမံ ခါဒိတုံ ပတ္ထယန္တိ, လုဒ္ဒါ စိလာစာ [မိလာစာ (သီ။ သျာ။ ပီ။)] ဘဝ မေ သုခါယ။
မိတ္တံ သဟာယဉ္စ ကရောန္တိ ပဏ္ဍိတာ, ကာလေ အကာလေ သုခမေသမာနာ [မာသယာနာ (ပီ။)]၊
ကရောမိ တေ သေနက ဧတမတ္ထံ, အရိယော ဟိ အရိယဿ ကရောတိ ကိစ္စံ။
ယံ ဟောတိ ကိစ္စံ အနုကမ္ပကေန, အရိယဿ အရိယေန ကတံ တယီဒံ [တဝ ယိဒံ (သီ။ ပီ။)]၊
အတ္တာနုရက္ခီ ဘဝ မာ အဒယှိ [အဍယှ (သီ။ ပီ။)], လစ္ဆာမ ပုတ္တေ တယိ ဇီဝမာနေ။
(ဇာ၊၁၊၂၈၁။)တဝေဝ [တမေဝ (သျာ။ က။)] ရက္ခာဝရဏံ ကရောန္တော, သရီရဘေဒါပိ န သန္တသာမိ၊
ကရောန္တိ ဟေကေ [ဟေတေ (က။ သီ။ သျာ။ ပီ။)] သခီနံ သခါရော, ပါဏံ စဇန္တာ [စဇန္တိ (သီ။ ပီ။)] သတမေသ [သတာနေသ (ပီ။)] ဓမ္မော။
သုဒုက္ကရံ ကမ္မမကာသိ [မကာ (သီ။ ပီ။)], အဏ္ဍဇာယံ ဝိဟင်္ဂမော၊
အတ္ထာယ ကုရရော ပုတ္တေ, အဍ္ဎရတ္တေ အနာဂတေ။
စုတာပိ ဟေကေ [ဧကေ (သီ။ ပီ။)] ခလိတာ သကမ္မုနာ, မိတ္တာနုကမ္ပာယ ပတိဋ္ဌဟန္တိ၊
ပုတ္တာ မမဋ္ဋာ ဂတိမာဂတောသ္မိ, အတ္ထံ စရေထော [စရေထ (သီ။ သျာ။ ပီ။)] မမ ဝါရိစရ [ဝါရိဆန္န (သီ။ ပီ။)]။
ဓနေန ဓညေန စ အတ္တနာ စ, မိတ္တံ သဟာယဉ္စ ကရောန္တိ ပဏ္ဍိတာ၊
ကရောမိ တေ သေနက ဧတမတ္ထံ, အရိယော ဟိ အရိယဿ ကရောတိ ကိစ္စံ။
အပ္ပေါဿုက္ကော တာတ တုဝံ နိသီဒ, ပုတ္တော ပိတု စရတိ အတ္ထစရိယံ၊
အဟံ စရိဿာမိ တဝေတမတ္ထံ, သေနဿ ပုတ္တေ ပရိတာယမာနော။
အဒ္ဓါ ဟိ တာတ သတမေသ ဓမ္မော, ပုတ္တော ပိတု ယံ စရေ [ပိတုနံ စရေ (က။), ပိတု ယဉ္စရေထ (သီ။ ပီ။)] အတ္ထစရိယံ၊
အပ္ပေဝ မံ ဒိသွာန ပဝဍ္ဎကာယံ, သေနဿ ပုတ္တာ န ဝိဟေဌယေယျုံ။
ပသူ မနုဿာ မိဂဝီရသေဋ္ဌ [မိဂဝိရိယသေဋ္ဌ (သီ။ ပီ။)], ဘယဋ္ဋိတာ [ဘယဒ္ဒိတာ (သီ။ ပီ။)] သေဋ္ဌမုပဗ္ဗဇန္တိ၊
ပုတ္တာ မမဋ္ဋာ ဂတိမာဂတောသ္မိ, တွံ နောသိ ရာဇာ ဘဝ မေ သုခါယ။
(ဇာ၊၁၊၂၈၂။)ကရောမိ တေ သေနက ဧတမတ္ထံ, အာယာမိ တေ တံ ဒိသတံ ဝဓာယ၊
ကထဉှိ ဝိညူ ပဟု သမ္ပဇာနော, န ဝါယမေ အတ္တဇနဿ ဂုတ္တိယာ။
မိတ္တဉ္စ ကယိရာထ သုဟဒယဉ္စ [သုဟဒ္ဒယဉ္စ (သီ။), သခါဃရဉ္စ (ပီ။)], အယိရဉ္စ ကယိရာထ သုခါဂမာယ၊
နိဝတ္ထကောစောဝ [ကောဇောဝ (သီ။ ပီ။)] သရေဘိဟန္တွာ, မောဒါမ ပုတ္တေဟိ သမင်္ဂိဘူတာ။
သကမိတ္တဿ ကမ္မေန, သဟာယဿာပလာယိနော၊
ကူဇန္တမုပကူဇန္တိ, လောမသာ ဟဒယင်္ဂမံ။
မိတ္တံ သဟာယံ အဓိဂမ္မ ပဏ္ဍိတော, သော ဘုဉ္ဇတီ ပုတ္တ ပသုံ ဓနံ ဝါ၊
အဟဉ္စ ပုတ္တာ စ ပတီ စ မယှံ, မိတ္တာနုကမ္ပာယ သမင်္ဂိဘူတာ။
ရာဇဝတာ သူရဝတာ စ အတ္ထော, သမ္ပန္နသခိဿ ဘဝန္တိ ဟေတေ၊
သော မိတ္တဝါ ယသဝါ ဥဂ္ဂတတ္တော, အသ္မိံဓလောကေ [အသ္မိဉ္စ လောကေ (သီ။ သျာ။ ပီ။)] မောဒတိ ကာမကာမီ။
ကရဏီယာနိ မိတ္တာနိ, ဒလိဒ္ဒေနာပိ သေနက၊
ပဿ မိတ္တာနုကမ္ပာယ, သမဂ္ဂမှာ သဉာတကေ [သဉာတကာ (?)]။
သူရေန ဗလဝန္တေန, ယော မိတ္တေ [မေတ္တေ (သီ။), မိတ္တံ (သျာ။)] ကုရုတေ ဒိဇော၊
ဧဝံ သော သုခိတော ဟောတိ, ယထာဟံ တွဉ္စ သေနကာတိ။
မဟာဥက္ကုသဇာတကံ တတိယံ။
(ဇာ၊၁၊၂၈၃။)ခရာဇိနာ ဇဋိလာ ပင်္ကဒန္တာ, ဒုမ္မက္ခရူပါ [ဒုမ္မုဓရူပါ (သီ။ ပီ။ က။)] ယေ မန္တံ ဇပ္ပန္တိ [ယေမေ ဇပန္တိ (သီ။ ပီ။), ယေ’မေ ဇပ္ပန္တိ မန္တေ (ဇာ။ ၁။၆။၁၀)]၊
ကစ္စိန္နု တေ မာနုသကေ ပယောဂေ, ဣဒံ ဝိဒူ ပရိမုတ္တာ အပါယာ။
ပါပါနိ ကမ္မာနိ ကရေထ [ကရေယျ (သျာ။), ကတွာန (ဇာ။ ၁။၆။၁၁)] ရာဇ, ဗဟုဿုတော စေ န စရေယျ ဓမ္မံ၊
သဟဿဝေဒေါပိ န တံ ပဋိစ္စ, ဒုက္ခာ ပမုစ္စေ [ပမုဉ္စေ (သျာ။)] စရဏံ အပတွာ။
သဟဿဝေဒေါပိ န တံ ပဋိစ္စ, ဒုက္ခာ ပမုစ္စေ စရဏံ အပတွာ၊
မညာမိ ဝေဒါ အဖလာ ဘဝန္တိ, သသံယမံ စရဏညေဝ သစ္စံ။
န ဟေဝ ဝေဒါ အဖလာ ဘဝန္တိ, သသံယမံ စရဏညေဝ သစ္စံ၊
ကိတ္တိဉှိ [ကိတ္တိဉ္စ (သျာ။)] ပပ္ပေါတိ အဓိစ္စ ဝေဒေ, သန္တိံ ပုဏာတိ [ပုနောတိ (သီ။ အဋ္ဌ။), ပုဏေတိ (သျာ။ ဇာ။ ၁။၆။၁၃), ပုနေတိ (ပီ။)] စရဏေန ဒန္တော။
ဘစ္စာ မာတာ ပိတာ ဗန္ဓူ, ယေန ဇာတော သယေဝ သော၊
ဥဒ္ဒါလကော အဟံ ဘောတော [ဘောတိ (က။)], သောတ္တိယာကုလဝံသကော [ဝံသတော (က။)]။
ကထံ ဘော ဗြာဟ္မဏော ဟောတိ, ကထံ ဘဝတိ ကေဝလီ၊
ကထဉ္စ ပရိနိဗ္ဗာနံ, ဓမ္မဋ္ဌော ကိန္တိ ဝုစ္စတိ။
(ဇာ၊၁၊၂၈၄။)နိရံကတွာ အဂ္ဂိမာဒါယ ဗြာဟ္မဏော, အာပေါ သိဉ္စံ ယဇံ ဥဿေတိ ယူပံ၊
ဧဝံကရော ဗြာဟ္မဏော ဟောတိ ခေမီ, ဓမ္မေ ဌိတံ တေန အမာပယိံသု။
န သုဒ္ဓိ သေစနေနတ္ထိ, နာပိ ကေဝလီ ဗြာဟ္မဏော၊
န ခန္တီ နာပိ သောရစ္စံ, နာပိ သော ပရိနိဗ္ဗုတော။
ကထံ သော [ဘော (သျာ။ က။)] ဗြာဟ္မဏော ဟောတိ, ကထံ ဘဝတိ ကေဝလီ၊
ကထဉ္စ ပရိနိဗ္ဗာနံ, ဓမ္မဋ္ဌော ကိန္တိ ဝုစ္စတိ။
အခေတ္တဗန္ဓူ အမမော နိရာသော, နိလ္လောဘပါပေါ ဘဝလောဘခီဏော၊
ဧဝံကရော ဗြာဟ္မဏော ဟောတိ ခေမီ, ဓမ္မေ ဌိတံ တေန အမာပယိံသု။
ခတ္တိယာ ဗြာဟ္မဏာ ဝေဿာ, သုဒ္ဒါ စဏ္ဍာလပုက္ကုသာ၊
သဗ္ဗေဝ သောရတာ ဒန္တာ, သဗ္ဗေဝ ပရိနိဗ္ဗုတာ၊
သဗ္ဗေသံ သီတိဘူတာနံ, အတ္ထိ သေယျောထ [သေယျောဝ (သီ။ ပီ။)] ပါပိယော။
ခတ္တိယာ ဗြာဟ္မဏာ ဝေဿာ, သုဒ္ဒါ စဏ္ဍာလပုက္ကုသာ၊
သဗ္ဗေဝ သောရတာ ဒန္တာ, သဗ္ဗေဝ ပရိနိဗ္ဗုတာ၊
သဗ္ဗေသံ သီတိဘူတာနံ, နတ္ထိ သေယျောထ ပါပိယော။
ခတ္တိယာ ဗြာဟ္မဏာ ဝေဿာ, သုဒ္ဒါ စဏ္ဍာလပုက္ကုသာ၊
သဗ္ဗေဝ သောရတာ ဒန္တာ, သဗ္ဗေဝ ပရိနိဗ္ဗုတာ။
သဗ္ဗေသံ သီတိဘူတာနံ, နတ္ထိ သေယျောထ ပါပိယော၊
ပနတ္ထံ [ပသတ္ထံ (သျာ။), ပသဋ္ဌံ (က။)] စရသိ ဗြဟ္မညံ, သောတ္တိယာကုလဝံသတံ။
နာနာရတ္တေဟိ ဝတ္ထေဟိ, ဝိမာနံ ဘဝတိ ဆာဒိတံ၊
န တေသံ ဆာယာ ဝတ္ထာနံ, သော ရာဂေါ အနုပဇ္ဇထ။
(ဇာ၊၁၊၂၈၅။)ဧဝမေဝ [ဧဝမေဝံ (ပီ။)] မနုဿေသု, ယဒါ သုဇ္ဈန္တိ မာဏဝါ၊
တေ သဇာတိံ ပမုဉ္စန္တိ [န တေသံ ဇာတိံ ပုစ္ဆန္တိ (သီ။ သျာ။ ပီ။), န တေသံ ဇာတိ သုဇ္ဈတိ (က။)], ဓမ္မမညာယ သုဗ္ဗတာတိ။
ဥဒ္ဒါလကဇာတကံ စတုတ္ထံ။
အဿံ ဂဝံ ရဇတံ ဇာတရူပံ, ဘရိယဉ္စ သော ဣဓ လဘတံ မနာပံ၊
ပုတ္တေဟိ ဒါရေဟိ သမင်္ဂိ ဟောတု, ဘိသာနိ တေ ဗြာဟ္မဏ ယော အဟာသိ။
မာလဉ္စ သော ကာသိကစန္ဒနဉ္စ, ဓာရေတု ပုတ္တဿ ဗဟူ ဘဝန္တု၊
ကာမေသု တိဗ္ဗံ ကုရုတံ အပေက္ခံ, ဘိသာနိ တေ ဗြာဟ္မဏ ယော အဟာသိ။
ပဟူတဓညော ကသိမာ ယသဿီ, ပုတ္တေ ဂိဟီ ဓနိမာ သဗ္ဗကာမေ၊
ဝယံ အပဿံ ဃရမာဝသာတု, ဘိသာနိ တေ ဗြာဟ္မဏ ယော အဟာသိ။
သော ခတ္တိယော ဟောတု ပသယှကာရီ, ရာဇာဘိရာဇာ [ရာဇာဓိရာဇာ (သျာ။ က။)] ဗလဝါ ယသဿီ၊
သ စာတုရန္တံ မဟိမာဝသာတု, ဘိသာနိ တေ ဗြာဟ္မဏ ယော အဟာသိ။
သော ဗြာဟ္မဏော ဟောတု အဝီတရာဂေါ, မုဟုတ္တနက္ခတ္တပထေသု ယုတ္တော၊
ပူဇေတု နံ ရဋ္ဌပတီ ယသဿီ, ဘိသာနိ တေ ဗြာဟ္မဏ ယော အဟာသိ။
(ဇာ၊၁၊၂၈၆။)အဇ္ဈာယကံ သဗ္ဗသမန္တဝေဒံ [သဗ္ဗသမတ္တဝေဒံ (သီ။), သဗ္ဗသမတ္တဝေဒနံ (ပီ။)], တပဿီနံ မညတု သဗ္ဗလောကော၊
ပူဇေန္တု နံ ဇာနပဒါ သမေစ္စ, ဘိသာနိ တေ ဗြာဟ္မဏ ယော အဟာသိ။
စတုဿဒံ ဂါမဝရံ သမိဒ္ဓံ, ဒိန္နဉှိ သော ဘုဉ္ဇတု ဝါသဝေန၊
အဝီတရာဂေါ မရဏံ ဥပေတု, ဘိသာနိ တေ ဗြာဟ္မဏ ယော အဟာသိ။
သော ဂါမဏီ ဟောတု သဟာယမဇ္ဈေ, နစ္စေဟိ ဂီတေဟိ ပမောဒမာနော၊
သော ရာဇတော ဗျသန မာလတ္ထ [မာ ရာဇတော ဗျသန’မလတ္ထ (သီ။ သျာ။ ပီ။)] ကိဉ္စိ, ဘိသာနိ တေ ဗြာဟ္မဏ ယော အဟာသိ။
ယံ ဧကရာဇာ ပထဝိံ ဝိဇေတွာ, ဣတ္ထီသဟဿာန [ဣတ္ထီသဟဿဿ (သီ။ ပီ။)] ဌပေတု အဂ္ဂံ၊
သီမန္တိနီနံ ပဝရာ ဘဝါတု, ဘိသာနိ တေ ဗြာဟ္မဏ ယာ အဟာသိ။
ဣသီနဉှိ သာ သဗ္ဗသမာဂတာနံ, ဘုဉ္ဇေယျ သာဒုံ အဝိကမ္ပမာနာ၊
စရာတု လာဘေန ဝိကတ္ထမာနာ, ဘိသာနိ တေ ဗြာဟ္မဏ ယာ အဟာသိ။
အာဝါသိကော ဟောတု မဟာဝိဟာရေ, နဝကမ္မိကော ဟောတု ဂဇင်္ဂလာယံ [ကဇင်္ဂလာယံ (သီ။ သျာ။ ပီ။)]၊
အာလောကသန္ဓိံ ဒိဝသံ [ဒိဝသာ (သီ။ သျာ။ ပီ။)] ကရောတု, ဘိသာနိ တေ ဗြာဟ္မဏ ယော အဟာသိ။
(ဇာ၊၁၊၂၈၇။)သော ဗဇ္ဈတူ ပါသသတေဟိ ဆဗ္ဘိ [ဆမှိ (သီ။ ပီ။), ဆဿု (?)], ရမ္မာ ဝနာ နိယျတု ရာဇဓာနိံ [ရာဇဌာနိံ (က။)]၊
တုတ္တေဟိ သော ဟညတု ပါစနေဟိ, ဘိသာနိ တေ ဗြာဟ္မဏ ယော အဟာသိ။
အလက္ကမာလီ တိပုကဏ္ဏဝိဒ္ဓေါ, လဋ္ဌီဟတော သပ္ပမုခံ ဥပေတု၊
သကစ္ဆဗန္ဓော [သက္ကစ္စဗဒ္ဓေါ (သီ။ ပီ။), သံကစ္စဗန္ဓော (နိယျ)] ဝိသိခံ စရာတု, ဘိသာနိ တေ ဗြာဟ္မဏ ယော အဟာသိ။
ယော ဝေ အနဋ္ဌံဝ [အနဋ္ဌံ (သီ။ သျာ။ ပီ။)] နဋ္ဌန္တိ စာဟ, ကာမေဝ သော လဘတံ ဘုဉ္ဇတဉ္စ [လဘတု ဘုဉ္ဇတု စ (သျာ။)]၊
အဂါရမဇ္ဈေ မရဏံ ဥပေတု, ယော ဝါ ဘောန္တော သင်္ကတိ ကဉ္စိဒေဝ [ကိဉ္စိဒေဝ (က။)]။
ယဒေသမာနာ ဝိစရန္တိ လောကေ, ဣဋ္ဌဉ္စ ကန္တဉ္စ ဗဟူနမေတံ၊
ပိယံ မနုညံ စိဓ ဇီဝလောကေ, ကသ္မာ ဣသယော နပ္ပသံသန္တိ ကာမေ။
ကာမေသု ဝေ ဟညရေ ဗဇ္ဈရေ စ, ကာမေသု ဒုက္ခဉ္စ ဘယဉ္စ ဇာတံ၊
ကာမေသု ဘူတာဓိပတီ ပမတ္တာ, ပါပါနိ ကမ္မာနိ ကရောန္တိ မောဟာ။
တေ ပါပဓမ္မာ ပသဝေတွ ပါပံ, ကာယဿ ဘေဒါ နိရယံ ဝဇန္တိ၊
အာဒီနဝံ ကာမဂုဏေသု ဒိသွာ, တသ္မာ ဣသယော နပ္ပသံသန္တိ ကာမေ။
ဝီမံသမာနော ဣသိနော ဘိသာနိ, တီရေ ဂဟေတွာန ထလေ နိဓေသိံ၊
သုဒ္ဓါ အပါပါ ဣသယော ဝသန္တိ, ဧတာနိ တေ ဗြဟ္မစာရီ ဘိသာနိ။
(ဇာ၊၁၊၂၈၈။)န တေ နဋာ နော ပန ကီဠနေယျာ, န ဗန္ဓဝါ နော ပန တေ သဟာယာ၊
ကိသ္မိံ ဝုပတ္ထမ္ဘ သဟဿနေတ္တ, ဣသီဟိ တွံ ကီဠသိ ဒေဝရာဇ။
အာစရိယော မေသိ ပိတာ စ မယှံ, ဧသာ ပတိဋ္ဌာ ခလိတဿ ဗြဟ္မေ၊
ဧကာပရာဓံ ခမ ဘူရိပည, န ပဏ္ဍိတာ ကောဓဗလာ ဘဝန္တိ။
သုဝါသိတံ ဣသိနံ ဧကရတ္တံ, ယံ ဝါသဝံ ဘူတပတိဒ္ဒသာမ၊
သဗ္ဗေဝ ဘောန္တော သုမနာ ဘဝန္တု, ယံ ဗြာဟ္မဏော ပစ္စုပါဒီ ဘိသာနိ။
အဟဉ္စ သာရိပုတ္တော စ, မောဂ္ဂလ္လာနော စ ကဿပေါ၊
အနုရုဒ္ဓေါ ပုဏ္ဏော အာနန္ဒော, တဒါသုံ သတ္တ ဘာတရော။
ဘဂိနီ ဥပ္ပလဝဏ္ဏာ စ, ဒါသီ ခုဇ္ဇုတ္တရာ တဒါ၊
စိတ္တော ဂဟပတိ ဒါသော, ယက္ခော သာတာဂိရော တဒါ။
ပါလိလေယျော [ပါရိလေယျော (သီ။ ပီ။)] တဒါ နာဂေါ, မဓုဒေါ [မဓုဝါ (သီ။ ပီ။)] သေဋ္ဌဝါနရော၊
ကာဠုဒါယီ တဒါ သက္ကော, ဧဝံ ဓာရေထ ဇာတကန္တိ။
ဘိသဇာတကံ ပဉ္စမံ။
မဟေသီ သုရုစိနော [ရုစိနော (သီ။ သျာ။ ပီ။)] ဘရိယာ, အာနီတာ ပဌမံ အဟံ၊
ဒသ ဝဿသဟဿာနိ, ယံ မံ သုရုစိမာနယိ။
သာဟံ ဗြာဟ္မဏ ရာဇာနံ, ဝေဒေဟံ မိထိလဂ္ဂဟံ၊
နာဘိဇာနာမိ ကာယေန, ဝါစာယ ဥဒ စေတသာ၊
သုရုစိံ အတိမညိတ္ထ [အတိမညိတ္ထော (သီ။ ပီ။), အတိမညိတာ (?)], အာဝိ [အာဝိံ (သီ။ ပီ။)] ဝါ ယဒိ ဝါ ရဟော။
(ဇာ၊၁၊၂၈၉။)ဧတေန သစ္စဝဇ္ဇေန, ပုတ္တော ဥပ္ပဇ္ဇတံ ဣသေ၊
မုသာ မေ ဘဏမာနာယ, မုဒ္ဓါ ဖလတု သတ္တဓာ။
ဘတ္တု မမ သဿု မာတာ, ပိတာ စာပိ စ သဿုရော၊
တေ မံ ဗြဟ္မေ ဝိနေတာရော, ယာဝ အဋ္ဌံသု ဇီဝိတံ။
သာဟံ အဟိံသာရတိနီ, ကာမသာ [ကာမသော (သီ။)] ဓမ္မစာရိနီ [ဓမ္မစာရိဏီ (သီ။)]၊
သက္ကစ္စံ တေ ဥပဋ္ဌာသိံ, ရတ္တိန္ဒိဝမတန္ဒိတာ။
ဧတေန သစ္စဝဇ္ဇေန, ပုတ္တော ဥပ္ပဇ္ဇတံ ဣသေ၊
မုသာ မေ ဘဏမာနာယ, မုဒ္ဓါ ဖလတု သတ္တဓာ။
သောဠသိတ္ထိသဟဿာနိ, သဟဘရိယာနိ ဗြာဟ္မဏ၊
တာသု ဣဿာ ဝါ ကောဓော ဝါ, နာဟု မယှံ ကုဒါစနံ။
ဟိတေန တာသံ နန္ဒာမိ, န စ မေ ကာစိ အပ္ပိယာ၊
အတ္တာနံဝါနုကမ္ပာမိ, သဒါ သဗ္ဗာ သပတ္တိယော။
ဧတေန သစ္စဝဇ္ဇေန, ပုတ္တော ဥပ္ပဇ္ဇတံ ဣသေ၊
မုသာ မေ ဘဏမာနာယ, မုဒ္ဓါ ဖလတု သတ္တဓာ။
ဒါသေ ကမ္မကရေ ပေဿေ [ပေါသေ (သျာ။ က။)], ယေ စညေ အနုဇီဝိနော၊
ပေသေမိ [ပေါသေမိ (သီ။ သျာ။ ပီ။)] သဟဓမ္မေန, သဒါ ပမုဒိတိန္ဒြိယာ။
ဧတေန သစ္စဝဇ္ဇေန, ပုတ္တော ဥပ္ပဇ္ဇတံ ဣသေ၊
မုသာ မေ ဘဏမာနာယ, မုဒ္ဓါ ဖလတု သတ္တဓာ။
သမဏေ ဗြာဟ္မဏေ စာပိ, အညေ စာပိ ဝနိဗ္ဗကေ၊
တပ္ပေမိ အန္နပါနေန, သဒါ ပယတပါဏိနီ။
ဧတေန သစ္စဝဇ္ဇေန, ပုတ္တော ဥပ္ပဇ္ဇတံ ဣသေ၊
မုသာ မေ ဘဏမာနာယ, မုဒ္ဓါ ဖလတု သတ္တဓာ။
စာတုဒ္ဒသိံ ပဉ္စဒ္ဒသိံ [ပန္နရသိံ (သီ။ ပီ။)], ယာ စ ပက္ခဿ အဋ္ဌမီ [အဋ္ဌမိံ (သီ။ ပီ။)]၊
ပါဋိဟာရိယပက္ခဉ္စ, အဋ္ဌင်္ဂသုသမာဂတံ [အဋ္ဌင်္ဂသုသမာဟိတံ (သဗ္ဗတ္ထ) ဝိ။ ဝ။ ၁၂၉ ပါဠိယာ အဋ္ဌကထာ ပဿိတဗ္ဗာ]၊
ဥပေါသထံ ဥပဝသာမိ [ဥပဝသိံ (က။)], သဒါ သီလေသု သံဝုတာ။
(ဇာ၊၁၊၂၉၀။)ဧတေန သစ္စဝဇ္ဇေန, ပုတ္တော ဥပ္ပဇ္ဇတံ ဣသေ၊
မုသာ မေ ဘဏမာနာယ, မုဒ္ဓါ ဖလတု သတ္တဓာ။
သဗ္ဗေဝ တေ ဓမ္မဂုဏာ, ရာဇပုတ္တိ ယသဿိနိ၊
သံဝိဇ္ဇန္တိ တယိ ဘဒ္ဒေ, ယေ တွံ ကိတ္တေသိ အတ္တနိ။
ခတ္တိယော ဇာတိသမ္ပန္နော, အဘိဇာတော ယသဿိမာ၊
ဓမ္မရာဇာ ဝိဒေဟာနံ, ပုတ္တော ဥပ္ပဇ္ဇတေ တဝ [တဝံ (သီ။ ပီ။)]။
ဒုမ္မီ [ရုမ္မီ (သီ။ ပီ။)] ရဇောဇလ္လဓရော, အဃေ ဝေဟာယသံ ဌိတော၊
မနုညံ ဘာသသေ ဝါစံ, ယံ မယှံ ဟဒယင်္ဂမံ။
ဒေဝတာနုသိ သဂ္ဂမှာ, ဣသိ ဝါသိ [စာပိ (က။)] မဟိဒ္ဓိကော၊
ကော ဝါသိ တွံ အနုပ္ပတ္တော, အတ္တာနံ မေ ပဝေဒယ။
ယံ ဒေဝသံဃာ ဝန္ဒန္တိ, သုဓမ္မာယံ သမာဂတာ၊
သောဟံ သက္ကော သဟဿက္ခော, အာဂတောသ္မိ တဝန္တိကေ။
ဣတ္ထိယော [ဣတ္ထိယာ (ပီ။)] ဇီဝလောကသ္မိံ, ယာ ဟောတိ [ဟောန္တိ (သီ။ သျာ။)] သမစာရိနီ [သမစာရိဏီ (သီ။)]၊
မေဓာဝိနီ သီလဝတီ, သဿုဒေဝါ ပတိဗ္ဗတာ။
တာဒိသာယ သုမေဓာယ, သုစိကမ္မာယ နာရိယာ၊
ဒေဝါ ဒဿနမာယန္တိ, မာနုသိယာ အမာနုသာ။
တွဉ္စ ဘဒ္ဒေ သုစိဏ္ဏေန, ပုဗ္ဗေ သုစရိတေန စ၊
ဣဓ ရာဇကုလေ ဇာတာ, သဗ္ဗကာမသမိဒ္ဓိနီ။
အယဉ္စ တေ ရာဇပုတ္တိ, ဥဘယတ္ထ ကဋဂ္ဂဟော၊
ဒေဝလောကူပပတ္တီ စ, ကိတ္တီ စ ဣဓ ဇီဝိတေ။
စိရံ သုမေဓေ သုခိနီ, ဓမ္မမတ္တနိ ပါလယ၊
ဧသာဟံ တိဒိဝံ ယာမိ, ပိယံ မေ တဝ ဒဿနန္တိ။
သုရုစိဇာတကံ ဆဋ္ဌံ။
(ဇာ၊၁၊၂၉၁။)֍ * ၄၉၀။ ပဉ္စုပေါသထိကဇာတကံ (၇)
အပ္ပေါဿုက္ကော ဒါနိ တုဝံ ကပေါတ, ဝိဟင်္ဂမ န တဝ ဘောဇနတ္ထော၊
ခုဒံ [ခုဒ္ဒံ (သျာ။ က။), ခုဓံ (သက္ကတ-ပါကတာနုရူပံ)] ပိပါသံ အဓိဝါသယန္တော, ကသ္မာ ဘဝံပေါသထိကော ကပေါတ [ကပေါတော (သီ။ ပီ။)]။
အဟံ ပုရေ ဂိဒ္ဓိဂတော ကပေါတိယာ, အသ္မိံ ပဒေသသ္မိမုဘော ရမာမ၊
အထဂ္ဂဟီ သာကုဏိကော ကပေါတိံ, အကာမကော တာယ ဝိနာ အဟောသိံ။
နာနာဘဝါ ဝိပ္ပယောဂေန တဿာ, မနောမယံ ဝေဒန ဝေဒယာမိ [ဝေဒနံ ဝေဒိယာမိ (သီ။ ပီ။)]၊
တသ္မာ အဟံပေါသထံ ပါလယာမိ, ရာဂေါ မမံ မာ ပုနရာဂမာသိ။
အနုဇ္ဇုဂါမီ ဥရဂါ ဒုဇိဝှ [ဥရဂ ဒွိဇိဝှ (သီ။)], ဒါဌာဝုဓော ဃောရဝိသောသိ သပ္ပ၊
ခုဒံ ပိပါသံ အဓိဝါသယန္တော, ကသ္မာ ဘဝံပေါသထိကော နု ဒီဃ [ဒီဃော (သီ။ ပီ။)]။
ဥသဘော အဟူ ဗလဝါ ဂါမိကဿ, စလက္ကကူ ဝဏ္ဏဗလူပပန္နော၊
သော မံ အက္ကမိ တံ ကုပိတော အဍံသိ, ဒုက္ခာဘိတုဏ္ဏော မရဏံ ဥပါဂါ [ဥပါဂမိ (သီ။ ပီ။)]။
တတော ဇနာ နိက္ခမိတွာန ဂါမာ, ကန္ဒိတွာ ရောဒိတွာ [ကန္ဒိတွ ရောဒိတွ (သီ။)] အပက္ကမိံသု၊
တသ္မာ အဟံပေါသထံ ပါလယာမိ, ကောဓော မမံ မာ ပုနရာဂမာသိ။
(ဇာ၊၁၊၂၉၂။)မတာန မံသာနိ ဗဟူ သုသာနေ, မနုညရူပံ တဝ ဘောဇနေ တံ၊
ခုဒံ ပိပါသံ အဓိဝါသယန္တော, ကသ္မာ ဘဝံပေါသထိကော သိင်္ဂါလ [သိဂါလော (သီ။ ပီ။)]။
ပဝိသိ [ပဝိဿံ (သီ။ ပီ။), ပဝိဿ (သျာ။)] ကုစ္ဆိံ မဟတော ဂဇဿ, ကုဏပေ ရတော ဟတ္ထိမံသေသု ဂိဒ္ဓေါ [ဟတ္ထိမံသေ ပဂိဒ္ဓေါ (သီ။ ပီ။)]၊
ဥဏှော စ ဝါတော တိခိဏာ စ ရသ္မိယော, တေ သောသယုံ တဿ ကရီသမဂ္ဂံ။
ကိသော စ ပဏ္ဍူ စ အဟံ ဘဒန္တေ, န မေ အဟူ နိက္ခမနာယ မဂ္ဂေါ၊
မဟာ စ မေဃော သဟသာ ပဝဿိ, သော တေမယီ တဿ ကရီသမဂ္ဂံ။
တတော အဟံ နိက္ခမိသံ ဘဒန္တေ, စန္ဒော ယထာ ရာဟုမုခါ ပမုတ္တော၊
တသ္မာ အဟံပေါသထံ ပါလယာမိ, လောဘော မမံ မာ ပုနရာဂမာသိ။
ဝမ္မီကထူပသ္မိံ ကိပိလ္လိကာနိ, နိပ္ပေါထယန္တော တုဝံ ပုရေ စရာသိ၊
ခုဒံ ပိပါသံ အဓိဝါသယန္တော, ကသ္မာ ဘဝံပေါသထိကော နု အစ္ဆ [အစ္ဆော (သီ။ ပီ။)]။
သကံ နိကေတံ အတိဟီဠယာနော [အတိဟေဠယာနော (သျာ။ က။)], အတြိစ္ဆတာ [အတြိစ္ဆတာယ (သီ။ သျာ။ ပီ။)] မလ္လဂါမံ [မလတံ (သီ။ ပီ။), မလ္လယတံ (က။)] အဂစ္ဆိံ၊
တတော ဇနာ နိက္ခမိတွာန ဂါမာ, ကောဒဏ္ဍကေန ပရိပေါထယိံသု မံ။
(ဇာ၊၁၊၂၉၃။)သော ဘိန္နသီသော ရုဟိရမက္ခိတင်္ဂေါ, ပစ္စာဂမာသိံ သကံ [သ သကံ (သျာ။ က။),’ထ သကံ (?)] နိကေတံ၊
တသ္မာ အဟံပေါသထံ ပါလယာမိ, အတြိစ္ဆတာ မာ ပုနရာဂမာသိ။
ယံ နော အပုစ္ဆိတ္ထ တုဝံ ဘဒန္တေ, သဗ္ဗေဝ ဗျာကရိမှ ယထာ ပဇာနံ၊
မယမ္ပိ ပုစ္ဆာမ တုဝံ ဘဒန္တေ, ကသ္မာ ဘဝံပေါသထိကော နု ဗြဟ္မေ။
အနူပလိတ္တော မမ အဿမမှိ, ပစ္စေကဗုဒ္ဓေါ မုဟုတ္တံ နိသီဒိ၊
သော မံ အဝေဒီ ဂတိမာဂတိဉ္စ, နာမဉ္စ ဂေါတ္တံ စရဏဉ္စ သဗ္ဗံ။
ဧဝမ္ပဟံ ဝန္ဒိ န [ဧဝမ္ပဟံ နဂ္ဂဟေ (သီ။ ပီ။)] တဿ ပါဒေ, န စာပိ နံ မာနဂတေန ပုစ္ဆိံ၊
တသ္မာ အဟံပေါသထံ ပါလယာမိ, မာနော မမံ မာ ပုနရာဂမာသီတိ။
ပဉ္စုပေါသထိကဇာတကံ သတ္တမံ။
သစေ ဟိ တျာဟံ ဓနဟေတု ဂါဟိတော, မာ မံ ဝဓီ ဇီဝဂါဟံ ဂဟေတွာ၊
ရညော စ [ရညောဝ (သီ။ ပီ။)] မံ သမ္မ ဥပန္တိကံ [ဥပန္တိ (သီ။ သျာ။ ပီ။)] နေဟိ, မညေ ဓနံ လစ္ဆသိနပ္ပရူပံ။
န မေ အယံ တုယှ ဝဓာယ အဇ္ဇ, သမာဟိတော စာပဓုရေ [စာပဝရေ (သီ။ ပီ။), စာပဝရော (သျာ။)] ခုရပ္ပေါ၊
ပါသဉ္စ တျာဟံ အဓိပါတယိဿံ, ယထာသုခံ ဂစ္ဆတု မောရရာဇာ။
(ဇာ၊၁၊၂၉၄။)ယံ သတ္တ ဝဿာနိ မမာနုဗန္ဓိ, ရတ္တိန္ဒိဝံ ခုပ္ပိပါသံ သဟန္တော၊
အထ ကိဿ မံ ပါသဝသူပနီတံ, ပမုတ္တဝေ ဣစ္ဆသိ ဗန္ဓနသ္မာ။
ပါဏာတိပါတာ ဝိရတော နုသဇ္ဇ, အဘယံ နု တေ သဗ္ဗဘူတေသု ဒိန္နံ၊
ယံ မံ တုဝံ ပါသဝသူပနီတံ, ပမုတ္တဝေ ဣစ္ဆသိ ဗန္ဓနသ္မာ။
ပါဏာတိပါတာ ဝိရတဿ ဗြူဟိ, အဘယဉ္စ ယော သဗ္ဗဘူတေသု ဒေတိ၊
ပုစ္ဆာမိ တံ မောရရာဇေတမတ္ထံ, ဣတော စုတော ကိံ လဘတေ သုခံ သော။
ပါဏာတိပါတာ ဝိရတဿ ဗြူမိ, အဘယဉ္စ ယော သဗ္ဗဘူတေသု ဒေတိ၊
ဒိဋ္ဌေဝ ဓမ္မေ လဘတေ ပသံသံ, သဂ္ဂဉ္စ သော ယာတိ သရီရဘေဒါ။
န သန္တိ ဒေဝါ ဣတိ အာဟု [ဣစ္စာဟု (သီ။ ပီ။)] ဧကေ, ဣဓေဝ ဇီဝေါ ဝိဘဝံ ဥပေတိ၊
တထာ ဖလံ သုကတဒုက္ကဋာနံ, ဒတ္တုပညတ္တဉ္စ ဝဒန္တိ ဒါနံ၊
တေသံ ဝစော အရဟတံ သဒ္ဒဟာနော, တသ္မာ အဟံ သကုဏေ ဗာဓယာမိ။
စန္ဒော စ သုရိယော စ ဥဘော သုဒဿနာ, ဂစ္ဆန္တိ ဩဘာသယမန္တလိက္ခေ၊
ဣမဿ လောကဿ ပရဿ ဝါ တေ, ကထံ နု တေ အာဟု မနုဿလောကေ။
(ဇာ၊၁၊၂၉၅။)စန္ဒော စ သုရိယော စ ဥဘော သုဒဿနာ, ဂစ္ဆန္တိ ဩဘာသယမန္တလိက္ခေ၊
ပရဿ လောကဿ န တေ ဣမဿ, ဒေဝါတိ တေ အာဟု မနုဿလောကေ။
ဧတ္ထေဝ တေ နီဟတာ ဟီနဝါဒါ, အဟေတုကာ ယေ န ဝဒန္တိ ကမ္မံ၊
တထာ ဖလံ သုကတဒုက္ကဋာနံ, ဒတ္တုပညတ္တံ ယေ စ ဝဒန္တိ ဒါနံ။
အဒ္ဓါ ဟိ သစ္စံ ဝစနံ တဝေဒံ [တဝေတံ (သီ။ သျာ။ ပီ။)], ကထဉှိ ဒါနံ အဖလံ ဘဝေယျ [ဝဒေယျ (သီ။ ပီ။)]၊
တထာ ဖလံ သုကတဒုက္ကဋာနံ, ဒတ္တုပညတ္တဉ္စ ကထံ ဘဝေယျ။
ကထံကရော ကိန္တိကရော ကိမာစရံ, ကိံ သေဝမာနော ကေန တပေါဂုဏေန၊
အက္ခာဟိ [အက္ခာဟိ တံ ဒါနိ (က။)] မေ မောရရာဇေတမတ္ထံ, ယထာ အဟံ နော နိရယံ ပတေယျံ။
ယေ ကေစိ အတ္ထိ သမဏာ ပထဗျာ, ကာသာယဝတ္ထာ အနဂါရိယာ တေ၊
ပါတောဝ ပိဏ္ဍာယ စရန္တိ ကာလေ, ဝိကာလစရိယာ ဝိရတာ ဟိ သန္တော။
တေ တတ္ထ ကာလေနုပသင်္ကမိတွာ, ပုစ္ဆာဟိ ယံ တေ မနသော ပိယံ သိယာ၊
တေ တေ ပဝက္ခန္တိ ယထာပဇာနံ, ဣမဿ လောကဿ ပရဿ စတ္ထံ။
တစံဝ ဇိဏ္ဏံ ဥရဂေါ ပုရာဏံ, ပဏ္ဍူပလာသံ ဟရိတော ဒုမောဝ၊
ဧသပ္ပဟီနော မမ လုဒ္ဒဘာဝေါ, ဇဟာမဟံ လုဒ္ဒကဘာဝမဇ္ဇ။
(ဇာ၊၁၊၂၉၆။)ယေ စာပိ မေ သကုဏာ အတ္ထိ ဗဒ္ဓါ, သတာနိနေကာနိ နိဝေသနသ္မိံ၊
တေသမ္ပဟံ [တေသံ အဟံ (သျာ။ က။)] ဇီဝိတမဇ္ဇ ဒမ္မိ, မောက္ခဉ္စ တေ ပတ္တာ [ပတ္တော (သီ။), အစ္ဆ (သျာ။)] သကံ နိကေတံ။
လုဒ္ဒေါ စရီ ပါသဟတ္ထော အရညေ, ဗာဓေတု မောရာဓိပတိံ ယသဿိံ၊
ဗန္ဓိတွာ [ဗန္ဓိတွ (သီ။ ပီ။)] မောရာဓိပတိံ ယသဿိံ, ဒုက္ခာ သ ပမုစ္စိ [ဒုက္ခာ ပမုစ္စိ (သီ။), ဒုက္ခာ ပမုဉ္စိ (သျာ။ ပီ။)] ယထာဟံ ပမုတ္တောတိ။
မဟာမောရဇာတကံ အဋ္ဌမံ။
ယဒေသမာနာ ဝိစရိမှ, ပဗ္ဗတာနိ ဝနာနိ စ၊
အနွေသံ ဝိစရိံ [ဝိပုလေ (သျာ။ က။)] ဉာတီ, တေမေ အဓိဂတာ မယာ။
ဗဟုဉ္စိဒံ မူလဖလံ, ဘက္ခော စာယံ အနပ္ပကော၊
ရမ္မာ စိမာ ဂိရီနဇ္ဇော [ဂိရိနဒိယော (သီ။ ပီ။)], ဖာသုဝါသော ဘဝိဿတိ။
ဣဓေဝါဟံ ဝသိဿာမိ, သဟ သဗ္ဗေဟိ ဉာတိဘိ၊
အပ္ပေါဿုက္ကော နိရာသင်္ကီ, အသောကော အကုတောဘယော။
အညမ္ပိ [အညံ ဟိ (သီ။ ပီ။)] လေဏံ ပရိယေသ, သတ္တု နော ဣဓ ဝိဇ္ဇတိ၊
သော တစ္ဆ သူကရေ ဟန္တိ, ဣဓာဂန္တွာ ဝရံ ဝရံ။
ကော နုမှာကံ [ကော နမှာကံ (သီ။ ပီ။)] ဣဓ သတ္တု, ကော ဉာတီ သုသမာဂတေ၊
ဒုပ္ပဓံသေ [အပ္ပဓံသေ (သီ။ ပီ။)] ပဓံသေတိ, တံ မေ အက္ခာထ ပုစ္ဆိတာ။
ဥဒ္ဓဂ္ဂရာဇီ မိဂရာဇာ, ဗလီ ဒါဌာဝုဓော မိဂေါ၊
သော တစ္ဆ သူကရေ ဟန္တိ, ဣဓာဂန္တွာ ဝရံ ဝရံ။
န နော ဒါဌာ န ဝိဇ္ဇန္တိ [နု ဝိဇ္ဇန္တိ (က။)], ဗလံ ကာယေ သမောဟိတံ၊
သဗ္ဗေ သမဂ္ဂါ ဟုတွာန, ဝသံ ကာဟာမ ဧကကံ။
(ဇာ၊၁၊၂၉၇။)ဟဒယင်္ဂမံ ကဏ္ဏသုခံ, ဝါစံ ဘာသသိ တစ္ဆက၊
ယောပိ ယုဒ္ဓေ ပလာယေယျ, တမ္ပိ ပစ္ဆာ ဟနာမသေ။
ပါဏာတိပါတာ ဝိရတော နု အဇ္ဇ, အဘယံ နု တေ သဗ္ဗဘူတေသု ဒိန္နံ၊
ဒါဌာ နု တေ မိဂဝဓာယ [မိဂ ဝိရိယံ (သီ။ သျာ။ ပီ။)] န သန္တိ, ယော သံဃပတ္တော ကပဏောဝ ဈာယသိ။
န မေ ဒါဌာ န ဝိဇ္ဇန္တိ, ဗလံ ကာယေ သမောဟိတံ၊
ဉာတီ စ ဒိသွာန သာမဂ္ဂီ ဧကတော, တသ္မာ စ ဈာယာမိ ဝနမှိ ဧကကော။
ဣမဿုဒံ ယန္တိ ဒိသောဒိသံ ပုရေ, ဘယဋ္ဋိတာ လေဏဂဝေသိနော ပုထု၊
တေ ဒါနိ သင်္ဂမ္မ ဝသန္တိ ဧကတော, ယတ္ထဋ္ဌိတာ ဒုပ္ပသဟဇ္ဇ တေ မယာ။
ပရိဏာယကသမ္ပန္နာ, သဟိတာ ဧကဝါဒိနော၊
တေ မံ သမဂ္ဂါ ဟိံသေယျုံ, တသ္မာ နေသံ န ပတ္ထယေ [အပတ္ထဝေ (ပီ။)]။
ဧကောဝ ဣန္ဒော အသုရေ ဇိနာတိ, ဧကောဝ သေနော ဟန္တိ ဒိဇေ ပသယှ၊
ဧကောဝ ဗျဂ္ဃေါ မိဂသံဃပတ္တော, ဝရံ ဝရံ ဟန္တိ ဗလဉှိ တာဒိသံ။
န ဟေဝ ဣန္ဒော န သေနော, နပိ ဗျဂ္ဃေါ မိဂါဓိပေါ၊
သမဂ္ဂေ သဟိတေ ဉာတီ, န ဗျဂ္ဃေ [ဗျဂ္ဃေ စ (သီ။ ပီ။), ဗျဂ္ဃေါ န (သျာ။)] ကုရုတေ ဝသေ။
ကုမ္ဘီလကာ သကုဏကာ, သံဃိနော ဂဏစာရိနော၊
သမ္မောဒမာနာ ဧကဇ္ဈံ, ဥပ္ပတန္တိ ဍယန္တိ စ။
တေသဉ္စ ဍယမာနာနံ, ဧကေတ္ထ အပသက္ကတိ [အပဝတ္တတိ (သီ။ ပီ။)]၊
တဉ္စ သေနော နိတာဠေတိ, ဝေယျဂ္ဃိယေဝ သာ ဂတိ။
(ဇာ၊၁၊၂၉၈။)ဥဿာဟိတော ဇဋိလေန, လုဒ္ဒေနာမိသစက္ခုနာ၊
ဒါဌီ ဒါဌီသု ပက္ခန္ဒိ, မညမာနော ယထာ ပုရေ။
သာဓု သမ္ဗဟုလာ ဉာတီ, အပိ ရုက္ခာ အရညဇာ၊
သူကရေဟိ သမဂ္ဂေဟိ, ဗျဂ္ဃေါ ဧကာယနေ ဟတော။
ဗြာဟ္မဏဉ္စေဝ ဗျဂ္ဃဉ္စ, ဥဘော ဟန္တွာန သူကရာ။
အာနန္ဒိနော ပမုဒိတာ, မဟာနာဒံ ပနာဒိသုံ။
တေ သု ဥဒုမ္ဗရမူလသ္မိံ, သူကရာ သုသမာဂတာ၊
တစ္ဆကံ အဘိသိဉ္စိံသု, ‘‘တွံ နော ရာဇာသိ ဣဿရော’’တိ။
တစ္ဆသူကရဇာတကံ နဝမံ။
ဝါဏိဇာ သမိတိံ ကတွာ, နာနာရဋ္ဌတော အာဂတာ၊
ဓနာဟရာ ပက္ကမိံသု, ဧကံ ကတွာန ဂါမဏိံ။
တေ တံ ကန္တာရမာဂမ္မ, အပ္ပဘက္ခံ အနောဒကံ၊
မဟာနိဂြောဓမဒ္ဒက္ခုံ, သီတစ္ဆာယံ မနောရမံ။
တေ စ တတ္ထ နိသီဒိတွာ, တဿ ရုက္ခဿ ဆာယယာ [ဆာဒိယာ (သီ။ သျာ။ ပီ။)]၊
ဝါဏိဇာ သမစိန္တေသုံ, ဗာလာ မောဟေန ပါရုတာ။
အလ္လာယတေ [အဒ္ဒါယတေ (သီ။ ပီ။)] အယံ ရုက္ခော, အပိ ဝါရီဝ [ဝါရိ စ (သီ။ ပီ။)] သန္ဒတိ၊
ဣင်္ဃဿ ပုရိမံ သာခံ, မယံ ဆိန္ဒာမ ဝါဏိဇာ။
သာ စ ဆိန္နာဝ ပဂ္ဃရိ, အစ္ဆံ ဝါရိံ အနာဝိလံ၊
တေ တတ္ထ နှတွာ ပိဝိတွာ, ယာဝတိစ္ဆိံသု ဝါဏိဇာ။
ဒုတိယံ သမစိန္တေသုံ, ဗာလာ မောဟေန ပါရုတာ၊
ဣင်္ဃဿ ဒက္ခိဏံ သာခံ, မယံ ဆိန္ဒာမ ဝါဏိဇာ။
သာ စ ဆိန္နာဝ ပဂ္ဃရိ, သာလိမံသောဒနံ ဗဟုံ၊
အပ္ပေါဒဝဏ္ဏေ ကုမ္မာသေ, သိင်္ဂိံ ဝိဒလသူပိယော [သိင်္ဂိံ ဗိဒလသူပိယော (သီ။ ပီ။), သိင်္ဂီဝေရံ လသူပိယော (က။) သိင်္ဂီန္တိ သိင်္ဂီဝေရာဒိကံ ဥတ္တရိဘင်္ဂံ၊ ဝိဒလသူပိယောတိ မုဂ္ဂသူပါဒယော (အဋ္ဌ။) ဝိဒလံ ကလာယာဒိမှိ ဝတ္တတီတိ သက္ကတာဘိဓာနေ]။
(ဇာ၊၁၊၂၉၉။)တေ တတ္ထ ဘုတွာ ခါဒိတွာ [ဘုတွာ စ ပိဝိတွာ စ (ပီ။)], ယာဝတိစ္ဆိံသု ဝါဏိဇာ၊
တတိယံ သမစိန္တေသုံ, ဗာလာ မောဟေန ပါရုတာ၊
ဣင်္ဃဿ ပစ္ဆိမံ သာခံ, မယံ ဆိန္ဒာမ ဝါဏိဇာ။
သာ စ ဆိန္နာဝ ပဂ္ဃရိ, နာရိယော သမလင်္ကတာ၊
ဝိစိတြဝတ္ထာဘရဏာ, အာမုတ္တမဏိကုဏ္ဍလာ။
အပိ သု ဝါဏိဇာ ဧကာ, နာရိယော ပဏ္ဏဝီသတိ၊
သမန္တာ ပရိဝါရိံသု [ပရိကရိံသု (သီ။ သျာ။ ပီ။)], တဿ ရုက္ခဿ ဆာယယာ [ဆာဒိယာ (သီ။ သျာ။ ပီ။)]။
တေ တာဟိ ပရိစာရေတွာ [ပရိဝါရေတွာ (သီ။ သျာ။ ပီ။)], ယာဝတိစ္ဆိံသု ဝါဏိဇာ၊
စတုတ္ထံ သမစိန္တေသုံ, ဗာလာ မောဟေန ပါရုတာ၊
ဣင်္ဃဿ ဥတ္တရံ သာခံ, မယံ ဆိန္ဒာမ ဝါဏိဇာ။
သာ စ ဆိန္နာဝ ပဂ္ဃရိ, မုတ္တာ ဝေဠုရိယာ ဗဟူ၊
ရဇတံ ဇာတရူပဉ္စ, ကုတ္တိယော ပဋိယာနိ စ။
ကာသိကာနိ စ ဝတ္ထာနိ, ဥဒ္ဒိယာနိ စ ကမ္ဗလာ [ဥဒ္ဒိယာနေ စ ကမ္ဗလေ (သီ။ ပီ။)]၊
တေ တတ္ထ ဘာရေ ဗန္ဓိတွာ, ယာဝတိစ္ဆိံသု ဝါဏိဇာ။
ပဉ္စမံ သမစိန္တေသုံ, ဗာလာ မောဟေန ပါရုတာ၊
ဣင်္ဃဿ မူလေ [မူလံ (သီ။ ပီ။ က။)] ဆိန္ဒာမ, အပိ ဘိယျော လဘာမသေ။
အထုဋ္ဌဟိ သတ္ထဝါဟော, ယာစမာနော ကတဉ္ဇလီ၊
နိဂြောဓော ကိံ ပရဇ္ဈတိ [အပရဇ္ဈထ (သီ။), အပရဇ္ဈတိ (သျာ။ ပီ။)], ဝါဏိဇာ ဘဒ္ဒမတ္ထု တေ။
ဝါရိဒါ ပုရိမာ သာခါ, အန္နပါနဉ္စ ဒက္ခိဏာ၊
နာရိဒါ ပစ္ဆိမာ သာခါ, သဗ္ဗကာမေ စ ဥတ္တရာ၊
နိဂြောဓော ကိံ ပရဇ္ဈတိ, ဝါဏိဇာ ဘဒ္ဒမတ္ထု တေ။
ယဿ ရုက္ခဿ ဆာယာယ, နိသီဒေယျ သယေယျ ဝါ၊
န တဿ သာခံ ဘဉ္ဇေယျ, မိတ္တဒုဗ္ဘော ဟိ ပါပကော။
တေ စ တဿာနာဒိယိတွာ [တဿ အနာဒိတွာ (သီ။ သျာ။)], ဧကဿ ဝစနံ ဗဟူ၊
နိသိတာဟိ ကုဌာရီဟိ [ကုဓာရီဟိ (က။)], မူလတော နံ ဥပက္ကမုံ။
(ဇာ၊၁၊၃၀၀။)တတော နာဂါ နိက္ခမိံသု, သန္နဒ္ဓါ ပဏ္ဏဝီသတိ၊
ဓနုဂ္ဂဟာနံ တိသတာ, ဆသဟဿာ စ ဝမ္မိနော။
ဧတေ ဟနထ ဗန္ဓထ, မာ ဝေါ မုဉ္စိတ္ထ [မုစ္စိတ္ထ (ပီ။)] ဇီဝိတံ၊
ဌပေတွာ သတ္ထဝါဟံဝ, သဗ္ဗေ ဘသ္မံ [ဘသ္မီ (သီ။)] ကရောထ နေ။
တသ္မာ ဟိ ပဏ္ဍိတော ပေါသော, သမ္ပဿံ အတ္ထမတ္တနော၊
လောဘဿ န ဝသံ ဂစ္ဆေ, ဟနေယျာရိသကံ [ဟနေယျ ဒိသတံ (သီ။), ဟနေယျ ဒိသကံ (သျာ။)] မနံ။
ဧဝ [ဧတ (သီ။ ပီ။)] မာဒီနဝံ ဉတွာ, တဏှာ ဒုက္ခဿ သမ္ဘဝံ၊
ဝီတတဏှော အနာဒါနော, သတော ဘိက္ခု ပရိဗ္ဗဇေတိ။
မဟာဝါဏိဇဇာတကံ ဒသမံ။
အဗ္ဘုတော ဝတ လောကသ္မိံ, ဥပ္ပဇ္ဇိ လောမဟံသနော၊
ဒိဗ္ဗော ရထော ပါတုရဟု, ဝေဒေဟဿ ယသဿိနော။
ဒေဝပုတ္တော မဟိဒ္ဓိကော, မာတလိ [မာတလီ (သီ။)] ဒေဝသာရထိ၊
နိမန္တယိတ္ထ ရာဇာနံ, ဝေဒေဟံ မိထိလဂ္ဂဟံ။
ဧဟိမံ ရထမာရုယှ, ရာဇသေဋ္ဌ ဒိသမ္ပတိ၊
ဒေဝါ ဒဿနကာမာ တေ, တာဝတိံသာ သဣန္ဒကာ၊
သရမာနာ ဟိ တေ ဒေဝါ, သုဓမ္မာယံ သမစ္ဆရေ။
တတော စ ရာဇာ သာဓိနော [သာဓီနော (သီ။ ပီ။)], ဝေဒေဟော မိထိလဂ္ဂဟော [ပမုခေါ ရထမာရုဟိ (သီ။ ပီ။)]၊
သဟဿယုတ္တမာရုယှ [ယုတ္တံ အဘိရုယှ (သီ။)], အဂါ ဒေဝါန သန္တိကေ၊
တံ ဒေဝါ ပဋိနန္ဒိံသု, ဒိသွာ ရာဇာနမာဂတံ။
သွာဂတံ တေ မဟာရာဇ, အထော တေ အဒုရာဂတံ၊
နိသီဒ ဒါနိ ရာဇီသိ [ရာဇိသိ (သီ။ သျာ။ ပီ။)], ဒေဝရာဇဿ သန္တိကေ။
သက္ကောပိ ပဋိနန္ဒိတ္ထ, ဝေဒေဟံ မိထိလဂ္ဂဟံ၊
နိမန္တယိတ္ထ [နိမန္တယီ စ (သီ။ ပီ။)] ကာမေဟိ, အာသနေန စ ဝါသဝေါ။
(ဇာ၊၁၊၃၀၁။)သာဓု ခေါသိ အနုပ္ပတ္တော, အာဝါသံ ဝသဝတ္တိနံ၊
ဝသ ဒေဝေသု ရာဇီသိ, သဗ္ဗကာမသမိဒ္ဓိသု၊
တာဝတိံသေသု ဒေဝေသု, ဘုဉ္ဇ ကာမေ အမာနုသေ။
အဟံ ပုရေ သဂ္ဂဂတော ရမာမိ, နစ္စေဟိ ဂီတေဟိ စ ဝါဒိတေဟိ၊
သော ဒါနိ အဇ္ဇ န ရမာမိ သဂ္ဂေ, အာယုံ နု ခီဏော [ခီဏံ (သျာ။)] မရဏံ နု သန္တိကေ၊
ဥဒါဟု မူဠှောသ္မိ ဇနိန္ဒသေဋ္ဌ။
န တာယု [န စာယု (သီ။ ပီ။ က။)] ခီဏံ မရဏဉ္စ [မရဏံ တေ (သီ။ ပီ။)] ဒူရေ, န စာပိ မူဠှော နရဝီရသေဋ္ဌ၊
တုယှဉ္စ [တဝဉ္စ (သီ။ ပီ။), တဝ စ (က။)] ပုညာနိ ပရိတ္တကာနိ, ယေသံ ဝိပါကံ ဣဓ ဝေဒယိတ္ထော [ဝေဒယတော (ပီ။ က။)]။
ဝသ ဒေဝါနုဘာဝေန, ရာဇသေဋ္ဌ ဒိသမ္ပတိ၊
တာဝတိံသေသု ဒေဝေသု, ဘုဉ္ဇ ကာမေ အမာနုသေ။
ယထာ ယာစိတကံ ယာနံ, ယထာ ယာစိတကံ ဓနံ၊
ဧဝံ သမ္ပဒမေဝေတံ, ယံ ပရတော ဒါနပစ္စယာ။
န စာဟမေတမိစ္ဆာမိ, ယံ ပရတော ဒါနပစ္စယာ၊
သယံကတာနိ ပုညာနိ, တံ မေ အာဝေဏိကံ [အာဝေဏိယံ (သီ။ သျာ။ ပီ။), အာဝေနိကံ (က။)] ဓနံ။
သောဟံ ဂန္တွာ မနုဿေသု, ကာဟာမိ ကုသလံ ဗဟုံ၊
ဒါနေန သမစရိယာယ, သံယမေန ဒမေန စ၊
ယံ ကတွာ သုခိတော ဟောတိ, န စ ပစ္ဆာနုတပ္ပတိ။
ဣမာနိ တာနိ ခေတ္တာနိ, ဣမံ နိက္ခံ သုကုဏ္ဍလံ၊
ဣမာ တာ ဟရိတာနူပါ, ဣမာ နဇ္ဇော သဝန္တိယော။
ဣမာ တာ ပေါက္ခရဏီ ရမ္မာ, စက္ကဝါကပကူဇိတာ [စက္ကဝါကူပကူဇိတာ (သီ။ ပီ။)]၊
မန္ဒာလကေဟိ သဉ္ဆန္နာ, ပဒုမုပ္ပလကေဟိ စ၊
ယဿိမာနိ မမာယိံသု, ကိံ နု တေ ဒိသတံ ဂတာ။
(ဇာ၊၁၊၃၀၂။)တာနီဓ ခေတ္တာနိ သော ဘူမိဘာဂေါ, တေယေဝ အာရာမဝနုပစာရာ [တေ အာရာမာ တေ ဝန’မေ ပစာရာ (သီ။ ပီ။), တေ ယေဝ အာရာမဝနာနိ သဉ္စရာ (က။)]၊
တမေဝ မယှံ ဇနတံ အပဿတော, သုညံဝ မေ နာရဒ ခါယတေ ဒိသာ။
ဒိဋ္ဌာ မယာ ဝိမာနာနိ, ဩဘာသေန္တာ စတုဒ္ဒိသာ၊
သမ္မုခါ ဒေဝရာဇဿ, တိဒသာနဉ္စ သမ္မုခါ။
ဝုတ္ထံ မေ ဘဝနံ ဒိဗျံ [ဒိဗ္ဗံ (သီ။ ပီ။)], ဘုတ္တာ ကာမာ အမာနုသာ၊
တာဝတိံသေသု ဒေဝေသု, သဗ္ဗကာမသမိဒ္ဓိသု။
သောဟံ ဧတာဒိသံ ဟိတွာ, ပုညာယမှိ ဣဓာဂတော၊
ဓမ္မမေဝ စရိဿာမိ, နာဟံ ရဇ္ဇေန အတ္ထိကော။
အဒဏ္ဍာဝစရံ မဂ္ဂံ, သမ္မာသမ္ဗုဒ္ဓဒေသိတံ၊
တံ မဂ္ဂံ ပဋိပဇ္ဇိဿံ, ယေန ဂစ္ဆန္တိ သုဗ္ဗတာတိ။
သာဓိနဇာတကံ [သာဓိနရာဇဇာတကံ (သျာ။)] ဧကာဒသမံ။
ရာဇာ အဝေါစ ဝိဓုရံ, ဓမ္မကာမော ယုဓိဋ္ဌိလော၊
ဗြာဟ္မဏေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု [ဘုဉ္ဇေယျုံ (သီ။)] ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
ဒုလ္လဘာ ဗြာဟ္မဏာ ဒေဝ, သီလဝန္တော ဗဟုဿုတာ၊
ဝိရတာ မေထုနာ ဓမ္မာ, ယေ တေ ဘုဉ္ဇေယျု ဘောဇနံ။
ဒသ ခလု မဟာရာဇ, ယာ တာ ဗြာဟ္မဏဇာတိယော၊
တေသံ ဝိဘင်္ဂံ ဝိစယံ [ဝိစိယ (က။)], ဝိတ္ထာရေန သုဏောဟိ မေ။
ပသိဗ္ဗကေ ဂဟေတွာန, ပုဏ္ဏေ မူလဿ သံဝုတေ၊
ဩသဓိကာယော [ဩသဓိကာယေ (သျာ။ က။)] ဂန္ထေန္တိ, နှာပယန္တိ [နဟာယန္တိ (သီ။ ပီ။)] ဇပန္တိ စ။
(ဇာ၊၁၊၃၀၃။)တိကိစ္ဆကသမာ ရာဇ, တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
အပေတာ တေ စ [တေ (သီ။ ပီ။)] ဗြဟ္မညာ,
(ဣတိ ရာဇာ [ရာဇာ စ (သျာ။ က။)] ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
ကိင်္ကိဏိကာယော [ကိင်္ကဏိကာယော (က။), ကိင်္ကိဏိယော (သျာ။)] ဂဟေတွာ [ဂဟေတွာန (သီ။ သျာ။ ပီ။)], ဃောသေန္တိ ပုရတောပိ တေ၊
ပေသနာနိပိ ဂစ္ဆန္တိ, ရထစရိယာသု သိက္ခရေ။
ပရိစာရကသမာ ရာဇ, တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
အပေတာ တေ စ ဗြဟ္မညာ,
(ဣတိ ရာဇာ ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
ကမဏ္ဍလုံ ဂဟေတွာန, ဝင်္ကဒဏ္ဍဉ္စ ဗြာဟ္မဏာ၊
ပစ္စုပေဿန္တိ ရာဇာနော, ဂါမေသု နိဂမေသု စ၊
နာဒိန္နေ ဝုဋ္ဌဟိဿာမ, ဂါမမှိ ဝါ ဝနမှိ ဝါ [ဝါမမှိ စ ဝနမှိ စ (သီ။ ပီ။), ဂါမမှိ နိဂမမှိ ဝါ (သျာ။)]။
နိဂ္ဂါဟကသမာ ရာဇ, တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
အပေတာ တေ စ ဗြဟ္မညာ,
(ဣတိ ရာဇာ ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
(ဇာ၊၁၊၃၀၄။)ပရူဠှကစ္ဆနခလောမာ, ပင်္ကဒန္တာ ရဇဿိရာ၊
ဩကိဏ္ဏာ ရဇရေဏူဟိ, ယာစကာ ဝိစရန္တိ တေ။
ခါဏုဃာတသမာ ရာဇ, တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
အပေတာ တေ စ ဗြဟ္မညာ,
(ဣတိ ရာဇာ ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
ဟရီတကံ [ဟရီဋကံ (ဗဟူသု)] အာမလကံ, အမ္ဗံ ဇမ္ဗုံ ဝိဘီတကံ [အမ္ဗဇမ္ဗုဝိဘီဋကံ (သီ။ ပီ။)]၊
လဗုဇံ ဒန္တပေါဏာနိ, ဗေလုဝါ ဗဒရာနိ စ။
ရာဇာယတနံ ဥစ္ဆု-ပုဋံ, ဓူမနေတ္တံ မဓု-အဉ္ဇနံ၊
ဥစ္စာဝစာနိ ပဏိယာနိ, ဝိပဏေန္တိ ဇနာဓိပ။
ဝါဏိဇကသမာ ရာဇ, တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
(ဣတိ ရာဇာ ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
ကသိ-ဝါဏိဇ္ဇံ [ကသိံ ဝဏိဇ္ဇံ (သီ။ ပီ။)] ကာရေန္တိ, ပေါသယန္တိ အဇေဠကေ၊
ကုမာရိယော ပဝေစ္ဆန္တိ, ဝိဝါဟန္တာဝဟန္တိ စ။
သမာ အမ္ဗဋ္ဌဝေဿေဟိ, တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
အပေတာ တေ စ ဗြဟ္မညာ,
(ဣတိ ရာဇာ ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
(ဇာ၊၁၊၃၀၅။)ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
နိက္ခိတ္တဘိက္ခံ ဘုဉ္ဇန္တိ, ဂါမေသွေကေ ပုရောဟိတာ၊
ဗဟူ တေ [နေ (သျာ။ က။)] ပရိပုစ္ဆန္တိ, အဏ္ဍစ္ဆေဒါ နိလဉ္ဆကာ [တိလဉ္ဆကာ (ပီ။)]။
ပသူပိ တတ္ထ ဟညန္တိ, မဟိံသာ သူကရာ အဇာ၊
ဂေါဃာတကသမာ ရာဇ, တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
အပေတာ တေ ဗြဟ္မညာ,
(ဣတိ ရာဇာ ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
အသိစမ္မံ ဂဟေတွာန, ခဂ္ဂံ ပဂ္ဂယှ ဗြာဟ္မဏာ၊
ဝေဿပထေသု တိဋ္ဌန္တိ, သတ္ထံ အဗ္ဗာဟယန္တိပိ။
သမာ ဂေါပနိသာဒေဟိ, တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
အပေတာ တေ ဗြဟ္မညာ,
(ဣတိ ရာဇာ ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
အရညေ ကုဋိကံ ကတွာ, ကူဋာနိ ကာရယန္တိ တေ၊
သသဗိဠာရေ ဗာဓေန္တိ, အာဂေါဓာ မစ္ဆကစ္ဆပံ။
တေ လုဒ္ဒကသမာ ရာဇ [လုဒ္ဒကာ တေ မဟာရာဇ (သီ။ ပီ။)], တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
(ဇာ၊၁၊၃၀၆။)(ဣတိ ရာဇာ ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
အညေ ဓနဿ ကာမာ ဟိ, ဟေဋ္ဌာမဉ္စေ ပသက္ကိတာ [ပသက္ခိတာ (သီ။ သျာ။ ပီ။)]၊
ရာဇာနော ဥပရိ နှာယန္တိ, သောမယာဂေ ဥပဋ္ဌိတေ။
မလမဇ္ဇကသမာ ရာဇ, တေပိ ဝုစ္စန္တိ ဗြာဟ္မဏာ၊
အက္ခာတာ တေ မဟာရာဇ, တာဒိသေ နိပတာမသေ။
(ဣတိ ရာဇာ ကောရဗျော)
န တေ ဝုစ္စန္တိ ဗြာဟ္မဏာ၊
အညေ ဝိဓုရ ပရိယေသ, သီလဝန္တေ ဗဟုဿုတေ။
ဝိရတေ မေထုနာ ဓမ္မာ, ယေ မေ ဘုဉ္ဇေယျု ဘောဇနံ၊
ဒက္ခိဏံ သမ္မ ဒဿာမ, ယတ္ထ ဒိန္နံ မဟပ္ဖလံ။
အတ္ထိ ခေါ ဗြာဟ္မဏာ ဒေဝ, သီလဝန္တော ဗဟုဿုတာ၊
ဝိရတာ မေထုနာ ဓမ္မာ, ယေ တေ ဘုဉ္ဇေယျု ဘောဇနံ။
ဧကဉ္စ ဘတ္တံ ဘုဉ္ဇန္တိ, န စ မဇ္ဇံ ပိဝန္တိ တေ၊
အက္ခာတာ တေ မဟာရာဇ, တာဒိသေ နိပတာမသေ။
ဧတေ ခေါ ဗြာဟ္မဏာ ဝိဓုရ, သီလဝန္တော ဗဟုဿုတာ၊
ဧတေ ဝိဓုရ ပရိယေသ, ခိပ္ပဉ္စ နေ [ခိပ္ပံဝ နေ (က။)] နိမန္တယာတိ။
ဒသဗြာဟ္မဏဇာတကံ ဒွါဒသမံ။
֍ * ၄၉၆။ ဘိက္ခာပရမ္ပရဇာတကံ (၁၃)
သုခုမာလရူပံ ဒိသွာ [ဒိသွာန (က။ သီ။ အဋ္ဌ။)], ရဋ္ဌာ ဝိဝနမာဂတံ၊
ကူဋာဂါရဝရူပေတံ, မဟာသယနမုပါသိတံ [မုပေါစိတံ (ဗဟူသု)]။
(ဇာ၊၁၊၃၀၇။)တဿ တေ ပေမကေနာဟံ, အဒါသိံ ဝဍ္ဎမောဒနံ [ဗဒ္ဓမောဒနံ (သီ။ ပီ။)]၊
သာလီနံ ဝိစိတံ ဘတ္တံ, သုစိံ မံသူပသေစနံ။
တံ တွံ ဘတ္တံ ပဋိဂ္ဂယှ, ဗြာဟ္မဏဿ အဒါသယိ [အဒါပယိ (သီ။ သျာ။ ပီ။)]၊
အတ္တာနံ [အတ္တနာ (ပီ။ အဋ္ဌ။ ပါဌန္တရံ)] အနသိတွာန, ကောယံ ဓမ္မော နမတ္ထု တေ။
အာစရိယော ဗြာဟ္မဏော မယှံ, ကိစ္စာကိစ္စေသု ဗျာဝဋော [ဝါဝဋော (က။)]၊
ဂရု စ အာမန္တနီယော [အာမန္တဏီယော (သီ။ ပီ။)] စ, ဒါတုမရဟာမိ ဘောဇနံ။
ဗြာဟ္မဏံ ဒါနိ ပုစ္ဆာမိ, ဂေါတမံ ရာဇပူဇိတံ၊
ရာဇာ တေ ဘတ္တံ ပါဒါသိ, သုစိံ မံသူပသေစနံ။
တံ တွံ ဘတ္တံ ပဋိဂ္ဂယှ, ဣသိဿ ဘောဇနံ အဒါ၊
အခေတ္တညူသိ ဒါနဿ, ကောယံ ဓမ္မော နမတ္ထု တေ။
ဘရာမိ ပုတ္တ [ပုတ္တေ (သီ။ ပီ။)] ဒါရေ စ, ဃရေသု ဂဓိတော [ဂထိတော (သီ။ ပီ။)] အဟံ၊
ဘုဉ္ဇေ မာနုသကေ ကာမေ, အနုသာသာမိ ရာဇိနော။
အာရညိကဿ [အာရညကဿ (သီ။ ပီ။)] ဣသိနော, စိရရတ္တံ တပဿိနော၊
ဝုဍ္ဎဿ ဘာဝိတတ္တဿ, ဒါတုမရဟာမိ ဘောဇနံ။
ဣသိဉ္စ ဒါနိ ပုစ္ဆာမိ, ကိသံ ဓမနိသန္ထတံ၊
ပရူဠှကစ္ဆနခလောမံ, ပင်္ကဒန္တံ ရဇဿိရံ။
ဧကော အရညေ ဝိဟရသိ [ဝိဟာသိ (က။)], နာဝကင်္ခသိ ဇီဝိတံ၊
ဘိက္ခု ကေန တယာ သေယျော, ယဿ တွံ ဘောဇနံ အဒါ။
ခဏန္တာလုကလမ္ဗာနိ [ခဏမာလုကလမ္ဗာနိ (သျာ။ က။)], ဗိလာလိတက္ကလာနိ စ [ဗိဠာလိတက္ကဠာနိ စ (သီ။ ပီ။)]၊
ဓုနံ သာမာကနီဝါရံ, သံဃာရိယံ ပသာရိယံ [သံဟာရိယံ ပဟာရိယံ (သျာ။), သံသာရိယံ ပသာရိယံ (က။)]။
သာကံ ဘိသံ မဓုံ မံသံ, ဗဒရာမလကာနိ စ၊
တာနိ အာဟရိတွာ [အာဟတွ (သီ။ သျာ။)] ဘုဉ္ဇာမိ, အတ္ထိ မေ သော ပရိဂ္ဂဟော။
(ဇာ၊၁၊၃၀၈။)ပစန္တော အပစန္တဿ, အမမဿ သကိဉ္စနော [အကိဉ္စနော (က။)]၊
အနာဒါနဿ သာဒါနော, ဒါတုမရဟာမိ ဘောဇနံ။
ဘိက္ခုဉ္စ ဒါနိ ပုစ္ဆာမိ, တုဏှီမာသီန သုဗ္ဗတံ၊
ဣသိ တေ ဘတ္တံ ပါဒါသိ, သုစိံ မံသူပသေစနံ။
တံ တွံ ဘတ္တံ ပဋိဂ္ဂယှ, တုဏှီ ဘုဉ္ဇသိ ဧကကော၊
နာညံ ကဉ္စိ [ကိဉ္စိ (က။)] နိမန္တေသိ, ကောယံ ဓမ္မော နမတ္ထု တေ။
န ပစာမိ န ပါစေမိ, န ဆိန္ဒာမိ န ဆေဒယေ၊
တံ မံ အကိဉ္စနံ ဉတွာ, သဗ္ဗပါပေဟိ အာရတံ။
ဝါမေန ဘိက္ခမာဒါယ, ဒက္ခိဏေန ကမဏ္ဍလုံ၊
ဣသိ မေ ဘတ္တံ ပါဒါသိ, သုစိံ မံသူပသေစနံ။
ဧတေ ဟိ ဒါတုမရဟန္တိ, သမမာ သပရိဂ္ဂဟာ၊
ပစ္စနီကမဟံ မညေ, ယော ဒါတာရံ နိမန္တယေ။
အတ္ထာယ ဝတ မေ အဇ္ဇ, ဣဓာဂစ္ဆိ ရထေသဘော၊
သောဟံ အဇ္ဇ ပဇာနာမိ [ဣတော ပုဗ္ဗေ န ဇာနာမိ (သီ။ ပီ။)], ယတ္ထ ဒိန္နံ မဟပ္ဖလံ။
ရဋ္ဌေသု ဂိဒ္ဓါ ရာဇာနော, ကိစ္စာကိစ္စေသု ဗြာဟ္မဏာ၊
ဣသီ မူလဖလေ ဂိဒ္ဓါ, ဝိပ္ပမုတ္တာ စ ဘိက္ခဝေါတိ။
ဘိက္ခာပရမ္ပရဇာတကံ တေရသမံ။
တဿုဒ္ဒါနံ –
သုဝ ကိန္နရ မုက္က ခရာဇိနသော, ဘိသဇာတ မဟေသိ ကပေါတဝရော၊
အထ မောရ သတစ္ဆက ဝါဏိဇကော, အထ ရာဇ သဗြာဟ္မဏ ဘိက္ခပရန္တိ။
ပကိဏ္ဏကနိပါတံ နိဋ္ဌိတံ။
(ဇာ၊၁၊၃၀၉။)၁၅။ ဝီသတိနိပါတော
ကုတော နု အာဂစ္ဆသိ ဒုမ္မဝါသီ [ရုမ္မဝါသီ (သီ။ ပီ။)], ဩတလ္လကော ပံသုပိသာစကောဝ၊
သင်္ကာရစောဠံ ပဋိမုဉ္စ [ပဋိမုစ္စ (သီ။ ပီ။)] ကဏ္ဌေ, ကော ရေ တုဝံ ဟောသိ [ဟောဟိသိ (သီ။ ပီ။)] အဒက္ခိဏေယျော။
အန္နံ တဝေဒံ [တဝ ဣဒံ (က။ သီ။ ပီ။), တဝယိဒံ (သျာ။)] ပကတံ ယသဿိ, တံ ခဇ္ဇရေ ဘုဉ္ဇရေ ပိယျရေ စ၊
ဇာနာသိ မံ တွံ ပရဒတ္တူပဇီဝိံ, ဥတ္တိဋ္ဌပိဏ္ဍံ လဘတံ သပါကော။
အန္နံ မမေဒံ [မမ ဣဒံ (က။ သီ။ ပီ။), မမယိဒံ (သျာ။)] ပကတံ ဗြာဟ္မဏာနံ, အတ္တတ္ထာယ သဒ္ဒဟတော မမေဒံ [မမ ဣဒံ (က။ သီ။ ပီ။), မမယိဒံ (သျာ။)]၊
အပေဟိ ဧတ္တော ကိမိဓဋ္ဌိတောသိ, န မာဒိသာ တုယှံ ဒဒန္တိ ဇမ္မ။
ထလေ စ နိန္နေ စ ဝပန္တိ ဗီဇံ, အနူပခေတ္တေ ဖလမာသမာနာ [မာသသာနာ (သီ။ ပီ။), မာသိံ သမာနာ (သျာ။)]၊
ဧတာယ သဒ္ဓါယ ဒဒါဟိ ဒါနံ, အပ္ပေဝ အာရာဓယေ ဒက္ခိဏေယျေ။
ခေတ္တာနိ မယှံ ဝိဒိတာနိ လောကေ, ယေသာဟံ ဗီဇာနိ ပတိဋ္ဌပေမိ၊
ယေ ဗြာဟ္မဏာ ဇာတိမန္တူပပန္နာ, တာနီဓ ခေတ္တာနိ သုပေသလာနိ။
ဇာတိမဒေါ စ အတိမာနိတာ စ, လောဘော စ ဒေါသော စ မဒေါ စ မောဟော၊
ဧတေ အဂုဏာ ယေသု စ သန္တိ [ယေသု ဝသန္တိ (သီ။ ပီ။)] သဗ္ဗေ, တာနီဓ ခေတ္တာနိ အပေသလာနိ။
(ဇာ၊၁၊၃၁၀။)ဇာတိမဒေါ စ အတိမာနိတာ စ, လောဘော စ ဒေါသော စ မဒေါ စ မောဟော၊
ဧတေ အဂုဏာ ယေသု န သန္တိ သဗ္ဗေ, တာနီဓ ခေတ္တာနိ သုပေသလာနိ။
ကွေတ္ထ ဂတာ [ကွတ္ထ ဂတာ (သျာ။), ကတ္ထေဝ ဘဋ္ဌာ (ပီ။)] ဥပဇောတိယော စ, ဥပဇ္ဈာယော စ အထဝါ ဂဏ္ဍကုစ္ဆိ [အဏ္ဍကုစ္ဆိ (သီ။ သျာ။ ပီ။)]၊
ဣမဿ ဒဏ္ဍဉ္စ ဝဓဉ္စ ဒတွာ, ဂလေ ဂဟေတွာ ခလယာထ [ဂလယာထ (က။)] ဇမ္မံ။
ဂိရိံ နခေန ခဏသိ, အယော ဒန္တေဟိ [ဒန္တေန (သီ။ ပီ။)] ခါဒသိ၊
ဇာတဝေဒံ ပဒဟသိ, ယော ဣသိံ ပရိဘာသသိ။
ဣဒံ ဝတွာန မာတင်္ဂေါ, ဣသိ သစ္စပရက္ကမော၊
အန္တလိက္ခသ္မိံ ပက္ကာမိ [ပက္ကမိ (က။)], ဗြာဟ္မဏာနံ ဥဒိက္ခတံ။
အာဝေလ္လိတံ [အဝေဌိတံ (သီ။ ပီ။)] ပိဋ္ဌိတော ဥတ္တမင်္ဂံ, ဗာဟုံ [ဗာဟံ (သီ။ ပီ။)] ပသာရေတိ အကမ္မနေယျံ [အကမ္ပနေယျံ (က။)]၊
သေတာနိ အက္ခီနိ ယထာ မတဿ, ကော မေ ဣမံ ပုတ္တမကာသိ ဧဝံ။
ဣဓာဂမာ သမဏော ဒုမ္မဝါသီ, ဩတလ္လကော ပံသုပိသာစကောဝ၊
သင်္ကာရစောဠံ ပဋိမုဉ္စ ကဏ္ဌေ, သော တေ ဣမံ ပုတ္တမကာသိ ဧဝံ။
ကတမံ ဒိသံ အဂမာ ဘူရိပညော, အက္ခာထ မေ မာဏဝါ ဧတမတ္ထံ၊
ဂန္တွာန တံ ပဋိကရေမု အစ္စယံ, အပ္ပေဝ နံ ပုတ္တ လဘေမု ဇီဝိတံ။
(ဇာ၊၁၊၃၁၁။)ဝေဟာယသံ အဂမာ ဘူရိပညော, ပထဒ္ဓုနော ပန္နရသေဝ စန္ဒော၊
အပိ စာပိ သော ပုရိမဒိသံ အဂစ္ဆိ, သစ္စပ္ပဋိညော ဣသိ သာဓုရူပေါ။
အာဝေလ္လိတံ ပိဋ္ဌိတော ဥတ္တမင်္ဂံ, ဗာဟုံ ပသာရေတိ အကမ္မနေယျံ၊
သေတာနိ အက္ခီနိ ယထာ မတဿ, ကော မေ ဣမံ ပုတ္တမကာသိ ဧဝံ။
ယက္ခာ ဟဝေ သန္တိ မဟာနုဘာဝါ, အနွာဂတာ ဣသယော သာဓုရူပါ၊
တေ ဒုဋ္ဌစိတ္တံ ကုပိတံ ဝိဒိတွာ, ယက္ခာ ဟိ တေ ပုတ္တမကံသု ဧဝံ။
ယက္ခာ စ မေ ပုတ္တမကံသု ဧဝံ, တွညေဝ မေ မာ ကုဒ္ဓေါ [ကုဒ္ဓ (က။)] ဗြဟ္မစာရိ၊
တုမှေဝ [တုယှေဝ (က။)] ပါဒေ သရဏံ ဂတာသ္မိ, အနွာဂတာ ပုတ္တသောကေန ဘိက္ခု။
တဒေဝ ဟိ ဧတရဟိ စ မယှံ, မနောပဒေါသော န မမတ္ထိ [မမ နတ္ထိ (ပီ။)] ကောစိ၊
ပုတ္တော စ တေ ဝေဒမဒေန မတ္တော, အတ္ထံ န ဇာနာတိ အဓိစ္စ ဝေဒေ။
အဒ္ဓါ ဟဝေ ဘိက္ခု မုဟုတ္တကေန, သမ္မုယှတေဝ ပုရိသဿ သညာ၊
ဧကာပရာဓံ [ဧတာပရာဓံ (က။)] ခမ ဘူရိပည, န ပဏ္ဍိတာ ကောဓဗလာ ဘဝန္တိ။
ဣဒဉ္စ မယှံ ဥတ္တိဋ္ဌပိဏ္ဍံ, တဝ [နတ္ထိ သီ။ ပီ။ ပေါတ္ထကေသု] မဏ္ဍဗျော ဘုဉ္ဇတု အပ္ပပညော၊
ယက္ခာ စ တေ နံ [တေ ပုတ္တံ (သျာ။)] န ဝိဟေဌယေယျုံ, ပုတ္တော စ တေ ဟေဿတိ [ဟောဟိတိ (သီ။ ပီ။)] သော အရောဂေါ။
(ဇာ၊၁၊၃၁၂။)မဏ္ဍဗျ ဗာလောသိ ပရိတ္တပညော, ယော ပုညခေတ္တာနမကောဝိဒေါသိ၊
မဟက္ကသာဝေသု ဒဒါသိ ဒါနံ, ကိလိဋ္ဌကမ္မေသု အသညတေသု။
ဇဋာ စ ကေသာ အဇိနာ နိဝတ္ထာ, ဇရူဒပါနံဝ မုခံ ပရူဠှံ၊
ပဇံ ဣမံ ပဿထ ဒုမ္မရူပံ [ရုမ္မရူပိံ (သီ။ ပီ။)], န ဇဋာဇိနံ တာယတိ အပ္ပပညံ။
ယေသံ ရာဂေါ စ ဒေါသော စ, အဝိဇ္ဇာ စ ဝိရာဇိတာ၊
ခီဏာသဝါ အရဟန္တော, တေသု ဒိန္နံ မဟပ္ဖလန္တိ။
မာတင်္ဂဇာတကံ ပဌမံ။
သဗ္ဗံ နရာနံ သဖလံ သုစိဏ္ဏံ, န ကမ္မုနာ ကိဉ္စန မောဃမတ္ထိ၊
ပဿာမိ သမ္ဘူတံ မဟာနုဘာဝံ, သကမ္မုနာ ပုညဖလူပပန္နံ။
သဗ္ဗံ နရာနံ သဖလံ သုစိဏ္ဏံ, န ကမ္မုနာ ကိဉ္စန မောဃမတ္ထိ၊
ကစ္စိန္နု စိတ္တဿပိ ဧဝမေဝံ, ဣဒ္ဓေါ မနော တဿ ယထာပိ မယှံ။
သဗ္ဗံ နရာနံ သဖလံ သုစိဏ္ဏံ, န ကမ္မုနာ ကိဉ္စန မောဃမတ္ထိ၊
စိတ္တမ္ပိ ဇာနာဟိ [စိတ္တံ ဝိဇာနာဟိ (သီ။ ပီ။)] တထေဝ ဒေဝ, ဣဒ္ဓေါ မနော တဿ ယထာပိ တုယှံ။
ဘဝံ နု စိတ္တော သုတမညတော တေ, ဥဒါဟု တေ ကောစိ နံ ဧတဒက္ခာ၊
ဂါထာ သုဂီတာ န မမတ္ထိ ကင်္ခါ, ဒဒါမိ တေ ဂါမဝရံ သတဉ္စ။
(ဇာ၊၁၊၃၁၃။)န စာဟံ စိတ္တော သုတမညတော မေ, ဣသီ စ မေ ဧတမတ္ထံ အသံသိ၊
‘‘ဂန္တွာန ရညော ပဋိဂါဟိ [ပဋိဂါယိ (သျာ။ က။), ပဋိဂါယ (?)] ဂါထံ, အပိ တေ ဝရံ အတ္တမနော ဒဒေယျ’’ [အပိ နု တေ ဝရံ အတ္တမနော ဒဒေယျ (သျာ။), အပိ နု တေ အတ္တမနော ဝရံ ဒဒေ (က။)]။
ယောဇေန္တု ဝေ ရာဇရထေ, သုကတေ စိတ္တသိဗ္ဗနေ၊
ကစ္ဆံ နာဂါနံ ဗန္ဓထ, ဂီဝေယျံ ပဋိမုဉ္စထ။
အာဟညန္တု [အာဟညရေ (သျာ။)] ဘေရိမုဒိင်္ဂသင်္ခေ [သင်္ခါ (သျာ။)], သီဃာနိ ယာနာနိ စ ယောဇယန္တု၊
အဇ္ဇေဝဟံ အဿမံ တံ ဂမိဿံ, ယတ္ထေဝ ဒက္ခိဿမိသိံ နိသိန္နံ။
သုလဒ္ဓလာဘော ဝတ မေ အဟောသိ, ဂါထာ သုဂီတာ ပရိသာယ မဇ္ဈေ၊
သွာဟံ ဣသိံ သီလဝတူပပန္နံ, ဒိသွာ ပတီတော သုမနောဟမသ္မိ။
အာသနံ ဥဒကံ ပဇ္ဇံ, ပဋိဂ္ဂဏှာတု နော ဘဝံ၊
အဂ္ဃေ ဘဝန္တံ ပုစ္ဆာမ, အဂ္ဃံ ကုရုတု နော ဘဝံ။
ရမ္မဉ္စ တေ အာဝသထံ ကရောန္တု, နာရီဂဏေဟိ ပရိစာရယဿု၊
ကရောဟိ ဩကာသမနုဂ္ဂဟာယ, ဥဘောပိ မံ ဣဿရိယံ ကရောမ။
ဒိသွာ ဖလံ ဒုစ္စရိတဿ ရာဇ, အထော သုစိဏ္ဏဿ မဟာဝိပါကံ၊
အတ္တာနမေဝ ပဋိသံယမိဿံ, န ပတ္ထယေ ပုတ္တ [ပုတ္တံ (သီ။ ပီ။)] ပသုံ ဓနံ ဝါ။
ဒသေဝိမာ ဝဿဒသာ, မစ္စာနံ ဣဓ ဇီဝိတံ၊
အပတ္တညေဝ တံ ဩဓိံ, နဠော ဆိန္နောဝ သုဿတိ။
(ဇာ၊၁၊၃၁၄။)တတ္ထ ကာ နန္ဒိ ကာ ခိဍ္ဍာ, ကာ ရတီ ကာ ဓနေသနာ၊
ကိံ မေ ပုတ္တေဟိ ဒါရေဟိ, ရာဇ မုတ္တောသ္မိ ဗန္ဓနာ။
သောဟံ ဧဝံ ပဇာနာမိ [သော အဟံ သုပ္ပဇာနာမိ (သီ။ ပီ။)], မစ္စု မေ နပ္ပမဇ္ဇတိ၊
အန္တကေနာဓိပန္နဿ, ကာ ရတီ ကာ ဓနေသနာ။
ဇာတိ နရာနံ အဓမာ ဇနိန္ဒ, စဏ္ဍာလယောနိ ဒွိပဒါကနိဋ္ဌာ [ဒိပဒါကနိဋ္ဌာ (သီ။ ပီ။)]၊
သကေဟိ ကမ္မေဟိ သုပါပကေဟိ, စဏ္ဍာလဂဗ္ဘေ [စဏ္ဍာလိဂဗ္ဘေ (သျာ။)] အဝသိမှ ပုဗ္ဗေ။
စဏ္ဍာလာဟုမှ အဝန္တီသု, မိဂါ နေရဉ္ဇရံ ပတိ၊
ဥက္ကုသာ နမ္မဒါတီရေ [ရမ္မဒါတီရေ (သျာ။ က။)], တျဇ္ဇ ဗြာဟ္မဏခတ္တိယာ။
ဥပနီယတိ ဇီဝိတမပ္ပမာယု, ဇရူပနီတဿ န သန္တိ တာဏာ၊
ကရောဟိ ပဉ္စာလ မမေတ [မမေဝ (သျာ။ က။)] ဝါကျံ, မာကာသိ ကမ္မာနိ ဒုက္ခုဒြယာနိ။
ဥပနီယတိ ဇီဝိတမပ္ပမာယု, ဇရူပနီတဿ န သန္တိ တာဏာ၊
ကရောဟိ ပဉ္စာလ မမေတ ဝါကျံ, မာကာသိ ကမ္မာနိ ဒုက္ခပ္ဖလာနိ။
ဥပနီယတိ ဇီဝိတမပ္ပမာယု, ဇရူပနီတဿ န သန္တိ တာဏာ၊
ကရောဟိ ပဉ္စာလ မမေတ ဝါကျံ, မာကာသိ ကမ္မာနိ ရဇဿိရာနိ။
ဥပနီယတိ ဇီဝိတမပ္ပမာယု, ဝဏ္ဏံ ဇရာ ဟန္တိ နရဿ ဇိယျတော၊
ကရောဟိ ပဉ္စာလ မမေတ ဝါကျံ, မာကာသိ ကမ္မံ နိရယူပပတ္တိယာ။
(ဇာ၊၁၊၃၁၅။)အဒ္ဓါ ဟိ သစ္စံ ဝစနံ တဝေတံ, ယထာ ဣသီ ဘာသသိ ဧဝမေတံ၊
ကာမာ စ မေ သန္တိ အနပ္ပရူပါ, တေ ဒုစ္စဇာ မာဒိသကေန ဘိက္ခု။
နာဂေါ ယထာ ပင်္ကမဇ္ဈေ ဗျသန္နော, ပဿံ ထလံ နာဘိသမ္ဘောတိ ဂန္တုံ၊
ဧဝမ္ပဟံ [ဧဝမဟံ (သျာ။)] ကာမပင်္ကေ ဗျသန္နော, န ဘိက္ခုနော မဂ္ဂမနုဗ္ဗဇာမိ။
ယထာပိ မာတာ စ ပိတာ စ ပုတ္တံ, အနုသာသရေ ကိန္တိ သုခီ ဘဝေယျ၊
ဧဝမ္ပိ မံ တွံ အနုသာသ ဘန္တေ, ယထာ စိရံ [ယမာစရံ (သီ။ ပီ။ က။ အဋ္ဌ။)] ပေစ္စ သုခီ ဘဝေယျံ။
နော စေ တုဝံ ဥဿဟသေ ဇနိန္ဒ, ကာမေ ဣမေ မာနုသကေ ပဟာတုံ၊
ဓမ္မိံ [ဓမ္မံ (သီ။ ပီ။)] ဗလိံ ပဋ္ဌပယဿု ရာဇ, အဓမ္မကာရော တဝ [အဓမ္မကာရော စ တေ (သီ။ သျာ။ ပီ။)] မာဟု ရဋ္ဌေ။
ဒူတာ ဝိဓာဝန္တု ဒိသာ စတဿော, နိမန္တကာ သမဏဗြာဟ္မဏာနံ၊
တေ အန္နပါနေန ဥပဋ္ဌဟဿု, ဝတ္ထေန သေနာသနပစ္စယေန စ။
အန္နေန ပါနေန ပသန္နစိတ္တော, သန္တပ္ပယ သမဏဗြာဟ္မဏေ စ၊
ဒတွာ စ ဘုတွာ စ ယထာနုဘာဝံ, အနိန္ဒိတော သဂ္ဂမုပေဟိ [မုပေတိ (ပီ။ က။)] ဌာနံ။
သစေ စ တံ ရာဇ မဒေါ သဟေယျ, နာရီဂဏေဟိ ပရိစာရယန္တံ၊
ဣမမေဝ ဂါထံ မနသီ ကရောဟိ, ဘာသေသိ [ဘာသေဟိ (သျာ။ ပီ။ က။)] စေနံ ပရိသာယ မဇ္ဈေ။
(ဇာ၊၁၊၃၁၆။)အဗ္ဘောကာသသယော ဇန္တု, ဝဇန္တျာ ခီရပါယိတော၊
ပရိကိဏ္ဏော သုဝါနေဟိ [သုပိနေဟိ (သီ။ ပီ။)], သွာဇ္ဇ ရာဇာတိ ဝုစ္စတီတိ။
စိတ္တသမ္ဘူတဇာတကံ ဒုတိယံ။
ဒူရေ အပဿံ ထေရောဝ, စက္ခုံ ယာစိတုမာဂတော၊
ဧကနေတ္တာ ဘဝိဿာမ, စက္ခုံ မေ ဒေဟိ ယာစိတော။
ကေနာနုသိဋ္ဌော ဣဓ မာဂတောသိ, ဝနိဗ္ဗက [ဝဏိဗ္ဗက (သီ။)] စက္ခုပထာနိ ယာစိတုံ၊
သုဒုစ္စဇံ ယာစသိ ဥတ္တမင်္ဂံ, ယမာဟု နေတ္တံ ပုရိသေန ဒုစ္စဇံ။
ယမာဟု ဒေဝေသု သုဇမ္ပတီတိ, မဃဝါတိ နံ အာဟု မနုဿလောကေ၊
တေနာနုသိဋ္ဌော ဣဓ မာဂတောသ္မိ, ဝနိဗ္ဗကော စက္ခုပထာနိ ယာစိတုံ။
ဝနိဗ္ဗတော [ဝနိဗ္ဗကော (သျာ။ ပီ။)] မယှ ဝနိံ [ဝနံ (က။), ဝဏိံ (သီ။ သျာ။ ပီ။)] အနုတ္တရံ, ဒဒါဟိ တေ စက္ခုပထာနိ ယာစိတော၊
ဒဒါဟိ မေ စက္ခုပထံ အနုတ္တရံ, ယမာဟု နေတ္တံ ပုရိသေန ဒုစ္စဇံ။
ယေန အတ္ထေန အာဂစ္ဆိ [အာဂဉ္ဆိ (သီ။ ပီ။)], ယမတ္ထမဘိပတ္ထယံ၊
တေ တေ ဣဇ္ဈန္တု သင်္ကပ္ပါ, လဘ စက္ခူနိ ဗြာဟ္မဏ။
ဧကံ တေ ယာစမာနဿ, ဥဘယာနိ ဒဒါမဟံ၊
သ စက္ခုမာ ဂစ္ဆ ဇနဿ ပေက္ခတော, ယဒိစ္ဆသေ တွံ တဒတေ သမိဇ္ဈတု။
(ဇာ၊၁၊၃၁၇။)မာ နော ဒေဝ အဒါ စက္ခုံ, မာ နော သဗ္ဗေ ပရာကရိ [ပရက္ကရိ (သျာ။ က။ အဋ္ဌ။), ပရိက္ကရိ (က။) ပရိ + အာ + ကရိ = ပရာကရိ]၊
ဓနံ ဒေဟိ မဟာရာဇ, မုတ္တာ ဝေဠုရိယာ ဗဟူ။
ယုတ္တေ ဒေဝ ရထေ ဒေဟိ, အာဇာနီယေ စလင်္ကတေ၊
နာဂေ ဒေဟိ မဟာရာဇ, ဟေမကပ္ပနဝါသသေ။
ယထာ တံ သိဝယော [သီဝိယော (သျာ။)] သဗ္ဗေ, သယောဂ္ဂါ သရထာ သဒါ၊
သမန္တာ ပရိကိရေယျုံ [ပရိကရေယျုံ (သျာ။ ပီ။)], ဧဝံ ဒေဟိ ရထေသဘ။
ယော ဝေ ဒဿန္တိ ဝတွာန, အဒါနေ ကုရုတေ မနော၊
ဘူမျံ [ဘူမျာ (သီ။ ပီ။)] သော ပတိတံ ပါသံ, ဂီဝါယံ ပဋိမုဉ္စတိ။
ယော ဝေ ဒဿန္တိ ဝတွာန, အဒါနေ ကုရုတေ မနော၊
ပါပါ ပါပတရော ဟောတိ, သမ္ပတ္တော ယမသာဓနံ။
ယဉှိ ယာစေ တဉှိ ဒဒေ, ယံ န ယာစေ န တံ ဒဒေ၊
သွာဟံ တမေဝ ဒဿာမိ, ယံ မံ ယာစတိ ဗြာဟ္မဏော။
အာယုံ နု ဝဏ္ဏံ နု သုခံ ဗလံ နု, ကိံ ပတ္ထယာနော နု ဇနိန္ဒ ဒေသိ၊
ကထဉှိ ရာဇာ သိဝိနံ အနုတ္တရော, စက္ခူနိ ဒဇ္ဇာ ပရလောကဟေတု။
န ဝါဟမေတံ ယသသာ ဒဒါမိ, န ပုတ္တမိစ္ဆေ န ဓနံ န ရဋ္ဌံ၊
သတဉ္စ ဓမ္မော စရိတော ပုရာဏော, ဣစ္စေဝ ဒါနေ ရမတေ မနော မမ [မမံ (သီ။ ပီ။)]။
သခါ စ မိတ္တော စ မမာသိ သီဝိက [သီဝက (သီ။ ပီ။)], သုသိက္ခိတော သာဓု ကရောဟိ မေ ဝစော၊
ဥဒ္ဓရိတွာ [ဥဒ္ဓတွ (သီ။), လဒ္ဓ တွံ (ပီ။)] စက္ခူနိ မမံ ဇိဂီသတော, ဟတ္ထေသု ဌပေဟိ [အာဝေသိ (သီ။)] ဝနိဗ္ဗကဿ။
(ဇာ၊၁၊၃၁၈။)စောဒိတော သိဝိရာဇေန, သိဝိကော ဝစနင်္ကရော၊
ရညော စက္ခူနုဒ္ဓရိတွာ [စက္ခူနိ ဥဒ္ဓတွာ (သီ။ ပီ။)], ဗြာဟ္မဏဿူပနာမယိ၊
သစက္ခု ဗြာဟ္မဏော အာသိ, အန္ဓော ရာဇာ ဥပါဝိသိ။
တတော သော ကတိပါဟဿ, ဥပရူဠှေသု စက္ခုသု၊
သူတံ အာမန္တယီ ရာဇာ, သိဝီနံ ရဋ္ဌဝဍ္ဎနော။
ယောဇေဟိ သာရထိ ယာနံ, ယုတ္တဉ္စ ပဋိဝေဒယ၊
ဥယျာနဘူမိံ ဂစ္ဆာမ, ပေါက္ခရညော ဝနာနိ စ။
သော စ ပေါက္ခရဏီတီရေ [ပေါက္ခရဏိယာ တီရေ (သီ။ ပီ။)], ပလ္လင်္ကေန ဥပါဝိသိ၊
တဿ သက္ကော ပါတုရဟု, ဒေဝရာဇာ သုဇမ္ပတိ။
သက္ကောဟမသ္မိ ဒေဝိန္ဒော, အာဂတောသ္မိ တဝန္တိကေ၊
ဝရံ ဝရဿု ရာဇီသိ, ယံ ကိဉ္စိ မနသိစ္ဆသိ။
ပဟူတံ မေ ဓနံ သက္က, ဗလံ ကောသော စနပ္ပကော၊
အန္ဓဿ မေ သတော ဒါနိ, မရဏညေဝ ရုစ္စတိ။
ယာနိ သစ္စာနိ ဒွိပဒိန္ဒ, တာနိ ဘာသဿု ခတ္တိယ၊
သစ္စံ တေ ဘဏမာနဿ, ပုန စက္ခု ဘဝိဿတိ။
ယေ မံ ယာစိတုမာယန္တိ, နာနာဂေါတ္တာ ဝနိဗ္ဗကာ၊
ယောပိ မံ ယာစတေ တတ္ထ, သောပိ မေ မနသော ပိယော၊
ဧတေန သစ္စဝဇ္ဇေန, စက္ခု မေ ဥပပဇ္ဇထ။
ယံ မံ သော ယာစိတုံ အာဂါ, ဒေဟိ စက္ခုန္တိ ဗြာဟ္မဏော၊
တဿ စက္ခူနိ ပါဒါသိံ, ဗြာဟ္မဏဿ ဝနိဗ္ဗတော [ဝဏိဗ္ဗိနော (သီ။), ဝနိဗ္ဗိနော (ပီ။)]။
ဘိယျော မံ အာဝိသီ ပီတိ, သောမနဿဉ္စနပ္ပကံ၊
ဧတေန သစ္စဝဇ္ဇေန, ဒုတိယံ မေ ဥပပဇ္ဇထ။
ဓမ္မေန ဘာသိတာ ဂါထာ, သိဝီနံ ရဋ္ဌဝဍ္ဎန၊
ဧတာနိ တဝ နေတ္တာနိ, ဒိဗ္ဗာနိ ပဋိဒိဿရေ။
တိရောကုဋ္ဋံ တိရောသေလံ, သမတိဂ္ဂယှ ပဗ္ဗတံ၊
သမန္တာ ယောဇနသတံ, ဒဿနံ အနုဘောန္တု တေ။
(ဇာ၊၁၊၃၁၉။)ကော နီဓ ဝိတ္တံ န ဒဒေယျ ယာစိတော, အပိ ဝိသိဋ္ဌံ သုပိယမ္ပိ အတ္တနော၊
တဒိင်္ဃ သဗ္ဗေ သိဝယော သမာဂတာ, ဒိဗ္ဗာနိ နေတ္တာနိ မမဇ္ဇ ပဿထ။
တိရောကုဋ္ဋံ တိရောသေလံ, သမတိဂ္ဂယှ ပဗ္ဗတံ၊
သမန္တာ ယောဇနသတံ, ဒဿနံ အနုဘောန္တိ မေ။
န စာဂမတ္တာ ပရမတ္ထိ ကိဉ္စိ, မစ္စာနံ ဣဓ ဇီဝိတေ၊
ဒတွာန မာနုသံ [ဒတွာ မာနုသကံ (သီ။)] စက္ခုံ, လဒ္ဓံ မေ [မေ ဣတိ ပဒံ နတ္ထိ သီ။ ပေါတ္ထကေ] စက္ခုံ အမာနုသံ။
ဧတမ္ပိ ဒိသွာ သိဝယော, ဒေထ ဒါနာနိ ဘုဉ္ဇထ၊
ဒတွာ စ ဘုတွာ စ ယထာနုဘာဝံ, အနိန္ဒိတာ သဂ္ဂမုပေထ ဌာနန္တိ။
သိဝိဇာတကံ တတိယံ။
ပညာယုပေတံ သိရိယာ ဝိဟီနံ, ယသဿိနံ ဝါပိ အပေတပညံ၊
ပုစ္ဆာမိ တံ သေနက ဧတမတ္ထံ, ကမေတ္ထ သေယျော ကုသလာ ဝဒန္တိ။
ဓီရာ စ ဗာလာ စ ဟဝေ ဇနိန္ဒ, သိပ္ပူပပန္နာ စ အသိပ္ပိနော စ၊
သုဇာတိမန္တောပိ အဇာတိမဿ, ယသဿိနော ပေသကရာ [ပေဿကရာ (သီ။ ပီ။)] ဘဝန္တိ၊
ဧတမ္ပိ ဒိသွာန အဟံ ဝဒါမိ, ပညော နိဟီနော သိရီမာဝ [သိရိမာဝ (သီ။ သျာ။ ပီ။)] သေယျော။
တုဝမ္ပိ ပုစ္ဆာမိ အနောမပည, မဟောသဓ ကေဝလဓမ္မဒဿိ၊
ဗာလံ ယသဿိံ ပဏ္ဍိတံ အပ္ပဘောဂံ, ကမေတ္ထ သေယျော ကုသလာ ဝဒန္တိ။
(ဇာ၊၁၊၃၂၀။)ပါပါနိ ကမ္မာနိ ကရောတိ ဗာလော [ကရောန္တိ ဗာလာ (သျာ။ က။)], ဣဓမေဝ [ဣဒမေဝ (သျာ။ က။ အဋ္ဌ။), ဣမမေဝ (က။)] သေယျော ဣတိ မညမာနော [မညမာနာ (သျာ။ က။)]၊
ဣဓလောကဒဿီ ပရလောကမဒဿီ, ဥဘယတ္ထ ဗာလော ကလိမဂ္ဂဟေသိ၊
ဧတမ္ပိ ဒိသွာန အဟံ ဝဒါမိ, ပညောဝ သေယျော န ယသဿိ ဗာလော။
န သိပ္ပမေတံ ဝိဒဓာတိ ဘောဂံ, န ဗန္ဓုဝါ [န ဗန္ဓဝါ (သီ။ သျာ။ က။)] န သရီရဝဏ္ဏော ယော [န သရီရာဝကာသော (သီ။ သျာ။ ပီ။)]၊
ပဿေဠမူဂံ သုခမေဓမာနံ, သိရီ ဟိ နံ ဘဇတေ ဂေါရဝိန္ဒံ [ဂေါရိမန္ဒံ (သီ။ ပီ။)]၊
ဧတမ္ပိ ဒိသွာန အဟံ ဝဒါမိ, ပညော နိဟီနော သိရီမာဝ သေယျော။
လဒ္ဓါ သုခံ မဇ္ဇတိ အပ္ပပညော, ဒုက္ခေန ဖုဋ္ဌောပိ ပမောဟမေတိ၊
အာဂန္တုနာ ဒုက္ခသုခေန ဖုဋ္ဌော, ပဝေဓတိ ဝါရိစရောဝ ဃမ္မေ၊
ဧတမ္ပိ ဒိသွာန အဟံ ဝဒါမိ, ပညောဝ သေယျော န ယသဿိ ဗာလော။
ဒုမံ ယထာ သာဒုဖလံ အရညေ, သမန္တတော သမဘိသရန္တိ [သမဘိစရန္တိ (သီ။ ပီ။)] ပက္ခီ၊
ဧဝမ္ပိ အဍ္ဎံ သဓနံ သဘောဂံ, ဗဟုဇ္ဇနော ဘဇတိ အတ္ထဟေတု၊
ဧတမ္ပိ ဒိသွာန အဟံ ဝဒါမိ, ပညော နိဟီနော သိရီမာဝ သေယျော။
န သာဓု ဗလဝါ ဗာလော, သာဟသာ ဝိန္ဒတေ ဓနံ၊
ကန္ဒန္တမေတံ ဒုမ္မေဓံ, ကဍ္ဎန္တိ နိရယံ ဘုသံ၊
ဧတမ္ပိ ဒိသွာန အဟံ ဝဒါမိ, ပညောဝ သေယျော န ယသဿိ ဗာလော။
(ဇာ၊၁၊၃၂၁။)ယာ ကာစိ နဇ္ဇော ဂင်္ဂမဘိဿဝန္တိ, သဗ္ဗာဝ တာ နာမဂေါတ္တံ ဇဟန္တိ၊
ဂင်္ဂါ သမုဒ္ဒံ ပဋိပဇ္ဇမာနာ, န ခါယတေ ဣဒ္ဓိံ ပညောပိ လောကေ [ဣဒ္ဓိပရော ဟိ လောကေ (က။ သီ။ သျာ။), ဣဒ္ဓိပရော ဟိ လောကော (သီ။ ပီ။ အဋ္ဌ။)]၊
ဧတမ္ပိ ဒိသွာန အဟံ ဝဒါမိ, ပညော နိဟီနော သိရီမာဝ သေယျော။
ယမေတမက္ခာ ဥဒဓိံ မဟန္တံ, သဝန္တိ နဇ္ဇော သဗ္ဗကာလမသင်္ချံ၊
သော သာဂရော နိစ္စမုဠာရဝေဂေါ, ဝေလံ န အစ္စေတိ မဟာသမုဒ္ဒေါ။
ဧဝမ္ပိ ဗာလဿ ပဇပ္ပိတာနိ, ပညံ န အစ္စေတိ သိရီ ကဒါစိ၊
ဧတမ္ပိ ဒိသွာန အဟံ ဝဒါမိ, ပညောဝ သေယျော န ယသဿိ ဗာလော။
အသညတော စေပိ ပရေသမတ္ထံ, ဘဏာတိ သန္ဓာနဂတော [သဏ္ဌာနဂတော (သျာ။ ပီ။), သန္ထာနဂတော (သီ။)] ယသဿီ၊
တဿေဝ တံ ရူဟတိ ဉာတိမဇ္ဈေ, သိရီ ဟိ နံ [သိရိဟီနံ (သီ။ က။), သိရီဟီနံ (သျာ။ ပီ။)] ကာရယတေ န ပညာ [န ပညော (သီ။), န ပညံ (သျာ။ က။)]၊
ဧတမ္ပိ ဒိသွာန အဟံ ဝဒါမိ, ပညော နိဟီနော သိရီမာဝ သေယျော။
ပရဿ ဝါ အတ္တနော ဝါပိ ဟေတု, ဗာလော မုသာ ဘာသတိ အပ္ပပညော၊
သော နိန္ဒိတော ဟောတိ သဘာယ မဇ္ဈေ, ပစ္ဆာပိ [ပေစ္စမ္ပိ (သီ။ ပီ။), ပေစ္စာပိ (?)] သော ဒုဂ္ဂတိဂါမီ ဟောတိ၊
ဧတမ္ပိ ဒိသွာန အဟံ ဝဒါမိ, ပညောဝ သေယျော န ယသဿိ ဗာလော။
(ဇာ၊၁၊၃၂၂။)အတ္ထမ္ပိ စေ ဘာသတိ ဘူရိပညော, အနာဠှိယော [အနာလယော (ပီ။)] အပ္ပဓနော ဒလိဒ္ဒေါ၊
န တဿ တံ ရူဟတိ ဉာတိမဇ္ဈေ, သိရီ စ ပညာဏဝတော န ဟောတိ၊
ဧတမ္ပိ ဒိသွာန အဟံ ဝဒါမိ, ပညော နိဟီနော သိရီမာဝ သေယျော။
ပရဿ ဝါ အတ္တနော ဝါပိ ဟေတု, န ဘာသတိ အလိကံ ဘူရိပညော၊
သော ပူဇိတော ဟောတိ သဘာယ မဇ္ဈေ, ပစ္ဆာပိ သော သုဂ္ဂတိဂါမီ ဟောတိ၊
ဧတမ္ပိ ဒိသွာန အဟံ ဝဒါမိ, ပညောဝ သေယျော န ယသဿိ ဗာလော။
ဟတ္ထီ ဂဝဿာ မဏိကုဏ္ဍလာ စ, ထိယော စ ဣဒ္ဓေသု ကုလေသု ဇာတာ၊
သဗ္ဗာဝ တာ ဥပဘောဂါ ဘဝန္တိ, ဣဒ္ဓဿ ပေါသဿ အနိဒ္ဓိမန္တော၊
ဧတမ္ပိ ဒိသွာန အဟံ ဝဒါမိ, ပညော နိဟီနော သိရီမာဝ သေယျော။
အသံဝိဟိတကမ္မန္တံ, ဗာလံ ဒုမ္မေဓမန္တိနံ၊
သိရီ ဇဟတိ ဒုမ္မေဓံ, ဇိဏ္ဏံဝ ဥရဂေါ တစံ၊
ဧတမ္ပိ ဒိသွာန အဟံ ဝဒါမိ, ပညောဝ သေယျော န ယသဿိ ဗာလော။
ပဉ္စ ပဏ္ဍိတာ မယံ ဘဒ္ဒန္တေ, သဗ္ဗေ ပဉ္ဇလိကာ ဥပဋ္ဌိတာ၊
တွံ နော အဘိဘုယျ ဣဿရောသိ, သက္ကောဝ ဘူတပတိ ဒေဝရာဇာ၊
ဧတမ္ပိ ဒိသွာန အဟံ ဝဒါမိ, ပညော နိဟီနော သိရီမာဝ သေယျော။
(ဇာ၊၁၊၃၂၃။)ဒါသောဝ ပညဿ ယသဿိ ဗာလော, အတ္ထေသု ဇာတေသု တထာဝိဓေသု၊
ယံ ပဏ္ဍိတော နိပုဏံ သံဝိဓေတိ, သမ္မောဟမာပဇ္ဇတိ တတ္ထ ဗာလော၊
ဧတမ္ပိ ဒိသွာန အဟံ ဝဒါမိ, ပညောဝ သေယျော န ယသဿိ ဗာလော။
အဒ္ဓါ ဟိ ပညာဝ သတံ ပသတ္ထာ, ကန္တာ သိရီ ဘောဂရတာ မနုဿာ၊
ဉာဏဉ္စ ဗုဒ္ဓါနမတုလျရူပံ, ပညံ န အစ္စေတိ သိရီ ကဒါစိ။
ယံ တံ အပုစ္ဆိမှ အကိတ္တယီ နော, မဟောသဓ ကေဝလဓမ္မဒဿီ၊
ဂဝံ သဟဿံ ဥသဘဉ္စ နာဂံ, အာဇညယုတ္တေ စ ရထေ ဒသ ဣမေ၊
ပဉှဿ ဝေယျာကရဏေန တုဋ္ဌော, ဒဒါမိ တေ ဂါမဝရာနိ သောဠသာတိ။
သိရီမန္တဇာတကံ [သိရိမန္ဒဇာတကံ (သီ။ သျာ။ ပီ။)] စတုတ္ထံ။
ဧတေ ယူထာ ပတိယန္တိ, ဘီတာ မရဏဿ [မရဏာ (သျာ။ ပီ။), မရဏ (က။)] စိတ္တက၊
ဂစ္ဆ တုဝမ္ပိ မာကင်္ခိ, ဇီဝိဿန္တိ တယာ သဟ။
နာဟံ ရောဟဏ [ရောဟန္တ (သီ။ ပီ။), ရောဟန (သျာ။)] ဂစ္ဆာမိ, ဟဒယံ မေ အဝကဿတိ၊
န တံ အဟံ ဇဟိဿာမိ, ဣဓ ဟိဿာမိ ဇီဝိတံ။
တေ ဟိ နူန မရိဿန္တိ, အန္ဓာ အပရိဏာယကာ၊
ဂစ္ဆ တုဝမ္ပိ မာကင်္ခိ, ဇီဝိဿန္တိ တယာ သဟ။
နာဟံ ရောဟဏ ဂစ္ဆာမိ, ဟဒယံ မေ အဝကဿတိ၊
န တံ ဗဒ္ဓံ [ဗန္ဓံ (က။)] ဇဟိဿာမိ, ဣဓ ဟိဿာမိ ဇီဝိတံ။
(ဇာ၊၁၊၃၂၄။)ဂစ္ဆ ဘီရု ပလာယဿု, ကူဋေ ဗဒ္ဓေါသ္မိ အာယသေ၊
ဂစ္ဆ တုဝမ္ပိ မာကင်္ခိ, ဇီဝိဿန္တိ တယာ သဟ။
နာဟံ ရောဟဏ ဂစ္ဆာမိ, ဟဒယံ မေ အဝကဿတိ၊
န တံ အဟံ ဇဟိဿာမိ, ဣဓ ဟိဿာမိ ဇီဝိတံ။
တေ ဟိ နူန မရိဿန္တိ, အန္ဓာ အပရိဏာယကာ၊
ဂစ္ဆ တုဝမ္ပိ မာကင်္ခိ, ဇီဝိဿန္တိ တယာ သဟ။
နာဟံ ရောဟဏ ဂစ္ဆာမိ, ဟဒယံ မေ အဝကဿတိ၊
န တံ ဗဒ္ဓံ ဇဟိဿာမိ, ဣဓ ဟိဿာမိ ဇီဝိတံ။
အယံ သော လုဒ္ဒကော ဧတိ, လုဒ္ဒရူပေါ [ရုဒ္ဒရူပေါ (သီ။ ပီ။)] သဟာဝုဓော၊
ယော နော ဝဓိဿတိ အဇ္ဇ, ဥသုနာ သတ္တိယာ အပိ [မပိ (သီ။ သျာ။ ပီ။)]။
သာ မုဟုတ္တံ ပလာယိတွာ, ဘယဋ္ဋာ [ဘယဋ္ဌာ (ပီ။)] ဘယတဇ္ဇိတာ၊
သုဒုက္ကရံ အကရာ ဘီရု, မရဏာယူပနိဝတ္တထ။
ကိန္နု တေမေ မိဂါ ဟောန္တိ, မုတ္တာ ဗဒ္ဓံ ဥပါသရေ၊
န တံ စဇိတုမိစ္ဆန္တိ, ဇီဝိတဿပိ ကာရဏာ။
ဘာတရော ဟောန္တိ မေ လုဒ္ဒ, သောဒရိယာ ဧကမာတုကာ၊
န မံ စဇိတုမိစ္ဆန္တိ, ဇီဝိတဿပိ ကာရဏာ။
တေ ဟိ နူန မရိဿန္တိ, အန္ဓာ အပရိဏာယကာ၊
ပဉ္စန္နံ ဇီဝိတံ ဒေဟိ, ဘာတရံ မုဉ္စ လုဒ္ဒက။
သော ဝေါ အဟံ ပမောက္ခာမိ, မာတာပေတ္တိဘရံ မိဂံ၊
နန္ဒန္တု မာတာပိတရော, မုတ္တံ ဒိသွာ မဟာမိဂံ။
ဧဝံ လုဒ္ဒက နန္ဒဿု, သဟ သဗ္ဗေဟိ ဉာတိဘိ၊
ယထာဟမဇ္ဇ နန္ဒာမိ, မုတ္တံ ဒိသွာ မဟာမိဂံ။
ကထံ တွံ ပမောက္ခော [ကထံ ပမောက္ခော (သီ။ ပီ။), ကထံ တေ ပရောက္ခော (?)] အာသိ, ဥပနီတသ္မိ ဇီဝိတေ၊
ကထံ ပုတ္တ အမောစေသိ, ကူဋပါသမှ လုဒ္ဒကော။
ဘဏံ ကဏ္ဏသုခံ ဝါစံ, ဟဒယင်္ဂံ ဟဒယဿိတံ၊
သုဘာသိတာဟိ ဝါစာဟိ, စိတ္တကော မံ အမောစယိ။
(ဇာ၊၁၊၃၂၅။)ဘဏံ ကဏ္ဏသုခံ ဝါစံ, ဟဒယင်္ဂံ ဟဒယဿိတံ၊
သုဘာသိတာဟိ ဝါစာဟိ, သုတနာ မံ အမောစယိ။
သုတွာ ကဏ္ဏသုခံ ဝါစံ, ဟဒယင်္ဂံ ဟဒယဿိတံ၊
သုဘာသိတာနိ သုတွာန, လုဒ္ဒကော မံ အမောစယိ။
ဧဝံ အာနန္ဒိတော ဟောတု, သဟ ဒါရေဟိ လုဒ္ဒကော၊
ယထာ မယဇ္ဇ နန္ဒာမ, ဒိသွာ ရောဟဏမာဂတံ။
နနု တွံ အဝစ [အဝစာ (သီ။ ပီ။)] လုဒ္ဒ, ‘‘မိဂစမ္မာနိ အာဟရိံ’’၊
အထ ကေန နု ဝဏ္ဏေန, မိဂစမ္မာနိ နာဟရိ။
အာဂမာ စေဝ ဟတ္ထတ္ထံ, ကူဋပါသဉ္စ သော မိဂေါ၊
အဗဇ္ဈိ တံ [အဗဇ္ဈိ တဉ္စ (ပီ။)] မိဂရာဇံ, တဉ္စ မုတ္တာ ဥပါသရေ။
တဿ မေ အဟု သံဝေဂေါ, အဗ္ဘုတော လောမဟံသနော၊
ဣမဉ္စာဟံ မိဂံ ဟညေ, အဇ္ဇ ဟိဿာမိ ဇီဝိတံ။
ကီဒိသာ တေ မိဂါ လုဒ္ဒ, ကီဒိသာ ဓမ္မိကာ မိဂါ၊
ကထံဝဏ္ဏာ ကထံသီလာ, ဗာဠှံ ခေါ နေ ပသံသသိ။
ဩဒါတသိင်္ဂါ သုစိဝါဠာ, ဇာတရူပတစူပမာ၊
ပါဒါ လောဟိတကာ တေသံ, အဉ္ဇိတက္ခာ မနောရမာ။
ဧဒိသာ တေ မိဂါ ဒေဝ, ဧဒိသာ ဓမ္မိကာ မိဂါ၊
မာတာပေတ္တိဘရာ ဒေဝ, န တေ သော အဘိဟာရိတုံ [အဘိဟာရယုံ (က။ သီ။), အဘိဟာရယိံ (သျာ။), အဘိဟာရယံ (ပီ။)]။
ဒမ္မိ နိက္ခသတံ လုဒ္ဒ, ထူလဉ္စ မဏိကုဏ္ဍလံ၊
စတုဿဒဉ္စ [စတုရဿဉ္စ (သျာ။ က။)] ပလ္လင်္ကံ, ဥမာပုပ္ဖသရိန္နိဘံ [ဥမ္မာပုပ္ဖသိရိန္နိဘံ (သီ။ သျာ။ ပီ။ က။)]။
ဒွေ စ သာဒိသိယော ဘရိယာ, ဥသဘဉ္စ ဂဝံ သတံ၊
ဓမ္မေန ရဇ္ဇံ ကာရေဿံ, ဗဟုကာရော မေသိ လုဒ္ဒက။
ကသိဝါဏိဇ္ဇာ [ကသီ ဝဏိဇ္ဇာ (သီ။ သျာ။ ပီ။)] ဣဏဒါနံ, ဥဉ္ဆာစရိယာ စ လုဒ္ဒက၊
ဧတေန ဒါရံ ပေါသေဟိ, မာ ပါပံ အကရီ ပုနာတိ [အကရာ ပုနန္တိ (က။ သီ။ ပီ။)]။
ရောဟဏမိဂဇာတကံ [ရောဟန္တမိဂဇာတကံ (သီ။ ပီ။)] ပဉ္စမံ။
(ဇာ၊၁၊၃၂၆။)ဧတေ ဟံသာ ပက္ကမန္တိ, ဝက္ကင်္ဂါ ဘယမေရိတာ၊
ဟရိတ္တစ ဟေမဝဏ္ဏ, ကာမံ သုမုခ ပက္ကမ။
ဩဟာယ မံ ဉာတိဂဏာ, ဧကံ ပါသဝသံ ဂတံ၊
အနပေက္ခမာနာ [နာပေက္ခမာနာ (က။)] ဂစ္ဆန္တိ, ကိံ ဧသော အဝဟိယျသိ။
ပတေဝ ပတတံ သေဋ္ဌ, နတ္ထိ ဗဒ္ဓေ သဟာယတာ [သဟာယကာ (သျာ။)]၊
မာ အနီဃာယ ဟာပေသိ, ကာမံ သုမုခ ပက္ကမ။
နာဟံ ‘‘ဒုက္ခပရေတော’’တိ [ဒုက္ခပရေတောပိ (က။)], ဓတရဋ္ဌ တုဝံ [တဝံ (သီ။ ပီ။)] ဇဟေ၊
ဇီဝိတံ မရဏံ ဝါ မေ, တယာ သဒ္ဓိံ ဘဝိဿတိ။
ဧတဒရိယဿ ကလျာဏံ, ယံ တွံ သုမုခ ဘာသသိ၊
တဉ္စ ဝီမံသမာနောဟံ, ‘‘ပတတေတံ’’ အဝဿဇိံ။
အပဒေန ပဒံ ယာတိ, အန္တလိက္ခစရော [အန္တလိက္ခေ စရော (သီ။ ပီ။)] ဒိဇော၊
အာရာ ပါသံ န ဗုဇ္ဈိ တွံ, ဟံသာနံ ပဝရုတ္တမ [ပဝရုတ္တမော (က။ သီ။ ပီ။)]။
ယဒါ ပရာဘဝေါ ဟောတိ, ပေါသော ဇီဝိတသင်္ခယေ၊
အထ ဇာလဉ္စ ပါသဉ္စ, အာသဇ္ဇာပိ န ဗုဇ္ဈတိ။
ဧတေ ဟံသာ ပက္ကမန္တိ, ဝက္ကင်္ဂါ ဘယမေရိတာ၊
ဟရိတ္တစ ဟေမဝဏ္ဏ, တွညေဝ [တွဉ္စ တံ (သီ။), တွဉ္စ (ပီ။)] အဝဟိယျသိ။
ဧတေ ဘုတွာ စ ပိတွာ စ, ပက္ကမန္တိ ဝိဟင်္ဂမာ၊
အနပေက္ခမာနာ ဝက္ကင်္ဂါ, တွညေဝေကော ဥပါသသိ။
ကိန္နု တျာယံ [တာယံ (သီ။ သျာ။ ပီ။)] ဒိဇော ဟောတိ, မုတ္တော ဗဒ္ဓံ ဥပါသသိ၊
ဩဟာယ သကုဏာ ယန္တိ, ကိံ ဧကော အဝဟိယျသိ။
ရာဇာ မေ သော ဒိဇော မိတ္တော, သခါ ပါဏသမော စ မေ၊
နေဝ နံ ဝိဇဟိဿာမိ, ယာဝ ကာလဿ ပရိယာယံ။
ယော စ တွံ သခိနော ဟေတု, ပါဏံ စဇိတုမိစ္ဆသိ၊
သော တေ သဟာယံ မုဉ္စာမိ, ဟောတု ရာဇာ တဝါနုဂေါ။
(ဇာ၊၁၊၃၂၇။)ဧဝံ လုဒ္ဒက နန္ဒဿု, သဟ သဗ္ဗေဟိ ဉာတိဘိ၊
ယထာဟမဇ္ဇ နန္ဒာမိ, ဒိသွာ မုတ္တံ ဒိဇာဓိပံ။
ကစ္စိန္နု ဘောတော ကုသလံ, ကစ္စိ ဘောတော အနာမယံ၊
ကစ္စိ ရဋ္ဌမိဒံ ဖီတံ, ဓမ္မေန မနုသာသသိ။
ကုသလဉ္စေဝ မေ ဟံသ, အထော ဟံသ အနာမယံ၊
အထော ရဋ္ဌမိဒံ ဖီတံ, ဓမ္မေန မနုသာသဟံ။
ကစ္စိ ဘောတော အမစ္စေသု, ဒေါသော ကောစိ န ဝိဇ္ဇတိ၊
ကစ္စိ အာရာ အမိတ္တာ တေ, ဆာယာ ဒက္ခိဏတောရိဝ။
အထောပိ မေ အမစ္စေသု, ဒေါသော ကောစိ န ဝိဇ္ဇတိ၊
အထော အာရာ အမိတ္တာ မေ, ဆာယာ ဒက္ခိဏတောရိဝ။
ကစ္စိ တေ သာဒိသီ ဘရိယာ, အဿဝါ ပိယဘာဏိနီ၊
ပုတ္တရူပယသူပေတာ, တဝ ဆန္ဒဝသာနုဂါ။
အထော မေ သာဒိသီ ဘရိယာ, အဿဝါ ပိယဘာဏိနီ၊
ပုတ္တရူပယသူပေတာ, မမ ဆန္ဒဝသာနုဂါ။
ကစ္စိ တေ ဗဟဝေါ ပုတ္တာ, သုဇာတာ ရဋ္ဌဝဍ္ဎန၊
ပညာဇဝေန သမ္ပန္နာ, သမ္မောဒန္တိ တတော တတော။
သတမေကော စ မေ ပုတ္တာ, ဓတရဋ္ဌ မယာ သုတာ၊
တေသံ တွံ ကိစ္စမက္ခာဟိ, နာဝရုဇ္ဈန္တိ [နာဝရဇ္ဈန္တိ (က။ သီ။ ပီ။)] တေ ဝစော။
ဥပပန္နောပိ စေ ဟောတိ, ဇာတိယာ ဝိနယေန ဝါ၊
အထ ပစ္ဆာ ကုရုတေ ယောဂံ, ကိစ္ဆေ [ကိစ္စေ (သီ။ သျာ။ ပီ။)] အာပါသု [အာဝါသု (သျာ။), အာပဒါသု (က။)] သီဒတိ။
တဿ သံဟီရပညဿ, ဝိဝရော ဇာယတေ မဟာ၊
ရတ္တိမန္ဓောဝ [နတ္တမန္ဓောဝ (သီ။ ပီ။)] ရူပါနိ, ထူလာနိ မနုပဿတိ။
အသာရေ သာရယောဂညူ, မတိံ န တွေဝ ဝိန္ဒတိ၊
သရဘောဝ ဂိရိဒုဂ္ဂသ္မိံ, အန္တရာယေဝ သီဒတိ။
ဟီနဇစ္စောပိ စေ ဟောတိ, ဥဋ္ဌာတာ ဓိတိမာ နရော၊
အာစာရသီလသမ္ပန္နော, နိသေ အဂ္ဂီဝ ဘာသတိ။
(ဇာ၊၁၊၃၂၈။)ဧတံ မေ ဥပမံ ကတွာ, ပုတ္တေ ဝိဇ္ဇာသု ဝါစယ [ဌာပသ (သျာ။ က။)]၊
သံဝိရူဠှေထ မေဓာဝီ, ခေတ္တေ ဗီဇံဝ [ခေတ္တဗီဇံဝ (သီ။ ပီ။)] ဝုဋ္ဌိယာတိ။
စူဠဟံသဇာတကံ ဆဋ္ဌံ။
မိဂလုဒ္ဒေါ မဟာရာဇာ, ပဉ္စာလာနံ ရထေသဘော၊
နိက္ခန္တော သဟ သေနာယ, ဩဂဏော ဝနမာဂမာ။
တတ္ထဒ္ဒသာ အရညသ္မိံ, တက္ကရာနံ ကုဋိံ ကတံ၊
တဿာ [တသ္မာ (သျာ။ ပီ။ က။)] ကုဋိယာ နိက္ခမ္မ, သုဝေါ လုဒ္ဒါနိ ဘာသတိ။
သမ္ပန္နဝါဟနော ပေါသော, ယုဝါ သမ္မဋ္ဌကုဏ္ဍလော [ကုဏ္ဍလီ (သျာ။ က။)]၊
သောဘတိ လောဟိတုဏှီသော, ဒိဝါ သူရိယောဝ ဘာသတိ။
မဇ္ဈနှိကေ [မဇ္ဈန္တိကေ (သဗ္ဗတ္ထ)] သမ္ပတိကေ, သုတ္တော ရာဇာ သသာရထိ၊
ဟန္ဒဿာဘရဏံ သဗ္ဗံ, ဂဏှာမ သာဟသာ [သဟသာ (သီ။ သျာ။ ပီ။)] မယံ။
နိသီထေပိ ရဟော ဒါနိ, သုတ္တော ရာဇာ သသာရထိ၊
အာဒါယ ဝတ္ထံ မဏိကုဏ္ဍလဉ္စ, ဟန္တွာန သာခါဟိ အဝတ္ထရာမ။
ကိန္နု ဥမ္မတ္တရူပေါဝ, သတ္တိဂုမ္ဗ ပဘာသသိ၊
ဒုရာသဒါ ဟိ ရာဇာနော, အဂ္ဂိ ပဇ္ဇလိတော ယထာ။
အထ တွံ ပတိကောလမ္ဗ, မတ္တော ထုလ္လာနိ ဂဇ္ဇသိ၊
မာတရိ မယှံ နဂ္ဂါယ, ကိန္နု တွံ ဝိဇိဂုစ္ဆသေ။
ဥဋ္ဌေဟိ သမ္မ တရမာနော, ရထံ ယောဇေဟိ သာရထိ၊
သကုဏော မေ န ရုစ္စတိ, အညံ ဂစ္ဆာမ အဿမံ။
ယုတ္တော ရထော မဟာရာဇ, ယုတ္တော စ ဗလဝါဟနော၊
အဓိတိဋ္ဌ မဟာရာဇ, အညံ ဂစ္ဆာမ အဿမံ။
ကော နုမေဝ ဂတာ [ကွ နု’မေ’ပဂတာ (?)] သဗ္ဗေ, ယေ အသ္မိံ ပရိစာရကာ၊
ဧသ ဂစ္ဆတိ ပဉ္စာလော, မုတ္တော တေသံ အဒဿနာ။
(ဇာ၊၁၊၃၂၉။)ကောဒဏ္ဍကာနိ ဂဏှထ, သတ္တိယော တောမရာနိ စ၊
ဧသ ဂစ္ဆတိ ပဉ္စာလော, မာ ဝေါ မုဉ္စိတ္ထ ဇီဝတံ [ဇီဝိတံ (ဗဟူသု)]။
အထာပရော ပဋိနန္ဒိတ္ထ, သုဝေါ လောဟိတတုဏ္ဍကော၊
သွာဂတံ တေ မဟာရာဇ, အထော တေ အဒုရာဂတံ၊
ဣဿရောသိ အနုပ္ပတ္တော, ယံ ဣဓတ္ထိ ပဝေဒယ။
တိန္ဒုကာနိ ပိယာလာနိ, မဓုကေ ကာသုမာရိယော၊
ဖလာနိ ခုဒ္ဒကပ္ပါနိ, ဘုဉ္ဇ ရာဇ ဝရံ ဝရံ။
ဣဒမ္ပိ ပါနီယံ သီတံ, အာဘတံ ဂိရိဂဗ္ဘရာ၊
တတော ပိဝ မဟာရာဇ, သစေ တွံ အဘိကင်္ခသိ။
အရညံ ဥဉ္ဆာယ ဂတာ, ယေ အသ္မိံ ပရိစာရကာ၊
သယံ ဥဋ္ဌာယ ဂဏှဝှေါ, ဟတ္ထာ မေ နတ္ထိ ဒါတဝေ။
ဘဒ္ဒကော ဝတယံ ပက္ခီ, ဒိဇော ပရမဓမ္မိကော၊
အထေသော ဣတရော ပက္ခီ, သုဝေါ လုဒ္ဒါနိ ဘာသတိ။
‘‘ဧတံ ဟနထ ဗန္ဓထ, မာ ဝေါ မုဉ္စိတ္ထ ဇီဝတံ’’၊
ဣစ္စေဝံ ဝိလပန္တဿ, သောတ္ထိံ [သောတ္ထီ (သျာ။)] ပတ္တောသ္မိ အဿမံ။
ဘာတရောသ္မ မဟာရာဇ, သောဒရိယာ ဧကမာတုကာ၊
ဧကရုက္ခသ္မိံ သံဝဍ္ဎာ, နာနာခေတ္တဂတာ ဥဘော။
သတ္တိဂုမ္ဗော စ စောရာနံ, အဟဉ္စ ဣသီနံ ဣဓ၊
အသတံ သော, သတံ အဟံ, တေန ဓမ္မေန နော ဝိနာ။
တတ္ထ ဝဓော စ ဗန္ဓော စ, နိကတီ ဝဉ္စနာနိ စ၊
အာလောပါ သာဟသာကာရာ, တာနိ သော တတ္ထ သိက္ခတိ။
ဣဓ သစ္စဉ္စ ဓမ္မော စ, အဟိံသာ သံယမော ဒမော၊
အာသနူဒကဒါယီနံ, အင်္ကေ ဝဒ္ဓေါသ္မိ ဘာရဓ [ဘာရတ (သီ။ သျာ။ ပီ။)]။
ယံ ယဉှိ ရာဇ ဘဇတိ, သန္တံ ဝါ ယဒိ ဝါ အသံ၊
သီလဝန္တံ ဝိသီလံ ဝါ, ဝသံ တဿေဝ ဂစ္ဆတိ။
ယာဒိသံ ကုရုတေ မိတ္တံ, ယာဒိသံ စူပသေဝတိ၊
သောပိ တာဒိသကော ဟောတိ, သဟဝါသော ဟိ [သဟဝါသောပိ (သျာ။ က။)] တာဒိသော။
(ဇာ၊၁၊၃၃၀။)သေဝမာနော သေဝမာနံ, သမ္ဖုဋ္ဌော သမ္ဖုသံ ပရံ၊
သရော ဒိဒ္ဓေါ ကလာပံဝ, အလိတ္တမုပလိမ္ပတိ၊
ဥပလေပဘယာ [ဥပလိမ္ပဘယာ (သျာ။ က။)] ဓီရော, နေဝ ပါပသခါ သိယာ။
ပူတိမစ္ဆံ ကုသဂ္ဂေန, ယော နရော ဥပနယှတိ၊
ကုသာပိ ပူတိ [ပူတီ (သီ။ ပီ။)] ဝါယန္တိ, ဧဝံ ဗာလူပသေဝနာ။
တဂရဉ္စ ပလာသေန, ယော နရော ဥပနယှတိ၊
ပတ္တာပိ သုရဘိ [သုရဘီ (သီ။ သျာ။ ပီ။)] ဝါယန္တိ, ဧဝံ ဓီရူပသေဝနာ။
တသ္မာ ပတ္တပုဋဿေဝ [ဖလပုဋဿေဝ (သီ။ ပီ။), ပလပုဋဿေဝ (က။ အဋ္ဌ။), ပလာသပုဋဿေဝ (သျာ။ က။)], ဉတွာ သမ္ပာကမတ္တနော၊
အသန္တေ နောပသေဝေယျ, သန္တေ သေဝေယျ ပဏ္ဍိတော၊
အသန္တော နိရယံ နေန္တိ, သန္တော ပါပေန္တိ သုဂ္ဂတိန္တိ။
သတ္တိဂုမ္ဗဇာတကံ သတ္တမံ။
ဘလ္လာတိယော [ဘလ္လာဋိယော (သီ။ ပီ။)] နာမ အဟောသိ ရာဇာ, ရဋ္ဌံ ပဟာယ မိဂဝံ အစာရိ သော၊
အဂမာ ဂိရိဝရံ ဂန္ဓမာဒနံ, သုပုပ္ဖိတံ [သမ္ပုပ္ဖိတံ (သီ။ ပီ။)] ကိမ္ပုရိသာနုစိဏ္ဏံ။
သာဠူရသံဃဉ္စ နိသေဓယိတွာ, ဓနုံ [ဓနု (သီ။ သျာ။ ပီ။)] ကလာပဉ္စ သော နိက္ခိပိတွာ၊
ဥပါဂမိ ဝစနံ ဝတ္တုကာမော, ယတ္ထဋ္ဌိတာ ကိမ္ပုရိသာ အဟေသုံ။
ဟိမစ္စယေ ဟေမဝတာယ တီရေ, ကိမိဓဋ္ဌိတာ မန္တယဝှေါ အဘိဏှံ၊
ပုစ္ဆာမိ ဝေါ မာနုသဒေဟဝဏ္ဏေ, ကထံ နု [ကထံ ဝေါ (သီ။ သျာ။ ပီ။)] ဇာနန္တိ မနုဿလောကေ။
(ဇာ၊၁၊၃၃၁။)မလ္လံ ဂိရိံ ပဏ္ဍရကံ တိကူဋံ, သီတောဒကာ [သီတောဒိယာ (သီ။ ပီ။), သီတောဒိကာ (?)] အနုဝိစရာမ နဇ္ဇော၊
မိဂါ မနုဿာဝ နိဘာသဝဏ္ဏာ, ဇာနန္တိ နော ကိမ္ပုရိသာတိ လုဒ္ဒ။
သုကိစ္ဆရူပံ ပရိဒေဝယဝှေါ [ပရိဒေဝထဝှေါ (?) မောဂ္ဂလ္လာနဗျာကရဏေ ၆။၃၈ သုတ္တံ], အာလိင်္ဂိတော စာသိ ပိယော ပိယာယ၊
ပုစ္ဆာမိ ဝေါ မာနုသဒေဟဝဏ္ဏေ, ကိမိဓ ဝနေ ရောဒထ အပ္ပတီတာ။
သုကိစ္ဆရူပံ ပရိဒေဝယဝှေါ, အာလိင်္ဂိတော စာသိ ပိယော ပိယာယ၊
ပုစ္ဆာမိ ဝေါ မာနုသဒေဟဝဏ္ဏေ, ကိမိဓ ဝနေ ဝိလပထ အပ္ပတီတာ။
သုကိစ္ဆရူပံ ပရိဒေဝယဝှေါ, အာလိင်္ဂိတော စာသိ ပိယော ပိယာယ၊
ပုစ္ဆာမိ ဝေါ မာနုသဒေဟဝဏ္ဏေ, ကိမိဓ ဝနေ သောစထ အပ္ပတီတာ။
မယေကရတ္တံ [ရတ္တိံ (ပီ။)] ဝိပ္ပဝသိမှ လုဒ္ဒ, အကာမကာ အညမညံ သရန္တာ၊
တမေကရတ္တံ အနုတပ္ပမာနာ, သောစာမ ‘‘သာ ရတ္တိ ပုနံ န ဟေဿတိ’’။
ယမေကရတ္တံ အနုတပ္ပထေတံ, ဓနံ ဝ နဋ္ဌံ ပိတရံ ဝ ပေတံ၊
ပုစ္ဆာမိ ဝေါ မာနုသဒေဟဝဏ္ဏေ, ကထံ ဝိနာ ဝါသမကပ္ပယိတ္ထ။
ယမိမံ [ယယိမံ (က။ သီ။)] နဒိံ ပဿသိ သီဃသောတံ, နာနာဒုမစ္ဆာဒနံ သေလကူလံ [ဒုမစ္ဆဒနံ သေလကူဋံ (သီ။ ပီ။), ဒုမသဉ္ဆန္နံ သေလကူလံ (က။)]၊
တံ မေ ပိယော ဥတ္တရိ ဝဿကာလေ, မမဉ္စ မညံ အနုဗန္ဓတီတိ။
(ဇာ၊၁၊၃၃၂။)အဟဉ္စ အင်္ကောလကမောစိနာမိ, အတိမုတ္တကံ သတ္တလိယောထိကဉ္စ၊
‘‘ပိယော စ မေ ဟေဟိတိ မာလဘာရီ, အဟဉ္စ နံ မာလိနီ အဇ္ဈုပေဿံ’’။
အဟဉ္စိဒံ ကုရဝကမောစိနာမိ, ဥဒ္ဒါလကာ ပါဋလိသိန္ဓုဝါရကာ [သိန္ဓုဝါရိတာ (သျာ။ ပီ။ က။)]၊
‘‘ပိယော စ မေ ဟေဟိတိ မာလဘာရီ, အဟဉ္စ နံ မာလိနီ အဇ္ဈုပေဿံ’’။
အဟဉ္စ သာလဿ သုပုပ္ဖိတဿ, ဩစေယျ ပုပ္ဖါနိ ကရောမိ မာလံ၊
‘‘ပိယော စ မေ ဟေဟိတိ မာလဘာရီ, အဟဉ္စ နံ မာလိနီ အဇ္ဈုပေဿံ’’။
အဟဉ္စ သာလဿ သုပုပ္ဖိတဿ, ဩစေယျ ပုပ္ဖါနိ ကရောမိ ဘာရံ၊
ဣဒဉ္စ နော ဟေဟိတိ သန္ထရတ္ထံ, ယတ္ထဇ္ဇိမံ [ယတ္ထဇ္ဇမံ (သီ။ ပီ။)] ဝိဟရိဿာမ [ဝိဟရိဿာမု (ပီ။)] ရတ္တိံ။
အဟဉ္စ ခေါ အဂဠုံ [အဂ္ဂလု (သျာ။ က။), အကလုံ (ပီ။)] စန္ဒနဉ္စ, သိလာယ ပိံသာမိ ပမတ္တရူပါ၊
‘‘ပိယော စ မေ ဟေဟိတိ ရောသိတင်္ဂေါ, အဟဉ္စ နံ ရောသိတာ အဇ္ဈုပေဿံ’’။
အထာဂမာ သလိလံ သီဃသောတံ, နုဒံ သာလေ သလဠေ ကဏ္ဏိကာရေ၊
အာပူရထ [အပူရထ (သီ။ ပီ။), အာပူရထေ (သျာ။)] တေန မုဟုတ္တကေန, သာယံ နဒီ အာသိ မယာ သုဒုတ္တရာ။
ဥဘောသု တီရေသု မယံ တဒါ ဌိတာ, သမ္ပဿန္တာ ဥဘယော အညမညံ၊
သကိမ္ပိ ရောဒါမ သကိံ ဟသာမ, ကိစ္ဆေန နော အာဂမာ [အဂမာ (သီ။ သျာ။ ပီ။)] သံဝရီ သာ။
(ဇာ၊၁၊၃၃၃။)ပါတောဝ [ပါတော စ (သီ။ သျာ။ ပီ။)] ခေါ ဥဂ္ဂတေ သူရိယမှိ, စတုက္ကံ နဒိံ ဥတ္တရိယာန လုဒ္ဒ၊
အာလိင်္ဂိယာ အညမညံ မယံ ဥဘော, သကိမ္ပိ ရောဒါမ သကိံ ဟသာမ။
တီဟူနကံ သတ္တသတာနိ လုဒ္ဒ, ယမိဓ မယံ ဝိပ္ပဝသိမှ ပုဗ္ဗေ၊
ဝဿေကိမံ [ဝါသေကိမံ (သီ။ ပီ။)] ဇီဝိတံ ဘူမိပါလ, ကော နီဓ ကန္တာယ ဝိနာ ဝသေယျ။
အာယုဉ္စ ဝေါ ကီဝတကော နု သမ္မ, သစေပိ ဇာနာထ ဝဒေထ အာယုံ၊
အနုဿဝါ ဝုဍ္ဎတော အာဂမာ ဝါ, အက္ခာထ မေ တံ အဝိကမ္ပမာနာ။
အာယုဉ္စ နော ဝဿသဟဿံ လုဒ္ဒ, န စန္တရာ ပါပကော အတ္ထိ ရောဂေါ၊
အပ္ပဉ္စ [အပ္ပံဝ (သျာ။ က။)] ဒုက္ခံ သုခမေဝ ဘိယျော, အဝီတရာဂါ ဝိဇဟာမ ဇီဝိတံ။
ဣဒဉ္စ သုတွာန အမာနုသာနံ, ဘလ္လာတိယော ဣတ္တရ ဇီဝိတန္တိ၊
နိဝတ္တထ န မိဂဝံ အစရိ, အဒါသိ ဒါနာနိ အဘုဉ္ဇိ ဘောဂေ။
ဣဒဉ္စ သုတွာန အမာနုသာနံ, သမ္မောဒထ မာ ကလဟံ အကတ္ထ၊
မာ ဝေါ တပီ အတ္တကမ္မာပရာဓော, ယထာပိ တေ ကိမ္ပုရိသေကရတ္တံ။
ဣဒဉ္စ သုတွာန အမာနုသာနံ, သမ္မောဒထ မာ ဝိဝါဒံ အကတ္ထ၊
မာ ဝေါ တပီ အတ္တကမ္မာပရာဓော, ယထာပိ တေ ကိမ္ပုရိသေကရတ္တံ။
(ဇာ၊၁၊၃၃၄။)ဝိဝိဓံ [ဝိဝိဓ (သီ။ သျာ။)] အဓိမနာ သုဏောမဟံ, ဝစနပထံ တဝ အတ္ထသံဟိတံ၊
မုဉ္စံ [မုဉ္စ (သီ။ ပီ။)] ဂိရံ နုဒသေဝ မေ ဒရံ, သမဏ သုခါဝဟ ဇီဝ မေ စိရန္တိ။
ဘလ္လာတိယဇာတကံ အဋ္ဌမံ။
ကော တံ ဟိံသတိ ဟေဌေတိ, ကိံ [ကိန္နု (ပီ။ က။)] ဒုမ္မနော သောစသိ အပ္ပတီတော၊
ကဿဇ္ဇ မာတာပိတရော ရုဒန္တု, ကွဇ္ဇ သေတု [ကော နွေဇ္ဇ သေတိ (က။), ကော အဇ္ဇ သေတု (?)] နိဟတော ပထဗျာ။
တုဋ္ဌောသ္မိ ဒေဝ တဝ ဒဿနေန, စိရဿံ ပဿာမိ တံ ဘူမိပါလ၊
အဟိံသကော ရေဏုမနုပ္ပဝိဿ, ပုတ္တေန တေ ဟေဌယိတောသ္မိ [ပေါထယိတောသ္မိ (က။)] ဒေဝ။
အာယန္တု ဒေါဝါရိကာ ခဂ္ဂဗန္ဓာ [ခဂ္ဂဗဒ္ဓါ (သီ။ ပီ။)], ကာသာဝိယာ ယန္တု [ဟန္တု (က။)] အန္တေပုရန္တံ၊
ဟန္တွာန တံ သောမနဿံ ကုမာရံ, ဆေတွာန သီသံ ဝရမာဟရန္တု။
ပေသိတာ ရာဇိနော ဒူတာ, ကုမာရံ ဧတဒဗြဝုံ၊
ဣဿရေန ဝိတိဏ္ဏောသိ, ဝဓံ ပတ္တောသိ ခတ္တိယ။
သ ရာဇပုတ္တော ပရိဒေဝယန္တော, ဒသင်္ဂုလိံ အဉ္ဇလိံ ပဂ္ဂဟေတွာ၊
အဟမ္ပိ ဣစ္ဆာမိ ဇနိန္ဒ ဒဋ္ဌုံ, ဇီဝံ မံ နေတွာ [ဇီဝံ ပနေတွာ (သီ။ ပီ။)] ပဋိဒဿယေထ။
တဿ တံ ဝစနံ သုတွာ, ရညော ပုတ္တံ အဒဿယုံ၊
ပုတ္တော စ ပိတရံ ဒိသွာ, ဒူရတောဝဇ္ဈဘာသထ။
(ဇာ၊၁၊၃၃၅။)အာဂစ္ဆုံ [အာဂဉ္ဆုံ (သီ။), အာဂဉ္ဆု (ပီ။)] ဒေါဝါရိကာ ခဂ္ဂဗန္ဓာ, ကာသာဝိယာ ဟန္တု မမံ ဇနိန္ဒ၊
အက္ခာဟိ မေ ပုစ္ဆိတော ဧတမတ္ထံ, အပရာဓော ကော နိဓ မမဇ္ဇ အတ္ထိ။
သာယဉ္စ ပါတော ဥဒကံ သဇာတိ, အဂ္ဂိံ သဒါ ပါရိစရတပ္ပမတ္တော၊
တံ တာဒိသံ သံယတံ ဗြဟ္မစာရိံ, ကသ္မာ တုဝံ ဗြူသိ ဂဟပ္ပတီတိ။
တာလာ စ မူလာ စ ဖလာ စ ဒေဝ, ပရိဂ္ဂဟာ ဝိဝိဓာ သန္တိမဿ၊
တေ ရက္ခတိ ဂေါပယတပ္ပမတ္တော, [ဗြာဟ္မဏော ဂဟပတိ တေန ဟောတိ (သီ။ သျာ။ ပီ။)] တသ္မာ အဟံ ဗြူမိ ဂဟပ္ပတီတိ [ဗြာဟ္မဏော ဂဟပတိ တေန ဟောတိ (သီ။ သျာ။ ပီ။)]။
သစ္စံ ခေါ ဧတံ ဝဒသိ ကုမာရ, ပရိဂ္ဂဟာ ဝိဝိဓာ သန္တိမဿ၊
တေ ရက္ခတိ ဂေါပယတပ္ပမတ္တော, သ [နတ္ထိ ဣဒံ သီ။ သျာ။ ပီ။ ပေါတ္ထကေသု] ဗြာဟ္မဏော ဂဟပတိ တေန ဟောတိ။
သုဏန္တု မယှံ ပရိသာ သမာဂတာ, သနေဂမာ ဇာနပဒါ စ သဗ္ဗေ၊
ဗာလာယံ ဗာလဿ ဝစော နိသမ္မ, အဟေတုနာ ဃာတယတေ မံ [ဃာတယတေ (သီ။ ပီ။)] ဇနိန္ဒော။
ဒဠှသ္မိ မူလေ ဝိသဋေ ဝိရူဠှေ, ဒုန္နိက္ကယော ဝေဠု ပသာခဇာတော၊
ဝန္ဒာမိ ပါဒါနိ တဝ [တဝံ (သီ။ ပီ။)] ဇနိန္ဒ, အနုဇာန မံ ပဗ္ဗဇိဿာမိ ဒေဝ။
ဘုဉ္ဇဿု ဘောဂေ ဝိပုလေ ကုမာရ, သဗ္ဗဉ္စ တေ ဣဿရိယံ ဒဒါမိ၊
အဇ္ဇေဝ တွံ ကုရူနံ ဟောဟိ ရာဇာ, မာ ပဗ္ဗဇီ ပဗ္ဗဇ္ဇာ ဟိ ဒုက္ခာ။
(ဇာ၊၁၊၃၃၆။)ကိန္နူဓ ဒေဝ တဝမတ္ထိ ဘောဂါ, ပုဗ္ဗေဝဟံ [ပုဗ္ဗေ စဟံ (က။)] ဒေဝလောကေ ရမိဿံ၊
ရူပေဟိ သဒ္ဒေဟိ အထော ရသေဟိ, ဂန္ဓေဟိ ဖဿေဟိ မနောရမေဟိ။
ဘုတ္တာ စ မေ [ဘုတ္တာ (သီ။ ပီ။)] ဘောဂါ တိဒိဝသ္မိံ ဒေဝ, ပရိဝါရိတာ [ပရိစာရိတာ (က။)] အစ္ဆရာနံ ဂဏေန [အစ္ဆရာသံဂဏေန (သျာ။ ပီ။ က။)]၊
တုဝဉ္စ [တဝဉ္စ (သီ။ ပီ။)] ဗာလံ ပရနေယျံ ဝိဒိတွာ, န တာဒိသေ ရာဇကုလေ ဝသေယျံ။
သစာဟံ ဗာလော ပရနေယျော အသ္မိ, ဧကာပရာဓံ [ဧတာပရာဓံ (က။)] ခမ ပုတ္တ မယှံ၊
ပုနပိ စေ ဧဒိသကံ ဘဝေယျ, ယထာမတိံ သောမနဿ ကရောဟိ။
အနိသမ္မ ကတံ ကမ္မံ, အနဝတ္ထာယ စိန္တိတံ၊
ဘေသဇ္ဇဿေဝ ဝေဘင်္ဂေါ, ဝိပါကော ဟောတိ ပါပကော။
နိသမ္မ စ ကတံ ကမ္မံ, သမ္မာဝတ္ထာယ စိန္တိတံ၊
ဘေသဇ္ဇဿေဝ သမ္ပတ္တိ, ဝိပါကော ဟောတိ ဘဒြကော။
အလသော ဂိဟီ ကာမဘောဂီ န သာဓု, အသညတော ပဗ္ဗဇိတော န သာဓု၊
ရာဇာ န သာဓု အနိသမ္မကာရီ, ယော ပဏ္ဍိတော ကောဓနော တံ န သာဓု။
နိသမ္မ ခတ္တိယော ကယိရာ, နာနိသမ္မ ဒိသမ္ပတိ၊
နိသမ္မကာရိနော ရာဇ, ယသော ကိတ္တိ စ ဝဍ္ဎတိ။
နိသမ္မ ဒဏ္ဍံ ပဏယေယျ ဣဿရော, ဝေဂါ ကတံ တပ္ပတိ ဘူမိပါလ၊
သမ္မာပဏီဓီ စ နရဿ အတ္ထာ, အနာနုတပ္ပါ တေ ဘဝန္တိ ပစ္ဆာ။
(ဇာ၊၁၊၃၃၇။)အနာနုတပ္ပါနိ ဟိ ယေ ကရောန္တိ, ဝိဘဇ္ဇ ကမ္မာယတနာနိ လောကေ၊
ဝိညုပ္ပသတ္ထာနိ သုခုဒြယာနိ, ဘဝန္တိ ဗုဒ္ဓါနုမတာနိ [ဝဒ္ဓါနုမတာနိ (သီ။ ပီ။)] တာနိ။
အာဂစ္ဆုံ ဒေါဝါရိကာ ခဂ္ဂဗန္ဓာ, ကာသာဝိယာ ဟန္တု မမံ ဇနိန္ဒ၊
မာတုဉ္စ [မာတုစ္စ (ပီ။)] အင်္ကသ္မိမဟံ နိသိန္နော, အာကဍ္ဎိတော သဟသာ တေဟိ ဒေဝ။
ကဋုကဉှိ သမ္ဗာဓံ သုကိစ္ဆံ [သုကိစ္ဆ (သီ။ ပီ။)] ပတ္တော, မဓုရမ္ပိ ယံ ဇီဝိတံ လဒ္ဓ ရာဇ၊
ကိစ္ဆေနဟံ အဇ္ဇ ဝဓာ ပမုတ္တော, ပဗ္ဗဇ္ဇမေဝါဘိမနောဟမသ္မိ။
ပုတ္တော တဝါယံ တရုဏော သုဓမ္မေ, အနုကမ္ပကော သောမနဿော ကုမာရော၊
တံ ယာစမာနော န လဘာမိ သွဇ္ဇ [သဇ္ဇ (သီ။ ပီ။)], အရဟသိ နံ ယာစိတဝေ [ယာစိတုယေ (က။)] တုဝမ္ပိ။
ရမဿု ဘိက္ခာစရိယာယ ပုတ္တ, နိသမ္မ ဓမ္မေသု ပရိဗ္ဗဇဿု၊
သဗ္ဗေသု ဘူတေသု နိဓာယ ဒဏ္ဍံ, အနိန္ဒိတော ဗြဟ္မမုပေဟိ ဌာနံ။
အစ္ဆေရ [အစ္ဆရိယ (သီ။ သျာ။ ပီ။)] ရူပံ ဝတ ယာဒိသဉ္စ, ဒုက္ခိတံ မံ ဒုက္ခာပယသေ သုဓမ္မေ၊
ယာစဿု ပုတ္တံ ဣတိ ဝုစ္စမာနာ, ဘိယျောဝ ဥဿာဟယသေ ကုမာရံ။
ယေ ဝိပ္ပမုတ္တာ အနဝဇ္ဇဘောဂိနော [ဘောဇိနော (သီ။ သျာ။ ပီ။)], ပရိနိဗ္ဗုတာ လောကမိမံ စရန္တိ၊
တမရိယမဂ္ဂံ ပဋိပဇ္ဇမာနံ, န ဥဿဟေ ဝါရယိတုံ ကုမာရံ။
(ဇာ၊၁၊၃၃၈။)အဒ္ဓါ ဟဝေ သေဝိတဗ္ဗာ သပညာ, ဗဟုဿုတာ ယေ ဗဟုဌာနစိန္တိနော၊
ယေသာယံ သုတွာန သုဘာသိတာနိ, အပ္ပေါဿုက္ကာ ဝီတသောကာ သုဓမ္မာတိ။
သောမနဿဇာတကံ နဝမံ။
ကာ နု ဝိဇ္ဇုရိဝါဘာသိ, ဩသဓီ ဝိယ တာရကာ၊
ဒေဝတာ နုသိ ဂန္ဓဗ္ဗီ, န တံ မညာမိ မာနုသိံ [မာနုသီ (သျာ။ က။)]။
နမှိ ဒေဝီ န ဂန္ဓဗ္ဗီ, န မဟာရာဇ မာနုသီ၊
နာဂကညာသ္မိ ဘဒ္ဒန္တေ, အတ္ထေနမှိ ဣဓာဂတာ။
ဝိဗ္ဘန္တစိတ္တာ ကုပိတိန္ဒြိယာသိ, နေတ္တေဟိ တေ ဝါရိဂဏာ သဝန္တိ၊
ကိံ တေ နဋ္ဌံ ကိံ ပန ပတ္ထယာနာ, ဣဓာဂတာ နာရိ တဒိင်္ဃ ဗြူဟိ။
ယမုဂ္ဂတေဇော ဥရဂေါတိ စာဟု, နာဂေါတိ နံ အာဟု ဇနာ ဇနိန္ဒ၊
တမဂ္ဂဟီ ပုရိသော ဇီဝိကတ္ထော, တံ ဗန္ဓနာ မုဉ္စ ပတီ မမေသော။
ကထံ နွယံ ဗလဝိရိယူပပန္နော, ဟတ္ထတ္တ [ဟတ္ထတ္ထ (သီ။ သျာ။ ပီ။)] မာဂစ္ဆိ ဝနိဗ္ဗကဿ၊
အက္ခာဟိ မေ နာဂကညေ တမတ္ထံ, ကထံ ဝိဇာနေမု ဂဟီတနာဂံ။
နဂရမ္ပိ နာဂေါ ဘသ္မံ ကရေယျ, တထာ ဟိ သော ဗလဝိရိယူပပန္နော၊
ဓမ္မဉ္စ နာဂေါ အပစာယမာနော, တသ္မာ ပရက္ကမ္မ တပေါ ကရောတိ။
(ဇာ၊၁၊၃၃၉။)စာတုဒ္ဒသိံ ပဉ္စဒသိံ [ပန္နရသိံ (သီ။ သျာ။ ပီ။)] စ ရာဇ, စတုပ္ပထေ သမ္မတိ နာဂရာဇာ၊
တမဂ္ဂဟီ ပုရိသော ဇီဝိကတ္ထော, တံ ဗန္ဓနာ မုဉ္စ ပတီ မမေသော။
သောဠသိတ္ထိသဟဿာနိ, အာမုတ္တမဏိကုဏ္ဍလာ၊
ဝါရိဂေဟသယာ နာရီ [နာရိယော (ပီ။)], တာပိ တံ သရဏံ ဂတာ။
ဓမ္မေန မောစေဟိ အသာဟသေန, ဂါမေန နိက္ခေန ဂဝံ သတေန၊
ဩဿဋ္ဌကာယော ဥရဂေါ စရာတု, ပုညတ္ထိကော မုဉ္စတု ဗန္ဓနသ္မာ။
ဓမ္မေန မောစေမိ အသာဟသေန, ဂါမေန နိက္ခေန ဂဝံ သတေန၊
ဩဿဋ္ဌကာယော ဥရဂေါ စရာတု, ပုညတ္ထိကော မုဉ္စတု ဗန္ဓနသ္မာ။
ဒမ္မိ နိက္ခသတံ လုဒ္ဒ, ထူလဉ္စ မဏိကုဏ္ဍလံ၊
စတုဿဒဉ္စ ပလ္လင်္ကံ, ဥမာပုပ္ဖသရိန္နိဘံ။
ဒွေ စ သာဒိသိယော ဘရိယာ, ဥသဘဉ္စ ဂဝံ သတံ၊
ဩဿဋ္ဌကာယော ဥရဂေါ စရာတု, ပုညတ္ထိကော မုဉ္စတု ဗန္ဓနသ္မာ။
ဝိနာပိ ဒါနာ တဝ ဝစနံ ဇနိန္ဒ, မုဉ္စေမု နံ ဥရဂံ ဗန္ဓနသ္မာ၊
ဩဿဋ္ဌကာယော ဥရဂေါ စရာတု, ပုညတ္ထိကော မုဉ္စတု ဗန္ဓနသ္မာ။
မုတ္တော စမ္ပေယျကော နာဂေါ, ရာဇာနံ ဧတဒဗြဝိ၊
နမော တေ ကာသိရာဇတ္ထု, နမော တေ ကာသိဝဍ္ဎန၊
အဉ္ဇလိံ တေ ပဂ္ဂဏှာမိ, ပဿေယျံ မေ နိဝေသနံ။
(ဇာ၊၁၊၃၄၀။)အဒ္ဓါ ဟိ ဒုဗ္ဗိဿသမေတမာဟု, ယံ မာနုသော ဝိဿသေ အမာနုသမှိ၊
သစေ စ မံ ယာစသိ ဧတမတ္ထံ, ဒက္ခေမု တေ နာဂ နိဝေသနာနိ။
သစေပိ [သစေ ဟိ (သီ။ ပီ။ အဋ္ဌ။)] ဝါတော ဂိရိမာဝဟေယျ, စန္ဒော စ သုရိယော စ ဆမာ ပတေယျုံ၊
သဗ္ဗာ စ နဇ္ဇော ပဋိသောတံ ဝဇေယျုံ, န တွေဝဟံ ရာဇ မုသာ ဘဏေယျံ။
နဘံ ဖလေယျ ဥဒဓီပိ သုဿေ, သံဝဋ္ဋယေ [သံဝဋ္ဋေယံ (သီ။ ပီ။), သံဝဋ္ဋေယျ (သျာ။ က။)] ဘူတဓရာ ဝသုန္ဓရာ၊
သိလုစ္စယော မေရု သမူလမုပ္ပတေ [မုဗ္ဗဟေ (သီ။ သျာ။ ပီ။ က။ အဋ္ဌ။), မုဋ္ဌဟေ (က။)], န တွေဝဟံ ရာဇ မုသာ ဘဏေယျံ။
အဒ္ဓါ ဟိ ဒုဗ္ဗိဿသမေတမာဟု, ယံ မာနုသော ဝိဿသေ အမာနုသမှိ၊
သစေ စ မံ ယာစသိ ဧတမတ္ထံ, ဒက္ခေမု တေ နာဂ နိဝေသနာနိ။
တုမှေ ခေါတ္ထ ဃောရဝိသာ ဥဠာရာ, မဟာတေဇာ ခိပ္ပကောပီ စ ဟောထ၊
မံကာရဏာ [မမ ကာရဏာ (သီ။ သျာ။ ပီ။)] ဗန္ဓနသ္မာ ပမုတ္တော, အရဟသိ နော ဇာနိတုယေ [ဇာနိတာယေ (သီ။), ဇာနိတဝေ (သျာ။), ဇာနိတယေ (ပီ။)] ကတာနိ။
သော ပစ္စတံ နိရယေ ဃောရရူပေ, မာ ကာယိကံ သာတမလတ္ထ ကိဉ္စိ၊
ပေဠာယ ဗဒ္ဓေါ မရဏံ ဥပေတု, ယော တာဒိသံ ကမ္မကတံ န ဇာနေ။
(ဇာ၊၁၊၃၄၁။)သစ္စပ္ပဋိညာ တဝမေသ ဟောတု, အက္ကောဓနော ဟောဟိ အနုပနာဟီ၊
သဗ္ဗဉ္စ တေ နာဂကုလံ သုပဏ္ဏာ, အဂ္ဂိံဝ ဂိမှေသု [ဂိမှာသု (သီ။ သျာ။ ပီ။)] ဝိဝဇ္ဇယန္တု။
အနုကမ္ပသီ နာဂကုလံ ဇနိန္ဒ, မာတာ ယထာ သုပ္ပိယံ ဧကပုတ္တံ၊
အဟဉ္စ တေ နာဂကုလေန သဒ္ဓိံ, ကာဟာမိ ဝေယျာဝဋိကံ ဥဠာရံ။
ယောဇေန္တု ဝေ ရာဇရထေ သုစိတ္တေ, ကမ္ဗောဇကေ အဿတရေ သုဒန္တေ၊
နာဂေ စ ယောဇေန္တု သုဝဏ္ဏကပ္ပနေ, ဒက္ခေမု နာဂဿ နိဝေသနာနိ။
ဘေရီ မုဒိင်္ဂါ [မုတိင်္ဂါ (သီ။ ပီ။)] ပဏဝါ စ သင်္ခါ, အဝဇ္ဇယိံသု ဥဂ္ဂသေနဿ ရညော၊
ပါယာသိ ရာဇာ ဗဟုသောဘမာနော, ပုရက္ခတော နာရိဂဏဿ မဇ္ဈေ။
သုဝဏ္ဏစိတကံ ဘူမိံ, အဒ္ဒက္ခိ ကာသိဝဍ္ဎနော၊
သောဝဏ္ဏမယပါသာဒေ, ဝေဠုရိယဖလကတ္ထတေ။
သ ရာဇာ ပါဝိသိ ဗျမှံ, စမ္ပေယျဿ နိဝေသနံ၊
အာဒိစ္စဝဏ္ဏသန္နိဘံ, ကံသဝိဇ္ဇု ပဘဿရံ။
နာနာရုက္ခေဟိ သဉ္ဆန္နံ, နာနာဂန္ဓသမီရိတံ၊
သော ပါဝေက္ခိ ကာသိရာဇာ, စမ္ပေယျဿ နိဝေသနံ။
ပဝိဋ္ဌသ္မိံ ကာသိရညေ, စမ္ပေယျဿ နိဝေသနံ၊
ဒိဗ္ဗာ တူရိယာ ပဝဇ္ဇိံသု, နာဂကညာ စ နစ္စိသုံ [နစ္စယုံ (သီ။ ပီ။ က။)]။
တံ နာဂကညာ စရိတံ ဂဏေန, အနွာရုဟီ ကာသိရာဇာ ပသန္နော၊
နိသီဒိ သောဝဏ္ဏမယမှိ ပီဌေ, သာပဿယေ [သောပဿယေ (က။)] စန္ဒနသာရလိတ္တေ။
(ဇာ၊၁၊၃၄၂။)သော တတ္ထ ဘုတွာ စ အထော ရမိတွာ, စမ္ပေယျကံ ကာသိရာဇာ အဝေါစ၊
ဝိမာနသေဋ္ဌာနိ ဣမာနိ တုယှံ, အာဒိစ္စဝဏ္ဏာနိ ပဘဿရာနိ၊
နေတာဒိသံ အတ္ထိ မနုဿလောကေ, ကိံ ပတ္ထယံ [ကိမတ္ထိယံ (သီ။ သျာ။ ပီ။)] နာဂ တပေါ ကရောသိ။
တာ ကမ္ဗုကာယူရဓရာ သုဝတ္ထာ, ဝဋ္ဋင်္ဂုလီ တမ္ဗတလူပပန္နာ၊
ပဂ္ဂယှ ပါယေန္တိ အနောမဝဏ္ဏာ, နေတာဒိသံ အတ္ထိ မနုဿလောကေ၊
ကိံ ပတ္ထယံ နာဂ တပေါ ကရောသိ။
နဇ္ဇော စ တေမာ ပုထုလောမမစ္ဆာ, အာဋာ [အာဒါ (သျာ။), အဒါ (ပီ။)] သကုန္တာဘိရုဒါ သုတိတ္ထာ၊
နေတာဒိသံ အတ္ထိ မနုဿလောကေ, ကိံ ပတ္ထယံ နာဂ တပေါ ကရောသိ။
ကောဉ္စာ မယူရာ ဒိဝိယာ စ ဟံသာ, ဝဂ္ဂုဿရာ ကောကိလာ သမ္ပတန္တိ၊
နေတာဒိသံ အတ္ထိ မနုဿလောကေ, ကိံ ပတ္ထယံ နာဂ တပေါ ကရောသိ။
အမ္ဗာ စ သာလာ တိလကာ စ ဇမ္ဗုယော, ဥဒ္ဒါလကာ ပါဋလိယော စ ဖုလ္လာ၊
နေတာဒိသံ အတ္ထိ မနုဿလောကေ, ကိံ ပတ္ထယံ နာဂ တပေါ ကရောသိ။
ဣမာ စ တေ ပေါက္ခရညော သမန္တတော, ဒိဗ္ဗာ [ဒိဗျာ (သျာ။), ဒိဝိယာ (ပီ။)] စ ဂန္ဓာ သတတံ ပဝါယန္တိ၊
နေတာဒိသံ အတ္ထိ မနုဿလောကေ, ကိံ ပတ္ထယံ နာဂ တပေါ ကရောသိ။
(ဇာ၊၁၊၃၄၃။)န ပုတ္တဟေတု န ဓနဿ ဟေတု, န အာယုနော စာပိ [ဝါပိ (သီ။ ပီ။)] ဇနိန္ဒ ဟေတု၊
မနုဿယောနိံ အဘိပတ္ထယာနော, တသ္မာ ပရက္ကမ္မ တပေါ ကရောမိ။
တွံ လောဟိတက္ခော ဝိဟတန္တရံသော, အလင်္ကတော ကပ္ပိတကေသမဿု၊
သုရောသိတော လောဟိတစန္ဒနေန, ဂန္ဓဗ္ဗရာဇာဝ ဒိသာ ပဘာသသိ။
ဒေဝိဒ္ဓိပတ္တောသိ မဟာနုဘာဝေါ, သဗ္ဗေဟိ ကာမေဟိ သမင်္ဂိဘူတော၊
ပုစ္ဆာမိ တံ နာဂရာဇေတမတ္ထံ, သေယျော ဣတော ကေန မနုဿလောကော။
ဇနိန္ဒ နာညတြ မနုဿလောကာ, သုဒ္ဓီ ဝ သံဝိဇ္ဇတိ သံယမော ဝါ၊
အဟဉ္စ လဒ္ဓါန မနုဿယောနိံ, ကာဟာမိ ဇာတိမရဏဿ အန္တံ။
အဒ္ဓါ ဟဝေ သေဝိတဗ္ဗာ သပညာ, ဗဟုဿုတာ ယေ ဗဟုဌာနစိန္တိနော၊
နာရိယော စ ဒိသွာန တုဝဉ္စ နာဂ, ကာဟာမိ ပုညာနိ အနပ္ပကာနိ။
အဒ္ဓါ ဟဝေ သေဝိတဗ္ဗာ သပညာ, ဗဟုဿုတာ ယေ ဗဟုဌာနစိန္တိနော၊
နာရိယော စ ဒိသွာန မမဉ္စ ရာဇ, ကရောဟိ ပုညာနိ အနပ္ပကာနိ။
ဣဒဉ္စ မေ ဇာတရူပံ ပဟူတံ, ရာသီ သုဝဏ္ဏဿ စ တာလမတ္တာ၊
[ဣတော ဟရိတွာ သောဝဏ္ဏဃရာနိ ကာရယ, ရူပိယဿ စ ပါကာရံ ကရောန္တု (သီ။ သျာ။) ဣတော ဟရိတွာ သောဝဏ္ဏဃရာနိ, [ကာရယ] ရူပိယဿ စ ပါကာရံ ကရောန္တု (ပီ။)] ဣတော ဟရိတွာန သုဝဏ္ဏဃရာနိ, ကရဿု ရူပိယပါကာရံ ကရောန္တု [ဣတော ဟရိတွာ သောဝဏ္ဏဃရာနိ ကာရယ, ရူပိယဿ စ ပါကာရံ ကရောန္တု (သီ။ သျာ။) ဣတော ဟရိတွာ သောဝဏ္ဏဃရာနိ, [ကာရယ] ရူပိယဿ စ ပါကာရံ ကရောန္တု (ပီ။)]။
(ဇာ၊၁၊၃၄၄။)မုတ္တာ စ [မုတ္တာနဉ္စ (သီ။ သျာ။)] ဝါဟသဟဿာနိ ပဉ္စ, ဝေဠုရိယမိဿာနိ ဣတော ဟရိတွာ၊
အန္တေပုရေ ဘူမိယံ သန္ထရန္တု, နိက္ကဒ္ဒမာ ဟေဟိတိ နီရဇာ စ။
ဧတာဒိသံ အာဝသ ရာဇသေဋ္ဌ, ဝိမာနသေဋ္ဌံ ဗဟု သောဘမာနံ၊
ဗာရာဏသိံ နဂရံ ဣဒ္ဓံ ဖီတံ, ရဇ္ဇဉ္စ ကာရေဟိ အနောမပညာတိ။
စမ္ပေယျဇာတကံ ဒသမံ။
ဗြဟ္မလောကာ စဝိတွာန, ဒေဝပုတ္တော မဟိဒ္ဓိကော၊
ရညော ပုတ္တော ဥဒပါဒိ, သဗ္ဗကာမသမိဒ္ဓိသု။
ကာမာ ဝါ ကာမသညာ ဝါ, ဗြဟ္မလောကေ န ဝိဇ္ဇတိ၊
သွာဿု [ယွာဿ (သီ။)] တာယေဝ သညာယ, ကာမေဟိ ဝိဇိဂုစ္ဆထ။
တဿ စန္တေပုရေ အာသိ, ဈာနာဂါရံ သုမာပိတံ၊
သော တတ္ထ ပဋိသလ္လီနော [ပဋိသလ္လာနော (က။)], ဧကော ရဟသိ ဈာယထ။
သ ရာဇာ ပရိဒေဝေသိ, ပုတ္တသောကေန အဋ္ဋိတော၊
ဧကပုတ္တော စယံ မယှံ, န စ ကာမာနိ ဘုဉ္ဇတိ။
ကော နု ခွေတ္ထ [ခေတ္ထ (သီ။ ပီ။)] ဥပါယော သော, ကော ဝါ ဇာနာတိ ကိဉ္စနံ၊
ယော [ကော (သီ။ ပီ။)] မေ ပုတ္တံ ပလောဘေယျ, ယထာ ကာမာနိ ပတ္ထယေ။
အဟု ကုမာရီ တတ္ထေဝ, ဝဏ္ဏရူပသမာဟိတာ၊
ကုသလာ နစ္စဂီတဿ, ဝါဒိတေ စ ပဒက္ခိဏာ။
သာ တတ္ထ ဥပသင်္ကမ္မ, ရာဇာနံ ဧတဒဗြဝိ၊
အဟံ ခေါ နံ ပလောဘေယျံ, သစေ ဘတ္တာ ဘဝိဿတိ။
တံ တထာဝါဒိနိံ ရာဇာ, ကုမာရိံ ဧတဒဗြဝိ၊
တွညေဝ နံ ပလောဘေဟိ, တဝ ဘတ္တာ ဘဝိဿတိ။
(ဇာ၊၁၊၃၄၅။)သာ စ အန္တေပုရံ ဂန္တွာ, ဗဟုံ ကာမုပသံဟိတံ၊
ဟဒယင်္ဂမာ ပေမနီယာ, စိတြာ ဂါထာ အဘာသထ။
တဿာ စ ဂါယမာနာယ, သဒ္ဒံ သုတွာန နာရိယာ၊
ကာမစ္ဆန္ဒဿ ဥပ္ပဇ္ဇိ, ဇနံ သော ပရိပုစ္ဆထ။
ကဿေသော သဒ္ဒေါ ကော ဝါ သော, ဘဏတိ ဥစ္စာဝစံ ဗဟုံ၊
ဟဒယင်္ဂမံ ပေမနီယံ, အဟော [အထော (သီ။ ပီ။)] ကဏ္ဏသုခံ မမ။
ဧသာ ခေါ ပမဒါ ဒေဝ, ခိဍ္ဍာ ဧသာ အနပ္ပိကာ [အနပ္ပကာ (က။)]၊
သစေ တွံ ကာမေ ဘုဉ္ဇေယျ, ဘိယျော ဘိယျော ဆာဒေယျု တံ။
ဣင်္ဃ အာဂစ္ဆတောရေန [အာဂစ္ဆတောရေနံ (က။) အာဂစ္ဆတု + ဩရေန], အဝိဒူရမှိ ဂါယတု၊
အဿမဿ သမီပမှိ, သန္တိကေ မယှံ ဂါယတု။
တိရောကုဋ္ဋမှိ ဂါယိတွာ, ဈာနာဂါရမှိ ပါဝိသိ၊
ဗန္ဓိ နံ [ဘန္ဓိတုံ (သျာ။ က။)] အနုပုဗ္ဗေန, အာရညမိဝ ကုဉ္ဇရံ။
တဿ [တဿာ (သျာ။)] ကာမရသံ ဉတွာ, ဣဿာဓမ္မော အဇာယထ၊
‘‘အဟမေဝ ကာမေ ဘုဉ္ဇေယျံ, မာ အညော ပုရိသော အဟု’’။
တတော အသိံ ဂဟေတွာန, ပုရိသေ ဟန္တုံ ဥပက္ကမိ၊
အဟမေဝေကော ဘုဉ္ဇိဿံ, မာ အညော ပုရိသော သိယာ။
တတော ဇာနပဒါ သဗ္ဗေ, ဝိက္ကန္ဒိံသု သမာဂတာ၊
ပုတ္တော တျာယံ မဟာရာဇ, ဇနံ ဟေဌေတျဒူသကံ။
တဉ္စ ရာဇာ ဝိဝါဟေသိ [နိဝါဟေသိ (သျာ။), ဝိဟာဟေသိ (ပီ။)], သမှာ ရဋ္ဌာ စ [ရဋ္ဌာတော (သီ။ ပီ။), ရဋ္ဌတော (က။)] ခတ္တိယော၊
ယာဝတာ ဝိဇိတံ မယှံ, န တေ ဝတ္ထဗ္ဗ [ဝတ္တဗ္ဗ (သီ။ ပီ။)] တာဝဒေ။
တတော သော ဘရိယမာဒါယ, သမုဒ္ဒံ ဥပသင်္ကမိ၊
ပဏ္ဏသာလံ ကရိတွာန, ဝနမုဉ္ဆာယ ပါဝိသိ။
အထေတ္ထ ဣသိ မာဂစ္ဆိ, သမုဒ္ဒံ ဥပရူပရိ၊
သော တဿ ဂေဟံ ပါဝေက္ခိ, ဘတ္တကာလေ ဥပဋ္ဌိတေ။
(ဇာ၊၁၊၃၄၆။)တဉ္စ ဘရိယာ ပလောဘေသိ, ပဿ ယာဝ သုဒါရုဏံ၊
စုတော သော ဗြဟ္မစရိယမှာ, ဣဒ္ဓိယာ ပရိဟာယထ။
ရာဇပုတ္တော စ ဥဉ္ဆာတော, ဝနမူလဖလံ ဗဟုံ၊
သာယံ ကာဇေန [ကာစေန (ပီ။)] အာဒါယ, အဿမံ ဥပသင်္ကမိ။
ဣသီ စ ခတ္တိယံ ဒိသွာ, သမုဒ္ဒံ ဥပသင်္ကမိ၊
‘‘ဝေဟာယသံ ဂမိဿ’’န္တိ, သီဒတေ သော မဟဏ္ဏဝေ။
ခတ္တိယော စ ဣသိံ ဒိသွာ, သီဒမာနံ မဟဏ္ဏဝေ၊
တဿေဝ အနုကမ္ပာယ, ဣမာ ဂါထာ အဘာသထ။
အဘိဇ္ဇမာနေ ဝါရိသ္မိံ, သယံ အာဂမ္မ ဣဒ္ဓိယာ၊
မိဿီဘာဝိတ္ထိယာ ဂန္တွာ, သံသီဒသိ မဟဏ္ဏဝေ။
အာဝဋ္ဋနီ မဟာမာယာ, ဗြဟ္မစရိယဝိကောပနာ၊
သီဒန္တိ နံ ဝိဒိတွာန, အာရကာ ပရိဝဇ္ဇယေ။
အနလာ မုဒုသမ္ဘာသာ, ဒုပ္ပူရာ တာ နဒီသမာ၊
သီဒန္တိ နံ ဝိဒိတွာန, အာရကာ ပရိဝဇ္ဇယေ။
ယံ ဧတာ ဥပသေဝန္တိ, ဆန္ဒသာ ဝါ ဓနေန ဝါ၊
ဇာတဝေဒေါဝ သံ ဌာနံ, ခိပ္ပံ အနုဒဟန္တိ နံ။
ခတ္တိယဿ ဝစော သုတွာ, ဣသိဿ နိဗ္ဗိဒါ အဟု၊
လဒ္ဓါ ပေါရာဏကံ မဂ္ဂံ, ဂစ္ဆတေ သော ဝိဟာယသံ။
ခတ္တိယော စ ဣသိံ ဒိသွာ, ဂစ္ဆမာနံ ဝိဟာယသံ၊
သံဝေဂံ အလဘီ ဓီရော, ပဗ္ဗဇ္ဇံ သမရောစယိ။
တတော သော ပဗ္ဗဇိတွာန, ကာမရာဂံ ဝိရာဇယိ၊
ကာမရာဂံ ဝိရာဇေတွာ, ဗြဟ္မလောကူပဂေါ အဟူတိ။
မဟာပလောဘနဇာတကံ ဧကာဒသမံ။
(ဇာ၊၁၊၃၄၇။)ပဉ္စ ပဏ္ဍိတာ သမာဂတာတ္ထ, ပဉှာ မေ ပဋိဘာတိ တံ သုဏာထ၊
နိန္ဒိယမတ္ထံ ပသံသိယံ ဝါ, ကဿေဝါဝိကရေယျ [ကဿ ဝါဝီကရေယျ (က။)] ဂုယှမတ္ထံ။
တွံ အာဝိကရောဟိ ဘူမိပါလ, ဘတ္တာ ဘာရသဟော တုဝံ ဝဒေ တံ၊
တဝ ဆန္ဒရုစီနိ [ဆန္ဒဉ္စ ရုစိဉ္စ (သီ။ ပီ။)] သမ္မသိတွာ, အထ ဝက္ခန္တိ ဇနိန္ဒ ပဉ္စ ဓီရာ။
ယာ သီလဝတီ အနညထေယျာ [အနညဓေယျာ (သီ။ ပီ။)], ဘတ္တုစ္ဆန္ဒဝသာနုဂါ (ပိယာ) [( ) နတ္ထိ သီ။ ပီ။ ပေါတ္ထကေသု] မနာပါ၊
နိန္ဒိယမတ္ထံ ပသံသိယံ ဝါ, ဘရိယာယာဝိကရေယျ [ဘရိယာယ ဝါဝီကရေယျ (က။)] ဂုယှမတ္ထံ။
ယော ကိစ္ဆဂတဿ အာတုရဿ, သရဏံ ဟောတိ ဂတီ ပရာယနဉ္စ၊
နိန္ဒိယမတ္ထံ ပသံသိယံ ဝါ, သခိနော ဝါဝိကရေယျ ဂုယှမတ္ထံ။
ဇေဋ္ဌော [ယော ဇေဋ္ဌော (သျာ။)] အထ မဇ္ဈိမော ကနိဋ္ဌော, ယော [သော (သီ။ သျာ။ ပီ။)] စေ သီလသမာဟိတော ဌိတတ္တော၊
နိန္ဒိယမတ္ထံ ပသံသိယံ ဝါ, ဘာတု ဝါဝီကရေယျ ဂုယှမတ္ထံ။
ယော ဝေ ပိတုဟဒယဿ ပဒ္ဓဂူ [ပတ္ထဂူ (သျာ။), ပတ္တဂူ (က။)], အနုဇာတော ပိတရံ အနောမပညော၊
နိန္ဒိယမတ္ထံ ပသံသိယံ ဝါ, ပုတ္တဿာဝိကရေယျ [ပုတ္တဿ ဝါဝီကရေယျ (က။)] ဂုယှမတ္ထံ။
(ဇာ၊၁၊၃၄၈။)မာတာ ဒွိပဒါဇနိန္ဒသေဋ္ဌ, ယာ နံ [ယော တံ (သီ။ ပီ။)] ပေါသေတိ ဆန္ဒသာ ပိယေန၊
နိန္ဒိယမတ္ထံ ပသံသိယံ ဝါ, မာတုယာဝီကရေယျ [မာတုယာ ဝါဝီကရေယျ (က။)] ဂုယှမတ္ထံ။
ဂုယှဿ ဟိ ဂုယှမေဝ သာဓု, န ဟိ ဂုယှဿ ပသတ္ထမာဝိကမ္မံ၊
အနိပ္ဖန္နတာ [အနိပ္ဖါဒါယ (သီ။ ပီ။), အနိပ္ဖန္နတာယ (သျာ။), အာ နိပ္ဖါဒါ (?)] သဟေယျ ဓီရော, နိပ္ဖန္နောဝ [နိပ္ဖန္နတ္ထော (သီ။ ပီ။), နိပ္ဖန္နတ္ထောဝ (သျာ။)] ယထာသုခံ ဘဏေယျ။
ကိံ တွံ ဝိမနောသိ ရာဇသေဋ္ဌ, ဒွိပဒဇနိန္ဒ [ဒိပဒိန္ဒ (သီ။ သျာ။ ပီ။)] ဝစနံ သုဏောမ မေတံ [နေတံ (သီ။ ပီ။), တေတံ (သျာ။)]၊
ကိံ စိန္တယမာနော ဒုမ္မနောသိ, နူန ဒေဝ အပရာဓော အတ္ထိ မယှံ။
‘‘ပဏှေ [ပညော (သီ။ ပီ။), ပဉှေ (သျာ။), ပနှေ (က။)] ဝဇ္ဈော မဟောသဓော’’တိ, အာဏတ္တော မေ ဝဓာယ ဘူရိပညော၊
တံ စိန္တယမာနော ဒုမ္မနောသ္မိ, န ဟိ ဒေဝီ အပရာဓော အတ္ထိ တုယှံ။
အဘိဒေါသဂတော ဒါနိ ဧဟိသိ, ကိံ သုတွာ ကိံ သင်္ကတေ မနော တေ၊
ကော တေ ကိမဝေါစ ဘူရိပည, ဣင်္ဃ ဝစနံ သုဏောမ ဗြူဟိ မေတံ။
‘‘ပဏှေ ဝဇ္ဈော မဟောသဓော’’တိ, ယဒိ တေ မန္တယိတံ ဇနိန္ဒ ဒေါသံ၊
ဘရိယာယ ရဟောဂတော အသံသိ, ဂုယှံ ပါတုကတံ သုတံ မမေတံ။
(ဇာ၊၁၊၃၄၉။)ယံ သာလဝနသ္မိံ သေနကော, ပါပကမ္မံ အကာသိ အသဗ္ဘိရူပံ၊
သခိနောဝ ရဟောဂတော အသံသိ, ဂုယှံ ပါတုကတံ သုတံ မမေတံ။
ပုက္ကုသ [ပက္ကုသ (က။) ဇာ။ ၁။၇။၄၁ ပဏ္ဏဇာတကေ ပဿိတဗ္ဗံ] ပုရိသဿ တေ ဇနိန္ဒ, ဥပ္ပန္နော ရောဂေါ အရာဇယုတ္တော၊
ဘာတုဉ္စ [ဘာတုစ္စ (သီ။ ပီ။), ဘာတုဝ (သျာ။)] ရဟောဂတော အသံသိ, ဂုယှံ ပါတုကတံ သုတံ မမေတံ။
အာဗာဓောယံ အသဗ္ဘိရူပေါ, ကာမိန္ဒော [ကာဝိန္ဒော (သီ။ ပီ။)] နရဒေဝေန ဖုဋ္ဌော၊
ပုတ္တဿ ရဟောဂတော အသံသိ, ဂုယှံ ပါတုကတံ သုတံ မမေတံ။
အဋ္ဌဝင်္ကံ မဏိရတနံ ဥဠာရံ, သက္ကော တေ အဒဒါ ပိတာမဟဿ၊
ဒေဝိန္ဒဿ ဂတံ တဒဇ္ဇ ဟတ္ထံ [ဒေဝိန္ဒဿ တဒဇ္ဇ ဟတ္ထဂတံ (က။)], မာတုဉ္စ ရဟောဂတော အသံသိ၊
ဂုယှံ ပါတုကတံ သုတံ မမေတံ။
ဂုယှဿ ဟိ ဂုယှမေဝ သာဓု, န ဟိ ဂုယှဿ ပသတ္ထမာဝိကမ္မံ၊
အနိပ္ဖန္နတာ သဟေယျ ဓီရော, နိပ္ဖန္နောဝ ယထာသုခံ ဘဏေယျ။
န ဂုယှမတ္ထံ ဝိဝရေယျ, ရက္ခေယျ နံ ယထာ နိဓိံ၊
န ဟိ ပါတုကတော သာဓု, ဂုယှော အတ္ထော ပဇာနတာ။
ထိယာ ဂုယှံ န သံသေယျ, အမိတ္တဿ စ ပဏ္ဍိတော၊
ယော စာမိသေန သံဟီရော, ဟဒယတ္ထေနော စ ယော နရော။
ဂုယှမတ္ထံ အသမ္ဗုဒ္ဓံ, သမ္ဗောဓယတိ ယော နရော၊
မန္တဘေဒဘယာ တဿ, ဒါသဘူတော တိတိက္ခတိ။
(ဇာ၊၁၊၃၅၀။)ယာဝန္တော ပုရိသဿတ္ထံ, ဂုယှံ ဇာနန္တိ မန္တိနံ၊
တာဝန္တော တဿ ဥဗ္ဗေဂါ, တသ္မာ ဂုယှံ န ဝိဿဇေ။
ဝိဝိစ္စ ဘာသေယျ ဒိဝါ ရဟဿံ, ရတ္တိံ ဂိရံ နာတိဝေလံ ပမုဉ္စေ၊
ဥပဿုတိကာ ဟိ သုဏန္တိ မန္တံ, တသ္မာ မန္တော ခိပ္ပမုပေတိ ဘေဒန္တိ။
ပဉ္စပဏ္ဍိတဇာတကံ ဒွါဒသမံ။
စိရဿံ ဝတ ပဿာမ, ဗြာဟ္မဏံ ဒေဝဝဏ္ဏိနံ၊
မဟာဇဋံ ခါရိဓရံ [ဘာရဓရံ (ပီ။)], ပင်္ကဒန္တံ ရဇဿိရံ။
စိရဿံ ဝတ ပဿာမ, ဣသိံ ဓမ္မဂုဏေ ရတံ၊
ကာသာယဝတ္ထဝသနံ, ဝါကစီရံ ပဋိစ္ဆဒံ။
အာသနံ ဥဒကံ ပဇ္ဇံ, ပဋိဂဏှာတု နော ဘဝံ၊
အဂ္ဃေ ဘဝန္တံ ပုစ္ဆာမ, အဂ္ဃံ ကုရုတု နော ဘဝံ။
အဓိစ္စ ဝေဒေ ပရိယေသ ဝိတ္တံ, ပုတ္တေ ဂဟေ [ဂေဟေ (သီ။ သျာ။ ပီ။)] တာတ ပတိဋ္ဌပေတွာ၊
ဂန္ဓေ ရသေ ပစ္စနုဘုယျ [ပစ္စနုဘောတွ (သျာ။), ပစ္စနုဘုတွ (ပီ။)] သဗ္ဗံ, အရညံ သာဓု မုနိ သော ပသတ္ထော။
ဝေဒါ န သစ္စာ န စ ဝိတ္တလာဘော, န ပုတ္တလာဘေန ဇရံ ဝိဟန္တိ၊
ဂန္ဓေ ရသေ မုစ္စန [မုဉ္စန (သီ။ က။)] မာဟု သန္တော, သကမ္မုနာ [သကမ္မနာ (သီ။ ပီ။)] ဟောတိ ဖလူပပတ္တိ။
အဒ္ဓါ ဟိ သစ္စံ ဝစနံ တဝေတံ, သကမ္မုနာ ဟောတိ ဖလူပပတ္တိ၊
ဇိဏ္ဏာ စ မာတာပိတရော တဝီမေ [တဝေမေ (သီ။), တဝ ယိမေ (သျာ။ ပီ။)], ပဿေယျုံ တံ ဝဿသတံ အရောဂံ [အရောဂျံ (သျာ။ က။)]။
(ဇာ၊၁၊၃၅၁။)ယဿဿ သက္ခီ မရဏေန ရာဇ, ဇရာယ မေတ္တီ နရဝီရသေဋ္ဌ၊
ယော စာပိ ဇညာ န မရိဿံ ကဒါစိ, ပဿေယျုံ တံ ဝဿသတံ အရောဂံ။
ယထာပိ နာဝံ ပုရိသော ဒကမှိ, ဧရေတိ စေ နံ ဥပနေတိ တီရံ၊
ဧဝမ္ပိ ဗျာဓီ သတတံ ဇရာ စ, ဥပနေတိ မစ္စံ [မစ္စု (သျာ။ ပီ။)] ဝသမန္တကဿ။
ပင်္ကော စ ကာမာ ပလိပေါ စ ကာမာ, မနောဟရာ ဒုတ္တရာ မစ္စုဓေယျာ၊
ဧတသ္မိံ ပင်္ကေ ပလိပေ ဗျသန္နာ [ဝိသန္နာ (သျာ။ က။)], ဟီနတ္တရူပါ န တရန္တိ ပါရံ။
အယံ ပုရေ လုဒ္ဒမကာသိ ကမ္မံ, သွာယံ ဂဟီတော န ဟိ မောက္ခိတော မေ၊
ဩရုန္ဓိယာ နံ ပရိရက္ခိဿာမိ, မာယံ ပုန လုဒ္ဒမကာသိ ကမ္မံ။
ဂဝံဝ [ဂါဝံဝ (သီ။)] နဋ္ဌံ ပုရိသော ယထာ ဝနေ, အနွေသတီ [ပရိယေသတီ (သီ။ ပီ။)] ရာဇ အပဿမာနော၊
ဧဝံ နဋ္ဌော ဧသုကာရီ မမတ္ထော, သောဟံ ကထံ န ဂဝေသေယျံ ရာဇ။
ဟိယျောတိ ဟိယျတိ [ဟီယောတိ ဟီယတိ (သီ။)] ပေါသော, ပရေတိ ပရိဟာယတိ၊
အနာဂတံ နေတမတ္ထီတိ ဉတွာ, ဥပ္ပန္နဆန္ဒံ ကော ပနုဒေယျ ဓီရော။
ပဿာမိ ဝေါဟံ ဒဟရံ [ဒဟရီ (သျာ။ ပီ။ က။)] ကုမာရိံ, မတ္တူပမံ ကေတကပုပ္ဖနေတ္တံ၊
အဘုတ္တဘောဂေ [အဘုတွ ဘောဂေ (သျာ။ က။ အဋ္ဌ။), အဘုတွ ဘောဂေ (ပီ။), ဘောဂေ အတုတွာ (က။)] ပဌမေ ဝယသ္မိံ, အာဒါယ မစ္စု ဝဇတေ ကုမာရိံ။
(ဇာ၊၁၊၃၅၂။)ယုဝါ သုဇာတော သုမုခေါ သုဒဿနော, သာမော ကုသုမ္ဘပရိကိဏ္ဏမဿု၊
ဟိတွာန ကာမေ ပဋိကစ္စ [ပဋိဂစ္စ (သီ။), ပဋိဂစ္ဆ (သျာ။ ပီ။)] ဂေဟံ, အနုဇာန မံ ပဗ္ဗဇိဿာမိ ဒေဝ။
သာခါဟိ ရုက္ခော လဘတေ သမညံ, ပဟီနသာခံ ပန ခါဏုမာဟု၊
ပဟီနပုတ္တဿ မမဇ္ဇ ဘောတိ, ဝါသေဋ္ဌိ ဘိက္ခာစရိယာယ ကာလော။
အဃသ္မိ ကောဉ္စာဝ ယထာ ဟိမစ္စယေ, ကတာနိ [တန္တာနိ (သီ။ ပီ။)] ဇာလာနိ ပဒါလိယ [ပဒါလေယျ (သီ။)] ဟံသာ၊
ဂစ္ဆန္တိ ပုတ္တာ စ ပတီ စ မယှံ, သာဟံ ကထံ နာနုဝဇေ ပဇာနံ။
ဧတေ ဘုတွာ ဝမိတွာ စ, ပက္ကမန္တိ ဝိဟင်္ဂမာ၊
ယေ စ ဘုတွာန ဝမိံသု, တေ မေ ဟတ္ထတ္တ [ဟတ္ထတ္ထ (သီ။ သျာ။ ပီ။)] မာဂတာ။
အဝမီ ဗြာဟ္မဏော ကာမေ, သော [တေ (သီ။ ပီ။)] တွံ ပစ္စာဝမိဿသိ၊
ဝန္တာဒေါ ပုရိသော ရာဇ, န သော ဟောတိ ပသံသိယော။
ပင်္ကေ စ [ပင်္ကေဝ (သီ။ ပီ။)] ပေါသံ ပလိပေ ဗျသန္နံ, ဗလီ ယထာ ဒုဗ္ဗလမုဒ္ဓရေယျ၊
ဧဝမ္ပိ မံ တွံ ဥဒတာရိ ဘောတိ, ပဉ္စာလိ ဂါထာဟိ သုဘာသိတာဟိ။
ဣဒံ ဝတွာ မဟာရာဇာ, ဧသုကာရီ ဒိသမ္ပတိ၊
ရဋ္ဌံ ဟိတွာန ပဗ္ဗဇိ, နာဂေါ ဆေတွာဝ ဗန္ဓနံ။
ရာဇာ စ ပဗ္ဗဇ္ဇမရောစယိတ္ထ, ရဋ္ဌံ ပဟာယ နရဝီရသေဋ္ဌော၊
တုဝမ္ပိ နော ဟောတိ ယထေဝ ရာဇာ, အမှေဟိ ဂုတ္တာ အနုသာသ ရဇ္ဇံ။
(ဇာ၊၁၊၃၅၃။)ရာဇာ စ ပဗ္ဗဇ္ဇမရောစယိတ္ထ, ရဋ္ဌံ ပဟာယ နရဝီရသေဋ္ဌော၊
အဟမ္ပိ ဧကာ [ဧကာဝ (သီ။)] စရိဿာမိ လောကေ, ဟိတွာန ကာမာနိ မနောရမာနိ။
ရာဇာ စ ပဗ္ဗဇ္ဇမရောစယိတ္ထ, ရဋ္ဌံ ပဟာယ နရဝီရသေဋ္ဌော၊
အဟမ္ပိ ဧကာ စရိဿာမိ လောကေ, ဟိတွာန ကာမာနိ ယထောဓိကာနိ။
အစ္စေန္တိ ကာလာ တရယန္တိ ရတ္တိယော, ဝယောဂုဏာ အနုပုဗ္ဗံ ဇဟန္တိ၊
အဟမ္ပိ ဧကာ စရိဿာမိ လောကေ, ဟိတွာန ကာမာနိ မနောရမာနိ။
အစ္စေန္တိ ကာလာ တရယန္တိ ရတ္တိယော, ဝယောဂုဏာ အနုပုဗ္ဗံ ဇဟန္တိ၊
အဟမ္ပိ ဧကာ စရိဿာမိ လောကေ, ဟိတွာန ကာမာနိ ယထောဓိကာနိ။
အစ္စေန္တိ ကာလာ တရယန္တိ ရတ္တိယော, ဝယောဂုဏာ အနုပုဗ္ဗံ ဇဟန္တိ၊
အဟမ္ပိ ဧကာ စရိဿာမိ လောကေ, သီတိဘူတာ [သီတီဘူတာ (သီ။)] သဗ္ဗမတိစ္စ သင်္ဂန္တိ။
ဟတ္ထိပါလဇာတကံ တေရသမံ။
ယမေကရတ္တိံ ပဌမံ, ဂဗ္ဘေ ဝသတိ မာဏဝေါ၊
အဗ္ဘုဋ္ဌိတောဝ သော ယာတိ [သယတိ (သီ။ ပီ။), သ ယာတိ (ကတ္ထစိ)], သဂစ္ဆံ န နိဝတ္တတိ။
(ဇာ၊၁၊၃၅၄။)န ယုဇ္ဈမာနာ န ဗလေနဝဿိတာ, နရာ န ဇီရန္တိ န စာပိ မိယျရေ၊
သဗ္ဗံ ဟိဒံ [ဟိ တံ (သီ။ ပီ။)] ဇာတိဇရာယုပဒ္ဒုတံ, တံ မေ မတီ ဟောတိ စရာမိ ဓမ္မံ။
စတုရင်္ဂိနိံ သေနံ သုဘိံသရူပံ, ဇယန္တိ ရဋ္ဌာဓိပတီ ပသယှ၊
န မစ္စုနော ဇယိတုမုဿဟန္တိ, တံ မေ မတီ ဟောတိ စရာမိ ဓမ္မံ။
ဟတ္ထီဟိ အဿေဟိ ရထေဟိ ပတ္တိဘိ, ပရိဝါရိတာ မုစ္စရေ ဧကစ္စေယျာ [ဧကစေယျာ (သီ။ ပီ။)]၊
န မစ္စုနော [န မစ္စုတော (သီ။)] မုစ္စိတုမုဿဟန္တိ, တံ မေ မတီ ဟောတိ စရာမိ ဓမ္မံ။
ဟတ္ထီဟိ အဿေဟိ ရထေဟိ ပတ္တိဘိ, သူရာ [ပုရာ (က။)] ပဘဉ္ဇန္တိ ပဓံသယန္တိ၊
န မစ္စုနော ဘဉ္ဇိတုမုဿဟန္တိ, တံ မေ မတီ ဟောတိ စရာမိ ဓမ္မံ။
မတ္တာ ဂဇာ ဘိန္နဂဠာ [ပဘိန္နဂလာ (သီ။)] ပဘိန္နာ, နဂရာနိ မဒ္ဒန္တိ ဇနံ ဟနန္တိ၊
န မစ္စုနော မဒ္ဒိတုမုဿဟန္တိ, တံ မေ မတီ ဟောတိ စရာမိ ဓမ္မံ။
ဣဿာသိနော ကတဟတ္ထာပိ ဝီရာ [ဝီရာ (သီ။ ပီ။)], ဒူရေပါတီ [ပတီ (က။)] အက္ခဏဝေဓိနောပိ၊
န မစ္စုနော ဝိဇ္ဈိတုမုဿဟန္တိ, တံ မေ မတီ ဟောတိ စရာမိ ဓမ္မံ။
သရာနိ ခီယန္တိ သသေလကာနနာ, သဗ္ဗံ ဟိဒံ [ဟိ တံ (သီ။ ပီ။), ပိတံ (သျာ။)] ခီယတိ ဒီဃမန္တရံ၊
သဗ္ဗံ ဟိဒံ [ဟိ တံ (သီ။ ပီ။), ပိတံ (သျာ။)] ဘဉ္ဇရေ ကာလပရိယာယံ, တံ မေ မတီ ဟောတိ စရာမိ ဓမ္မံ။
(ဇာ၊၁၊၃၅၅။)သဗ္ဗေ သမေဝံ ဟိ နရာနနာရိနံ [နရာနရီနံ (ပီ။), နာရီ နရာနံ (သျာ။), နရနာရီနံ (က။)], စလာစလံ ပါဏဘုနောဓ ဇီဝိတံ၊
ပဋောဝ ဓုတ္တဿ ဒုမောဝ ကူလဇော, တံ မေ မတီ ဟောတိ စရာမိ ဓမ္မံ။
ဒုမပ္ဖလာနေဝ ပတန္တိ မာဏဝါ, ဒဟရာ စ ဝုဒ္ဓါ စ သရီရဘေဒါ၊
နာရိယော နရာ မဇ္ဈိမပေါရိသာ စ, တံ မေ မတီ ဟောတိ စရာမိ ဓမ္မံ။
နာယံ ဝယော တာရကရာဇသန္နိဘော, ယဒဗ္ဘတီတံ ဂတမေဝ ဒါနိ တံ၊
ဇိဏ္ဏဿ ဟီ နတ္ထိ ရတီ ကုတော သုခံ, တံ မေ မတီ ဟောတိ စရာမိ ဓမ္မံ။
ယက္ခာ ပိသာစာ အထဝါပိ ပေတာ, ကုပိတာတေ [ကုပိတာပိ တေ (သီ။ ပီ။)] အဿသန္တိ မနုဿေ၊
န မစ္စုနော အဿသိတုဿဟန္တိ, တံ မေ မတီ ဟောတိ စရာမိ ဓမ္မံ။
ယက္ခေ ပိသာစေ အထဝါပိ ပေတေ, ကုပိတေပိ တေ နိဇ္ဈပနံ ကရောန္တိ၊
န မစ္စုနော နိဇ္ဈပနံ ကရောန္တိ, တံ မေ မတီ ဟောတိ စရာမိ ဓမ္မံ။
အပရာဓကေ ဒူသကေ ဟေဌကေ စ, ရာဇာနော ဒဏ္ဍေန္တိ ဝိဒိတွာန ဒေါသံ၊
န မစ္စုနော ဒဏ္ဍယိတုဿဟန္တိ, တံ မေ မတီ ဟောတိ စရာမိ ဓမ္မံ။
အပရာဓကာ ဒူသကာ ဟေဋ္ဌကာ စ, လဘန္တိ တေ ရာဇိနော နိဇ္ဈပေတုံ၊
န မစ္စုနော နိဇ္ဈပနံ ကရောန္တိ, တံ မေ မတီ ဟောတိ စရာမိ ဓမ္မံ။
(ဇာ၊၁၊၃၅၆။)န ခတ္တိယောတိ န စ ဗြာဟ္မဏောတိ, န အဍ္ဎကာ ဗလဝါ တေဇဝါပိ၊
န မစ္စုရာဇဿ အပေက္ခမတ္ထိ, တံ မေ မတီ ဟောတိ စရာမိ ဓမ္မံ။
သီဟာ စ ဗျဂ္ဃါ စ အထောပိ ဒီပိယော, ပသယှ ခါဒန္တိ ဝိပ္ဖန္ဒမာနံ၊
န မစ္စုနော ခါဒိတုမုဿဟန္တိ, တံ မေ မတီ ဟောတိ စရာမိ ဓမ္မံ။
မာယာကာရာ ရင်္ဂမဇ္ဈေ ကရောန္တာ, မောဟေန္တိ စက္ခူနိ ဇနဿ တာဝဒေ၊
န မစ္စုနော မောဟယိတုဿဟန္တိ, တံ မေ မတီ ဟောတိ စရာမိ ဓမ္မံ။
အာသီဝိသာ ကုပိတာ ဥဂ္ဂတေဇာ, ဍံသန္တိ မာရေန္တိပိ တေ မနုဿေ၊
န မစ္စုနော ဍံသိတုမုဿဟန္တိ, တံ မေ မတီ ဟောတိ စရာမိ ဓမ္မံ။
အာသီဝိသာ ကုပိတာ ယံ ဍံသန္တိ, တိကိစ္ဆကာ တေသ ဝိသံ ဟနန္တိ၊
န မစ္စုနော ဒဋ္ဌဝိသံ [ဒဋ္ဌဿ ဝိသံ (က။)] ဟနန္တိ, တံ မေ မတီ ဟောတိ စရာမိ ဓမ္မံ။
ဓမ္မန္တရီ ဝေတ္တရဏီ [ဝေတရဏီ (သီ။ ပီ။)] စ ဘောဇော, ဝိသာနိ ဟန္တွာန ဘုဇင်္ဂမာနံ၊
သုယျန္တိ တေ ကာလကတာ တထေဝ, တံ မေ မတီ ဟောတိ စရာမိ ဓမ္မံ။
ဝိဇ္ဇာဓရာ ဃောရမဓီယမာနာ, အဒဿနံ ဩသဓေဟိ ဝဇန္တိ၊
န မစ္စုရာဇဿ ဝဇန္တဒဿနံ [ဝဇန္တိ အဒဿနံ (သျာ။ က။)], တံ မေ မတီ ဟောတိ စရာမိ ဓမ္မံ။
(ဇာ၊၁၊၃၅၇။)ဓမ္မော ဟဝေ ရက္ခတိ ဓမ္မစာရိံ, ဓမ္မော သုစိဏ္ဏော သုခမာဝဟာတိ၊
ဧသာနိသံသော ဓမ္မေ သုစိဏ္ဏေ, န ဒုဂ္ဂတိံ ဂစ္ဆတိ ဓမ္မစာရီ။
န ဟိ ဓမ္မော အဓမ္မော စ, ဥဘော သမဝိပါကိနော၊
အဓမ္မော နိရယံ နေတိ, ဓမ္မော ပါပေတိ သုဂ္ဂတိန္တိ။
အယောဃရဇာတကံ စုဒ္ဒသမံ။
တဿုဒ္ဒါနံ –
မာတင်္ဂ သမ္ဘူတ သိဝိ သိရိမန္တော, ရောဟဏ ဟံသ သတ္တိဂုမ္ဗော ဘလ္လာတိယ၊
သောမနဿ စမ္ပေယျ ဗြဟ္မ ပဉ္စ-ပဏ္ဍိတ စိရဿံဝတ အယောဃရာတိ။
ဝီသတိနိပါတံ နိဋ္ဌိတံ။
(ဇာ၊၁၊၃၅၈။)၁၆။ တိံသနိပါတော
ကိံဆန္ဒော ကိမဓိပ္ပါယော, ဧကော သမ္မသိ ဃမ္မနိ၊
ကိံ ပတ္ထယာနော ကိံ ဧသံ, ကေန အတ္ထေန ဗြာဟ္မဏ။
ယထာ မဟာ ဝါရိဓရော, ကုမ္ဘော သုပရိဏာဟဝါ [သုပရိဏာမဝါ (က။)]၊
တထူပမံ အမ္ဗပက္ကံ, ဝဏ္ဏဂန္ဓရသုတ္တမံ။
တံ ဝုယှမာနံ သောတေန, ဒိသွာနာမလမဇ္ဈိမေ၊
ပါဏီဟိ နံ ဂဟေတွာန, အဂျာယတနမာဟရိံ။
တတော ကဒလိပတ္တေသု, နိက္ခိပိတွာ သယံ အဟံ၊
သတ္ထေန နံ ဝိကပ္ပေတွာ, ခုပ္ပိပါသံ အဟာသိ မေ။
သောဟံ အပေတဒရထော, ဗျန္တီဘူတော [ဗျန္တိဘူတော (သီ။ ပီ။ က။)] ဒုခက္ခမော၊
အဿာဒံ နာဓိဂစ္ဆာမိ, ဖလေသွညေသု ကေသုစိ [ကေသုပိ (က။ သီ။)]။
သောသေတွာ နူန မရဏံ, တံ မမံ အာဝဟိဿတိ၊
အမ္ဗံ ယဿ ဖလံ သာဒု, မဓုရဂ္ဂံ မနောရမံ၊
ယမုဒ္ဓရိံ ဝုယှမာနံ, ဥဒဓိသ္မာ မဟဏ္ဏဝေ။
အက္ခာတံ တေ မယာ သဗ္ဗံ, ယသ္မာ ဥပဝသာမဟံ၊
ရမ္မံ ပတိ နိသိန္နောသ္မိ, ပုထုလောမာယုတာ ပုထု။
တွဉ္စ ခေါ မေဝ [မေ (သီ။), မမ (?)] အက္ခာဟိ, အတ္တာနမပလာယိနိ၊
ကာ ဝါ တွမသိ ကလျာဏိ, ကိဿ ဝါ တွံ သုမဇ္ဈိမေ။
ရုပ္ပပဋ္ဋပလိမဋ္ဌီဝ [ရုပ္ပပဋ္ဋပ္လမဋ္ဌီဝ (သျာ။), ရူပပဋ္ဋပမဋ္ဌီဝ (က။)], ဗျဂ္ဃီဝ ဂိရိသာနုဇာ၊
ယာ သန္တိ နာရိယော ဒေဝေသု, ဒေဝါနံ ပရိစာရိကာ။
ယာ စ မနုဿလောကသ္မိံ, ရူပေနာနွာဂတိတ္ထိယော၊
ရူပေန တေ သဒိသီ နတ္ထိ, ဒေဝေသု ဂန္ဓဗ္ဗမနုဿလောကေ [ဒေဝဂန္ဓဗ္ဗမာနုသေ (သျာ။)]၊
ပုဋ္ဌာသိ မေ စာရုပုဗ္ဗင်္ဂိ, ဗြူဟိ နာမဉ္စ ဗန္ဓဝေ။
(ဇာ၊၁၊၃၅၉။)ယံ တွံ ပတိ နိသိန္နောသိ, ရမ္မံ ဗြာဟ္မဏ ကောသိကိံ၊
သာဟံ ဘုသာလယာ ဝုတ္ထာ, ဝရဝါရိဝဟောဃသာ။
နာနာဒုမဂဏာကိဏ္ဏာ, ဗဟုကာ ဂိရိကန္ဒရာ၊
မမေဝ ပမုခါ ဟောန္တိ, အဘိသန္ဒန္တိ ပါဝုသေ။
အထော ဗဟူ ဝနတောဒါ, နီလဝါရိဝဟိန္ဓရာ၊
ဗဟုကာ နာဂဝိတ္တောဒါ, အဘိသန္ဒန္တိ ဝါရိနာ။
တာ အမ္ဗဇမ္ဗုလဗုဇာ, နီပါ တာလာ စုဒုမ္ဗရာ [တာလမုဒုမ္ဗရာ (သျာ။ က။)]၊
ဗဟူနိ ဖလဇာတာနိ, အာဝဟန္တိ အဘိဏှသော။
ယံ ကိဉ္စိ ဥဘတော တီရေ, ဖလံ ပတတိ အမ္ဗုနိ၊
အသံသယံ တံ သောတဿ, ဖလံ ဟောတိ ဝသာနုဂံ။
ဧတဒညာယ မေဓာဝိ, ပုထုပည သုဏောဟိ မေ၊
မာ ရောစယ မဘိသင်္ဂံ, ပဋိသေဓ ဇနာဓိပ။
န ဝါဟံ ဝဍ္ဎဝံ [ဝဒ္ဓဝံ (သီ။ ပီ။)] မညေ, ယံ တွံ ရဋ္ဌာဘိဝဍ္ဎန၊
အာစေယျမာနော ရာဇိသိ, မရဏံ အဘိကင်္ခသိ။
တဿ ဇာနန္တိ ပိတရော, ဂန္ဓဗ္ဗာ စ သဒေဝကာ၊
ယေ စာပိ ဣသယော လောကေ, သညတတ္တာ တပဿိနော၊
အသံသယံ တေပိ [တေ (သီ။ ပီ။)] ဇာနန္တိ, ပဋ္ဌဘူတာ [ဝဒ္ဓဘူတာ (သီ။ ပီ။)] ယသဿိနော။
ဧဝံ ဝိဒိတွာ ဝိဒူ သဗ္ဗဓမ္မံ, ဝိဒ္ဓံသနံ စဝနံ ဇီဝိတဿ၊
န စီယတီ တဿ နရဿ ပါပံ, သစေ န စေတေတိ ဝဓာယ တဿ။
ဣသိပူဂသမညာတေ, ဧဝံ လောကျာ ဝိဒိတာ သတိ [ပတိ (က။ သျာ။ က။)]၊
အနရိယပရိသမ္ဘာသေ, ပါပကမ္မံ ဇိဂီသသိ [ဇိဂိံသသိ (သီ။ သျာ။ ပီ။)]။
သစေ အဟံ မရိဿာမိ, တီရေ တေ ပုထုသုဿောဏိ၊
အသံသယံ တံ အသိလောကော, မယိ ပေတေ အာဂမိဿတိ။
(ဇာ၊၁၊၃၆၀။)တသ္မာ ဟိ ပါပကံ ကမ္မံ, ရက္ခဿေဝ [ရက္ခဿု စ (သျာ။)] သုမဇ္ဈိမေ၊
မာ တံ သဗ္ဗော ဇနော ပစ္ဆာ, ပကုဋ္ဌာယိ [ပကတ္ထာသိ (သီ။ ပီ။), ပတွက္ခာသိ (သျာ။)] မယိ မတေ။
အညာတမေတံ အဝိသယှသာဟိ, အတ္တာနမမ္ဗဉ္စ ဒဒါမိ တေ တံ၊
သော ဒုစ္စဇေ ကာမဂုဏေ ပဟာယ, သန္တိဉ္စ ဓမ္မဉ္စ အဓိဋ္ဌိတောသိ။
ယော ဟိတွာ ပုဗ္ဗသညောဂံ, ပစ္ဆာ သံယောဇနေ ဌိတော၊
အဓမ္မဉ္စေဝ စရတိ, ပါပဉ္စဿ ပဝဍ္ဎတိ။
ဧဟိ တံ ပါပယိဿာမိ, ကာမံ အပ္ပေါဿုကော ဘဝ၊
ဥပါနယာမိ သီတသ္မိံ, ဝိဟရာဟိ အနုဿုကော။
တံ ပုပ္ဖရသမတ္တေဘိ, ဝက္ကင်္ဂေဟိ အရိန္ဒမ၊
ကောဉ္စာ မယူရာ ဒိဝိယာ, ကောလဋ္ဌိမဓုသာဠိကာ၊
ကူဇိတာ ဟံသပူဂေဟိ, ကောကိလေတ္ထ ပဗောဓရေ။
အမ္ဗေတ္ထ ဝိပ္ပသာခဂ္ဂါ [ဝိပ္ပသူနဂ္ဂါ (သီ။ သျာ။ ပီ။), ဝိပ္ပဩနဂ္ဂါ (က။)], ပလာလခလသန္နိဘာ၊
ကောသမ္ဗသဠလာ [ကောသုမ္ဘသလလာ (သီ။ သျာ။ ပီ။)] နီပါ, ပက္ကတာလဝိလမ္ဗိနော။
မာလီ တိရိဋီ ကာယူရီ, အင်္ဂဒီ စန္ဒနုဿဒေါ [စန္ဒနဿဒေါ (သီ။)]၊
ရတ္တိံ တွံ ပရိစာရေသိ, ဒိဝါ ဝေဒေသိ ဝေဒနံ။
သောဠသိတ္ထိသဟဿာနိ, ယာ တေမာ ပရိစာရိကာ၊
ဧဝံ မဟာနုဘာဝေါသိ, အဗ္ဘုတော လောမဟံသနော။
ကိံ ကမ္မမကရီ ပုဗ္ဗေ, ပါပံ အတ္တဒုခါဝဟံ၊
ယံ ကရိတွာ မနုဿေသု, ပိဋ္ဌိမံသာနိ ခါဒသိ။
အဇ္ဈေနာနိ ပဋိဂ္ဂယှ, ကာမေသု ဂဓိတော [ဂထိတော (သီ။ ပီ။), ဂိဒ္ဓိတော (သျာ။ က။), ဂိဒ္ဓိကော (က။ အဋ္ဌ။)] အဟံ၊
အစရိံ ဒီဃမဒ္ဓါနံ, ပရေသံ အဟိတာယဟံ။
ယော ပိဋ္ဌိမံသိကော ဟောတိ, ဧဝံ ဥက္ကစ္စ ခါဒတိ၊
ယထာဟံ အဇ္ဇ ခါဒါမိ, ပိဋ္ဌိမံသာနိ အတ္တနောတိ။
ကိံဆန္ဒဇာတကံ ပဌမံ။
(ဇာ၊၁၊၃၆၁။)ကော ပါတုရာသီ တိဒိဝါ နဘမှိ, ဩဘာသယံ သံဝရိံ စန္ဒိမာဝ၊
ဂတ္တေဟိ တေ ရသ္မိယော နိစ္ဆရန္တိ, သတေရတာ [သတေရိတာ (သီ။ သျာ။ က။)] ဝိဇ္ဇုရိဝန္တလိက္ခေ။
သော ဆိန္နဝါတံ ကမသီ အဃမှိ, ဝေဟာယသံ ဂစ္ဆသိ တိဋ္ဌသီ စ၊
ဣဒ္ဓီ နု တေ ဝတ္ထုကတာ သုဘာဝိတာ, အနဒ္ဓဂူနံ အပိ ဒေဝတာနံ။
ဝေဟာယသံ ဂမ္မမာဂမ္မ [ကမမာဂမ္မ (သီ။ သျာ။)] တိဋ္ဌသိ, ကုမ္ဘံ ကိဏာထာတိ ယမေတမတ္ထံ၊
ကော ဝါ တုဝံ ကိဿ ဝါ တာယ ကုမ္ဘော, အက္ခာဟိ မေ ဗြာဟ္မဏ ဧတမတ္ထံ။
န သပ္ပိကုမ္ဘော နပိ တေလကုမ္ဘော, န ဖာဏိတဿ န မဓုဿ ကုမ္ဘော၊
ကုမ္ဘဿ ဝဇ္ဇာနိ အနပ္ပကာနိ, ဒေါသေ ဗဟူ ကုမ္ဘဂတေ သုဏာထ။
ဂဠေယျ ယံ ပိတွာ [ပီတွာ (သီ။ ပီ။)] ပတေ ပပါတံ, သောဗ္ဘံ ဂုဟံ စန္ဒနိယောဠိဂလ္လံ၊
ဗဟုမ္ပိ ဘုဉ္ဇေယျ အဘောဇနေယျံ, တဿာ ပုဏ္ဏံ ကုမ္ဘမိမံ ကိဏာထ။
ယံ ပိတွာ [ယံ ဝေ ပီတွာ (သီ။)] စိတ္တသ္မိမနေသမာနော, အာဟိဏ္ဍတီ ဂေါရိဝ ဘက္ခသာရီ [ဘက္ခသာဒီ (သီ။ သျာ။ အဋ္ဌ။)]၊
အနာထမာနော ဥပဂါယတိ နစ္စတိ စ, တဿာ ပုဏ္ဏံ ကုမ္ဘမိမံ ကိဏာထ။
(ဇာ၊၁၊၃၆၂။)ယံ ဝေ ပိဝိတွာ အစေလောဝ နဂ္ဂေါ, စရေယျ ဂါမေ ဝိသိခန္တရာနိ၊
သမ္မူဠှစိတ္တော အတိဝေလသာယီ, တဿာ ပုဏ္ဏံ ကုမ္ဘမိမံ ကိဏာထ။
ယံ ပိတွာ ဥဋ္ဌာယ ပဝေဓမာနော, သီသဉ္စ ဗာဟုဉ္စ [ဗာဟဉ္စ (ပီ။)] ပစာလယန္တော၊
သော နစ္စတီ ဒါရုကဋလ္လကောဝ, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိဝိတွာ အဂ္ဂိဒဍ္ဎာ သယန္တိ, အထော သိဂါလေဟိပိ ခါဒိတာသေ၊
ဗန္ဓံ ဝဓံ ဘောဂဇာနိဉ္စုပေန္တိ, တဿာ ပုဏ္ဏံ ကုမ္ဘမိမံ ကိဏာထ။
ယံ ပိတွာ ဘာသေယျ အာဘာသနေယျံ, သဘာယမာသီနော အပေတဝတ္ထော၊
သမ္မက္ခိတော [သမက္ခိတော (သီ။)] ဝန္တဂတော ဗျသန္နော, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိဝိတွာ ဥက္ကဋ္ဌော အာဝိလက္ခော, မမေဝ သဗ္ဗာ ပထဝီတိ မညေ [မညတိ (သီ။)]၊
န မေ သမော စာတုရန္တောပိ ရာဇာ, တဿာ ပုဏ္ဏံ ကုမ္ဘမိမံ ကိဏာထ။
မာနာတိမာနာ ကလဟာနိ ပေသုဏီ, ဒုဗ္ဗဏ္ဏိနီ နဂ္ဂယိနီ ပလာယိနီ၊
စောရာန ဓုတ္တာန ဂတီ နိကေတော, တဿာ ပုဏ္ဏံ ကုမ္ဘမိမံ ကိဏာထ။
ဣဒ္ဓါနိ ဖီတာနိ ကုလာနိ အဿု, အနေကသာဟဿဓနာနိ လောကေ၊
ဥစ္ဆိန္နဒါယဇ္ဇကတာနိမာယ, တဿာ ပုဏ္ဏံ ကုမ္ဘမိမံ ကိဏာထ။
(ဇာ၊၁၊၃၆၃။)ဓညံ ဓနံ ရဇတံ ဇာတရူပံ, ခေတ္တံ ဂဝံ ယတ္ထ ဝိနာသယန္တိ၊
ဥစ္ဆေဒနီ ဝိတ္တဝတံ [ဥစ္ဆေဒနီ ဝိတ္တဂတံ (သျာ။), ဥစ္ဆေဒနိဝိတ္တဂတံ (က။)] ကုလာနံ, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိတွာ ဒိတ္တရူပေါဝ [ဒုဋ္ဌရူပေါဝ (သီ။)] ပေါသော, အက္ကောသတိ မာတရံ ပိတရဉ္စ၊
သဿုမ္ပိ ဂဏှေယျ အထောပိ သုဏှံ, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိတွာ ဒိတ္တရူပါဝ နာရီ, အက္ကောသတိ သသုရံ သာမိကဉ္စ၊
ဒါသမ္ပိ ဂဏှေ ပရိစာရကမ္ပိ, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိဝိတွာန [ယဉ္စေ ပီတွာန (ပီ။)] ဟနေယျ ပေါသော, ဓမ္မေ ဌိတံ သမဏံ ဗြာဟ္မဏံ ဝါ၊
ဂစ္ဆေ အပါယမ္ပိ တတောနိဒါနံ, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိဝိတွာ ဒုစ္စရိတံ စရန္တိ, ကာယေန ဝါစာယ စ စေတသာ စ၊
နိရယံ ဝဇန္တိ ဒုစ္စရိတံ စရိတွာ, တဿာ ပုဏ္ဏံ ကုမ္ဘမိမံ ကိဏာထ။
ယံ ယာစမာနာ န လဘန္တိ ပုဗ္ဗေ, ဗဟုံ ဟိရညမ္ပိ ပရိစ္စဇန္တာ၊
သော တံ ပိဝိတွာ အလိကံ ဘဏာတိ, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိတွာ ပေသနေ ပေသိယန္တော, အစ္စာယိကေ ကရဏီယမှိ ဇာတေ၊
အတ္ထမ္ပိ သော နပ္ပဇာနာတိ ဝုတ္တော, တဿာ ပုဏ္ဏံ ကုမ္ဘမိမံ ကိဏာထ။
(ဇာ၊၁၊၃၆၄။)ဟိရီမနာပိ အဟိရီကဘာဝံ, ပါတုံ ကရောန္တိ မဒနာယ [မဒိရာယ (ပီ။)] မတ္တာ၊
ဓီရာပိ သန္တာ ဗဟုကံ ဘဏန္တိ, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိတွာ ဧကထူပါ သယန္တိ, အနာသကာ ထဏ္ဍိလဒုက္ခသေယျံ၊
ဒုဗ္ဗဏ္ဏိယံ အာယသကျဉ္စုပေန္တိ, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိတွာ ပတ္တခန္ဓာ သယန္တိ, ဂါဝေါ ကုဋဟတာဝ န ဟိ ဝါရုဏိယာ၊
[ယံ ဝေ ပိတွာ ပတ္တက္ခန္ဓာ, သယန္တိ ဂါဝေါ ကူဋဟတာရိဝ၊ န ဟိ ဝါရုဏိယာ ဝေဂေါ, နရေန သုဿဟောရိဝ၊ (သီ။)] ဝေဂေါ နရေန သုသဟောရိဝ [ယံ ဝေ ပိတွာ ပတ္တက္ခန္ဓာ, သယန္တိ ဂါဝေါ ကူဋဟတာရိဝ၊ န ဟိ ဝါရုဏိယာ ဝေဂေါ, နရေန သုဿဟောရိဝ၊ (သီ။)], တဿာ ပုဏ္ဏံ ကုမ္ဘမိမံ ကိဏာထ။
ယံ မနုဿာ ဝိဝဇ္ဇေန္တိ, သပ္ပံ ဃောရဝိသံ မိဝ [ဝိသမိဝ (သျာ။), ဝိသံ ဣဝ (က။), ဝိသာမိဝ (?)]၊
တံ လောကေ ဝိသသမာနံ, ကော နရော ပါတုမရဟတိ။
ယံ ဝေ ပိတွာ အန္ဓကဝေဏ္ဍပုတ္တာ, သမုဒ္ဒတီရေ ပရိစာရယန္တာ [အန္ဓကဝေဏှုပုတ္တာ (သီ။ ပီ။), အဏ္ဍကဝေဏ္ဍပုတ္တာ (က။)]၊
ဥပက္ကမုံ မုသလေဟညမညံ, တဿာ ပုဏ္ဏံ ကုမ္ဘမိမံ ကိဏာထ။
ယံ ဝေ ပိတွာ ပုဗ္ဗဒေဝါ ပမတ္တာ, တိဒိဝါ စုတာ သဿတိယာ သမာယ၊
တံ တာဒိသံ မဇ္ဇမိမံ နိရတ္ထကံ, ဇာနံ မဟာရာဇ ကထံ ပိဝေယျ။
နယိမသ္မိံ ကုမ္ဘသ္မိံ ဒဓိ ဝါ မဓု ဝါ, ဧဝံ အဘိညာယ ကိဏာဟိ ရာဇ၊
ဧဝဉှိမံ ကုမ္ဘဂတာ မယာ တေ, အက္ခာတရူပံ တဝ သဗ္ဗမိတ္တ။
(ဇာ၊၁၊၃၆၅။)န မေ ပိတာ ဝါ အထဝါပိ မာတာ, ဧတာဒိသာ ယာဒိသကော တုဝံသိ၊
ဟိတာနုကမ္ပီ ပရမတ္ထကာမော, သောဟံ ကရိဿံ ဝစနံ တဝဇ္ဇ။
ဒဒါမိ တေ ဂါမဝရာနိ ပဉ္စ, ဒါသီသတံ သတ္တ ဂဝံ သတာနိ၊
အာဇညယုတ္တေ စ ရထေ ဒသ ဣမေ, အာစရိယော ဟောသိ မမတ္ထကာမော။
တဝေဝ ဒါသီသတမတ္ထု ရာဇ, ဂါမာ စ ဂါဝေါ စ တဝေဝ ဟောန္တု၊
အာဇညယုတ္တာ စ ရထာ တဝေဝ, သက္ကောဟမသ္မီ တိဒသာနမိန္ဒော။
မံသောဒနံ သပ္ပိပါယာသံ [သပ္ပိပါယဉ္စ (သီ။)] ဘုဉ္ဇ, ခါဒဿု စ တွံ မဓုမာသပူဝေ၊
ဧဝံ တုဝံ ဓမ္မရတော ဇနိန္ဒ, အနိန္ဒိတော သဂ္ဂမုပေဟိ ဌာနန္တိ။
ကုမ္ဘဇာတကံ ဒုတိယံ။
စိရဿံ ဝတ မေ ဥဒပါဒိ အဇ္ဇ, ဘက္ခော မဟာ သတ္တမိဘတ္တကာလေ၊
ကုတောသိ ကော ဝါသိ တဒိင်္ဃ ဗြူဟိ, အာစိက္ခ ဇာတိံ ဝိဒိတော ယထာသိ။
ပဉ္စာလရာဇာ မိဂဝံ ပဝိဋ္ဌော, ဇယဒ္ဒိသော နာမ ယဒိဿုတော တေ၊
စရာမိ ကစ္ဆာနိ ဝနာနိ စာဟံ, ပသဒံ ဣမံ ခါဒ မမဇ္ဇ မုဉ္စ။
(ဇာ၊၁၊၃၆၆။)သေနေဝ တွံ ပဏသိ သဿမာနော [သယှမာနော (သျာ။ က။)], မမေသ ဘက္ခော ပသဒေါ ယံ ဝဒေသိ၊
တံ ခါဒိယာန ပသဒံ ဇိဃညံ [ဇိဃစ္ဆံ (?)], ခါဒိဿံ ပစ္ဆာ န ဝိလာပကာလော။
န စတ္ထိ မောက္ခော မမ နိက္ကယေန [ဝိက္ကယေန (သီ။)], ဂန္တွာန ပစ္စာဂမနာယ ပဏှေ၊
တံ သင်္ကရံ [သင်္ဂရံ (သီ။ သျာ။ ပီ။)] ဗြာဟ္မဏဿပ္ပဒါယ, သစ္စာနုရက္ခီ ပုနရာဝဇိဿံ။
ကိံ ကမ္မဇာတံ အနုတပ္ပတေ တွံ [အနုတပ္ပတီ တံ (သီ။ ပီ။)], ပတ္တံ သမီပံ မရဏဿ ရာဇ၊
အာစိက္ခ မေ တံ အပိ သက္ကုဏေမု, အနုဇာနိတုံ အာဂမနာယ ပဏှေ။
ကတာ မယာ ဗြာဟ္မဏဿ ဓနာသာ, တံ သင်္ကရံ ပဋိမုက္ကံ န မုတ္တံ၊
တံ သင်္ကရံ ဗြာဟ္မဏဿပ္ပဒါယ, သစ္စာနုရက္ခီ ပုနရာဝဇိဿံ။
ယာ တေ ကတာ ဗြာဟ္မဏဿ ဓနာသာ, တံ သင်္ကရံ ပဋိမုက္ကံ န မုတ္တံ၊
တံ သင်္ကရံ ဗြာဟ္မဏဿပ္ပဒါယ, သစ္စာနုရက္ခီ ပုနရာဝဇဿု။
မုတ္တော စ သော ပေါရိသာဒဿ [ပုရိသာဒဿ (ပီ။)] ဟတ္ထာ, ဂန္တွာ သကံ မန္ဒိရံ ကာမကာမီ၊
တံ သင်္ကရံ ဗြာဟ္မဏဿပ္ပဒါယ, အာမန္တယီ ပုတ္တမလီနသတ္တံ [သတ္တုံ (သျာ။ ပီ။ က။)]။
(ဇာ၊၁၊၃၆၇။)အဇ္ဇေဝ ရဇ္ဇံ အဘိသိဉ္စယဿု, ဓမ္မံ စရ သေသု ပရေသု စာပိ၊
အဓမ္မကာရော စ တေ မာဟု ရဋ္ဌေ, ဂစ္ဆာမဟံ ပေါရိသာဒဿ ဉတ္တေ [ဉန္တေ (သျာ။)]။
ကိံ ကမ္မ ကုဗ္ဗံ တဝ ဒေဝ ပါဝ [ဒေဝပါဒေ (သီ။ သျာ။ ပီ။)], နာရာဓယီ တံ တဒိစ္ဆာမိ သောတုံ၊
ယမဇ္ဇ ရဇ္ဇမှိ ဥဒဿယေ တုဝံ, ရဇ္ဇမ္ပိ နိစ္ဆေယျံ တယာ ဝိနာဟံ။
န ကမ္မုနာ ဝါ ဝစသာ ဝ တာတ, အပရာဓိတောဟံ တုဝိယံ သရာမိ၊
သန္ဓိဉ္စ [သဒ္ဓိံ စ (က။)] ကတွာ ပုရိသာဒကေန, သစ္စာနုရက္ခီ ပုနာဟံ ဂမိဿံ။
အဟံ ဂမိဿာမိ ဣဓေဝ ဟောဟိ, နတ္ထိ တတော ဇီဝတော ဝိပ္ပမောက္ခော၊
သစေ တုဝံ ဂစ္ဆသိယေဝ ရာဇ, အဟမ္ပိ ဂစ္ဆာမိ ဥဘော န ဟောမ။
အဒ္ဓါ ဟိ တာတ သတာနေသ ဓမ္မော, မရဏာ စ မေ ဒုက္ခတရံ တဒဿ၊
ကမ္မာသပါဒေါ တံ ယဒါ ပစိတွာ, ပသယှ ခါဒေ ဘိဒါ ရုက္ခသူလေ။
ပါဏေန တေ ပါဏမဟံ နိမိဿံ, မာ တွံ အဂါ ပေါရိသာဒဿ ဉတ္တေ၊
ဧတဉ္စ တေ ပါဏမဟံ နိမိဿံ, တသ္မာ မတံ ဇီဝိတဿ ဝဏ္ဏေမိ [ဝရေမိ (သီ။)]။
တတော ဟဝေ ဓိတိမာ ရာဇပုတ္တော, ဝန္ဒိတွာ မာတု စ ပိတု စ [ဝန္ဒိတ္ထ မာတုစ္စ ပိတုစ္စ (သီ။ ပီ။)] ပါဒေ၊
ဒုခိနိဿ မာတာ နိပတာ [နိပတီ (သီ။ ပီ။)] ပထဗျာ, ပိတာဿ ပဂ္ဂယှ ဘုဇာနိ ကန္ဒတိ။
(ဇာ၊၁၊၃၆၈။)တံ ဂစ္ဆန္တံ တာဝ ပိတာ ဝိဒိတွာ, ပရမ္မုခေါ ဝန္ဒတိ ပဉ္ဇလီကော၊
သောမော စ ရာဇာ ဝရုဏော စ ရာဇာ, ပဇာပတီ စန္ဒိမာ သူရိယော စ၊
ဧတေဟိ ဂုတ္တော ပုရိသာဒကမှာ, အနုညာတော သောတ္ထိ ပစ္စေဟိ တာတ။
ယံ ဒဏ္ဍကိရညော ဂတဿ [ယံ ဒဏ္ဍကာရညဂတဿ (ပီ။)] မာတာ, ရာမဿကာသိ သောတ္ထာနံ သုဂုတ္တာ၊
တံ တေ အဟံ သောတ္ထာနံ ကရောမိ, ဧတေန သစ္စေန သရန္တု ဒေဝါ၊
အနုညာတော သောတ္ထိ ပစ္စေဟိ ပုတ္တ။
အာဝီ ရဟော ဝါပီ မနောပဒေါသံ, နာဟံ သရေ ဇာတု မလီနသတ္တေ၊
ဧတေန သစ္စေန သရန္တု ဒေဝါ, အနုညာတော သောတ္ထိ ပစ္စေဟိ ဘာတိက [ဘာတ (သီ။), ဘာတာ (သျာ။ ပီ။)]။
ယသ္မာ စ မေ အနဓိမနောသိ သာမိ, န စာပိ မေ မနသာ အပ္ပိယောသိ၊
ဧတေန သစ္စေန သရန္တု ဒေဝါ, အနုညာတော သောတ္ထိ ပစ္စေဟိ သာမိ။
ဗြဟာ ဥဇူ စာရုမုခေါ ကုတောသိ, န မံ ပဇာနာသိ ဝနေ ဝသန္တံ၊
လုဒ္ဒံ မံ ဉတွာ ‘‘ပုရိသာဒကော’’တိ, ကော သောတ္ထိ မာဇာနမိဓာ’ဝဇေယျ။
ဇာနာမိ လုဒ္ဒ ပုရိသာဒကော တွံ, န တံ န ဇာနာမိ ဝနေ ဝသန္တံ၊
အဟဉ္စ ပုတ္တောသ္မိ ဇယဒ္ဒိသဿ, မမဇ္ဇ ခါဒ ပိတုနော ပမောက္ခာ။
(ဇာ၊၁၊၃၆၉။)ဇာနာမိ ပုတ္တောတိ [ပုတ္တောသိ (သျာ။ က။)] ဇယဒ္ဒိသဿ, တထာ ဟိ ဝေါ မုခဝဏ္ဏော ဥဘိန္နံ၊
သုဒုက္ကရညေဝ [သုဒုက္ကရဉ္စေဝ (သျာ။ ပီ။ က။)] ကတံ တဝေဒံ, ယော မတ္တုမိစ္ဆေ ပိတုနော ပမောက္ခာ။
န ဒုက္ကရံ ကိဉ္စိ မဟေတ္ထ မညေ, ယော မတ္တုမိစ္ဆေ ပိတုနော ပမောက္ခာ၊
မာတု စ [မာတုစ္စ (သီ။)] ဟေတု ပရလောက ဂန္တွာ [ဂမျာ (သီ။ သျာ။), ဂမျ (ပီ။)], သုခေန သဂ္ဂေန စ သမ္ပယုတ္တော။
အဟဉ္စ ခေါ အတ္တနော ပါပကိရိယံ, အာဝီ ရဟော ဝါပိ သရေ န ဇာတု၊
သင်္ခါတဇာတီမရဏောဟမသ္မိ, ယထေဝ မေ ဣဓ တထာ ပရတ္ထ။
ခါဒဇ္ဇ မံ ဒါနိ မဟာနုဘာဝ, ကရဿု ကိစ္စာနိ ဣမံ သရီရံ၊
ရုက္ခဿ ဝါ တေ ပပတာမိ အဂ္ဂါ, ဆာဒယမာနော မယှံ တွမဒေသိ မံသံ။
ဣဒဉ္စ တေ ရုစ္စတိ ရာဇပုတ္တ, စဇေသိ [စဇာသိ (သီ။ ပီ။)] ပါဏံ ပိတုနော ပမောက္ခာ၊
တသ္မာ ဟိ သော [တသ္မာတိဟ (သီ။ သျာ။)] တွံ တရမာနရူပေါ, သမ္ဘဉ္ဇ ကဋ္ဌာနိ ဇလေဟိ အဂ္ဂိံ။
တတော ဟဝေ ဓိတိမာ ရာဇပုတ္တော, ဒါရုံ သမာဟတွာ မဟန္တမဂ္ဂိံ၊
သန္ဒီပယိတွာ ပဋိဝေဒယိတ္ထ, အာဒီပိတော ဒါနိ မဟာယမဂ္ဂိ [မယာ ယက္ခမဂ္ဂိ (က။)]။
(ဇာ၊၁၊၃၇၀။)ခါဒဇ္ဇ မံ ဒါနိ ပသယှကာရီ, ကိံ မံ မုဟုံ ပေက္ခသိ ဟဋ္ဌလောမော၊
တထာ တထာ တုယှမဟံ ကရောမိ, ယထာ ယထာ မံ ဆာဒယမာနော အဒေသိ။
ကော တာဒိသံ အရဟတိ ခါဒိတာယေ, ဓမ္မေ ဌိတံ သစ္စဝါဒိံ ဝဒညုံ၊
မုဒ္ဓါပိ တဿ ဝိဖလေယျ သတ္တဓာ, ယော တာဒိသံ သစ္စဝါဒိံ အဒေယျ။
ဣဒဉှိ သော ဗြာဟ္မဏံ မညမာနော, သသော အဝါသေသိ သကေ သရီရေ၊
တေနေဝ သော စန္ဒိမာ ဒေဝပုတ္တော, သသတ္ထုတော [သသဋ္ဌကော (သျာ။)] ကာမဒုဟဇ္ဇ [ကာမရုဟဇ္ဇ (က။)] ယက္ခ။
စန္ဒော ယထာ ရာဟုမုခါ ပမုတ္တော, ဝိရောစတေ ပန္နရသေဝ ဘာဏုမာ [ဘာနုမာ (သီ။ ပီ။)]၊
ဧဝံ တုဝံ ပေါရိသာဒါ ပမုတ္တော, ဝိရောစ ကပိလေ [ကမ္ပိလ္လ (သီ။ ပီ။), ကပိလ္လေ (သျာ။)] မဟာနုဘာဝ၊
အာမောဒယံ ပိတရံ မာတရဉ္စ, သဗ္ဗော စ တေ နန္ဒတု ဉာတိပက္ခော။
တတော ဟဝေ ဓိတိမာ ရာဇပုတ္တော, ကတဉ္ဇလီ ပရိယာယ [ပရိယဂါ (သီ။), ပဂ္ဂယှ (သျာ။ ပီ။)] ပေါရိသာဒံ၊
အနုညာတော သောတ္ထိ သုခီ အရောဂေါ, ပစ္စာဂမာ [ပစ္စာဂ (ပီ။)] ကပိလမလီနသတ္တာ [ကမ္ပိလ္လ’မလီနသတ္တော (သီ။ ပီ။), ကပိလ’မလီနသတ္တာ (က။)]။
တံ နေဂမာ ဇာနပဒါ စ သဗ္ဗေ, ဟတ္ထာရောဟာ ရထိကာ ပတ္တိကာ စ၊
နမဿမာနာ ပဉ္ဇလိကာ ဥပါဂမုံ, နမတ္ထု တေ ဒုက္ကရကာရကောသီတိ။
ဇယဒ္ဒိသဇာတကံ [ဇယဒိသဇာတကံ (က။)] တတိယံ။
(ဇာ၊၁၊၃၇၁။)ကိံ နု သောစသိနုစ္စင်္ဂိ, ပဏ္ဍူသိ ဝရဝဏ္ဏိနိ၊
မိလာယသိ ဝိသာလက္ခိ, မာလာဝ ပရိမဒ္ဒိတာ။
ဒေါဟဠော မေ မဟာရာဇ, သုပိနန္တေနုပဇ္ဈဂါ [နု’ပစ္စဂါ (သီ။ သျာ။ ပီ။)]၊
န သော သုလဘရူပေါဝ, ယာဒိသော မမ ဒေါဟဠော။
ယေ ကေစိ မာနုသာ ကာမာ, ဣဓ လောကသ္မိ နန္ဒနေ၊
သဗ္ဗေ တေ ပစုရာ မယှံ, အဟံ တေ ဒမ္မိ ဒေါဟဠံ။
လုဒ္ဒါ ဒေဝ သမာယန္တု, ယေ ကေစိ ဝိဇိတေ တဝ၊
ဧတေသံ အဟမက္ခိဿံ, ယာဒိသော မမ ဒေါဟဠော။
ဣမေ တေ လုဒ္ဒကာ ဒေဝိ, ကတဟတ္ထာ ဝိသာရဒါ၊
ဝနညူ စ မိဂညူ စ, မမတ္ထေ [မမ တေ (ပီ။)] စတ္တဇီဝိတာ။
လုဒ္ဒပုတ္တာ နိသာမေထ, ယာဝန္တေတ္ထ သမာဂတာ၊
ဆဗ္ဗိသာဏံ ဂဇံ သေတံ, အဒ္ဒသံ သုပိနေ အဟံ၊
တဿ ဒန္တေဟိ မေ အတ္ထော, အလာဘေ နတ္ထိ ဇီဝိတံ။
န နော ပိတူနံ န ပိတာမဟာနံ, ဒိဋ္ဌော သုတော ကုဉ္ဇရော ဆဗ္ဗိသာဏော၊
ယမဒ္ဒသာ သုပိနေ ရာဇပုတ္တီ, အက္ခာဟိ နော ယာဒိသော ဟတ္ထိနာဂေါ။
ဒိသာ စတဿော ဝိဒိသာ စတဿော, ဥဒ္ဓံ အဓော ဒသ ဒိသာ ဣမာယော၊
ကတမံ ဒိသံ တိဋ္ဌတိ နာဂရာဇာ, ယမဒ္ဒသာ သုပိနေ ဆဗ္ဗိသာဏံ။
ဣတော ဥဇုံ ဥတ္တရိယံ ဒိသာယံ, အတိက္ကမ္မ သော သတ္တဂိရီ ဗြဟန္တေ၊
သုဝဏ္ဏပဿော နာမ ဂိရီ ဥဠာရော, သုပုပ္ဖိတော [သမ္ပုပ္ဖိတော (သျာ။)] ကိမ္ပုရိသာနုစိဏ္ဏော။
(ဇာ၊၁၊၃၇၂။)အာရုယှ သေလံ ဘဝနံ ကိန္နရာနံ, ဩလောကယ ပဗ္ဗတပါဒမူလံ၊
အထ ဒက္ခသီ မေဃသမာနဝဏ္ဏံ, နိဂြောဓရာဇံ အထ သဟဿပါဒံ [ပေါရံ (က။)]။
တတ္ထစ္ဆတီ ကုဉ္ဇရော ဆဗ္ဗိသာဏော, သဗ္ဗသေတော ဒုပ္ပသဟော ပရေဘိ၊
ရက္ခန္တိ နံ အဋ္ဌသဟဿနာဂါ, ဤသာဒန္တာ ဝါတဇဝပ္ပဟာရိနော။
တိဋ္ဌန္တိ တေ တုမူလံ [တုမူလ (သျာ။), ဘိမူလ (ပီ။ က။)] ပဿသန္တာ, ကုပ္ပန္တိ ဝါတဿပိ ဧရိတဿ၊
မနုဿဘူတံ ပန တတ္ထ ဒိသွာ, ဘသ္မံ ကရေယျုံ နာဿ ရဇောပိ တဿ။
ဗဟူ ဟိမေ ရာဇကုလမှိ သန္တိ, ပိဠန္ဓနာ ဇာတရူပဿ ဒေဝီ၊
မုတ္တာမဏီဝေဠုရိယာမယာ စ, ကိံ ကာဟသိ ဒန္တပိဠန္ဓနေန၊
မာရေတုကာမာ ကုဉ္ဇရံ ဆဗ္ဗိသာဏံ, ဥဒါဟု ဃာတေဿသိ လုဒ္ဒပုတ္တေ။
သာ ဣဿိတာ ဒုက္ခိတာ စသ္မိ လုဒ္ဒ, ဥဒ္ဓဉ္စ သုဿာမိ အနုဿရန္တီ၊
ကရောဟိ မေ လုဒ္ဒက ဧတမတ္ထံ, ဒဿာမိ တေ ဂါမဝရာနိ ပဉ္စ။
ကတ္ထစ္ဆတီ ကတ္ထမုပေတိ ဌာနံ, ဝီထိဿ ကာ နှာန [နဟာန (သီ။ ပီ။)] ဂတဿ ဟောတိ၊
ကထဉှိ သော နှာယတိ [နဟာယတိ (သီ။ ပီ။)] နာဂရာဇာ, ကထံ ဝိဇာနေမု ဂတိံ ဂဇဿ။
(ဇာ၊၁၊၃၇၃။)တတ္ထေဝ သာ ပေါက္ခရဏီ အဒူရေ [အဝိဒူရေ (သျာ။ က။)], ရမ္မာ သုတိတ္ထာ စ မဟောဒိကာ [မဟောဒကာ (သျာ။ က။)] စ၊
သမ္ပုပ္ဖိတာ ဘမရဂဏာနုစိဏ္ဏာ [ကိဏ္ဏာ (ကတ္ထစိ)], ဧတ္ထ ဟိ သော နှာယတိ နာဂရာဇာ။
သီသံ နဟာတုပ္ပလ [နဟာတော ဥပ္ပလ (သီ။ သျာ။ ပီ။)] မာလဘာရီ, သဗ္ဗသေတော ပုဏ္ဍရီကတ္တစင်္ဂီ၊
အာမောဒမာနော ဂစ္ဆတိ သန္နိကေတံ, ပုရက္ခတွာ မဟေသိံ သဗ္ဗဘဒ္ဒံ။
တတ္ထေဝ သော ဥဂ္ဂဟေတွာန ဝါကျံ, အာဒါယ တူဏိဉ္စ ဓနုဉ္စ လုဒ္ဒေါ၊
ဝိတုရိယတိ [ဝိတုရိယ သော (သီ။ အဋ္ဌ။)] သတ္တဂိရီ ဗြဟန္တေ, သုဝဏ္ဏပဿံ နာမ ဂိရိံ ဥဠာရံ။
အာရုယှ သေလံ ဘဝနံ ကိန္နရာနံ, ဩလောကယီ ပဗ္ဗတပါဒမူလံ၊
တတ္ထဒ္ဒသာ မေဃသမာနဝဏ္ဏံ, နိဂြောဓရာဇံ အဋ္ဌသဟဿပါဒံ။
တတ္ထဒ္ဒသာ ကုဉ္ဇရံ ဆဗ္ဗိသာဏံ, သဗ္ဗသေတံ ဒုပ္ပသဟံ ပရေဘိ၊
ရက္ခန္တိ နံ အဋ္ဌသဟဿနာဂါ, ဤသာဒန္တာ ဝါတဇဝပ္ပဟာရိနော။
တတ္ထဒ္ဒသာ ပေါက္ခရဏိံ အဒူရေ, ရမ္မံ သုတိတ္ထဉ္စ မဟောဒိကဉ္စ၊
သမ္ပုပ္ဖိတံ ဘမရဂဏာနုစိဏ္ဏံ, ယတ္ထ ဟိ သော နှာယတိ နာဂရာဇာ။
ဒိသွာန နာဂဿ ဂတိံ ဌိတိဉ္စ, ဝီထိဿ ယာ နှာနဂတဿ ဟောတိ၊
ဩပါတမာဂစ္ဆိ အနရိယရူပေါ, ပယောဇိတော စိတ္တဝသာနုဂါယ။
(ဇာ၊၁၊၃၇၄။)ခဏိတွာန ကာသုံ ဖလကေဟိ ဆာဒယိ, အတ္တာနမောဓာယ ဓနုဉ္စ လုဒ္ဒေါ၊
ပဿာဂတံ ပုထုသလ္လေန နာဂံ, သမပ္ပယီ ဒုက္ကဋကမ္မကာရီ။
ဝိဒ္ဓေါ စ နာဂေါ ကောဉ္စမနာဒိ ဃောရံ, သဗ္ဗေ စ [သဗ္ဗေဝ (သီ။ သျာ။ ပီ။)] နာဂါ နိန္နဒုံ [နိန္နာဒု (သျာ။), နိန္နာဒံ (က။)] ဃောရရူပံ၊
တိဏဉ္စ ကဋ္ဌဉ္စ ရဏံ [စုဏ္ဏံ (က။ သီ။ ပီ။)] ကရောန္တာ, ဓာဝိံသု တေ အဋ္ဌဒိသာ သမန္တတော။
ဝဓိဿမေတန္တိ [ဝဓိဿမေနန္တိ (သျာ။)] ပရာမသန္တော, ကာသာဝမဒ္ဒက္ခိ ဓဇံ ဣသီနံ၊
ဒုက္ခေန ဖုဋ္ဌဿုဒပါဒိ သညာ, အရဟဒ္ဓဇော သဗ္ဘိ အဝဇ္ဈရူပေါ။
အနိက္ကသာဝေါ ကာသာဝံ, ယော ဝတ္ထံ ပရိဒဟိဿတိ [ပရိဒဟေဿတိ (သီ။ ပီ။), ပရိဓဿတိ (ကတ္ထစိ)]၊
အပေတော ဒမသစ္စေန, န သော ကာသာဝမရဟတိ။
ယော စ ဝန္တကသာဝဿ, သီလေသု သုသမာဟိတော၊
ဥပေတော ဒမသစ္စေန, သ ဝေ ကာသာဝမရဟတိ။
သမပ္ပိတော ပုထုသလ္လေန နာဂေါ, အဒုဋ္ဌစိတ္တော လုဒ္ဒကမဇ္ဈဘာသိ၊
ကိမတ္ထယံ ကိဿ ဝါ သမ္မ ဟေတု, မမံ ဝဓီ ကဿ ဝါယံ ပယောဂေါ။
ကာသိဿ ရညော မဟေသီ ဘဒန္တေ, သာ ပူဇိတာ ရာဇကုလေ သုဘဒ္ဒါ၊
တံ အဒ္ဒသာ သာ စ မမံ အသံသိ, ဒန္တေဟိ အတ္ထောတိ စ မံ [အတ္ထောတိ မမံ (သျာ။ က။)] အဝေါစ။
(ဇာ၊၁၊၃၇၅။)ဗဟူ ဟိ မေ ဒန္တယုဂါ ဥဠာရာ, ယေ မေ ပိတူနဉ္စ [ပိတုန္နမ္ပိ (ပီ။)] ပိတာမဟာနံ၊
ဇာနာတိ သာ ကောဓနာ ရာဇပုတ္တီ, ဝဓတ္ထိကာ ဝေရမကာသိ ဗာလာ။
ဥဋ္ဌေဟိ တွံ လုဒ္ဒ ခရံ ဂဟေတွာ, ဒန္တေ ဣမေ ဆိန္ဒ ပုရာ မရာမိ၊
ဝဇ္ဇာသိ တံ ကောဓနံ ရာဇပုတ္တိံ, ‘‘နာဂေါ ဟတော ဟန္ဒ ဣမဿ ဒန္တာ’’။
ဥဋ္ဌာယ သော လုဒ္ဒေါ ခရံ ဂဟေတွာ, ဆေတွာန ဒန္တာနိ ဂဇုတ္တမဿ၊
ဝဂ္ဂူ သုဘေ အပ္ပဋိမေ ပထဗျာ, အာဒါယ ပက္ကာမိ တတော ဟိ ခိပ္ပံ။
ဘယဋ္ဋိတာ [ဘယဒ္ဒိတာ (သီ။ ပီ။)] နာဂဝဓေန အဋ္ဋာ, ယေ တေ နာဂါ အဋ္ဌ ဒိသာ ဝိဓာဝုံ၊
အဒိသွာန [အဒိသွ (သီ။ ပီ။)] ပေါသံ ဂဇပစ္စမိတ္တံ, ပစ္စာဂမုံ ယေန သော နာဂရာဇာ။
တေ တတ္ထ ကန္ဒိတွာ ရောဒိတွာန [ရောဒိတွ (သီ။ ပီ။)] နာဂါ, သီသေ သကေ ပံသုကံ ဩကိရိတွာ၊
အဂမံသု တေ သဗ္ဗေ သကံ နိကေတံ, ပုရက္ခတွာ မဟေသိံ သဗ္ဗဘဒ္ဒံ။
အာဒါယ ဒန္တာနိ ဂဇုတ္တမဿ, ဝဂ္ဂူ သုဘေ အပ္ပဋိမေ ပထဗျာ၊
သုဝဏ္ဏရာဇီဟိ သမန္တမောဒရေ, သော လုဒ္ဒကော ကာသိပုရံ ဥပါဂမိ၊
ဥပနေသိ သော ရာဇကညာယ ဒန္တေ, နာဂေါ ဟတော ဟန္ဒ ဣမဿ ဒန္တာ။
(ဇာ၊၁၊၃၇၆။)ဒိသွာန ဒန္တာနိ ဂဇုတ္တမဿ, ဘတ္တုပ္ပိယဿ ပုရိမာယ ဇာတိယာ၊
တတ္ထေဝ တဿာ ဟဒယံ အဖာလိ, တေနေဝ သာ ကာလမကာသိ ဗာလာ။
သမ္ဗောဓိပတ္တော သ [စ (သီ။ သျာ။), ဝ (ပီ။)] မဟာနုဘာဝေါ, သိတံ အကာသိ ပရိသာယ မဇ္ဈေ၊
ပုစ္ဆိံသု ဘိက္ခူ သုဝိမုတ္တစိတ္တာ, နာကာရဏေ ပါတုကရောန္တိ ဗုဒ္ဓါ။
ယမဒ္ဒသာထ ဒဟရိံ ကုမာရိံ, ကာသာယဝတ္ထံ အနဂါရိယံ စရန္တိံ၊
သာ ခေါ တဒါ ရာဇကညာ အဟောသိ, အဟံ တဒါ နာဂရာဇာ အဟောသိံ။
အာဒါယ ဒန္တာနိ ဂဇုတ္တမဿ, ဝဂ္ဂူ သုဘေ အပ္ပဋိမေ ပထဗျာ၊
ယော လုဒ္ဒကော ကာသိပုရံ ဥပါဂမိ, သော ခေါ တဒါ ဒေဝဒတ္တော အဟောသိ။
အနာဝသူရံ စိရရတ္တသံသိတံ, ဥစ္စာဝစံ [ဥစံ နီစံ (သီ။ သျာ။ ပီ။)] စရိတမိဒံ ပုရာဏံ၊
ဝီတဒ္ဒရော ဝီတသောကော ဝိသလ္လော, သယံ အဘိညာယ အဘာသိ ဗုဒ္ဓေါ။
အဟံ ဝေါ တေန ကာလေန, အဟောသိံ တတ္ထ ဘိက္ခဝေါ၊
နာဂရာဇာ တဒါ ဟောမိ [ဟောသိံ (သီ။ သျာ။ ပီ။)], ဧဝံ ဓာရေထ ဇာတကန္တိ။
ဆဒ္ဒန္တဇာတကံ စတုတ္ထံ။
ရဇ္ဇဉ္စ ပဋိပန္နာသ္မ, အာဓိပစ္စံ သုစီရတ၊
မဟတ္တံ ပတ္တုမိစ္ဆာမိ, ဝိဇေတုံ ပထဝိံ ဣမံ။
ဓမ္မေန နော အဓမ္မေန, အဓမ္မော မေ န ရုစ္စတိ၊
ကိစ္စောဝ ဓမ္မော စရိတော, ရညော ဟောတိ သုစီရတ။
(ဇာ၊၁၊၃၇၇။)ဣဓ စေဝါနိန္ဒိတာ ယေန, ပေစ္စ ယေန အနိန္ဒိတာ၊
ယသံ ဒေဝမနုဿေသု, ယေန ပပ္ပေါမု [ပပ္ပေမု (သီ။ အဋ္ဌ။)] ဗြာဟ္မဏ။
ယောဟံ အတ္ထဉ္စ ဓမ္မဉ္စ, ကတ္တုမိစ္ဆာမိ ဗြာဟ္မဏ၊
တံ တွံ အတ္ထဉ္စ ဓမ္မဉ္စ, ဗြာဟ္မဏက္ခာဟိ ပုစ္ဆိတော။
နာညတြ ဝိဓုရာ ရာဇ, ဧတဒက္ခာတုမရဟတိ၊
ယံ တွံ အတ္ထဉ္စ ဓမ္မဉ္စ, ကတ္တုမိစ္ဆသိ ခတ္တိယ။
ဧဟိ ခေါ ပဟိတော ဂစ္ဆ, ဝိဓုရဿ ဥပန္တိကံ၊
နိက္ခဉ္စိမံ [နိက္ခံ ရတ္တ (သီ။), နိက္ခမိမံ (ပီ။)] သုဝဏ္ဏဿ, ဟရံ ဂစ္ဆ သုစီရတ၊
အဘိဟာရံ ဣမံ ဒဇ္ဇာ, အတ္ထဓမ္မာနုသိဋ္ဌိယာ။
သွာဓိပ္ပါဂါ ဘာရဒွါဇော, ဝိဓုရဿ ဥပန္တိကံ၊
တမဒ္ဒသ မဟာဗြဟ္မာ, အသမာနံ သကေ ဃရေ။
ရညောဟံ ပဟိတော ဒူတော, ကောရဗျဿ ယသဿိနော၊
‘‘အတ္ထံ ဓမ္မဉ္စ ပုစ္ဆေသိ’’, ဣစ္စဗြဝိ ယုဓိဋ္ဌိလော၊
တံ တွံ အတ္ထဉ္စ ဓမ္မဉ္စ, ဝိဓုရက္ခာဟိ ပုစ္ဆိတော။
ဂင်္ဂံ မေ ပိဒဟိဿန္တိ, န တံ သက္ကောမိ ဗြာဟ္မဏ၊
အပိဓေတုံ မဟာသိန္ဓုံ, တံ ကထံ သော ဘဝိဿတိ။
န တေ သက္ကောမိ အက္ခာတုံ, အတ္ထံ ဓမ္မဉ္စ ပုစ္ဆိတော၊
ဘဒြကာရော စ မေ ပုတ္တော, ဩရသော မမ အတြဇော၊
တံ တွံ အတ္ထဉ္စ ဓမ္မဉ္စ, ဂန္တွာ ပုစ္ဆဿု ဗြာဟ္မဏ။
သွာဓိပ္ပါဂါ ဘာရဒွါဇော, ဘဒြကာရဿုပန္တိကံ [ဘဒြကာရဿ သန္တိကံ (သီ။ သျာ။)]၊
တမဒ္ဒသ မဟာဗြဟ္မာ, နိသိန္နံ သမှိ ဝေသ္မနိ။
ရညောဟံ ပဟိတော ဒူတော, ကောရဗျဿ ယသဿိနော၊
‘‘အတ္ထံ ဓမ္မဉ္စ ပုစ္ဆေသိ’’, ဣစ္စဗြဝိ ယုဓိဋ္ဌိလော၊
တံ တွံ အတ္ထဉ္စ ဓမ္မဉ္စ, ဘဒြကာရ ပဗြူဟိ [ဗြဝီဟိ (သီ။ ပီ။)] မေ။
မံသကာဇံ [မံသကာစံ (ပီ။)] အဝဟာယ, ဂေါဓံ အနုပတာမဟံ၊
န တေ သက္ကောမိ အက္ခာတုံ, အတ္ထံ ဓမ္မဉ္စ ပုစ္ဆိတော။
(ဇာ၊၁၊၃၇၈။)သဉ္စယော [သဉ္ဇယော (သီ။ သျာ။ ပီ။)] နာမ မေ ဘာတာ, ကနိဋ္ဌော မေ သုစီရတ၊
တံ တွံ အတ္ထဉ္စ ဓမ္မဉ္စ, ဂန္တွာ ပုစ္ဆဿု ဗြာဟ္မဏ။
သွာဓိပ္ပါဂါ ဘာရဒွါဇော, သဉ္စယဿ ဥပန္တိကံ၊
တမဒ္ဒသ မဟာဗြဟ္မာ, နိသိန္နံ သမှိ ဝေသ္မနိ [ပရိသတိ (သျာ။), ပရီသတိ (ပီ။)]။
ရညောဟံ ပဟိတော ဒူတော, ကောရဗျဿ ယသဿိနော၊
‘‘အတ္ထံ ဓမ္မဉ္စ ပုစ္ဆေသိ’’, ဣစ္စဗြဝိ ယုဓိဋ္ဌိလော၊
တံ တွံ အတ္ထဉ္စ ဓမ္မဉ္စ, သဉ္စယက္ခာဟိ ပုစ္ဆိတော။
သဒါ မံ ဂိလတေ [ဂိလတီ (သီ။), ဂိလတိ (ပီ။)] မစ္စု, သာယံ ပါတော သုစီရတ၊
န တေ သက္ကောမိ အက္ခာတုံ, အတ္ထံ ဓမ္မဉ္စ ပုစ္ဆိတော။
သမ္ဘဝေါ နာမ မေ ဘာတာ, ကနိဋ္ဌော မေ သုစီရတ၊
တံ တွံ အတ္ထဉ္စ ဓမ္မဉ္စ, ဂန္တွာ ပုစ္ဆဿု ဗြာဟ္မဏ။
အဗ္ဘုတော ဝတ ဘော ဓမ္မော, နာယံ အသ္မာက ရုစ္စတိ၊
တယော ဇနာ ပိတာပုတ္တာ, တေသု ပညာယ နော ဝိဒူ။
န တံ သက္ကောထ အက္ခာတုံ, အတ္ထံ ဓမ္မဉ္စ ပုစ္ဆိတာ၊
ကထံ နု ဒဟရော ဇညာ, အတ္ထံ ဓမ္မဉ္စ ပုစ္ဆိတော။
မာ နံ ဒဟရောတိ ဥညာသိ [မညာသိ (သျာ။ က။)], အပုစ္ဆိတွာန သမ္ဘဝံ၊
ပုစ္ဆိတွာ သမ္ဘဝံ ဇညာ, အတ္ထံ ဓမ္မဉ္စ ဗြာဟ္မဏ။
ယထာပိ စန္ဒော ဝိမလော, ဂစ္ဆံ အာကာသဓာတုယာ၊
သဗ္ဗေ တာရာဂဏေ လောကေ, အာဘာယ အတိရောစတိ။
ဧဝမ္ပိ ဒဟရူပေတော, ပညာယောဂေန သမ္ဘဝေါ၊
မာ နံ ဒဟရောတိ ဥညာသိ, အပုစ္ဆိတွာန သမ္ဘဝံ၊
ပုစ္ဆိတွာ သမ္ဘဝံ ဇညာ, အတ္ထံ ဓမ္မဉ္စ ဗြာဟ္မဏ။
ယထာပိ ရမ္မကော မာသော, ဂိမှာနံ ဟောတိ ဗြာဟ္မဏ၊
အတေဝညေဟိ မာသေဟိ, ဒုမပုပ္ဖေဟိ သောဘတိ။
(ဇာ၊၁၊၃၇၉။)ဧဝမ္ပိ ဒဟရူပေတော, ပညာယောဂေန သမ္ဘဝေါ၊
မာ နံ ဒဟရောတိ ဥညာသိ, အပုစ္ဆိတွာန သမ္ဘဝံ၊
ပုစ္ဆိတွာ သမ္ဘဝံ ဇညာ, အတ္ထံ ဓမ္မဉ္စ ဗြာဟ္မဏ။
ယထာပိ ဟိမဝါ ဗြဟ္မေ, ပဗ္ဗတော ဂန္ဓမာဒနော၊
နာနာရုက္ခေဟိ သဉ္ဆန္နော, မဟာဘူတဂဏာလယော၊
ဩသဓေဟိ စ ဒိဗ္ဗေဟိ, ဒိသာ ဘာတိ ပဝါတိ စ။
ဧဝမ္ပိ ဒဟရူပေတော, ပညာယောဂေန သမ္ဘဝေါ၊
မာ နံ ဒဟရောတိ ဥညာသိ, အပုစ္ဆိတွာန သမ္ဘဝံ၊
ပုစ္ဆိတွာ သမ္ဘဝံ ဇညာ, အတ္ထံ ဓမ္မဉ္စ ဗြာဟ္မဏ။
ယထာပိ ပါဝကော ဗြဟ္မေ, အစ္စိမာလီ ယသဿိမာ၊
ဇလမာနော ဝနေ ဂစ္ဆေ [စရံ ကစ္ဆေ (ပီ။)], အနလော ကဏှဝတ္တနီ။
ဃတာသနော ဓူမကေတု, ဥတ္တမာဟေဝနန္ဒဟော၊
နိသီထေ [နိဿီဝေ (သျာ။), နိသိဝေ (က။)] ပဗ္ဗတဂ္ဂသ္မိံ, ပဟူတေဓော [ဗဟုတေဇော (သျာ။ က။)] ဝိရောစတိ။
ဧဝမ္ပိ ဒဟရူပေတော, ပညာယောဂေန သမ္ဘဝေါ၊
မာ နံ ဒဟရောတိ ဥညာသိ, အပုစ္ဆိတွာန သမ္ဘဝံ၊
ပုစ္ဆိတွာ သမ္ဘဝံ ဇညာ, အတ္ထံ ဓမ္မဉ္စ ဗြာဟ္မဏ။
ဇဝေန ဘဒြံ ဇာနန္တိ, ဗလိဗဒ္ဒဉ္စ [ဗလိဝဒ္ဒဉ္စ (သီ။ ပီ။)] ဝါဟိယေ၊
ဒေါဟေန ဓေနုံ ဇာနန္တိ, ဘာသမာနဉ္စ ပဏ္ဍိတံ။
ဧဝမ္ပိ ဒဟရူပေတော, ပညာယောဂေန သမ္ဘဝေါ၊
မာ နံ ဒဟရောတိ ဥညာသိ, အပုစ္ဆိတွာန သမ္ဘဝံ၊
ပုစ္ဆိတွာ သမ္ဘဝံ ဇညာ, အတ္ထံ ဓမ္မဉ္စ ဗြာဟ္မဏ။
သွာဓိပ္ပါဂါ ဘာရဒွါဇော, သမ္ဘဝဿ ဥပန္တိကံ၊
တမဒ္ဒသ မဟာဗြဟ္မာ, ကီဠမာနံ ဗဟီပုရေ။
ရညောဟံ ပဟိတော ဒူတော, ကောရဗျဿ ယသဿိနော၊
‘‘အတ္ထံ ဓမ္မဉ္စ ပုစ္ဆေသိ’’, ဣစ္စဗြဝိ ယုဓိဋ္ဌိလော၊
တံ တွံ အတ္ထဉ္စ ဓမ္မဉ္စ, သမ္ဘဝက္ခာဟိ ပုစ္ဆိတော။
(ဇာ၊၁၊၃၈၀။)တဂ္ဃ တေ အဟမက္ခိဿံ, ယထာပိ ကုသလော တထာ၊
ရာဇာ စ ခေါ တံ ဇာနာတိ, ယဒိ ကာဟတိ ဝါ န ဝါ။
‘‘အဇ္ဇ သုဝေ’’တိ သံသေယျ, ရညာ ပုဋ္ဌော သုစီရတ၊
မာ ကတွာ အဝသီ ရာဇာ, အတ္ထေ ဇာတေ ယုဓိဋ္ဌိလော။
အဇ္ဈတ္တညေဝ သံသေယျ, ရညာ ပုဋ္ဌော သုစီရတ၊
ကုမ္မဂ္ဂံ န နိဝေသေယျ, ယထာ မူဠှော အစေတသော [အစေတနော (က။)]။
အတ္တာနံ နာတိဝတ္တေယျ, အဓမ္မံ န သမာစရေ၊
အတိတ္ထေ နပ္ပတာရေယျ, အနတ္ထေ န ယုတော သိယာ။
ယော စ ဧတာနိ ဌာနာနိ, ကတ္တုံ ဇာနာတိ ခတ္တိယော၊
သဒါ သော ဝဍ္ဎတေ ရာဇာ, သုက္ကပက္ခေဝ စန္ဒိမာ။
ဉာတီနဉ္စ ပိယော ဟောတိ, မိတ္တေသု စ ဝိရောစတိ၊
ကာယဿ ဘေဒါ သပ္ပညော, သဂ္ဂံ သော ဥပပဇ္ဇတီတိ။
သမ္ဘဝဇာတကံ ပဉ္စမံ။
ဗာရာဏသျံ [ဗာရာဏဿံ (သီ။ ပီ။)] အဟူ ရာဇာ, ကာသီနံ ရဋ္ဌဝဍ္ဎနော၊
မိတ္တာမစ္စပရိဗျူဠှော, အဂမာသိ မိဂါဇိနံ [မိဂါဇိရံ (သီ။), မိဂါစိရံ (ပီ။)]။
တတ္ထ ဗြာဟ္မဏမဒ္ဒက္ခိ, သေတံ စိတြံ ကိလာသိနံ၊
ဝိဒ္ဓသ္တံ ကောဝိဠာရံဝ, ကိသံ ဓမနိသန္ထတံ။
ပရမကာရုညတံ ပတ္တံ, ဒိသွာ ကိစ္ဆဂတံ နရံ၊
အဝစ ဗျမှိတော ရာဇာ, ‘‘ယက္ခာနံ ကတမော နုသိ။
‘‘ဟတ္ထပါဒါ စ တေ သေတာ, တတော သေတတရံ [သေတတရော (ပီ။)] သိရော၊
ဂတ္တံ ကမ္မာသဝဏ္ဏံ တေ, ကိလာသဗဟုလော စသိ။
‘‘ဝဋ္ဋနာဝဠိ [ဝဋ္ဌနာဝလိ (ပီ။)] သင်္ကာသာ, ပိဋ္ဌိ တေ နိန္နတုန္နတာ၊
ကာဠပဗ္ဗာဝ [ကာဠပဗ္ဗာ စ (သျာ။), ကာဠာ ပဗ္ဗာ စ (ပီ။)] တေ အင်္ဂါ, နာညံ ပဿာမိ ဧဒိသံ။
(ဇာ၊၁၊၃၈၁။)‘‘ဥဂ္ဃဋ္ဋပါဒေါ တသိတော, ကိသော ဓမနိသန္ထတော၊
ဆာတော အာတတ္တရူပေါသိ [အာဒိတ္တရူပေါသိ (က။), အတိတ္တရူပေါသိ (သျာ။ က။ အဋ္ဌ။)], ကုတောသိ ကတ္ထ ဂစ္ဆသိ။
‘‘ဒုဒ္ဒသီ အပ္ပကာရောသိ, ဒုဗ္ဗဏ္ဏော ဘီမဒဿနော၊
ဇနေတ္တိ ယာပိ တေ မာတာ, န တံ ဣစ္ဆေယျ ပဿိတုံ။
‘‘ကိံ ကမ္မမကရံ [ကမ္မမကရာ (သီ။ သျာ။ ပီ။)] ပုဗ္ဗေ, ကံ အဝဇ္ဈံ အဃာတယိ၊
ကိဗ္ဗိသံ ယံ ကရိတွာန, ဣဒံ ဒုက္ခံ ဥပါဂမိ’’။
တဂ္ဃ တေ အဟမက္ခိဿံ, ယထာပိ ကုသလော တထာ၊
သစ္စဝါဒိဉှိ လောကသ္မိံ, ပသံသန္တီဓ ပဏ္ဍိတာ။
ဧကော စရံ ဂေါဂဝေသော, မူဠှော အစ္စသရိံ ဝနေ၊
အရညေ ဣရီဏေ [ဤရိဏေ (သီ။ သျာ။ ပီ။)] ဝိဝနေ, နာနာကုဉ္ဇရသေဝိတေ။
ဝါဠမိဂါနုစရိတေ, ဝိပ္ပနဋ္ဌောသ္မိ ကာနနေ၊
အစရိံ တတ္ထ သတ္တာဟံ, ခုပ္ပိပါသ [ခုပ္ပိပါသာ (သီ။ ပီ။)] သမပ္ပိတော။
တတ္ထ တိန္ဒုကမဒ္ဒက္ခိံ, ဝိသမဋ္ဌံ ဗုဘုက္ခိတော၊
ပပါတမဘိလမ္ဗန္တံ, သမ္ပန္နဖလဓာရိနံ။
ဝါတဿိတာနိ ဘက္ခေသိံ, တာနိ ရုစ္စိံသု မေ ဘုသံ၊
အတိတ္တော ရုက္ခမာရူဟိံ [မာရုယှ (သီ။ သျာ။)], တတ္ထ ဟေဿာမိ အာသိတော။
ဧကံ မေ ဘက္ခိတံ အာသိ, ဒုတိယံ အဘိပတ္ထိတံ၊
တတော သာ ဘဉ္ဇထ သာခါ, ဆိန္နာ ဖရသုနာ ဝိယ။
သောဟံ သဟာဝ သာခါဟိ, ဥဒ္ဓံပါဒေါ အဝံသိရော၊
အပ္ပတိဋ္ဌေ အနာလမ္ဗေ, ဂိရိဒုဂ္ဂသ္မိ ပါပတံ။
ယသ္မာ စ ဝါရိ ဂမ္ဘီရံ, တသ္မာ န သမပဇ္ဇိသံ [သမပဇ္ဇသိံ (သီ။), သမဘဇ္ဇိသံ (ပီ။)]၊
တတ္ထ သေသိံ နိရာနန္ဒော, အနူနာ [အနာထော (သီ။)] ဒသ ရတ္တိယော။
အထေတ္ထ ကပိ မာဂဉ္ဆိ [မာဂစ္ဆိ (သျာ။ က။)], ဂေါနင်္ဂုလော ဒရီစရော၊
သာခါဟိ သာခံ ဝိစရန္တော, ခါဒမာနော ဒုမပ္ဖလံ။
(ဇာ၊၁၊၃၈၂။)သော မံ ဒိသွာ ကိသံ ပဏ္ဍုံ, ကာရုညမကရံ မယိ၊
အမ္ဘော ကော နာမ သော ဧတ္ထ, ဧဝံ ဒုက္ခေန အဋ္ဋိတော။
မနုဿော အမနုဿော ဝါ, အတ္တာနံ မေ ပဝေဒယ၊
တဿဉ္ဇလိံ ပဏာမေတွာ, ဣဒံ ဝစနမဗြဝိံ။
မနုဿောဟံ ဗျသမ္ပတ္တော [ဝသမ္ပတ္တော (သျာ။ က။)], သာ မေ နတ္ထိ ဣတော ဂတိ၊
တံ ဝေါ ဝဒါမိ ဘဒ္ဒံ ဝေါ, တွဉ္စ မေ သရဏံ ဘဝ။
ဂရုံ [ဂရု (သီ။ ပီ။)] သိလံ ဂဟေတွာန, ဝိစရီ [ဝိစရိ (ပီ။)] ပဗ္ဗတေ ကပိ၊
သိလာယ ယောဂ္ဂံ ကတွာန, နိသဘော ဧတဒဗြဝိ။
ဧဟိ မေ ပိဋ္ဌိမာရုယှ, ဂီဝံ ဂဏှာဟိ ဗာဟုဘိ၊
အဟံ တံ ဥဒ္ဓရိဿာမိ, ဂိရိဒုဂ္ဂတ ဝေဂသာ။
တဿ တံ ဝစနံ သုတွာ, ဝါနရိန္ဒဿ သိရီမတော၊
ပိဋ္ဌိမာရုယှ ဓီရဿ, ဂီဝံ ဗာဟာဟိ အဂ္ဂဟိံ။
သော မံ တတော သမုဋ္ဌာသိ, တေဇဿီ [တေဇသီ (သျာ။ ပီ။ က။)] ဗလဝါ ကပိ၊
ဝိဟညမာနော ကိစ္ဆေန, ဂိရိဒုဂ္ဂတ ဝေဂသာ။
ဥဒ္ဓရိတွာန မံ သန္တော, နိသဘော ဧတဒဗြဝိ၊
ဣင်္ဃ မံ သမ္မ ရက္ခဿု, ပဿုပိဿံ မုဟုတ္တကံ။
သီဟာ ဗျဂ္ဃါ စ ဒီပီ စ, အစ္ဆကောကတရစ္ဆယော၊
တေ မံ ပမတ္တံ ဟိံသေယျုံ, တေ တွံ ဒိသွာ နိဝါရယ [ဒိသွာန ဝါရယ (ပီ။)]။
ဧဝံ မေ ပရိတ္တာတူန [ပရိတ္တာတုန (က။)], ပဿုပိ သော မုဟုတ္တကံ၊
တဒါဟံ ပါပိကံ ဒိဋ္ဌိံ, ပဋိလစ္ဆိံ အယောနိသော။
ဘက္ခော အယံ မနုဿာနံ, ယထာ စညေ ဝနေ မိဂါ၊
ယံ နူနိမံ ဝဓိတွာန, ဆာတော ခါဒေယျ ဝါနရံ။
အသိတော [အာသိကော (ပီ။)] စ ဂမိဿာမိ, မံသမာဒါယ သမ္ဗလံ၊
ကန္တာရံ နိတ္ထရိဿာမိ, ပါထေယျံ မေ ဘဝိဿတိ။
တတော သိလံ ဂဟေတွာန, မတ္ထကံ သန္နိတာဠယိံ၊
မမ ဂတ္တ [ဘတ္တ (သီ။ သျာ။), ဟတ္ထ (ပီ။)] ကိလန္တဿ, ပဟာရော ဒုဗ္ဗလော အဟု။
(ဇာ၊၁၊၃၈၃။)သော စ ဝေဂေနုဒပ္ပတ္တော, ကပိ ရုဟိရ [ရုဓိရ (သီ။)] မက္ခိတော၊
အဿုပုဏ္ဏေဟိ နေတ္တေဟိ, ရောဒန္တော မံ ဥဒိက္ခတိ။
မာယျောမံ ကရိ ဘဒ္ဒန္တေ, တွဉ္စ နာမေဒိသံ ကရိ၊
တွဉ္စ ခေါ နာမ ဒီဃာဝု [ဒီဃာယု (ပီ။)], အညေ [အညံ (ပီ။)] ဝါရေတုမရဟသိ။
အဟော ဝတ ရေ ပုရိသ, တာဝ ဒုက္ကရကာရက၊
ဧဒိသာ ဝိသမာ ဒုဂ္ဂါ, ပပါတာ ဥဒ္ဓတော [ဥဒ္ဓဋော (ပီ။)] မယာ။
အာနီတော ပရလောကာဝ, ဒုဗ္ဘေယျံ မံ အမညထ၊
တံ တေန ပါပဓမ္မေန, ပါပံ ပါပေန စိန္တိတံ။
မာ ဟေဝ တွံ အဓမ္မဋ္ဌ, ဝေဒနံ ကဋုကံ ဖုသိ၊
မာ ဟေဝ ပါပကမ္မံ တံ, ဖလံ ဝေဠုံဝ တံ ဝဓိ။
တယိမေ နတ္ထိ ဝိဿာသော, ပါပဓမ္မ အသညတ [ပါပဓမ္မံ အမညထ (ပီ။)]၊
ဧဟိ မေ ပိဋ္ဌိတော ဂစ္ဆ, ဒိဿမာနောဝ သန္တိကေ။
မုတ္တောသိ ဟတ္ထာ ဝါဠာနံ, ပတ္တောသိ မာနုသိံ ပဒံ၊
ဧသ မဂ္ဂေါ အဓမ္မဋ္ဌ, တေန ဂစ္ဆ ယထာသုခံ။
ဣဒံ ဝတွာ ဂိရိစရော, ရဟဒေ [ရုဟိရံ (သျာ။ က။)] ပက္ခလျ မတ္ထကံ၊
အဿူနိ သမ္ပမဇ္ဇိတွာ, တတော ပဗ္ဗတမာရုဟိ။
သောဟံ တေနာဘိသတ္တောသ္မိ, ပရိဠာဟေန အဋ္ဋိတော၊
ဍယှမာနေန ဂတ္တေန, ဝါရိံ ပါတုံ ဥပါဂမိံ။
အဂ္ဂိနာ ဝိယ သန္တတ္တော, ရဟဒေါ ရုဟိရမက္ခိတော၊
ပုဗ္ဗလောဟိတသင်္ကာသော, သဗ္ဗော မေ သမပဇ္ဇထ။
ယာဝန္တော ဥဒဗိန္ဒူနိ, ကာယသ္မိံ နိပတိံသု မေ၊
တာဝန္တော ဂဏ္ဍ [ဂဏ္ဍူ (သီ။ ပီ။), ဂဏ္ဍု (သျာ။)] ဇာယေထ, အဒ္ဓဗေလုဝသာဒိသာ။
ပဘိန္နာ ပဂ္ဃရိံသု မေ, ကုဏပါ ပုဗ္ဗလောဟိတာ၊
ယေန ယေနေဝ ဂစ္ဆာမိ, ဂါမေသု နိဂမေသု စ။
(ဇာ၊၁၊၃၈၄။)ဒဏ္ဍဟတ္ထာ နိဝါရေန္တိ, ဣတ္ထိယော ပုရိသာ စ မံ၊
ဩက္ကိတာ [ဩကိဏ္ဏာ (သီ။)] ပူတိဂန္ဓေန, မာဿု ဩရေန အာဂမာ [မာဂမာ (သီ။ ပီ။)]။
ဧတာဒိသံ ဣဒံ ဒုက္ခံ, သတ္တ ဝဿာနိ ဒါနိ မေ၊
အနုဘောမိ သကံ ကမ္မံ, ပုဗ္ဗေ ဒုက္ကဋမတ္တနော။
တံ ဝေါ ဝဒါမိ ဘဒ္ဒန္တေ [ဘဒ္ဒံ ဝေါ (သီ။ ပီ။)], ယာဝန္တေတ္ထ သမာဂတာ၊
မာဿု မိတ္တာန [မိတ္တာနံ (သီ။ ပီ။)] ဒုဗ္ဘိတ္ထော, မိတ္တဒုဗ္ဘော ဟိ ပါပကော။
ကုဋ္ဌီ ကိလာသီ ဘဝတိ, ယော မိတ္တာနိဓ ဒုဗ္ဘတိ [ယော မိတ္တာနံ ဣဓဒ္ဒုဘိ (သီ။ အဋ္ဌ။), ယော မိတ္တာနံ ဣဓ ဒုဗ္ဘတိ (ပီ။)]၊
ကာယဿ ဘေဒါ မိတ္တဒ္ဒု [မိတ္တဒုဗ္ဘီ (သျာ။ က။)], နိရယံ သောပပဇ္ဇတီတိ [သော ဥပပဇ္ဇတီတိ (သီ။ သျာ။ ပီ။)]။
မဟာကပိဇာတကံ ဆဋ္ဌံ။
သစေ ဝေါ ဝုယှမာနာနံ, သတ္တန္နံ ဥဒကဏ္ဏဝေ၊
မနုဿဗလိမေသာနော, နာဝံ ဂဏှေယျ ရက္ခသော၊
အနုပုဗ္ဗံ ကထံ ဒတွာ, မုဉ္စေသိ ဒကရက္ခသာ [ဒကရက္ခတော (ပီ။)]။
မာတရံ ပဌမံ ဒဇ္ဇံ, ဘရိယံ ဒတွာန ဘာတရံ၊
တတော သဟာယံ ဒတွာန, ပဉ္စမံ ဒဇ္ဇံ [ဒဇ္ဇ (သျာ။)] ဗြာဟ္မဏံ၊
ဆဋ္ဌာဟံ ဒဇ္ဇမတ္တာနံ, နေဝ ဒဇ္ဇံ မဟောသဓံ။
ပေါသေတာ တေ ဇနေတ္တီ စ, ဒီဃရတ္တာနုကမ္ပိကာ၊
ဆဗ္ဘီ တယိ ပဒုဿတိ [ပဒုဋ္ဌသ္မိံ (သီ။ သျာ။)], ပဏ္ဍိတာ အတ္ထဒဿိနီ၊
အညံ ဥပနိသံ ကတွာ, ဝဓာ တံ ပရိမောစယိ။
တံ တာဒိသိံ [တာဒိသံ (က။)] ပါဏဒဒိံ, ဩရသံ ဂဗ္ဘဓာရိနိံ [ဂဗ္ဘဓာရိဏိံ (သီ။ သျာ။)]၊
မာတရံ ကေန ဒေါသေန, ဒဇ္ဇာသိ ဒကရက္ခိနော [ဒကရက္ခတော (ပီ။)]။
ဒဟရာ ဝိယလင်္ကာရံ, ဓာရေတိ အပိဠန္ဓနံ၊
ဒေါဝါရိကေ အနီကဋ္ဌေ, အတိဝေလံ ပဇဂ္ဃတိ [သဉ္ဇဂ္ဃတိ (က။)]။
(ဇာ၊၁၊၃၈၅။)အထောပိ ပဋိရာဇူနံ, သယံ ဒူတာနိ သာသတိ၊
မာတရံ တေန ဒေါသေန, ဒဇ္ဇာဟံ ဒကရက္ခိနော။
ဣတ္ထိဂုမ္ဗဿ ပဝရာ, အစ္စန္တံ ပိယဘာဏိနီ [အစ္စန္တပိယဝါဒိနီ (သီ။ ပီ။)]၊
အနုဂ္ဂတာ [အနုဗ္ဗတာ (သျာ။), အနုပုဗ္ဗတာ (က။)] သီလဝတီ, ဆာယာဝ အနပါယိနီ။
အက္ကောဓနာ ပုညဝတီ [ပညဝတီ (သီ။ ပီ။)], ပဏ္ဍိတာ အတ္ထဒဿိနီ၊
ဥဗ္ဗရိံ [ဥပ္ပရိံ (သီ။)] ကေန ဒေါသေန, ဒဇ္ဇာသိ ဒကရက္ခိနော။
ခိဍ္ဍာရတိသမာပန္နံ, အနတ္ထဝသမာဂတံ၊
သာ မံ သကာန ပုတ္တာနံ, အယာစံ ယာစတေ ဓနံ။
သောဟံ ဒဒါမိ သာရတ္တော [သာရတော (သျာ။)], ဗဟုံ ဥစ္စာဝစံ ဓနံ၊
သုဒုစ္စဇံ စဇိတွာန, ပစ္ဆာ သောစာမိ ဒုမ္မနော၊
ဥဗ္ဗရိံ တေန ဒေါသေန, ဒဇ္ဇာဟံ ဒကရက္ခိနော။
ယေနောစိတာ ဇနပဒါ [ဇာနပဒါ (သီ။ သျာ။ ပီ။)], အာနီတာ စ ပဋိဂ္ဂဟံ၊
အာဘတံ ပရရဇ္ဇေဘိ, အဘိဋ္ဌာယ ဗဟုံ ဓနံ။
ဓနုဂ္ဂဟာနံ ပဝရံ, သူရံ တိခိဏမန္တိနံ၊
ဘာတရံ ကေန ဒေါသေန, ဒဇ္ဇာသိ ဒကရက္ခိနော။
ယေနောစိတာ [မယောစိတာ (သီ။), မယာစိတာ (ပီ။)] ဇနပဒါ, အာနီတာ စ ပဋိဂ္ဂဟံ၊
အာဘတံ ပရရဇ္ဇေဘိ, အဘိဋ္ဌာယ ဗဟုံ ဓနံ။
ဓနုဂ္ဂဟာနံ ပဝရော, သူရော တိခိဏမန္တိ စ [တိခိဏမန္တိနော (က။)]၊
မယာယံ [မယာ သော (သီ။ ပီ။)] သုခိတော ရာဇာ, အတိမညတိ ဒါရကော။
ဥပဋ္ဌာနမ္ပိ မေ အယျေ, န သော ဧတိ ယထာ ပုရေ၊
ဘာတရံ တေန ဒေါသေန, ဒဇ္ဇာဟံ ဒကရက္ခိနော။
ဧကရတ္တေန ဥဘယော, တွဉ္စေဝ ဓနုသေခ စ [ဓနုသေခဝါ (သီ။ သျာ။ ပီ။)]၊
ဥဘော ဇာတေတ္ထ ပဉ္စာလာ, သဟာယာ သုသမာဝယာ။
(ဇာ၊၁၊၃၈၆။)စရိယာ တံ အနုဗန္ဓိတ္ထော [အနုဗန္ဓော (က။)], ဧကဒုက္ခသုခေါ တဝ၊
ဥဿုက္ကော တေ ဒိဝါရတ္တိံ, သဗ္ဗကိစ္စေသု ဗျာဝဋော၊
သဟာယံ ကေန ဒေါသေန, ဒဇ္ဇာသိ ဒကရက္ခိနော။
စရိယာ မံ အယံ [စရိယာယ အယံ (သီ။ ပီ။)] အယျေ, ပဇဂ္ဃိတ္ထော [သဉ္ဇဂ္ဃိတ္ထော (သျာ။)] မယာ သဟ၊
အဇ္ဇာပိ တေန ဝဏ္ဏေန, အတိဝေလံ ပဇဂ္ဃတိ။
ဥဗ္ဗရိယာပိဟံ အယျေ, မန္တယာမိ ရဟောဂတော၊
အနာမန္တော [အနာမန္တာ (သီ။)] ပဝိသတိ, ပုဗ္ဗေ အပ္ပဋိဝေဒိတော။
လဒ္ဓဒွါရော [လဒ္ဓဝါရော (သီ။ ပီ။)] ကတောကာသော, အဟိရိကံ အနာဒရံ၊
သဟာယံ တေန ဒေါသေန, ဒဇ္ဇာဟံ ဒကရက္ခိနော။
ကုသလော သဗ္ဗနိမိတ္တာနံ, ရုတညူ [ရုဒညူ (သီ။ သျာ။ ပီ။)] အာဂတာဂမော၊
ဥပ္ပါတေ သုပိနေ ယုတ္တော, နိယျာနေ စ ပဝေသနေ။
ပဋ္ဌော [ပဒ္ဓေါ (သီ။ ပီ။)] ဘူမန္တလိက္ခသ္မိံ, နက္ခတ္တပဒကောဝိဒေါ၊
ဗြာဟ္မဏံ ကေန ဒေါသေန, ဒဇ္ဇာသိ ဒကရက္ခိနော။
ပရိသာယမ္ပိ မေ အယျေ, ဥမ္မီလိတွာ ဥဒိက္ခတိ၊
တသ္မာ အစ္စဘမုံ လုဒ္ဒံ, ဒဇ္ဇာဟံ ဒကရက္ခိနော။
သသမုဒ္ဒပရိယာယံ, မဟိံ သာဂရကုဏ္ဍလံ၊
ဝသုန္ဓရံ အာဝသသိ, အမစ္စပရိဝါရိတော။
စာတုရန္တော မဟာရဋ္ဌော, ဝိဇိတာဝီ မဟဗ္ဗလော၊
ပထဗျာ ဧကရာဇာသိ, ယသော တေ ဝိပုလံ ဂတော။
သောဠသိတ္ထိသဟဿာနိ, အာမုတ္တမဏိကုဏ္ဍလာ၊
နာနာဇနပဒါ နာရီ, ဒေဝကညူပမာ သုဘာ။
ဧဝံ သဗ္ဗင်္ဂသမ္ပန္နံ, သဗ္ဗကာမသမိဒ္ဓိနံ၊
သုခိတာနံ ပိယံ ဒီဃံ, ဇီဝိတံ အာဟု ခတ္တိယ။
အထ တွံ ကေန ဝဏ္ဏေန, ကေန ဝါ ပန ဟေတုနာ၊
ပဏ္ဍိတံ အနုရက္ခန္တော, ပါဏံ စဇသိ ဒုစ္စဇံ။
(ဇာ၊၁၊၃၈၇။)ယတောပိ အာဂတော အယျေ, မမ ဟတ္ထံ မဟောသဓော၊
နာဘိဇာနာမိ ဓီရဿ, အနုမတ္တမ္ပိ ဒုက္ကဋံ။
သစေ စ ကိသ္မိစိ ကာလေ, မရဏံ မေ ပုရေ သိယာ၊
သော မေ ပုတ္တေ [ပုတ္တေ စ မေ (သီ။ သျာ။ ပီ။] ပပုတ္တေ စ, သုခါပေယျ မဟောသဓော။
အနာဂတံ ပစ္စုပ္ပန္နံ, သဗ္ဗမတ္ထမ္ပိ ပဿတိ [သဗ္ဗမတ္ထံ ဝိပဿတိ (သီ။ သျာ။ ပီ။)]၊
အနာပရာဓကမ္မန္တံ, န ဒဇ္ဇံ ဒကရက္ခိနော။
ဣဒံ သုဏာထ ပဉ္စာလာ, စူဠနေယျဿ [စူဠနီယဿ (သီ။)] ဘာသိတံ၊
ပဏ္ဍိတံ အနုရက္ခန္တော, ပါဏံ စဇတိ ဒုစ္စဇံ။
မာတု ဘရိယာယ ဘာတုစ္စ, သခိနော ဗြာဟ္မဏဿ စ၊
အတ္တနော စာပိ ပဉ္စာလော, ဆန္နံ စဇတိ ဇီဝိတံ။
ဧဝံ မဟတ္ထိကာ [ခဟိဒ္ဓိယာ (သျာ။), မဟိဒ္ဓိကာ (က။)] ပညာ, နိပုဏာ သာဓုစိန္တိနီ၊
ဒိဋ္ဌဓမ္မဟိတတ္ထာယ, သမ္ပရာယသုခါယ စာတိ။
ဒကရက္ခသဇာတကံ သတ္တမံ။
ဝိကိဏ္ဏဝါစံ အနိဂုယှ [အနိဂူဠှ (ပီ။)] မန္တံ, အသညတံ အပရိစက္ခိတာရံ [အပရိရက္ခိတာရံ (က။)]၊
ဘယံ တမနွေတိ သယံ အဗောဓံ, နာဂံ ယထာ ပဏ္ဍရကံ သုပဏ္ဏော [သုဝဏ္ဏော (က။)]။
ယော ဂုယှမန္တံ ပရိရက္ခနေယျံ, မောဟာ နရော သံသတိ ဟာသမာနော [ဘာသမာနော (ပီ။)]၊
တံ ဘိန္နမန္တံ ဘယမနွေတိ ခိပ္ပံ, နာဂံ ယထာ ပဏ္ဍရကံ သုပဏ္ဏော။
နာနုမိတ္တော ဂရုံ အတ္ထံ, ဂုယှံ ဝေဒိတုမရဟတိ၊
သုမိတ္တော စ အသမ္ဗုဒ္ဓံ, သမ္ဗုဒ္ဓံ ဝါ အနတ္ထ ဝါ။
(ဇာ၊၁၊၃၈၈။)ဝိဿာသမာပဇ္ဇိမဟံ အစေလံ [အစေလော (သီ။ ပီ။)], သမဏော အယံ သမ္မတော ဘာဝိတတ္တော၊
တဿာဟမက္ခိံ ဝိဝရိံ [ဝိဝရံ (သီ။)] ဂုယှမတ္ထံ, အတီတမတ္ထော ကပဏံ [ကပဏော (ပီ။)] ရုဒါမိ။
တဿာဟံ ပရမံ [ပုရိမံ (သီ။)] ဗြဟ္မေ ဂုယှံ, ဝါစဉှိ မံ နာသက္ခိံ [နာသက္ခိ (ပီ။)] သံယမေတုံ၊
တပ္ပက္ခတော ဟိ ဘယမာဂတံ မမံ, အတီတမတ္ထော ကပဏံ ရုဒါမိ။
ယော ဝေ နရော သုဟဒံ မညမာနော, ဂုယှမတ္ထံ သံသတိ ဒုက္ကုလီနေ၊
ဒေါသာ ဘယာ အထဝါ ရာဂရတ္တာ [ရာဂရတ္တော (သီ။ သျာ။ ပီ။)], ပလ္လတ္ထိတော [ပလ္လိတ္ထော (ပီ။), ပလ္လတ္တိတော (က။)] ဗာလော အသံသယံ သော။
တိရောက္ခဝါစော အသတံ ပဝိဋ္ဌော, ယော သင်္ဂတီသု မုဒီရေတိ ဝါကျံ၊
အာသီဝိသော ဒုမ္မုခေါတျာဟု တံ နရံ, အာရာ အာရာ [အာရာ အရာ (ပီ။)] သံယမေ တာဒိသမှာ။
အန္နံ ပါနံ ကာသိက [ကာသိကံ (ပီ။)] စန္ဒနဉ္စ, မနာပိတ္ထိယော မာလမုစ္ဆာဒနဉ္စ၊
ဩဟာယ ဂစ္ဆာမသေ သဗ္ဗကာမေ, သုပဏ္ဏ ပါဏူပဂတာဝ တျမှာ။
ကော နီဓ တိဏ္ဏံ ဂရဟံ ဥပေတိ, အသ္မိံဓ လောကေ ပါဏဘူ နာဂရာဇ၊
သမဏော သုပဏ္ဏော အထ ဝါ တွမေဝ, ကိံ ကာရဏာ ပဏ္ဍရကဂ္ဂဟီတော။
(ဇာ၊၁၊၃၈၉။)သမဏောတိ မေ သမ္မတတ္တော အဟောသိ, ပိယော စ မေ မနသာ ဘာဝိတတ္တော၊
တဿာဟမက္ခိံ ဝိဝရိံ ဂုယှမတ္ထံ, အတီတမတ္ထော ကပဏံ ရုဒါမိ။
န စတ္ထိ သတ္တော အမရော ပထဗျာ, ပညာဝိဓာ နတ္ထိ န နိန္ဒိတဗ္ဗာ၊
သစ္စေန ဓမ္မေန ဓိတိယာ [ဓိယာ (သီ။ ပီ။)] ဒမေန, အလဗ္ဘမဗျာဟရတီ နရော ဣဓ။
မာတာပိတာ ပရမာ ဗန္ဓဝါနံ, နာဿ တတိယော အနုကမ္ပကတ္ထိ၊
တေသမ္ပိ ဂုယှံ ပရမံ န သံသေ, မန္တဿ ဘေဒံ ပရိသင်္ကမာနော။
မာတာပိတာ ဘဂိနီ ဘာတရော စ, သဟာယာ ဝါ ယဿ ဟောန္တိ သပက္ခာ၊
တေသမ္ပိ ဂုယှံ ပရမံ န သံသေ, မန္တဿ ဘေဒံ ပရိသင်္ကမာနော။
ဘရိယာ စေ ပုရိသံ ဝဇ္ဇာ, ကောမာရီ ပိယဘာဏိနီ၊
ပုတ္တရူပယသူပေတာ, ဉာတိသံဃပုရက္ခတာ, တဿာပိ ဂုယှံ ပရမံ န သံသေ၊
မန္တဿ ဘေဒံ ပရိသင်္ကမာနော။
န ဂုယှမတ္ထံ [ဂုယှတ္ထံ (က။)] ဝိဝရေယျ, ရက္ခေယျ နံ ယထာ နိဓိံ၊
န ဟိ ပါတုကတော သာဓု, ဂုယှော အတ္ထော ပဇာနတာ။
ထိယာ ဂုယှံ န သံသေယျ, အမိတ္တဿ စ ပဏ္ဍိတော၊
ယော စာမိသေန သံဟီရော, ဟဒယတ္ထေနော စ ယော နရော။
ဂုယှမတ္ထံ အသမ္ဗုဒ္ဓံ, သမ္ဗောဓယတိ ယော နရော၊
မန္တဘေဒဘယာ တဿ, ဒါသဘူတော တိတိက္ခတိ။
(ဇာ၊၁၊၃၉၀။)ယာဝန္တော ပုရိသဿတ္ထံ, ဂုယှံ ဇာနန္တိ မန္တိနံ၊
တာဝန္တော တဿ ဥဗ္ဗေဂါ, တသ္မာ ဂုယှံ န ဝိဿဇေ။
ဝိဝိစ္စ ဘာသေယျ ဒိဝါ ရဟဿံ, ရတ္တိံ ဂိရံ နာတိဝေလံ ပမုဉ္စေ၊
ဥပဿုတိကာ ဟိ သုဏန္တိ မန္တံ, တသ္မာ မန္တော ခိပ္ပမုပေတိ ဘေဒံ။
ယထာပိ အဿ [အယော (သျာ။), အယ (က။)] နဂရံ မဟန္တံ, အဒွါရကံ [အာဠာရကံ (ပီ။)] အာယသံ ဘဒ္ဒသာလံ၊
သမန္တခါတာပရိခါဥပေတံ, ဧဝမ္ပိ မေ တေ ဣဓ ဂုယှမန္တာ။
ယေ ဂုယှမန္တာ အဝိကိဏ္ဏဝါစာ, ဒဠှာ သဒတ္ထေသု နရာ ဒုဇိဝှ [ဒုဇိဝှါ (သျာ။ ပီ။)]၊
အာရာ အမိတ္တာ ဗျဝဇန္တိ တေဟိ, အာသီဝိသာ ဝါ ရိဝ သတ္တုသံဃာ [သတ္တသံဃာ (သီ။ သျာ။)]။
ဟိတွာ ဃရံ ပဗ္ဗဇိတော အစေလော, နဂ္ဂေါ မုဏ္ဍော စရတိ ဃာသဟေတု၊
တမှိ [တမှီ (ပီ။)] နု ခေါ ဝိဝရိံ ဂုယှမတ္ထံ, အတ္ထာ စ ဓမ္မာ စ အပဂ္ဂတမှာ [အပါဂတမှာ (သီ။), အပဂတမှာ (သျာ။), အဝါဂတမှာ (ပီ။)]။
ကထံကရော ဟောတိ သုပဏ္ဏရာဇ, ကိံသီလော ကေန ဝတေန ဝတ္တံ၊
သမဏော စရံ ဟိတွာ မမာယိတာနိ, ကထံကရော သဂ္ဂမုပေတိ ဌာနံ။
ဟိရိယာ တိတိက္ခာယ ဒမေနုပေတော [ဒမေန ခန္တိယာ (သီ။ သျာ။ ပီ။)], အက္ကောဓနော ပေသုဏိယံ ပဟာယ၊
သမဏော စရံ ဟိတွာ မမာယိတာနိ, ဧဝံကရော သဂ္ဂမုပေတိ ဌာနံ။
(ဇာ၊၁၊၃၉၁။)မာတာဝ ပုတ္တံ တရုဏံ တနုဇ္ဇံ [တနူဇံ (သီ။)], သမ္ဖဿတာ [သမ္ပဿ တံ (သီ။ ပီ။)] သဗ္ဗဂတ္တံ ဖရေတိ၊
ဧဝမ္ပိ မေ တွံ ပါတုရဟု ဒိဇိန္ဒ, မာတာဝ ပုတ္တံ အနုကမ္ပမာနော။
ဟန္ဒဇ္ဇ တွံ မုဉ္စ [မုစ္စ (သီ။)] ဝဓာ ဒုဇိဝှ, တယော ဟိ ပုတ္တာ န ဟိ အညော အတ္ထိ၊
အန္တေဝါသီ ဒိန္နကော အတြဇော စ, ရဇ္ဇဿု [ရဇဿု (သီ။ သျာ။ ပီ။)] ပုတ္တညတရော မေ အဟောသိ။
ဣစ္စေဝ ဝါကျံ ဝိသဇ္ဇီ သုပဏ္ဏော, ဘုမျံ ပတိဋ္ဌာယ ဒိဇော ဒုဇိဝှံ၊
မုတ္တဇ္ဇ တွံ သဗ္ဗဘယာတိဝတ္တော, ထလူဒကေ ဟောဟိ မယာဘိဂုတ္တော။
အာတင်္ကိနံ ယထာ ကုသလော ဘိသက္ကော, ပိပါသိတာနံ ရဟဒေါဝ သီတော၊
ဝေသ္မံ ယထာ ဟိမသီတဋ္ဋိတာနံ [ဟိမသိသိရဋ္ဋိတာနံ (ပီ။)], ဧဝမ္ပိ တေ သရဏမဟံ ဘဝါမိ။
သန္ဓိံ ကတွာ အမိတ္တေန, အဏ္ဍဇေန ဇလာဗုဇ၊
ဝိဝရိယ ဒါဌံ သေသိ, ကုတော တံ ဘယမာဂတံ။
သင်္ကေထေဝ အမိတ္တသ္မိံ, မိတ္တသ္မိမ္ပိ န ဝိဿသေ၊
အဘယာ ဘယမုပ္ပန္နံ, အပိ မူလာနိ ကန္တတိ။
ကထံ နု ဝိဿသေ တျမှိ, ယေနာသိ ကလဟော ကတော၊
နိစ္စယတ္တေန ဌာတဗ္ဗံ, သော ဒိသဗ္ဘိ [သော ဒိသမှိ (ပီ။)] န ရဇ္ဇတိ။
ဝိဿာသယေ န စ တံ [နံ (သီ။ သျာ။ ပီ။)] ဝိဿယေယျ, အသင်္ကိတော သင်္ကိတော စ [အသင်္ကိတော စ သင်္ကိတော (သီ။ ပီ။)] ဘဝေယျ၊
တထာ တထာ ဝိညူ ပရက္ကမေယျ, ယထာ ယထာ ဘာဝံ ပရော န ဇညာ။
(ဇာ၊၁၊၃၉၂။)တေ ဒေဝဝဏ္ဏာ [ဒေဝဝဏ္ဏီ (ပီ။)] သုခုမာလရူပါ, ဥဘော သမာ သုဇယာ [သုဇယော (သီ။ သျာ။ ပီ။)] ပုညခန္ဓာ [ပုညဂန္ဓာ (ပီ။)]၊
ဥပါဂမုံ ကရမ္ပိယံ [ကာဒမ္ဗိယံ (သီ။), ကာရမ္ဗိယံ (ပီ။)] အစေလံ, မိဿီဘူတာ အဿဝါဟာဝ နာဂါ။
တတော ဟဝေ ပဏ္ဍရကော အစေလံ, သယမေဝုပါဂမ္မ ဣဒံ အဝေါစ၊
မုတ္တဇ္ဇဟံ သဗ္ဗဘယာတိဝတ္တော, န ဟိ [ဟ (ပီ။)] နူန တုယှံ မနသော ပိယမှာ။
ပိယော ဟိ မေ အာသိ သုပဏ္ဏရာဇာ, အသံသယံ ပဏ္ဍရကေန သစ္စံ၊
သော ရာဂရတ္တောဝ အကာသိမေတံ, ပါပကမ္မံ [ပါပံ ကမ္မံ (သီ။ ပီ။)] သမ္ပဇာနော န မောဟာ။
န မေ ပိယံ အပ္ပိယံ ဝါပိ ဟောတိ, သမ္ပဿတော လောကမိမံ ပရဉ္စ၊
သုသညတာနဉှိ ဝိယဉ္ဇနေန, အသညတော လောကမိမံ စရာသိ။
အရိယာဝကာသောသိ အနရိယောဝါသိ [အနရိယော စာသိ (သီ။ ပီ။)], အသညတော သညတသန္နိကာသော၊
ကဏှာဘိဇာတိကောသိ အနရိယရူပေါ, ပါပံ ဗဟုံ ဒုစ္စရိတံ အစာရိ။
အဒုဋ္ဌဿ တုဝံ ဒုဗ္ဘိ, ဒုဗ္ဘီ [ဒူဘိ, ဒူဘီ (ပီ။)] စ ပိသုဏော စသိ၊
ဧတေန သစ္စဝဇ္ဇေန, မုဒ္ဓါ တေ ဖလတု သတ္တဓာ။
တသ္မာ ဟိ မိတ္တာနံ န ဒုဗ္ဘိတဗ္ဗံ, မိတ္တဒုဗ္ဘာ [မိတ္တဒုဗ္ဘာ ဟိ (သျာ။)] ပါပိယော နတ္ထိ အညော၊
အာသိတ္တသတ္တော နိဟတော ပထဗျာ, ဣန္ဒဿ ဝါကျေန ဟိ သံဝရော ဟတောတိ။
ပဏ္ဍရနာဂရာဇဇာတကံ [ပဏ္ဍရကဇာတကံ (သီ။ သျာ။ ပီ။)] အဋ္ဌမံ။
(ဇာ၊၁၊၃၉၃။)ကာ ဝေဓမာနာ ဂိရိကန္ဒရာယံ, ဧကာ တုဝံ တိဋ္ဌသိ သံဟိတူရု [သညတူရ (သီ။ ပီ။), သဉ္စိတူရု (သျာ။)]၊
ပုဋ္ဌာသိ မေ ပါဏိပမေယျမဇ္ဈေ, အက္ခာဟိ မေ နာမဉ္စ ဗန္ဓဝေ စ။
ဩဘာသယံ ဝနံ ရမ္မံ, သီဟဗျဂ္ဃနိသေဝိတံ၊
ကာ ဝါ တွမသိ ကလျာဏိ, ကဿ ဝါ တွံ သုမဇ္ဈိမေ၊
အဘိဝါဒေမိ တံ ဘဒ္ဒေ, ဒါနဝါဟံ နမတ္ထု တေ။
ယော ပုတ္တော ကာသိရာဇဿ, သောတ္ထိသေနောတိ တံ ဝိဒူ၊
တဿာဟံ သမ္ဗုလာ ဘရိယာ, ဧဝံ ဇာနာဟိ ဒါနဝ၊
အဘိဝါဒေမိ တံ ဘန္တေ [ဘဒ္ဒန္တေ (သီ။ သျာ။)], သမ္ဗုလာဟံ နမတ္ထု တေ။
ဝေဒေဟပုတ္တော ဘဒ္ဒန္တေ, ဝနေ ဝသတိ အာတုရော၊
တမဟံ ရောဂသမ္မတ္တံ, ဧကာ ဧကံ ဥပဋ္ဌဟံ [ဥပဋ္ဌဟိံ (သီ။)]။
အဟဉ္စ ဝနမုဉ္ဆာယ, မဓုမံသံ မိဂါဗိလံ [မိဂါဝိလံ (သီ။)]၊
ယဒါ ဟရာမိ တံ ဘက္ခော, တဿ နူနဇ္ဇ နာဓတိ [နာထတိ (က။)]။
ကိံ ဝနေ ရာဇပုတ္တေန, အာတုရေန ကရိဿသိ၊
သမ္ဗုလေ ပရိစိဏ္ဏေန, အဟံ ဘတ္တာ ဘဝါမိ တေ။
သောကဋ္ဋာယ ဒုရတ္တာယ, ကိံ ရူပံ ဝိဇ္ဇတေ မမ၊
အညံ ပရိယေသ ဘဒ္ဒန္တေ, အဘိရူပတရံ မယာ။
ဧဟိမံ ဂိရိမာရုယှ, ဘရိယာ မေ [မယှံ (သီ။ သျာ။ ပီ။)] စတုဿတာ၊
တာသံ တွံ ပဝရာ ဟောဟိ, သဗ္ဗကာမသမိဒ္ဓိနီ။
နူန [နနု (သီ။ သျာ။ ပီ။ က။)] တာရကဝဏ္ဏာဘေ [ဟာဋကဝဏ္ဏာဘေ (ပီ။)], ယံ ကိဉ္စိ မနသိစ္ဆသိ၊
သဗ္ဗံ တံ ပစုရံ မယှံ, ရမssvဇ္ဇ [ရမသုဇ္ဇ (သီ။ သျာ။)] မယာ သဟ။
နော စေ တုဝံ မဟေသေယျံ, သမ္ဗုလေ ကာရယိဿသိ၊
အလံ တွံ ပါတရာသာယ, ပဏှေ [မညေ (သီ။ ပီ။)] ဘက္ခာ ဘဝိဿသိ။
(ဇာ၊၁၊၃၉၄။)တဉ္စ သတ္တဇဋော လုဒ္ဒေါ, ကဠာရော ပုရိသာဒကော၊
ဝနေ နာထံ အပဿန္တိံ, သမ္ဗုလံ အဂ္ဂဟီ ဘုဇေ။
အဓိပန္နာ ပိသာစေန, လုဒ္ဒေနာမိသစက္ခုနာ၊
သာ စ သတ္တုဝသမ္ပတ္တာ, ပတိမေဝါနုသောစတိ။
န မေ ဣဒံ တထာ ဒုက္ခံ, ယံ မံ ခါဒေယျ ရက္ခသော၊
ယဉ္စ မေ အယျပုတ္တဿ, မနော ဟေဿတိ အညထာ။
န သန္တိ ဒေဝါ ပဝသန္တိ နူန, န ဟိ နူန သန္တိ ဣဓ လောကပါလာ၊
သဟသာ ကရောန္တာနမသညတာနံ, န ဟိ နူန သန္တိ ပဋိသေဓိတာရော။
ဣတ္ထီနမေသာ ပဝရာ ယသဿိနီ, သန္တာ သမာ အဂ္ဂိရိဝုဂ္ဂတေဇာ၊
တဉ္စေ တုဝံ ရက္ခသာဒေသိ ကညံ, မုဒ္ဓါ စ ဟိ သတ္တဓာ တေ ဖလေယျ၊
မာ တွံ ဒဟီ [ဇဟီ (ပီ။)] မုဉ္စ ပတိဗ္ဗတာယ [ပတိဗ္ဗတာ သာ (သီ။), ပတိဗ္ဗတာ ယာ (ပီ။)]။
သာ စ အဿမမာဂစ္ဆိ, ပမုတ္တာ ပုရိသာဒကာ၊
နီဠံ [နိဍ္ဍံ (သျာ။ က။)] ပဠိနံ သကုဏီဝ [ဖလိနသကုဏီဝ (သီ။ သျာ။ ပီ။)], ဂတသိင်္ဂံဝ အာလယံ။
သာ တတ္ထ ပရိဒေဝေသိ, ရာဇပုတ္တီ ယသဿိနီ၊
သမ္ဗုလာ ဥတုမတ္တက္ခာ, ဝနေ နာထံ အပဿန္တီ [အပဿတီ (သီ။)]။
သမဏေ ဗြာဟ္မဏေ ဝန္ဒေ, သမ္ပန္နစရဏေ ဣသေ၊
ရာဇပုတ္တံ အပဿန္တီ, တုမှံမှိ [တုမှံ ဟိ (ပီ။)] သရဏံ ဂတာ။
ဝန္ဒေ သီဟေ စ ဗျဂ္ဃေ စ, ယေ စ အညေ ဝနေ မိဂါ၊
ရာဇပုတ္တံ အပဿန္တီ, တုမှံမှိ သရဏံ ဂတာ။
တိဏာ [တိဏ (ပီ။)] လတာနိ ဩသဓျော, ပဗ္ဗတာနိ ဝနာနိ စ၊
ရာဇပုတ္တံ အပဿန္တီ, တုမှံမှိ သရဏံ ဂတာ။
(ဇာ၊၁၊၃၉၅။)ဝန္ဒေ ဣန္ဒီဝရီသာမံ, ရတ္တိံ နက္ခတ္တမာလိနိံ၊
ရာဇပုတ္တံ အပဿန္တီ, တုမှံမှိ သရဏံ ဂတာ။
ဝန္ဒေ ဘာဂီရထိံ ဂင်္ဂံ, သဝန္တီနံ ပဋိဂ္ဂဟံ၊
ရာဇပုတ္တံ အပဿန္တီ, တုမှံမှိ သရဏံ ဂတာ။
ဝန္ဒေ အဟံ ပဗ္ဗတရာဇသေဋ္ဌံ, ဟိမဝန္တံ သိလုစ္စယံ၊
ရာဇပုတ္တံ အပဿန္တီ, တုမှံမှိ သရဏံ ဂတာ။
အတိသာယံ ဝတာဂစ္ဆိ, ရာဇပုတ္တိ ယသဿိနိ၊
ကေန နုဇ္ဇ သမာဂစ္ဆိ [သမာဂစ္ဆိ (သီ။ ပီ။)], ကော တေ ပိယတရော မယာ။
ဣဒံ ခေါဟံ တဒါဝေါစံ [တဒဝေါစံ (သီ။ သျာ။)], ဂဟိတာ တေန သတ္တုနာ၊
န မေ ဣဒံ တထာ ဒုက္ခံ, ယံ မံ ခါဒေယျ ရက္ခသော၊
ယဉ္စ မေ အယျပုတ္တဿ, မနော ဟေဿတိ အညထာ။
စောရီနံ ဗဟုဗုဒ္ဓီနံ, ယာသု သစ္စံ သုဒုလ္လဘံ၊
ထီနံ ဘာဝေါ ဒုရာဇာနော, မစ္ဆဿေဝေါဒကေ ဂတံ။
တထာ မံ သစ္စံ ပါလေတု, ပါလယိဿတိ စေ မမံ၊
ယထာဟံ နာဘိဇာနာမိ, အညံ ပိယတရံ တယာ၊
ဧတေန သစ္စဝဇ္ဇေန, ဗျာဓိ တေ ဝူပသမ္မတု။
ယေ ကုဉ္ဇရာ သတ္တသတာ ဥဠာရာ, ရက္ခန္တိ ရတ္တိန္ဒိဝမုယျုတာဝုဓာ၊
ဓနုဂ္ဂဟာနဉ္စ သတာနိ သောဠသ, ကထံဝိဓေ ပဿသိ ဘဒ္ဒေ သတ္တဝေါ။
အလင်္ကတာယော ပဒုမုတ္တရတ္တစာ, ဝိရာဂိတာ ပဿတိ ဟံသဂဂ္ဂရာ၊
တာသံ သုဏိတွာ မိတဂီတဝါဒိတံ [မိတဂီတဝါဒိနံ (ပီ။)], န ဒါနိ မေ တာတ တထာ ယထာ ပုရေ။
(ဇာ၊၁၊၃၉၆။)သုဝဏ္ဏသံကစ္စဓရာ သုဝိဂ္ဂဟာ, အလင်္ကတာ မာနုသိယစ္ဆရူပမာ၊
သေနောပိယာ [သေနူပိယာ (ပီ။)] တာတ အနိန္ဒိတင်္ဂိယော, ခတ္တိယကညာ ပဋိလောဘယန္တိ [ပဋိလာဘယန္တိ (ပီ။)] နံ။
သစေ အဟံ တာတ တထာ ယထာ ပုရေ, ပတိံ တမုဉ္ဆာယ ပုနာ ဝနေ ဘရေ၊
သမ္မာနယေ မံ န စ မံ ဝိမာနယေ, ဣတောပိ မေ တာတ တတော ဝရံ သိယာ။
ယမန္နပါနေ ဝိပုလသ္မိ ဩဟိတေ, နာရီ ဝိမဋ္ဌာဘရဏာ အလင်္ကတာ၊
သဗ္ဗင်္ဂုပေတာ [ပဉ္စင်္ဂုပေတာ (သီ။ သျာ။ ပီ။)] ပတိနော စ အပ္ပိယာ, အဗဇ္ဈ [အဝဇ္ဈ (သျာ။), အာဗဇ္ဈ (ပီ။)] တဿာ မရဏံ တတော ဝရံ။
အပိ စေ ဒလိဒ္ဒါ ကပဏာ အနာဠှိယာ, ကဋာဒုတီယာ ပတိနော စ သာ ပိယာ၊
သဗ္ဗင်္ဂုပေတာယပိ အပ္ပိယာယ, အယမေဝ သေယျာ [သေယျော (သျာ။ က။)] ကပဏာပိ ယာ ပိယာ [ကပဏာပိ ယာ (က။)]။
သုဒုလ္လဘိတ္ထီ ပုရိသဿ ယာ ဟိတာ, ဘတ္တိတ္ထိယာ ဒုလ္လဘော ယော ဟိတော စ၊
ဟိတာ စ တေ သီလဝတီ စ ဘရိယာ, ဇနိန္ဒ ဓမ္မံ စရ သမ္ဗုလာယ။
သစေ တုဝံ ဝိပုလေ လဒ္ဓဘောဂေ, ဣဿာဝတိဏ္ဏာ မရဏံ ဥပေသိ၊
အဟဉ္စ တေ ဘဒ္ဒေ ဣမာ ရာဇကညာ [ဣမာ စ ကညာ (ပီ။)], သဗ္ဗေ [သဗ္ဗေဝ (သီ။ သျာ။ ပီ။)] တေ ဝစနကရာ ဘဝါမာတိ။
သမ္ဗုလာဇာတကံ နဝမံ။
(ဇာ၊၁၊၃၉၇။)֍ * ၅၂၀။ ဂန္ဓတိန္ဒုကဇာတကံ (၁၀)
အပ္ပမာဒေါ အမတံ ပဒံ [အမတပဒံ (သီ။ ပီ။)], ပမာဒေါ မစ္စုနော ပဒံ၊
အပ္ပမတ္တာ န မီယန္တိ, ယေ ပမတ္တာ ယထာ မတာ။
မဒါ ပမာဒေါ ဇာယေထ, ပမာဒါ ဇာယတေ ခယော၊
ခယာ ပဒေါသာ [ခယာ စ ဒေါသာ (သီ။)] ဇာယန္တိ, မာ ပမာဒေါ [မာ မဒေါ (သီ။ သျာ။ ပီ။)] ဘရတူသဘ [ဘာရဓူသဘ (က။)]။
ဗဟူ ဟိ ခတ္တိယာ ဇီနာ, အတ္ထံ ရဋ္ဌံ ပမာဒိနော၊
အထောပိ ဂါမိနော ဂါမာ, အနဂါရာ အဂါရိနော။
ခတ္တိယဿ ပမတ္တဿ, ရဋ္ဌသ္မိံ ရဋ္ဌဝဍ္ဎန၊
သဗ္ဗေ ဘောဂါ ဝိနဿန္တိ, ရညော တံ ဝုစ္စတေ အဃံ။
နေသ ဓမ္မော မဟာရာဇ, အတိဝေလံ ပမဇ္ဇသိ၊
ဣဒ္ဓံ ဖီတံ ဇနပဒံ, စောရာ ဝိဒ္ဓံသယန္တိ နံ။
န တေ ပုတ္တာ ဘဝိဿန္တိ, န ဟိရညံ န ဓာနိယံ [န ဟိရညနိဓာနိယာ (က။)]၊
ရဋ္ဌေ ဝိလုပ္ပမာနမှိ, သဗ္ဗဘောဂေဟိ ဇိယျသိ။
သဗ္ဗဘောဂါ ပရိဇိဏ္ဏံ, ရာဇာနံ ဝါပိ ခတ္တိယံ [ခတ္တိယ (က။)]၊
ဉာတိမိတ္တာ သုဟဇ္ဇာ စ, န တံ မညန္တိ မာနိယံ [မန္တိယံ (သျာ။)]။
ဟတ္ထာရောဟာ အနီကဋ္ဌာ, ရထိကာ ပတ္တိကာရကာ၊
တမေဝမုပဇီဝန္တာ, န တံ မညန္တိ မာနိယံ။
အသံဝိဟိတကမ္မန္တံ, ဗာလံ ဒုမ္မန္တိမန္တိနံ၊
သိရီ ဇဟတိ ဒုမ္မေဓံ, ဇိဏ္ဏံဝ ဥရဂေါ တစံ။
သုသံဝိဟိတကမ္မန္တံ, ကာလုဋ္ဌာယိံ အတန္ဒိတံ၊
သဗ္ဗေ ဘောဂါဘိဝဍ္ဎန္တိ, ဂါဝေါ သဥသဘာမိဝ။
ဥပဿုတိံ မဟာရာဇ, ရဋ္ဌေ ဇနပဒေ စရ၊
တတ္ထ ဒိသွာ စ သုတွာ စ, တတော တံ [တွံ (က။)] ပဋိပဇ္ဇသိ။
ဧဝံ ဝေဒေတု ပဉ္စာလော, သင်္ဂါမေ သရမပ္ပိတော [သမပ္ပိတော (သီ။ ပီ။)]၊
ယထာဟမဇ္ဇ ဝေဒေမိ, ကဏ္ဋကေန သမပ္ပိတော။
(ဇာ၊၁၊၃၉၈။)ဇိဏ္ဏော ဒုဗ္ဗလစက္ခူသိ, န ရူပံ သာဓု ပဿသိ၊
ကိံ တတ္ထ ဗြဟ္မဒတ္တဿ, ယံ တံ မဂ္ဂေယျ [မဂ္ဃေယျ (ပီ။)] ကဏ္ဋကော [ကဏ္ဍကော (သီ။ သျာ။ ပီ။)]။
ဗဟွေတ္ထ ဗြဟ္မဒတ္တဿ, သောဟံ [ယောဟံ (သီ။ သျာ။ ပီ။)] မဂ္ဂသ္မိ [မဂ္ဂေါသ္မိ (ပီ။)] ဗြာဟ္မဏ၊
အရက္ခိတာ ဇာနပဒါ, အဓမ္မဗလိနာ ဟတာ။
ရတ္တိဉှိ [ရတ္တိဉ္စ (သီ။)] စောရာ ခါဒန္တိ, ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ, ဗဟု အဓမ္မိကော ဇနော။
ဧတာဒိသေ ဘယေ ဇာတေ [တာတ (သီ။ ပီ။)], ဘယဋ္ဋာ တာတ [တာဝ (သီ။ ပီ။)] မာဏဝါ၊
နိလ္လေနကာနိ ကုဗ္ဗန္တိ, ဝနေ အာဟတွ ကဏ္ဋကံ။
ကဒါဿု နာမယံ ရာဇာ, ဗြဟ္မဒတ္တော မရိဿတိ၊
ယဿ ရဋ္ဌမှိ ဇိယျန္တိ, အပ္ပတိကာ ကုမာရိကာ။
ဒုဗ္ဘာသိတဉှိ တေ ဇမ္မိ, အနတ္ထပဒကောဝိဒေ၊
ကုဟိံ ရာဇာ ကုမာရီနံ, ဘတ္တာရံ ပရိယေသတိ။
န မေ ဒုဗ္ဘာသိတံ ဗြဟ္မေ, ကောဝိဒတ္ထပဒါ အဟံ၊
အရက္ခိတာ ဇာနပဒါ, အဓမ္မဗလိနာ ဟတာ။
ရတ္တိဉှိ စောရာ ခါဒန္တိ, ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ, ဗဟု အဓမ္မိကော ဇနော၊
ဒုဇ္ဇီဝေ ဒုဗ္ဘရေ ဒါရေ, ကုတော ဘတ္တာ ကုမာရိယော။
ဧဝံ သယတု ပဉ္စာလော, သင်္ဂါမေ သတ္တိယာ ဟတော၊
ယထာယံ ကပဏော သေတိ, ဟတော ဖာလေန သာလိယော။
အဓမ္မေန တုဝံ ဇမ္မ, ဗြဟ္မဒတ္တဿ ကုဇ္ဈသိ၊
ယော တွံ သပသိ ရာဇာနံ, အပရဇ္ဈိတွာန အတ္တနော [အတ္တနာ (ပီ။)]။
ဓမ္မေန ဗြဟ္မဒတ္တဿ, အဟံ ကုဇ္ဈာမိ ဗြာဟ္မဏ၊
အရက္ခိတာ ဇာနပဒါ, အဓမ္မဗလိနာ ဟတာ။
ရတ္တိဉှိ စောရာ ခါဒန္တိ, ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ, ဗဟု အဓမ္မိကော ဇနော။
(ဇာ၊၁၊၃၉၉။)သာ နူန ပုန ရေ ပက္ကာ, ဝိကာလေ ဘတ္တမာဟရိ၊
ဘတ္တဟာရိံ အပေက္ခန္တော, ဟတော ဖာလေန သာလိယော။
ဧဝံ ဟညတု ပဉ္စာလော, သင်္ဂါမေ အသိနာ ဟတော [ဒဠှံ (ပီ။)]၊
ယထာဟမဇ္ဇ ပဟတော, ခီရဉ္စ မေ ပဝဋ္ဋိတံ။
ယံ ပသု ခီရံ ဆဍ္ဍေတိ, ပသုပါလံ ဝိဟိံသတိ [ပသုပါလဉ္စ ဟိံသတိ (သီ။), ပသု ဖာလဉ္စ ဟိံသတိ (ပီ။)]၊
ကိံ တတ္ထ ဗြဟ္မဒတ္တဿ, ယံ နော ဂရဟတေ [ဂရဟတော (ပီ။)] ဘဝံ။
ဂါရယှော ဗြဟ္မေ ပဉ္စာလော, ဗြဟ္မဒတ္တဿ ရာဇိနော၊
အရက္ခိတာ ဇာနပဒါ, အဓမ္မဗလိနာ ဟတာ။
ရတ္တိဉှိ စောရာ ခါဒန္တိ, ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ, ဗဟု အဓမ္မိကော ဇနော။
စဏ္ဍာ အဋနကာ [အဋနက (ပီ။), အကဋနာ (က။)] ဂါဝီ, ယံ ပုရေ န ဒုဟာမသေ၊
တံ ဒါနိ အဇ္ဇ ဒေါဟာမ, ခီရကာမေဟုပဒ္ဒုတာ။
ဧဝံ ကန္ဒတု ပဉ္စာလော, ဝိပုတ္တော ဝိပ္ပသုက္ခတု၊
ယထာယံ ကပဏာ ဂါဝီ, ဝိပုတ္တာ ပရိဓာဝတိ။
ယံ ပသု ပသုပါလဿ, သမ္ဘမေယျ [ပဗ္ဘမေယျ (သီ။ ပီ။)] ရဝေယျ ဝါ၊
ကော နီဓ အပရာဓတ္ထိ, ဗြဟ္မဒတ္တဿ ရာဇိနော။
အပရာဓော မဟာဗြဟ္မေ, ဗြဟ္မဒတ္တဿ ရာဇိနော၊
အရက္ခိတာ ဇာနပဒါ, အဓမ္မဗလိနာ ဟတာ။
ရတ္တိဉှိ စောရာ ခါဒန္တိ, ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ, ဗဟု အဓမ္မိကော ဇနော၊
ကထံ နော အသိကောသတ္ထာ, ခီရပါ ဟညတေ ပဇာ။
ဧဝံ ခဇ္ဇတု ပဉ္စာလော, ဟတော ယုဒ္ဓေ သပုတ္တကော၊
ယထာဟမဇ္ဇ ခဇ္ဇာမိ, ဂါမိကေဟိ [ဂါမကေဟိ (သီ။ ပီ။)] အရညဇော။
(ဇာ၊၁၊၄၀၀။)န သဗ္ဗဘူတေသု ဝိဓေန္တိ [ဝိဓန္တိ (က။)] ရက္ခံ, ရာဇာနော မဏ္ဍူက မနုဿလောကေ၊
နေတ္တာဝတာ ရာဇာ အဓမ္မစာရီ, ယံ တာဒိသံ ဇီဝမဒေယျု ဓင်္ကာ။
အဓမ္မရူပေါ ဝတ ဗြဟ္မစာရီ, အနုပ္ပိယံ ဘာသသိ ခတ္တိယဿ၊
ဝိလုပ္ပမာနာယ ပုထုပ္ပဇာယ, ပူဇေသိ ရာဇံ ပရမပ္ပမာဒံ [ရာဇံ ပရမပ္ပဝါဒံ (သီ။), ရာဇာ ပရမပ္ပဝါဒိံ (သျာ။)]။
သစေ ဣမံ ဗြဟ္မေ သုရဇ္ဇကံ သိယာ, ဖီတံ ရဋ္ဌံ မုဒိတံ [ပူရိတံ (က။)] ဝိပ္ပသန္နံ၊
ဘုတွာ ဗလိံ အဂ္ဂပိဏ္ဍဉ္စ ကာကာ, န မာဒိသံ ဇီဝမဒေယျု ဓင်္ကာတိ။
ဂန္ဓတိန္ဒုကဇာတကံ ဒသမံ။
တဿုဒ္ဒါနံ –
ကိံဆန္ဒ ကုမ္ဘ ဇယဒ္ဒိသ ဆဒ္ဒန္တ, အထ ပဏ္ဍိတသမ္ဘဝ သိရကပိ၊
ဒကရက္ခသ ပဏ္ဍရနာဂဝရော, အထ သမ္ဗုလ တိန္ဒုကဒေဝသုတောတိ။
တိံသနိပါတံ နိဋ္ဌိတံ။
ဇာတကပါဠိယာ ပဌမော ဘာဂေါ နိဋ္ဌိတော။